JW subtitle extractor

Nhos é ben-vindu!
Na es rilatóriu, nu sta ben
odja pamodi ki é inportanti
nu kuida di nos amizadi ku Jeová tudu dia.
Tanbê, nu ta ben pâpia sobri alguns kuza ki
ki nu ta ben faze na pregason.
Má nu odja alguns novidadi.
Désdi kel últimu rilatóriu,
fazedu 9 kongrésu internasional,
“Filisidadi pa tudu ténpu” na Douala, Kamarons;
Bucharest, na Ruménia;
Curitiba, na Brazil;
St. John’s, na Kanadá;
Varsóvia, na Pulónia;
Stockholm, na Suésia;
Kaohsiung, na Taiuan;
Sidadi di Panamá, na Panamá
i Portu na Purtugal.
Más di 32 mil delegadu di 77 país
bai sisti kes kongrésu.
Pa tudu, más di 251 mil algen bai sisti kes kongrésu
i 2.440 algen batiza.
Duránti mês di agostu ta ben fazedu
más 7 kongrésu internasional.
Kuzê ki sta ben kontise na setenbru di 2026?
Sima dja nu avizaba antis,
nu sta ben faze un kanpanha na mundu interu
ku bruxura Vive filís pa tudu ténpu!
Kes irmons ku irmans ki disidi ser pioneru ajudanti
na mês di setenbru pode skodje da 15 óra ô 30 óra.
Alén di kel-li, un diskursu spesial ku téma
“Modi ki Bíblia pode djuda-u”
ta ben fazedu na tudu kongregason
na mundu interu.
Tanbê, nu krê fla nhos ma
un kuza spesial sta ben kontise
na vizita di enkaregadu di grupu di kongregason
di setenbru di 2026 ti febreru di 2027.
Envês di enkaregadu faze diskursu pa públiku,
nu ta ben odja párti 1 di Drama 2 sobri
Vida i trabadju di pregason di Jizus!
Nu ta insentiva tudu algen
pa konvida kes algen interesadu
i kes studanti di Bíblia pa sisti
es aprizentason spesial.
Pa dexa pesoas sabe sobri kes vídiu
Stória di vida i trabadju di pregason di Jizus,
fazedu un vídiu pikinoti pa nu mostra na pregason.
Ka ta dura el ta lansadu na jw.org.
Tanbê, dja lansadu un novu pájina na jw.org
pa motiva kes algen ki ta vizita nos site
pa odja kes drama sobri Jizus.
Nu ta atxa-l na pájina prinsipal.
Tanbê es ta ben odja un trailer kurtu
ki ta pô-s ku gana di odja kes drama.
I un rezumu brévi di kada drama
ta ben djuda-s atxa kel stória
di Bíblia ki ta interesa-s.
Ku kes novu inisiativa li,
nu ta spera ma mutu más algen ta ben konxe
i ama Jizus Kristu i nos Pai, Jeová.
Gósi nu krê fla nhos modi ki
nos irmons na Venezuela sta.
Sima dja nu avizaba antis na jw.org,
na spasu di alguns sugundu
kontise dôs tremor di téra fórti
na dia 24 di junhu di 2026.
Un di kes tremor di téra,
foi un di kes más fórti ki dja kontise
na Venezuela désdi anu 1900.
Infilismenti,
46 di nos irmons ku irmans móre,
35 panha pankada
i 807 tevi ki sai di ses kaza.
Txeu kaza i Salons di Reinu fika stragadu ô distruídu.
Bu ta imajina pasa pa un situason di kel-la?
Nos korason sta tristi
pamodi kes ki sta ta pasa pa kes dizastri li.
Déntu di 48 óra, dipôs di kes tremor di téra,
formadu dôs Kumison pa Djuda
i sinku irmon di Kumison di Filial
pa ba vizita kel lugar i konsola nos irmons.
Es da-s kumida, agu, lugar suguru pa es fika,
kuza di ijiéne i ajuda di dotor.
Kantu kes kuza di ijiéne staba kuazi ta kaba,
es sabia ma Jeová ta daba es
kes kuza ki es staba ta meste na kel momentu.
I sô alguns óra dipôs,
un ómi ki é ka Tistimunha di Jeová
leba alguns kuza pa Salon di Reinu ki el krê daba.
Ses família fla-l: “Da Tistimunhas di Jeová.
Es é organizadu i asi bu ta ten serteza
ma kes algen ki meste ta
resebe kes kuza ki bu sta da.”
Kel ómi oferese txeu kuza di ijiéne
ki éra izatamenti kel ki irmons
ku irmans staba ta meste!
