JW subtitle extractor

!Welkam!
Long program ya,
bae mifala i apdetem yufala
long situesen blong ol
brata sista raon long wol
we oli stap long kalabus from bilif blong olgeta.
Be fastaem, hemia wan apdet
blong ol bigfala asembli long yia ya.
Long samples long wol,
bigfala asembli ya
“!Talemaot Gud Nius!” i stap gohed.
Hem i wan naesfala program.
Traem harem tingting blong samfala.
Plante long ol brata mo sista
oli mekem sam bigfala traehad
blong sapotem gud asembli ya.
Mi mi askem bos
blong mi spel long taem ya.
Mifala tu i askem skul
blong spel long taem ya.
Mifala i wekap eli moning.
Evri traehad we yu mekem
i no blong nating.
I wan nambawan privilej
blong stap long ples ya.
Mifala i mitim ol brata sista
we mifala i no luk longtaem.
Mo tu, yu mitim ol brata sista,
oli hagem yu gogo.
Mi laekem tumas.
Mi save hagem narafala.
Be long intanet, nogat nomo.
I defren olgeta taem yu stap long ples ya
i bitim we yu wajem long intanet.
I rili gat bigfala paoa.
Mi laekem tumas ol singsing.
I gat bigfala paoa mo glad
taem evriwan oli singsing tugeta.
Hemia i mekem mifala i strong
mo i leftemap tingting.
Mo tu, i nambawan tumas
blong luk Episod 1
blong Gud Nius Blong Jisas.
Nekis taem we mi mekem Baebol riding blong mi,
mi save pijarem ol stori ya blong i givhan long mi
Samting we mi laekem tumas hemia se
bifo taem we mi ridim ol vas ya
i no tajem hat blong mi tumas,
mi no krae nomo.
Be tede, video ya i tajem hat blong mi, mo mi krae.
Yu harem se yu stap long taem ya.
Ol lafet ya long saed blong spirit
oli givim bigfala paoa long yumi.
Ating bae mi save joenem
asembli ya tri o fo taem bakegen.
Mi luk se i nogat wan narafala ples
i moagud i bitim blong stap
wetem ol man blong Jehova.
Evritaem mi stap tingbaot se
i wan blesing blong stap
long bigfala famle blong Jehova.
!Mifala i glad tumas blong stap
wetem ol brata mo sista!
Yu no wantem mestem nating.
Mifala i leftemap tingting yufala evriwan
blong go long bigfala asembli ya.
Bambae yu haremgud tumas long program ya
mo bambae ol kampani blong ol brata sista
i leftemap tingting blong yu
mo maet yu mitim samfala
we yu no bin luk olgeta longtaem.
Be mifala i kasemsave se
samfala we oli olfala o we oli sik
bae oli save wajem program ya tru long intanet.
Long yia ya,
yumi glad tumas
from we bae i gat 15 spesel asembli raon long wol.
Faswan i bin kamaot long Jun 7-9
long aelan blong Gwadelup.
Brata Jeffrey Winder mo Clive Martin
i bin gat privilej ya blong joen long asembli ya.
I bin gat ol deleget we oli bin
kamaot long 11 defren kantri,
mo namba blong ol man
we oli bin kam, hem i 8,602.
Long Sarede, 74 oli tekem baptaes.
!Yumi glad tumas blong luk olsem wanem
ol brata mo sista raon long wol
oli lavlavem olgeta mo oli joengud!
Naoia, bambae yumi tokbaot
situesen blong ol brata
mo sista blong yumi
we oli stap long kalabus
from bilif blong olgeta.
Hemia bae i halpem yumi
blong folem ol advaes long Hibru 13:3,
we i talem se:
“Yufala i mas gohed blong tingbaot
olgeta we oli stap long kalabus,
olsem we yufala tu
i stap kalabus wetem olgeta
. . . , from we yufala i stap
long sem bodi wetem olgeta.”
Stat long Jun 17,
i gat bitim 199 brata sista
we oli stap long kalabus
from bilif blong olgeta.
