JW subtitle extractor

各位弟兄姊妹大家好
好開心喺呢度同大家分享一啲最新消息
每年嚟到呢個時間
我哋都好期待出席耶穌犧牲紀念聚會
今年呢個聚會會喺4月2號星期四舉行
而喺3月23號嗰個星期
我哋會聽到特別公眾演講
題目係
邊個能夠重建美好嘅地球家園？
喺嚟緊呢兩個星期
我哋會盡力邀請更加多人聽呢個特別演講
同埋參加紀念聚會
不如試吓喺3月同4月做輔助先驅吖
如果你喺呢兩個月報名做輔助先驅
時間定額可以係15或者30小時
另外我哋都要研讀同埋沉思聖經嘅記載
深入咁諗吓耶穌喺地上最後嗰幾個星期發生嘅事
就好似希伯來書12:3講嘅咁
呢節經文鼓勵我哋咁樣做
「你哋要仔細諗吓佢嘅榜樣免得疲倦最終放棄」
我哋沉思耶穌嘅榜樣
就會更加愛同感激耶和華仲有耶穌
咁樣我哋面對難題嗰陣就可以好似耶穌咁
有力量保持忍耐
而家你可以喺JW Library下載《紀念聚會讀經進度表》啦
呢個讀經進度表列出咗一啲經文
你只要點一點連結就可以睇到
耶穌犧牲前後發生嘅一啲重要事件
呢個進度表就放咗喺《冊子》呢個欄目入面
你亦都可以將佢加入「我的最愛」
方便下次打開
喺紀念聚會當日
亦都會有一個早晨崇拜節目
呢個影片會喺3月26號上載去我哋嘅網站
好開心喺4月2號呢一日
全球嘅耶和華見證人可以一齊收睇呢個節目
紀念聚會之後
我哋會繼續幫助嗰啲出席呢個聚會
對聖經有興趣嘅人
目標係盡力邀請更加多人
開始一個聖經課程
另一方面
我哋都可以繼續運用唔同嘅雜誌向人傳道
喺3月同埋4月
我哋會主力分發
驅散壓力嘅烏雲
呢本《警醒！》雜誌
而家嘅人壓力咁大
真係好需要睇吓呢本雜誌嘅建議
我哋網站嘅新聞曾經都報導過
意大利嘅分部會由羅馬
搬去博洛尼亞嘅新設施
一齊睇吓呢個工程嘅最新進展吖
喺2019年
JW網站嘅新聞就提到
意大利分部會由羅馬搬去博洛尼亞
報導嘅結尾話
「我哋會向耶和華禱告求佢繼續賜福俾呢個工程
令即將喺新分部設施展開嘅工作
喺呢片已經成熟嘅田地順利進行」
耶和華真係有回應我哋嘅禱告
佢幫我哋克服咗唔同嘅難題
一齊嚟睇吓呢個工程嘅進度吖
即使受到疫情影響
喺2020年9月
其中一棟宿舍大樓都可以順利落成
嗰度可以提供41個單位
俾建築部嘅弟兄姊妹
喺2022年1月我哋得到批准
開始翻新一棟喺2018年買入嘅辦公大樓
同埋興建另外3座宿舍
另一個好消息係
喺博洛尼亞嘅訪客中心正式開幕
裡面嘅展覽可以推動嚟參觀嘅人
更加熱心獻出自己為耶和華服務
呢度提供咗15種語言嘅導賞團
喺開幕之後嘅短短15個月裡面
已經有超過5萬人嚟參觀
好多人參觀完都好開心
亦都更加感激弟兄姊妹嘅付出
有總部嘅支援
加上中央長老團同埋其他弟兄嘅探訪
令我哋睇出耶和華真係支持呢個工程
啲弟兄鼓勵我哋保持耐心
相信耶和華會喺最適當嘅時候幫我哋
佢哋亦都提醒我哋
要感激所有有份幫手嘅弟兄姊妹
好多本地嘅弟兄姊妹
獻出自己嘅時間同埋精力嚟幫手
好多人禱告之後都認真諗吓
自己可以點樣盡力支持呢項工程
有啲人減少返工時間甚至有啲仲辭埋職添
