JW subtitle extractor

大家好歡迎收睇今次嘅報導
喺呢個報導我哋會講吓呢個世界提供嘅教育
你係咪好想聽落去呢？
不如先講吓啲最新消息吖
自從上次嘅報導以嚟
我哋舉行多8場特別區域大會
喺比利時嘅根特先後舉行咗兩場
其餘嘅就喺蘇格蘭嘅格拉斯哥
克羅地亞嘅薩格勒布
美國嘅薩克拉門托
仲有盧旺達嘅基加利
日本嘅橫濱
同埋美國嘅盧德代爾堡舉行
見到世界各地弟兄姊妹嘅笑容
仲有佢哋團結噉崇拜耶和華真係開心啊
睇完頭先嘅片段
你可能已經好期待下年嘅區域大會
你想唔想知道出年大會嘅主題係乜嘢呢？
2026年區域大會嘅主題係「永恆幸福」
真係好期待啊！
另外好開心話俾大家知
下年喺17個國家會舉行19場國際大會
喺9月初各群會眾就會收到進一步嘅資料
就好似近排週中聚會都提過
我哋會喺9月展開一個全球特別運動
盡力向人分發
「唔再有戰爭有冇可能呢？」呢期守望台
呢個題目真係好合時啊
到時JW網站嘅首頁都會重點推介呢期守望台
傳道嘅時候試吓多啲運用吖
你係咪諗住做輔助先驅呢？
如果係喺呢個月你嘅時間定額可以係15或者30個鐘
又或者試吓喺新嘅工作年度做正規先驅吖
除此之外我哋會有一個特別公眾演講
題目同呢期守望台一樣㗎
就係「唔再有戰爭有冇可能呢？」
大部分會眾都會喺9月22號嗰個星期聽到呢個演講
跟住落嚟我哋會集中講吓同教育有關嘅問題
雖然呢個話題主要嘅對象係年輕人同埋佢哋嘅父母
但係都值得我哋所有人留意㗎
你可能聽過人問你「你第時想做啲咩呀？」
當然最好梗係參與全時服務啦
不過參與全時服務嘅人都要賺錢維持生活㗎
喺一啲地方嗰度嘅人接受完基本教育
可能都搵到足夠嘅收入
但係喺另一啲地方
如果你唔想成日加班又可以賺到足夠嘅收入
可能就要再讀多啲書嘞
喺噉嘅情況或者你好自然會諗
「究竟我係咪應該接受額外嘅教育呢？
如果係嘅話讀啲咩呢？」
噉我哋講嘅額外教育係指啲咩呢？
指嘅係任何基礎教育以外嘅培訓或者課程
所以呢個包括讀大學、大專、學徒訓練計劃
中專課程、技術學院、職業培訓或者一啲短期嘅課程
噉到底作為一個基督徒
我哋應唔應該報讀呢啲課程呢？
我哋想喺今次嘅報導講吓組織嘅睇法更新咗
就係即使報讀某啲課程可能會帶嚟一啲危險
不過接唔接受額外嘅教育都係個人嘅決定
聖經嘅加拉太書6:5話
「每個人都要負起自己嘅責任」
所以每一個成年人都要自己決定
究竟接唔接受額外嘅教育
而父母就有責任喺呢方面為未成年嘅仔女作決定
同時亦都要裝備佢哋
等佢哋喺成年之後識得做明智嘅決定
噉點樣先至可以喺接受額外教育方面
做明智嘅決定呢？
每一個成年嘅基督徒同埋有未成年仔女嘅家主
喺作決定之前應該禱告
然後考慮聖經嘅原則
同埋諗吓同嗰個課程相關嘅唔同因素
要記得雖然長老或者成熟嘅弟兄姊妹
可以幫我哋睇清楚接受額外教育有啲咩利弊
但係任何人包括長老
都唔應該批評其他人喺呢方面作嘅決定
接受額外嘅教育有好處但係都有壞處㗎
噉有咩聖經原則可以幫我哋作好嘅決定呢？
箴言14:15有一個好好嘅原則經文下半節話
「精明審慎嘅人步步留心」
要禱告
我再講多次
要禱告
年輕人要同父母傾吓然後考慮兩樣嘢
第一諗吓你點解想讀呢？
第二分析呢個課程會對你有啲咩影響？
而家我哋逐一講吓呢兩點吖
