JW subtitle extractor

Hikoran̈a momba asa tokony hifantohantsika,
asa fan̈anovan̈a pianatra atsika
amy vaovao farany ty.
Ndray io valan̈aretin̈y ty,
Filankevipitantan̈ana mizaha hevitry fo
hankatsaran̈a fanompoan̈antsika,
baka atsika mahita vokatra tsara.
Ino zen̈y?
Fan̈arahan̈a torohevitry
namian̈a tamy Fivorian̈a Fatao Isaka Taon̈o
natao tamy taon̈o 2017 in̈y.
Tamy fivorian̈a in̈y baka,
Filankevipitantan̈ana nan̈ano filazan̈a
momba fan̈ovoan̈a ataony fandaminan̈a,
miorin̈y amy 1 Korintianina 9:26.
Karaha ty koran̈inizio ao:
Akory ataontsika baka tsy hamango tsiko?
Atsika mifantoko amy
Asan’ny Apostoly 13:48,
ke mitsakaraka iro
“olo manan̈a toetsain̈y tsara,
hazahoan̈a fiain̈ana mandrakizay.”
Fa ino raha man̈ampy atsika han̈ano zen̈y?
Hikoran̈intsika raha nisy
taon̈o vitsivitsy loso zay.
Nisy lahatsoratra fianaran̈a maromaro
tamy Tilikambo Fiambesan̈a,
nampianatra atsika han̈ampy iro vaovao
handroso firaka amy batisa,
avio nampatsiaro atsika fa nila
hajan̈ono fampianaran̈a
izikoa olo io tsy mety mandroso.
Tamy fivoriambeny vondromparitry
tamy taon̈o loso in̈y koa,
nisy andraraiky taminany io natokan̈a nikoran̈ana
momba asa fan̈anovan̈a pianatra fo,
ndreky fan̈ampian̈a pianatra
handroso firaka amy batisa.
Mety mbala tsaroantsika
Neeta ndreky Jade in̈y.
Nisy ezaka manokan̈a koa
nataontsika tamy Novambra in̈y,
nan̈ambaran̈a Fanjakan̈any Zan̈ahary
tamindro manampahifan̈a aby io,
hitady olo maro manan̈a toetsain̈y tsara
tanjon̈ontsika tamizin̈y.
Ravoravo koa atsika nahazo
fitaovan̈a vaovao hampianaran̈a Baiboly,
titranany, “Mankafiza Fiain̈ana Tsisy Farany!”
Han̈ampy atsika hahay hampianatra izio.
Fa tsy din̈intsika lera ampiasan̈a iro io!
Fa nisy raha niavaka koa tamy 2020 in̈y,
han̈ampy atsika baka hahaihahita vokatra fo.
Tamy Ziain 2020,
nisy filazan̈a natao fa,
sampan̈a jiaby nirahin̈y ndreky nandiniky momba
antokopitory, andiampitory,
ndreky fiangonan̈a mampiasa volan̈a hafa.
Fa ino ma antony nan̈anovan̈a raha zen̈y?
Karaha ty raha nikoran̈iny Filankevipitantan̈ana
tamindro antipan̈ahy aby io tamy zen̈y:
tamy taon̈o faramparany tatỳ,
maro vahoakany Jehovah namaly kaiky,
ke nifen̈y mare nianatra volan̈a hafa,
baka hahavitan̈a mitory
amindro olo manan̈a toetsain̈y tsara aby io.
Ten̈a man̈eva derain̈a iro pitory nahafoe ten̈a,
ke nifen̈y mare nianatra volan̈a hafa zen̈y.
Ndray izy man̈ano zen̈y, ny raha hita,
misy antokopitory ndreky andiampitory sasany,
tsy mitombo foeky,
baka io koa
vitsy pianatra Baiboly mandroso,
vitsy koa olo atao batisa,
izikoa raha zen̈y misy.
Filankevipitantan̈ana tihan̈araka torolalan̈a
amy 1 korintianina 9:26 in̈y,
amy zen̈y iro antokopitory
ndreky andiampitory aby io,
tsy hamango tsiko karaha io fo.
Ke karakory ma natao nandiniky ndraiky
iro fiangonan̈a ndreky antokopitory aby io?
Alaiva onon̈o baka ino raha nisy,
Paoly ndreky iro namany aby io koa fa
nila hampitombo fanompoan̈a nataondro.
