JW subtitle extractor

Nhos é ben-vindu!
Nu tene txeu kuza interesanti pa nu fla nhos
i algun ideia sobri modi ki nu pode faze más
na kes mês ki sta pa ben.
Já-já nos kongrésu pa 2026 ku téma
“Filisidadi pa tudu ténpu” ta ben kumesa.
Nu ta fika inkorajadu di odja txeu família
i otus algen ta faze planu pa sisti kel kongrésu li.
Kel-li sta di akordu ku Salmu 111:1, ki ta fla:
“Nhos lova Jeová! N ta ben lova Jeová di tudu nha korason
Na meiu di un grupu di algen justu i na kongregason.”
N ten serteza ma nos tudu sta ku vontadi di ben adora Jeová
djuntu ku nos família i nos amigus.
Kongrésu di es anu ten más di 60 vídiu.
Irmons sforsa txeu pa pripara kada párti di es prugrama,
sima kes múzika ku vídiu.
Es é un párti inportanti di nos kongrésu.
Es ta djuda-nu pripara nos menti
i nos korason pa kel prugrama ki nu sta ba sisti.
Nu ben odja alguns párti di un di kes vídiu.
Nu tene vontadi di ben odja kes 6 múzika ku vídiu
ki priparadu pa kongrésu di es anu.
Nton óras ki prizidenti fla-nu pa nu xinta pamodi
prugrama sta ben kumesa na sinku minutu,
nu faze kel-li.
Asi nu ta konsigi presta atenson na kes múzika ku vídiu.
Kel-li ta djuda nos tudu tra pruvetu
di kel párti inportanti di kongrésu li.
Nu sabe ma nhos gosta di odja Drama 1, 2 i 3
di Stória di vida i trabadju di pregason di Jizus
kantu es lansadu na kongrésu di 2024 i 2025.
Nu sta kontenti di fla nhos ma kes otu drama
di Stória di vida i trabadju di pregason di Jizus
ta ben lansadu antis di kada kongrésu.
Pur isu, kes drama di kongrésu di es anu
ki é Drama 4, 5 i 6 dja sta disponível
pa odja na jw.org i na JW Library.
Na komésu es ta ben lansadu na uns 250 língua.
Sima el ta ba ta lansadu na más língua,
el ta parse na párti “Nobidadis” na jw.org i na JW Library.
Pa diskarega kes drama, bai na jw.org
ô na JW Library i skodje “Bibliotéka” “Vídius”
i na párti “Dramas” nu ta atxa
“Stória di vida i trabadju di pregason di Jizus”
É klaru ki kes vídiu li ta bai mostradu
na nos kongrésu di 2026.
Txeu di nhos pode disidi spera ti kongrésu
pa odja tudu kes drama sábi li.
Kada família pode disidi kuzê ki el ta faze.
Nu toma kel disizon li, asi pa pai ku mai
pode odja kes vídiu primeru
i pripara ses fidju pa kuzê ki ta ba mostradu na kongrésu.
Nu ta insentiva pai ku mai pa lé kes
stória li na Bíblia djuntu ku ses fidju,
talvês na ses adorason na família.
Favor, lenbra bus fidju ma kes stória li sta na Bíblia
pa mostra ma Jizus ten mutu más puder di ki dimónis.
Ku Jeová i Jizus di nos ladu,
nu ka meste xinti medu di kes spritu mau.
Kes Drama Stória di vida i trabadju di pregason di Jizus
ta djuda-nu imajina kuzê ki kontise
sima sta skrebedu na Bíblia.
Kes stória li ta mostra kuzas spetakular
ki kontise na pasadu, i es pode mexe ku nos sentimentu.
Nu toma txeu kuidadu pa kes séna ka poi algen
ta xinti medu ô ta fika sen jetu.
Má tanbê nu sforsa pa nu ka dexa
ninhun informason inportanti di fóra.
Tanbê nu sta kontenti di fla nhos ma kel publikason
Stória di vida i trabadju di pregason di Jizus — Lista di vídius
ta ben atualizadu ku kes drama novu.
Através di kel publikason li,
nu ta pode odja párti di vídiu di
Stória di vida i trabadju di pregason di Jizus
dirétu na Bíblia na JW Library.
Si bu meste di ajuda pa sabe modi ki bu ta uza es publikason,
bu pode piskiza pa “Lista di vídius” na jw.org
i bu ta atxa un vídiu ki pode djuda-u.
Ô bu pode pidi ajuda di un irmon na kongregason.
Duránti kes simana antis di kongrésu
nu ta bai faze un kanpanha spesial pa konvida nos vizinhu
i otus algen pa sisti kongrésu.
Óras ki bu atxa algen ki mostra interesi,
mostra-l kel vídiu di konviti pa kongrésu.