Txeu irmon ku irman oferese di livri vontadi
pa djuda konpo kes kaza
i kes Salon di Reinu ki straga.
Irmons ku irmans resebe ajuda fíziku i spritual.
Runion i vizita di pastoreiu da irmons txeu konsolu.
Sima nu flaba na nos últimu rilatóriu,
tanbê kontise un tremor di téra fórti
na Filipinas na dia 8 di junhu di 2026.
Infilismenti, un di nos irman móre,
34 irmon ku irman panha pankada
i 429 tevi ki sai di ses kaza.
Grupu Enkaregadu di Óbra aprova
pa uzadu dinheru pa djuda irmons ku irmans
torna faze kes kaza i kes Salon di Reinu na Filipinas.
Favor, kontinua ta faze orason pa
kes irmon ku irmans na Venezuela,
na Filipinas i na mundu interu ki sta
sufri pamodi dizastri na naturéza.
Obrigadu pa kes kontribuison
na óbra na mundu interu,
ki nhos ta faze ki ta permiti-nu da ajuda i apoiu.
Gósi, nu sta ta ben pâpia un poku sobri
kuida di nos amizadi ki Jeová.
Tudu anu, Grupu Enkaregadu di Óbra ta skodje
un testu di Bíblia ki ta ba djuda-nu duránti kel anu interu.
Na últimus anu, ti nu tevi un
múzika ku bazi na testu di anu.
Bu ta lenbra kal ki é nos testu di anu pa 2026?
É Mateus 5:3,
ki nu ta odja na tudu nos Salon di Reinu:
“Filís é kes ki sabe ma es meste di Deus.”
Bíblia ta konpara palavra di Deus ku kumida.
Na Mateus 4:4, Jizus fla:
“Ómi ka debe vive sô di pon,
má tanbê di tudu palavra ki ta sai di bóka di Jeová.”
Sima nu ta kume kumida
pa nu pode fika bibu,
kumida spritual ta pô-nu ta
fika bibu na sentidu spritual.
Kenha ki ta disidi ki kumida ki bu ta kume?
Normalmenti é bo.
Má i sobri kumida spritual?
Kenha ki ta skodje kuzê ki bu ta kume?
Jeová i se organizason ta
da-nu txeu kumida spritual.
Através di “skravu fiel i prudenti,”
nu ta resebe un “fésta ku bon kumida” déntu di óra.
Na nos runion, asenbleia i kongrésu,
nu ta dadu kumida spritual sábi i ben priparadu.
Má, sima kes israelita tinha ki kodje i kume maná,
kada un di nos debe pensa na kel pergunta inportanti li:
Kal ki é nha responsabilidadi
na kuida dretu di nha amizadi ku Jeová
sen falta tudu dia?
Ô na otus palavra: ‘Kuzê ki N ta kume oji?’
Kada xéfi di família é responsável
pa djuda se família na sentidu spritual,
má kada un di nos meste kuida
di nos amizadi ku Jeová tudu dia.
Kel-li ka é un kuza ki otus algen pode faze pa nos.
Filipensis 2:12 ta lenbra-nu:
“Nhos kontinua ta trabadja pa nhos salvason.”
Gálatas kapitlu 6 ta da-nu un bon konsedju.
Versiklu 2 ta fla: “Nhos kontinua
ta leba karga di kunpanheru.”
Má versiklu 5 ta fla:
“Kada un ta leba se própi
karga di responsabilidadi.”
“Karga di responsabilidadi”
é un responsabilidadi ki Jeová ta da-nu,
é un kuza ki nu ten ki karega.
Enbóra Jeová i otus algen pode
djuda-nu karega nos karga,
ningen más ka pode karega nos karga
di responsabilidadi ki Deus da-nu.
É pur isu ki nu debe pergunta:
‘Modi ki oji N pode kuida
di nha amizadi ku Jeová?’
Nu ten txeu feraménta
sima bibliotéka na internet,
publikason pa djuda
Tistimunhas di Jeová faze piskiza
i testus di Bíblia ki ta djuda-nu
faze vontadi di Jeová.
Un di kes manera inportanti pa nu
kuida di nos amizadi ku Jeová
é lé un párti di Palavra di Deus tudu dia
i dipôs tra ténpu pa nu pensa na kuzê ki nu lé.
Tanbê nu debe lé i midita na testu di dia.
Nu ben odja modi ki faze kel-li djuda dôs publikador.
Tevi un testu di dia ki toka nha korason.
É testu 12 di febreru di 2026, el tradu di Salmu 94:19.
