JW subtitle extractor

Nos é ben-vindu!
Na es rilatóriu nu sta ben pâpia sobri
modi ki nu pode uza livru Vive filís
pa faze studus di Bíblia.
Má primeru nu krê da nhos alguns notísia.
Désdi nos últimu rilatóriu,
fazedu más três kongrésu spesial.
Di 26 ti 28 di dizenbru di 2025,
fazedu kel sugundu di kes dôs kongrésu spesial
na Jakarta, na Indonézia.
Na kel mésmu fin di simana, fazedu un kongrésu
spesial na Lomé, na Togu.
I di 9 ti 11 di janeru di 2026,
fazedu un kongrésu spesial na Auckland,
na Nova Zilándia.
Kel-li é kongrésu más grandi ki dja
fazedu na Nova Zilándia.
Na kuazi 50 anu kel-li é primeru bês
ki tudu publikador di Nova Zilándia
konvidadu pa sisti kongrésu na mésmu lugar.
Kes algen ki trabadja na kel lugar di kongrésu fla ma
nos irmons mostra bondadi i ma es linpa i es konpo kel lugar.
Tanbê es fla ma nunka es ka odjaba un kuza sima kel-li.
Óras ki es ta pasaba,
tudu algen ta flaba es mantenha
ku sorizu na róstu,
i kel-li dexa-s dimiradu.
Ti es fla ma es ta krê guardaba kel spiriénsia
pa uzaba na otus atividadi.
Un autoridadi na Indonézia fla:
“Tistimunhas di Jeová é ben organizadu,
es é un povu ki ten algen di txeu lugar diferenti,
es ta mostra amor,
es ta sta sénpri ku un sorizu i es é sinseru.”
Diretor di stádiu na Togu fika dimiradu di tal manera
ku modi ki kongrésu staba organizadu ki el fla:
“N sta xinti ma N sta kuazi prontu pa batiza
i bira un Tistimunha di Jeová.”
Nunbru más altu di algen ki sisti
kes três kongrésu li foi 68 mil i 178.
Kel-li ta inklui más di 8 mil irmon
ku irmans di 32 país
I nu fika kontenti di sabe ma 703 algen batiza.
Kel-li foi últimu kongrésu spesial.
Pamodi?
Sima dja nu avizaba antis, apartir di anu 2026,
nu ta bira ta txoma kes kongrésu li
di “kongrésu internasional.”
I kes primeru três kongrésu ta ben
fazedu na junhu di 2026.
Dia 1 di janeru di 2026,
faze 50 anu ki fazedu un mudansa
inportanti na organizason di Jeová.
Livru Proclamadores fla ma kel-li
é “un di kes mudansa más inportanti ki
dja fazedu na stória di Tistimunhas di Jeová.”
É ki mudansa?
Grupu Enkaregadu di Óbra divididu
na 6 kumison ki é:
Di Pesoal, Iditóra, Sirvisu, Ensinu,
Redason i kel ki gósi ta txomadu di Kumison di Kordenadoris.
Orientason pa tudu atividadi di organizason
i di kes kongregason na mundu interu
ta ben di kes 6 kumison li.
Na dia 1 di febreru di 1976,
Grupu Enkaregadu di Óbra faze un mudansa
na manera ki kes filial staba organizadu.
Envês di un enkaregadu di filial
toma kónta di trabadju na tiritóriu di kada filial,
Grupu Enkaregadu skodje un kumison di filial
ki ta tinha três ô más ansion ku txeu spiriénsia.
Ta fika klaru ma Jeová abênsua kes mudansa li.
Na 1976, tinha 2 milhon i 100 mil publikador.
Má gósi, 50 anu dipôs,
ten más di 9 milhon di publikador!
Nu sta kontenti pamodi Jizus ki é “kabésa di kongregason”
sta da-nu orientason ku amor.
El sta ta orienta trabadju di pregason
i ta abênsua nos sforsu pa muda nos manera di prega
asi pa nu konsigi pâpia ku más algen.
Nos tudu nu fika kontenti di partisipa
na kanpanha di Sentinéla ku téma:
“Modi ki géra ta ben kaba?”
Nos irmons ku irmans di mundu interu,
tevi txeu spiriénsia sábi
na oferese kel revista li.
Kel Sentinéla li konsola txeu algen própi.
Nos revistas pa públiku
ta kontinua ta ser un bon feraménta pa pregason.
Sima nhos sabe,
kada anu nu ten três revista Sentinéla pa públiku
i três revista Nhos korda!
ki nu pode oferese na pregason.
Nu pode uza kes asuntu ki sta na kes revista li pa
kumesa un konbérsu na pregason
i pa oferese un studu di Bíblia.
Na janeru ku febreru, nu ta ben oferese
revista Sentinéla pa públiku ku téma:
“Deus ta preokupa ku bo?”
Ku tudu probléma ki sta na mundu,
kel-li é un bon téma!
