JW subtitle extractor

!Welkam!
Bambae yumi luk long program ya se
i impoten blong putum ol mak long wok blong prij.
Be fastaem, hemia sam long ol apdet.
Long 1 Jenuware 2024,
wan bigfala etkwek blong
7.6 magnitude i kilim sentrol Japan.
Yumi glad se i no gat wan brata o sista we i ded.
Be bitim 100 long ol haos blong olgeta i gat damej
mo i gat 2 haos we etkwek i spolem gud.
Mo tu, i gat naen Haos Kingdom we i gat damej.
Branj ofis i kwik blong faenem
wan ples blong ol brata sista
mo givim samting we oli nidim.
Mo afta, branj i stanemap wan Disasta Rilif Komiti,
mo i sanem sam brata long branj
blong visitim ol brata sista we oli kasem trabol ya.
Sam dei nomo afta long etkwek,
ol brata sista oli kasem ol rilif saplae we oli nidim.
Long Wajima Kongregesen,
ol elda oli no save kontaktem wan sista.
So wan elda i wokbaot eit aoa,
tru long ol ples we i denja blong kasem hem.
Mo yumi glad blong save se sista blong yumi i sef i stap.
Ol kongregesen long ol eria ya
oli gohed blong mekem miting,
nating se etkwek i bin kasem olgeta.
Plante pablisa oli joen wanples
blong lefleftemap tingting blong olgeta.
Yumi prea from ol brata sista long Japan
mo long ol nara kantri we oli stap fesem ol disasta.
Long 1 Jenuware,
!Visiting Senta long Patterson
i open blong mekem ol tua!
Oli stat bildim ples ya long 2021
mo oli finisim long Septemba 2023.
?Bambae yu luk wanem taem yu visitim ples ya?
!Bae yumi luk!
Visiting Senta long Patterson i gat tri musium
mo wan ples blong soem ol koin.
Nem blong faswan rum hemia
“Defending and Legally Establishing the Good News.”
I gat ekspiriens blong ol man,
woman mo ol pikinini long skul
we oli holemstrong long Jehova
nating se gavman i agensem olgeta.
Rum ya soem olsem wanem
oganaesesen blong Jehova
i halpem olgeta long ol hadtaem.
Long wan nara rum blong musium,
i gat sam koin we oli yusum
long ol faswan handred yia
mo we Baebol i tokbaot.
Bae yu luk vas we i tokbaot ol koin ya
mo samting we yu save lanem from.
Wan nara rum hemia
“All Your Sons Will Be Taught by Jehovah,”
we i soemaot olsem wanem
oganaesesen blong Jehova i yusum ol skul
blong trenem ol Witnes blong prij
mo mekem bes blong olgeta long wok blong Jehova.
Mifala i hop se bambae i leftemap tingting blong yu,
blong yu save joenem
wan long ol skul we Jehova i rerem.
Wan nara rum we i spesel
hemia “Bible Village” long taem blong Jisas.
Ol “man blong vilej” ya bambae oli welkamem yu
mo bae oli soem fasin blong olgeta
blong laef olsem wan komuniti.
Bae yu lanem fasin blong laef blong Jisas
taem hem i stap long wol.
Bae yu pas long ol eria blong agrikalja,
maket ples, ol haos, wan sinagog
mo tu, wan fising bot.
Bambae yu lanem plante moa samting long Baebol
long ol niufala musium ya
mo bae i mekem se yu tinghae moa
long oganaesesen blong Jehova.
!Mifala i welkamem yu mo evriwan we oli naf
blong kam long Visiting Senta long Patterson!
!Visiting Senta long Patterson i naes tumas!
Tangkiu long evriwan we oli wok long projek ya.
Mifala i wantem invaetem yu
blong kam visitim ples ya.
Yu save bukum wan tua long jw.org.
Naoia bae yumi tokbaot
niufala jenis ya blong givim ripot
mo olsem wanem yumi save
kamgud moa long wok blong prij.
Long laswan anuel miting,
oli talem se stat long laswan Novemba,
bae yumi no moa nid blong
raetem ol aoa long ripot blong prij.
Hemia i wan bigfala jenis ya, ?yu agri?
Nao, nating se yumi jenisim
fasin blong yumi blong givim ripot,
be yumi no jenisim tingting blong yumi blong prij.
Yumi tingbaot yet ol man.
Yumi lavem olgeta,
mo yumi wantem halpem olgeta.
Yumi rere blong serem gud nius
taem yumi faenem olgeta.
