JW subtitle extractor

Welkam long apdet ya.
Bae yumi stat wetem apdet
blong ol wok we oganaesesen i mekem
blong halpem ol pablisa
we oli jes fesem ol disasta i no longtaem.
Long stat blong Jenuware 2025,
long saot blong California, Yunaeted Stet,
bitim 1,100 pablisa oli mas lego
haos blong olgeta from bus faea.
Long 23 Jenuware,
bus faea ya i bonem 91 haos blong olgeta
mo 48 haos i gat damej.
Wan Disasta Rilif Komiti
i stat oganaesem ol wok
blong givhan long ol pablisa.
Ol elda mo ol eria elda tu oli givhan
blong meksua se ol pablisa
oli gat samting we oli nidim.
I no longtaem i pas,
ol pablisa long Kuba
oli safa from ol hariken mo ol etkwek.
Ol disasta ya i spolem klosap
500 haos blong ol brata mo sista.
Branj blong Kuba i stanemap
wan Disasta Rilif Komiti
blong lukaot long nid blong ol pablisa.
Oli givim kakae mo klos,
mo oli givhan blong fiksim
ol haos blong olgeta.
Long aelan blong Mayot,
we i stap long is kos blong Afrika,
i gat samwe 130 pablisa.
Ol brata sista ya tu oli safa from ol hadtaem
olsem, i no gat naf wota,
praes blong ol samting i go antap
mo i gat ol faet.
Mo long Disemba 2024,
Saeklon Chido i kasem olgeta
nao i spolem ol rod,
paoa i kat, mo i no moa gat intenet.
Mo tu, saeklon ya i spolem
36 haos blong ol pablisa
mo, tu Haos Kingdom long aelan ya.
Branj blong Franis i stap
lukaot long nid blong ol pablisa.
Long 26 Disemba,
Branj i sanem eit brata sista i go long Mayot.
Long grup ya, i gat
wan eria elda mo wan dokta
mo oli givhan long ol nid blong ol pablisa.
Mo sore tumas
from we long 13 Jenuware 2025,
wan narafala saeklon i kasem olgeta bakegen.
Mosambik tu i bin fesem
Saeklon Chido long Disemba.
Saeklon ya i spolem 28 haos blong ol pablisa
mo, tu ples blong mekem miting.
Long semtaem,
ol pablisa long nara haf blong kantri ya tu
oli safa from i no moa gat ren
mo i gat ol faet.
Plis gohed blong prea
from ol brata sista blong yumi long ol ples ya
mo long plante narafala ples
we oli fesem ol strong disasta olsem.
Yumi glad tumas long
gudfala wok we ol branj ofis
mo yufala, ol brata sista, i stap mekem
blong sapotem ol rilif wok.
Tangkiu tumas long gladhat blong yufala
blong givim presen mane,
hemia i givhan long ol pablisa
blong kasem samting
we oli nidim long ol hadtaem.
Long 6 Disemba 2024,
kot blong Rasia i talem se fo sista
oli stap mekem “wok blong teroris”
nao oli fosem olgeta blong mekem sam wok.
?From wanem kot i tekem desisen olsem?
From oli bin mit tugeta blong tokbaot Baebol.
Panis blong ol sista ya
bae i stap blong bitim tu yia.
Be ol sista oli apil long desisen blong kot.
Blong sikis yia finis,
gavman i stap agensem ol fofala sista ya
wetem ol famle blong olgeta.
Ol hasban blong tri long ol sista ya
oli stap finis long kalabus from ol giaman ripot.
Long 18 Disemba 2024,
long Tukmenistan,
Brata Arslan Vepayev we i gat 21 yia
i go long kalabus from
hem i no wantem joen long faet.
Kot i talem se bambae
hem i kalabus blong tu yia.
Long 8 Jenuware 2025,
hem i apil i go long wan narafala kot,
mo kot ya i se bae hem i save
kamaot long kalabus
be bae i mas mekem sam
strong wok blong tu yia ya.
Yes, mifala i glad blong talem
se Arslan i kamaot finis long kalabus
mo i stap naoia wetem famle blong hem.
Long Eritrea,
23 brata sista oli bin go long kalabus
from oli bin mekem miting tugeta
long Septemba 2024.
Wan long olgeta hemia
Sista Mizan Gebreyesus
we i gat 82 yia.
Mifala glad blong talem long yufala se
long 15 Jenuware 2025,
Sista Miza i kamaot long kalabus.
Naoia hem i stap kasem
tritmen from helt blong hem.
Olsem we yumi harem long laswan apdet,
Sista Saron Ghebru i kamaot long kalabus
long 7 Disemba 2024.
Mifala i glad blong talem long yufala se
hem i bonem pikinini gel blong hem finis,
mo tufala tugeta i oraet.
Plis gohed blong prea from ol brata sista ya
mo bitim 235 long olgeta raon long wol
we oli stap naoia long kalabus
from bilif blong olgeta.
Nating se i gat disasta mo fasin agens,
oganaesesen blong Jehova
i stap gohed blong muv i go fored.
