JW subtitle extractor

Welkam ol brata mo sista.
Afta laswan apdet blong yumi,
yumi gat tu moa spesel asembli bakegen.
Tufala i stap long Jili.
I gat bitim 4,700 deleget
we oli kamaot long 21 kantri
mo oli bin joen long tufala asembli ya.
Namba blong evriwan we oli
bin joen long tufala asembli ya,
i bitim 17,000
mo i gat 123 we oli baptaes.
Spesel asembli ya i tajem hat
blong plante brata mo sista,
olsem brata Jonathan.
Hem i se:
“Taem mifala i go
ol brata sista oli soem bigfala lav long mifala,
oli welkamem mifala long epot,
oli oganaesem plante pleplei
blong mifala i haremgud long hem,
oli givim ol presen
mo oli lukaot gud long mifala
long ol hotel we mifala i stap long hem.
!I naes tumas!
Mifala i talem bigfala tangkiu long Jehova
from nambawan ekspiriens ya
we mifala i bin kasem.”
Wan sista we nem blong hem Jésica i se:
“!Mifala i harem olsem se
mifala i stap long niufala wol finis!”
I no longtaem i pas,
yumi kasem plante naturol disasta.
Long medel blong Septemba,
hariken ya Boris i spolemgud Sentrol Yurop
wetem hevi ren mo strong win.
Plante brata sista oli mas
lego ol haos blong olgeta
be oli kasem rilif saplae.
Long semtaem,
long Saot Afrika, i no moa gat tumas ren
mekem se ples i drae we i drae.
Plante branj ofis, olsem Malawi,
Mosambik, mo Simbabwe,
oli givhan long plante taosen brata mo sista
blong oli kasem kakae we oli nidim.
Long en blong Septemba
mo stat blong Oktoba,
hariken Helene mo Milton
i spolemgud saotis blong Yunaeted Stet.
I gat bigfala flad
mo graon blong ol hil i folfoldaon.
Sore tumas,
i gat tri pablisa we oli ded.
Bitim 11,000 brata sista
oli mas lego haos blong olgeta.
Hariken ya i spolemgud 17 Haos Kingdom
mo bitim 2,500 haos blong ol brata mo sista.
Yumi gohed blong prea from ol brata mo sista ya
we oli stap fesem ol strong disasta.
Mo yumi glad se i gat plante volontia
we oli stap givhan long disasta rilif wok.
Mo tu,
yumi glad long ol presen mane we yumi kasem
we i givhan bigwan long ol brata sista blong yumi
we oli stap fesem ol nogud situesen ya.
Long 27 Septemba 2024,
ol polis long Eritrea oli atakem
ol Witnes blong Jehova
we oli stap mekem miting
long haos blong wan brata sista.
Fastaem, ol polis oli arestem
24 brata mo sista blong yumi,
wetem tu smol pikinini.
Biaen, oli lego tufala pikinini ya.
Atak ya i hapen klosap 30 yia
afta we presiden blong Eritrea
i tekem desisen blong karemaot sitisensip
blong ol Witnes blong Jehova long 1994.
Loa ya i stanap yet tede.
From samting ya,
plante brata sista oli no gat raet
blong mekem plante samting olsem,
pem wan propeti,
gat wan bisnis,
o faenem wan wok.
Mo sam dei afta long atak ya,
ol polis oli arestem
mo putum sista Letebrhan Tesfay long kalabus.
Sista ya i wan long ol faswan
we i bin stadi Baebol
wetem ol Witnes blong Jehova long Eritrea.
Hem i baptaes long yia 1957.
Eit pikinini blong hem
mo eit bubu blong hem
oli stap long trutok.
Gel blong hem, Hadassa Zerisenay
i stap long kalabus wetem hem.
Sista Saron Ghebru mo man
blong hem tu oli stap long kalabus.
Saron i gat bel blong samwe sikis manis.
Mo brata blong Saron, Henok,
i stap long kalabus longtaem moa
i bitim ol narafala brata sista.
Oli bin arestem hem long Jenuware 2005.
Ripot blong 1 Novemba i soem se
i gat 64 Witnes oli kalabus long Eritrea.
Yumi gohed blong prea
from ol 223 brata sista blong yumi raon long wol
we oli stap naoia long kalabus
from bilif blong olgeta.
