JW subtitle extractor

Modi ki nhos sta?
Nhos é ben-vindu pa nos prugrama!
Oji nu sta ben pâpia sobri
bai universidadi i faze formason.
Kel-li txoma-u atenson?
Boa.
Má primeru, nu krê da nhos alguns informason.
Désdi nos últimu rilatóriu,
dja fazedu 8 kongrésu spesial na kes lugar li:
Ghent, na Béljika,
Glasgow, na Skósia,
Zagreb, na Kroásia,
Sacramento, na Mérka,
más un na Ghent;
Kigali, na Ruanda,
Yokohama, na Japon,
i na Fort Lauderdale, na Mérka.
Nu ta xinti sábi dimás
di odja nos irmons ku irmans na mundu interu
kontenti ta adora Jeová djuntu!
Óras ki nu ta pensa na kes momentu sábi li,
nu ta pergunta:
‘Kuzê ki ta ben kontise na kel otu kongrésu?’
Bu ta gostaba di sabe téma di kongrésu pa 2026?
É un bon téma.
Kel téma é: “Filisidadi pa tudu ténpu”.
Ta parse interesanti.
Tanbê, nu sta kontenti di fla nhos
ma na 2026 ta ben fazedu
19 kongrésu internasional na 17 país.
Na komésu di setenbru,
kongregasons ta ben resebe más informason.
Sima dadu avizu na runion di meiu di simana ka dura li,
na mês di setenbru,
nu ta ben faze un kanpanha na mundu interu
ku kel Sentinéla ku téma:
“Modi ki géra ta ben kaba?”
Na ténpu ki nu sta vive
bu ta konsigi imajina un téma midjór di ki kel-li?
Duránti mês di setenbru,
kanpanha ta ben ser distaki na nos pájina prinsipal jw.org.
Nton nu pode uza-l dretu óras ki nu sta na pregason.
Dja bu pensa na ser pioneru ajudanti?
Si sin, bu pode skodje da 15 ô 30 óra na pregason.
Más un pergunta:
Bu ta pode ser pioneru fíksu na es novu anu di sirvisu?
Alén di kel-li,
nu ta ben ten un diskursu spesial ku kel mésmu téma di Sentinéla:
“Modi ki géra ta ben kaba?”
Kel diskursu spesial ta ben fazedu na maioria di kongregason
na simana di 22 di setenbru.
Gósi, nu sta ben pâpia sobri bai universidadi ô faze formason.
Nu sta ben pâpia prinsipalmenti ku jóvens i ses pai ku ses mai,
enbóra nos tudu nu pode tra pruvetu di es informason.
Txeu jóven ta perguntadu:
“Kuzê ki bu krê faze óras ki bu bira grandi?”
Ki é klaru ki midjór manera di bu uza bu vida
na sirvisu di Jeová.
Má simé, bu ta meste di dinheru
pa bu ranja kes kuza ki bu ta meste.
Na alguns lugar,
bu ka meste ten txeu skóla pa bu pode ten un vida dretu.
Na otus país, bu ten ki ten un kursu ô un formason
si bu krê atxa un trabadju ki bu ka ta trabadja txeu óra
i ki ta pagadu dretu.
Na kel situason li, un algen pode pergunta:
‘N debe faze un kursu ô un formason?
Si sin, kal di es?’
Óras ki nu sta ta pâpia di faze un kursu ô un formason,
nu krê fla bai pa skóla
alén di kel ki govérnu ta iziji ma tudu algen debe bai,
ki ta involve kursus ki ta dadu na universidadi,
skólas di formason profisional,
skólas tékniku
i otus tipu di formason ô kursu.
É dretu pa un sérvu di Jeová faze un kursu ô un formason?
Na es rilatóriu, nu krê pâpia ku nhos sobri es asuntu.
Enbóra alguns kursu ô formason pode frakise nos amizadi ku Jeová,
é kada sérvu di Jeová ki ta disidi si
el ta faze un formason ô un kursu.
Na Gálatas 6:5, Bíblia ta fla:
“Pamodi kada un ta leba se própi karga di responsabilidadi.”
Nton, kada algen ta toma se própi disizon
si el ta faze un kursu ô un formason.
Pai ku mai tanbê ten responsabilidadi
di djuda ses fidju odja ki disizon ki es ta toma.
Ses orientason pode djuda ses fidju
toma bons disizon sobri kel asuntu li
óras ki es bira grandi.
Modi ki nu pode toma bons disizon
óras ki nu ta analiza si nu ta faze un kursu ô un formason?
