JW subtitle extractor

!Welkam long apdet ya!
Bae yumi stat wetem smol apdet
blong ol brata sista blong yumi long Eritrea.
Maet yu tingbaot yet
samting we i hapen long Septemba 2024,
taem ol polis oli kam arestem ol brata sista
we oli stap mekem miting tugeta.
Mifala i glad blong talem long yufala
se long 7 Disemba 2024,
Sista Saron Ghebru
we i gat bel eit manis long taem ya,
hem i kamaot long kalabus.
Yumi glad tumas long nambawan nius ya.
Be man blong hem
Brata Fitsum Goitom,
i stap yet long kalabus
from bilif blong hem.
Mo yumi sore blong harem se
gavman blong Eritrea
i arestem faef moa brata mo sista.
Long 1 Novemba 2024,
oli arestem fo yangfala
we yia blong olgeta
i stat long 16 kasem 18 yia:
Brata Zesani Biniam,
Brata Ebenezer Yonas,
Sista Sidon Tekeste
mo Sista Horeb Tekeste.
Afta we oli kwestinim olgeta,
oli putum olgeta kwiktaem
i go long kalabus blong Mai Serwa.
Long 22 Novemba 2024,
Sista Almaz Gebrehiwot
i kasem wan fon kol we i talem se
oli karem gel blong hem i go long polis stesen.
Taem Sista Almas i go long polis stesen,
ol polis oli arestem hem
be oli lego gel blong hem.
Ripot blong 23 Disemba 2024
i soem se naoia i gat
68 brata sista long Eritrea
we oli kalabus from bilif blong olgeta.
Plis
gohed blong prea from ol brata sista ya
mo plis prea from evriwan
we oli kalabus from bilif blong olgeta.
Folem ripot we i stap long jw.org,
long 6 Novemba 2024,
minisipol blong taon blong Ramapo
i apruvum ol plan blong Ramapo Betel.
So hemia i min se naoia
ol bigfala konstraksen wok
blong yumi i save stat.
Yumi glad tumas se
minisipol i apruvum plan ya.
!Be antap moa,
yumi talem tangkiu long Jehova!
?Wanem ol wok we
yumi mekem finis long Ramapo?
?Mo wanem wok we bambae yumi mekem?
Mifala i sua se
bambae yufala i enjoem ripot ya.
Yumi glad tumas
we minisipol i apruvum ol plan blong yumi
blong bildim Ramapo projek.
Eria ya we bae yumi wok long hem i luk olsem.
Plante long ol bigfala wok blong rerem graon
mo disaenem ol bilding i finis finis.
Oli karemaot plante tri long eria ya,
mo oli wokem ol smol bilding we yumi nidim
blong statem ol bigfala wok long Ramapo.
Mo naoia we oli apruvum ol plan blong yumi,
bigfala wok i save stat.
Long ol wik mo manis we i stap kam,
bambae yumi yusum sam kampani aotsaed
blong brebrekem ol ston blong levelem graon.
From we eria i bigwan,
ol wok blong levelem graon long ples ya,
bambae i tekem samples
18 manis olsem blong finisim.
Long Warwick,
yumi bin tekem sikis manis nomo
blong brebrekem ol ston
blong levelem graon.
Mo ol ston we yumi brebrekem,
bambae yumi yusum gud olgeta
blong berem ol hol mo bildim ol wol.
Hemia wan rod blong sevem mane.
Long ol 12 kasem 18 manis we i stap kam,
ol brata sista bambae oli stat blong instolem
ol paep blong wota mo lektrik
aninit long graon,
finisim ol wok blong
tufala men intrens blong eria ya
mo wokem ol faswan
fandesen blong ol bilding.
Afta long hemia,
bae yumi save stat blong wokem ol bilding
olsem ples blong paking
mo ol bilding blong slip long hem.
Yumi luk klia olsem wanem Jehova i stap
blesem projek ya we i stap gohed gud.
