JW subtitle extractor

“Ke anaro miambesa fo.”
Zen̈y raha nivolan̈iny Jesosy tamy pianatranany aby io,
izy koa fa nan̈ambara tamindro raha maro hiboaka,
aminy andra farany.
Asa efa firy taon̈o anao zay niambin̈y fo?
Atsika jiaby izioty tsy mifamatra fa
sarotro ankitin̈y fiain̈anantsika zioty.
Raha miboaka zioty io,
efa nambarantsika olo tan̈atiny taon̈o taon̈o zay.
Atsika niany ty,
atsika hikoran̈a sasany amindro faminanian̈a
hitantsika efa tanteraka aminy andrantsika zioty.
Avio faharoe man̈araka zen̈y,
atsika hikoran̈a vokatrany ezaka manokan̈a
han̈ambaran̈a Fanjakan̈any Zan̈ahary,
ataontsika amy fanjava novambra ty.
Voanalohany, diniha iro famantaran̈a
nambarany Jesosy pianatranany aby io.
Amy Lioka 21:11, Jesosy nivolan̈a fa
hisy mosary ndreky valan̈aretin̈y,
amy tany maro isankarazany.
Efa hitantsika zioty fa
ten̈a efa tanteraka ankitin̈y mandilatra ny taloha,
famantaran̈a nivolan̈iny Jesosy zen̈y.
Faminanian̈a faharoe dinihintsika ndreky,
araiky koran̈iny Daniela toko faha-2 ao in̈y.
Izy ao mikoran̈a momba sarivongana maventy
man̈ambara fifandimbiasan̈y fanjakan̈a matanjaka erantany,
nanomboko tamy fanjakan̈a Babylonian̈iny
firaka aminandratsika zioty.
Vavitsy ndreky vitinizio,
amy farany ambany amy sary io
man̈ambara fanjakan̈a matanjaka erantany
Angiley Amerikain.
Fa koran̈iny Daniela amintsika fa,
vavitsy ndreky vity io vita amy vy miharo tanimanga.
Asa azonao onon̈o,
man̈ambara ino vy mahery ndreky
tanimanga malemy io?
Tanimanga io manondro vahoaka fihezin̈y
fanjakan̈a Angiley Amerikain,
kanefa iro baka io manohitry fitondrasan̈a.
Fanjakan̈a Angiley Amerikain io tsy fatatra karaha vy,
fotony vahoakanany mierin̈y fahifan̈anany.
Koran̈iny Daniela 2:43 fa tsy posibla hitambatra foeky
vy ndreky tanimanga io.
Tilikambo Fiambesan̈a niboaka tamy 15 Ziain 2012,
ahitantsika porofo tsy azo hifamaran̈a fa
tsy mety mitambatra ankitin̈y vy ndreky tanimanga io.
Mahay hitantsika fo zioty
fahamarin̈any raha koran̈inizio,
ndray efa 8 taon̈o loso zioty nan̈oratan̈a Tilikambo io.
Atsika koa fa misaintsain̈y faminanian̈any Baiboly aby
efa tanteraka aminandratsika zioty io,
mahaifatatra fo finoan̈antsika.
Zahava amy fan̈adikadin̈ana ty,
rahalahy Richard Kelsey,
izy vita batisa tamy taon̈o 1941.
Andeha hikoran̈iny amintsika,
ino raha nan̈ampy izy hiambin̈y fo
tan̈atiny efa tsy ela 80 taon̈o zay zioty.
Tamy Ziain 1941,
zahay roeny Peggy vadiko natao batisa.
ta Des Moines, Iowa.
Tan̈atiny raha fasian̈a rano figiahany sevaly
nan̈anovan̈a batisa zahay.
Taloha helinizio,
nisy fivoriambe iraisampirenena natao ta
St. Louis, ta Missouri tan̈y.
Iro tsaiky ndreky tanora jiaby tamy fivoriambe io,
nirahin̈a nipetraka tamy laharan̈a voanalohany
manoloan̈a lampihazo,
avio rahalahy Rutherford nan̈ano kabaro,
titranany ‘Zanaka panjaka io.’
Avio tamy farany kabaronany io izy nivolan̈a karaha ty :
«Ty misy boky vaovao,
titranany ‘Tsaiky’,
samy hahazo aminany ty anaro tsiaraikiaraiky.»
Nankahery zaho mare boky io.
Fa tafarinizen̈y izikoa fa nianaranay,
hitako nanjary nahainazoto nanompo Jehovah fo zaho.
