JW subtitle extractor

大家好欢迎收睇今次嘅报导
喺呢个报导我哋会讲吓呢个世界提供嘅教育
你系咪好想听落去呢？
不如先讲吓啲最新消息吖
自从上次嘅报导以嚟
我哋举行多8场特别区域大会
喺比利时嘅根特先后举行咗两场
其余嘅就喺苏格兰嘅格拉斯哥
克罗地亚嘅萨格勒布
美国嘅萨克拉门托
仲有卢旺达嘅基加利
日本嘅横滨
同埋美国嘅卢德代尔堡举行
见到世界各地弟兄姊妹嘅笑容
仲有佢哋团结噉崇拜耶和华真系开心啊
睇完头先嘅片段
你可能已经好期待下年嘅区域大会
你想唔想知道出年大会嘅主题系乜嘢呢？
2026年区域大会嘅主题系“永恒幸福”
真系好期待啊！
另外好开心话俾大家知
下年喺17个国家会举行19场国际大会
喺9月初各群会众就会收到进一步嘅资料
就好似近排周中聚会都提过
我哋会喺9月展开一个全球特别运动
尽力向人分发
“唔再有战争有冇可能呢？”呢期守望台
呢个题目真系好合时啊
到时JW网站嘅首页都会重点推介呢期守望台
传道嘅时候试吓多啲运用吖
你系咪谂住做辅助先驱呢？
如果系喺呢个月你嘅时间定额可以系15或者30个钟
又或者试吓喺新嘅工作年度做正规先驱吖
除此之外我哋会有一个特别公众演讲
题目同呢期守望台一样㗎
就系“唔再有战争有冇可能呢？”
大部分会众都会喺9月22号嗰个星期听到呢个演讲
跟住落嚟我哋会集中讲吓同教育有关嘅问题
虽然呢个话题主要嘅对象系年轻人同埋佢哋嘅父母
但系都值得我哋所有人留意㗎
你可能听过人问你“你第时想做啲咩呀？”
当然最好梗系参与全时服务啦
不过参与全时服务嘅人都要赚钱维持生活㗎
喺一啲地方嗰度嘅人接受完基本教育
可能都揾到足够嘅收入
但系喺另一啲地方
如果你唔想成日加班又可以赚到足够嘅收入
可能就要再读多啲书嘞
喺噉嘅情况或者你好自然会谂
“究竟我系咪应该接受额外嘅教育呢？
如果系嘅话读啲咩呢？”
噉我哋讲嘅额外教育系指啲咩呢？
指嘅系任何基础教育以外嘅培训或者课程
所以呢个包括读大学、大专、学徒训练计划
中专课程、技术学院、职业培训或者一啲短期嘅课程
噉到底作为一个基督徒
我哋应唔应该报读呢啲课程呢？
我哋想喺今次嘅报导讲吓组织嘅睇法更新咗
就系即使报读某啲课程可能会带嚟一啲危险
不过接唔接受额外嘅教育都系个人嘅决定
圣经嘅加拉太书6:5话
“每个人都要负起自己嘅责任”
所以每一个成年人都要自己决定
究竟接唔接受额外嘅教育
而父母就有责任喺呢方面为未成年嘅仔女作决定
同时亦都要装备佢哋
等佢哋喺成年之后识得做明智嘅决定
噉点样先至可以喺接受额外教育方面
做明智嘅决定呢？
每一个成年嘅基督徒同埋有未成年仔女嘅家主
喺作决定之前应该祷告
然后考虑圣经嘅原则
同埋谂吓同嗰个课程相关嘅唔同因素
要记得虽然长老或者成熟嘅弟兄姊妹
可以帮我哋睇清楚接受额外教育有啲咩利弊
但系任何人包括长老
都唔应该批评其他人喺呢方面作嘅决定
接受额外嘅教育有好处但系都有坏处㗎
噉有咩圣经原则可以帮我哋作好嘅决定呢？
箴言14:15有一个好好嘅原则经文下半节话
“精明审慎嘅人步步留心”
要祷告
我再讲多次
要祷告
年轻人要同父母倾吓然后考虑两样嘢
第一谂吓你点解想读呢？
第二分析呢个课程会对你有啲咩影响？
而家我哋逐一讲吓呢两点吖
