JW subtitle extractor

弟兄姊妹大家好
歡迎收睇今次嘅報導
今日我哋想講吓
點樣運用聖經原則去做明智嘅決定
不過我哋先講吓一啲鼓舞人心嘅消息吖
好開心最近舉行多兩場特別區域大會
2025年5月23至25號呢個週末
喺玻利維亞嘅聖克魯斯就舉行咗其中一場
呢一次係見證人喺玻利維亞
有史以嚟最大規模嘅大會
有超過1900個代表出席佢哋嚟自10個國家
最高嘅出席人數有19233人
另外仲有277個人受浸添
另一場就喺6月13至15號
喺阿爾巴尼亞嘅地拉那舉行
最高嘅出席人數有8987人
當中包括接近2000位嚟自17個國家嘅代表
呢一次亦都係我哋喺阿爾巴尼亞
舉行過最多人出席嘅大會
我哋好開心見到有83人受浸啊
睇到咁多弟兄姊妹一齊崇拜耶和華
真係令人好開心
呢啲大會令我哋諗起詩篇133:1嘅說話
經文話「睇吓！
弟兄團結同住
幾咁美善幾咁可喜」
跟住落嚟想講吓
我哋可以點樣運用聖經原則
喺生活上做明智嘅決定
而唔係一味跟住一大堆嘅規條
請諗吓一個例子吖
我哋細個嗰陣
父母為咗保護我哋都會定一啲規矩
例如佢哋會話
「每次過馬路都一定要拖實大人隻手啊」
父母定呢啲規矩
都係想令我哋避開危險
但係到我哋大個
就唔使拖住爹哋媽咪隻手嘞
係咪過馬路唔再危險呢？
唔係啊
而係我哋已經識得睇清楚有冇車
確保安全先至過馬路
講真吖如果一個健健康康成30歲嘅人
仲要拖住媽咪隻手先識得過馬路嘅話
都有啲奇怪啊
同樣成熟嘅基督徒
都唔需要下下有規條先識做決定
相反我哋會識得根據聖經原則考慮唔同嘅情況
如果聖經冇直接話嗰件事應該點樣做
就會用受聖經訓練過嘅良心嚟做決定
例如你可能都聽過一啲圖案或者習俗
佢嘅起源可能同錯誤宗教有關
請諗吓我哋嘅弟兄姊妹遍佈240個國家同地區
你可唔可以想像
佢哋加加埋埋會見到幾多圖案要面對幾多習俗呢？
我哋可以點樣決定
接唔接受呢啲圖案或者習俗呢？
我哋可以考慮3個相關嘅聖經原則
第一
呢一樣嘢會唔會令耶和華唔高興呢？
喺哥林多後書6:17就好清楚噉講
「耶和華話『所以
你哋要從佢哋當中出嚟同佢哋分開
唔好再接觸不潔嘅嘢』『我就接納你哋』」
所以基督徒一定會遠遠噉避開
所有同錯誤宗教或者通靈術有關嘅符號同埋習俗
第二
呢個會唔會影響弟兄姊妹呢？
羅馬書14:19同21噉講
「所以我哋要努力促進和睦互相鼓勵
如果會使你嘅弟兄跌倒
無論係食肉係飲酒
定係其他任何事都一律唔做」
就算一個圖案或者習俗本身冇問題
我哋都要顧及其他弟兄姊妹嘅諗法同埋感覺
我哋唔會明知道其他人唔鍾意
都堅持自己嘅選擇
同時成熟嘅基督徒亦都會尊重其他人
根據聖經原則訓練過嘅良心所做嘅決定
第三
喺我嘅文化入面
又或者本地人係點睇嗰啲圖案或者習俗呢？
有咩聖經原則呢？
哥林多前書9:20,21,23話
「對猶太人我就做猶太人為咗幫助猶太人
對受法典約束嘅人我雖然唔受法典約束
仍然好似受法典約束嘅人
為咗幫助受法典約束嘅人
對冇法典嘅人我就做冇法典嘅人
為咗幫助冇法典嘅人
不過我必須遵守上帝嘅法律
亦都受基督嘅法律約束
我願意為好消息做任何事
目的係向其他人傳講好消息」
呢個原則就係
我哋需要考慮其他人嘅諗法同埋感受
了解我哋文化或者住喺同一個地方嘅人
點樣睇呢啲符號同習俗係好重要㗎
有時某個圖案或者習俗喺我哋嘅地方
可能會令好多人唔鍾意
不過喺另一個地區就完全冇問題
1976年英語版嘅《警醒》
有一篇文章就提出咗一個好值得我哋諗吓嘅問題
「對於嗰啲曾經喺某個時代或者地方
同錯誤宗教有關嘅圖案同埋設計
基督徒應該有乜嘢睇法？
呢個問題牽涉嘅層面好廣
例如當你揀用邊款牆紙
買乜嘢花紋嘅領呔、裙
乜嘢款式嘅袖口鈕、手鈪、頸鏈
甚至揀燈飾或者餐具嗰陣
都會考慮呢個問題
你可能會諗
呢個設計係咪同偶像崇拜有某啲關係呢？」
然後佢提到一個要點
「好多時設計嘅含義會隨住地點同時間而有所改變
同樣嘅圖案對身處某個時間或者地點嘅人有特定嘅含義
但係對其他地方或者另一個時代嘅人就有唔同嘅意義
所以基督徒應該考慮乜嘢因素呢？
唔係考慮某個設計或者圖案對古代嘅人有乜嘢意義
又或者其他地區嘅人嘅睇法
而係喺我哋目前生活嘅地方
大多數人對佢有乜嘢感覺？」