Yumi prea se Jehova i gohed blong blesem
mo lidim projek blong Ramapo.
Mo mifala i glad
long yufala ol brata sista raon long wol
we yufala i stap sapotem wok blong Kingdom.
Yufala i soemaot sem tingting
we i stap long Ol Sam 110:3:
“Ol man blong yu
bambae oli glad nomo
blong kam joen long dei
we ol ami blong yu oli go faet.
Yu yu gat kampani blong ol yang man
we oli olsem ol wota blong naet
long eli moning.”
Sam wok blong oganaesesen
yumi no save luk,
be sam nara wok blong oganaesesen
yumi save luk.
Eksampol,
oganaesesen blong Jehova
i yusum plante defren brata mo sista
long ol pija
mo ol video blong yumi.
Yumi luk klia
olsem wanem oganaesesen
i yusum ol video mo ol drama
long ol yia we i pas.
Eksampol, long yia ya,
mifala i sua se yufala i enjoem episod wan
blong video blong Gud Nius Blong Jisas.
Mo yumi wantem tumas
blong wajem olgeta 18 episod blong hem.
Mo yumi talem tangkiu
long ol bigfala wok
we oli brata sista oli mekem,
blong mekem se
ol stori ya blong Baebol oli laef.
Ol video blong yumi
oli soem fes blong plante brata sista.
Samtaem yumi luk
intaviu blong wan brata o sista
o yumi harem wan ekspiriens
blong laef blong olgeta.
Samtaem oli aktem
wan man o woman long Baebol
o wan long taem blong yumi tede.
Mo maet,
yu yu save wan brata o sista
we i gat privilej ya.
Be kwestin blong yumi hemia:
?Wanem tingting blong yumi
long saed blong olgeta
we oli kamaot long ol video?
Ol brata mo sista
we oli kamaot long ol video ya
oli ol man blong God we oli gat tingting daon.
Oli no wantem kasem
haenem from wok blong Jehova.
Defren olgeta,
oli wantem se glori i go long Jehova nomo.
Mo yumi glad se
bighaf blong ol brata sista blong yumi
oli holemtaet tingting ya.
Nating se i olsem,
i gat wan woning blong yumi:
Yumi mas lukaot
blong no leftemap wan brata o sista
we i aktem wan man o woman
long video blong yumi.
Defren olgeta,
yumi wantem folem bilif
blong ol man mo woman long Baebol.
Sipos yumi leftemap ol brata sista
o tinghae bitim mak long olgeta,
?bambae oli harem olsem wanem?
Maet bae oli no save haremgud mo oli sem.
Maet hemia nao filing blong olgeta,
taem yumi askem olgeta
blong tekem wan foto tugeta.
Mo maet oli save harem nogud moa
sipos yumi postem ol foto ya long sosol media.
Long Jud 16,
Baebol i agensem fasin blong
“tok swit long ol narafala
blong kasem samting nomo.”
O olsem futnot i talem,
Baebol i agensem fasin ya
blong “leftemap narafala man.”
So sipos yumi tinghae bitim mak
o leftemap ol brata sista
we oli kamaot long ol video,
hemia i save mekem se oli sem
mo oli no fri blong joen wetem ol narafala.
Taswe i impoten tumas blong gat stret tingting
long olgeta we oli kamaot long ol video.
?Yu tingbaot wan man long Baebol
we ol man oli stap leftemap hem
from wok blong Jehova?
Ating yu tingbaot Pol mo Banabas, ah.
Ol Wok japta 14 i soem se
ol man oli stap leftemap tufala
afta we oli mekem wan merikel
blong hilim wan sikman.
Merikel ya i blong mekem bilif i strong,
i blong pulum ol man
blong oli givim glori
mo presem Jehova.
?Be wanem i hapen?
Ol man long taem ya oli no presem God.
Oli girap
oli stap leftemap Pol mo Banabas.