Kuzê más ki nu sta ben oferese pesoas na pregason?
Duránti mês di maiu i junhu nu pode uza Sentinéla ku téma:
“Bale péna kontinua ta vive?”
Txeu di nos vizinhu sta ta pasa pa prublémas difísil.
Alguns pode sta dizusperadu i sen speransa.
Es pode atxa ma Deus ka ta preokupa ku es.
Kel Sentinéla li ta ben djuda pesoas
odja ma Jeová ta preokupa ku es
i ma bale péna kontinua ta vive.
Di serteza txeu di es ta ben fika
kontenti di obi es notísia sábi.
Ka dura li, Grupu Enkaregadu di Óbra
aprova pa kunpradu un propriedadi
ki ta ben uzadu pa faze Skólas di organizason na Dinamarka.
Nu sta kontenti di fla nhos ma na dia 14 di abril di 2026,
kel propriedade kunpradu.
El ta ben ser kel sugundu lugar más grandi na mundu
ki organizason ta uza pa faze skóla,
el ten 6 sala di aula i 134 kuartu
pa resebe más di 800 alunu tudu anu.
Tanbê ta bai ten lugar pa kume, un kuzinha i lugaris pa divirti.
Ku ajuda di Jeová, nu ta spera
ma ta ben fazedu Skóla pa Pregadoris di Reinu
na kel lugar li inda es anu.
Gósi nu ben pâpia di un kuza ki sta ta fortalese fé
di nos irmons ku irmans na mundu interu:
ki é sobri nos irmons ku irmans ki sta ta aguenta firmi na Rúsia.
É difísil di kridita ma dja pasa 9 anu
désdi ki Tribunal Más Altu di Rúsia disidi proíbi nos trabadju.
Désdi di 2017, nos irmons ku irmans sta ta pirsigidu sen para,
sô pamodi es ta sisti runion, faze orason i pâpia sobri Bíblia.
Pa djuda-nu intende kuzê ki nos irmons ku irmans
dja pasa pa el ti dia 27 di abril di 2026,
nu ta ben da nhos alguns informason.
Autoridadis dja rabista más di 2.300 kaza di nos irmons ku irmans.
Más di 950 irmons ku irmans akuzadu di faze un krimi.
Más di 450 irmon i más di 60 irman
dja podu prézu pamodi ses fé.
Txeu otus irmon podu prézu na ses kaza,
tevi ki paga multa ô es tradu otus direitu.
Ti gósi, senténsa más txeu ki dja dadu é di 8 anu na kadia.
Sinku di nos irmons sta ta kunpri kel senténsa li.
I un di nos irman sta ta kunpri un senténsa di 6 anu.
Nu ka sta kontenti ku kuzê ki nos irmons sta ta pasa pa el,
má kuzê ki sénpri nu ten stadu ta odja duránti kes 9 anu li?
Óras ki nos irmons ku irmans tradu di kadia,
un kuza bunitu ki nu ta odja é ma es mante firmi.
Sénpri ki es ta sai di kadia,
nu ta odja ma ses fé i kunfiansa na Jeová inda sta fórti.
Pur izénplu, na dia 7 di abril di 2026,
irmon Danil Suvorov tradu di kadia dipôs di pasa 4 anu i meiu la.
Kantu ki el staba prézu el mudadu di kadia,
i se mai konsigi vizita-l di três en três mês.
Ses amigu sénpri ta mandaba el karta.
Danil fla: “Através di kartas es inkoraja-m i ami N inkoraja otus.
Kel-li djuda-m kontinua ta vive, sen dizanima
i mante okupadu.
N manda txeu karta pa nhas amigu i família.”
Na dia 10 di abril, irman Olga Panyuta tradu di kadia
dipôs di ten más di três anu prézu.
Situason na kadia éra difísil,
prinsipalmenti pa el ki dja sta algen grandi.
El fla ma kuza más difísil ki el pasa pa el
é kantu es pô-l na un sela di kastigu duránti 14 dia,
undi ki éra friu dimás i kasábi di sta.
Dipôs, el mandadu pa un otu sela más piór inda.
Má simé, irman Olga dizenvolve
un bon amizadi ku kes otu prézu.
Ku karinhu es ta txomaba el di “tia Olya.”
Ti mésmu kes algen ki ta trabadja na kadia
fika dimiradu ku manera ki es ta trataba el.
Un guarda di kadia pergunta:
“Pamodi ki tudu algen li gosta di bo txeu si?”
Otus irmon fla ma kontise mésmu kuza ku es tanbê.
Irmon Valeriy Rogozin, ki pasa más di sinku anu na kadia,
fla ma karta di irmons foi sima “respira un ar fresku”.
El fla ma ku ajuda di Jeová,
‘nu pode aguenta na kalker situason’.
