JW subtitle extractor

Amy vaovao araiky ty,
hikoran̈intsika akory ataontsika
baka atsika hahay hampiasa tsarabe fotoan̈antsika,
an̈atiny valan̈aretin̈y ty.
Fa voanalohany,
atsika hikoran̈a vaovao farany
momba valan̈aretin̈y io.
Malahelo zahay mivolan̈a aminaro fa
firaka tamy le 10 Desambra tiô in̈y,
nisy 25 658
rahalahy ndreky ranabavintsika
natiny COVID-19.
Mivavaka nindro piaramanompo
naty havan̈a aby io atsika.
Tato ato zay,
malaza koa fisiany variant vaovao,
Omicron an̈arany.
Firaka zioty,
mbala tsy haintsika tsarabe raha momba izio.
Rahalahy ndreky ranabavy,
atsika tsy mila taitaitry.
Raha mila ataontsika zioty,
man̈araka toromariky aby efa namezan̈a atsika in̈y fo.
Man̈ano cache bouche, man̈aja elan̈elan̈a,
manasa tan̈ana matetiky, man̈ano vaksin,
izikoa mbala azo atao.
Tamy Vaovao Farany Baka amy
Filankevipitantan̈ana #7 tamy 2021 ty,
Rahalahy Losch nan̈ambara fa
mandilatran 80 isanjatony
Betelita erantany vita vaksiny.
Fa ravoravo zahay mivolan̈a aminaro fa zioty,
efa mandilatrany 99 isanjatony
fianakavian̈any Betelantsika,
efa vita vaksiny.
Avio efa mandilatrany 95 isanjatony
panompo manontolo andra manokan̈antsika amy saha
vita vaksiny.
Maro amindro rahalahy ndreky
ranabavintsika aby io koa nahita fa
ten̈a ilain̈a ankitin̈y man̈ano vaksiny.
Karaha ataony tamy faritry sasany ta Bulgarie zioty
nisy pitondra fivavahan̈a araiky nivolan̈a fa
vaksiny io zen̈y poazon baka amy Devoly.
Ke nalaza tamy tanàna io koran̈a fa
tsy ilain̈a man̈ano vaksiny zen̈y.
Ndray tiô zen̈y,
nisy ranabavy araiky ndreky vadiny
nizaha Vaovao Farany Baka amy Filankevipitantan̈ana,
ke nanapakevitry iro baka amy safidindro manokan̈a fa
han̈ano vaksiny.
Tafaranizin̈y, patrony ranabavy io nikaiky izy,
ke nivolan̈a taminany fa
mifan̈araka amy lalàn̈any fanjakan̈a,
tsy mahazo mimpody miasa izy
izikoa tsy vita vaksiny.
Lan̈y fan̈ahy patronany koa fa nahay fa
kaiky ranabavy io taminio efa vita vaksiny.
Raha nisy baka,
efa izy zaraiky edy tamy piasa jiaby tao
nan̈ano vaksiny.
Ke safe nafaka asa lan̈iany tsy vita vaksiny.
Ke man̈angy io nivolan̈a tamy ranabavy io
tsao izy mahita ranabavy maromaro an̈y
efa vita vaksiny ke mety soloan̈a
iro nafaka asa aby io.
Avio man̈angy patron io
nivolan̈a tamy ranabavy hafa hainy
tsao izy mahita ranabavy hafa
vita vaksiny koa an̈y mitady asa.
Harivanizin̈y fo
efa presky voasolo iro olo jiaby nadoso in̈y.
Safe talebendro tao nan̈ontany iro ranabavy aby io,
“Akory nahaizanaro man̈angy marobe vita vaksiny io?”
Nahavita nitory taminany iro baka tiô.
Vokany, ranabavy 14
ndreky pianatra Baiboly araiky
nahazo asa.
