JW subtitle extractor

Mbalatsara anaro!
Misy vaovao maro niany tianay koran̈iny aminaro.
Koa zioty edy,
jerinolo jiaby erantany zioty
amy raha mandalo a la Russie
ndreky a Ukraine an̈y.
Fa atsika ndraiky,
tsy mahagaga atsika fisiany raha zen̈y,
fotony atsika panompony Jehovah.
Haintsika fa la Russie ndreky panohan̈a izy,
man̈atanteraka raha volan̈iny Daniela toko faha-11 ao,
fa iro panjakany avaratra.
Tamy voanalohany Filankevipitantan̈ana
nan̈ambara raha zen̈y,
tamy fivorian̈a fatao isaka taon̈o tamy 2018 in̈y,
tamizin̈y zahay nan̈ambara fa
efa nifeheziny panjakany avaratra
iro ta Crimée tan̈y.
Tsy gaga atsika izikoa mamaky
amy Daniela toko faha-11 izikoa mahita fa
mbala tihahazo tany hafa koa
panjakany avaratra io.
Ke zioty,
zioty fotoan̈a tokony hahavy atsika
hahaihiambin̈y fo,
baka iô tsy hilan̈y amy donia ty foeky.
Fa firaka tamy 28 Fevrie tiô,
tsisy rahalahintsika naty,
fa nisy araiky ndraiky naratra
ta Ukraine tan̈y.
Fa maro ndraiky tran̈ondro
rahalahintsika aby io robaka.
Nisy andrivony tamindro io koa
nilefa niala amy faritry misy adiny maramila io.
Anaro rahalahy ndreky ranabavy
a Russie ndreky a Ukraine an̈y,
zahay tsy voly mampiditry anaro
amy vavaka ataonay.
Fa miaraka amy zen̈y koa,
man̈ano erakany vitanay koa zahay,
baka anaro mahazo raha ilainaro fo
aminy hanin̈y arapan̈ahy,
ndreky raha ten̈a ilainaro amy fiain̈ana.
Fa mikasiky vaovao arapitsaran̈a ndraiky,
tamy herin̈iandrany 21 Fevrie in̈y,
nisy afaira telo maventy
niambesan̈a fanapahankevitriny fitsaran̈a.
Tamy 22 Fevrie tiô in̈y,
fitsaran̈a ta Ust-Abakan tan̈y
nivolan̈a fa hankafaka ranabavintsika
efa 70 taon̈o, i Valentina Baranovskaya.
Ranabavy Baranovskaya io,
migadra amy prizon efa 12 fanjava zay.
Firaka amy 04 Marsy fo fotoan̈a
hanan̈any procureur aminy afairanany io.
Koa tsisy kaikiny fitsaran̈a aminio,
afaka gadra baka amy prizon
ranabavintsika io amy 05 Marsy.
Azafady kony,
mba ampidira amy vavaka ataonaro kony
ranabavintsika Baranovskaya io.
Tamy 22 Fevrie 2022 tiô in̈y,
Fitsaran̈a Eoropeanin̈y Momba Zònolombelon̈o,
nandiniky afaira aroe maventy
mikasiky zòndro rahalahintsika a la Russie an̈y.
Afaira aby io,
mikasiky fisavan̈a
ndreky fampigadran̈a nataony polisy
amindro rahalahintsika tan̈y
nanomboko tamy 2010 firaka tamy 2012.
Nan̈amia rariny atsika fitsaran̈a io
ndreky nan̈iraka han̈ifan̈a onitry,
amindro rahalahintsika ndreky ranabavintsika 15,
tafiditry taminy afaira io.
Koa atambatra,
fanjakan̈a Rosianin̈y
mila man̈efa vola mandeha 100 000 euros.
Nambarany fitsaran̈a io fa
manan̈a zò han̈ano asa fitorian̈a io
Vavolombelon̈o Jehovah,
avio iro manampahifan̈a aby io
tsy tokony hampijanon̈o
na himenasy iro,
izikoa iro fa man̈ano asa io.
Momba corona ndraiky,
amy tany maro nahainihen̈y isanolo
avoany COVID-19.
