JW subtitle extractor

!Welkam!
Afta laswan apdet blong yumi,
i gat faef moa spesel asembli bakegen.
Oli mekem long ol ples ya:
Prague, Jek Ripablik;
Helsinki, Finlan;
Budapest, Hangari;
Reykjavik, Aeslan;
mo Zurich, Swiselan.
Mo ol deleget we oli joen,
oli blong bitim 30 kantri.
Yumi glad blong luk we
ol man blong Jehova oli joen tugeta.
Mo namba blong olgeta
we oli baptaes long ol asembli ya,
hem i 578.
Wan spesel samting i hapen
long asembli blong Aeslan.
Oli rilisim fulwan Niu Wol Translesen
long Aeslan Lanwis.
Gudfala program blong bigfala asembli ya
i mekem tingting blong yumi
i strong blong gohed
blong talemaot gud nius long ol man.
Hemia i mekem yumi tingbaot se i no longtaem,
bambae yumi kasem niufala sevis yia bakegen.
Ating yu tingbaot se long stat blong 1 Septemba,
bambae yumi joen long spesel kampen ya
blong askem Baebol stadi long ol man.
Taswe i gud we yumi rere naoia.
Long kampen ya,
bae yumi mas traehad blong askem Baebol stadi
long plante defren man,
wetem buklet ya !Enjoem Laef Olwe!
Long Septemba, ol pablisa oli save jus
sipos oli wantem mekem 30 aoa long manis ya
o 15 aoa nomo.
I gud yu tekem smol taem long wik ya
blong jekem program blong yu
blong manis Septemba.
Prea long Jehova
blong yu naf blong mekem moa long manis ya.
Mo wan naesfala nius
we mifala i wantem serem long yufala,
hemia se long Sande, 28 Julae,
yumi kasem wan niufala mak
long histri blong yumi blong Baebol translesen.
Niu Wol Translesen, fulwan o sam haf
i stap naoia
long 300 lanwis.
!I nambawan tumas!
!Yes plante gudfala samting i stap kamaot
long oganaesesen blong Jehova!
Be naoia long apdet blong yumi,
mi wantem tokbaot wan impoten topik wetem yufala,
hemia blong tingbaot oltaem
se Kingdom blong God nomo
i save fiksim problem blong olgeta man.
Impoten trutok ya bae i halpem yumi
blong no joen long ol problem blong politik.
Bigfala asembli blong yia ya
i halpem yumi blong tingbaot poen ya.
Yumi gat janis blong enjoem Episod 1
blong Gud Nius Blong Jisas.
I mekem yumi tingbaot se taem Mesaea i bon,
i wan gudfala nius.
Mo from we Jisas i kam long wol,
olgeta promes blong God oli save kamtru
tru long hem. ?Wanem sam long ol promes ya?
?Mo wanem sam long ol promes ya?
Hemia se Jisas bambae i King
long Kingdom blong God
mo Kingdom ya bae i stretem olgeta problem.
?Wanem sam fasin we Jisas i gat olsem King?
Aesea 9:6, 7 i talem wan profet tok
long saed blong Jisas se: “From wan pikinini
i bon i kam long yumi . . . , mo wok blong rul
bambae i stap long solda blong hem.
Bambae oli singaot hem long ol nem ya,
Nambawan Advaesa, God We i Gat Paoa,
Papa We i Stap Olwe, mo Prins Blong Pis.
Mo rul blong hem we i stap kam bigwan
mo pis, bambae i no gat en,
long tron blong Deved
mo long kingdom blong hem
blong mekem se i stap strong
mo i gohed blong stanap
tru long jastis mo stret fasin,
i stat naoia i go mo blong olwe.
Strong tingting blong Jehova
komanda blong ol ami,
bambae i mekem samting ya.”
Ol vas ya i soemaot se taem bae Jisas i King,
bambae hem i rul long pis, jastis, mo stret fasin.
Rul blong hem bambae i blong olwe.
!Hemia i mekem yumi glad!
Yumi glad blong save tu se
Kingdom blong God i stap rul finis long heven.
Kingdom ya nomo i prapa rod
blong stretem olgeta problem
we oli stap long wol.
Taswe i gud we yumi no mas fogetem poen ya.
?From wanem?
From se ol jalens long laef tede,
oli save mekem i had long yumi
blong luk Kingdom blong God olsem prapa rod
blong stretem ol problem.
I gat plante samting we
i stap seraotem wol tede.
I gat plante faet mo wo bitwin ol man.
I gat presa oltaem we i pulum yumi
blong tekem saed blong wan problem
o blong sapotem politik.
Wan ripot i se, samwe haf blong populesen
blong ol man long fulwol,
oli laef long wan kantri
we i bin gat o bambae i gat
eleksen blong politik long yia ya nomo.
Yumi luk tu se plante oli mekem ol seremoni
blong presem kantri blong olgeta,
iven long ol skul tu.
Mo i gat ol spot we i mekem ol kantri oli seraot.
Olgeta samting ya oli stap
kamaot long nius evri dei.
Ol problem long wol oli stap kam mowas,
mo ol man long wol ya oli gat
plante tingting blong stretem ol problem ya.
Be yumi ol Witnes blong Jehova,
?wanem tingting blong yumi long saed ya?
Yes, yumi no joen nating long politik.
Yumi tingbaot tok blong Jisas long Jon 18:36,
we hem i se: “Kingdom blong mi
i no blong wol ya.”
From samting ya, yumi givim ful laef blong yumi
long Kingdom blong God nomo
mo yumi no joen nating
long ol politik blong wol ya.