Olsem 2 Timoti 4:5 i talem:
“Yu mas stanap strong long ol hadtaem,
yu mas mekem wok blong ivanjelis,
mo yu mas finisim gud minista wok blong yu.”
Ol tok blong Pol long Timoti
i leftemap tingting blong yumi
blong stanap strong
be long semtaem,
yumi ‘mas finisim gud minista wok blong yumi.’
From samting ya,
bae yumi tokbaot sam samting
we i save givhan long yumi
blong mekem olsem.
Raon long wol,
Kingdom Ministri Skul blong yia 2025
i stap gohed naoia.
Skul ya i blong trenem ol eria elda,
ol elda mo ol man blong givhan.
Mak blong skul ya i blong givhan long ol brata
blong ol mekem gud wok ya
blong lukaot long ol sipsip
mo blong oli folem gud fasin blong Jehova
insaed long kongregesen.
Wan spesel haf blong skul ya long yia ya,
hemia se ol waef blong ol elda
mo ol man blong givhan
oli save joen tu blong harem
tufala laswan tok blong skul ya.
Wan narafala blesing
hemia se i gat wan niufala program
blong trenem ol brata blong
Hospital Infomesen Dipatmen
blong ol branj ofis raon long wol.
Biaen bae ol brata ya oli trenem ol brata
we oli stap long
Komiti Blong Toktok Wetem Dokta.
Program ya bae i givhan long ol brata
blong oli kam gud moa long fasin ya
blong halpem ol pablisa we oli sik
mo blong halpem olgeta
blong oli faenem beswan tritmen
we oli no nidim blong tekem blad.
Yumi glad tumas long ol wok we
bitim 50,000 brata blong yumi
long Komiti Blong Toktok Wetem Dokta
o long Grup Blong Visitim Ol Sikman,
oli stap mekem.
Wan samting we yumi save enjoem
hemia niu apdet long JW Library app
we i givhan long yumi blong mekem risej
long semtaem we yumi ridim Baebol.
?Wanem apdet ya?
Yumi wajem.
Long niu apdet blong JW Library,
yumi ademap sam niu samting
blong givhan long ol
risej blong yumi long Baebol.
Eksampol,
taem yu openem Luk japta 2,
evri save long saed blong japta ya
bambae oli kamaot long raet saed blong skrin.
Sipos yu wantem luk
ol save blong wan vas nomo,
klikim vas ya,
mo afta klikim pija blong daeman
blong luk risej infomesen blong vas ya.
Faswan samting we bae yu luk
hemia ol pesnel not blong yu.
Aninit, sipos i gat long lanwis blong yu,
bae yu luk ol stadi not, ol pija,
ol sot video, ol refrens mo futnot.
Mo tu, i gat ol nara refrens
blong Buk Blong Mekem Risej.
Hemia i save givhan long yu blong luk
olgeta save we i kamaot finis
long lanwis blong yu,
mo blong yu faenem ol poen
we yu stap lukaotem.
Eksampol,
maet hem i wan poen we i kamaot
long atikol blong wan Wajtaoa
o maet hem i wan poen we i kamaot
long wan narafala buk blong yumi.
Buk Blong Mekem Risej
i gat ol refrens blong ol buk
stat long yia 1986 kasem naoia.
So taem yu mekem risej,
i gud yu stat wetem
ol refrens we oli jes kamaot,
blong meksua se ol save ya oli ol apdet wan.
Risej infomesen ya i save halpem yu
blong save moa ol vas we yu ridim
mo blong rerem ol ansa blong yu.
Yumi glad tumas se
Jehova i givim JW Library app
mo ol nara tul blong halpem yumi
blong ‘finisim gud minista wok blong yumi.’
Wan narafala tul we i nambawan
hemia buklet ya
Lavem Ol Man—Mekem Disaepol.
Buklet ya i givhan long yumi blong
kamgud moa long wok blong prij,
blong save olsem wanem blong soem intres
mo blong rere blong jenisim tok blong yumi,
blong yumi save statem
storian wetem narafala.
?From wanem i impoten
blong save olsem wanem
blong statem storian wetem ol man?
From yumi wantem halpem ol man
blong oli save kam disaepol
blong Masta Jisas Kraes,
mo tijim olgeta long saed blong
nambawan God blong yumi, Jehova.
?Be samtaem,
yu yu harem se i had blong
statem storian wetem wan man
from yu no sua long wanem blong talem?
Maet yumi harem se i had blong
mekem olsem long haos blong man.
?Wanem i save givhan long yumi
blong statem storian?
I gat wan apendiks long buklet ya
Lavem Ol Man we i se,
“Ol Trutok We Yumi Laekem Blong Tokbaot.”
I gat ol tijing blong Baebol
we yumi save mo yumi laekem.
Eksampol,
“God i gat wan nem,”
“God i no stap mekem yumi safa,”
mo “Ol dedman bambae oli laef bakegen.”
?Olsem wanem blong statem
storian wetem ol trutok ya?
