JW subtitle extractor

Irmons ku irmans, nhos é ben-vindu.
Dja ki kel rilatóriu li é txeu inportanti,
Grupu Enkaregadu di Óbra disidi lansa-l
na inglês más faxi ki es ta pode.
Já-já kel rilatóriu li ta ben lansadu
na otus língua tanbê.
Désdi nos últimu rilatóriu,
fazedu más 7 kongrésu internasional
ku téma “Filisidadi pa tudu ténpu”
na Calgary, na Kanadá; Quito na Ekuador;
Vilnius na Lituánia; Hamburgo na Alimanha;
Utrecht na Olanda;
Johannesburg na Áfrika di Sul
i Milwaukee na Mérka.
Más di 30 mil delegadus di 69 país
sisti kes kongrésu li.
Nunbru más altu di algen ki sisti kes
kongrésu li é 165 mil i 1.428 algen batiza.
Pensa na kel bon tistimunhu ki kes
algen ki ta mora na kes sidadi resebe!
Inda sta ben fazedu más três kongrésu
internasional antis di anu tirmina.
Dja sta ta fazedu planus pa kongrésu di 2027.
Téma di kongrésu di prósimu anu é
“Jizus é kaminhu.”
Nu tene planu di faze 21 kongrésu
internasional na 19 país.
Sima dja nu avizaba antis,
duránti es mês di setenbru di 2026,
nu sta ta oferese pesoas bruxura
Vive filís pa tudu ténpu!
ku obijetivu di kumesa studus di Bíblia.
Tanbê nu sta konvida pesoas
pa un diskursu spesial ku téma,
“Modi ki Bíblia pode djuda-u?”
Kel-li é un grandi oportunidadi pa djuda
kes algen sinseru konxe i ama Jeová!
Dja ki nu ta ma pesoas,
nu tene vontadi di pâpia ku es sobri notísias sábi
i oferese-s un studu di Bíblia.
Bu pode poi méta di kumesa un studu di Bíblia?
Pamodi ki bu ka ta pâpia ku Jeová sobri
kel dizeju sinseru ki bu ten
di djuda un algen bira disiplu?
Jeová ta djuda-u xinti alegria
timenti bu ta djobe kes algen ki ten
un “bon atitudi pa ganha vida pa tudu ténpu.”
I ka ta inporta ki rezultadu ki bu ta ten,
bu pode ten serteza ma Jeová
ta da valor pa bu sforsu.
Nos amor pa pesoas ta motiva-nu pa
nu pâpia ku es sobri notísias sábi.
Tanbê el ta pô-nu ta preokupa ku
kes ki sta pasa pa situasons difísil.
Na kes últimu mês li,
alguns dizastri na naturéza
prujudika nos irmons ku irmans.
Kel-li ta inklui teremotu fórti
na Venezuela, Japon i Kulónbia.
Lumi ki pega na florésta na Europa i na Mérka.
I téra ki disliza na Ázia i prujudika txeu algen.
Na Venezuela, nu sta kontinua
ta faze nos trabadju di djuda.
Alguns di nos irmons ku irmans fika prézu
na meiu di kes kaza ki ronba,
má nos irmons salva-s.
Tanbê irmons ku irmans di la
dja oferese más di 500 mil dóla
di kumida, ropa i otus kuza.
Betel faze alguns lugar pa djuda
asi pa kes ki meste pode ten kes kuza di dia-dia.
Ka dura li, irmon Jacob Rumph,
di Grupu Enkaregadu di Óbra,
i Troy Snyder, ajudanti di Kumison di Kordenadoris,
bai Venezuela pa vizita kes ki fika
prujudikadu pamodi kel tremor di téra.
Óras ki ta kontise un dizastri,
nu ta fika preokupadu ku nos irmons
ku irmans i ku nos vizinhu.
Nu sabe ma vida é un prezenti
di txeu valor ki Jeová da-nu.
Salmu 36:9 ta fla: “[Jeová] é fonti di vida.”
Sérvus di Jeová sénpri sforsa pa
da valor pa vida sima el ta da.
É pur isu ki nu ka ta apoia géra,
nu ka ta tra vida di un mininu ki inda ka nase
i nu ta ivita faze kalker kuza
prigozu ki pode poi algen ta móre.
Tanbê, Jeová ta mostra ma vida
ki é sagradu sta ligadu ku sangi.
Na kel lei ki Jeová da Nué na Jénezis 9:4, el fla:
“Má sô ka nhos kume karni di un
animal ku se sangi, ki é se vida.”
Ku orientason di spritu santu,
apóstlus fla un kuza sima kel-li
kantu ki es fla kristons pa ka seta sangi.