Nanomboko nan̈ano pisava lalan̈a maharitry zaho,
tamy Septambra 1948,
fa talohanizen̈y zaho efa nan̈ano pisava lalan̈a pan̈ampy fo,
fa raha io baka tio nahavy zaho tihan̈ano
fanompoan̈a manontolo andra.
Hitantsika koa fa mahaisarotro fo fiain̈ana erantany
ke mety havozo koa atsika.
Ndray izy mety misy aby olo efa nanompo Jehovah efa ela
kanefa nanjary kivy izikoa fa nandeha taon̈o.
Ke ten̈a ilain̈a zioty mifandray marikitry amy Jehovah,
ke mankatsara fihavan̈ana aminany fo.
Man̈anten̈a fanjakan̈anany io atsika,
fotony izio fo mahavaha problemontsika jiaby.
Iro tanora aby io koa mangala onon̈o
tsy fivadihan̈anolo efa ela nanompoan̈a Jehovah,
loso tihangala tahaka finoandro koa iro.
Mazava hoazy fa raha zen̈y ten̈a mamparavoravo Jehovah.
Ke zahay koa fa naharen̈y filazan̈a momba
ezaka manokan̈a zioty io,
zahay roeny Peggy,
samy nameno demandiny Pisava lalan̈a pan̈ampy.
Efa tan̈atiny taon̈o maro atsika
nitory momba Fanjakan̈any Zan̈ahary io,
avio zioty koa atsika man̈ano ezaka manokan̈a,
han̈ambaran̈a Fanjakan̈a io aminolo.
Ary mbala zio fo koa hafatra maventy hambarantsika,
an̈atiny taon̈o maro hanompoantsika Jehovah.
Karaha rahalahy Kelsey in̈y,
mahaimatoky fampan̈atin̈ianany Jehovah fo atsika,
avio mahaifatatra fo finoan̈antsika,
izikoa fa mahita raha mandalo amizioty io.
Ankamarozanolo erantany zioty,
lan̈y fan̈ahy mahita raha tsy mahazatra izioty.
Io valan̈aretin̈y, mosary, lagrevo, horohorontany
ndreky antambo,
miaraka miboaka an̈atiny fotoan̈a araiky.
Fa mbala misy faminanian̈any Baiboly sasany zioty,
mbala tsy endriky tanteraka.
Fa fahitantsika faminanian̈a tanteraka aby io,
mahavy atsika matoky fa
tsy maintsy mbala adosony Jehovah ke tsy himpody eky,
iro jaly aby mahazo atsika zioty io.
Ohatra zioty,
koran̈iny Daniela 2:44 amintsika fa
Fanjakan̈any Zan̈ahary zaraiky fo,
fanjakan̈a hanjaka aminolo jiaby ambony tany eto mandrakizay.
Ten̈a mamparavoravo atsika zioty,
atsika an̈atiny andra sarotro zioty
atsika mandray anjara aminy ezaka manokan̈a
han̈ambaran̈a aminolo jiaby
vahaolan̈a tokan̈a amy problemo
mahazo atsika zioty,
Fanjakan̈any Zan̈ahary.
Fa misy fo olo sasany nazoto nanompo Jehovah hoe taloha
kanefa nanjary tafijan̈ono hely,
iro koa efa mahita faminanian̈a tanteraka
aminandratsika zioty,
manjary loso mimpody amy fandaminan̈a Jehovah ndraiky zioty.
Ke izikoa anao efa tsy nitory eky,
na voaroaka,
mandrisika anao zahay
hikoran̈a amindro antipan̈ahy amy fiangonan̈anaro,
fa iro ravoravo han̈ampy anao.
Izikoa anao tihahazo araiky amy gazety io,
mandihan̈a amy tran̈onkalatsika jw.org.
Telechargeha izio na mangataha gazety araiky
amy zay Vavolombelon̈o Jehovah hitanao.
Fa nisy ranabavy araiky zay ta France tan̈y,
tsy ela nanombohany ezaka manokan̈a tamy Novambra ty,
nikahiany pivarotro araiky tamy telefony.
Alo baka atsika hitandren̈y rahalahy Bruno Faure
han̈azava,
karakory nataony ranabavintsika io
nan̈ambara Fanjakan̈any Zan̈ahary.
Karaha ty tantara io tamy voanalohany,
nisy pivarotro araiky nikaiky ranabavintsika io.
Nitandrin̈esiny tsara ankendriky ino raha volan̈iny pivarotro io.