Iro baka nan̈araka taridalan̈a
ndreky toro lalan̈a baka amy Baiboly aby
koran̈iny Vaovao Farany Baka amy
Filankevipitantan̈ana efa niboaka aby in̈y.
Fa hikoran̈intsika amy zay ziô
akory ampiasantsika tsarabe fotoan̈antsika
an̈atiny valan̈aretin̈y ty.
Ten̈a mamparavoravo mahay fa
maro aminaro zioty
nanjary nan̈ano pisava lalan̈a,
nanomboko fampianaran̈a Baiboly,
ndreky nankatsara fahaizan̈a mitory amy telefaony
ndreky amy taratasy.
Nahay nampiasa fotoan̈a tsarabe anaro.
Fa amy vaovao araiky ty,
atsika han̈azava fomba aroe fan̈ampiny
ahafahantsika mampiasa tsarabe fotoan̈antsika:
Fan̈ampian̈a iro tsy mitory eky,
ndreky fankatsaran̈a fahaizan̈a mamaky teny
ndreky manoratra.
Ten̈a mampatsaratsara koa mahita iro
rahalahy ndreky ranabavy efa tsy mitory eky
tan̈atiny valan̈aretin̈y ty
nanjary nimpody nivory ndreky nitory
miaraka amintsika ndraiky zioty.
Izikoa anao an̈atiny zen̈y,
tsara hainao fa Filankevipitantan̈ana
ten̈a ravoravo mandray anao.
Miniminia hely baka haravoan̈any Jehovah
ndreky Jesosy,
ndreky iro anjely jiaby andan̈itry an̈y
mahita anao navy ndraiky.
Karakory fo iro olo sasany mbala
tsy nimpody nitory aby io?
Mety mira amy raha koran̈iny
pan̈ano Salamo ty raha tsapandro,
amy Salamo 119:176.
Karaha ty ho izy ao:
Mety misy an̈y aminy atsika mivolan̈a ziô,
mivavaka karaha ataony pan̈ano Salamo io koa:
‘Tadiava zaho o!
Ampia zaho baka zaho tafimpody.’
Iro io tsy man̈adin̈a Jehovah.
Fa nohony antony maro,
izikoa angovondro tompony fo
iro tsy tafimpody amy Jehovah.
Ino raha tsapany Jehovah momba iro olo aby io?
Karaha ty volan̈iny Ezekiela 34:15, 16:
Asa anao mety ampiasainy Jehovah
hitady ondrikondrikinany very?
Ia, anao mety ampiasainy.
Maro aminaro zioty mifen̈y
man̈ampy olo efa tsy mitory eky.
Zahava amy video ty,
akory nataondro pitory aby io
nifen̈y mare nan̈ampy olo tsy nitory eky
himpody amy Jehovah.
Tsy haiko foeky taminio asa mbala
himpody amy Jehovah edy rahalahiko in̈y.
Efa navy pitory tamy fiangonan̈anay
izy taminizy mbala hely.
Mampalahelo fa taminizy 16 taon̈o
izy nanapakevitry niala tantran̈onay,
ke izy baka tiô tsy nanompo Jehovah eky.
Fa izikoa fa nandeha taon̈o,
zahay fivadiany nimpody baka ta Seattle tan̈y.
Loso nifandray matetiky taminany zahay tamy zen̈y.
Narary vadiny nazony tumeur du cerveau,
ke zahay fivadiany antsendriky nan̈atitry hanin̈indro.
Fa ten̈a nampahery koa raha
nataonolo tamy fiangonan̈anay,
fotony iro nan̈atitry hanin̈indro baka tiô.
Nisy anadahiny madamo koa niditry lopitaly,
ke iro navy namangy izy koa
ndreky nankahery izy.
Ten̈a nanohin̈y fony rahalahiko io raha zen̈y.
Hitany tsara fitiavan̈a misy amy fiangonan̈a zen̈y.
Ke fandinihako izy,
raha zen̈y nandrisiky izy himpody amy Jehovah.