Di serteza nu tene gana di uza
kel revista li na pregason.
Panha kes revista ki bu ta meste
na bu Salon di Reinu.
Na 2021, nu kumesa ta uza un novu livru
pa faze studus di Bíblia:
Vive filís pa tudu ténpu!
Désdi kel anu, más di un milhon di algen dja batiza!
Sima Jizus dja flaba,
txeu algen sta ta seta verdadi.
Di serteza, nos tudu nu ta gostaba di studa ku
un algen ki tene gana di prende verdadi.
Ki orientason ki nu resebe sobri modi
ki nu ta faze studu di Bíblia
na livru Vive filís pa tudu ténpu! ?
Na 2021, kongregason resebe formuláriu ku téma:
Modi ki nu ta uza bruxura i livru
“Vive filís pa tudu ténpu!” na pregason ô S-196.
Tanbê bruxura Amor ta djuda na faze disiplus
ta da bons orientason.
Téma di apéndisi três é:
“Modi ki nu pode uza Vive filís pa tudu ténpu!”
pa faze studus di Bíblia.
Tanbê, fazedu pártis na runion di meiu di simana
i nu resebe artigus di studu di Sentinéla
ki ta djuda-nu uza kel feraménta li dretu.
Má dipôs di alguns anu ta uza kel livru li,
dja nu prende modi ki nu pode uza-l más midjór inda.
Pur isu, nu sta kontenti di da nhos
kes novu orientason li.
Nu ben responde kuatu pergunta.
Primeru, kantu matéria ki nu debe studa kada simana?
Sugundu, nu debe odja tudu vídiu di kada lison?
Tirseru, modi ki nu debe uza kel párti “Djobe Más”?
I kuartu, modi ki nu pode uza kes lison
di akordu ku nisisidadi di studanti?
Primeru, kantu matéria ki nu debe studa kada simana?
Si ta da, poi méta di da un lison kada simana.
É klaru ki alvês bu studanti pode ka
konsigi da un lison kada simana.
Un kuza ki pode djuda-nu da un lison na kada simana
é ivita gasta txeu ténpu na kes primeru
parágrafu di kada lison.
Kel primeru párti di lison é sô intruduson.
É sô pa studanti xinti gostu di kuzê ki nhos sta ta ba studa.
Pur isu, nu debe gasta poku ténpu
na kes primeru parágrafu.
Kuzê ki pode djuda-nu?
Nu pode insentiva nos studanti pa lé
intruduson di kada lison óras ki el ta pripara se studu.
Si el faze si,
nu ka meste torna lé kes parágrafu duránti studu.
Envês di kel-li, nu debe sô faze kes
pergunta ki sta ku létra distakadu i
lé kes testu di Bíblia ki ta fla “lé”.
Asi bu ta fika ku más ténpu pa párti “Sabe Más”.
Na alguns língua, párti “Sabe Más” ten vídiu.
Kel-li ta leba-nu pa kel sugundu pergunta.
Nu debe odja tudu vídiu di kada lison?
Na komésu, éra kel-li ki é orientason ki nu dadu.
Má, gósi nu krê fla nhos ma nu
ka meste mostra tudu vídiu.
Si ta parse ma un vídiu ka ta aplika na nos studanti,
nu ka meste mostra-l.
Na verdadi, é difísil konsigi odja tudu vídiu
i tirmina un lison sô na un studu di Bíblia.
Obijetivu é poi studu ta avansa
asi pa studanti ka perde interesi.
Pur isu, dja ki nu konxe nos studanti,
nu pode disidi ki vídiu ki nu ta mostra
i ki vídiu ki nu ka ta mostra.
Pa kel-li, nu debe faze orason
óras ki nu ta pripara pa ba faze studu.
Alguns irmon pode ka konsigi mostra vídiu
pamodi falta di internet.
Si é kel-li ki ta kontise na undi ki bu ta mora,
ka bu xinti mariadu pamodi bu
ka ta konsigi mostra vídiu.
Konsentra na da kel matéria
ki sta na livru Vive filís! na papel.
Lenbra ma é Bíblia ki nu krê inxina algen.
Nton bu ta konsigi faze un bon studu di Bíblia
sikrê bu uza sô testus di Bíblia
i kel matéria ki sta na livru Vive filís pa tudu ténpu!
mésmu ki bu ka ta konsigi mostra vídiu.
Kel tirseru pergunta,
modi ki nu debe uza kel párti “Djobe Más”?
Na studu, nu ka meste pâpia di kel párti “Djobe Más”.
Kel párti li é pa studanti atxa respósta
di algun pergunta ki el pode ten
ô pa djuda-l lida ku un prubléma.
Nu pode fla nos studanti pa el lé algun artigu
ô odja algun vídiu ki sta na párti
“Djobe Más” el sô di akordu ku se nisisidadi.
Kel kuartu pergunta,
modi ki nu pode uza kes lison di
akordu ku nisisidadi di studanti?