?Oli stap wea?
I gat 9 i stap long Crimea,
39 long Eritrea,
8 long Singapo,
mo bitim 17 long ol narafala kantri.
Be bigfala namba blong ol
brata sista we oli stap long kalabus,
hemia Rasia,
we i gat 126 long olgeta.
?Be olsem wanem long Saot Koria?
Nating se oli no moa
putum ol brata blong yumi
we oli stap long kantri ya long kalabus
be yet oli mas mekem
sam narafala strong wok.
Ol brata ya oli mas wok blong tri yia
mo oli mas laef mo wok
insaed nomo long ol kalabus
I no longtaem i pas,
Brata Mark Sanderson i visitim tu grup
blong ol brata ya we oli stap
mekem wok long kalabus.
Yumi hop se situesen ya
i kamgud moa long fiuja.
Mo yumi gohed blong prea
from ol gudfala brata ya
mo ol famle blong olgeta.
Samtaem yumi gat tingting se
ol brata nomo oli stap
long kalabus raon long wol.
Be i gat 12 sista long Eritrea tu
we oli stap long kalabus
from bilif blong olgeta.
Mo i gat 8 sista long Rasia
we oli stap long kalabus
from bilif blong olgeta.
Yumi mas gohed blong prea
from ol gudfala sista ya blong yumi.
Mo tu, plante brata mo sista
oli mas stap longtaem long kalabus
mo samtaem oli stap kilim nogud olgeta.
Hemia nao samting we i hapen long
Brata Rinat Kiramov long Rasia.
Long Eprel 2024,
sam nara prisena oli traem fosem brata ya
blong talemaot nem blong
ol nara Witnes blong Jehova.
!Be from strong tingting,
hem i no talemaot!
Nao oli faetem nogud hem blong fo dei,
mo oli yusum wan lektrik tul blong jokem hem.
Yumi gohed blong prea from Brata Kiramov
mo ol 199 brata sista
we oli stap long kalabus
from bilif blong olgeta.
Mo yumi no fogetem famle blong olgeta tu.
Strong bilif blong ol brata mo
sista blong yumi long kalabus
i mekem yumi tingbaot
ol tok long Rom 12:21:
“Yu no mas letem
ol rabis samting oli winim yu,
be yu mas gohed blong
mekem ol gudfala samting
blong winim ol rabis samting.”
Yes oli stanap strong long plante trabol
we i traem bilif blong olgeta.
Be oli no letem ol samting ya i winim olgeta.
Be, oli “gohed blong
mekem ol gudfala samting
blong winim ol rabis samting.”
Yumi lavem mo respektem
ol gudfala brata sista ya
Nating se ol brata mo sista
oli fesem ol hadtaem
be oli gat ol nambawan janis
blong talemaot gud nius.
Hemia nao samting we i hapen
long plante Witnes long
taon blong Birobidzhan,
long Rasia, long 2018.
Ol polis oli brekin long 22 haos,
long 1 dei nomo.
Taem yu wajem video ya,
makem olsem wanem ol brata mo sista
oli givim wan gudfala witnes
mo holemtaet glad.
?Olsem wanem oli ‘gohed blong mekem
gudfala samting blong winim rabis samting’?
Long Mei 17, 2018,
long eli moning mifala i wekap
from wan man i kilim strong doa blong mifala.
Mi stanap long doa
mo askem se, “?Hu ya?”
Oli se, “Ol polis ya.”
Blong talem stret, mifala i fraet we.
Wantaem nomo,
mifala i stat blong prea long Jehova.
Biaen, mifala i faenemaot se
nem blong operesen ya hemia Jajmen Dei
mo i gat samples 150 polis
we i joen long wok ya.
Taem gavman i faelem
wan kriminol kes agensem mi,
oli blokem ol bank akaon blong mi.
Taem mi go long ol bank
ol staf blong bank
oli jikim nogud mi mo oli se,
“O, smol teroris blong yumi i kam”
mo oli smael long mi.