第一谂吓点解想读呢？
问吓自己“我想继续升学嘅动机系乜嘢呢？”
好多人噉做系因为想第时揾份好工系佢哋钟意嘅
可以赚多啲钱又唔使成日加班做得咁辛苦
噉样谂系咪错嘅呢？
都唔一定嘅
有啲弟兄姊妹因为噉可以做先驱
或者参与其他全时服务
不过圣经警告我哋唔好追求财富
或者觉得越有钱就越有保障
如果你系想得到财富或者地位
噉最终你唔单止会觉得好空虚
仲可能会同耶和华疏远
冇嘢我再讲多一次
冇嘢重要得过崇拜耶和华我哋嘅上帝
所以接受任何额外教育都系为咗帮助我哋维持生活
然后全心全意为耶和华服务
要记得耶稣喺马太福音6:33嘅说话
“要一直将上帝嘅王国同埋上帝视为啱嘅事摆喺
［摆喺边呢?] 第一位
噉所有你哋需要嘅嘢佢都会赐俾你哋”
有一位姊妹佢叫做何塞菲娜
佢读完一个课程成为咗美容师佢噉样讲
“读呢个课程系为咗帮助我
可以有多啲时间为耶和华服务
接受额外教育应该帮助我哋达到崇拜嘅目标
我哋唔应该本末倒置”
另一位姊妹叫伊丽斯佢完成咗一个牙科嘅课程
佢话“接受额外嘅教育系有啲好处嘅
但系佢就唔能够带俾人真正嘅成功同满足”
佢仲话“其实道理好简单嘅啫
如果你将耶和华放喺第一位
你就会有真正嘅成功同埋满足”
冇错如果你最重视嘅系自己同耶和华嘅友谊
就会识得作最好嘅决定令你得到真正嘅快乐
做明智决定嘅第二步
就系要分析呢个课程会对你有啲咩影响
如果我哋唔接受额外教育
系咪都可以维持生活呢？
好多做先驱嘅弟兄姊妹都可以揾到兼职嘅工作
就好似芬兰嘅乔安娜姊妹噉样
佢冇接受额外嘅教育
佢话“毕业之后我就一边做先驱一边返兼职
我做过好多唔同嘅工作
耶和华真系好似佢应承嘅噉一直照顾我”
如果你仲读紧书
不妨尽早同父母一齐研究一吓第时做乜嘢好
噉无论毕业之后你系想做嘢
定系接受额外嘅教育
而家就可以拣啲相关嘅科目嚟读嘞
如果你考虑紧继续升学嘅话
要谂吓噉样做会占用你几多时间
你仲有冇时间维持好嘅崇拜习惯
负起家庭责任呢？
我哋会唔会因为读书读得好攰
而冇精力准备聚会资料或者研读圣经？
亦都要谂吓要读几耐呢？
系几年定系几个月呢？
传道书12:1鼓励年轻人
“喺年少嘅日子就要将你伟大嘅创造主铭记在心
唔好等到辛苦嘅日子
就系将来你话‘乜嘢乐趣都冇’嘅年头来临”
如果你选择接受额外嘅教育
你可唔可以趁后生将最好嘅献俾耶和华
例如参与全时服务呢？
又或者你想读嘅有冇啲短期课程？
亦都要考虑吓另一啲问题
例如喺边度读同埋学费系几多
你想读嘅学校会唔会就喺你屋企附近呢？
定系离你屋企好远？
又使唔使你住喺学校嘅宿舍呢？
要小心啊
你搬出嚟住好可能会影响自己同耶和华嘅关系
特别系同一啲信仰唔同嘅人一齐住就更加危险喇
如果你决定接受额外嘅教育
可唔可以考虑继续同屋企人一齐住
又或者拣一啲网上课程嚟读呢？
要记得耶稣教我哋嘅原则喺路加福音14:28
佢教导人要做周详嘅计划
“你哋想起一座塔有边个唔会先坐低计算使费
睇吓起唔起得成呢？”
喺一啲地方唔使俾好多钱都可以升学
因为政府都会有补贴
但喺另一啲地方就可能要借钱先读到
仲要还好多年债
所以最好喺接受额外教育之前就谂清楚
而唔系读咗先谂
另外仲要考虑一吓就业嘅机会
你读嘅嗰个课程系咪真系帮到你揾工？
更加重要嘅系
可唔可以帮你将上帝嘅王国放喺第一位？