Rahalahiko in̈y baka tiô nandeha
nivory tamy tran̈o fivorian̈a tan̈y
tan̈atiny 2 semainy,
fa baka tiô nisy COVID-19.
Fa tamy voanalohany izy nimpody nivory in̈y,
nisy antipan̈ahy araiky nikoran̈a taminany.
Iro nifan̈amia nimerony telefaony.
Ke tafarany zen̈y iro mbala afaka nifankaren̈y fo.
Rahalahy in̈y nampianatra izy fomba fampiasan̈a Zoom,
ke izy nahavita nan̈araka fivorian̈a fo.
Fenony fivorian̈a jiaby.
Zaho baka tiô nandrisiky izy hianatra Baiboly.
Fa ho izy taminaka, “Zaho kony efa mianatra e!”
Fa taminio nisy tsy fankahazo hely koran̈anay
fotony raha tiako volan̈iny taminany,
tokony hisy olo hampianatra Baiboly izy.
Fa misy fianakavian̈a naman̈a aby io mahita
izy avy mivory in̈y ke mba navy iro
nan̈aton̈o nankahery izy,
ke izy baka tiô amy zay nianatra Baiboly.
Komansy nandroso amy zay izy baka tiô.
59 taon̈o tafarany tsy nitoriany raha zen̈y.
Ten̈a tombontsoa maventy taminaka
nan̈ano batisa rahalahiko io!
Izikoa fa nikomansy valan̈aretin̈y ty,
hainay fa tsy maintsy hiova fomba
fan̈anaovantsika fanompoan̈a.
Safe zahay koa fa nieritreritry ino raha
mbala mety ataonay,
karaha ty raha nidinihinay:
Nataonay listy an̈aranolo jiaby efa
tsy nitory eky azonay onon̈o,
tamindro fiangonan̈a aby efa navy nisy zahay taloha,
na mbala jeune iro na efa be.
Nahavita listinolo 40 efa tsy nitory eky zahay taminio.
Safe iro nandifasanay mesazy, nikahianay,
avio zahay nanoratra taratasy maro nalefa tamindro.
Fa raha misy,
sasany tamindro io ndray tsy namaly,
tsisy tamindro ndraiky nivolan̈a taminay
iro efa tsy mila andifasan̈a eky.
Nisy lelahy zay efa 40 taon̈o tsy nifankahitanay.
Zaho nahita izy farany zay,
tamy zaho mbala vo 19 taon̈o.
Safe nanomboko nifandray ndraiky zahay.
Komansy nivory tamy Zoom izy,
avio zahay ziô efa mianatra amy boky
Mankafiza Fiain̈ana Tsisy Farany!
Nisy rahalahy araiky zay koa
efa taono maro izy efa tsy nitory eky.
Fa ziô, izy efa man̈ano fivorian̈a jiaby amy Zoom.
Izy efa nimpody nitory ndraiky,
ndray efa an̈atiny tsy fahasalaman̈a mare
izy amy zioty.
Ten̈a mila manampaharetan̈a
ndreky tsy mora kivy atsika,
izikoa man̈ampy iro namantsika efa tsy mitory aby io.
Tianay mare iro.
Safe isaka herin̈iandra kahianay fo
iro nataonay amy listy aby io.
Ten̈a ravoravo zahay.
Efa 3 amindro olo nikahianay aby io zioty,
efa man̈aton̈o fivorian̈a tsy tapaka.
Misy aroe koa efa nimpody nianatra Baiboly.
Ten̈a mamparavoravo zahay
mahita iro olo aby io,
fotony ten̈a tianay iro himpody amy Jehovah ndraiky.
Izikoa baka Jehovah ankitin̈y nitaon̈o iro,
iro man̈eky ampian̈a fo.
Zaho matoky fa
mitovy hevitry amindro koa anaro.
Jehovah mitahy ezakanolo mitady ondrikondrikinany very.
