JW subtitle extractor

!Welkam long apdet blong yumi!
Bae yumi tokbaot sam vas blong Baebol
we i save givhan long yumi
blong jusumgud klos mo hea blong yumi.
Be fastaem,
hemia apdet blong ol rilif wok
wetem sam disasta we i jes hapen.
Long Saot Is Afrika,
sam kantri olsem Malawi,
Mosambik mo Simbabwe
oli fesem hadtaem from i nogat naf wota.
Branj ofis blong Simbabwe i talem se
samples 13,500 pablisa olsem long kantri ya,
oli nidim help blong
kasem ol men samting blong laef.
Mo tu, bigfala ren mo flad
i spolem gud haos
blong sam brata sista long Malawi
wetem kakae blong olgeta we oli bin hivimap.
Long en blong manis Eprel,
Brata Gage i go leftemap tingting
blong ol brata sista
long Malawi mo Simbabwe.
Blong givhan long ol rilif wok ya,
Hed Kampani i sanem mane
blong givhan long ol brata sista,
blong oli save kasem ol kakae we oli nidim
olsem kon, bin, drae fis mo kuking oel.
Long Japan,
strong etkwek blong 7.6 magnitude
long manis Jenuware,
i damajem bitim 600 haos blong ol brata sista
mo i distroem gud 8 haos blong olgeta.
Mo i gat 13 Haos Kingdom we i gat damej.
Kasem naoia,
gavman i stap givhan
long ol komuniti blong riperem ol samting.
Mo branj ofis i wok strong blong bildim
mo riperem haos blong ol brata mo sista.
Wan strong etkwek we i no bin kasem
Taiwan blong 25 yia,
i kilim olgeta long 3 Eprel.
From samting ya, i gat woning
blong tsunami long Japan mo Filipin.
Yumi glad se i no gat wan brata o sista
i ded long disasta ya.
Haos blong olgeta tu i no gat bigfala damej.
Be 20 Haos Kingdom
mo translesen ofis blong Amis lanwis
i kasem smol damej,
mo ol brata oli stap wok long hem naoia.
Nating se ol disasta ya oli stap spolem plante ples,
be ol brata sista oli kwik
blong volontia mo givhan long rilif wok.
Mo mifala i talem tangkiu long yufala
from ol prea blong yufala
mo ol presen mane we yufala i givim
blong sapotem ol rilif wok ya.
I no longtaem,
wan niufala video bambae i kamaot
long JW Laebri app.
Video ya i tokbaot wan hanraet blong Baebol
we ol man oli ting se i lus finis.
Hanraet ya i wan Inglis translesen
blong Grik Haf blong Baebol
we nem blong Jehova
i stap long hem bitim 200 taem.
Bae yumi wajem smol haf blong video ya
Oli Faenem Bakegen
Wan Baebol Translesen We i Bin Lus.
Long ol yia 1700,
ol man blong politik mo ol lida blong jej
oli no glad nating long wok blong translesen.
I wan taem we yu mas lukaot
long ol tok we yu talem long ol narafala.
Ol man we oli gat paoa long taem ya,
oli no glad nating long traehad blong hem
blong lanem trutok.
Sipos yu bilif se Baebol i wan buk we i tabu,
bambae yu no glad taem yu makem se
i gat ol mastik insaed
long translesen blong Baebol.
Wok blong mifala i no blong stap kwaet
mo ting se i olsem nao,
nogat, mifala i askem ol kwestin.
Hemia i translesen blong ol man blong stadi
we oli savegud lanwis Hibru mo Grik.
Mifala i ting se translesen projek ya i lus
long taem blong bigfala faet.
I nambawan tumas,
mo i gud we plante moa man
oli save long saed ya.
!Mifala i sua se
bae yufala i enjoem fulwan video
long saed blong Baebol ya
we oli faenem bakegen!
Lastaem,
yumi bin gat apdet long saed blong klos mo hea.
Yumi tokbaot mustas blong ol brata,
traosis we i blong ol sista,
fasin blong werem kot
o nektaem blong ol brata.
Yumi glad se Jehova i trastem
jus blong yumi long saed ya.
Be i gat sam kwestin i kamaot from.
Fastaem,
?Ol jenis ya i min se
naoia yumi no moa tinghae
long klos mo hea blong yumi olsem bifo?
!No, nogat!
Jehova i wantem se
yumi wosipim hem wetem respek mo ona.
Ol jenis ya i no min se
bae yumi no moa soem respek
long wok we yumi mekem blong Jehova.
Be yumi luksave se stael blong klos mo hea
i stap jenis long ol taem we i pas
mo ol man oli akseptem ol jenis long ol klos
we oli stret mo oli soem respek.