Wan taem mi ringim wan taksi
blong go long ofis blong
polis blong oli kwestinim mi.
Mo taksi draeva i askem se:
“?Wanem ples ya?
?Yu stap go wea?”
Mi se, “Mi go long ofis blong polis.”
Hem i askem se, “?Yu go wok?”
Mi se, “No, mi go blong
oli kwestinim mi nomo.”
Hem i no save bilivim.
Hem i konfius we.
Mi gat janis blong talem
se mi wan Witnes blong Jehova
mo oli faelem wan kriminol kes
agensem mi from bilif blong mi.
Sam dei afta,
mi gobak long ofis blong polis
mo mi ringim wan narafala taksi.
Mi sapraes tumas taem mi luk we
sem taksi draeva ya i pikimap mi.
Mo naoia mi gat janis blong storian wetem hem
long ol profet tok blong Baebol
we i joengud long situesen ya,
mo mitufala i gat wan gudfala storian.
Taem mifala i go long polis
blong oli kwestinim mifala,
mifala i wantem soemaot long olgeta
tru long ol gudfala fasin mo toktok blong mifala
se mifala i no ol kriminol,
ol Witnes blong Jehova oli ol gudfala man.
Mo afta mifala i mekem ol kad blong olgeta.
Mo mifala i traem blong talem
ol naes samting long evriwan.
Mo tokbaot ol gudfala fasin blong olgeta.
Loea blong mifala i wari mo hem i se:
“Mi luk se yufala ol gudfala man,
mo ol man olsem yufala
i no sud go long kalabus.
Mi sua se bae God blong
yufala i halpem yufala
be, plis, Artur,
gohed blong mekem olsem.
Holemstrong go kasem en.”
Taem kes blong mifala i stat,
mifala fo sista i stanap
long fored blong semfala jaj.
Mo hem i no laekem mifala nating.
Hem i no letem mifala i toktok,
hem i se mifala i no skulgud,
mo hem i tok daonem mifala.
Afta mifala i stap tingting se
‘Jehova i putum mifala
long ples ya blong prij ya,
?be hao nao mifala i save prij
sipos hem i no letem mifala i toktok?’
Mifala i prea long Jehova
blong mekem hat blong hem i sofsof
olsem nao mifala i save prij long hem.
Mifala i traehad tu blong kaen long hem
mo talem halo long hem oltaem.
Mi traehad blong soemaot kaen fasin
long voes blong mi, ol toktok, mo fes blong mi.
Be afta, wan samting i hapen.
Ol samting oli jenis bigwan.
Hem i stat blong lesin
mo talem halo long mifala.
Taem mifala i stap wajem ol video
rikoding blong mifala long kot,
jaj i stap tekem not.
Mo afta hem i askem se,
“?Hem i stap ridim long wea ya?”
Fastaem mi fraet mo mi no tingbaot.
Mo mi se, “Long Baebol.”
Be afta hem i se, “Mi save.
?Be weples stret long Baebol?”
Nao mi se, “Long Job.”
Hem i se, “?Wanem?”
Mi se, “Job.”
Nao hem i askem bakegen se, “?Wanem?”
Ale Loea blong mi se, “Job.”
Mo hem i se, “O, Job”
mo hem i raetem daon.
Mo mi ademap se, “42:10.”
Taem hem i talemaot desisen,
hem i askem plante taem long mi se:
“?Irina, mi stap talemaot gud
nem blong God ya?”
Mi prea long Jehova se:
“Jehova, tede bae jajmen i kamaot.
Mi wantem se oli leftemap nem blong yu.”
Mi se: “Jehova plis mekem jaj
i talemaot gud nem blong yu ten taem
long ol stret ples blong hem,”
from hem i no stap talemaot gud.
?Mo yu save wanem?
!Long en blong jajmen ya,
hem i talemaot gud nem blong God ten taem!
Taem jaj i talemaot desisen,
i gat plante fren blong mi i stap.
