JW subtitle extractor

Nhos é ben-vindu!
Na es rilatóriu nu sta ben pâpia di kuza sábi
ki kontise na nos trabadju di pregason na 2025.
Tanbê nu ta ben konta nhos alguns spiriénsia ki kontise
na kanpanha di setenbru ki ta da-nu koraji.
Má, primeru nu krê da nhos alguns informason.
Di 24 ti 26 di otubru di 2025,
fazedu un kongrésu spesial na Kobe, na Japon.
Más di 3 mil irmon di 35 país bai sisti kel kongrésu.
Kel nunbru más altu di algen ki sisti é 22.591.
I foi sábi dimás odja 93 algen ta batiza.
Kongrésu ta bira-nu más amigu di nos irmons,
má tanbê el ta da un grandi tistimunhu.
Un irmon di Ilhas Maurísiu ki ba sisti kongrésu na Japon fla:
“Un kuzinheru di otel pergunta:
‘Anhos é ki grupu?’
N splika-l ma nos é Tistimunhas di Jeová
ki ben sisti un atividadi spesial.
El fla:
‘Tudu algen ki sta uza kel kraxá li
ta sta sénpri kontenti i es ta mostra txeu bondadi.’
Dipôs kel kuzinheru traze un koléga di sel i el fla:
‘Kes-li é kes algen ki N flaba bo sobri es.
Es ta bisti dretu i es é idukadu.’
Kel kuzinheru ti mésmu fla ma el ta bai
sisti kongrésu na se dia di fólga.
Na fin di konbérsu el fla:
‘Dja N konxeba misionárius di otus relijion
má nhos é txeu diferenti.’
I el fla ma el sta ta gosta más inda di se trabadju
pamodi el ta odja irmons ku irmans duránti dia.”
Adorason puru ta da glória pa Jeová.
Enbóra kongrésu traze-nu txeu alegria,
alguns di nos irmons pasa pa situasons difísil
pamodi dizastris na naturéza.
Pur izénplu, nos irmons na Filipinas
pasa pa txeu dizastris na naturéza sô na 7 simana.
Kontise três tenpistadi grandi i
dôs tremor di téra ku forsa.
Pamodi kel-li uns 2 mil publikador
tevi ki sai di ses kaza i 99 kaza fika distruídu.
Tanbê 548 kaza i 36 Salon di Reinu fika stragadu.
10 di nos irmons ku irmans panha pankada
má, filismenti ninhun di nos irmon ka móre.
Fazedu 12 Kumison pa Djuda na
Ténpu di Dizastri pa djuda nos irmons.
Na dia 28 di otubru di 2025,
kontise un furakon fórti na Jamaika.
Pa kel ki nu sabe,
kel-li é un di kes furakon ki faze más stragu
ki dja kontise na Osianu Atlántiku.
Pamodi kel txuba fórti,
txeu lugar na sul di Jamaika fika xeiu di agu i alguns algen móre.
Kel mésmu furakon li tanbê prujudika alguns párti di Aiti,
Repúblika Dominikana, Kuba, Bahamas, Ilhas Turkus i Kaikus i Bermudas.
Modi ki nos irmons fika afetadu?
Grasas-a Deus ninhun di nos irmons ka móre,
má 14 di es panha pankada.
679 irmons tevi ki sai di ses kaza,
79 kaza fika distruídu i 1165 kaza fika stragadu.
4 Salon di Reinu fika distruídu.
40 Salon di Reinu i 5 Salon di Asenbleia fika stragadu.
Fazedu 4 Kumison pa Djuda
na Ténpu di Dizastri pa djuda irmons.
Óras ki dizastris sima kes-li ta kontise,
nu ta fika preokupadu ku nos irmons ku irmans.
É sima apóstlu Paulu fla na 1 Koríntius 12:25, 26:
“. . . má pa kes ménbru mostra kel mésmu preokupason pa kunpanheru.
Si un ménbru sta sufri, tudu kes otu ménbru ta sufri djuntu ku el.”
“Na língua orijinal, kes palavra ki traduzidu pa
‘mostra kel mésmu preokupason pa kunpanheru’,
ki sta na versiklu 25, ta da ideia
ma ménbrus di kongregason ta preokupa txeu ku kunpanheru.
Es ten un dizeju di korason pa ses irmons ku irmans
kontinua amigu di Jeová, ten saúdi i suguransa,
i tanbê ten kes kuza ki es ta meste tudu dia.”
Favor, nhos kontinua ta ora pa kes ki sta ta sufri
pamodi dizastris na naturéza.