Eksampol,
?yu tingbaot ol pija ya we i kamaot
long 2023 Hed Kampani Apdet #8?
Yumi no stap tingbaot se
bae yumi mas werem ol klos
we i sem mak olsem ol man long Baebol bifo,
o werem klos olsem ol man
we oli laef long ol yia 100.
Taem i jenis.
Tingting blong man long saed blong klos mo hea
we i stret mo i soem respek, i jenis.
Mo hemia nao risen from wanem
i bin gat wan apdet long saed ya.
Wan narafala kwestin we i kamaot, hemia se,
?Olsem wanem blong meksua se
desisen blong yumi long saed blong mustas,
o traosis blong ol woman,
i stret long wosip blong yumi?
I tru,
i gat plante defren stael
long saed blong fasin blong werem klos mo hea.
Be hemia tri stamba trutok blong Baebol,
we yufala i save finis,
mo from yufala i lavem Jehova,
i sua se yufala i tinghae long ol trutok ya.
?So olsem wanem ol trutok ya
oli save halpem yumi blong mekem ol desisen
long saed blong klos mo hea?
Bae yumi luk faswan
long 1 Timoti 2:9, 10. I se:
“Taem ol woman oli flasem olgeta,
oli mas putum ol klos we i stret nomo,
mo oli mas soemaot se oli gat respek
mo stret tingting.
. . . Oli mas flasem olgeta
long fasin we i stret long ol woman
we oli stap talem se oli wosipim God.
Oli mas mekem ol gudfala wok
mo hemia nao i flasem gud olgeta.”
So folem ol vas we yumi jes ridim,
?yumi mas jusum klos mo hea olsem wanem?
Long man long wol oli jusum klos
we olgeta nomo oli harem gud long hem.
Be yumi ol Kristin,
yumi mas tingbaot tu se
!‘yumi stap talem se yumi wosipim God’!
From samting ya,
yumi wantem se klos mo hea blong yumi
i givim glori long Jehova.
So yumi jusum ol stael we i stret nomo,
yumi soem respek mo gat stret tingting,
speseli taem yumi stap go long Haos Kingdom
o long wok blong prij.
Ol stadi not blong vas ya
oli eksplenem sam long ol tok ya we yumi jes ridim.
Bae yumi stat wetem tok ya
ol klos we i “stret nomo”
“Grik tok we oli yusum long tok ya ‘stret nomo’
long saed blong ol klos,
i minim ol klos we ol narafala oli ting i stret
mo i soem respek.
Olgeta we oli talem se
oli wantem mekem wok blong God,
oli mas werem ol klos we ol narafala oli respeketem.
Sipos ol klos we yumi werem oli taet
o i soemaot bodi blong yumi,
?hemia i stret nomo?
?Hemia i stret nomo blong werem
blong wosipim Jehova?
Mi sua se yufala i agri se i no stret olsem.
I min se yumi mas tingting gud
long ol klos we yumi wantem werem,
speseli taem yumi wantem wosipim Jehova.
?Yu ting se i stret nomo,
blong werem ol klos blong spel o klos blong haos,
taem yumi wosipim Jehova long miting
mo wok blong prij?
Nogat. Hemia i no stret olsem.
Bae yu agri ?ah?
se oltaem yumi wantem werem klos we i stret
long ples we yumi wantem go long hem.
Eksampol,
bae yumi werem klos blong swimswim,
sipos yumi wantem go long solwota.
O taem yumi go long wan mared,
yumi werem klos we i stret blong wan mared.
Sem mak, ol klos we yumi werem
blong go long Haos Kingdom mo wok blong prij,
oli mas stret blong wosip.
?Yu makem poen?
Nating se stael blong klos i stap jenis,
be i gud yumi luksave se
ol klos we yumi jusum blong werem,
oli mas stret nomo
long ples we yumi go long hem.
Hemia nao poen we yumi wantem tingbaot.
Bae yumi luk nekis wan tok.
Vas i se, “Oli mas soemaot se oli gat respek.”
Stadi not i se:
“Yumi jus blong werem klos we i soemaot respek,
i no from we yumi tingbaot yumi wan,
be from we yumi tingbaot
tingting mo filing blong narafala.
Wan Kristin olsem bambae i no werem klos
we i pulum narafala blong wantem lukluk hem nomo,
o i werem klos we i mekem ol narafala oli stambol.”
So taem yumi jusum klos mo hea,
yumi mas tingbaot tingting mo filing
blong ol brata mo sista,
mo ol man long komuniti.
