JW subtitle extractor

Maro raha tsy azo antoko nohony fiparitahany aretin̈y ty erantany,
ke maro koa raha tsy haintsika.
Fa ny raha haintsika fo:
Mandrapivitanizio,
Jehovah ten̈a mikarakara raha ilaintsika.
Isanandra sanandra
iro rahalahintsika erantany mivolana aminay fa
ten̈a hitandro fa Jehovah ndreky fandaminan̈anany mikarakara iro tsarabe.
Mampatsiaro za raha koran̈iny Baiboly aminy Isaia 40:11 raha zen̈y:
Karaha zen̈y atsika io,
mira zanaka ondrikondriky amy tan̈any Babantsika Jehovah,
ke arovany mare.
Tsisy ny hafa amy zen̈y koa raha tsapanay jiaby an̈isany Filankevipitantan̈ana!
Atsika jiaby io samy miatriky andra sarotro be ty,
ke mankasitraka Jehovah atsika
amy fitiavany atsika ndreky fikarakarany atsika.
Mira piambin̈y ondrikondriky,
Jehovah tsy vitany mahay raha mahazo atsika fo fa,
izy koa mizaha fomba han̈ampian̈a atsika.
Vakintsika Salamo 37:5:
An̈isany ‘raha ataony Jehovah’ izioty,
izy mandrisiky olonany han̈ampy naman̈a ten̈a sahiran̈a.
Amy tatitry ty,
tianay hikoran̈a aminaro ohatrandro rahalahy ndreky ranabavy nan̈ano karaha zen̈y.
Amy tany sasany ambony tany,
raha ten̈a mampiasa loha iro rahalahintsika aby io
fitadiavan̈a raha hoanin̈y isanandra.
Tsy maro raha afaka vangain̈a,
confinement,
olo tsy afaka miasa eky,
ndreky problemo hafa,
ke manjary an̈arany mihina fo na tsisy raha hoanin̈y olo.
Man̈ano erakany vitany Komitiny Pandrindra amy Filankevipitantan̈ana
ke man̈amia iro rahalahy aby io hanin̈y ndreky aody ten̈a ilain̈a.
Efa misy Komitiny Vonjy Rano Vaky mandilatra 400 koa natsangana erantany.
Iro komity aby io miasa mare man̈aramaso raha ilaindro rahalahy ndreky ranabavy aby io
baka iro tsy hofoatiny mosary.
Karaha zen̈y raha nisy tamy tanànany Angola tan̈y.
Akory nataondro tan̈y baka iro rahalahy aby io nahazo hanin̈y nilaindro?
Rahalahy Johannes De Jager,
baka amy sampan̈any Angola,
hikoran̈a zen̈y amintsika.
Rango tamy Marsy in̈y,
fanjakan̈a efa nan̈ambara fa tsy mahazo mandehandeha eky olo.
Nohony raha zen̈y,
maro iro rahalahintsika ndreky ranabavintsika nanjary tsy afaka miasa eky,
ke nanjary sarotro amindro mamelon̈o fianakavian̈andro.
Zahay Komitiny Sampan̈a mba miasaloha mare amy raha mahazo iro.
Ho zahay:
‘Akory hataonay hikarakara iro rahalahy ndreky ranabavinay aby io?’
Zahay direkty nanoratra tamy Komitiny Pandrindra amy Filankevipitantan̈ana nan̈ambara iro raha mandalo.
Mety ho azoazonaro antsain̈y haravoan̈anay iro koa namaly,
ke nan̈amia zahay fan̈apian̈a
baka zahay afaka mivanga hanin̈y ndreky han̈amia izio iro rahalahy aby io.
Ke, zahay direkty nan̈ano ezaka mare nandamin̈y fomba hazahoandro fan̈ampian̈a io.
An̈isany raha nataonay,
nanangana Komitiny Vonjy Rano Vaky 37 zahay.