I tru se Rom 13:1, 2 i talem se
God nao i letem ol haeman oli stanap
“mo oli holem ol defdefren posisen.”
Taswe yumi wantem
soemaot se yumi respektem
wok we ol gavman oli mekem tede.
Hemia i laenap wetem tok we Jisas i talem
long Matiu 22:21,
we hem i se: “Ol samting we oli blong Sisa,
yufala i givimbak long Sisa,
mo ol samting we oli blong God,
yufala i givimbak long God.”
So i tru se yumi soem ona long olgeta
we oli gat posisen long gavman,
be yumi lukaot se yumi no joen
long ol raorao blong politik,
nating sipos i luk olsem se
samting we oli mekem
i stret long yumi.
Yumi “mas gohed blong lukaot Kingdom
mo stret fasin blong hem fastaem.”
Kingdom ya nomo i prapa rod.
So yumi no tekem saed blong wol ya,
long aksen mo tu long tingting.
Yumi no mas ting se
wan politik pati i gud moa bitim nara pati,
nating sipos i luk olsem se promes blong olgeta
i stret long yumi.
Tingting blong yumi i mas strong nomo
long Kingdom blong God
we Kraes i King long hem.
?Wanem i save givhan long yumi
blong no joen long politik?
Bae yumi tokbaot tu rod:
Faswan, yumi save spenem moa taem
blong tingbaot Kingdom, i bitim ol problem.
Mo namba tu, yumi save spenem moa taem
blong tokbaot Kingdom, i bitim ol problem.
So i gud yumi tokbaot faswan rod.
?Wanem i save halpem yumi
blong spenem moa taem
blong tingbaot Kingdom, i bitim ol problem?
Ridim mo tingting dip long Baebol
blong mekem se bilif mo hop
blong yumi i strong oltaem.
Mo yumi mas lukaot gud
long ol taem we yumi spenem
blong ridim ol nius we oli
kamaot tu long ol sosol media.
Ol nius ya oli save mekem yumi wari,
tingting i foldaon, mo yumi taed.
Namba tu, ?wanem i save givhan long yumi
blong spenem moa taem
blong tokbaot Kingdom,
i bitim ol problem?
I tru tumas se ol tok blong yumi
oli soemaot samting we i stap long hat.
Sipos yumi kwik oltaem
blong talemaot tingting blong yumi
long saed blong ol problem blong politik,
maet hemia i wan saen we i soem se
tingting blong yumi i no strong long saed ya.
I olsem signal blong trak we i stap givim woning.
Maet ol toktok blong yumi i stap givim woning se
yumi mas mekem tingting blong yumi
i strong bakegen.
Be nao taem yumi talemaot gud nius
hemia i givhan long yumi bigwan
blong yumi tingbaot Kingdom oltaem.
Yumi bilif strong se Jehova nomo
i save stretem ol raf fasin tede.
Mo wok blong prij i mekem
yumi tingbaot hop oltaem,
hop we i olsem wan angka
we i givhan long yumi taem laef i had,
mo i halpem yumi blong no lego
oganaesesen blong Jehova.
Sipos yumi gohed blong mekem olsem,
bae yumi no joen nating
long ol bisnes blong politik
mo bambae yumi tingbaot nomo
prapa rod blong fiksim ol problem,
hemia Kingdom blong God.
Hed Kampani i serem
ol impoten trutok ya bakegen
from Setan, “rula blong wol ya,”
i wok strong moa blong agensem
ol man blong Jehova.
Devel Setan i wantem se
yumi tekem saed blong wol.
Hem i wantem se yumi mas joen long politik.
Hemia i save pulum yumi blong agensem
Jehova God, mo agensem Kingdom blong hem.
Mo i olsem se yumi stap luk long Setan nao
olsem rod ya blong fiksim ol problem blong yumi.
!Yumi neva wantem blong mekem olsem!
So ol gudfala brata mo sista,
yumi mas prea strong long Jehova
blong yumi save stanap strong oltaem.
Yumi wantem blong sapotem
Kingdom wetem fulhat,
taswe i impoten we yumi mekem
pesnel stadi o famle wosip
long topik blong no joen long politik.
Hemia sam tingting:
Long buk ya
Ol Vas Blong Givhan long Kristin Laef,
yu save stadi long topik blong “Ol Gavman.”
Yu save faenem buk ya long JW Library,
mo long ples ya Laebri,
afta Ol Pablikesen,
mo afta Ol Buk.
Wan nara tingting
hemia blong stadi long
Wajtaoa blong Oktoba 2023
we i se, ?Yu Yu “Rere Blong Obei”?
Brodkasting blong Maj 2019 tu
i gat wan naesfala tok
we i tokbaot fasin blong no joen long politik.
I stap long app blong JW Library,
long ples ya Laebri, Video,
mo JW Brodkasting, mo afta
Ol Program Blong Evri Manis.
O long jw.org,
yu save taepem “Maj 2019 brodkasting.”
Mo tu, long jw.org yu save taepem
“No Joen Long Politik,”
Mo bae yu faenem plante video mo atikol
we i joen wetem haf ya.
Yumi save sua se hat blong Jehova i glad tumas
taem hem luk plante milian man
blong olgeta nesen oli joen blong wosipim hem,
oli no joen long politik,
mo oli talemaot gud nius se
prapa rod blong fiksim ol problem,
hem i Kingdom blong God.
Ol brata mo sista,
plis tingbaot se
mifala i lavem yufala tumas.
Long Wol Hedkwota
blong Ol Witnes blong Jehova,
hemia hem i JW Brodkasting.

2024 Hed Kampani Apdet #5