Tanbê nos é gratu pa tudu kes ki sta ta djuda
kes irmon ku irmans ku kes kuza ki es meste i da-s koraji.
Kel-li tanbê ta inklui nhos tudu.
Obrigadu pa nhos orason i kontribuison,
pamodi es sta ta djuda-nu da nos irmons kel ki es meste.
Irmons ku irmans, ka ta inporta ki
difikuldadi nhos sta ta pasa pa el,
nu ta fika txeu inkorajadu di odja nhos zelu na pregason.
Kel zelu li fika klaru na kel
kanpanha mundial di pregason ki nu faze.
Na setenbru di 2025,
nu fika kontenti di partisipa na kel kanpanha mundial
ku kel Sentinéla ku téma “Modi ki géra ta ben kaba?”
Tanbê nu konvida kes ki mostra interesi pa diskursu spesial.
Nu ben obi alguns spiriénsia di kel kanpanha ki ta da-nu koraji.
Un irman na Arjentina faze txeu sforsu
pa da kes algen di se trabadju tistimunhu na óra di almosu.
El sabia ma se patroa dja studaba Bíblia antis,
pur isu el pâpia ku el sobri kel kanpanha mundial.
Tanbê el insentiva-l pa el kumesa ta studa Bíblia otu bês.
Dipôs, kel irman fika ta sabe ma dôs koléga di sel
obi kel konbérsu i es tinha txeu pergunta.
Pamodi kel-li, kes dôs koléga di sel seta studa Bíblia ku el.
Kel otu dia, patroa di nos irman
disidi kumesa ta studa Bíblia otu bês.
Gósi es tudu três sta ta studa Bíblia i dôs di es sisti diskursu.
Na Béljika, un mudjer resebe dretu
dôs irman ki konku na se pórta.
Kantu kes irman mostra-l kel Sentinéla, el seta lógu.
Kantu es volta pa vizita-l, kel mudjer fla-s
ma el entra na nos pájina na internet
i ma el sisti kel vídiu Pamodi ki Deus ta dexa sufrimentu kontise?
El fla ma vídiu responde ses pergunta
di un manera klaru i ki konsola-l.
Irmans oferese-l un studu di Bíblia i el fika kontenti di seta.
Timenti kel mudjer staba ta sisti diskursu spesial, el obi ku atenson.
Dipôs di diskursu, kel mudjer fla ma el xinti txeu kontenti
di sta na meiu di pesoas ki ta adora Deus di un manera sinseru.
I inda el sta ta kontinua se studu di Bíblia.
Kes-li é sô alguns spiriénsia sábi ki nu tevi duránti
kanpanha di setenbru di 2025.
Má gósi, nu ben odja otu spiriénsia sábi
ki kontise duránti anu di sirvisu di 2025.
Testu di anu di 2025 insentiva-nu pa nu
“da Jeová kel glória ki se nómi merese.”
I é kel-li ki povu di Jeová na mundu interu faze.
Nu tevi 9.047.083 publikador,
i nu fika kontenti ku kel-li.
Kel-li krê fla ma nu tevi un omentu di 2,5 pursentu.
Tanbê di kes 241 país ki nu prega notísia sábi,
96 di es tevi un omentu di publikador ki nunka ka tevi antis.
Alén di kel kanpanha mundial ki nu faze
pa oferese studus di Bíblia na setenbru di 2024,
txeu Betel faze kanpanhas di pregason
na ses tiritóriu duránti kel anu di sirvisu.
Irmons sforsa txeu pa kumesa un konbérsu
i pa oferese un studu di Bíblia i Jeová abensua-s.
Pur izénplu, di junhu ti agostu di 2025,
nos irmons ku irmans na Perú partisipa na un kanpanha di pregason.
Kal ki éra obijetivu?
Es krê pregaba pa pesoas di sinku lugar diferenti.
Kes lugar li ta inklui kes lugar ki ta fika pértu di riu Amazónia
i tanbê di kes montanha di Andes.
Kal ki foi rezultadu?
Kuazi 10 mil algen mostra interesi na nos studu di Bíblia
i es krê prendeba más.
Tanbê di julhu ti agostu di 2025,
un monti di nos irmons ku irmans partisipa na un kanpanha
ki fazedu pa primeru bês na oésti di Zánbia.
Sérka di 1,3 milhon di algen ta vive na kes lugar la ki é grandi i bunitu.
Pa txeu di kes algen ki ta mora na kes lugar la
kel-li foi primeru bês ki es obi mensajen di Bíblia.
