JW subtitle extractor

今仔日
咱逐工攏會接收著各種各樣的消息
了解上新的消息是袂䆀啦
毋過愛細膩
毋是每一个消息攏是真的
有的是人家己的見解
有的只有一部份是真的
有的是無根據的謠言
抑是假做事實的白賊話
假消息毋但是無正確爾爾
嘛可能會對咱有危害喔
人若相信遮的消息
可能就會做出錯誤的決定
抑是感覺一寡警告無要緊
按呢
按怎才袂去互假消息騙去咧
約伯記12:11
鼓勵咱愛檢驗聽著的話
就親像喙舌咧試滋味
你食物件的時
若是感覺佗位怪怪
就愛給呸出來
毋通給吞落去喔
仝款
你收著一个消息
毋通馬上就相信
抑是傳互別人
愛先查看覓仔這个消息敢是真的
你會當按怎做咧
第一步
了解消息的來源
你敢知影
這个消息是對佗位來的
就算咱佇線頂看著的物件
看起來蓋成是來自官方的消息
咱嘛愛細膩
這可能只是人
給假消息閣提出來講
抑是發表伊個人的見解
這馬閣有一種
號做深度偽造的技術
會當給人的面及聲換掉
人可能就會運用這種技術
製造假消息來騙人
所以
就算一件代誌逐家攏咧講
咱嘛愛照
帖撒羅尼迦前書5:21的建議落去做
事事攏著查證
你會當比較無仝的消息來源
來確定這件代誌是有影抑無影
第二步
看清消息背後的目的
發這个消息的人
只是欲說明事實
抑是欲影響人的看法
互逐家支持某一爿咧
有的新聞報導會歪曲事實
干焦講對某一方較有利的部份
其他的就刁工無愛講
有的報導甚至會講
一寡天災人禍
抑是社會事件
是某一寡組織佇背後計畫的
這款報導的目的
通常是欲製造對立及仇恨
而且嘛會像火燒山按呢
湠甲足緊的
毋過事實上
遮的消息攏無經過證實
有時陣
甚至是充滿歹意的白賊話
毋通去互騙去
毋過呢
你欲開時間查證一个消息進前
會當問家己一个重要的問題
就是
這个報導對我來講敢真正遐重要
愛知影
人定定會給小可代誌講甲足嚴重
你若每一个消息
攏想欲點入去了解
可能就會互家己足忝的
嘛可能
會互一大堆有的無的消息
舞甲足緊張的
你若感覺跳出來的消息傷濟矣
你會當給一寡APP的通知關掉
干焦佇你需要的時陣
搜揣你想欲知影的資訊就好矣
當然
就算你無咧上網路
你猶是有可能對別人遐聽著假消息
有的親情朋友
可能出自好意
就給怹聽著的消息講互你知
所以
毋管是你家己看著的
對別人遐聽著的
抑是朋友傳互你的
攏愛會記得
箴言14:15的話
「天真無知的人
啥物話攏信
精光閣謹慎的人
步步攏細膩」
也就是講
對你聽著的物件
毋通無經過思考就相信
當然這毋是講
任何人任何代誌
你攏袂當相信
若是一寡消息
聽起來怪怪
抑是互你感覺不安
你會當請一个值得信賴
而且有經驗的朋友
幫你看一下
看遮的消息敢有正確
用一寡時間查消息的來源
想看覓報導背後的目的
嘛莫互
你無需要知影的消息
來給你攪擾
按呢
你就會當做一个巧巧仔人
就算假消息滿四界
你嘛袂去互騙去

消息滿天飛，如何辨真假