JW subtitle extractor

!Welkam, ol brata mo sista!
Afta laswan apdet blong yumi,
yumi gat seven moa spesel asembli.
Oli stap long Philadelphia, Yunaeted Stet,
Sofia, Bulgaria,
Suva, Fiji,
Lyon, Franis,
Asunción, Paragwe,
Tampa, Yunaeted Stet,
mo Santo Domingo, Dominikan Ripablik.
I gat bitim 16,000 brata sista
we oli kamaot long 101 kantri,
oli bin go long ol spesel asembli ya.
Total namba blong evriwan we oli joen
i bitim 98,000,
mo blong baptaes, hem i 859.
Long Paragwe,
i gat samwe 11,500 pablisa naoia.
Mo klosap 2,000 brata sista
we oli kasem invetesen
blong go long asembli long we.
!Be namba blong ol man we oli joen
long asembli ya, hem i 28,617!
I klia se plante man oli intres long trutok.
Long asembli ya nomo,
293 man i baptaes.
Hemia faswan taem long histri blong Paragwe
we plante man oli tekem baptaes
long wan ples nomo.
I klia se Jehova i stap blesem
ol spesel asembli ya.
I gat tu moa i stap yet blong yia 2024,
mo i gat 19 moa spesel asembli
we bae i stap long yia 2025.
Hemia wan smol ligol apdet.
Long 17 Septemba 2024,
17 jaj blong Haefala Kot
blong European Court of Human Rights
oli tekem desisen se
aksen blong ol dokta blong Spen
blong fosem sista Pindo Mulla
blong tekem blad,
i wan nogud aksen.
Nating se sista blong yumi i talem klia
mo i iven raetem se hem i no wantem blad,
be wan jaj blong Spen i letem ol dokta
oli givim blad long hem.
Haefala Kot i se aksen ya
i agensem raet blong sista blong yumi.
Hemia i soemaot klia se
ol sikman oli gat raet blong jusum
weswan tritmen oli wantem.
Hemia i wan impoten desisen
from i kamaot long Haefala kot
blong European Court of Human Rights.
Mo taem oli lukluk long wan kes olsem,
desisen blong olgeta
bae i afektem narafala kantri tu.
Taswe, 46 kantri naoia long Yurop
oli mas respektem jus blong ol sikman
long saed blong tritmen blong olgeta.
Yumi glad long desisen we Haefala Kot i mekem.
Antap moa, yumi tangkiu long Jehova
we i mekem se yumi win.
Hemia bae i givhan long
ol brata sista blong yumi long Yurop
taem oli mas mekem desisen
long saed blong helt.
Ekspiriens ya i rimaenem yumi se
i impoten blong talemaot klia
long ol dokta blong yumi
mo raetemdaon desisen blong yumi
long saed blong blad,
olsem sista ya blong yumi.
Long manis ya,
Septemba 2024,
yumi joen long wan bigfala kampen
blong statem Baebol stadi wetem buklet ya,
!Enjoem Laef Olwe!
!Yumi glad tumas blong joen wetem ol brata sista
raon long wol blong mekem kampen ya!
Hemia sam gudfala ekspiriens:
Hannelore i wan olfala paenia sista
long Ostria we i gat 84 yia.
From sik blong hem,
hem i no save prij longtaem
long doa blong ol man.
Kampen ya i pulum tingting blong hem
blong askem ol visit blong hem
we oli soem intres
blong stadi long Baebol.
Ale hem i go visitim sikis long olgeta.
Hem i glad tumas blong soem long olgeta
olsem wanem blong mekem wan Baebol stadi.
Mo afta,
evriwan long ol sikis man ya
oli agri blong stadi Baebol.
Long Filipin, long wok blong prij,
tu pablisa oli mitim wan woman
long fored blong haos blong hem we i stap was.
Nem blong hem Josie.
Be from we Josie i bisi,
hem i talem long tufala
blong go prij long boe blong hem
mo nefiu blong hem insaed long haos.
Taem ol pablisa oli askem tufala
sipos oli wantem stadi,
tufala i agri blong stadi,
hemia boe mo nefiu blong Josie.
Long medel blong storian blong olgeta,
wan nis blong Josie tu i kam joenem olgeta,
ale oli askem hem tu sipos hem i wantem stadi,
mo hem i se, yes.