Avio fanjakan̈a amy tany sasany
efa mampihen̈y raha tandreman̈a,
fa sasany ndraiky efa man̈afoan̈a foeky
amy raha tandreman̈a.
Matoky atsika fa fisiany raha aby zen̈y
hahavy atsika hahavita
himpody amy fomba fanompoan̈a
nahazatra atsika taloha aby in̈y.
Fa mbala mila mitandrin̈y fo atsika
ndray efa mahazo mifanerasera,
Filankevipitantan̈ana efa nan̈amia lalan̈a
Komitiny Sampan̈a handiniky ndraiky,
raha misy amy faritry tsiaraikiaraiky
amy sampan̈a misy iro an̈y.
Anjarany Komitiny Sampan̈a tsiaraikiaraiky,
manapakevitry izikoa asian̈a fivorian̈a andran̈a,
na hampitombo isanizio,
izikoa azo antoko iro faritry aby io.
Ke izio ma posibla
efa han̈ano fahatsiarovan̈a
amy Tran̈o Fivorian̈a an̈y atsika
amy taon̈o 2022 ty?
Iô atsika mahita izy.
Ndray zen̈y,
atsika jiaby samby mila mandiniky tsarabe
karakory ma fiheverantsika
iro fivorian̈a fataontsika aby io.
Izikoa atsika himpody hivory amy
Tran̈o Fivorian̈a an̈y,
asa efa von̈ono ankitiny atsika handeha an̈y?
Diniha baka karakory ataontsika han̈azava
aminolo ampianarintsika Baiboly fa
ilain̈a mandeha mivory amy Tran̈o Fivorian̈a an̈y,
amy leson faha-10 amy boky
Mankafìza Fiain̈ana Tsisy Farany?
Karaha ty koran̈iny ao:
Avio misy fan̈ontanian̈a karaha amy boky io:
Matoky atsika fa fan̈ontanian̈a
mampadiniky be karaha zen̈y
mety hahavy pianatra Baiboly sasany
hanapakevitry handeha hivory.
Fa ziô ndraiky atsika tsiaraikiaraiky
mila mandiniky fan̈ontanian̈a io aby jiaby.
Izikoa baka atsika himpody hivory ndraiky
amy Tran̈o Fivorian̈a an̈y,
misy ezaka mila ataontsika.
Fa atsika koa mba mila mandiniky
ino aby hatsaran̈a ho azontsika,
izikoa atsika fanojy amindro
rahalahy ndreky ranabavintsika
amy Tran̈o Fivorian̈a an̈y.
Miniminia hely baka iry Josefa ndreky Maria
ndreky iry zanakandro,
ravoravo mare iro nandeha ta Jerosalema tan̈y!
Sady taminio,
feno olo manompo Jehovah fanojy iro tan̈y.
Ke haravoan̈a hitaniry Josefa
ndreky Maria tamy zen̈y
mety nahavy iro nandiniky fa
ten̈a man̈eva han̈anaovan̈a ezaka
fan̈aton̈ana fivorian̈a io.
Karaha zen̈y koa,
adin̈antsika ezaka jiaby nataontsika
atsika nandeha nan̈aton̈o fivorian̈a in̈y,
izikoa atsika ravoravo mahita
rahalahintsika ndreky ranabavintsika
amy Tran̈o Fivorian̈a an̈y.
Fa parapimpodian̈antsika amy Tran̈o Fivorian̈a an̈y,
ten̈a mankasitraka mare anaro zahay
aminy ezaka jiaby ataonaro
rahalahy ndreky ranabavy
amy fan̈aton̈ana fivorian̈antsika amy Zoom io.
Koa bonera atsika miditry amizio,
avio mijanon̈o elaela lera ravan̈a,
ten̈a afaka man̈ano raha
koran̈iny Soratra Masin̈y aminy
Hebreo 10:24, 25 ty atsika:
Ho tsapantsika tsarabe fa ho ravoravo atsika,
izikoa atsika mifen̈y mare
man̈ano erakany vitantsika,
ke mandrisiky iro rahalahintsika aby io
amy fitiavan̈a ndreky han̈ano asa tsara.
Fa karaha ty,
nan̈ino ma atsika mila mifen̈y
man̈ano raha jiaby zen̈y?
