JW subtitle extractor

Dja ten uns mês,
talvês maioria di nos nunka ka obiba kel palavra li
“koronavírus”.
Má gósi nu ta sta sénpri ta obi na notísia i ta uza kes palavra li
“koronavírus” i “COVID-19”.
Gósi ki kel duénsa li sta ta spadja pa mundu interu,
txeu kuza dja muda na nos dia-dia
di un manera ki nunka nu ka ta imajinaba.
I é tristi di fla ma na poku ténpu
kel duénsa li dja mata milharis di algen.
Nu sabe ma nhos sta preokupadu ku saúdi
i suguransa di nos irmons ku irmans,
inda más di kes ki sta na kes país más afetadu pa koronavírus.
Bon, na kel rilatóriu li,
nu sta ben pâpia ku ansions na Betel di Koreia, Itália i di Mérka,
pa odja modi ki nos irmons ku irmans sta
i kuzê ki sta ta fazedu pa djuda kes ki sta ta sufri
pamodi kel duénsa gravi li.
Má antis di N pâpia ku kes irmon li,
N ta gostaba di fla nhos alguns kuza.
É verdadi ma txeu algen sta preokupadu
pamodi kel duénsa li sta ta spadja.
Má nos nu ka sta spantadu
di odja kel situason li ta kontise, ka simé?
Na Lucas 21:11, Jizus fla klaru ma duénsas ki ta spadja
ta faze párti di kel sinal di ténpu di fin.
I na Apocalipse kapítlu 6, ta pâpia di kuatu kabalu
i la ta pâpia tanbê di ‘duénsas ki ta mata’.
Nton, kuzê ki sta ta kontise na mundu gósi
ta mostra klaru ma ténpu ki nu sta ta vive na el,
é fin di ténpu di fin.
Di sertéza, nu sta vive na fin di ténpu di fin,
kuazi ta txiga na últimu dia di ténpu di fin.
Nu sabe ma situason é sériu, ma dja ki nos é povu di Jeová,
nu ka ta fika dizorientadu.
I Isaías 30:15 ta fla-nu pamodi.
Nu ben lé-l djuntu.
Isaías 30:15:
‘Sinhor Jeová, Kel Algen Más Grandi, kel Santu di Israel, fla:
“Si nhos volta pa mi i nhos fika trankilu,
nhos ta ser salvu;
Pa nhos ten forsa nhos ten ki kontinua kalmu i ten kunfiansa.”’
Jeová sénpri da se povu orientason na ténpu di frónta.
Nton nu pode faze sima kel versíklu li ta fla-nu:
‘Kontinua kalmu i ten kunfiansa’ na Jeová.
I Jeová ta promete ma el ta da-nu forsa.
Sima nu ta ben odja na kes rilatóriu di alguns país,
Jeová da prinsípius ki sta na Bíblia
pa djuda se povu toma bons disizon,
sikrê ku situasons difísil.
Nu ta kumesa ta pâpia ku irmon Reino Kesk, ki ta sirbi na Koreia.
Reino, obrigadu pa pâpia ku nos.
Di nada. É un priviléjiu.
Nton nu ta pergunta-u irmon
Reino, modi ki nos irmons ku irmans na Koreia sta?
Nbóra pesoas li tene medu,
nos irmons ku irmans sta ku un atitudi puzitivu
i es sta ta tenta aplika kel bon konsedju
ki sta na Isaías 26:3 di kunfia di tudu korason na Jeová.
É bon obi kel-li.
Modi ki koronavírus afeta runions di kongregason
i trabadju di pregason na tiritóriu di nhos filial?
Bon, nu tevi ki para di faze runions na Salons di Reinu
i tanbê nu para di da tistimunhu na públiku.
Na komésu, irmons fika un bokadinhu konfuzu ku kes mudansa li,
pamodi tudu kuza kontise dirapenti.
Má kantu es fladu pamodi ki tomadu kes disizon li
i kantu es odja nisisidadi di aplika Romanos 13:1
(pa obi ku ‘autoridadi supirior’, ô autoridadis di govérnu),
lógu es ntende
i es kumesa ta aji di akordu ku kes orientason ki es resebe.
I es fika kontenti pamodi kes bon orientason ki ben di organizason.
Kes-li foi mudansas grandi,
má nu sabe ma irmons ku irmans obidese
i kel-li da bon tistimunhu pa otus sobri nómi di Jeová.
Má kuzê ki djuda nos irmons ku irmans
mante kalmu duránti kel ténpu li?
Bon, irmons sta ta kontinua ta adora Jeová.
Kel-li sta ta djuda-s, sta ta djuda nos tudu, fika kalmu
i lenbra di kes kuza ki é más inportanti.