啲弟兄姊妹都好有心煮咗好多好嘢食俾大家
呢個工程唔單止令到弟兄姊妹得益
住喺周圍嘅人都可以
因為我哋將一個廢置咗嘅工業用地改建得好靚
仲增設咗一個公園俾所有人使用添
咁究竟最近工程嘅進展係點呢？
喺2025年3月1號
呢個新分佈設施入面嘅王國聚會所落成啦
而家有4群會眾用緊呢個聚會所
喺2026年嘅1月30號
承辦商已經完成咗辦公室工程嘅主要部分
淨返嘅就會交由我哋嘅建築工程委員會去完成
我哋嘅目標係喺2026年6月
正式啟用呢個新分部辦事處
好快淨返嗰三棟宿舍大樓嘅工程亦都會陸續完成
我哋好開心可以搬嚟呢個新嘅分部
因為長遠嚟講可以節省開支
弟兄姊妹亦都可以喺更舒適嘅環境工作
大部分嘅伯特利成員
而家都可以住喺同一個範圍
咁樣就可以更加方便嗰啲
支援佢哋嘅弟兄姊妹嘞
詩篇127:1話
「如果唔係耶和華建造家宅
建造嘅人就徒勞無功」
我哋會繼續禱告
求耶和華支持呢啲建築工程
亦都好希望呢啲新設施可以榮耀耶和華
真係好多謝耶和華幫助我哋
亦都好多謝各位弟兄姊妹你哋嘅支持
我哋會禱告求耶和華繼續賜福
俾組織喺唔同地方嘅建築工程
世界各地有好多弟兄姊妹都受到天災嘅影響
喺馬拉維持續出現嚴重嘅水災同旱災
呢個導致農作物失收
好多人都唔夠嘢食
分部成立咗兩個救災委員會
到目前為止
已經有差唔多4000個弟兄姊妹
收到足夠嘅食物同埋其他救援物資
喺2月初熱帶氣旋格扎尼吹襲馬達加斯加
慶幸冇弟兄姊妹受重傷或者喪生
但係有199間弟兄姊妹嘅屋被摧毀
亦都有237間受損
另外仲有1個大會堂同埋3個聚會所受到破壞
而家有兩個救災委員會幫緊弟兄姊妹重建家園
熱帶氣旋吹襲之後
馬達加斯加分部
即刻喺災情最嚴重嘅地區
舉行一個特別聚會
參加嘅人都得到安慰同埋鼓勵
之前嘅報導亦都講過
喺舊年颶風梅利莎重創加勒比海一帶嘅島嶼
包括牙買加
最近中央長老團成員楊杰明弟兄
去咗牙買加探訪當地嘅弟兄姊妹
楊弟兄喺特別聚會發表演講
鼓勵嗰度受颶風影響嘅會眾
加強佢哋嘅信心
喺舊年短短7個星期之內
菲律賓就經歷咗三場颱風同埋兩場大地震
協調委員會助手保羅·吉利斯弟兄
最近探訪咗嗰度
佢去咗災情最嚴重嘅地方
同弟兄姊妹見面
我哋會繼續為受天災影響嘅弟兄姊妹禱告
等佢哋有力量渡過難關
就好似詩篇145:18保證
「所有呼求耶和華嘅…上帝都親近佢哋」
多謝大家慷嘅捐款
你哋盡自己嘅能力表現愛心
可以幫助到受天災影響嘅弟兄姊妹
耶和華一定會大大賜福俾你哋每一位
喺俄羅斯唔少弟兄姊妹
因為信仰而要繼續坐監
其中有好多人需要睇醫生接受治療
例如魯斯塔姆·季阿羅夫弟兄
因為佢病得好嚴重
好需要得到治療
所以喺2026年2月17號獲准假釋出獄
季阿羅夫弟兄喺2021年
被判8年有期徒刑
假釋出獄之後
佢就即刻被遣返烏茲別克
佢而家喺嗰度接受緊癌症治療
烏茲別克嘅弟兄姊妹
喺佢同太太到達之後
熱情咁歡迎佢哋
截至2026年3月16號
全球有280位弟兄姊妹因為信仰而被囚
有181位係喺俄羅斯
喺坐監嘅人當中
有至少35位
喺殘疾人士或者有嚴重嘅健康難題