Koran̈iny Asan’ny Apostoly 16:6-10 fa
nahavita kilometara maro iro,
iro nifen̈y mare nandeha nitory
tamy faritany isankarazany.
Fa kanefa,
Jehovah nampiasa fan̈ahy masin̈inany
hitariky iro amy tany ten̈a tokony himboandro.
Alô hivakintsika Asan’ny Apostoly 16:9:
Izikoa fa haindro taridalan̈any Jehovah,
iro rahalahy aby io direkty
nan̈araka fitaritany fan̈ahy masin̈y.
Izioty koa,
mbala man̈araka fitaritany
fan̈ahy masin̈y fo koa atsika.
Mazava hoazy fa atsika efa
tsy mahazo fahitan̈a zen̈y.
Fa atsika ndraiky mahita
raha mandalo amy faritany an̈y.
Ke izikoa fa natao fandinihan̈a vo tsy ela,
ny raha hita zen̈y,
sasany amindro antokopitory
ndreky fiangonan̈a fa nisy
fa ela tan̈atiny taon̈o maro,
mbala vitsy fo pitory,
sasany baka tsisy foeky,
amy volan̈a araiky ampiasain̈y io.
Fa misy koa karaha ty,
faritany sasany hiasan̈a mivelatra be,
ke mila mandeha lavitry mare
iro pitory ndreky pisava lalan̈a aby io,
zay vo mahita olo mampiasa volan̈a
handeha hitoriandro amindro io.
Ndray tio ezaka jiaby nataondro zen̈y,
vitsy amindro olo aby io fo
man̈eky handeha hianatra Baiboly,
vitsy fo olo lian̈a ke man̈eky han̈aton̈o fivorian̈a.
Ke ino taridalan̈a fan̈ahy masin̈y Jehovah?
Ten̈a tsara izikoa
atsika mifen̈y mandany
angovontsika amy raha hafa.
Safe najan̈ono antokopitory
ndreky andiampitory,
ndreky fiangonan̈a aby io.
Asa anao mba an̈isany navoakasiky
tamy raha nataontsika io?
Izikoa ia, anao tsy latsatokan̈a.
Ohatra zioty,
izikoa fa natao fandinihan̈a
tamy sampan̈a aby 16,
nisy antipan̈ahy 4700,
pan̈ampy amy fanompoan̈a 2800,
ndreky pisava lalan̈a maharitry 11000,
von̈ono nandeha nifindra ke nan̈ampy fiangonan̈a hafa.
Nisy fotoan̈a atsika nieritreritry fa
amy faritany misy olo mampiasa volan̈a hafa,
na misy mampiasa tenimparitry,
atsika taloha nihevitry fa zen̈y
faritany mamokatra mare aminany.
Fa izikoa ndraiky fa nidinihiny
tsarabe raha momba zio,
karaha amindro fiangonan̈a
maventy aby io ndraiky
ny ten̈a misy fitombosan̈a,
mba hahitan̈a pianatra Baiboly maro hoe,
mandroso firaka amy batisa.
Ke izikoa anao zioty mimpody
amy fiangonan̈a mampiasa volan̈a
ten̈a ampiasainolo amy tany misy anao,
aza adin̈a fa anao mbala ten̈a ilain̈a ao.
Misy fiangonan̈a maro zioty sahiran̈a,
fotony maventy faritany hiasandro.
Amy tanàna maventy sasany,
mandeha antapitrisany olo mbala mila hitorian̈a,
kanefa vitsy fo pitory ndreky
pisava lalan̈a afaka mitory an̈y.
Maro pisava lalan̈a ndreky pitory aby io,
mahita fiveran̈ana mitsidiky maro
ndreky fampianaran̈a Baiboly amy tany aby io.
Tsy basiny zen̈y fa
mahaimatanjaka fo koa fiangonan̈a,
izikoa misy rahalahy ndreky
ranabavy matotro miaraka amindro.
Maro koa rahalahy voatendry zioty,
afaka man̈ampy amy asany piandry,
man̈ano anjara amy fivorian̈a,
ndreky man̈ampy amy raha maro foeky.
Ke ino aby ma hatsaran̈a nazo
tamindro fan̈ovoan̈a natao aby io?
Tandrin̈esa baka raha volan̈indro
Komitiny Sampan̈a aby ty.