Má sobri runions, irmons sta ta djunta na grupus pikinoti
ô es sta ta uza prugramas di konputador
pa pâpia ku kunpanheru i pa sisti runion.
I tanbê es sta ta uza JW Stream.
Tanbê es muda ses manera di prega.
Es sta ta skrebe kartas,
es sta ta manda mensaji pa ses revizita,
es sta ta faze studus di Bíblia pa tilifóni,
es sta ta txoma ses família pa es odja modi ki es sta (pa pâpia ku es),
i tanbê es sta ta txoma kes algen ki dja studaba Bíblia
pa odja modi ki es sta i pa da-s tistimunhu.
Otu kuza ki N krê fla,
é ma irmons sta ta sforsa txeu pa es ser ikilibradu
na ténpu ki es ta gasta na odja i lé notísias.
É klaru ki é inportanti nu sta atualizadu ku kuzas ki sta kontise,
má nos irmons dja da kónta ma si es sta sénpri ta odja kes últimu notísia
es ta fika preokupadu dimás.
Di sertéza nu pode imita fé di nos irmons ku irmans na Koreia
i ses disizon di kontinua ta adora Jeová duránti kel ténpu li.
Muitu obrigadu pamodi bu dexa-nu sabe kes kuza li.
Mi ki ta agradese. Obrigadu.
Gósi nu ta bai ti Itália pa nu pâpia ku irmon Greg Cicciù.
Obrigadu pamodi bu sta pâpia ku mi, Greg.
N sta kontenti di pâpia ku bo irmon Lett. Obrigadu.
Nu sabe ma nos irmons na Itália sta ta pasa pa kel mésmu situason difísil
sima nos irmons na Koreia.
I na kes últimu simana
situason fika más difísil inda
pamodi tudu algen na país interu
dadu órdi pa ka sai di kaza.
Favor bu ta pode fla-nu modi ki irmons na Itália sta?
Odja, alguns irmons panha koronavírus
i infilismenti ti dia 16 di marsu, 6 di es dja móre.
Maioria di nos irmons sta dretu.
Nu sta ta ora pa es, prinsipalmenti pa kes ki ses família móre.
Nu sta kontenti di sabe ma maioria di nos irmons sta dretu,
má nu sta tristi pamodi kes ki perde ses família.
Nu obi na notísias ma gósi na Itália nhos ka pode faze txeu kuza.
Má simé, modi ki nos irmons ku irmans sta ta kuida di kunpanheru?
Irmons sta xinti txeu falta di sta djuntu ku kunpanheru,
má ku ajuda di Jeová es sta dretu na sentidu spritual.
Sima Jizus fla na João 13:34, 35
amor ta mostraba ken ki é se disiplus verdaderu,
i nu sta ta odja irmons ta mostra kel tipu di amor li.
É simé ma govérnu dja fla-nu pa nu ka sai di kaza,
má nos irmons ta kontinua ta pâpia ku kunpanheru pa tilifóni
ô di otus manera.
Rezultadu é ki txeu irmon
sta ta fla ma na kel situason li irmons sta más amigu di kunpanheru.
Kes notísia li ta da algen koraji.
Favor fla-nu modi ki ansions sta ta kuida di irmons.
Alén di djuda irmons ku kuzas ki es meste,
ansions sta ta pâpia ku irmons i ku grupu di pregason
através di prugrama di konputador, pa nkoraja-s ku bazi na Bíblia
asi pa ningen ka xinti el sô.
Tudu algen sta resebe konsolu i ajuda pa mante ses amizadi ku Jeová.
Txeu irmon ta fla ma es sta kontenti
pamodi ansions sta ta kuida di es.
Pur izénplu, un irman skrebe: “N ta xinti protejidu,
sima óras ki galinha ta poi se fidjus dibaxu di se aza.”
Otu irmon fla:
“N ta xinti amor di Jeová através di nhas ansions.”
Sima Isaías 32:2 ta fla, nos ansions
sta ta ser ‘sima un lugar pa sukundi di béntu,
[i] sima un lugar pa sukundi di tenporal’.
Kel-li ta da algen forsa!
Nu sta kontenti di odja modi ki Jeová
sta ta djuda nhos duránti kel ténpu difísil li.
Nu ta kontinua ta ora pa nhos.
Muitu obrigadu irmon, Lett.
Gósi nu ta ben pâpia ku un irmon li di Mérka ki txoma Harold Corkern,
ki sta sirbi na Wallkill, Nova York.
Irmon Harold ta sirbi kómu ajudanti di Kumison Editora
di Grupu Enkaregadu di Óbra,
má tanbê el é ménbru di Kumison di Filial di Mérka.
