JW subtitle extractor

Tudu dretu, irmons?
Grupu Enkaregadu di Óbra
i família di Betel di Mérka manda nhos mantenha.
Nu krê pa nhos sabe ma nu krê nhos txeu,
ma nu sta preokupadu ku nhos
i ma nu sta faze orason pa nhos, tudu dia.
Nu sabe ma kada bês más
nhos sta ta ser afetadu pa es duénsa di koronavírus.
Nhos ka pode bai trabadju.
Nhos ka pode bai skóla.
Nhos ka pode bai pa Salon di Reinu ô prega di kaza en kaza.
Alguns di nhos dja perde nhos trabadju
i nhos ka sabe modi ki nhos sta ben konsigi kuida di nhos família.
Otus ten família ki ta vive lonji.
Es sta es sô na kaza.
Es sta preokupadu ku es.
I infilismenti, alguns sta txeu tristi
pamodi es duénsa dja mata un algen ki es krê txeu.
Nu krê pa nhos sabe ma nu fika kasábi kantu nu obi kes notísia li.
Nu sta txeu tristi pamodi kel-li.
Kes-li é ténpu txeu difísil,
má é inportanti nu lenbra di un kuza:
Ninhun amigu di Jeová ka ta fika bandonadu.
Jeová pode djuda-nu através di se spritu santu.
El pode djuda-nu sikrê nu sta nos sô.
Otu manera ki Jeová ta djuda-nu é através di ansions ki ten txeu amor.
I kel-li sta di akordu ku promésa ki el faze.
Nu lé Jeremias 23:4, i nu odja modi ki kel profesia li sta ta kunpri gósi.
N ta lé sô un párti di es versíklu.
Li Jeová promete:
ma el ta ‘ranja pastoris ki ta pastora-s di verdadi.’
I na fin el ta fla: ‘ninhun di es ka ta perde.’
Bon, nhos konsigi odja modi kel profesia li sta ta kunpri na ansions?
Pur izénplu, nhos pensa na tudu trabadju ki nos ansions sta ta faze
pa nu ka xinti falta di kumida spritual.
Es sta ta organiza runions,
es sta ta faze vizita di pastoreiu através di internet,
es sta ta organiza runions pa pregason
i na alguns país es sta ta ranja tiritórius
pa irmons da tistimunhu pa tilifóni ô pa karta.
É klaru ki ansions tanbê sta preokupadu si irmons sta dretu.
Di vês en kuandu, es ta txoma-nu pa sabe modi ki nu sta,
si nu tene kumida, ramedi i otus kuza ki nu ta meste.
Si es pergunta-u, ka bu xinti vergónha: Fla ansions kuzê ki bu sta meste.
Tanbê es pode da-u alguns sujiston di modi ki bu pode proteje bu saúdi.
Nhos ta faze ideia di kantu perguntas
ki ansions tinha kantu ki kel duénsa li spadja?
Nunka es ka lidaba ku un kuza sima kel-li.
I dirapenti, es tevi ki faze un monti kuza ki nunka es ka fazeba antis:
kria kóntas i prende modi ki es ta uza aplikativus sima Skype® ô Zoom
(kel-la é kuzê?)
i sabe modi ki es tinha ki organizaba runions
na internet pa un kongregason interu.
Kel-li é un responsabilidadi grandi ki nos irmons tene
i nu krê ilojia-s pa bon trabadju ki es sta ta faze.
Ansions tinha txeu pergunta,
má Jeová da-s orientason ki es sta ta mesteba através di organizason.
I un spiriénsa na Kanadá ta ben mostra-nu kel-li.
Nu ben odja un vídiu undi irmon Warren Shewfelt,
ki é ménbru di Kumison di Filial di Kanadá,
ta ben fla-nu kuzê ki kontise la.
Kantu koronavírus parse,
un grupu di ansions ki ta fika pértu di Filial di Kanadá,
nkontra pa es disidi modi ki es ta kontinuaba ta faze runions.
Es tinha txeu perguntas
sobri modi ki es ta kuidaba di nisisidadi spritual di irmons
i omésmu ténpu obidese orientasons ki govérnu da.
Es pidi orientason di Jeová na orason.
Má timenti es staba na kel runion,
es ka konsigi disidi kuzê ki es ta fazeba.
Dipôs un di kes ansion repara un karta ki ben di Filial na se tablet,
ki tinha orientasons pa ansions.
Sima es ba ta le-l,
es atxa respósta pa tudu pergunta ki es tinha i otus orientason inda.
Es odja ma kel-la éra respósta ki Jeová da-s pa ses orason.
Má es tinha ménus di un dia pa pripara ses primeru runion
através di internet.
Es faze orason, es sigi tudu kes orientason
i na kel otu dia kongregason interu sisti runion através di internet.
Kes algen ki sisti foi más di ki nunbru di publikadoris di kongregason
i un di kes família ki sisti skrebe kel-li pa ansions:
“Nu ta agradese nhos txeu
pa sforsu ki nhos faze pa da-nu es kumida spritual pa internet.
Éra kel-li própi ki nu staba ta meste. Obrigadu.”
Fórti spiriénsa ki ta da-nu koraji! Obrigadu, Warren.
Nu gosta txeu di obi-u.
I, nhos sabe, kel-li ta lenbra-m di kuzê ki proféta Izaías fla na Isaías 65:24:
‘Mésmu antis di es txoma, N ta responde;
Timenti inda es sta ta pâpia, N ta obi.’
Óras ki nu pensa na ansions amorozu,
nu ta lenbra di nos enkaregadus di grupu di kongregason,
pamodi óras ki dizastris ta kontise
é através di es ki informasons ta pasa entri filial i kongregason.