Kes lison di livru Vive filís!
ta djuda un algen prende verdadi di Bíblia
di un manera sinplis.
Pur isu, normalmenti é midjór da kes
lison pa órdi ki es ta parse na livru.
Má nu pode ser ikilibradu.
Kel-li krê fla ma nu pode salta un lison
ô torna da un lison ki dja nu daba antis
di akordu ku kel ki kel studanti meste.
Pur izénplu, i si un família ô amigu
di bu studanti móre?
Di akordu ku situason di bu studanti,
bu pode skodje da lison 29 ku téma:
“Kuzê ki ta kontise óras ki nu móre?”
Dipôs di kel-li, nhos pode volta pa kel
lison ki nhos staba.
Na otu situason,
bu pode disidi ma ten algun lison
ki bu studanti ka meste da.
Talvês pamodi kel lugar ki bu studanti ta mora
ô pamodi se kultura asuntu di algun
lison pode ka aplika na el.
Nton kuzê ki bu debe faze?
Na kel kazu li, bu pode salta kel lison.
Kal ki é pontu?
Ser ikilibradu i muda di akordu ku
nisisidadi di bu studanti.
Apóstlu Paulu da-nu un bon izénplu.
Bu ta lenbra kuzê ki el fla na 1 Koríntius 9:20-22?
“Pa judeus, N bira sima un judeu,
pa N pode ganha judeus.
Pa kes ki sta dibaxu di lei, N bira sima si N sta dibaxu di lei,
pa-m pode ganha kes ki sta dibaxu di lei,
enbóra ami N ka sta dibaxu di lei.
Pa kes ki sta sen lei, N bira sima si N sta sen lei,
pa N pode ganha kes ki sta sen lei,
enbóra pa Deus N ka sta sen lei,
má N sta dibaxu di lei di Kristu.
Pa kes fraku, N bira fraku,
pa N pode ganha kes fraku.
N bira tudu kuza pa tudu tipu di algen.
N faze tudu kel ki N ta pode,
asi pa peloménus N konsigi salva alguns.”
Má, ten más un purgunta ki bu pode pensa na el:
I si nha studanti batiza antis di nu tirmina livru?
Kuzê ki N debe faze?
Respósta sta na Kolosensis 2:6, 7.
La apóstlu Paulu fla kal ki méta ki
tudu kriston batizadu meste ten:
“Sima nhos seta Kristu Jizus, ki é Sinhor,
nhos kontinua ta anda unidu ku el.
Sima nhos inxinadu,
nhos raís debe sta ben finkadu i ta kria na Jizus,
i nhos debe sta firmi na fé i
sénpri ta agradese Deus.”
Nu krê pa nos studanti “sta firmi na fé.”
Nton, kuzê ki bu debe faze si bu studanti
batiza antis di nhos tirmina livru?
Bu debe kontinua ta studa ku el
ti ki nhos tirmina livru Vive filís!.
Kel-li ta djuda-l bira firmi na fé.
Sô más un kuza pa nu lenbra di el.
É klaru ki un publikador ka meste poi más na rilatóriu
kantu óra ki el faze na pregason.
Má ka bu skese ma si bu faze studus di Bíblia,
bu debe poi na bu rilatóriu kantu studu ki bu faze.
Ku kes novu orientason na kel rilatóriu li,
ta fika más fásil djuda nos studanti
faze prugrésu más rápidu
i gosta di se studu más txeu.
Na kel rilatóriu li,
nu odja modi ki organizason di Jeová
sta unidu na adorason verdaderu,
na kes kongrésu,
na kes mudansa ki ta fazedu na organizason
i na trabadju di pregason.
Tanbê nu odja modi ki nu pode midjora na faze studu
na livru Vive filís pa tudu ténpu!.
Sô pa lenbra,
uza kes lison di akordu ku nisisidadi di studanti
i poi studu ta avansa.
Si nu aplika kes sujiston li,
nu ta xinti alegria na faze disiplus.
Má kuzê ki bu pode faze si bu ta xinti
medu di faze un studu di Bíblia?
Lenbra di kuzê ki sta na Filipensis 2:13:
“Deus é kel ki ta da nhos puder pa nhos pode agrada-l,
i el ta da nhos dizeju i forsa pa aji.”
Faze orason ta pidi Jeová pa da-u “dizeju i forsa”
pa faze un studu di Bíblia.
Dja ki Jeová é kel ki ta da
“tudu bon prezenti i tudu prezenti perfeitu,”
bu pode ten serteza ma el ta responde bu orason.
Irmons ku irmans, nu ta ama nhos di korason
i nu ta da valor pa nhos trabadju duru na pregason!
Kel-li é JW Broadcasting®
di Sédi Mundial di Tistimunhas di Jeová.

Rilatóriu di Grupu Enkaregadu di Óbra di 2026 — Nunbru 1