Avo amizay,
zahay nivanga ndreky nandrasa vary 138 tonnes,
tsakotsako 138 tonnes,
avio zarko 104 tonnes.
Tsy zen̈y fo fa, taminy an̈arany foibe,
zahay mbala nan̈afatra hanin̈y 313 tonnes koa ta Brezil tan̈y.
Tamy 21 Zie tio navy entan̈a voanalohany.
Iro rahalahintsika aby io direky niasa nirasa iro hanin̈y aby io.
Safe rahalahy ndreky olo pianatra Baiboly 34 701
nahazo hanin̈y baka tamy fan̈ampian̈a io.
Ten̈a naro fankasitrahan̈a nazonay baka tamindro nahazo fan̈ampian̈a io.
Ohatra izioty,
nisy ranabavy araiky sady maty vady izy mitarimy zafiny dimy aby.
Ho izy:
“Kaiky Jehovah io ten̈a mahita za marin̈y.”
Hainay fa mbala hitohy elaela valan̈aretin̈y ty,
fa matoky tsarabe zahay fa
tsy hiovaova fitiavany Jehovah
ndreky fikarakarany iro rahalahintsika aby a Angola eto.
Hitantsika baka tamy tatitry tio in̈y fa
Jehovah ten̈a tia
ndreky mikarakara iro rahalahintsika a Agola marin̈y!
Ndray zen̈y, fan̈ampian̈a io tsy raha zisty an Angola an̈y fo.
Atsika mivolan̈a iziô,
Jehovah man̈ampy,
ke misy fandaharan̈a fan̈ampian̈a io koa amy faritry Afriky jiaby,
Ameriky Atsimo,
ndreky amy faritry maro ambony tany eto.
Hitanaro,
Filankevipitantan̈ana efa nan̈eky fa
misy vola mandilatra 17 million de dollar
ampiasain̈y amy fan̈ampian̈a iro rahalahy ndreky ranabavy
amy fotoan̈a isiany valan̈aretin̈y ty.
Fa, tianay ndraiky hampatsiaro anaro,
amy raha momba firasan̈a hanin̈y zen̈y:
Mbala mahaimiparitaka fo baka aretin̈y io izioty,
amy tany sasany, efa mimpody koa aby izio.
Ke tsy haintsika foeky ombian̈a mety tsy ho hisy hanin̈y eky amy tany misy atsika
na ombian̈a tany misy mety tsy hahazo handehandeha eky atsika.
Safe, izikoa mbala afaka mamory hanin̈y anaro,
tsara izikoa mba man̈ano rezerva hanin̈y tsy mora robaka anaro,
ndreky raha ten̈a ilainaro,
fa aza mamory raha maro loatra
ndreky man̈ano stoky raha tsy ilain̈y.
Safe mila mahay mandanjalanja anaro mizaha
ino raha ten̈a ilainaro tsoha fo.
Fa karaha ty: Akory fo basy hanin̈y arapan̈ahy?
Zo ma Jehovah mba mikarakara zen̈y koa?
Maro amintsika izioty man̈ano videoconference izikoa fa mivory.
Atsika ndray tsy mahita sorany namantsika,
fivorian̈a karaha zen̈y ten̈a fitahian̈a ankitin̈y.
Amy tany maro,
nitombo mare isanolo afaka man̈ano fivorian̈a.
Maro amindro rahalahy ndreky ranabavintsika tiantsika efa tsy mitory eky
nanjary mimpody miaraka mivory amintsika ndraiky koa.
Ten̈a ravoravo atsika miaraka amindro.
Avio koa, mahatsiaro sambatra koa zahay manan̈a anaro rahalahy ndreky ranabavy efa matoe!
Anaro man̈eky hianatra
ndreky malaky mahay mampiasa iro fitaovan̈a aby io.
Tianay koa mahita anaro mamaly teny amy fivorian̈a.
Mety efa hainaro fa
maro amindro rahalahy ndreky ranabavintsika aby io mipetraka amy tany tsisy Internet
na lafo loatra mampiasa izio an̈y.