呢篇文章提到一啲常見嘅圖案
佢哋以往都同錯誤宗教有關
但係到咗今日再冇噉樣嘅含義嘞
文章舉咗個例子包括心形、百合花飾同埋紅石榴
呢一篇文章有一個好好嘅總結
「既然有咁多圖案都曾經同錯誤宗教有關
如果一個人真係花時間去仔細研究
可能會發現幾乎每一個圖案都係有問題㗎
噉做只會增添不必要嘅負擔
浪費寶貴嘅時間同精力
如果喺你生活嘅地方
普遍嘅人認為某個設計或者圖案同宗教有關
噉我哋就應該避免使用
另外如果好多人對某個符號或者裝飾品特別敏感
成熟嘅基督徒就可能唔會使用
以免冒犯或者絆倒其他人」
真係好實用嘅提醒呀
習俗都一樣㗎
人對呢啲嘢嘅睇法都會隨時間改變
《警醒》2000年1月8日刊有篇文章
題目係〈對流行嘅習俗懷有平衡嘅睇法〉
裡面噉樣講㗎
「好多習俗曾經一度同宗教有密切關係
事實上當中有唔少係源自古代嘅迷信風俗
以及一啲唔符合聖經嘅宗教觀念」
呢篇文章舉咗幾個例子
當中有啲習俗嘅起源都係同錯誤宗教有關
但係篇文章繼續話
「不過久而久之
呢啲習俗嘅宗教色彩已經被淡化
而家呢啲禮儀風俗已經唔帶有任何宗教意味嘞」
文章繼續講「基督徒最關心嘅係乜嘢呢？
雖然有時我哋有理由要考究某個習俗嘅來源
但係更重要嘅係我哋要清楚知道
目前喺我哋住嘅地方一般人對嗰個習俗到底有乜嘢睇法
如果喺年中嘅某個日子
或者喺某個情況之下恪守某個習俗係抵觸聖經教訓
或者意識上係有問題嘅
噉基督徒就最好避免喺嗰陣噉樣做嘞」
今日有乜嘢常見嘅例子呢？
好多人打喊露嗰陣都會揞住個口
原來喺古代啲人打喊露嗰陣用手揞住個口
係防止靈魂喺個口度走出嚟
噉今日又點呢？
一般人都覺得噉樣做係有禮貌
而唔會諗到任何同靈魂有關嘅事
結婚戒指又點呢？
有啲歷史學家話
呢個係源自一啲違反聖經嘅信仰
但係今日大部分人認為戴結婚戒指
只係代表嗰個人結咗婚啫
有個例子就説明
喺乜嘢時間做某樣嘢都係好關鍵㗎
好多喺沃威克嘅伯特利成員
都鍾意掛一啲燈串喺佢哋嘅露台做裝飾㗎
除咗喺11同埋12月嗰陣
點解呢？
因為喺美國呢度
一般人喺呢啲日子見到燈串都會聯想起聖誕節
所以伯特利成員唔想令其他人覺得
佢哋慶祝緊呢個錯誤宗教嘅節日
仲有一個例子就係祝酒同埋碰杯
好多年嚟耶和華見證人都唔會噉樣做
原因係呢個習俗可能源自錯誤宗教
不過喺好多地方
而家嘅人唔會將碰杯或者祝酒
同宗教習俗聯繫埋一齊
啲人只係覺得噉做係表達同朋友一齊好開心
所以中央長老團經過仔細考慮同禱告之後決定
喺碰杯同祝酒方面唔需要定規條俾大家
每一個基督徒都應該用呢一個報導提到嘅聖經原則
同受聖經訓練過嘅良心做正確嘅決定
噉即係點呢？
係咪話由而家開始我哋無論咩時候、咩場合
祝酒同碰杯都冇問題呢？
當然唔係啦
我哋只係認為唔需要為大家定規條
每個基督徒都應該按照聖經原則
喺唔同嘅情況之下決定點樣做
耶和華嘅子民遍佈喺240個國家同地區
係會遇到好多唔同嘅情況㗎
我哋真係好感激
耶和華賜呢啲咁實用嘅聖經原則俾我哋啊
不如我哋一齊溫習吓吖
首先最重要嘅係我哋愛耶和華
時時刻刻都想令佢開心
我哋可以問吓自己
喺呢個場合祝酒會唔會令上帝唔開心呢？
在場嘅人係咪慶祝緊同宗教或者國家有關嘅節日呢？
定係我哋只係想表達好珍惜同對方嘅友誼
希望對方健健康康呢？
第二我哋都愛弟兄姊妹
唔想做一啲嘢令佢哋唔舒服
我哋尊重佢哋嘅良心同埋感受
第三因為我哋愛耶和華同其他人
所以會考慮喺我哋住嘅地方或者文化入面
一般人點樣睇呢一個習俗
我哋學到啲咩呢？
耶和華冇定一大堆規條令我哋覺得有負擔
相反佢通過佢嘅話語俾咗好多原則我哋
佢幫我哋學識仔細分析情況
喺選擇係咪接受某啲圖案或者習俗方面
做明智又有愛心嘅決定
我哋亦都要尊重其他人嘅良心
唔好強迫人同我哋有一樣嘅觀點同埋做法
耶和華俾咗自由我哋
所以我哋都要尊重其他人選擇嘅自由
我哋實踐聖經原則嘅時候
有愛心同辨識力就能夠保持團結
亦都唔會絆倒其他人
我哋會繼續為你哋禱告
就好似保羅喺以弗所書4:13所講嘅一樣
希望「所有人都喺信仰上完全一致
喺確切認識上帝嘅仔方面亦都完全一致
而且長大成人好似基督一樣完全成熟」
各位弟兄姊妹請記得我哋真係好愛你哋每一位
呢度係耶和華見證人世界總部嘅JW電視

2025來自中央長老團的報導（四）