Obrigadu pamodi bu sta ku nos, Harold,
i nu sta ku gana di obi kuzê ki bu ten pa fla-nu.
Obrigadu pa es oportunidadi irmon Lett.
Favor, fla-nu modi ki nos irmons ku irmans na sedi mundial
i na kes otu Betel di Mérka sta?
Bon irmon Lett, é klaru ki nu sta vive na ténpus konplikadu
pamodi nunka nu ka pasaba pa un situason sériu sima kel-li.
Má na nómi di Kumison di Filial,
nu sta txeu kontenti di fla ma família di Betel sta dretu.
I es merese ilojiu pamodi es sta ta mostra ‘kel sabedoria ki ta ben di riba’,
ki sta ‘prontu pa obidese’ sima sta na Tiago 3:17.
I di mésmu manera, nos irmons na país interu
sta prontu pa sigi orientason di Filial.
É bon obi kel-li.
Bu pode splika-nu kuzê ki nos irmons ku irmans
sta ta faze pa ivita spadja koronavírus?
Nu sta ta leba asériu kes orientason ki nu resebe
di autoridadis di saúdi i di govérnu
sobri kuzê ki nu debe faze pa ka dexa vírus spadja.
Ten alguns orientason prinsipal sima, laba mô sénpri,
ka poi mô na rostu,
ivita da abrasu ku mozada
i faze manera di sta sénpri ta dizinfeta kes lugar ki algen ta poi mô.
I si un algen sta duenti, el debe fika na kaza.
Nu da kes orientason prinsipal li
ka sô pa nos irmons ki ta trabadja na Betel
má tanbê pa kes ki ta sta na kanpu.
Kes-li é bons orientason.
Ti mi N sta ta kunprimenta nhas irmon ku kutubélu envês di mozada.
Bu pode fla-nu ki disizons ki tomadu asi pa tudu algen kontinua suguru?
Bon, pa proteje família di Betel, nos irmons na kanpu i nos vizinhus,
gósi nu ka sta faze vizitas
i nen nu ka sta resebe ningen na kes prédiu di Betel.
Di akordu ku orientason di Grupu Enkaregadu di Óbra,
ningen ka sisti formatura di Jiliádi sima ta kustuma kontise na kes otu anu
i família di Betel dadu orientason pa es sisti prugrama na ses kuartu.
Gósi ki kel vírus sta ta spadja más txeu inda, nu toma alguns medida.
Pur izénplu, família di Betel dadu orientason ma es ka debe sai di Betel
pa faze kalker atividadi,
i kel-li pode ser faze kónpra, faze konvívius i bai pa runions.
Nu ta gostaba di distaka ma kel-li
é un disizon ki tomadu pa proteje família di Betel,
pamodi inda kel duénsa ka spadja li,
má nu sta ta toma txeu kuidadu pa proteje-s.
I nu ta ba ta fika sienti tudu simana
pa odja ti ki ténpu nu ta fika di korenténa.
Nu informa tudu irmons, ma ti 17 di maiu,
kanseladu tudu asenbleias ki ta fazedu na tiritóriu
ki filial di Mérka ta kuida.
Di sertéza sigi kes orientason li é ka fásil.
Modi ki irmons reaji?
Nu sta kontenti di fla
ma es ten stadu ta sigi tudu kes orientason ki es sta ta resebe.
I irmon Lett, na nómi di Kumison di Filial,
nu ta gostaba di flaba nhos, irmons di Grupu Enkaregadu di Óbra:
Muitu obrigadu pa orientason ki nhos sta ta da-nu ku amor.
Ku tudu sertéza nu ta xinti nhos preokupason
i nhos amor pa nos. Pur isu, muitu obrigadu.
Muitu obrigadu Harold.
Di sertéza N ta fla kes otu irmons manera ki nhos sta ta xinti.
Nu pidi Jeová orientason pa nu pode toma kes disizon li.
Ta nkoraja-nu odja modi ki irmons ku irmans sta ta sigi kes orientason.
Muitu obrigadu irmon Harold, pa kes informason ki bu da-nu.
Nos ki ta agradese.
Sima dja nhos odja na es rilatóriu,
ku situason ta muda tudu dia, alvês tudu óra,
tevi ki fazedu txeu mudansa.
Na alguns kuza Grupu Enkaregadu di Óbra fla klaru
modi ki irmons debe sigi kes orientason.
Má otus disizon, nu dexa pa ménbrus di Kumison di Filial,
enkaregadus di grupu di kongregason
i ansions di kongregason,
ki konxe situason di ses tiritóriu midjór.