Long sarede moning,
maet yumi spenem sam aoa long ol haos wanwan.
Be afta, yumi mas go long stoa.
?So, hemia i min se “saye yumi finis nao”,
from we yumi no moa stap prij long ol haos wanwan?
No, yumi no tingting olsem.
Nating se yumi go long stoa,
yumi gohed yet blong faenem man
mo talemaot gud nius long olgeta.
Maet yumi storian wetem wan we i stanap klosap
taem yumi go blong pem samting
o maet yumi storian wetem man we i wok long stoa.
Yu save talem ol isi tok nomo,
olsem “halo” o sam nara naes tok olsem,
mo afta maet yu save soem wan kontak kad mo se:
“Hemia wan websaet we i nambawan.
I gat ol intresting haf insaed we i stap
long bitim 1,000 lanwis.”
O maet afta we yutufala i toktok smol,
yu save lego wan traket.
Sipos i gat naf taem mo man i intres,
yu save gohed storian.
Hemia sem samting we yumi save mekem
taem yumi wet long hospital,
epot, maket o long ples blong stopem bas.
Hemia wan tingting:
Maet yu save putum sam kontak kad
long basket o poket blong yu
taem yu aot i go samples.
Yes yumi wantem rere blong talemaot gud nius
long eniples we yumi faenem man.
?Be olsem wanem long ol man
we yumi no faenem olgeta long haos?
?Samtaem yu pasem wan haos finis,
maet long wan sarede o sande aftenun
mo yu makem se i gat man i stap insaed long haos ya?
Mo yu tingbaot se,
‘be haos ya nao mi stap pas long hem
long ol moning, be i no gat man.’
Maet sam man long haos ya
bae oli wantem stadi Baebol
sipos yumi askem olgeta.
Lav we yumi gat long ol man
bae i pulum yumi blong go prij long olgeta.
Mi tingbaot ya, wan taem,
taem mifala i stap go blong kakae
long wan restoron wetem wan kapol,
mifala i draev pasem wan haos.
Mo brata we i stap draev i luksave haos ya,
ale hem i stop, i saedem trak mo i se:
“Sore be, mi luk wan trak insaed long yad ya.
Mifala i traehad plante wik
blong kasem man ya long haos.
Wet smol ah.”
Ale hem mo waef blong hem oli go prij long man ya.
!Naes tumas!
Wan nara rod blong kamgud moa taem yumi prij,
hemia blong mekem ol visit.
Maet wan man i storian gud wetem yu long troli
mo i askem yu blong go visitim hem.
Man ya i laef long teritori blong yu,
mo yu agri blong visitim hem.
Ale sarede moning, yu go long haos blong hem,
?mo wanem i hapen?
Yu save finis: Man ya i no stap long haos.
?Bae yu mekem wanem nao?
?Bae yu se, “!Oh be mi traem, be hem i no stap!”?
!Nogat!
Man ya i bin soem intres ya,
so bae yumi gohed blong gobak bakegen
kasem we yumi faenem hem.
Nating se yumi no moa fulumap ol aoa
long ripot blong prij,
be yumi save putum sam mak yet blong kamgud moa.
Olsem blong kamgud long fasin blong lesin gud
taem man blo haos i toktok long yumi
o soem long hem se yumi kea long hem.
O maet yumi traem finisim gud ol teritori blong yumi.
Taem yumi wanwan i putum ol mak olsem,
yumi stap folem advaes long Galesia 6:4.
Yu save folem vas ya long skrin taem mi ridim.
Pol i se:
“I gud man i jekem wok we hem nomo i mekem,
blong faenemaot se wok ya i olsem wanem.
Olsem nao,
hem i save glad from wok we hem nomo i mekem,
be i no from we hem i skelem wok blong hem
wetem wok blong narafala.”
Ol mak we yumi wanwan i putum
i save givhan long yumi
blong stap bisi long impoten wok ya.
Traem harem samting
we sam brata sista oli talem
long saed blong ol niufala jenis
mo olsem wanem oli kamgud moa
long wok blong prij.
Mi glad long ol niufala jenis ya,
mi save enjoem moa wok blong prij
mo mekem disaepol.
Blong talem stret, mi laekem tumas.
Mi harem olsem se niufala jenis ya blong ripot
i halpem mi blong no wari tumas se
mi mas makem taem blong stat
mo taem we mi finis.
Mi harem se mi stap prij oltaem nomo.