Nan̈ino ma atsika mila mifen̈y mare
mankatsara fifandraisantsika tompiny
amy Jehovah fo,
ndreky mankahery olo hafa?
Fotony tiantsika baka
fifandraisantsika amy Jehovah io
hahaiho fatatra fo.
Sady atsika koa mifen̈y mare manohitry
fahavalontsika araiky farany maventy,
Satana Devoly.
Aleva onon̈o baka fampitandreman̈a
koran̈iny 1 Petera 5:8 an̈y in̈y.
Ho izy ao:
Marin̈y ndraiky fa tsy baka amy Satana
problemo jiaby mahazo atsika,
fa kanefa izy mitady fomba
hampiasan̈a izio hamangoan̈a atsika.
Nohony valan̈aretin̈y,
mety hiasaloha atsika,
nefa koa mbala tsy afaka man̈ano
raha miaraka aminolo maro,
ke tiany Satana araraotiny zen̈y
baka hampalemy finoan̈antsika,
na hampavarian̈a atsika amy vandinany.
Ke akory ataontsika?
Aleva onon̈o koa raha koran̈iny
aminy andininy faha-9:
Raha hitovizantsika,
panompony Jehovah tsy mivadiky jiaby,
samby tafihiny Satana tsiaraikiaraiky.
Fa izy fo mety samy amy karazany
fomba han̈anaovany zen̈y.
Fa na ahia na ahia tany misy atsika,
atsika jiaby io samby tafihiny aby.
Fa atsika ndraiky koa misaintsain̈y
raha mavoa iro rahalahy ndreky ranabavintsika
amy tany sasany an̈y,
izikoa izio ampitovisintsika amy nintsika,
mety mbala kirikiry nintsika.
Ohatra,
mba iritrireta baka
iro rahalahintsika ndreky anabavintsika
amy tany handalovany antambo
ndreky amy tany misy fan̈injehan̈a an̈y.
Karaha ataony tamy taompanompoan̈a ty,
nisy 120 karazany antambo
nahazo iro rahalahintsika aby io.
Ty ziô sasany amy zen̈y.
Nisy siklaony tamy Desambra,
Rai na Odette an̈arany,
nandrobaka tanànany Philippines.
Mampalahelo fa nisy pitory 4 naty taminio,
maro koa ny naratra,
avio nisy pitory mandilatrany 2000
tsy maintsy niala tantran̈ondro.
Miniminia hely baka,
efa nandilatra 1700 tran̈ondro
piaramanompo amintsika
robaka, na ravan̈a foeky.
Avio tamy Zanvie tiô in̈y,
nisy Siklaony Tropikaly Ana
nandalo tatsimo antin̈ianany Afriky tan̈y.
Mampalahelo fa naty tamizio
vadiny rahalahintsika araiky,
ndreky ry zanany.
Nisy rahalahintsika 3 ndreky
tsaiky araiky koa naratra,
avio mandilatra 2000 olo tsisy tran̈o ipitrahan̈a,
avio tran̈ony rahalahintsika aby io mandilatra 400
robaka na ravan̈a foeky.
Avio tamy 15 Fevrie in̈y,
nisy mahalen̈y be ndreky
tany nitotro ta Brezily tan̈y.
Mampalahelo fa nisy rahalahintsika araiky
ndreky zanany lelahy taon̈o aroe
nindesin̈y godra.
Babany tsaiky io ndraiky naratra mare,
fa izy fo tsy naty.
Fa mampalahelo ndraiky zanany in̈y naty.
Mampalahelo koa fa nisy
rahalahy araiky hafa koa naty.
Atsika tsy voly mivavaka,
nindro rahalahy ndreky ranabavintsika jiaby
naty havan̈a ndreky navoa raha
tamy fisiany antambo aby io.
Fa sosoko fisiany antambo zen̈y,
amy tany misy rahalahintsika sasany aby io
koa zioty misy korontan̈a mare.
Karaha ataony amy
Repobliky Demokratikiny Kongo an̈y,
rahalahy ndreky ranabavintsika
mipetraka amy faritry maromaro ziô
tsy maintsy niala amy tany misy iro,
ndreky vilindro.