An̈isany fomba ten̈a tsara ampiasan̈a fotoan̈antsika zen̈y,
amy fotoan̈any valan̈aretin̈y zioty.
Nisy piandraikitry faritry araiky a Etazonỳ atỳ,
nan̈ano tatitry fa amy faritry hiandraiketany,
nisy 76 pitory efa tsy nitory eky,
ke nimpody nitory ndraiky.
Koa 76 zen̈y kony efa fiangonan̈a araiky e!
Ke mandrisiky anaro zahay
hivavaka ndreky handiniky tsarabe,
azovy olo tsy mitory mety hainaro.
Mety olo an̈isany fianakavian̈anaro izio,
na mety ho kamaradinaro.
Asa anaro mety mikaiky iro,
na mandefa mesazy amindro,
na manoratra taratasy amindro.
Izikoa iro mamaly avio mivory,
raisa tsarabe.
Man̈anten̈a atsika fa maro ondrikondriky very
himpody amy Jehovah alohany haviany farany.
Fianaran̈a mamaky teny ndreky manoratra koa
an̈isany fomba tsara ampiasantsika fotoan̈antsika.
Teky koa,
vakiteny ndreky fanoratan̈a io an̈isany
raha ten̈a maventy tamy vahoakany Jehovah.
Tsaroanaro,
iro panjaka taminy Israely aby io nirahiny nanoratra,
nan̈ano dika soratra lalàn̈a,
avio namaky izio taminy andra jiaby niain̈andro.
Olo tsy manan̈a nitarimy Jesosy
taminizy tambony tany teto,
fa izy nahay namaky teny.
Zahava fo raha nataony tandraraiky
taminizy tamy Synagoga tao.
Izy nahay nan̈abian̈a horonambokiny Isaia,
kanefa izio tsisy toko ndreky andininy.
Hainy ahia tany handeha hivakiny io,
baka iô hainy namaky izio.
Avio azonaro onon̈o raha nivolan̈iny Paoly tamy Timoty?
Timoty taminio efa antipan̈ahy,
fa Paoly mbala nivolan̈a taminany,
“mifen̈a mare amy vakiteny an̈ivonolo jiaby.”
Ke mifan̈araka amy koran̈a jiaby
ambarany Baiboly mikasiky vakiteny io,
tsy gaga atsika izikoa fandaminan̈any Jehovah,
letrizay firaka amy zioty,
mifen̈y mampianatra olo erantany hamaky teny.
Efa tan̈atiny 70 taon̈o ziô,
Vavolombelon̈o Jehovah efa nahavita
nampianatra olo mandeha andrivony aby,
hamaky teny ndreky hanoratra.
Ohatra zioty a Meksiky,
misy olo 156 000 manan̈amby,
nampianariny namaky teny ndreky nanoratra.
Nahazo fankasitrahan̈a baka tamy fanjakan̈a
baka tamy tany maro atsika,
taminy ezaka mare natao io.
Ke akory fo zioty?
Marin̈y ndraiky fa efa mandroso teknolozỳ zioty,
ke atsika efa afaka mitandren̈y famakian̈a boky
amy volan̈a isankarazany.
Fa tsy tiantsika ndraiky izikoa atsika hitandren̈y fo
amindro boky voasoratra aby io.
Tiantsika izikoa atsika tompiny mamaky
ndreky mianatra Baiboly,
avio mandalin̈y iro fan̈azavan̈a aby
baka amy panompo atokisan̈a ndreky mahadiniky raha.
Ino ma hatsaran̈a azontsika izikoa
atsika mahay mamaky teny
ndreky mahay manoratra tsarabekiny?
Misy lahatsoratra vaovao zioty
vo tsy ela naboaka tamy jw.org,
titranany,
“Nan̈ino ma Tsaiky Mila Mamaky Teny?”
Natao ninaro raimandreny lahatsoratra io.