Faswan samting we mi jenisim,
hemia program blong mi,
from mi wantem prij long eni man we mi mitim.
Bifo, long wok blong prij,
mi wantem se ol man oli lesin long mi,
be naoia, mi wantem lesin long olgeta.
Mi no moa wari long hamas buk
mo magasin we mi mas givim.
Naoia mi luk se i impoten blong
tekem evri janis blong toktok long ol man
wetem tingting ya blong prij long olgeta.
Bifo, mi glad tumas taem mi mas givim wan samting
we i stap long basket blong mi,
be naoia mi glad moa blong soem
long olgeta se mi kea long olgeta.
Jenis ya i halpem mi blong
tingbaot samting we i moa impoten,
hemia blong mekem disaepol.
Mi laekem niufala fasin blong prij
from mi no moa nid blong tingbaot ol fastok blong mi.
Naoia, mi save storian gud moa wetem olgeta
mo enjoem ol topik we mifala i tokbaot long Baebol.
Samting we i moa impoten,
hemia lav we yumi gat long ol man,
be i no hamas buk we yumi givim
o hamas aoa we yumi kasem.
Mifala i makem se ol brata sista
long eria blong mifala
oli glad tumas long niufala fasin ya
blong prij long ol man.
Bifo yumi fokas moa long wan plan,
wan topik afta wan vas,
be naoia yumi storian nomo.
Bifo mi stap wari long samting we bae mi talem
o olsem wanem bae mi joenem
storian i go long Baebol.
Be naoia, mi luksave se
samting we i moa impoten
hemia blong soemaot long man
se mi rili kea long hem.
So Jisas i statem storian
wetem wan woman long wel,
mi tu mi wantem storian
wetem ol man we oli gat dog.
Bae mi askem sipos
mi save holem dog blong olgeta,
sloslo mifala i stat blong
storian olsem nomo,
ale biaen, mi naf blong givim
wan kad we i tokbaot trutok.
Mo samtaem taem oli go,
mi luk se oli stap skanem kad
wetem fon blong olgeta
mo mi save wantaem se
oli stap go long websaet blong yumi.
Long kongregesen blong mi,
mifala i kamgud moa blong
makemgud samting we man intres long hem
mo afta statem wan topik folem intres blong olgeta.
Mi mi wan man blong sem ya,
be taem mi luk we long niufala rod blong prij i talem se,
‘Yu no mas toktok tumas’,
mi mi haremgud we, mi se: ‘!Yes!
Hemia nao samting we mi save mekem.’
Mi glad tumas.
Mi harem se mi rilaks moa from se
mak blong yumi i blong statem storian.
So mi wantem rerem wan topik we i laenap
wetem nid blong ol man long teritori.
Mi rili glad long niufala jenis ya
from i leftemap tingting blong yumi
blong tekem evri janis
blong talemaot gud nius blong Kingdom.
Nating se i no isi long mi blong toktok long man,
be oltaem mi luk se Jehova
mo oganaesesen blong hem
i givim samting we mi nidim.
Mi hop se i no longtaem bae mi save
kasem mak ya blong fultaem paenia.
Yes hemia i mekem se
yumi wantem mekem moa long wok blong prij
so yumi wantem tumas blong halpem ol man
blong oli save Jehova.
Mi luk se plante long kongregesen
oli glad from wok blong paenia.
Mi wantem glad sem mak olsem olgeta
so long manis ya,
mi statem wok blong fultaem paenia.
Mi mo hasban blong mi i wantem
go long Skul blong Kingdom Ivanjelis,
from mitufala i wantem kamgud moa long ol rod
blong lavem ol man long wok blong prij.
Mi wantem tumas blong kam wan fultaem paenia,
afta bae mi go long SKI,
mo afta bae mi go long eniples
we oli sanem mi i go long hem.
Mi save se bae mi gat wan gudtaem.
!I nambawan!
Mi mas tingbaot moa ol man long teritori,
hemia nao samting we i moa impoten.
Ol brata mo sista,
!mifala i lavem yufala from evri samting
we yufala i naf blong mekem!
Jisas i talem long Jon 14:15 se:
“Sipos yufala i lavem mi,
bambae yufala i folem ol komanmen blong mi.”
Yes yumi lavem Jisas,
mo yumi lavem ol man,
so yumi glad nomo blong obei
long komanmen blong Jisas
blong “go prij.”
Long Wol Hedkwota
blong Ol Witnes blong Jehova,
hemia hem i JW Brodkasting.

2024 Hed Kampani Apdet #1