第一諗吓點解想讀呢？
問吓自己「我想繼續升學嘅動機係乜嘢呢？」
好多人噉做係因為想第時搵份好工係佢哋鍾意嘅
可以賺多啲錢又唔使成日加班做得咁辛苦
噉樣諗係咪錯嘅呢？
都唔一定嘅
有啲弟兄姊妹因為噉可以做先驅
或者參與其他全時服務
不過聖經警告我哋唔好追求財富
或者覺得越有錢就越有保障
如果你係想得到財富或者地位
噉最終你唔單止會覺得好空虛
仲可能會同耶和華疏遠
冇嘢我再講多一次
冇嘢重要得過崇拜耶和華我哋嘅上帝
所以接受任何額外教育都係為咗幫助我哋維持生活
然後全心全意為耶和華服務
要記得耶穌喺馬太福音6:33嘅說話
「要一直將上帝嘅王國同埋上帝視為啱嘅事擺喺
［擺喺邊呢?] 第一位
噉所有你哋需要嘅嘢佢都會賜俾你哋」
有一位姊妹佢叫做何塞菲娜
佢讀完一個課程成為咗美容師佢噉樣講
「讀呢個課程係為咗幫助我
可以有多啲時間為耶和華服務
接受額外教育應該幫助我哋達到崇拜嘅目標
我哋唔應該本末倒置」
另一位姊妹叫伊麗斯佢完成咗一個牙科嘅課程
佢話「接受額外嘅教育係有啲好處嘅
但係佢就唔能夠帶俾人真正嘅成功同滿足」
佢仲話「其實道理好簡單嘅啫
如果你將耶和華放喺第一位
你就會有真正嘅成功同埋滿足」
冇錯如果你最重視嘅係自己同耶和華嘅友誼
就會識得作最好嘅決定令你得到真正嘅快樂
做明智決定嘅第二步
就係要分析呢個課程會對你有啲咩影響
如果我哋唔接受額外教育
係咪都可以維持生活呢？
好多做先驅嘅弟兄姊妹都可以搵到兼職嘅工作
就好似芬蘭嘅喬安娜姊妹噉樣
佢冇接受額外嘅教育
佢話「畢業之後我就一邊做先驅一邊返兼職
我做過好多唔同嘅工作
耶和華真係好似佢應承嘅噉一直照顧我」
如果你仲讀緊書
不妨盡早同父母一齊研究一吓第時做乜嘢好
噉無論畢業之後你係想做嘢
定係接受額外嘅教育
而家就可以揀啲相關嘅科目嚟讀嘞
如果你考慮緊繼續升學嘅話
要諗吓噉樣做會佔用你幾多時間
你仲有冇時間維持好嘅崇拜習慣
負起家庭責任呢？
我哋會唔會因為讀書讀得好攰
而冇精力準備聚會資料或者研讀聖經？
亦都要諗吓要讀幾耐呢？
係幾年定係幾個月呢？
傳道書12:1鼓勵年輕人
「喺年少嘅日子就要將你偉大嘅創造主銘記在心
唔好等到辛苦嘅日子
就係將來你話『乜嘢樂趣都冇』嘅年頭來臨」
如果你選擇接受額外嘅教育
你可唔可以趁後生將最好嘅獻俾耶和華
例如參與全時服務呢？
又或者你想讀嘅有冇啲短期課程？
亦都要考慮吓另一啲問題
例如喺邊度讀同埋學費係幾多
你想讀嘅學校會唔會就喺你屋企附近呢？
定係離你屋企好遠？
又使唔使你住喺學校嘅宿舍呢？
要小心啊
你搬出嚟住好可能會影響自己同耶和華嘅關係
特別係同一啲信仰唔同嘅人一齊住就更加危險喇
如果你決定接受額外嘅教育
可唔可以考慮繼續同屋企人一齊住
又或者揀一啲網上課程嚟讀呢？
要記得耶穌教我哋嘅原則喺路加福音14:28
佢教導人要做周詳嘅計劃
「你哋想起一座塔有邊個唔會先坐低計算使費
睇吓起唔起得成呢？」
喺一啲地方唔使俾好多錢都可以升學
因為政府都會有補貼
但喺另一啲地方就可能要借錢先讀到
仲要還好多年債
所以最好喺接受額外教育之前就諗清楚
而唔係讀咗先諗
另外仲要考慮一吓就業嘅機會
你讀嘅嗰個課程係咪真係幫到你搵工？
更加重要嘅係
可唔可以幫你將上帝嘅王國放喺第一位？