Fa ndray zen̈y,
atsika jiaby tokony hihevitry vakiteny io,
an̈isany raha ten̈a maventy.
Ino antony?
Hazavainy lahatsoratra io fa
miasa sain̈intsika izikoa atsika mamaky teny.
Man̈ampy koa izio,
fotony manjary mahay mandamin̈y problemo atsika,
ndreky tsara toetry.
An̈isany toetry aby zen̈y ziô,
mahay miambin̈y,
mahafehy ten̈a, ndreky mahinakinaka.
Vakiteny io koa mahavy olo araiky
hahay handiniky tsarabe.
Tan̈atiny valan̈aretin̈y ty,
maro tamindro rahalahy ndreky ranabavintsika aby io
nampiasa tsarabe fotoan̈andro,
ke nianatra namaky teny ndreky nanoratra.
Alô zahavantsika iro mitantara hatsaran̈a nazondro.
Koa fa nan̈adary coronavirus in̈y,
nifody lekoly jiaby,
avio koa naro raimandreny tsy nandeha ampiasan̈a fa
niasa baka antran̈o fo.
Nan̈ano tanjon̈o piandraikitry faritry araiky
nandrisiky raimandreny amy faritry karakarainy
hampianatra zanakandro hamaky teny ndreky hanoratra,
baka iro io manjary pitory.
Naro raimandreny nan̈araka torohevitry zen̈y,
ke nisy tsaiky 37,
nianatra nanoratra ndreky namaky teny.
Misy ranabavy araiky zay, Sara an̈arany,
efa elaela nianatra namaky teny ndreky nanoratra.
Taloha vadiny nifen̈y nampianatra izy nan̈ano zen̈y
fa matetiky izy tsisy letan nan̈anaovan̈a izio,
fotony maro asanany avio maro koa andraikitrinany.
Fa ziô,
izy koa fa tsy niasa mare eky karaha taloha in̈y
nohony valan̈aretin̈y ziô,
nampiasainy rahalahy io tsarabe fotoan̈a nanan̈any.
Impirimpiry izy nampianatra vadiny
mamaky teny isaka herin̈iandra.
Zioty,
ravoravo ranabavintsika io
fotony efa mahavita mamaky iro bokintsika aby io.
Tiany mare koa izy tompiny
mahavita mihira baka amy fihirananany.
Misy pianatra Baiboly araiky zay koa Comfort an̈arany,
mba tihahay hamaky Baiboly mare.
Izikoa fa nan̈adary valan̈aretin̈y io nalahelo mare izy,
fotony efa tsisy kilasy fianaran̈a mamaky teny eky,
safe niasa loha izy azovy hampianatra izy.
Nisy antipan̈ahy araiky tamy fiangonan̈andro
nan̈amia izy torohevitry.
Izy mila man̈ano fan̈azaranten̈a fo mamaky teny.
Tapakevitry izy ke nifen̈y fo namaky teny.
Narehany torohevitry ny antipan̈ahy.
Nandroso izy ke efa mahay mamaky teny tsara izy zioty.
Avio dimy olo ampianariny Baiboly.
Misy zanany 14 taon̈o koa zioty
ampianariny mamaky teny ndreky manoratra.
Vita batisa Comfort tamy Fivoriambeny Vondroparitry
“Miravoravoa fo!” tamy 2020 in̈y.
A Nikaragoà misy ranabavy zay,
Maria an̈arany, 69 taon̈o,
efa mandilatra 6 taon̈o izy
nan̈ano pisava lalan̈a maharitry.
Izy olo tsiary nandeha lekoly.
Iro nampianatra Baiboly izy aby io
nampianatra izy namaky teny,
fa izy tsiary nahay nanoratra.
Ke izikoa fa navy valan̈aretin̈y ty,
dekorazy Maria,
fotony tsy hainy akory ataony mitory amy telefaony,
sady izy lastio tsy mahay manoratra amy taratasy.