Nha mai kria-m el sô i nos éra sinku fidju,
i sénpri el ta ranjaba manera pa tudu dia
nu leba kel testu di dia
i nu papiaba di el na família.
I N kontinua ta faze mésmu kuza ku nha família.
Pa N ten serteza ki N ta lé testu di dia tudu dia,
na kel noti antis N ta panha nha telemóvel,
N ta abri na JW Library® i N ta dexa-l
prontu pa N uza na kel otu dia.
Sédu palmanhan, nha mudjer ta
pripara nos fidju pa bai skóla.
El ta pripara Mikayla,
i dipôs ki es toma kafé 6:30,
nu ta xinta djuntu i nu ta lé i pâpia sobri testu di dia.
N gosta di faze kes pergunta li:
‘Kuzê ki kel-li ta inxina-m sobri Jeová?’
‘Modi ki N pode aplika kel-li na nha vida oji?’
Faze kes pergunta li ta djuda-m
intende midjór kuzê ki N sta lé
i prende más sobri kes kualidadi di Jeová.
I dja ki mi é soltera, N gosta di djobe
kes lison pa un algen ki é solteru.
N ta pâpia ku nhas fidju i na kes konbérsu
N ta presta atenson na kuzas ki ta djuda-m
intende kuzê ki es sta ta pasa pa el.
I óras ki N repara kes kuza
N ta tenta djuda-s odja modi ki kel testu di dia
ki nu sta ta pâpia di el ta djuda-s lida midjór
ku kes situason ki es sta ta infrenta.
N gosta di rezumi testu di dia,
pamodi é un bokadinhu más fásil di intende-l
i di lenbra di el duránti dia.
N ta toma alguns nóta,
i kes nóta é ku bazi na kuzê ki
nha mudjer i nhas fidju ta fla.
I é interesanti pamodi
kes komentáriu ki ta da-m más forsa
é kes kuza ki nhas fidju ta fla.
Nton na fin di dia, N ta torna djobe-s i N ta lé-s.
Es ta lenbra-m di kuzê ki nu papiaba
i kel-la ta da-m forsa própi.
N ten un amiga ki ta mora lonji
i nu ta kontinua ta pâpia ku kunpanheru
através di mensajen sobri testu di dia.
Ten dia ki nu ta pâpia sobri un testu di dia
ki lenbra-nu di kunpanheru
ô di algun kuza ki toka-nu nos korason.
Tevi un bês ki nu pâpia sobri un testu di dia,
inda na komésu di anu,
i el ta papiaba sobri mostra koraji i aji,
i N odja ma kel-la mexe ku Mikayla.
El staba ku vontadi di fla un kuza própi.
N ta lenbra di un dia ki nu staba ta lé testu di dia di sédu,
ki ta fla ma nu debe ten koraji,
nton N ba pa skóla i N fla un minina
ki ta kustuma fazeba otus algen abuzu,
ma Jeová krê pa nu trata tudu algen ku bondadi i amor.
Dipôs di un ténpu, el para di faze algen abuzu
i kel-li dexa-m txeu kontenti,
pamodi Jeová da-m koraji pa N pâpia.
N fika txeu kontenti di odja ma kel ki nu staba
ta pâpia di kel testu di dia
djuda-l ten koraji i aji.
N xinti orgulhu di el.
Kantu nha irmon ku se mudjer konvidadu
pa ba sisti Skóla pa Pregadoris di Reinu
kel-li afeta-m un bokadinhu.
N xinti tristi.
Dja N prenxeba pitison dôs bês
pa kel mésmu skóla i es ka konvida-m.
Pur isu, N fika ta pergunta:
‘Pamodi ki é ka mi ki es konvida?’
Kuzê ki N sta faze di mariadu?’
Kel testu di dia djuda-m lida ku kel situason li,
pamodi el lenbra-m ma N ten txeu valor pa Jeová.
Éra izatamenti kel-li ki N mesteba.
N ten nha própi negósiu i dja ki mi é pai,
alvês é normal N preokupa ku alguns kuza.
Nton tevi un ténpu ki negósiu ka staba ta kóre dretu,
i N fika un bokadinhu preokupadu.
Interesanti pamodi nu leba di palmanhan
un testu di dia ki tradu di Mateus 6:33
ki ta pâpia sobri ka fika preokupadu dimás.
I la Jizus promete ma Jeová ta kuida di nos.
I kel pensamentu la djuda-m txeu.
El djuda-m fika kalmu.
N fika trankuilu pamodi N da kónta ma
nu ka meste fika preokupadu dimás
pamodi Jeová sénpri ta kuida di nos.