Ke karakory ataondro rahalahy amy tany karaha zen̈y mahazo hanin̈y arapan̈ahy?
Anaro mety mahazo onon̈o tatitry momba coronavirus fahatelo
fa nisy sampan̈a sasany tanAfriky
niken̈y hampiasa tele ndreky radio tamy kabaro manokan̈a ndreky Fahatsiarovan̈a in̈y.
Ke ravoravo zahay mivolan̈a aminaro fa
nikeny Filankevipitantan̈ana koa han̈anovan̈a fivorian̈a jiaby (isaka herin̈iandra)
amy tele ndreky radio!
An̈isany sampan̈a efa nahazo hatsaran̈a tamy fandaharan̈a io iro a Mozambique any.
Rahalahy Amaro Teixeira
hikoran̈a amintsika momba raha zen̈y.
Aminay a Mozambiky atỳ,
maro rahalahy mipetraka amy tany mbala tsisy Internet ndreky fitaovan̈a elektroniky.
Safe ravoravo mare zahay Filankevipitantan̈ana koa fa nan̈ambara sampan̈a jiaby an Afriky fa
fivorian̈a jiaby ataony fiangonan̈a io
afaka alefa amy tele ndreky radio.
Tamy le 10 Zie,
nalamin̈y programo tamy radio 87 ndreky tele araiky a Mozambique.
Baka amy zen̈y mahavy iro rahalahy ndreky ranabavy mandilatra
51 000
isaka herin̈iandra mitandren̈y fivorian̈a amy volan̈a 24 karazany.
Ten̈a nahatsara iro rahalahintsika aby io raha zen̈y.
Olo kadiriny kadiriny 23 million iô
mizaha ndreky mitandren̈y fandaharan̈a arapan̈ahy io.
Mankasitraka izio mare iro rahalahintsika aby io.
Izikoa fa nambara iro fisianizio, iro latsadranomaso aby ravoravo.
Maro amindro rahalahy aby io mitovy fihetsehampo amindro fivadiany nanoratra ty:
“Nohony ezakanaro,
ndreky fan̈ahy masin̈y Jehovah nan̈ampy,
nahavita nan̈ateky ‘bongo’ anaro
nan̈amia hanin̈y arapan̈ahy ‘amy fotoan̈any’
iro rahalahy a Mozambiky atỳ.”
Fitiavany Jehovah ndreky fikarakarany atsika jiaby io
mahavy atsika mankasitraka izy mare ndreky zanany,
ndreky iro piaramanompo aby io.”
Fa tsy zen̈y fo!
Vo tsy ela koa zay nisy sampan̈a hafa koa natao karaha zen̈y,
baka io koa misy firenena 21 koa
man̈ano fivorian̈a amy tele ndreky radio.
Baka amy zen̈y mahavy iro rahalahy ndreky ranabavy
1, 2 million (un million deux cents mille)
afaka mitandren̈y fivorian̈a nalain̈y feo,
ke misy olo efa hely tsy 280 million
mahazo hanin̈y arapan̈ahy baka amy fandaharan̈a natao io!
Jehovah ten̈a man̈amia raha ilainy vahoakanany
hanin̈y hoanin̈y ndreky hanin̈y arapan̈ahy.
Fa karakory ndraiky ataony mikarakara iro rahalahintsika injehin̈y aby io?
Rango nisiany corona ty,
maro amintsika mahatsiaro karaha fa gadra in̈y fotony mifody antran̈o.
Fa asa mba efa nidinihinao
akory ataondro namantsika migadra a prizon, firka zioty,
amy lerany valan̈aretin̈y ty?
Tamy le 19 Zie tio in̈y,
rahalahy ndreky ranabavy 116 erantany migadra baka amy finoan̈andro.
A la Russie,
mbala niampy 27 koa izioty rahalahy ndreky ranabavy ambesandro polisy aby io antran̈ondro,
avio 372 koa ataondro fa olo kriminely zen̈y.