Long anuel miting blong 5 Oktoba 2024,
yumi bin harem wan gudfala nius:
Oli putumap brata Jody Jedele
mo brata Jacob Rumph
blong oli kam memba blong Hed Kampani.
Mo yumi glad se tufala i save joenem yumi tede.
I gud yumi tekem smoltaem
blong save tufala smol.
Welkam, tufala.
Mifala i gat plante kwestin
blong askem long yutufala.
Maet yutufala i save givhan long mifala
blong save olsem wanem
yutufala i stat blong lavem Jehova.
Fastaem,
?wanem i givhan
long yutufala blong save Jehova
mo wantem mekem wok blong hem?
Brata Jedele.
Yes, mi mi gruap long trutok.
Papa i baptaes long ol yia 1940,
mo hem i mekem wok blong Jehova
kasem we hem i ded.
Mo mama i baptaes long ol yia 1950.
Tufala i lavem Jehova
mo oganaesesen blong hem.
Mo from we tufala i lavem Jehova,
hemia i givhan long mifala ol pikinini
blong kam klosap long God.
I klia long mi se
samting we ol perens oli tijim mifala long hem,
hem i trutok.
Be samting we i pulum mi
blong bilif strong se hemia i stret rod,
hemia lav we ol man blong Jehova oli soemaot.
Mi tingbaot taem mi smol,
long taem blong spel,
ol brata sista oli kam long wan teritori
we i stap klosap long mifala blong prij.
Bifo we oli kam,
mifala i no save olgeta,
be taem oli kam,
mifala i kam olsem wan famle,
hemia from we yumi mekem wok blong Jehova.
Mo hemia i tajem hat blong mi bigwan.
Ol perens blong mi oli save trutok taem oli yang.
Be afta mama blong mi i stop
blong go long miting mo prij.
Mo taem mi gruap,
papa blong mi i no wan Witnes.
Nating se mifala i no joen
plante wetem kongregesen,
be mama i tijim ol stamba trutok long mi.
Olsem se,
mi save se nem blong God Jehova,
mi save se mi mas prea long hem nomo,
mo mi save se wol bambae i kam wan Paradaes.
Mo tu, wan o tu taem olsem long wan yia
mi stap go visitim bubu woman blong mi
we hem i gohed gud long trutok.
Evritaem we mi visitim hem
mi harem se mi kam klosap moa long Jehova
from ol gudfala fasin blong hem.
So mi wantem save se,
?hu ya Jehova?
So taem mi gat 13 yia,
mi askem mama
sipos mi save stadi Baebol.
Mi stap tingting se:
“Sipos ol Witnes blong Jehova i wan tru relijen,
bae mi joenem olgeta.
Mo sipos no, bae mi stadi nomo,
from we mi wantem kam wan gudfala man.”
Mo mi glad blong save se
mama blong mi i wantem
kambak long Jehova bakegen
so mitufala i gohed long trutok tugeta.
I no longtaem afta we mi stat blong stadi Baebol,
mi luksave se hemia i trutok.
Mama blong mi i stat prij bakegen,
mo wan manis afta, mi kam
wan pablisa we i no baptaes.
Naoia, mi glad blong talem se
fulwan famle blong mi i stap long trutok,
mo oli stap gohed blong
soemaot gudfala eksampol long mi.
Brata Rumph,
?wanem i pulum yu blong wantem
mekem wok blong Jehova fultaem?
Bae mi save talem se,
hemia ol paenia we oli mekem
wok blong Jehova blong plante yia
mo ol eria elda tu.
Oli soem intres long mi
mo spenem plante taem wetem mi,
mo hemia i gat bigfala paoa
long mi taem mi stap gruap.
Mi luk se oli glad we,
taem oli mekem wok blong Jehova
mo taem mi harem ol stori blong olgeta
olsem wanem oli mekem
moa long wok blong prij,
sam oli go prij longwe.
Hemia i pulum tingting blong mi
blong wantem kam wan misinari.
So taem mi finis skul,
mi statem wok blong paenia.
Stori blong mi i sem mak
olsem hemia blong Jacob.
Mi joen plante wetem olgeta
we oli mekem wok blong Jehova fultaem.
Perens blong mi oli laekem blong paenia,
mo oli paenia gogo kasem we
mifala ol pikinini i bon.
Mo biaen,
mama blong mi i stat blong paenia bakegen
mo i gohed kasem tede.