Nu ta atxa-l na Atus 15:28, 29:
“Pamodi parse dretu pa spritu santu i pa nos tanbê,
ka poi nhos más ninhun karga alén di kes kuza li ki nhos meste:
pa nhos kontinua ka ta seta kes kuza ki sakrifikadu pa imajen,
sangi, kes animal ki matadu i ki ka tradu sangi
i konportamentu seksual mariadu.
Si nhos kontinua ta ivita kes kuza li,
tudu ta kóre dretu.
Nu ta manda nhos mantenha!”
Kel-li krê fla ma kristons ka ta
kume karni ki ka tradu sangi.
Má kel órdi li é ka sô sobri kumida.
Kel-la é un oportunidadi ki kada
un di nos ten di mostra ruspetu
pa manera di pensa di Jeová sobri vida.
Obi ku kel órdi li ta inklui ka seta sangi.
Motivu prinsipal di kel prinsípiu li
é mostra ruspetu pa vida,
kel-li ta inklui kulpa di sangi, sima mata algen
ô faze algun kuza prigozu
ki pode poi un algen ta móre.
Na tudu kes ária li,
Tistimunhas di Jeová sta disididu na mostra
ma es ta pensa sima Jeová
sobri vida i sobri sangi ki é sagradu.
Sobri sangi,
Tistimunhas di Jeová ta intende ma Atus 15
siginifika ma es ka debe uza sangi konplétu,
nen kume, nen toma i nen da otus algen sangi.
Kel-li dja proteje povu di Jeová
na sentidu spritual i fíziku.
Tanbê nu ta aplikaba kel prinsípiu li
na kes kuatu párti prinsipal di sangi,
ki é glóbulus brumedju,
glóbulus branku,
plasma i plaketas.
Piskiza ki fazedu na medisina mostra ma
kes tratamentu ki ka ta involve sangi ta da bons
rezultadu i ta ivita txeu prigu di toma sangi.
Má, pamodi kes avansu
ki dja kontise na medisina
parse txeu pergunta sobri modi ki nu ta
aplika prinsípius di Bíblia sobri saúdi.
Pur isu, Rilatóriu di Grupu Enkaregadu di Óbra
di 2026 nunbru 2 fla kel-li:
“Kristons ka meste obi ku Lei di Muizés.
Má, nu debe obi ku kel lei ki sta na
livru di Atus sobri ka seta sangi.
Tanbê, Bíblia ka ta da un lei sobri
modi ki un algen debe uza se sangi
na un tratamentu di saúdi i na un operason.
Pur isu, sima ta kontise na disizons ki nu ta toma
na kalker otu tratamentu,
kada sérvu di Jeová debe disidi
modi ki se sangi ta uzadu na tudu
tratamentu di saúdi i na operason.”
Kel intendimentu midjór li
ta dexa kada sérvu di Jeová
faze kel ki sta na Gálatas 6:5:
“Kada un ta leba se própi karga di responsabilidadi.”
Dipôs di pensa ku kuidadu i di faze orason,
Grupu Enkaregadu di Óbra disidi
ma kel mésmu prinsípiu li
ta aplika tanbê na kes kuatu
párti prinsipal di sangi ki é:
glóbulus branku,
glóbulus brumedju, plasma
i plaketas ki tradu di sangi di otu algen.
Pur isu, kada sérvu di Jeová
debe toma se própi disizon
sobri modi ki el ta uza kes kuatu
párti prinsipal di sangi
na un tratamentu di saúdi ô un operason.
Tanbê, kada sérvu di Jeová
debe disidi si el ta da kes párti prinsipal di se sangi
ô kes párti más pikinoti.
Má, kel-li krê fla ma pa Grupu Enkaregadu di Óbra
é ka inportanti si un tratamentu di saúdi fazedu
ku un ô más di kes párti prinsipal di sangi?
Nau, é ka kel-la!
Pa Grupu Enkaregadu di Óbra kel-li ta
kontinua ta ser un asuntu txeu inportanti.
Má, dja ki Bíblia ka ta pâpia
di kes párti ki pode tradu di sangi,
nu ta rekonhese ma ku bazi na 1 Koríntius 4:6,
nu ka ten autoridadi di
“pasa di kes kuza ki sta skrebedu.”
Tanbê nu ta rekonhese kel konsedju inportanti
ki sta na 2 Koríntius 1:24 ki ta fla:
“É ka pamodi nos é dónu di nhos fé,
má nu ta kolabora pa nhos ten alegria,
dja ki é pamodi nhos fé ki nhos sta di pé.”