Erantany,
misy piaramanompo amintsika 19 taon̈o farany hely migadra,
avio 81 taon̈o farany be.
Ohatra, araiky amy zen̈y,
iro rahalahintsika telo migadra a Erythré:
Paulos, Isaac, ndreky Negede.
Iro io farany ela nigadran̈a a prizon an̈y,
fa presky 26 taon̈o!
A la Russie,
vo tamy le 13 Zie tio in̈y,
efa nisy rahalahy ndreky ranabavintsika maro koa nidirandro tantran̈o nisavaindro,
farany hely 100 isanandra.
Baka amy raha nataondro zen̈y,
Rahalahy Dmitrii Katyrov
ndreky Aleksandr Bokov
nipopohindro manampahifan̈a aby io.
Izikoa atao konty,
nanomboko tamy nandraran̈a asantsika tamy 2017,
efa mandilatra andrivony tran̈ony piaramanompo nidirandro nisavain̈y.
Efa mila vavaka baka amintsika fo iro rahalahintsika migadra aby io
talohany corona in̈y,
fa mbala mandilatra zen̈y filandro raha zen̈y izioty.
Karaha ty nisoratiny Paoly aminy Hebreo 13:3:
“Tsarova iro migadra amy prizon an̈y,
ke ataova karaha migadra miaraka amindro an̈y koa anao.”
Marin̈y, ten̈a mahatsiaro iro rahalahy ndreky ranabavy migadra nohony finoan̈andro ankitin̈y atsika.
Akory nanindro an̈y zay?
Akory ataony Jehovah mikarakara iro an̈atiny fitsapan̈a zen̈y an̈y?
Alo baka atsika hitandren̈y ranabavy aroe nigadra ta la Russie tan̈y.
Tamy le 11 Ziain 2019,
andra kadiriny tamy 8h maraindrain̈y,
nisy iro piasa pan̈ano ankety aby io ndreky polisy niditry forse tan tran̈onay.
Fa presky andra araiky iro tantran̈onay.
Iro koa fa baka nisavasava,
zahay nindresindro natao ankety tamy biro
avio zahay baka tio nitanandro tan̈y.
Nandesindro nitsarain̈y ta Novozybkov za.
Avio naboakandro didimpitsaran̈a,
za nampidirindro ta prizon.
Izikoa atao konty, kadiriny valo fanjava za nigadra.
Nafodindro tan̈atiny valo fanjava koa za in̈y.
Tan̈atiny 245 andra za nigadra.
Aminaka, karaha nitsofin̈y fo lera jiaby nidohan̈a tampigadran̈a tan̈y.
Izikoa zahan̈a 245 andra io, elaela zen̈y, marin̈y.
Fa tsy ela karaha zen̈y foeky fahitako izy izio, fotony
Zaho rikian̈a nanoratra namaly taratasy nalefanolo taminaka
ndreky nitory tamindro olo gadra araiky taminaka.
Za koa nivavaka tamy Jehovah mare tan̈atinizen̈y.
Namaky Baiboly za,
avio nan̈ano fianaran̈a manokan̈a.
Tamy somilany naviako tamy prizon,
karaha tsy ho vita, anao mandiniky valo fanjava an̈atiny prizon ao,
fotony anao tsy miaroaro aminolo,
tsy mahita iro ranadahy ndreky rahavavy aby io,
tsy afaka mikoran̈a amindro mivantan̈a,
ndreky tsy afaka mitolon̈o iro.
Tamy voanalohany, sarotro marin̈y.
Fa hitako baka tio fa
anao koa mahay miain̈y amy zavamisy,
mivadiky moramora aminao miatriky izy.
Nivavaka tamy Jehovah za baka tsy han̈ameloten̈a
ndreky tsy handany lera hifantoko aminy haratsiany fiain̈ana ampigadran̈a.