Kada sérvu di Jeová,
i si el é menór di idadi, kada xéfi di família,
debe faze orason i djobe prinsípius di Bíblia
i djobe tudu kuza ki sta involvidu
na faze un kursu ô un formason
antis di toma un disizon.
Komu un ansion, ô un amigu di kunfiansa
pode djuda-nu odja kes vantajen i disvantájen
di faze un kursu ô un formason.
Má ningen, nen mésmu ansion,
ka debe julga un sérvu di Jeová
pamodi disizon ki el toma sobri kel asuntu li.
Kal ki é ladu puzitivu i negativu
di faze un kursu ô formason?
Kuzê ki pode djuda-u toma un bon disizon?
Nu ta atxa un bon konsedju na Provérbios 14:15.
Últimu parti ta fla:
‘Ken ki é prudenti ta pensa antis di el da kada pasu.’
Ora sobri kel-li.
N ta torna ripiti.
Ora sobri kel-li.
Si bo é jóven,
pâpia ku bu pai ku bu mai sobri kel-li.
Dipôs, pensa na kes pasu li.
Primeru, djobe bus motivason.
Sugundu, djobe kuzê ki sta involvidu
na faze kel kursu ô formason.
Nu ben pâpia di kes dôs pontu li.
Primeru, djobe bus motivason.
Pensa na kel purgunta li:
‘Pamodi ki N krê faze kel kursu ô formason?’
Txeu algen ta faze kel-li
pa el pode atxa un trabadju ki el gosta di el,
ki ta pagadu dretu
ô ki ten un bon orariu.
Pensa si é mariadu?
Pa un ladu, nau.
Pa un kriston, kel-li pode djuda-l ser pioneru
ô djuda na otus tipu di diziginason pa ténpu interu.
Má, Bíblia ta aviza-nu
ma dinheru ka debe ser kel kuza más inportanti pa nos
ô ma nu ka debe kunfia sô na se proteson.
Si bu obijetivu é ser riku ô ten fama,
bu ka ta ser un algen filís
i bu pode prujudika bu amizadi ku Jeová.
Nada,
N ta torna ripiti,
nada ka debe ser más inportanti
di ki nos sirvisu pa Jeová.
Nton kalker kursu ô formason
debe ser pa djuda-u timenti bu ta konsentra bu vida
na sirbi Jeová di tudu bu korason.
Lenbra di kuzê ki Jizus fla na Mateus 6:33:
“Pur isu, nhos kontinua ta buska Reinu i justisa di Deus
[Ki palavra ki ta ben dipôs?]
primeru [primeru],
i nhos ta dadu tudu kes otu kuza.”
Un irman ki txoma Jozéfina
ki faze kursu di stétika,
txiga kel konkluzon li.
El fla: “Kel kursu ki N faze da-m xansi
di atxa un trabadju ki ta djuda-nu
gasta más ténpu na sirvisu di Jeová.
Nha amizadi ku Jeová
é kel kuza más inportanti pa mi,
é ka kel kursu.”
Un otu irman ki txoma Iris,
ki faze un kursu di txeu ténpu pa ser dentista, fla:
“Faze un kursu ô un formason pode djuda-u na alguns kuza,
má nunka el ka ta da-u kel filisidadi di verdadi.”
Tanbê el fla:
“Segredu é sinplis:
Si Jeová é kel algen más inportanti na bu vida,
bu ta ten bons rezultadu na vida
i bu ta ser filís.”
Nton, óras ki nos amizadi ku Jeová
é kel kuza más inportanti na nos vida,
nu ta toma disizons ki ta djuda-nu ser filís pa tudu ténpu.
Sugundu pasu pa bu toma un bon disizon
é djobe kuzê ki sta involvidu na kel kursu ô formason.
Bu pode ten kes kuza ki bu meste sen faze un kursu ô formason?
Txeu pioneru ta konsigi kel-li ku un trabadju di meiu píriudu.
Pur izénplu, un irman ki txoma Juana, di Finlándia,
ka faze ninhun kursu ô formason.
El fla: “Dipôs di liseu,
N kumesa ta trabadja pa meiu píriudu i ser pionera.
Dja N faze txeu tipu di trabadju,
i dja N odja modi ki Jeová sénpri kunpri se promésa
di da-m kel ki N meste.”
Si bu pâpia di kel-li ku bu mai i ku bu pai txeu ténpu antis,
nhos ta ten ténpu di piskiza txeu
tipu di trabadju ki bu pode gosta.
Bu pode skodje kes ária na skóla
ki ta djuda-u ten un bon trabadju
ô ki ta djuda-u faze un kursu ô formason dipôs.