Fa iro namany pisava lalan̈a aby io nan̈ampy izy.
Safe iro koa fa nan̈ano fitorian̈a amy taratasy,
Maria manoman̈a raha soratin̈y,
fa ranabavy miaraka aminany manoratra.
Ranabavy namany Maria io amy zay,
mangala sary taratasy io,
alefany amy Maria an̈y,
avio Maria amy zay mimpody manoratra raha jiaby in̈y,
amy taratasy hafa.
Karaha zen̈y fo nataony Maria,
ke izy nanjary nahay nanoratra.
Izy zaraiky fo zioty efa mahavita manoratra.
Anao koa mahita taratasinany,
zay raha milamin̈y ay!
Tsisy hosokosoko koa taratasy soratiny,
avio vitany tsara koa man̈aboaka
hevitry tiany koran̈iny.
Hita tsarabe fa Jehovah nitahy izy nifen̈y in̈y.
Zen̈y koa man̈amia korazy atsika jiaby,
hifen̈y baka hahay hanoratra tsara.
Zay fomba tsara mare ampiasan̈a fotoan̈a
an̈atiny valan̈aretin̈y ty ay!
Fa kanefa,
aza mieritreritry foeky fa
tsy fahaizan̈a mamaky teny ndreky manoratra io,
problemo amy tany sasany fo.
Fa problemony tsy fahaizan̈a
mamaky teny ndreky manoratra io,
io problemo erantany.
Man̈ano ny marin̈y aminy ain̈intsika atsika,
izikoa atsika mahatsapa ten̈a fa
atsika mila mankatsara fahaizantsika
mamaky teny ndreky manoratra.
Ke tsara atsika izikoa mba miezaka
man̈ano ambaka zen̈y.
Karaha ty taratasy nalefany Filankevipitantan̈ana,
nalefa tamy Komitiny Sampan̈a jiaby:
Ke akory hankatsarantsika fahaizantsika
mamaky teny ndreky manoratra?
Misy fomba aroe ty:
mivolan̈a amy kamarady, na olo tran̈o araiky aminao,
na fiangonana araiky aminao han̈ampy anao.
Misy fitaovan̈a tsara koa mety han̈ampy anao,
tsy ino zen̈y fa bokikely
Miezaha Mamaky Teny sy Manoratra.
Efa misy amy volan̈a 123 karazany izio.
An̈ontania antipan̈ahy amy fiangonan̈a misy anaro
karakory atao azahoan̈a bokikely io.
Mety han̈ampy koa vakiteny nalain̈a feo,
izikoa anao efa mahay alphabet
ndreky efa mahay man̈ambatambatra volan̈a.
Anao koa fa mitandren̈y vakiteny,
areha an̈aty boky raha vakina io.
Mifen̈a mangala tahaka fomba fanon̈onan̈a volan̈a
mifan̈araka amy fanon̈onan̈a ren̈inao.
Fankatsaran̈a vakiteny ndreky fahaizan̈a manoratra io,
an̈isany fomba ten̈a tsara ampiasantsika fotoan̈antsika
an̈atiny valan̈aretin̈y ty.
Efa naboaka anaro rahalahy ndreky ranabavy fa
anaro ten̈a afaka mifen̈y handroso arapan̈ahy,
ndreky hankahery olo an̈atiny valan̈aretin̈y ty.
Mahay mampiasa fotoan̈anaro tsarabe anaro.
Irarian̈a atsika jiaby tsy ho voly han̈ano karaha zen̈y
ke han̈ampy iro efa tsy mitory eky
ndreky hankatsara fahaizantsika
mamaky teny ndreky manoratra.
Matokisa fa Filankevipitantan̈ana
tsy voly mivavaka ninaro.
Narehanaro tiô Tele JW
baka amy Foibeny Vavolombelon̈o Jehovah atỳ!

Vaovao Farany Baka amy Filankevipitantan̈ana (2021) #10