Kuzê ki ta djuda un kriston disidi si el ta seta ô nau
un ô más di kes kuatu párti prinsipal di sangi?
Kada un di nos debe pensa i faze orason
sobri tudu kuza ki sta involvidu
antis di nu toma un disizon.
Si nu ka leba kel asuntu li asériu
nu pode prujudika nos konsénsia
i nos amizadi ku Jeová.
Kuzê ki un kriston debe pensa na el
óras ki el ten ki toma algun disizon ki ta involve
seta un di kes párti di sangi ki tradu di otu algen?
Kada un di nos ta pensa di manera diferenti.
Alguns algen pode ka seta ninhun di kes párti di sangi
pamodi es ta atxa ma é eradu faze kel-li.
Otus algen pode seta alguns párti
pamodi es ta reprizenta un persentajen
pikinoti di sangi konplétu.
Pur izénplu, alguns párti prinsipal di sangi
ten ménus sangi di ki otus párti más pikinoti
ki alguns sérvu di Jeová pode
seta pa un tratamentu di saúdi.
Ka ta inporta kal ki é situason,
Romanus 14:12 ta fla ma “kada un di nos
ta ben presta kónta di nos kabésa pa Deus.”
Pa djuda kada sérvu di Jeová toma se própi disizon,
Grupu Enkaregadu di Óbra
aprova pa lansadu un tabéla.
El ta mostra alguns di kes párti ki tradu di sangi.
Kel tabéla li, djuntu ku un artigu
“Perguntas ki leitoris ta faze”
já-já ta ben lansadu na jw.org i na JW Library®.
Alén di kel-li, sta ta priparadu alguns artigu
di studu di Sentinéla ki ta pâpia sobri kel asuntu li.
I tanbê nos karton DPA ta ben atualizadu.
Dipôs di pensa na kel-li i na otus kuza,
kada un di nos debe disidi si nu ta
seta kes párti prinsipal di sangi
ô kes párti más pikinoti ki tradu
di sangi di un otu algen.
Ningen na kongregason ka ta ba
involve na kel disizon li,
nen irmons ka debe julga disizon di otus algen.
Normalmenti, nu ka meste pâpia di
nos disizon di tratamentu di saúdi
ku otus algen si el é ka un di nos
prokurador ki sta na nos DPA.
Óras ki bu meste,
Kumison di Ligason ku Ospital sta
prontu pa djuda-u na bu disizon.
Kes irmon pode djuda-u atxa un
dotor ki ta ruspeta bu konsénsia
i es ka ta pâpia di bu disizon ku ningen.
I si trabadju di un irmon sta ligadu ku sangi
i ku kes párti ki ta tradu di sangi?
Kes prinsípiu ki sta na artigu
“Perguntas ki leitoris ta faze”
di Sentinéla di 15 abril di 1999,
pode djuda-l toma un bon disizon
i kontinua ku un konsénsia linpu.
Irmons ku irmans,
nu sabe ma kes-li é txeu
informason pa pensa na el,
má kal ki é pontu prinsipal?
Tistimunhas di Jeová ka ta
seta toma sangi konplétu,
nen nu ka ta da otus algen sangi konplétu.
Tanbê nu ka ta kume sangi
nen karni ki ka tradu sangi.
Má, kada un di nos ta disidi si nu ta
seta kes párti prinsipal di sangi
ô kes párti más pikinoti ki tradu
di sangi di otu algen.
Tanbê, é kada un di nos ki ta disidi si nu ta da
kes párti prinsipal di nos sangi
ô kes párti más pikinoti.
Favor, nhos ten serteza ma
Grupu Enkaregadu di Óbra
ta kontinua ta mostra ruspetu pa kel
prezenti di txeu valor ki é vida i sangi.
Má, nu ta rekonhese ma é responsabilidadi
di kada sérvu di Jeová toma se própi disizon
dianti di Jeová di akordu ku se konsénsia.
Pur isu, Grupu Enkaregadu di Óbra
ta insentiva tudu sérvu di Deus
pa analiza ku orason tudu kes pontu inportanti
óras ki es ta toma disizon
ki ta involve kes párti ki tradu di sangi.
Di kel manera li, kada un di nos
ta toma un disizon ki ta dexa-nu
ku un konsénsia linpu
i mostra ruspetu pa Jeová, ki é Fonti di vida.
Nhos irmons ku irmans ki nu krê txeu,
nu ta agradese nhos pa nhos fé, amor i lialdadi.
Nu ta ama nhos txeu.
Kel-li é JW Broadcasting®,
di Sédi Mundial di Tistimunhas di Jeová.

Rilatóriu di Grupu Enkaregadu di Óbra di 2026 — Nunbru 6