JW subtitle extractor

Nhos é ben-vindu, irmons!
Nu sta kontenti di da nhos alguns notísia.
Na es ténpu,
nu sta ta pensa na
Komemorason di mórti di Jizus.
El ta ben fazedu kinta-fera dia 2 di abril.
Diskursu spesial ta ben fazedu na simana di 23 di marsu
i el ten kel téma li “Ken ki ta ben konpo téra?”
Na kes simana li,
nu ten oportunidadi di konvida más algen ki
nu ta pode pa sisti diskursu spesial i Komemorason.
Talvês, bu situason ta da pa bu ser pioneru ajudanti.
Duránti mês di marsu i abril,
bu pode ser pioneru ajudanti i da 15 ô 30 óra.
Nu pode pripara nos korason pa Komemorason
óras ki nu ta lé i midita na kes kuza ki kontise ku
Jizus na kes últimu simana ki el staba na téra.
Kel-li sta di akordu ku kel prínsipiu
ki nu ta atxa na Ebreus 12:3,
ki ta fla: “Nhos pensa ku kuidadu na kel ki aguenta. . .
asi pa nhos ka kansa i nen pa nhos ka dizisti.”
Óras ki nu ta pensa na izénplu di Jizus,
nos gratidon i amor pa el i pa Jeová
ta kontinua ta omenta i tanbê nu ta konsigi
aguenta firmi óras ki nu ta pasa pa difikuldadis.
Ka dura li, Prugrama di leitura di Bíblia pa Komemorason
lansadu apárti na JW Library®.
Kel prugrama ta distaka kes kuza inportanti ki kontise
antis i dipôs ki Jizus móre i el ten link pa kes versiklu.
Bu pode atxa-l na párti “Bruxuras i Folhetus.”
Pa atxa-l más faxi bu pode pô-l na “Favoritus”.
Otu kuza é Adorason di palmanhan pa Komemorason.
El ta ben podu na jw.org na dia 26 di marsu.
Nos é gratu pamodi irmons ku irmans na mundu interu
ta ben odja kel prugrama li na kinta-fera dia 2 di abril!
Dipôs di Komemorason, nu pode kontinua
ta vizita kes algen ki sisti i ki mostra interesi.
Nos obijetivu é kumesa más studu di Bíblia ki nu ta pode.
Tanbê nu pode kontinua ta uza nos
revistas pa públiku na pregason.
Na mês di marsu i abril, nu pode oferese revista Nhos korda!
ku téma “Ajuda pa lida ku fadiga.”
Pesoas meste di kel mensajen inportanti li
más di ki nunka.
Sima dja nu flaba, Betel di Itália
sta ta mudadu di Roma pa kes
novu prédiu di Bulonha.
Nu ben odja kuzê ki irmons dja faze.
Na 2019, un artigu na jw.org
fla ma Betel di Itália sta ta mudadu di Roma pa Bulonha.
El ta flaba: “Nu ta ora pa Jeová
kontinua ta abênsua es prujétu
i pa kes novu prédiu ser di ajuda na
trabadju di pregason na Itália,
ki kanpu sta branku pa kodjéta.’”
Nu odja Jeová ta responde nos orason,
prinsipalmenti duránti ténpus difísil.
Nu sta kontenti di da nhos alguns
informason sobri es prujétu.
Na setenbru di 2020,
kel prédiu pa irmons mora na el, ki txoma Via Freud,
fika prontu sikrê ku koronavírus.
Irmons di Dipartamentu di Konstruson
mora na kes 41 apartamentu.
Dipôs, na janeru di 2022,
nu resebe aprovason pa kumesa ta trabadja na kes três prédiu
pa betelita mora na el i pa skritóriu ki nu kunpra na 2018.
Otu kuza sábi, é kel Séntru di Vizita ki abridu na Bulonha.
El fazedu di un manera ki ta poi pesoas
ta krê faze más na sirvisu pa Jeová.
Sô na 15 mês, kel Séntru di Vizita resebe más di 50 mil algen,
i vizitas ta fazedu na 15 língua.
Txeu di es fla ma kel vizita pô-s ta xinti más kontenti,
gratu i unidu ku ses irmon ku irmans.
Trabadja djuntu ku irmons di Sédi Mundial
i resebe vizitas di irmons di Grupu Enkaregadu di Óbra
i ses ajudanti,
da-nu serteza ma Jeová sta ta apoia es prujétu.
Es djuda-nu ten paxénxa,
mante kalmu i kunfia ma Jeová ta djuda-nu na óra sértu,
i es lenbra-nu di mostra gratidon
pa kada irmons ki sta ta trabadja na es prujétu.
Irmons ku irmans di kel lugar djuda-nu txeu,
es staba dispostu na uza ses ténpu,
forsa i kuzas ki es ten.
Txeu di es faze orason di djobe midjór
manera pa apoia es prujétu.
Pur isu, alguns fika ta trabadja mas poku
ô ti mésmu dexa ses trabadju.
I klaru, irmons na Itália da txeu kumida sábi,
kel-li ta mostra ma es gosta di da.