如果你已经祷告
考虑清楚点解要读同埋读嘅话对你有咩影响
你亦都已经同父母商量过衡量过利弊
同埋谂咗一个可行嘅计划
最后你决定升学接受额外嘅教育
噉你可以点样继续巩固同耶和华嘅关系呢？
你需要留意上帝喺腓立比书3:16嘅指引经文话
“无论如何我哋进步到乜嘢程度
就应该沿住同一条道路井然有序噉继续前进”
喺原文入面“沿住同一条道路
井然有序噉继续前进”系军事术语嚟㗎
嚟形容一班士兵步伐一致噉向前行
如果你接受额外教育
都要喺崇拜上帝方面继续向前行
唔好企喺度唔郁唔好后退
点先可以做到呢？
其中一个关键就系维持良好嘅崇拜习惯
继续升学可能会令你好忙
一唔小心你就可能会觉得崇拜耶和华唔系咁重要
甚至停止参与崇拜嘅活动添
要记得哥林多前书15:58嘅吩咐
“几时都要［我重复多次］几时都要多做主嘅工作
因为知道你哋嘅辛劳喺主嗰度唔系白费嘅”
要问吓自己“为咗可以经常聚会
传道、研读圣经
我有咩计划呢？”
最重要嘅事应该系崇拜上帝而唔系读书啊
一个叫莎曼莎嘅姊妹话“我同自己讲
如果我嘅学业会影响我崇拜耶和华嘅话
我就唔会再读落去”
另一点就系唔好受呢个世界嘅思想影响
有啲课程会搀杂咗“哲学同空虚骗人嘅说话”
例如无神论同埋进化论
或者鼓励你只系信自己而唔系信赖上帝
箴言5:1,2提醒我哋要“保护思考力”
想保护思考力嘅话
喺接受额外教育之前
就要确保自己肯定圣经教嘅系真理
试吓问吓自己呢啲问题吖
“点解我相信有上帝呢？
我点解相信圣经嘅道德标准系最好嘅？”
如果你决定读上去
都要继续喺崇拜上做个好学生认真研读圣经
另一点好重要嘅就系要学识安排时间
读书可以用你好多时间㗎
如果冇管理好时间
你就可能会好大压力甚至影响健康添
相信你都唔想噉
以弗所书5:15,16提醒我哋
“要仔细留意……尽力善用时间”
读书期间你可以经常问吓自己
“我嘅时间表有冇帮我喺健康
崇拜同埋学业方面保持平衡呢？
定系系时候调整一吓呢？”
最后一点就系要小心选择同咩人一齐
噉做可以保护你同上帝嘅关系
喺学校
你嘅同学可能会成日叫你同佢哋一齐去玩
不过你要小心啊
虽然你哋系同学喺同一个课室
但系你嘅价值观同佢哋唔同㗎
你越经常同佢哋一齐就越容易受佢哋影响
经常同唔爱上帝嘅人一齐会有啲咩后果呢？
箴言13:20话“同有智慧嘅人同行就有智慧
同愚昧嘅人来往就会吃亏”
最好每个月都问吓自己
“崇拜耶和华仲系唔系我生活嘅重心呢？
我嘅时间表合唔合理？
我对耶和华嘅信心有冇动摇呢？”
如果你察觉到危险嘅迹象就要即刻调整喇
千祈唔好俾学业妨碍你全心全意崇拜耶和华
我哋总结一吓
首先接唔接受额外嘅教育系个人嘅决定嚟㗎
但系要记得如果唔小心嘅话
可能会破坏你同上帝嘅关系
想做正确嘅决定就要运用圣经原则
要祷告一定要噉做
然后谂清楚点解要读
同埋了解课程相关嘅细节
年轻人记得耐心噉同父母商量吓
如果你决定接受额外嘅教育
点做就可以继续同耶和华有好嘅关系呢？
要有良好嘅崇拜习惯保护你嘅思考力
好好安排时间同埋小心选择同啲咩人来往
千祈唔好唔记得你嘅目标
你嘅目标唔系要喺呢个世界出人头地
而系要荣耀耶和华
弟兄姊妹我哋真系好爱你哋每一位
呢度系耶和华见证人世界总部嘅JW电视

2025来自中央长老团的报导（五）