I gat plante man,
mo oli givim plante flaoa long mi.
I gat wan woman mo
tufala fren blong hem i kam
mo hem i smael mo i askem se:
“?I gat wan samting? !Yu luk naes we!”
Mi smael long hem mo mi se,
“Yu save mi mi wan Witnes blong Jehova
mo jaj i givim wan panis long mi
we bae i stap wetem mi blong tu mo haf yia.”
Nao woman ya wetem ol fren
blong hem oli sek wantaem.
Mi wok long haos nomo,
taem ol kastoma blong mi oli kam
mo oli luk ol flaoa,
oli askem se: “?Ol flaoa ya oli kam wea?
Mo hemia i givim janis long mi blong talem se
hemia ol gudfala brata sista
blong mi ya we oli givim ol flaoa ya.
Aot long ol 23 brata mo sista ya
we oli go long kot,
fo long olgeta oli stap long rabis kalabus naoia.
Mifala i fanemaot se bae ol hasban
blong mifala oli go long kalabus,
so mifala i go long tren stesen
blong tata long olgeta.
Long tren oli askem se:
“?Hu ya olgeta ya we oli kam luk yu?
Sam oli gat tingting se hemia
wan grup blong sapotem olgeta ya.
Nating se oli tekem ol brata oli go long kalabus
be mifala i glad nomo mo mifala i stap singsing.
Taem mi tingting bak,
mi harem gud tumas,
from nating se i no bin isi nating
be Jehova i halpem mifala
tru long ol hadtaem ya.
Be i gat wan taem we
bilif blong mi i kam slak smol,
mo mi askem Artur se,
“?From wanem mi harem olsem se
Jehova i no halpem mi?”
Mo Artur i givhan long mi bigwan.
Hem i se:
“Hemia from se,
from we yu no givap.
Hemia i minim se Jehova i stap halpem yu.
From yu no lego hem
mo yu no stop blong wosip hem.
Mo hemia i soem se hem i stap wetem yu.”
Ol toktok ya oli rili mekem
bilif blong mi i strong bakegen,
mo mi luksave se Setan i stap
traem bilif blong mi.
Mo mi mas mekem bilif blong mi i strong
i no long Jehova nomo,
be se hem i stap wetem mi long ol hadtaem ya.
Setan i wantem stilim glad blong yumi.
Be i no posibol from
glad i kamaot long Jehova nomo.
?Be Setan i stap traem
blong mekem wanem?
Hem i traem blong
haedem glad ya long yumi.
Be gudfala fren blong yumi
Jehova we yumi save trastem,
oltaem hem i halpem yumi
blong luk ol risen blong yumi save glad.
Oli traem blong blokem yumi
blong yumi no tokbaot Jehova.
Be blong talem stret
oli jes givim plante moa janis long yumi
blong tokbaot nem blong God.
Yumi glad tumas from
strong tingting blong olgeta.
!Oli gohed blong prij
mo blong holem strong!
Oli gat ol nambawan janis blong prij
mo oli dipen fulwan long Jehova
blong mekem olsem.
I tru mifala i save se yufala evriwan
ol brata sista yufala i stap
fesem ol defren kaen hadtaem.
Be mifala i sua se ol ekpiriens ya
oli leftemap tingting
mo pulum yumi evriwan
blong gohed blong trastem Jehova
mo gohed blong prij,
nomata wanem jalens we yumi stap fesem.
Yes wetem help blong Jehova
yumi save “gohed blong mekem
ol gudfala samting
blong winim ol rabis samting.”
Ol brata mo sista,
bae yumi ‘gohed blong
tingbaot olgeta long kalabus,
olsem we yumi tu yumi stap
long kalabus wetem olgeta.’
Mifala i glad tumas long yufala evriwan
from yufala i holemstrong long Jehova.
Mifala i lavem yufala tumas.
Long Wol Hedkwota
blong Ol Witnes blong Jehova
hemia hem i JW Brodkasting®.

2024 Hed Kampani Apdet #4