Ku kel spriénsa li N intende ma é
inportanti lé testu di dia tudu dia
pamodi pode kontise situasons ki ta dizanima-nu.
Pur isu, kes spiriénsia li djuda-m intende
ma testu di dia pode djuda-nu
na momentus diferenti duránti dia.
Jeová sta sénpri la pa nos.
I através di testu di dia,
el ta pâpia ku nos tudu palmanhan.
Através di se Palavra,
el sta ta da-nu kel ajuda ki nu meste
Testu di dia pode djuda nos tudu si nu lé-l
i nu pensa na kuzê ki nu lé.
Mariely fla na el ta rezumi testu di dia sô na un frazi.
Otu irman ta rezumi-l sô na un palavra
i el ta fika ta pensa na kel palavra duránti dia.
Fazi si pode djuda-nu lenbra i aplika kel ki nu lé.
Pamodi ki nu sta ta pâpia di kel-li na es rilatóriu?
Pamodi sima 1 Koríntius 7:31 ta fla:
“Séna di es mundu sta ta muda.”
I nos própi situason tanbê ta muda.
Nton gósi más di ki nunka
nu krê uza Palavra di Deus
pa kuida di nos amizadi ku Jeová
i djuda nos família faze mésmu kuza.
Un izénplu bunitu é un karta ki nu
resebe di un irmon di Koreia di Sul
ki obrigadu trabadja i vive na un
kadia pamodi el nega bai trópa.
El skrebe: “Óras ki nu ta tirmina trabadju di kada dia,
irmons ki ta vive djuntu na mésmu kuartu,
ta tra ténpu pa lé testu di dia
i pâpia sobri kuzê ki es prende.
Alvês óras ki nu ta xinti dizanimadu
pamodi prublémas ki ta parse
pamodi kes otu algen ki sta na kadia
ô pamodi kes guarda nu ta fika
dimiradu di odja ma kel testu di dia
tinha kel pensamentu ki nu mesteba na kel momentu.
Kes momentu la ta da-nu txeu forsa i koraji
i ta djuda-nu xinti amor di Jeová através di nos irmons.”
Pa nhos tudu ki sta prézu pamodi nhos fé
ô ki obrigadu faze otu trabadju pamodi nhos konsénsia:
Nu ka skese di nhos.
Nhos izénplu di fé ta inkoraja-nu.
I nhos irmons ku irmans na mundu
interu sta ta ora pa nhos tanbê.
Timenti nu sta ta vive na es ténpu difísil,
nu kontinua ta tra ténpu pa lé i studa Bíblia
pa nu mante un amizadi fórti ku Jeová.
Nos Pai, Jeová,
tanbê ta da-nu un otu kuza pa inkoraja-nu,
ki é múzika.
Nu sta kontenti di pâpia ku nhos sobri novus múzika!
Na kes mês ki sta pa ben,
nu ta ben lansa txeu múzika ki ta
ben djuda irmons na mundu interu
fortalese ses amizadi ku Jeová.
Es ta ben txomadu “Múzika internasional.”
Kes múzika li ta ben podu na jw.org i na JW Library®
i es ta ben ser tipus di múzika diferenti
ki irmons na mundu interu gosta.
Kes múzika li ka ta ben traduzidu na otus língua,
i ka ta ben fazedu ninhun vídiu sobri es.
Enbóra tudu irmons di serteza
ta ben gosta di kes múzika li,
es fazedu prinsipalmenti pa kes más jóven.
Nhos krê obi un párti?
Nhos pode obi kes dôs primeru múzika gósi.
Dipôs ta ben podu más múzika.
Nu sta kontenti di ten más múzika,
bons múzika pa nu obi duránti nos dia-dia.
Na kel rilatóriu li,
nu pâpia sobri alguns kuza ki nu ta
ben faze na nos trabadju di pregason
ki ta inklui kel kanpanha
ki nu ta ben ten na setenbru.
Nu odja modi ki Jeová sta konsola
nos irmons i irmans na Venezuela
i tanbê na Filipinas dipôs di kes tremor di téra.
I nu pâpia sobri responsabilidadi
ki kada un di nos ten
na kuida di nos amizadi ku Jeová tudu dia.
Irmons ku irmans,
favor, nu krê pa nhos sabe ma nu ta ama nhos
i ma nu sta kontinua ta ora pa nhos.
I tanbê nu ta ora pa nhos ki sta
pasa pa dizastri ô pirsigison.
Kel-li é JW Broadcasting®
di Sedi Mundial di Tistimunhas di Jeová.

Rilatóriu di Grupu Enkaregadu di Óbra di 2026 — Nunbru 5