Fa baka tio, tsy direkty nitapahany telefony fa
izy nanontany hevitry man̈angy pivarotro io,
karakory fahitany fiain̈ana erantany zioty.
Man̈angy io koa fa baka namaly,
ranabavy in̈y nivolan̈a taminany fa
raha jiaby mandalo zioty io efa nambarany
Jesosy rango efa ela,.
Avio tsy ho ela Fanjakan̈any Zan̈ahary
han̈adoso jaly jiaby io.
Nahay lian̈a fo man̈angy pivarotro io.
Avio ozy tamy ranabavy io,
izy koa fa baka miasa,
izy mbala hikaiky ndraiky ranabavy io,
miaraka amy vadiny hanohy koran̈a.
Ke taminandranin̈y fo,
man̈angy io ndreky vadiny nikaiky marin̈y,
karaha nivolan̈iny in̈y.
Nandeha tsara koran̈andro,
nampiasa Tilikambo Fiambesan̈a No. 2,
ampiasain̈y amy ezaka manokan̈a ty,
avio iro nan̈ano rendez-vous
hanohizan̈a koran̈a ndraiky amarainizin̈y.
Hitanaro, amarainizin̈y
iro fivadiany in̈y efa pare niaraka tamy Baibolindro.
Iro nivolan̈a fa,
iro koa fa baka namaky Tilikambo Fiambesan̈a in̈y,
ten̈a nanohin̈y fondro Jaona 17:3,
ke hitandro fa ten̈a ilain̈y mianatra Baiboly.
Hoy iro baka tio,
iro io zen̈y olo baka Cameroun,
ke iro efa fankazatra tamy Vavolombelon̈o Jehovah
taminiro nipetraka tan̈y.
Iro amizay koa fa nizaha jw.org,
gaga mare koa iro nahita fa
misy amy volan̈andro koa raha aby an̈atinizio ao.
Izioty iro fivadiany io efa ten̈a vonon̈o mare han̈atriky fivorian̈a,
ndreky hanohy fianarana Baiboly.
Ke efa natao zioty fandaharan̈a han̈anovan̈a raha jiaby zen̈y.
Dikanizen̈y, tsy very borin̈y ezakandro rahalahy ta France
ndreky erantany,
fa ten̈a nisy vokany tsara tsarabekin̈y.
Maro olo lan̈y fan̈ahy nahita fa
ten̈a niova tampoko fiain̈anantsika,
tamy taon̈o 2020 ty.
Atsika zay tsy nieritreritry fa han̈ano karaha ty
foeky fiain̈ana amy taon̈o ty.
Misy leson maventy azontsika baka aminizity.
Mety ampoizin̈y hiova tampoko fiain̈anantsika ty
aminy amaray.
Jesosy koa fa baka nivolan̈a,
‘miambesa fo’,
Matio 24:42,
aleva onon̈o fa Jesosy nivolan̈a fa
mety hiova tampoko fiain̈ana,
avio aleva onon̈o koa ino raha tokony ataontsika.
Matio 24:42-44 mivolan̈a:
Atsika mahita fiovandraha tampoko amy donia ty zioty io,
mahaimazava amintsika fo mandilatra ny taloha fa
ten̈a ilain̈a mioman̈a.
Tsy tiantsika foeky han̈ambela donia ty
amparikian̈a atsika ke hampihen̈y fitiavantsika Jehovah.
Zio edy ny fotoan̈a ten̈a tokony hivavahantsika,
hianaran̈a ,
hivorian̈a,
ndreky hampazoto atsika amy fanompoan̈a.
Man̈ano mersy anaro jiaby,
fotony anaro zioty mifen̈y mare,
aminy ezaka manokan̈a han̈ambaran̈a Fanjakan̈a io.
Fa izikoa ndraiky anao mbala tsy nan̈ano
aminy ezaka manokan̈a io,
mbala afaka man̈ano anao.
Ten̈a tombontsoa tsisy karaha izy,
man̈ambara Fanjakan̈a io,
fotony izio zaraiky fo
hahavita hamaha problemony olombelon̈o jiaby erantany.
Atsika koa man̈ano ambaka zen̈y,
atsika hahavita hiambin̈y fo
baka io koa atsika ho von̈ono tsarabekiny.
Matokisa anaro fa zahay tsy voly mivavaka ninaro,
sady zahay koa ten̈a tia anaro.
Narehanaro tio, tele jw,
baka amy foibeny Vavolombelon̈o Jehovah aty.

Vaovao Farany Baka amy Filankevipitantan̈ana (2020) #8