Apendiks i talem olsem se:
“Bifo we yu serem wan trutok,
askem long man se:
‘?Yu yu save se . . . ?’
o ‘?Yu yu bin harem se . . . ?’
Biaen yu yusum wan o sam vas
blong eksplenem trutok ya.”
Hemia wan eksampol.
Long sam ples,
afta we yumi talem halo long man blong haos,
yumi save statem storian
wetem wan kwestin olsem se,
“?Yu yu save se God i gat wan nem?”
Biaen serem vas we i joen
wetem trutok long saed ya.
Hemia wan isi rod we yumi save folem.
Be tingbaot se
yumi mas tingbaot man blong haos fastaem
mo afta jusum wan trutok
we yumi luk se bae hem
i intres blong lesin long hem.
Taswe apendiks i gat 34 trutok
we yumi save jusum.
Blong kam gud moa,
mi sua se yufala i agri
se yumi mas spenem taem
blong lanem wanwan long
ol trutok ya mo ol vas blong hem.
Sipos yumi save gud ol trutok ya,
bae yumi rere blong save weswan nao
bae i save pulum intres blong
man we yumi storian wetem.
?So yumi save mekem wanem
blong lanem ol trutok ya?
Yumi save lanem long
taem blong famle wosip,
from ol pikinini blong yumi
tu oli nidim blong save,
blong oli save tokbaot
ol trutok ya long ol narafala.
Traem luk olsem wanem
wan famle i mekem olsem.
!Nambawan!
Yu tingbaot gud vas ya we yumi ridim las wik.
OK,
so yumi wantem tingbaot evriwan, ah.
So bae yumi lanem wan moa trutok
we yumi laekem blong tokbaot.
?Wanem vas i talem se God i gat wan nem?
Ophelia.
Ol Sam 83 . . .
83 . . .
No wari gel.
Yu save yusum buklet.
Luk long ples ya we i talem se “God.”
!Eitin! !Ah yes!
Ol Sam 83:18.
Yes, nambawan.
Nao, ?vas ya i talem wanem?
“I gud olgeta man oli save se yu,
we nem blong yu Jehova,
yu nomo yu Hae God long fulwol.”
Nambawan.
Mi laekem fasin blong yu blong ridim,
from yu makem gud nem blong Jehova.
Alba.
I gat Jeremaea 10:10 tu.
Nambawan.
?Wanem tok long vas ya
we i tijim trutok long saed blong God?
I se: “Jehova nao i God.”
!Yu kasem!
Ok tufala,
?olsem wanem yumi save yusum ol vas ya
blong tijim trutok ya se God i gat wan nem?
Alba, talem hat blong yu.
Mi save askem man blong haos se,
“Yu save se God i gat wan nem?”
Nambawan.
?Afta bae yu mekem wanem?
Bae mi save soem Ol Sam 83:18.
!Gud wan!
Mi glad long yutufala.
Yutufala i stap lanem gud ol trutok ya
we yumi laekem blong tokbaot
mo ol vas we i joen wetem.
Yumi evriwan, ol yangfala o olfala,
yumi glad long ol trutok ya.
I gud yu traem lanem tugeta wetem ol fren.
Poen se,
moa we yumi lanem ol trutok ya
mo stat yusum olgeta,
moa we bambae yumi kam gud moa
blong statem ol storian wetem ol man
mo tijim trutok blong Baebol.
Wan nara samting we i save
givhan blong rerem yumi
i stap long lesen 1
blong buklet ya Lavem Ol Man.
Poen 3 i halpem yumi blong tingbaot
samting we ol man long komuniti
oli stap tingbaot.
Eksampol,
yumi save askem yumi wan se:
‘?Wanem i stap kamaot long nius?’
O ‘?Ol neba, ol fren long wok,
o long skul oli stap tokbaot wanem?’
Afta yumi save tingbaot se:
‘?Weswan long ol trutok ya
bae i stret long situesen ya?’
Olsem Pol,
yumi rere blong tokbaot samting
we man i intres long hem.
Pol i talem long 1 Korin 9:22, 23 se:
“Mi mi mekem evri samting
we mi naf blong mekem
blong givhan long enikaen man,
blong mi save sevem sam long olgeta.
Mi mi mekem evri samting from gud nius,
blong mi save talemaot long ol narafala man.”
Yes, hemia nao mak blong yumi
blong tokbaot samting
we ol man oli intres long hem.
Long rod ya,
yumi soemaot se
yumi stap “mekem evri samting
we [yumi] naf blong mekem
blong givhan long enikaen man,
blong [yumi] save sevem sam long olgeta.”
I gud Jehova i gohed blong
blesem yumi evriwan
taem yumi wok tugeta
we “solda blong [yumi] i joen
long solda blong narawan.”
Ol gudfala brata mo sista,
mifala i lavem yufala tumas.
Long Wol Hedkwota
blong Ol Witnes blong Jehova,
hemia hem i JW Brodkasting.

2025 Hed Kampani Apdet #1