Long taem blong spel,
mifala i mekem haftaem paenia tugeta.
Mifala i go prij wetem eria elda.
Mo plante taem,
mifala i stap go visitim Betel.
Olgeta samting ya
oli halpem mi blong luksave se
wok blong Jehova fultaem
hem i beswan rod blong laef.
So taem mi finis skul,
mi statem wok blong paenia
mo taem mi gat 19 yia mi go long Betel.
Sista blong mi mo man
blong hem tu i bin stap long Betel.
?Wanem sam long ol wok
we yufala i mekem long ol yia we i pas?
?Mo hemia i givhan long yufala olsem wanem?
Fastaem we mi kam long Betel long Wallkill,
mi wok long Klining Dipatmen,
mo mi wok wetem ol gudfala brata mo sista.
Mi wok wetem ol defren tim
mo mifala i mekem ol defren wok,
mo hemia i tijim mi blong rere oltaem
blong mekem eni jenis blong finisim wan wok.
Samples tu mo haf yia afta,
mi muv i go long ofis mo mi mekem ol nara wok
olsem blong givhan long ol misinari
blong kasem ol tritmen
we oli nidim long saed blong helt.
Afta we mi mo Damaris mitufala i mared,
mitufala i muv i go long Brooklyn,
mo mi gohed blong mekem
ol wok long saed blong helt.
Long 2005, mitufala i aot long Betel
blong go lukaot long ol perens
mo mitufala i paenia.
Mi bin stap long
Komiti Blong Toktok Wetem Dokta
mo Komiti Blong Bildim Ol Haos Wosip.
Eit yia afta, mitufala i kambak long Warwick
blong wok long wan
konstraksen projek blong 2 wik.
Be hemia nao,
tu wik ya long Betel i stap kasem tede.
Long 2015, mifala i muv i go long Patterson
blong wok long wan niufala dipatment
hemia LDC o Lokol Disaen Konstraksen.
Long 2018, LDC i muv i go long Wallkill.
So mifala i gobak long ples
we mifala i stat long hem fastaem.
Mo long 2021,
mi muv i go long Hospitol Infomesen Dipatmen.
Mo long 2022,
mifala i muv i go long Warwick
blong wok wetem Hospitol Infomesen Sevis.
Long evri wok we mifala i mekem long Betel
mifala i lanem plante samting
long ol brata sista we oli lavem Jehova.
Long ol yia ya,
bilif blong mi i kam strong moa
blong luk olsem wanem
ol brata we oli gat ol impoten asaenmen
oli soem gudfala eksampol
blong kaen mo gat tingtingdaon.
Oli glad blong serem
save blong olgeta wetem mifala.
Mo taem mifala i aot long Betel,
mifala i luk hadwok blong ol perens
blong tijim ol pikinini long trutok.
Mo luk olsem wanem ol brata sista
oli bisi long wok blong Jehova.
Ol man blong Jehova oli nambawan tumas,
mo mi tinghae long eksampol blong olgeta.
Long saed blong mi,
mi tingbaot wan tok we i bin kamaot
long wan bigfala asembli long 1998.
Tok ya i tokbaot ol kantri
we oli gat nid blong ol paenia,
mo wan long ol kantri ya hemia Ekwado.
So mi prea long Jehova long saed ya,
mi lukluk gud situesen blong mi,
mi mekem sam risej,
mo afta long asembli,
mi raet i go long branj
blong Ekwado blong save moa.
Afta we mi visitim kantri ya, mi glad tumas,
mo wetem help blong Jehova,
mi muv i go longwe.
Wok blong prij long kantri ya i nambawan tumas.
I gat plante man we oli wantem stadi Baebol
mo mi luk se mak blong mi
blong wantem kam wan misinari i kamtru.
Be, bigfala blesing we mi kasem long Ekwado
hemia blong mitim fiuja waef blong mi, Inga.
Afta we mitufala i mared,
mitufala i gohed bong prij
long ol ples we i gat nid long Ekwado.
Sam yia afta, mitufala i kam ol spesel paenia
mo biaen, mitufala i stat
blong mekem wok blong eria elda.
Mo sam long ol kongregesen
we mitufala i lukaot long olgeta
oli stap longwe long ol bigfala bus long Amason.