Fa nohony fanampiany Jehovah,
atsika mbala nahavita nan̈amia hanin̈y
mandilatra 81 tonnes,
taminolo mandeha 19 600.
Ten̈a mankasitraka anaro zahay
tamy fanohan̈ana nataonaro
tamindro rahalahy ndreky ranabavintsika
amy tany andalovany antambo aby io.
Vavaka nataonaro,
ndreky fahazotoanaro man̈ano fan̈amezan̈a,
nisy vokany maventy koa raha jiaby zen̈y.
Mersy!
Ndray iô raha ratsy jiaby mandalo zen̈y,
iro rahalahintsika ndreky ranabavintsika aby io
tsy mivadiky foeky.
Atsika ziô hitandren̈y rahalahintsika baka Kongo,
Philippines ndreky Caraïbes,
mitantara raha tsapandro
tamindro nahazo fan̈ampian̈a.
Man̈ano mersy Jehovah amy fônaka jiaby zaho,
fotony izy nan̈amia raha jiaby nilaiko
nahavitako nimpody amy fiain̈ananaka mahazatra.
Koa aminaka,
mersy zen̈y tsy mahavolan̈a fankasitrahan̈a
raha vitany Jehovah taminaka,
fotony maro mare fitahian̈a namezany zahay.
Zahay baka mbala an̈isandro olo aby
robaka tran̈o aby in̈y,
ke zioty tran̈onay io efa voambotrandro io.
Ten̈a nan̈ampy zahay iro ranadahy aby io ay!
Ndray tiô raha sarotro tojy zahay,
tamy fandalovany siklaony Odette in̈y,
Jehovah mbala tsiary ndraiky nan̈ary zahay foeky.
Nan̈ampy zahay mare izy.
Kiakany andranizin̈y fo,
iro ranadahy aby io efa nikaiky zahay edy,
baka iô nan̈atitry hanin̈y taminay
ndreky nan̈amboatra raha robaka tamy tran̈onay.
Ten̈a mankasitraka Jehovah mare zahay
nohony fan̈ampiany zahay in̈y,
ndreky nan̈amezany zahay raha ten̈a ilainay,
ke mahavy fiain̈ananay mbala mitohy tsara fo.
Amy fônaka jiaby zaho man̈ano mersy
Jehovah ndreky fandaminan̈anany,
fotony naboakandro tsarabe fa iro tia zahay,
tamy fotoan̈a nisiany volkan nipoaka in̈y.
Tsy hainay foeky ino mahavolan̈a
fankasitrahan̈a an̈atiny fônay ao.
Jehovah baka efa miran̈a raha
nitantan̈a tan̈ananay in̈y,
mikarakara zahay,
ndreky nivolan̈a taminay:
“Aza mavozo fa zaho han̈ampy anaro.”
Ke amy fônay jiaby zahay man̈ano mersy ay.
Mersy bôko anaro nan̈amia zahay tran̈o ty,
fotony tran̈onany in̈y nay.
Ke anaro jiaby panompony Jehovah,
zaho tihan̈ano mersy anaro jiaby.
Mersy, mersy, mersy ay!
Lamba ankoditry fo taminaka zaho nilefa.
Zahay tsy maintsy niala tamy tany nipitrahanay tao.
Fa zahay koa fa nimpody tamy tran̈onany io,
hitanay raha vitandro ranadahy aby io taminay.
Tsy haiko foeky akory atao hivolan̈a
fankasitrahako iro.
Tiako anaro tsiaraikiaraiky,
ary mankasitraka anaro tsiaraikiaraiky zaho
tamy raha vitanaro taminay.
Ten̈a vaky asaloha mare zahay taminany in̈y,
fotony zahay efa lany hevitry.
Koa zahay edy baka, tsisy raha vitanay ay!
Ten̈a hitanay tsarabe tan̈any Jehovah miasa,
ndreky fitiavany zahay.
Hitanay tsarabe fa Jehovah io tsara ankitin̈y.
Ten̈a man̈ano mersy maventy
amy fitahiany Jehovah.
An̈isany raha sarotro mahazo
piaramanompo amintsika aby io koa zioty,
fan̈injehan̈a io.
Karaha zen̈y zioty ranabavintsika
Anna Safronova.
56 taon̈o izy.