如果你已經禱告
考慮清楚點解要讀同埋讀嘅話對你有咩影響
你亦都已經同父母商量過衡量過利弊
同埋諗咗一個可行嘅計劃
最後你決定升學接受額外嘅教育
噉你可以點樣繼續鞏固同耶和華嘅關係呢？
你需要留意上帝喺腓立比書3:16嘅指引經文話
「無論如何我哋進步到乜嘢程度
就應該沿住同一條道路井然有序噉繼續前進」
喺原文入面「沿住同一條道路
井然有序噉繼續前進」係軍事術語嚟㗎
嚟形容一班士兵步伐一致噉向前行
如果你接受額外教育
都要喺崇拜上帝方面繼續向前行
唔好企喺度唔郁唔好後退
點先可以做到呢？
其中一個關鍵就係維持良好嘅崇拜習慣
繼續升學可能會令你好忙
一唔小心你就可能會覺得崇拜耶和華唔係咁重要
甚至停止參與崇拜嘅活動添
要記得哥林多前書15:58嘅吩咐
「幾時都要［我重複多次］幾時都要多做主嘅工作
因為知道你哋嘅辛勞喺主嗰度唔係白費嘅」
要問吓自己「為咗可以經常聚會
傳道、研讀聖經
我有咩計劃呢？」
最重要嘅事應該係崇拜上帝而唔係讀書啊
一個叫莎曼莎嘅姊妹話「我同自己講
如果我嘅學業會影響我崇拜耶和華嘅話
我就唔會再讀落去」
另一點就係唔好受呢個世界嘅思想影響
有啲課程會攙雜咗「哲學同空虛騙人嘅說話」
例如無神論同埋進化論
或者鼓勵你只係信自己而唔係信賴上帝
箴言5:1,2提醒我哋要「保護思考力」
想保護思考力嘅話
喺接受額外教育之前
就要確保自己肯定聖經教嘅係真理
試吓問吓自己呢啲問題吖
「點解我相信有上帝呢？
我點解相信聖經嘅道德標準係最好嘅？」
如果你決定讀上去
都要繼續喺崇拜上做個好學生認真研讀聖經
另一點好重要嘅就係要學識安排時間
讀書可以用你好多時間㗎
如果冇管理好時間
你就可能會好大壓力甚至影響健康添
相信你都唔想噉
以弗所書5:15,16提醒我哋
「要仔細留意……盡力善用時間」
讀書期間你可以經常問吓自己
「我嘅時間表有冇幫我喺健康
崇拜同埋學業方面保持平衡呢？
定係係時候調整一吓呢？」
最後一點就係要小心選擇同咩人一齊
噉做可以保護你同上帝嘅關係
喺學校
你嘅同學可能會成日叫你同佢哋一齊去玩
不過你要小心啊
雖然你哋係同學喺同一個課室
但係你嘅價值觀同佢哋唔同㗎
你越經常同佢哋一齊就越容易受佢哋影響
經常同唔愛上帝嘅人一齊會有啲咩後果呢？
箴言13:20話「同有智慧嘅人同行就有智慧
同愚昧嘅人來往就會吃虧」
最好每個月都問吓自己
「崇拜耶和華仲係唔係我生活嘅重心呢？
我嘅時間表合唔合理？
我對耶和華嘅信心有冇動搖呢？」
如果你察覺到危險嘅跡象就要即刻調整喇
千祈唔好俾學業妨礙你全心全意崇拜耶和華
我哋總結一吓
首先接唔接受額外嘅教育係個人嘅決定嚟㗎
但係要記得如果唔小心嘅話
可能會破壞你同上帝嘅關係
想做正確嘅決定就要運用聖經原則
要禱告一定要噉做
然後諗清楚點解要讀
同埋了解課程相關嘅細節
年輕人記得耐心噉同父母商量吓
如果你決定接受額外嘅教育
點做就可以繼續同耶和華有好嘅關係呢？
要有良好嘅崇拜習慣保護你嘅思考力
好好安排時間同埋小心選擇同啲咩人來往
千祈唔好唔記得你嘅目標
你嘅目標唔係要喺呢個世界出人頭地
而係要榮耀耶和華
弟兄姊妹我哋真係好愛你哋每一位
呢度係耶和華見證人世界總部嘅JW電視

2025來自中央長老團的報導（五）