Mo afta long 2011,
mitufala i sek se oli invaetem mitufala
blong joen long namba 132 klas blong Gilead.
Hemia i wan bigfala privilej we mitufala i kasem.
Mo afta long Gilead,
mitufala i luk plante jenis long laef.
Mitufala i mekem wok
blong Jehova long plante ples
mo enjoem ol defren kaen privilej.
Be long olgeta wok ya,
samting we mitufala i lanem
hemia blong glad long eni wok
we Jehova i givim long yumi evri dei.
Jes mekem bes blong yumi
mo no wari long samting we
yumi no naf blong mekem.
Mi lanem tu se,
i no ples we yumi stap long hem
we i mekem se asaenmen blong yumi i spesel
be hem i ol brata sista
we yumi wok wetem olgeta.
Mo mifala i lavem ol brata sista ya.
?I gat wan vas long Baebol
we i givhan long yu
long niufala asaenmen ya we yu statem?
Long saed blong mi,
mi tingbaot eksampol
blong gudfala man ya Josua
taem Jehova i givim
wan niu asaenmen long hem.
Blong plante yia finis,
Josua i gat strong tingting
blong mekem wok blong Jehova.
Hem i pastru long Red Si,
mo hem i lidim ol man Isrel
blong faet agensem ol man Amalek,
hem i wan spae,
mo hem i halpem Moses
blong plante yia taem oli fesem ol had situesen.
Be yet long Josua 1:9,
Jehova i talem wan samting we i intresting.
Hem i se:
“Mi mi talem long yu finis.
Yu mas gat strong tingting mo yu mas strong.
Yu no mas seksek o fraet,
[Nao makem samting
we Jehova i talem long Josua
blong rerem hem
from niu asaenmen blong hem.
Hem i se:]
from Jehova we i God blong yu
bambae i stap wetem yu,
long evri ples we yu go long hem.”
Mo hemia nao poen,
Jehova i stap wetem yumi
long evri asaenmen blong yumi.
Taem mi tingtingbak,
mi luk se hem i stap wetem mi
blong plante yia finis,
mo mi save se bae i stap
wetem mi long asaenmen ya tu.
Mo mi laekem samting we Jehova i talem
se bambae hem “i stap wetem hem.”
Jehova i wantem givhan long hem.
Mo hemia i no jenis tede.
So mi mas tingbaot samting
we Jehova i save mekem,
from hem i save mekem eni samting.
Hem bambae i givhan long ol man blong hem.
So mi save trastem se Jehova bambae i stap wetem mi.
Hem nao bambae i halpem mi
long niufala asaenmen blong mi.
Mi mi harem sem mak olsem Gideon
taem i kasem asaenmen blong hem.
Hem i no kamaot long wan famle we i impoten,
mo hem i no ting se hem i naf
blong givhan long ol man blong hem.
Be Jehova i yusum wan enjel blong halpem hem
blong tingbaot wan impoten trutok
long Jajes 6:14.
Hem i se:
“. . . Yu go wetem paoa we yu gat,
bambae yu tekemaot ol man Isrel
long han blong ol man Midian,
from we mi nao mi sanem yu.”
Jehova i stap talem long Gideon
blong mekem bes blong hem
wetem prapa paoa blong hem.
Mo long saed blong ol samting
we Gideon i no naf blong mekem,
Jehova i talem se bambae hem nao i mekem.
Blong talem stret,
taem mi kasem niufala asaenmen ya,
mi mo waef mitufala i wari.
Be olsem Gideon,
bambae mitufala i mekem bes blong mitufala,
mo letem Jehova i lukaot
long ol narafala samting,
from hemia wok blong hem.
Hem nao bae i meksua se evri samting i ron gud.
Tangkiu tumas, ol brata.
Mi tingbaot 30 yia bifo
taem mi kam wan memba blong Hed Kampani,
mi harem sem mak olsem yutufala
mo mi save se Jehova
bambae i halpem yutufala.
!Mifala i glad tumas se
yutufala i save joenem Hed Kampani!
Mo mifala i prea se bambae
Jehova i blesem yutufala long asaenmen ya.
Mo mifala i gohed
blong prea from yufala evriwan,
from mifala i lavem yufala tumas.
Long Wol Hedkwota blong
Ol Witnes Blong Jehova,
hemia hem i JW Brodkasting®.

2024 Hed Kampani Apdet #7