Tamy 25 Zanvie in̈y,
nahazo sazy migadra an̈atiny 6 taon̈o izy,
amy prizon araiky amy tany io.
Io sazy araiky farany sarotro,
sady farany nahadin̈y ela
tamy ranabavy ta Russie tan̈y,
nanomboko tamy nisiany fandraran̈a tamy 2017.
Ranabavy Anna zaraiky fo tamy zen̈y
mikarakara reniny 81 taon̈o.
Fa mbala nigadraindro fo izy ndray zen̈y.
Fa ino aby ma
raha sarotro natrefindro olo aby
nanan̈a havan̈a nigadrain̈a aby io?
Akory nataony Jehovah nan̈ampy iro?
Alô zahantsika fan̈adikadin̈ana baka la Russie ty.
Tamy le 12 Ziain 2018 nikomansy
fitsapan̈a ndreky raha sarotro nahazo zay.
Nisavainy polisy tran̈onay taminio.
Tan̈atiny 11 fanjava zahay tsy nahita i Aleksey.
Nafodindro tamy prizon tan̈y baka izy.
Nisy pitsara araiky tamy fitsaramparitry
nan̈amia izy sazy higadra 3 taon̈o sy tapany.
Baka iô mbala nisy problemo hafa koa tojy zahay.
Tandraraiky sasakalin̈y taminio,
nirehitry koa tran̈onay ke ravan̈a jiaby.
Avio taminy Oktobra 2020 in̈y,
voany corona zaho ndreky ry zanakanay aby io.
Tsy basiny zen̈y koa fa mbala nazony
corona ampan̈indroeny koa zahay vo tsy ela zay.
Zaho miaraka mipetraka aminy
Anna zanako man̈angy.
Tamy Zie 2021 in̈y,
nisavainy polisy tran̈onay.
Avio tamy le 25 Zanvie 2022 tiô in̈y,
nisaziany fitsaran̈a izy higadra an̈atiny 6 taon̈o.
Zaho baka tsy nimboandro
nan̈ano veloma izy foeky tamizio.
Efa taon̈o araiky sy tapany papako zay nigadraindro.
Tamy Zanvie 2021,
izy nampidirindro amy prizon
nigadra an̈atiny 7 taon̈o.
Tsy basiny zen̈y fo fa
tamy faramparany taon̈o io,
naty tampoko koa mamako,
natiny corona.
Mafy izikoa misy olo araiky tianten̈a
tsy ankilanten̈a!
Fa mbala mafimafiny zen̈y izikoa misy
olo aroe ten̈a tianao tsy ankilanao iô.
Safe nisy olo aroe ten̈a tsy foeko taminio,
tsy tankilanaka tiô eky.
Nivavaka tamy Jehovah zaho.
Nangatahako taminany baka
fônaka ho kalma tsarabe,
avio zaho tsy ho taitaitry.
Ke nanjary jaijay asalohanaka.
Maro iro kamaradinay aby io navy
nitatahy zaho nan̈adio tran̈o.
Iro koa man̈ano bazarinaka
ndreky mikoran̈a aminaka.
Jehovah tsiary ndraiky nan̈ary zaho
tan̈atiny fotoan̈a jiaby zen̈y.
Izy nan̈ampy ndreky nanohan̈a zaho fo.
Jehovah tsy voly nampiasa volan̈anany
hankahirezan̈a zahay.
Avio koa izy nampiasa iro ranadahy aby io.
Karaha ataondro kamaradinay aby io,
iro mandefa mesazy aminay,
avio mandefa toko sy andininy
ten̈a mankahery zaho.
Nivaliany Jehovah vavakanaka ay!
Ka baka taminy aniverserany mariaziny
papako ndreky mamako,
tan̈atiny andra araiky taminio,
naro mare kadô namiandro zahay,
avio folera ndreky pake maro oe.
Nanjary feno folera tantran̈onay
koa fa hariva andra.
Karaha naharen̈y Jehovah
nivolan̈a mare karaha ty zahay:
“Tiako anaro.
Zaho tsy hiala anaro.
Anaro tsy hariako!”
Avio Sasha nivolan̈a,
“Mama, izikoa papa tsy nigadra,
bokeny folera araiky fo nisy tamintsika!”