Kal ki foi rezultadu?
Duránti kel kanpanha más di 24.500 algen
pidi pa studa Bíblia!
Kel-li é spetáklu, ka simé?
Ta fika klaru ma ‘kanpu sta branku pa kodjéta’.
Na verdadi, na mundu interu,
tevi un omentu di 1,6 pursentu na nunbru di
studus di Bíblia na anu di sirvisu ki pasa.
I nu sta txeu kontenti di sabe ma 304.643 algen batiza na 2025.
Kel-li krê fla ma tevi un omentu di
2,8 pursentu konparadu ku anu pasadu.
I kantu algen ki sisti Komemorason?
Nu sta kontenti di fla nhos ma 20.635.015 algen
sisti Komemorason i na 15 país sisti más algen di ki antis!
Nu ben obi más informason sobri Rilatóriu di anu di sirvisu di 2025.
Na Filipinas, nu tevi un novu omentu ku média di 268.200 publikador.
I dja ten 37 mês ki nu sta ta ten omentu na nunbru di pioneru fíksu,
gósi nu ten 79.000 pioneru fíksu.
Kel-li ta da un média di 531 novu pioneru tudu mês.
Na Méxiku nu tevi un novu omentu,
gósi nos é 879.024 publikador.
Tanbê nu tevi un novu omentu na nunbru
di pioneru fíksu, gósi nos é 173.000.
Na Indonézia, nu tevi un novu omentu, gósi nos é 32.371 publikador.
Kel-li krê fla ma nu tevi un omentu di 3 pursentu
konparadu ku anu pasadu.
Tanbê ka dura li, nu tevi kel nunbru más altu di pioneru fíksu,
gósi nu ten más di 7.100 pioneru fíksu.
Na Angola, nu tevi un omentu di 6 pursentu na nunbru di publikador.
Pamodi kel-li, nunbru di publikador foi 184.000,
kel-li foi un novu omentu.
Má désdi di kel ténpu ti setenbru, nu tevi un novu omentu,
gósi nos é 190.939 publikador.
Na Zinbábue, nu tevi un omentu na nunbru di publikador,
gósi nos é más di 53.700.
Kel-li krê fla ma nu tevi un omentu di 7 pursentu.
Tanbê, ka dura li nu tevi kel nunbru más altu di pioneru fíksu,
gósi nu ten más di 10.600 pioneru fíksu.
Na Kongu (Kinxasa), nu tevi un omentu di 11 pursentu
na nunbru di publikador, gósi nos é más di 297.000.
Tanbê nu tevi kel nunbru más altu na nunbru di studu di Bíblia
i di algen ki sisti Komemorason.
Na verdadi, más di 1,4 milhon di algen sisti Komemorason.
Kel-li é kuatu bês más txeu di ki nunbru di publikador.
Na Fransa, nu sta kontenti di fla nhos
ma nu tevi un novu omentu, gósi nos é 139.548.
Na Madagáskar, nu tevi un omentu di 7 pursentu na nunbru di publikador.
Gósi nos é más di 44.500 publikador.
Algen ki sisti Komemorason foi kuazi kuatu bês más txeu
di ki nunbru di publikador, 176.453 algen sisti.
Na Brazil, nu tevi un novu omentu,
pur isu nu bira más di 930.000 publikador.
Más désdi kel ténpu ti setenbru, dja nu tevi un novu omentu
na nunbru di publikador, gósi nos é más di 940.000 publikador.
Kes-li é sô alguns informason di Relatóriu di anu di sirvisu di 2025.
Es é un prova klaru di benson di Jeová.
Tanbê el ta mostra nhos zelu na pregason.
Nu ta agradese nhos pa tudu kel ki nhos sta ta faze
pa nhos ‘da Jeová kel glória ki se nómi merese’.
Sima nu odja na es relatóriu,
nos irmons ku irmans sta ta sufri pamodi dizastris na naturéza.
Má es “ka ta dizisti di faze kel ki é dretu”.
Jeová ta kontinua ta abênsua i ta da forsa pa kes irmon li.
I el ta abênsua kada un di nos pamodi nu
sta kontinua ta trabadja ku zelu na pregason.
Nu krê kontinua ta faze nos midjór pa Jeová.
Irmons ku irmans, nhos fika ta sabe ma nu ta ama nhos txeu
i nu ta ora pa nhos tudu.
Kel-li é JW Broadcasting®
di Sédi Mundial di Tistimunhas di Jeová.

Rilatóriu di Grupu Enkaregadu di Óbra di 2025 — Nunbru 7