Tanbê irman Lyudmila Shchekoldina,
tradu di kadia dipôs di kuazi kuatu anu prézu.
El kontinua fiel, sikrê ku prublémas gravi di saúdi
i sikrê es dura ki da-l kel tratamentu ki el mesteba.
Lyudmila fla:
‘N ta konsigi xintiba ma irmons na
mundu interu staba ta ora pa mi.
N tevi forsa pa aguenta firmi, N ka dizanima,
i nen N ka perde nha alegria.’
Txeu organizason internasional inportanti dja pâpia
sobri kel tratamentu injustu kóntra
nos irmons ku irmans na Rúsia.
Pur izénplu, na 2022 Tribunal di Europa pa Direitus Umanu,
fla ma kel proibison é kóntra lei
i nega kel akuzason ma nos adorason é kóntra govérnu.
Na kel mésmu anu li, Konselhu di Europa
pidi Rúsia pa para di akuza nos irmons ku irmans
di krimi i pa el tra-s di kadia.
Ka dura li, na marsu di 2026,
Kumison di Nason Unidu pa Direitus Umanus
disidi bai kóntra Rúsia pamodi es rabista kaza
di publikadoris na 2018.
Pa primeru bês, kel organizason li rekonhese
ma Tistimunhas di Jeová é un relijion ki sta na prigu
i el konfirma ma nos irmons ku irmans
sta ta sufri diskriminason pamodi ses krénsa.
Kel disizon li ki autoridadis internasional toma
ta konfirma ma nu ta adora Deus na pas
i ma kes akuzason é injustu.
Kel-li ta lenbra-nu di kel promésa sábi ki sta na Salmu 37:28:
“Jeová ta ama justisa,
I el ka ta bandona kes algen ki é lial pa el.”
Spiriénsia di nos irmons ku irmans na Rúsia
na kes 9 anu li ta prova ma Jeová sta kunpri se promésa.
El ka bandona-s.
Ti dia 27 di abril di 2026,
178 irmons ku irmans inda staba
prézu na Rúsia pamodi ses fé.
Pa tudu nos kontinua ta ora ka sô
pa nos irmons ku irmans na Rúsia,
má tanbê pa tudu kes 277
irmons ku irmans ki sta prézu
na mundu interu pamodi ses fé.
Nu sabe ma na ténpu sértu,
Jeová ta ben traze justisa di verdadi na téra interu.
Di serteza nu gosta di kes notísia li.
Alén di nos kongrésu
kuzê más ki nu pode spera na kes mês ki sta pa ben?
Si bu ta sta di féria na kes mês ki sta pa ben,
bu ta pode ser pioneru ajudanti?
Bu ta pode oferese pa trabadja na
prujétus di konstruson di organizason?
Alguns di nhos pode sta kuazi ta tirmina skóla.
Bu ta konsigi prenxe pitison pa ser
pioneru fíksu ô pa sirbi na Betel?
Si bo é pioneru fíksu,
bu ta pode prenxe pitison pa kursa
Skóla pa Pregadoris di Reinu?
Alguns pode bai prega na un lugar ki ten más nisisidadi.
Ten txeu manera sábi di nu faze más pa Jeová.
Pa Jeová abênsua nhos timenti nhos ta djobe oportunidadis
pa faze más na nhos sirvisu pa Jeová
di akordu ku nhos situason na kes mês ki sta pa ben.
Kuzê ki nu pâpia di el na es rilatóriu li?
Nu pâpia sobri kongrésu “Filisidadi pa tudu ténpu”
i di lansamentu di Drama 4, 5 i 6
di Stória di vida i trabadju di pregason di Jizus.
Nu pâpia di kel novu propriedade na Dinamarka
ki ta ben uzadu pa skólas di organizason.
Tanbê nu pâpia di situason di nos irmons ku irmans,
na Rúsia, ki nu krê txeu duránti kes últimu 9 anu li.
Nu odja modi ki Jeová sta djuda-s kontinua fiel,
sikrê ku pirsigison.
Ses kapasidadi di aguenta firmi ta fortalese nos fé
i ta inkoraja-nu pa nu kontinua lial pa Jeová.
I nu pâpia sobri kes txeu oportunidadi ki nu ten
di faze más pa Jeová na kes mês ki sta pa ben,
nu ta ben xinti alegria si nu uza nos ténpu i forsa
pa nu faze tudu kel ki nu ta pode na sirvisu di Jeová,
di akordu ku nos situason.
I pa Jeová kontinua ta abênsua nhos tudu
timenti nhos ta faze kel-li.
Irmons ku irmans, nu ta ama nhos tudu di korason!
Kel-li é JW Broadcasting®
di Sédi Mundial di Tistimunhas di Jeová.

Rilatóriu di Grupu Enkaregadu di Óbra di 2026 — Nunbru 3