Mankasitraka Filankevipitantan̈ana atsika
amy torohevitry tsara baka amindro,
fotony nahaitsara fo fomba
nan̈anovantsika fanompoan̈a.
Mahaimaro pitory, maro pisava lalan̈a,
baka io maro koa rahalahy
vonon̈o han̈itatra fanompoan̈a
ndreky han̈ampy fiangonan̈a hafa,
baka io hifantoko mare amy
faritany mety mbala ahitan̈a olo lian̈a.
Izikoa fa natao tsarabe fandinihan̈a,
tapakevitry zahay hanendry
iro nahazo diplaomy
tamy Sekoliny Pitorinilay Fanjakan̈a,
ndreky iro pisava lalan̈a manokan̈a,
alefa amy faritany ten̈a mamokatra.
Ny raha ren̈inay,
mahaimazoto mare fo iro
pisava lalan̈a aby io zioty,
salakady ravoravo man̈ano fanompoan̈a,
fotony maro amindro zioty,
mitariky fampianaran̈a Baiboly mandroso.
Haintsika fa tsy mora man̈ano fan̈ovoan̈a zen̈y.
Kanefa an̈isany raha mankahery zioty,
mahita olo maro von̈ono fo
hizatra amindro fan̈ovoan̈a natao aby io.
Tsy vitany zen̈y fo fa
iro ten̈a man̈eky fan̈ovoan̈a aby io.
Nisy rahalahy sasany nampiasa
teny vahiny nisalasala tamy voanalohany
momba fan̈ovoan̈a io.
Fa baka tio ndraiky iro nifen̈y fo.
Piandraikitry faritrindro io nivolan̈a fa
nandefa fankasitrahan̈a
mare ankitin̈y iro rahalahy aby io,
fotony nohony fitiavan̈a ankitin̈y
nan̈anovan̈a iro fan̈ovoan̈a aby io.
Maro tamindro pianatra aby io nivolan̈a fa
nampihen̈y asalohandro mare
fisiany fan̈ovoan̈a in̈y.
Iro nahatsapa tsarabe fa
ten̈a an̈ivony fiangonan̈a ankitin̈y,
baka io nan̈ampy iro hahita vokatra raha zen̈y,
tsy vitany zen̈y fo fa
mbala nankatsara arapan̈ahindro tompiny koa.
Zaho zio mahatsiaro rahalahy
araiky zay nianatra volan̈a hafa.
Izy taminio tamy fiangonan̈a tantoeran̈a tio fo.
Ke fiangonan̈a nisy izy io zen̈y,
tafiditry tan̈atiny fan̈ovoan̈a io
ke loso antokopitory.
Ke izy nivolan̈a:
“Mira vilany nadoso rakony in̈y!”
Azo antoko fa
Komitiny Sampan̈a ten̈a nahita
fiasany fan̈ahy masin̈y Jehovah,
ndreky ten̈a resy lahatra fa
tahiany ankitin̈y fan̈ovoan̈a io.
Akory fo iro pitory ndreky pisava lalan̈a?
Alô atsika hitandren̈y sasany
amindro mitantara fa
ten̈a nahatsara iro fan̈ovoan̈a in̈y.
Amy fiangonan̈a misy zaho zioty,
fiangonan̈a amy teny Portigey,
faritaninay ten̈a mamokatra.
Tamy zaho tamy antokopitory miteny vahiny,
hahazo pianatra araiky tanjon̈onaka.
Izikoa fa navy fan̈ovoan̈a in̈y,
tan̈atiny herin̈iandra vitsivitsy fo,
zaho efa nahazo pianatra Baiboly 5 aby.
Zahay taloha mandeha lavitry,
mitady olo mampiasa volan̈a hafa,
kanefa vitsy fo olo hitanay.
Zahay zio ndraiky mitory amizay olo hitanay.
Ke izikoa ndraiky zahay mahita
olo mampiasa volan̈a hafa,
zahay mbala afaka mitory amindro fo.
Zaho ravoravo fotony miasa tsara fotoan̈anaka.
Tianay nanompo tamy volan̈a hafa,
fa tsy mora taminay raha zen̈y.
Fa zioty ndraiky zahay mankafy izio mare,
fotony zahay manan̈a fotoan̈a
tsarabe hanoman̈ana fivorian̈a,
hikoran̈ana ndreky hampiharan̈a izio.
Ten̈a fitahian̈a baka amy Jehovah zen̈y!