Si bu sta ta pensa na faze un kursu ô formason,
djobe kantu ténpu ki el ta dura.
El ta djuda-u ten un bon rotina spritual
i kuida di bus responsabilidadi na família?
Kel kursu ô formason ki bu ta bai faze ta dexa-u kansadu dimás
ki bu ta fika sen forsa di pripara pa runion
ô faze studu pesoal?
El ta dura txeu?
Kantu mês ô kantu anu ki el ta ba dura?
Eclesiastes 12:1 ta insentiva jóvens:
‘Nton, lenbra di bu Grandiozu Kriador na bu juventudi,
antis di ben kes ténpu di sufrimentu
i txiga kes anu ki bu ta fla:
“N ka tene prazer na es.”’
Si bo é jóven,
faze un kursu ô un formason
ta djuda-u da bu midjór pa Jeová,
talvês na sirvisu pa ténpu interu,
timenti inda bu é jóven?
Ten un kursu ô un formason
ki ta dura más poku na kel mésmu ária?
Pensa tanbê na undi ki
bu ten ki ba faze kel formason ô kursu
i kantu ki el ta kusta.
Talvês bu pode atxa un skóla ki ta fika pértu di bu kaza.
Má i si bu atxa un skóla ki ta fika na un otu sidadi?
I si bu ten ki ba mora djuntu ku bus koléga na undi ki bu ta studa?
Toma kuidadu!
Muda pa lonji di bu família pode
poi bu amizadi ku Jeová na prigu,
prinsipalmenti si bu ten ki bai mora ku un família
ô otus algen ki ka ta sirbi Jeová.
Si bu disidi faze un kursu ô un formason,
ta da pa bu faze kel-li timenti bu ta mora ku bu pai ku bu mai
ô ti mésmu pa internet?
Lenbra di kel prinsípiu ki Jizus fla na Lukas 14:28.
El ta insentiva-nu pa nu faze planus ku kuidadu:
“Kal di nhos, ki si krê faze un tori,
primeru el ka ta xinta i djobe kantu ki el ta kusta,
asi pa el odja si kel ki el ten ta txiga pa tirmina-l?”
Na alguns país, faze un kursu ô formason é baratu,
ti mésmu é govérnu ki ta paga.
Má na otus país kel mésmu kursu ô formason
pode kusta karu dimás ki bu ten ki leba txeu anu pa paga.
Midjór óra di bu pensa na kes kuza li
é antis di bu kumesa un kursu ô un formason,
é ka dipôs ki dja bu kumesa.
Ten un otu kuza inportanti
ki bu debe pensa na el.
Kel kursu ô formason ta ba djuda-u atxa un trabadju?
Más inportanti inda, el ta ba djuda-u poi Reinu na primeru lugar?
Nton, imajina ma dja bu faze orason,
dja bu djobe bus motivason
i dja bu analiza tudu kuza ki sta involvidu.
I si bo é jóven,
dja bu pâpia ku bu pai ku bu mai sobri kel-li.
Dja bu analiza kes prigu i dja bu faze planu.
I si bu disidi faze algun kursu ô formason?
Modi ki bu pode mante bu amizadi ku Jeová timenti bu ta studa?
Bu ta meste sigi kel konsedju
ki sta na Filipensis 3:16.
El ta fla:
“Ka ta inporta kal ki é prugrésu ki dja nu faze,
nu kontinua ta anda na es mésmu kaminhu.”
Kel vérbu gregu ki uzadu pa
“kontinua ta anda na es mésmu kaminhu”
txeu bês ta uzadu pa pâpia di trópas.
Kel palavra ta uzadu pa pâpia di trópas
ta marxa tudu djuntu.
Si bu disidi faze un kursu ô formason,
bu meste kontinua ta marxa na sirvisu di Jeová,
bu ka debe fika paradu, nen vólta pa tras.
Kuzê ki pode djuda-u faze kel-li?
Segredu é kontinua ku un bon rotina spritual.
Kel kursu ô formason pode pô-u más okupadu ô más kansadu.
Si bu ka toma kuidadu,
bu pode kumesa ta da ménus valor pa bu sirvisu pa Jeová.
Bu pode kumesa ta dexa bu rotina spritual di ladu.
Bu debe obi ku kel konsedju ki sta na 1 Koríntius 15:58:
“Nhos sta sénpri [N ta ripiti otu bês, sénpri] okupadu na óbra di Sinhor,
pamodi nhos sabe ma nhos trabadju duru pa Sinhor é ka atoa.”
Pensa na kel-li:
‘Ki planus ki N faze pa N kontinua ta pripara i ta sisti runion,
sai na pregason i faze studu pesoal?’