I pa nhos irmons fiel ki ten kes responsabilidadi li,
nu ta gostaba di fla nhos kel-li:
Nu ta kunfia na nhos, i nu ten sertéza ma nhos ta faze orason
pa analiza situason di nhos tiritóriu
i ma nhos ta sigi kes orientason ki ‘autoridadis supirior’ ta da nhos.
Nu sabe ma nhos ta faze tudu kel ki nhos ta pode
pa nhos kontinua ta kuida di kongregason.
Nhos ta faze kel-li através di tilifóni ô otus prugrama di konputador.
Tanbê nu ten sertéza ma Jeová ta orienta nhos
através di se spritu santu,
i el ta da nhos sabedoria pa nhos aplika dretu prinsípius di Bíblia
i pa nhos konsigi da irmons bons orientason.
I pa nos tudu,
ka ta nporta si orientason ben di Grupu Enkaregadu di Óbra,
di filial, di enkaregadu di grupu di kongregason ô di ansions,
nu krê sigi tudu kes orientason.
Es ta proteje-nu gósi
i si nu pensa dretu, si nu sigi kes orientason li é un bon trenu
pamodi ténpu más difísil inda sta pa frenti.
Antis di nu tirmina, nu ta gostaba di pâpia sobri
Komemorason di mórti di Jizus ki ta fazedu dia 7 di abril.
Ka ten ninhun vírus ô duénsa na kel mundu li,
ki ta pô-nu ka mostra nos gratidon
pa kuzê ki Jeová ku Jizus dja faze pa nos
ô ka dexa-nu faze komemorason di mórti di Jizus Kristu.
Nu ta djunta pa nu faze es komemorason ka pamodi é un tradison
má pamodi é un órdi ki nu ta atxa na Ivanjélhu di Lucas 22:19.
Nu lé Lucas 22:19:
‘Tanbê el [Jizus] panha un pon, el agradese Deus, el parti-s el,
el da-s i el fla-s:
“Kel-li ta reprizenta nha korpu, ki ta ben dadu pa nhos pruvetu.
Nhos kontinua ta faze kel-li pa nhos lenbra di mi.’”
Nton nu ta kontinua ta obidese es órdi
di komemora mórti di Jizus pa lenbra di el?
Klaru ki sin.
Má manera ki nu ta faze es komemorason
ta dipende di situason di undi ki nu sta.
Si ta da, nu ta insentiva-u pa bu sisti djuntu ku bu kongregason.
Bu pode ten sertéza ma ansions ta toma medida
pa tudu algen ki ta sisti fika protejedu.
É klaru ki na alguns lugar,
bu ka ta pode sisti djuntu ku bu kongregason pamodi koronavírus.
Na kel situason li, bu pode resebe orientasons di bus ansion
pa djunta ku un grupu pikinoti,
pa uza prugrama di konputador, sima Skype ô Zoom.
Ô si ka ta da pa faze di ninhun di kes manera li,
bu pode sisti prugrama através di jw.org®.
Nu sta kontenti pamodi Jeová orienta se organizason
asi pa nu pode ‘bebe leti di nasons’ sima sta na Isaías 60:16,
i kel-li ta inklui uza tekinolojia ku sabedoria!
Ka ta nporta kuzê ki sta ta fazedu, nu krê pripara nos korason
i faze kalker kuza ki nu meste pa nu pode obidese kel órdi di Jizus
di faze komemorason di se mórti.
Pensa un bokadinhu na kel sakrifisiu ki Jizus faze
i na kuzê ki el ta siginifika,
inda más gósi ki mundu interu sta ta pasa pa kel situason difísil li.
Através di resgati, Jeová faze manera pa kaba ku tudu prublémas na Téra,
sima duénsas ki ta spadja.
Ka sô kel duénsa li má tudu tipu di duénsa i mórti.
É simé ma kes kuza ki nu sta ta odja ta kontise oji,
sta poi ‘kuzas ta fika konplikadu, difísil di aguenta’ sima Bíblia dja flaba.
Má kes kuza li tanbê ta lenbra-nu ma sta kuazi ta txiga kel ténpu
ki nu ta ben odja fin di tudu prubléma pa tudu ténpu.
Nu krê pa nhos sabe ma Grupu Enkaregadu di Óbra ta ama nhos txeu
i ma nu ta kontinua ta ora pa nhos.
Nos irmons na Mérka, Itália i na Koreia ta manda ses amor i mantenha.
Kel-li é JW Broadcasting® di Sedi Mundial di Tistimunhas di Jeová.

Rilatóriu di 2020 di Grupu Enkaregadu di Óbra — Nunbru 1