Kel prujétu li ka djuda sô irmons ku irmans,
má tanbê kes algen ki ta mora pértu.
Txeu algen fika dimiradu pamodi
nu bira kes prédiu ki staba bandonadu
na un lugar bunitu i nu faze un parki
ki tudu algen pode uza.
Talvês bu pode pensa: ‘Modi ki prujétu sta gósi?
Nu sta kontenti di fla nhos ma na dia 1 di marsu di 2025,
kel Salon di Reinu ki ta fika na kel novu Betel
fika prontu i kuatu kongregasons sta ta uza-l.
Na dia 30 di janeru di 2026,
kel inpréza ki nu kontrata tirmina kes trabadju na kes skritóriu,
i gósi irmons ta ben tirmina kes trabadju ki fika.
Nos méta é pa kes prédiu fika prontu
i kumesa ta uzadu na junhu di 2026.
Dipôs, nu krê tirmina kes três prédiu
pa betelitas pode mora na es.
Kel prujétu li ta ben djuda txeu,
pamodi organizason ta ben popa txeu dinheru
i irmons ta ben trabadja i mora na un lugar bunitu.
Envês di mora na lugaris diferenti maioria di betelitas
ta ben mora na mésmu lugar.
Asi ta ser más fásil da-s kes kuza ki es ta meste.
Salmu 127:1 ta fla:
“Si Jeová ka faze kaza,
ka bale péna kes trabadjador trabadja dura na el.”
Nu ta ora pa Jeová kontinua ta faze kel kaza li
i pa kes novu prédiu traze glória pa nómi di Jeová.
Nu ta agradese Jeová pamodi el gosta di da,
i nu ta agradese nhos, irmons, pa nhos ajuda.
Nu ta ora pa Jeová kontinua ta abênsua
tudu prujétu di konstruson di organizason
na mundu interu.
Irmons na mundu interu sta kontinua
ta lida ku dizastris na naturéza.
Na Malauí tene falta di kumida
pamodi txuba dimás i tanbê pamodi seka.
Fazedu dôs Kumison pa Djuda na Ténpu di Dizastri.
Ti gósi kuazi 4 mil irmons ku irmans ki nu krê txeu
dja resebe kumida i otus kuza ki es meste.
Na komésu di febreru tevi un
furakon fórti na Madagáskar.
Grasas-a Deus ninhun di nos irmons ku irmans
ka panha pankada gravi ô móre.
Má, 199 kaza di nos irmons ku irmans
fika distruídu i 237 straga.
Un Salon di Asenbleia i três Salon di Reinu
tanbê fika stragadu.
Dôs Kumison pa Djuda na Ténpu di Dizastri
sta trabadja manenti pa djuda konpo kaza di nos irmons.
Lógu dipôs di kel dizastri, Kumison di Filial
organiza un runion spesial
pa inkoraja kes irmon ki ta mora
na kes lugar ki fika más prujudikadu.
Kel prugrama da kes irmon ki sisti txeu koraji.
Sima dja nu flaba na kes otu rilatóriu,
furakon Melissa faze txeu stragu na kes
ilha di Karibi na fin di anu ki pasa.
Ka dura li, irmon Jacob Rumph
di Grupu Enkaregadu di Óbra, vizita irmons na Jamaika.
Fazedu un runion spesial pa inkoraja
kes irmon ku irmans
di kes kongregason na kel ilha ki fika prujudikadu.
Na fin di anu ki pasa, Filipinas pasa pa
txeu dizastris na naturéza sô na 7 simana.
Ka dura li, irmon Paul Gillies,
ajudanti di Kumison di Kordenadoris, bai vizita kes lugar.
El vizita kes irmon na kes lugar ki fika más prujudikadu.
Nu ta kontinua ta ora pa nos irmons ku irmans
ki sta ta lida ku dizastris.
Salmu 145:18 ta da-nu serteza
ma “Jeová sta pértu di tudu kes algen
ki ta faze orason pa el”.
I nu ta agradese nhos tudu pa kes
kontribuison di korason ki nhos ta faze,
ki ta djuda-nu apoia kes irmon
ki sta ta lida ku dizastri.
Pa Jeová kontinua ta abênsua nhos
pamodi nhos bondadi.
Na Rúsia, nos irmons ku irmans
sta kontinua ta lida ku pirsigison.
Txeu di kes ki sta na kadia pamodi ses fé
meste di ajuda di un dotor.
Un di kes é irmon Rustam Diarov.
Na dia 17 di febreru di 2026,
el dexadu sai di kadia pamodi el staba txeu duenti.
El staba na kadia désdi 2021, i éra pa el tinha 8 anu la.
Dipôs ki el tradu di kadia, el mandadu lógu pa Uzbekistan.
Gósi irmon Rustam pode resebe tratamentu di kánser.
El ku se mudjer Yelena, resebedu dretu kantu ki es txiga.
Ti dia 16 di marsu, tinha 280 irmons ku irmans
prézu na mundu interu pamodi ses fé.
I 181 di es sta na Rúsia.
Peloménus 35 di es ten algun difisiénsia
ô un prubléma di saúdi gravi.