Lenbra ma bu sirvisu pa Jeová é más inportanti
di ki kalker formason ô kursu.
Un irman ki txoma Samantha fla:
“N disidi ma si nha kursu ô nha formason
ka ta dexaba mi da nha midjór pa Jeová,
N ta largaba el.”
Otu kuza inportanti é proteje nos kapasidadi di pensa.
Alguns kursu ô formason ten filozofia i ideias falsu
ki ta inklui ivoluson i kes ki ka ta kridita na Deus.
Ô el pode pô-u ta kunfia más na bu kabésa di ki na Jeová.
Na Provérbios 5:1, 2, Bíblia ta fla
pa nu ‘proteje nos kapasidadi di pensa.’
Pa bu proteje bu kapasidadi di pensa,
antis di bu faze un kursu ô formason
bu debe ten serteza ma kel ki bu ta kridita na el é verdadi.
Pensa na kes pergunta li:
‘Pamodi ki N ta kridita na Deus?
Kuzê ki ta konvense-m ma kel ki Bíblia ta fla sobri konportamentu é midjór?’
Si bu disidi na faze un kursu ô formason,
kontinua ta ser un bon studanti di Palavra di Deus.
Óras ki bu ta faze un kursu ô formason
é inportanti bu uza bu ténpu ku sabedoria.
Faze un kursu ô formason ta toma-u ténpu.
Si bu ka uza bu ténpu ku sabedoria,
ansiadadi ta toma kónta di bo
ô bu pode fika duenti.
Modi ki bu pode ivita kel-li?
Efézius 5:15, 16 ta fla:
“Nhos toma txeu kuidadu . . . ,
uza nhos ténpu di midjór manera.”
Sénpri djobe modi ki bu sta uza bu ténpu timenti bu ta studa.
Djobe si bu sta kontinua ku un bon saúdi,
un bon amizadi ku Jeová,
si bu sta studa kes matéria
ô si bu meste faze algun mudansa.
Un otu kuza ki pode djuda-u proteje bu amizadi ku Jeová
é skodje dretu ku kenha ki bu ta pasa ténpu.
Si bu disidi faze un kursu ô formason,
bus koléga di turma pode konvida-u pa bu pasa ténpu ku es dipôs di skóla.
Má, bu debe toma kuidadu.
Es ka ta sirbi Jeová
i es ka ta insentiva-u pa bu faze kel ki Jeová ta fla ma é dretu.
I kantu más ténpu bu pasa djuntu ku es,
más bu ta fika ta pensa sima es ta pensa.
Bíblia ta fla kal ki é prigu di pasa ténpu ku kes ki ka ta sirbi Jeová.
Provérbios 13:20 ta fla:
‘Ken ki ta anda ku algen ki ten sabedoria, ta ganha sabedoria,
Má ken ki ta sta djuntu ku algen ki ka ten juís, ta ten prublémas.’
Tudu mês bu debe pensa na kes pergunta li:
‘Inda N sta ta kontinua ta da Jeová nha midjór?
N sta ta uza nha ténpu dretu?
Inda N ten serteza ma kel ki Bíblia ta fla é verdadi?’
Si bu xinti ma algun kuza ka sta dretu, aji faxi!
Ka bu dexa bu kursu ô formason inpidi-u di sirbi Jeová di tudu bu korason.
Nton, kuzê ki nu pâpia di el?
Faze un kursu ô formason é disizon di kada algen.
Má lenbra, ma si bu ka toma kuidadu
kel-li pode prujudika bu amizadi ku Jeová.
Modi ki bu pode toma un bon disizon?
Dexa prinsípius di Bíblia gia-u.
Ora, N ta ripiti,
ora sobri bus motivason i sobri tudu kuza ki sta involvidu.
Si bo é jóven, pâpia ku bu pai ku bu mai sobri kel asuntu li.
Si bu disidi faze un kursu ô formason,
kuzê ki pode djuda-u kontinua amigu di Jeová?
Kontinua ku un bon rotina spritual,
proteje bus pensamentu,
uza bu ténpu ku sabedoria,
i skodje dretu kenha ki bu ta pasa ténpu ku el.
Lenbra sénpri di bu obijetivu.
Bu obijetivu é ka ten susésu na es mundu,
má é da glória pa Jeová.
Irmons ku irmans, nu krê fla nhos ma nu ta ama nhos txeu.
Kel-li é JW Broadcasting®
di Sédi Mundial di Tistimunhas di Jeová!

Rilatóriu di Grupu Enkaregadu di Óbra di 2025 — Nunbru 5