Ol Wok 14:11, 12 i se:
“Taem ol man oli luk samting we Pol i mekem,
oli singaot bigwan long lanwis blong Likaonia,
oli talem se:
‘!Ol god oli jenis oli kam man,
mo oli kamdaon long yumi!’
Nao oli stat blong singaot Banabas se Sus,
be oli singaot Pol se Heremes
from we hem nao i stap toktok.”
?Yufala i luk problem?
Oli no leftemap Jehova from merikel ya.
Oli stap leftemap ol man
we Jehova i yusum olgeta.
?Yu ting se Pol mo Banabas
oli glad long fasin ya?
Bae yumi ridim vas 14 mo 15:
“Be taem tufala aposol ya i harem samting ya,
tufala i terem klos blong tufala,
mo tufala i resis i go
long medel blong ol hip man ya,
tufala i singaot bigwan se:
‘!Olgeta!
?From wanem yufala i stap
mekem samting ya?
Mitufala i man nomo olsem yufala.
Mo mitufala i stap
talemaot gud nius long yufala,
blong yufala i lego ol samting ya
we oli blong nating nomo,
mo yufala i kam man blong God ya we i laef,
we i mekem heven mo wol mo solwota.’”
Pol mo Banabas oli kwik
blong stretem tingting blong ol man ya.
Oli talem stret se
oli ol man nomo olsem olgeta.
Pol i eksplenem se mak blong olgeta
i blong talem gud nius
long saed blong Jehova.
Mo Jisas i mekem sem samting.
Hem i wantem se ol man oli leftemap God.
Be i gat wan taem
we ol man oli no kasemsave
long tijing blong Jisas.
Nao oli wantem leftemap Jisas.
Jon 6:14, 15 i se:
“Taem ol man oli luk merikel ya,
oli talem se:
‘Tru, hemia Profet ya nao we bifo
oli bin talem se bambae hem i kam long wol.’
Nao Jisas i save we
olgeta oli wantem fosem hem
mo mekem hem i kam king,
nao hem i aot long olgeta,
i go hem wan antap long bigfala hil.”
Jisas i no wantem haenem.
“Hem i aot long olgeta,”
hem “i go hem wan antap long bigfala hil.”
Ol eksampol ya oli givhan long yumi
blong no leftemap ol brata sista
we oli kamaot long ol video.
I klia se ol brata mo sista ya
oli gat tingting daon
blong mekem ol wok blong oganaesesen.
Olsem Pol, Banabas mo Jisas
oli wantem se yumi leftemap Jehova nomo.
I tru se
samtaem sam brata sista
oli aktem ol man blong Jehova.
Be samtaem oli save aktem
ol enemi blong Jehova.
Hemia i no wan isi samting ya
blong wan gudfala man blong Jehova
i aktem wan enemi blong God.
Yumi no wantem blong gat nogud tingting
long wan brata o sista
we i aktem enemi blong God
long ol video blong yumi.
I klia se i impoten tumas
we yumi gat stret tingting
long ol brata sista olsem.
I gud yumi evriwan
ol brata mo sista
yumi gohed blong joengud
mo leftemap Jehova nomo
be i no olgeta
we oli kamaot long ol video blong yumi.
?So yumi lanem wanem long apdet ya?
Yumi glad tumas se Sista Saron Ghebru
i kamaot long kalabus long Eritrea.
Be yumi gohed blong prea
from ol brata sista raon long wol
we oli kalabus from bilif blong olgeta
mo namba blong olgeta i bitim 235.
Yumi glad tumas
se minisipol blong taon blong Ramapo
i apruvum ol plan blong yumi
blong bigfala bilding wok
blong Ramapo Betel.
Mo yumi luk se i impoten tumas
we yumi no leftemap
ol brata sista blong yumi
we oli kamaot long ol video.
Plis tingbaot se
mifala i lavem yufala tumas.
Long Wol Hedkwota blong
Ol Witnes blong Jehova,
hemia hem i JW Brodkasting®.

2024 Hed Kampani Apdet #8