Mo i tru,
sipos klos mo hea blong yumi
i narakaen mo i bitim mak,
hemia i soemaot se yumi no gat respek.
Yumi no wantem blong pulum narafala
blong lukluk yumi nomo
from ol klos mo hea stael we yumi jusum.
Yumi wantem se evriwan
i lukluk i go long Jehova nomo
mo long mesej blong Kingdom.
Ale yumi go long nekis wan tok.
Vas i tokbaot fasin ya “stret tingting.”
Stadi not i se:
“Fasin ya i minim se yumi mekem
ol waes desisen o yumi tingting gud.”
I min se, bae yumi lukaot se
lukluk blong yumi i no olbaot.
Eksampol.
Tingbaot se yu kasem invetesen
blong mit wetem ol haeman blong gavman.
?Bae yu werem wanem?
?Bae yu werem klos blong slip
o klos blong swimswim long solwota?
!No, nogat!
Yumi wantem werem klos
we i soem respek long miting ya
mo long ol man we oli stap long miting ya.
So long fored blong Jehova,
!i moa impoten blong lukaot gud,
speseli taem yumi wosipim hem!
Namba tu stamba trutok we bae yumi luk,
i stap long 2 Korin 6:3, 4:
“Mifala i no wantem we ol man oli faenem poen
long minista wok blong mifala. . . .
Long olgeta samting we mifala i mekem,
mifala i soemaot se mifala i minista blong God.”
?So i gud blong tingbaot se klos mo hea blong yumi,
i save pulum narafala blong gat wanem tingting
long Jehova mo wok blong prij?
Blong talem stret,
klos mo hea blong yumi,
i save pulum narafala blong jus se
bae oli wantem lesin o no.
So i gud blong askem se:
?Sipos mi jenis olsem long teritori blong mi,
bae ol man oli luk mi
olsem minista blong God o nogat?
?Bambae oli naf blong luksave
se ol man blong Jehova
oli defren olgeta long ol narafala man?
Naoia traem luk namba tri stamba trutok
long 1 Jon 2:15-17:
“Yufala i no mas lavem wol
mo ol samting we oli stap long hem.
Sipos man i lavem wol,
hem i no lavem Papa,
from we evri samting we oli stap long wol,
olsem ol samting we bodi i wantem,
mo ol samting we ae i wantem,
mo fasin ya we man i flas . . . ,
oli no kamaot long Papa,
be oli kamaot long wol.
Mo tu, wol ya wetem evri samting blong hem . . . ,
oli stap lus.
Be man we i mekem wil blong God,
hem i no save lus samtaem.”
So long ol vas ya,
yumi lanem se ol klos mo hea blong yumi,
oli no mas soemaot se yumi lavem wol ya.
Ol stael oli stap jenis long ol yia,
mo i gat plante defren kaen stael
we ol man oli ting se i oraet mo oli akseptem.
Ol buk blong yumi oli stap talem se,
“yumi no mas faswan blong folem ol niufala stael
o laswan blong lego ol olfala stael.”
Yumi save se i gat plante stael long wol ya
we yumi no wantem nating blong folem,
speseli sipos oli no soem respek,
oli bitim mak mo oli olbaot nomo.
Mo blong talem stret,
yumi no jes wantem blong tingbaot
stael blong klos nomo,
be yumi wantem tu se i stret mo i soem respek.
Yumi neva wantem soemaot se
yumi no respektem Jehova
mo ol tabu fasin blong hem.
So hemia nao tri stamba trutok blong Baebol,
we i save givhan blong jusumgud klos blong yumi.
Mo yes, ol advaes ya
oli stret tu long ol hea, mustas
mo evri samting we yumi jusum long saed ya.
I givhan blong jusum stael
mo longfala blong hea blong yumi.
Ol brata oli tingting gud long ol advaes ya,
blong oli save lukaot gud
mustas blong olgeta blong i luk naes.
Yumi glad tumas
from we Jehova
i givim ol stamba trutok ya long yumi.
Taswe i gud yumi lukluk olgeta bakegen
folem ol jenis we i jes kamaot.
?Wanem wan moa samting
we yu save mekem?
Prea long Jehova.
Askem hem blong halpem yu
blong yu jekem yu wan long saed ya.
Askem wan fren we i bigman long spirit
blong halpem yu long saed ya.
Mo ol hed blong famle,
givhan long waef mo pikinini blong yu
blong folem ol stamba trutok ya blong Baebol.
Ol brata mo sista,
mifala i lavem
mo respektem yufala bigwan.
Long Wol Hedkwota
blong Ol Witnes blong Jehova,
hemia hem i JW Brodkasting.

2024 Hed Kampani Apdet #3