Kel-li ta lenbra-m di un spiriénsa ki kontise ku mi ku nha mudjer na 2010.
Nu diziginadu pa faze un vizita di pastoreiu na Aiti,
10 dia dipôs ki kontise un grandi tremor di téra
ki mata más di 300 mil algen.
I infilismenti, 154 irmons tanbê móre.
Bon, N nkontra ku kes enkaregadu di grupu di kongregason di la,
i N fika ta sabe tanbê ma alguns di ses família móre.
Má es éra kes primeru ki staba ta djuda pesoas,
pur isu es ka tevi nen ténpu pa txora ses família ki móre.
Inda es staba ta djobe kes algen ki skapa di kel tremor di téra.
Nton, kuzê ki Jeová dja flaba?
‘N ta ranja pastoris ki ta pastora-s di verdadi.
Ninhun di es ka ta perde.’
I kes ansion na Aiti faze ses midjór
pa ninhun di ses irmons ku irmans ka fika perdedu.
Nhos sabe ma nos enkaregadus di grupu di kongregason
sta kontinua ta sirbi kongregasons di midjór manera ki es ta pode
duránti es ténpu li?
Má modi ki es ta faze-l?
Na kel vídiu li,
irmon Paul Echon, ki é ménbru di Kumison di Filial di Filipinas,
ta fla-nu modi ki sta ta kuidadu ti di kes kongregasons ki ta fika lonji.
Kel-li é interesanti. Nu ben odja.
Un enkaregadu di grupu di kongregason na Filipinas,
skrebe ta konta se spiriénsa di modi ki el uza kel prugrama Zoom
pa vizita dôs kongregason ki ta fika lonji.
Normalmenti, pa txiga na kes ilha através di un barku pikinoti,
ta dura entri 5 ti 8 óra.
i ta dipende di modi ki mar sta i di tamanhu di óndias di Osianu Pasífiku.
Pamodi koronavírus, fika difísil viaja pa ilhas di Patnanungan i Jomalig.
Kel enkaregadu ku se mudjer suplika Jeová
ta pidi-l pa djuda-s atxa un manera pa es vizita kes kongregason
na kes dôs últimu simana di marsu.
Uns dia dipôs, es resebe un karta ki ben di filial
sobri modi ki es podia vizitaba kongregasons di otus manera.
Kel-li ta inkluiba faze vizitas através di internet.
Kel enkaregadu aviza kes ansion kel óra
i es fika uma kontenti
ki lógu es bai sprimenta kel prugrama.
Vizita kóre rei di dretu!
Kes irmon ku irmans fika txeu kontenti
i es xinti própi amor di Jeová pa es.
Pamodi kel spiriénsa li, kel enkaregadu fla:
“Fika klaru ma ka ten ninhun koronavírus
ki ta tadja Jeová, nos Deus Tudu-Poderozu,
di da se sérvus forsa ki es sta meste.
Nu sta kada bês más disididu na djuda i nkoraja nos irmons
pa kontinua ta kunfia na Jeová,
sima sta skrebedu na Salmo 91:2, ki ta fla:
‘Bo é nha proteson i nha fortaléza’.
Kuzê ki nu lé na Jeremias 23:4?
‘Ninhun di es ka ta perde’.
Jeová sabe undi ki tudu se ovelhas sta
i el ta faze manera pa toma kónta di es.
Obrigadu Paul.
I nu ta manda nos amor i nos mantenha pa nos irmons na Filipinas.
Nu krê nhos tudu txeu.
Nton kuzê ki nu ta prende di kel relatóriu li?
Dôs kuza
Primeru nu ta kridita ma Jeová ta kontinua ta orienta organizason
na tudu kuza.
I nos fé ta bira más fórti
óras ki nu ta odja nos organizason ta da orientasons pa proteje irmons
mutu antis di autoridadis toma algun midida.
Nton, kel-li é primeru pontu:
Jeová ta kontinua ta orienta organizason.
Sugundu: Kal ki é un di kes manera ki Jeová ta faze kel-la?
El ta da-nu ansions ki ta djuda-nu sigi kes orientason.
I pa riba di es sta Jizus ki fla:
‘Ami é kel bon pastor; kel bon pastor ta da se vida pa ovelhas.’
Irmons ku irmans, nhos kuida di nhos kabésa.
Ka nhos kóre risku.
Nhos obidese kes orientason di ‘autoridadis supirior’.
Li na Betel nu sta ta sigi tudu kes orientason ki nu dadu.
Nton si autoridadis fla nhos pa fika na kaza,
nhos fika na kaza.
Nhos ivita fika pértu di algen.
É bon fika atualizadu,
má ka nhos fika ta kóre trás di tudu notísia.
Ka meste ser dimás. Si nau nhos pode fika dizanimadu.
Na ki ténpu ki nu sta?
Na ténpu di Komemorason.
Nton kuzê ki nu debe konsentra na el na kel ténpu li?
Na kel sakrifisiu di resgati,
na amor di Jeová Deus i amor di Jizus Kristu.
É kes kuza li ki nu debe pensa na el.
I óras ki bu xinti bo sô ô preokupadu,
ripiti pa bu kabésa kes palavra li
ki sta na Hebreus 13:5:
‘Nunka N ka ta dexa-u i nunka N ka ta bandona-u.’
‘Nunka N ka ta dexa-u i nunka N ka ta bandona-u.’
Nhos ten sertéza ma nu ta ama nhos
i nu sta ta ora pa nhos.
Kel-li é JW Broadcasting di Sedi Mundial di Tistimunhas di Jeová.

Rilatóriu di 2020 di Grupu Enkaregadu di Óbra — Nunbru 2