Nu ta kontinua ta ora pa kes sérvu lial di Jeová li,
pa ses família i pa ses kongregason.
Jeová Deus é kel ki ta da-nu vida,
pur isu el krê pa nu da valor pa kel prezenti li.
Un di kes manera ki nu ta mostra ruspetu pa vida
é óras ki nu ta obi ku ses orientason sobri sangi.
Jeová da Nué i ses disendenti un lei
ki nunka ka ta ben muda,
el fla: “Sô ka nhos kume karni di un animal ku
se sangi, ki é se vida.”
Dipôs el fla ses sérvu pa ka seta
‘sangi di ninhun animal ki matadu i ka tradu sangi.’
Nos ki é Tistimunhas di Jeová, nu ta obi ku kel lei li oji.
Kel-li ta influensia nos disizon sobri tratamentus
di saúdi ki ta involve sangi.
Na pasadu nu ta uzaba un testu ki sta na Lei di Muizés
pa djudaba nos tomaba disizons ki ta involve sangi,
el sta na Levítiku 17:13, el ta fla:
“Si un Israelita ô u stranjeru ki sta ta mora na nhos meiu bai kasa
i el pega un animal brabu ô un pasu ki ta da pa kume,
el debe baza kel sangi i kubri-l ku téra.”
Má, kristons meste sigi kel Lei li oji?
Respósta é sinplis, nau.
Un motivu, é ki oji kristons ka meste obi ku Lei di Muizés.
Sima apóstlu Paulu fla na Kolosensis 2:13, 14:
“Deus. . . paga kel lei ki skrebedu kóntra nos
i ki tinha txeu régra.
El tra-l di kaminhu kantu el prega-l na staka di tortura.”
Má, kristons ka meste obi ku kel Lei
di baza sangi na txon i kubri-l ku téra.
Tanbê, Bíblia ka ta da ninhun lei sobri modi ki un algen
debe uza se própi sangi na un tratamentu
di saúdi i na un operason.
Sentinéla di 15 di otubru di 2000,
ta fla kuzê ki nos organizason ta pensa
sobri modi ki nu ta uza nos própi sangi.
El ta fla:
“Kada un di nos ten ki disidi modi ki nos sangi ta uzadu
óras ki nu ta faze un operason, un análizi ô un otu tratamentu.”
Pur isu, txeu di nos ta seta tratamentus sinplis,
sima izami di sangi,
má tanbê tratamentus konplikadu
ki ta involve nos própi sangi sima,
mákina korason-pulmon,
rekuperason intra-operatória di sélulas i hemodiálise.
Má gósi, ten txeu otus tipu di tratamentu ki nu pode skodje.
Pur isu, dipôs di txeu orason i di analiza testus di Bíblia,
Grupu Enkaregadu di Óbra disidi fla nhos klaru
kuzê ki nu ta atxa sobri modi ki un sérvu di Jeová
debe uza se própi sangi na un tratamentu di saúdi
i na un operason.
Nu krê fla nhos,
ma é kada un di nos ki ten ki disidi
modi ki nos sangi ta uzadu na tratamentus
di saúdi i na operason.
Kel-li ta involve disidi si nos sangi ta tradu di nos korpu,
guardadu i dipôs torna podu na nos korpu.
Kuzê ki kel-li krê fla?
Alguns sérvu di Jeová pode seta pa se sangi guardadu
i dipôs torna podu na ses korpu.
Má otus pode ka seta kel-li.
Kada sérvu di Jeová debe toma se própi disizon
na tudu asuntu ki ta involve uza se própi sangi
na un tratamentu di saúdi ô un operason.
Pa tirmina, kristons ka meste obi ku Lei di Muizés.
Má, nu debe obi ku kel lei ki sta na livru di Atus
sobri ka seta sangi.
Tanbê, Bíblia ka ta da un lei sobri modi ki un algen debe
uza se sangi na un tratamentu di saúdi i na un operason.
Pur isu, sima ta kontise na disizons
ki nu ta toma na kalker otu tratamentu,
kada sérvu di Jeová debe disidi modi ki se sangi
ta uzadu na tudu tratamentu di saúdi i na operason.
Na es rilatóriu, nu da nhos alguns notísia sobri
prujétu di konstruson na Betel di Itália
i sobri nos irmons na Rúsia.
Tanbê nu odja modi ki Jeová
ta djuda se povu duránti un dizastri.
I nu fika kontenti di intende midjór sobri
modi ki nu ta uza nos sangi
na un tratamentu di saúdi i na un operason!
Kes izénplu li ta mostra ma Jeová sta ta kuida di se povu.
El ta faze kel-li através di se organizason
i óras ki el ta da se povu forsa pa aguenta prublémas.
Sima nu ta txiga kada bês más pértu di Komemorason,
ki nu kontinua ta bira más amigu di Jeová,
i ki nunka nu ka skese ma sénpri el
ta djuda kes ki é lial pa el.
Nu ta ama nhos tudu txeu!
Kel-li é JW Broadcasting®
di Sédi Mundial di Tistimunhas di Jeová.

Rilatóriu di Grupu Enkaregadu di Óbra di 2026 — Nunbru 2