我哋會繼續為呢啲忠心嘅弟兄姊妹
仲有佢哋嘅家人同埋會眾禱告
耶和華比咗生命我哋
佢想我哋都珍惜同埋尊重生命
其中一個表明我哋尊重生命嘅方法就係
遵守同血有關嘅規定
耶和華俾咗一個永不過時嘅吩咐
挪亞同埋佢嘅後代
就係「帶生命嘅肉即係帶血嘅肉
你哋唔可以食」
後嚟佢亦都吩咐基督徒
要「禁戒勒死嘅動物」同埋「禁戒血」
今日耶和華見證人都會遵守呢個規定
呢個包括喺選擇醫療方案嘅時候
我哋一樣會禁戒血
以往我哋有一啲關於血嘅指引
係基於摩西法典入面其中一條規定
呢條規定就記錄喺利未記17:13
「如果以色列人
或者喺你哋嗰度嘅外族居民去打獵
捉到可以食嘅雀仔或者其他野生動物
佢就一定要將獵物嘅血放出嚟
用泥土掩蓋」
咁今日基督徒仲需唔需要遵守呢個規定呢？
簡單嚟講係唔需要㗎
原因好簡單
因為我哋唔需要再遵守摩西法典
就好似使徒保羅
喺歌羅西書2:13,14講嘅咁
「上帝…撤銷咗法典上寫住
指正我哋過錯嘅法令
上帝已經將呢啲法令
喺苦刑柱上廢除咗啦」
所以基督徒唔使好似摩西法典講嘅咁
將啲血倒出嚟然後用泥土掩蓋
而喺醫療方面
例如接受手術嘅時候
點樣運用自己嘅血液
聖經亦都冇明確嘅規定
關於點樣使用自己嘅血液
守望台2000年10月15日刊
入面有一篇《讀者來函》
就提到我哋嘅觀點
「喺接受外科手術、醫學化驗
或者其他治療嘅時候
基督徒要自己決定
其他人點樣處理佢嘅血液」
基於呢個原則
好多基督徒都接受驗血
有啲亦都會接受
使用心肺機、血液回收機
又或者腎臟透析
呢一類牽涉到運用自己血液嘅療法
不過我哋都發現
而家有越嚟越多
用到自己血液嘅治療方法推出
所以經過懇切禱告同埋查考聖經之後
中央長老團就住喺醫療程序嗰陣
運用自己血液方面調整咗觀點
究竟最新嘅睇法係乜嘢呢？
我哋最新嘅睇法係
喺醫療方面
只要係涉及用到自體血液
每一個基督徒都要根據良心自己做決定
呢個包括係咪接受
抽取自己嘅血液、儲存、然後輸返入體內
即係話
有啲基督徒可能接受到
抽取自己嘅血液、儲存
然之後輸返入體內嘅療法
有啲就未必接受
無論係啲乜嘢療法
只要涉及用到自體血液
咁嘅話每一個基督徒
都要按住自己嘅良心去選擇
總結一下吖
「禁戒血」呢條誡命
基督徒一定要遵守㗎
但係由於我哋已經唔使再守摩西法典
而且聖經亦都冇明確規定
喺醫療方面
一個人應該點樣運用自己嘅血液
所以呢一方面
其實係同其他醫療選擇一樣
即係每個基督徒都要自己決定
喺醫療方面點樣運用自體血液
喺今次嘅報導
我哋睇到意大利分部工程嘅進展
俄羅斯弟兄姊妹嘅最新情況
仲有耶和華點樣照顧
受天災影響嘅弟兄姊妹
我哋亦都好開心聽到
關於喺醫療方面使用自己嘅血液
組織最新嘅睇法係乜嘢
我哋清楚睇得出
耶和華好照顧佢嘅子民
佢會通過佢嘅組織幫助我哋
佢亦都會賜力量俾我哋
等我哋喺考驗之下忍耐得住
耶穌犧牲紀念聚會好快就會舉行
希望大家都把握機會親近耶和華
我哋肯定耶和華一定
唔會忘記忠於佢嘅人
我哋好愛你哋每一位
呢度係
耶和華見證人世界總部嘅JW電視

2026來自中央長老團的報導（二）