Nivavaka koa za baka jerinaka han̈eky raha jiaby misy parpialako tan̈y.
Haiko tamizin̈y koa fa ten̈a ilain̈y mandiniky raha han̈anovan̈a mersy Jehovah,
ke isaka alin̈y,
nata tsisy raha tsara nandalo tamy fiain̈ananaka tan̈atiny andra in̈y,
za mifen̈y man̈ano mersy Jehovah fo,
ke raha zen̈y koa nazahoako angovo,
fotony isanandra isanandra za koa fa mandiniky,
misy raha tsara fo.
Ndraikindraiky efa nanjary nadin̈ako aby za io kaiky amy prizon!
Za tan̈aty tao baka varian̈a misan̈andra lan̈itry fo
ke tsy azoko fa prizon za.
Avio lera zahay mandeha man̈ano sport,
misy riba maventy mikodidin̈y antena,
baka io anao mahita lan̈itry,
safe za mivolan̈a Jehovah man̈amia za toetsain̈y tsara.
Ohatra zioty, tan̈aty jeriko tan̈y:
‘Ino raha ambadiky lakorobe ty?’
Za amy zay mieritreritry iro bongo maro an̈abo an̈y,
iro folera maro tsara aby ten̈a tiako aby in̈y,
ndreky misy coquelicot koa.
Za nan̈ano mersy Jehovah fotony za, mbala nanan̈a Baiboly ndreky afaka mamaky izio,
avio afaka nivavaka tamy Jehovah,
avio mbala nafaka nan̈ano raha tsara fo isanandra vaky,
avio za nafaka mitazan̈a voron̈o mitilin̈y baka tamy lafenetra.
Talohany za niditry prizon,
za fa nieritreritry fa izikoa za migadra,
zen̈y fanendrena vaovaonaka baka amy Jehovah.
Taratasy nazoko voanalohany fananjo taminy andrany batisanaka.
Ropolo efatra amby taon̈o tamy zen̈y nivitany batisanaka.
Karaha tsy navilavila za tamy zen̈y,
safe za nangataka kado spesialy tamy Jehovah .
Ke taminy andra nivavahako io edy,
za nahazo kado spesialy marin̈y,
taratasy 59 baka tamindro ranadahy ndreky rahavavy aby io!
Haiko tsarabe fa miavaka ankitin̈y Zan̈ahary Jehovah io,
ary izy ten̈a ndreky mikarakara olonany marin̈y.
Nahainikeko fo fa Jehovah io Baba mikarakara marin̈y.
Sambany tamy fiain̈ananaka za nahazo taratasy marobe kara in̈y, 54.
Za nipetraka tan̈abo fandrian̈a, nifofoan̈iko taratasy io,
fa tsy haiko foeky raha nataoko raha io.
Loso diniky oe za.
Tio fo, niran̈aran̈a masonaka.
Ke za koa fa baka nandiniky tsara, komansy namaky amy zay za.
Iro taratasy nazoko aby in̈y koa nahavitako nan̈ano fianaran̈a manokan̈a.
Nisoratiko tamy kahie aroe fianarako zay lan̈iany hevitry hitako nankahery zaho.
Tamy taratasy aby in̈y,
nisy araiky zay nikoran̈a ino beriny nampisy korazy Davida.
Fotony izy tsy nifantoko taminy habezany Goliata
ndreky tsy nampitaha ain̈inany taminany,
fa izy nan̈eky fa hely Goliata izikoa ampitovisiny aminy habezan̈any Jehovah.
Hevitry zen̈y ten̈a hitako nan̈ampy za
nanan̈a toetsain̈y tsara ndreky nitavandra Jehovah.
Avio zaho koa fa baka tamy fitsaran̈a tan̈y nindesindro amy tany tomabily ioandranganay,
iro ranadahy ndreky rahavavy aby io nan̈ano bravo zaho sady nan̈amia korazy za.