From we naoia i gat tri man long haos
we oli wantem blong stadi Baebol,
hemia i pulum tingting blong Josie.
Ale hem i joenem olgeta
mo biaen, hem tu i akseptem blong stadi Baebol.
Be i no finis yet,
klosap long en blong storian blong olgeta,
namba faef man i kam,
hemia gel blong Josie,
we i kam blong harem se
oli stap tokbaot wanem,
ale hem i kam joenem olgeta
mo ol pablisa oli askem
sipos hem tu i wantem stadi Baebol,
mo hem i se, yes.
So traem tingbaot.
Faef memba blong famle long wan haos nomo
oli statem stadi from ol pablisa
oli askem stret long olgeta.
I klia se Jehova i stap blesem
traehad blong yumi blong askem Baebol stadi
long kampen ya.
Be yumi wantem gohed
blong askem Baebol stadi long ol man.
Ol brata mo sista,
nating sipos kampen ya bambae i finis,
!be yumi mas gohed blong tekem evri janis
blong askem ol man blong stadi Baebol!
?Wanem i save givhan long yumi?
I tru se prij long pablik ples
i wan impoten rod blong prij,
mo yu save statem stadi tu,
be mifala i leftemap tingting blong yufala
blong joen oltaem
blong prij long ol haos wanwan.
Mo tingbaot,
gudfala frut i save kamaot taem yumi prij
long taem we ol man oli stap long haos.
Hemia bae i givim janis long yumi
blong statem wan storian
go kasem we yumi statem wan stadi.
Tekem evri janis blong askem
man blong stadi Baebol.
Long wok blong prij long wan aftenun,
wan brata blong Jemani
i mitim wan man we i gat 35 yia.
Brata i askem se,
“?Wetaem laswan taem we yu ridim Baebol?”
Man ya i se,
“Long moning ya nomo.”
Biaen oli ridim Maeka 4:3, 4 blong tokbaot
from wanem Baebol i impoten tumas.
Ale oli go tru long Lesen 1
blong buklet ya, !Enjoem Laef Olwe!
Mo ol pikinini blong man ya tu i stap
mo oli ridim ol vas blong Baebol
long bigfala voes.
Biaen, man ya i agri blong stadi Baebol.
Antap moa,
plante oli statem stadi taem oli tekem janis
blong prij long famle,
neba, ples blong wok, stoa o nara ples.
Long Tansania,
wan sista we nem blong hem Elisabet,
i statem fo stadi long faswan dei blong kampen.
Wan long ol stadi ya i gat wan kofi shop
narasaed rod long Haos Kingdom.
Oltaem Elisabet i stap go long we
blong dring ti o pem sam samting.
So wan taem, hem i askem stret long woman ya
sipos hem i wantem blong stadi Baebol.
Afta we oli wajem video ya,
“Welkam long Baebol Stadi blong Yu,”
woman ya i glad we i glad, mo i se,
“Yumi mas stat naoia nomo.”
Mo hem i pulum gel mo nis blo hem tu
blong oli kam lesin long stadi.
Antap moa,
Elisabet i glad se woman ya
i naf blong joen long wan miting blong yumi.
Afta long miting,
woman ya i talemaot tingting blong hem se:
“Mi laekem Ol Witnes blong Jehova
from we oli stadi Baebol.
Taem mi go long nara jej,
oli singsing nomo mo prij
be oli no stadi Baebol.
Mi laekem tumas miting ya.
Bae mi traem blong kam joen oltaem.”
Yumi glad blong harem
ol naesfala ekspiriens olsem.
Taem yumi joen long wok blong prij,
yumi mas yusum gud taem blong yumi.
Olsem 1 Korin 9:26 i talem:
“Mo taem mi boksing,
mi no sakem han blong mi
blong faetem win nomo.”
Yes yumi wantem givim
bes blong yumi long Jehova.
Hemia nao from wanem yumi joen oltaem
blong prij long ol haos wanwan.
Long sam ples,
ol pablisa oli gat plante visit.
Be i gud blong prea blong jekem se,
?Ol visit ya oli stap gohed gud o no?
?Oli soemaot se oli lavem trutok?
?Oli glad taem yumi visitim olgeta?
?Oli intres blong stadi Baebol?