Azonao onon̈o tamy papanao nindesindro
anao navozo baka iô nivolan̈a taminany in̈y:
“Papa, tiako anao!
Korazy papa.
Anao tiany Jehovah!”?
Ten̈a nisy korazy anao,
avio atsika nivavaka in̈y.
Papa koa fa nandefa taratasy taminay,
nivolan̈iny tomoan̈y zen̈y izy
tamy zen̈y naharen̈y zaho,
fotony izy ravoravo oe.
Hitako nahaifatatra fo finoan̈anaka,
nanomboko namaky Baiboly
zaho isanandrasanandra,
avio zaho nan̈ano dingan̈a maventy araiky
tamy fanompoako Jehovah.
Aroe foeky baka.
Nanokanten̈a tamy Jehovah,
avio natao batisa.
Misy hevitry araiky zay matetiky azoko onon̈o.
Mamihin̈y atsika Jehovah,
fa misy olo fo ampiasainy han̈ano zen̈y amintsika.
Tamindro taon̈o aby tafarafara tatỳ,
ten̈a tsapanay fa matetiky Jehovah mamihin̈y zahay.
Raha sarotro aby mahazo zahay io
tsy maintsy ivoany fitahian̈a fo.
Karaha ataony tran̈onay koa fa nay,
zahay tsisy tran̈o.
Fa zahay ziô efa mipetraka amy tran̈o vao,
sady tsaratsarany araiky taloha in̈y!
Matoky zaho fa na ino na ino raha hiboaka,
tsy maintsy mbala ho vitanay fo hiatriky izy.
Ten̈a raha maventy mifandray
marikitry amy Jehovah.
Mirehareha mare atsika,
manan̈a iro rahalahy ndreky ranabavy maro
tsy mivadiky foeky
nata iro injehin̈y.
Mampatsiaro atsika raha koran̈iny
2 Korintianina 4:9 raha zen̈y:
Jehovah tsy han̈ary lan̈iany
panomponany tsy mivadiky aminany.
Tamy vaovao farany ty nampatsiarovin̈y atsika fa
iro rahalahintsika ndreky ranabavintsika erantany,
mbala maro fatatra finoan̈a mare fo zioty
ndray iô ady ataondro maramila aby io,
ndray iô valan̈aretin̈y ty,
avio ndray iô koa fan̈injehan̈a iro.
Rahalahy ndreky ranabavy,
karaha nikoran̈iny 1 Petera 5:8 in̈y,
atsika mila “mangala onondraha tsarabe,
ke hiambin̈y fo.”
Fahavalontsika io,
tsy azovy zen̈y fa Satana Devoly,
mahaiman̈aparitaka vandinany fo
izy zioty erantany.
Ke mitandrema fo!
Baka iô aza voly manohitry izy.
Olo amy donia misy atsika ty,
ndray iro mahaitia tanindrazan̈a fo,
ary ndray iro misaratsaraka,
atsika mbala tsy miova fo,
atsika tsy han̈eky hilan̈y amy donia ty foeky.
Atsika mbala miray sain̈y fo,
ndreky tsy mivadiky amy
Fanjakan̈any Zan̈ahary foeky,
avio koa atsika mbala hifankatia fo.
Tandrin̈esa fo feony Piambin̈y atsika,
Piambin̈y Tsara,
tsy azovy zen̈y fa Jesosy Kristy.
Avio tandrin̈esa fo koa
panompo atokisan̈a ndreky mahadiniky raha.
Jehovah Zan̈aharintsika farany mahery io,
izy tsy miala atsika foeky!
Avio atsika koa manan̈a iro rahalahy
ndreky anabavintsika aby io,
manohan̈a atsika.
Ke na ino na ino fitsapan̈a mbala handalovantsika,
atsika manan̈a raha jiaby ilaintsika
ke hahavitantsika tsy hivadiky
amy Jehovah foeky.
Rahalahy ndreky ranabavy,
ten̈a tianay anaro jiaby.
Narehanaro tiô Tele JW baka amy
Foibeny Vavolombelon̈o Jehovah atỳ!

Vaovao Farany Baka amy Filankevipitantan̈ana (2022) #2