JW subtitle extractor

長頸鹿係陸地上最高嘅動物
所以佢哋好容易食到樹上面嘅葉
不過要耷低頭飲水就考起佢哋嘞
除此之外
佢哋仲有一個更加大嘅挑戰
就係要克服地心吸力
地心吸力
會令液體由高嘅地方流向低嘅地方
調返轉如果想令啲液體去高嘅地方
就需要克服地心吸力嘅影響嘞
想去得越高就需要越大嘅壓力
一隻成年長頸鹿
心臟去到頭部嘅距離至少有兩米
即係話佢需要好高嘅血壓
先可以將血液泵到去頭部
長頸鹿需要嘅血壓
比起任何哺乳類動物都高
大約係人類正常血壓嘅兩倍
如果人類或者其他哺乳類動物
有咁高嘅血壓
就會引發嚴重嘅問題
例如對腳水腫
腎臟同埋心臟衰竭
或者中風
咁點解長頸鹿嘅血壓咁高
但係又唔會有事嘅呢？
雖然科學家未完全了解所有細節
但係佢哋發現呢個同長頸鹿
獨特嘅構造有關
成年長頸鹿嘅心臟肌肉特別厚
換轉係人如果心臟嘅肌肉變厚
心臟嘅機能就會變差
但係長頸鹿嘅心臟肌肉就好有彈性
所以泵血嘅效能好高
咁長頸鹿耷低頭飲水嘅時候
會唔會腦充血呢？
原來佢哋平時咁樣做係唔會有事㗎
其中一個原因係
長頸鹿喺飲水嘅時候
會屈住或者擘大對腳
咁做可以縮短心臟同頭部嘅垂直距離
保持血壓穩定
就算長頸鹿突然岳高個頭
佢都唔會因為啲血液
上唔切個腦而暈低
因為佢有好好嘅血液調節系統
比起頸動脈
長頸鹿小腿嘅動脈血管壁比較厚
而血管入面就窄啲
仲有血管裡面嘅環形肌肉
可以收緊或者放鬆
控制腳部嘅血流量
呢個機制
就好似同長頸鹿著壓力襪咁樣
幫佢調節下肢嘅血壓
咁佢隻腳就唔會腫嘞
研究長頸鹿嘅心血管系統
可以幫醫生搵到新方法
治療高血壓
科學家喺長頸鹿身上搵到靈感
研發更加好嘅太空衣
喺近乎真空嘅狀態之下
太空衣需要提供壓力
令太空人嘅血液同其他體液正常流動
維持佢哋嘅生命
我哋唔完全了解長頸鹿嘅構造
但係我哋肯定
雖然長頸鹿嘅血壓高過人類好多
但係就維持住佢哋嘅健康
你覺得呢？
長頸鹿高壓嘅血液循環系統
係進化而嚟
定係有設計嘅呢？

有設計者嗎？長頸鹿的血液循環系統