Yumi no wantem “sakem han blong [yumi]
blong faetem win nomo.”
Maet i moa gud blong fokas
long hemia we i intres.
Mo ol nara visit bae oli save gat janis
blong lesin bakegen
taem yumi gobak prij long teritori blong olgeta.
I tru se yumi mas gat longfala tingting
mo gat stret tingting
be long semtaem,
yumi mas yusum gud taem blong yumi.
Sem mak long ol Baebol stadi blong yumi.
I gud yumi askem se,
?Oli stap gohed gud o no?
Prea mo faenemaot se:
?Oli agri long ol trutok blong Baebol?
?Oli mekem ol jenis long laef blong olgeta
folem ol trutok ya?
?Oli stat finis blong joen long ol miting?
?Oli serem trutok long ol narafala tu?
Sipos oli no gohed gud,
i moa gud blong yusum taem
mo paoa blong yumi
blong faenem olgeta we
‘oli stret blong kasem laef olwe.’
So ol brata mo sista,
!I gud yumi tekem evri janis
blong askem ol man blong stadi Baebol!
Long plante ples raon long wol,
yumi luk se namba blong ol Baebol stadi
i stap kam antap bigwan.
Long wan bigfala asembli
we yumi jes gat long Madagaska,
i gat bitim 21,000 man i kam,
mo 419 i tekem baptaes.
Mo tu long Filipin
namba blong ol pablisa blong sevis yia 2024
i kam antap 5 pesen.
?I minim wanem?
I min se hemia fastaem long histri
we namba blong ol pablisa
i go antap bitim 260,000.
Namba blong ol stadi i gru bitim 252,000,
12,201 oli tekem baptaes long sevis yia ya,
120 niufala kongregesen i stanap
mo 15 niu seket i stat.
!I naes tumas!
Nomata weples we yumi laef long hem,
be yumi tingbaot tok blong Jisas long Jon 4:35:
“Yufala i leftemap hed blong yufala
mo yufala i lukluk ol garen,
ol kakae oli rere finis blong man i go havestem.”
Mo tu, Jisas i talem long ol disaepol
long Matiu 9:37, 38 se:
“Tru, i gat plante kakae blong havestem,
be ol man blong wok oli no plante.
From samting ya,
yufala i mas plis long Masta blong havest,
blong hem i sanem sam moa man blong wok
oli kam havestem ol kakae.”
Yes raon long wol, wok i plante
from we moa man oli stap akseptem trutok.
Taswe, i gud yumi askem se,
?Olsem wanem yumi wanwan i save mekem moa
long wok blong tij mo prij?
I tru se situesen blong yumi wanwan i defren.
?Be olsem wanem?
?Maet yumi save gat janis
blong mekem haftaem paenia?
?O maet putum mak
blong kam wan fultaem paenia?
Sipos yumi paenia finis,
?maet yumi save muv
i go long wan ples we i gat moa nid?
?Olsem wanem?
Yu yu naf blong aplae long
Skul blong Kingdom Ivanjelis?
Sam long ol graduet blong skul ya
oli mekem spesel paenia blong smoltaem,
spesel paenia, eria elda mo misinari.
Yes i gat plante rod we yumi save mekem moa
long wok blong Jehova
folem situesen blong yumi wanwan.
Japta 10 blong buk ya,
“Oganaesesen We i Mekem Wok Blong Jehova”
i save givhan long yumi blong prij moa.
Sipos yumi mekem bes blong yumi long wok ya,
bambae Jehova i blesem yumi.
?So yumi lanem wanem tede?
Gohed blong sapotem spesel kampen
we i stap gohed naoia.
Gohed blong tekem evri janis
blong askem man blong stadi Baebol.
Mo tu yumi tokbaot se
namba blong ol pablisa i gru bigwan
long plante ples long wol.
Taswe i gud we yumi gohed blong prea
blong ‘Masta blong havest,
hem i sanem moa man blong wok.’
Mo i gud we yumi wanwan
i mekem bes blong yumi
blong prij mo tijim “gud nius blong Kingdom.”
Plis tingbaot se
mifala i tinghae long yufala wanwan
ol gudfala brata mo sista.
Long Wol Hedkwota
blong Ol Witnes blong Jehova,
hemia hem i JW Brodkasting.

2024 Hed Kampani Apdet #6