Za zen̈y, za tsy nieritreritry hahita iro foeky,
fotony tsy haiko akory hitondrasandro zaho baka amy fitsaran̈a tao.
Za ndray nahatsapa karaha nalahelo baka tamy fanapahankevitry niraisindro tamy fitsaran̈a nataondro taminaka,
za koa fa niditry tan̈aty tomabily tao,
za nahatsapa ravoravo mare tan̈aty tan̈y,
fotony za ndray tsy nahita tsarabe sorandro ranadahy ndreky rahavavy aby io,
za naharen̈y feondro.
Zin̈y nan̈ampy za nahaitapakevitry fo tsy hivadiky amy Jehovah,
avio nan̈ampy za hiaro fahamarin̈ana io fo nata amy fitsaran̈a an̈y.
Tsapako tsarabe fa
za tsy latsatokana fotony haiko fa maro olo miasaloha aminaka ndreky mivavaka ninaka.
Za koa fa an̈atiny sarotro mare in̈y,
za manjary man̈eky marin̈y fa
na ino na ino raha sarotro andalovantena,
Jehovah man̈amia fan̈ahy masin̈y fo antenna ke vitantena fo miatriky problemo io.
Hitako tsarabe fa
, tsisy raha tokony hatahoran̈a lan̈iany raha sarotro mbala handalovantsika.
Jehovah tsy miala atsika foeky,
izy tsy maintsy manohan̈a, mankahery,
ndreky man̈ampy atsika fo.
Izy mizaha fomba han̈ampian̈a atsika fo,
ke amy fotoan̈a karaha in̈y,
mampiasa fomba miavaka izy han̈ampian̈a atsika marikitry.
Mankahery tsy zen̈y?
Lakorony prizon io tsy mahatana Jehovah ho tia ndreky hikarakara panomponany.
Za matoky fa
iro tantarandro ranabavy aroe tio in̈y
han̈ampy iro rahalahy ndreky ranabavy maro
mbala tsy mahazo miboaka antran̈o nohony valan̈aretin̈y ty.
Rahalahy ndreky ranabavy,
atsika jiaby io samy mandalo andra sarotro aby.
Sasany aminaro nanjary tsy miasa eky,
sasany miasaloha aia ahitan̈a raha hoanin̈y isanandra,
avio maro amintsika koa naty havan̈a.
Ndray iô raha jiaby zen̈y,
hitantsika tsarabe fa
Jehovah man̈ampy atsika fo,
aminy arabatan̈a ndreky arapan̈ahy!
Jehovah io mikarakara atsika,
ke karaha injoniny in̈y atsika,
mira raha ataony piambin̈y ondrikondriky in̈y.
Atsika ndray tsy afaka miboaka tran̈o,
ndray tsisy hanin̈y,
nata migadra,
fikarakarany atsika io han̈ampy atsika tsy hivadiky
fa hiaritry firaka amy farany.
Anao afaka matoky tsarabe fa
Jehovah ten̈a han̈ampy anao ndreky hitariky anao.
Hifen̈y koa zahay han̈ano zay vitanay han̈ampy anaro amy fotoan̈a ilanaro izy tsarabe.
Aza adin̈a koa fa
Jehovah koa mety hampiasa anao handeha han̈ampy olo hafa.
Mangataha fan̈ahy masin̈y hitariky anao.
Aza mijijy tamban̈a izikoa anao afaka man̈ampy!
Koran̈iny Hebreo 13:16:
Ten̈a tombontsoa tsisy ambaka izy
nintsika afaka ampiasainy Jehovah man̈ampy namantsika!
Ke aminy an̈arany Filankevipitantan̈ana,
azafady raisa tan̈anay mamihin̈y anaro jiaby
ary matokisa fa ten̈a tianay anaro tsiaraikiaraiky an̈y.
Narehanaro tio Tele JW,
baka amy Foibeny Vavolombelon̈o Jehovah atỳ.

Vaovao Farany Baka amy Filankevipitantan̈ana (2020) #5