Aminaka manokan̈a,
ten̈a mety tsarabe aminaka zen̈y
zioty fotony zaho manan̈a fotoan̈a
hankatsarako fifandraisako amy Jehovah.
Misy rahalahy araiky zay,
baka tamy antokopitory hafa tan̈y
nivolan̈a raha ten̈a mahalian̈a mare.
Hoizy,
“Zioty zaho mieritreritry fa
haiko eky fomba fan̈anovany
Jehovah matematiky!
Taloha in̈y baka olo 15 mianatra volan̈a hafa
han̈ampian̈a olo araiky.
Fa zioty ndraiky olo araiky fo
ilain̈a mianatra volan̈a hafa
han̈ampian̈a olo fiangonan̈a araiky
misy rahalahy ndreky ranabavy 100
na mandilatra zen̈y aby.”
Ny raha ten̈a nampiasa loha
zaho tamy voanalohany,
atao karakory olo aby
tsy mahay volan̈a ampiasainy fiangonan̈a in̈y.
Fa izikoa fa nandeha fotoan̈a tafara tatỳ,
hita fa nahatsiaro an̈ivony
fianakavian̈a ankitin̈y iro,
fotony nisy rahalahy ndreky
ranabavy ten̈a nikarakara iro.
Tamy fiangonan̈a hely nisy zahay taloha,
zisty zahay pitory fo man̈atriky
Fahatsiarovan̈a isaka taon̈o.
Fa amy fiangonan̈a vaovao
misy zahay zioty ndraiky,
indroe ny isakiny pitory
isakanolo man̈aton̈o Fahatsiarovan̈a.
Ten̈a mankahery raha zen̈y!
Zahay mahatsapa fa,
zioty zahay ten̈a mandany
fotoan̈a ndreky angovonay,
mba hiasan̈a amy faritany ten̈a mamokatra.
Avio karaha koran̈iny 1 Korintianina 9:26 in̈y,
tsapanay fa zahay tsy man̈ondry tsiko ankitin̈y!
Ke izikoa mitovy amy raha
misy amindro pitory aby io
raha misy anao zioty,
ino raha azonao atao?
Aleva tahaka Paoly.
Mila von̈ono fo anao hampifan̈araka
ezaka jiaby ataonao,
amy fitaritany fan̈ahy masin̈y Jehovah.
An̈isany fomba araiky
ampitombosantsika fanompoan̈antsika,
fianaran̈a volan̈a hafa zen̈y.
Kanefa tsy zen̈y zaraiky fo raha mety ataontsika.
Ahia ma ten̈a ilan̈a pitory maro aminany?
Mety amy faritaniny fiangonan̈a
misy anao fo izio.
Ke tsara izikoa anao mikoran̈a
amy piandraikitry ny faritrinaro,
amy zen̈y anao mahazo torohevitry momba
ahia ma tany ten̈a tokony ampiasan̈a anao?
Fa anao koa afaka manoratra
amy birôny sampan̈a misy anao,
misy hazahoanao torohevitry tsara koa.
Tsy voly mandroso fandamin̈anany
Jehovah io amizioty.
Tsisy raha mahavita misakan̈a zio
na valan̈aretin̈y na raha hafahafany zen̈y!
Ke mbala hitombo mare ma isany pitory,
koa mihen̈y antokopitory mampiasa volan̈a hafa?
Mety ho zen̈y, ampoizin̈y ndraiky zen̈y.
Fa maro tsara hoe tatitry nazontsika momba izio.
Nisy sampan̈a araiky zioty nazahoan̈a tatitry fa
tamy sampan̈a io,
impolo nahatatra tamponisany pitory iro.
Tamy sampan̈a hafa koa,
nivolan̈a iro fa nitombo isany pisava lalan̈a maharitry
ndreky fampianaran̈a Baiboly vaovao.
Tsiary nisy karaha zen̈y taloha.
Filankevipitantan̈ana matoky tsarabe fa
Jehovah hankahery anaro tsiaraikiaraiky,
ke tsy han̈ondry tsiko atsika
fa ho hisy vokany tsarabe fanompoan̈a ataontsika.
Ten̈a tianay anaro tsiaraikiaraiky!
Narehanaro tio Tele JW,
baka amy Foibeny
Vavolombelony Jehovah atỳ.

Vaovao Farany Baka amy Filankevipitantan̈ana (2021) #3