JW subtitle extractor

!Welkam!
Long program ya, bambae yumi luk
from wanem i impoten blong folem ol jenis
we oganaesesen blong Jehova i mekem.
Be fastaem, bambae yumi tokbaot sam apdet.
Long stat blong yia ya,
Hed Kampani i agri se
plan blong mekem sepeding
visit long ol branj ofis
bae i gohed bakegen long
sevis yia blong 2023.
Sevis Komiti i jusum ol memba
blong Hed Kampani
wetem sam narafala brata long
Hedkwota blong visitim ol branj ofis.
Ol visit olsem i sem mak long ol visit
we ol eria elda oli stap mekem long kongregesen,
be hemia, Hed Kampani wetem sam brata
long Hedkwota oli mekem long ol branj ofis.
Stat long 28 Novemba,
oli visitim 15 branj ofis finis long sevis yia ya.
Ol visit ya i leftemap tingting
blong olgeta brata sista blong ol branj ya,
mo i mekem se oli joen gud moa.
Mo tu, yumi harem se plante
oli glad tumas long ol spesel miting
we ol paenia oli joen long hem,
taem i gat ol wan dei asembli.
Wan paenia long New York i se,
“Tede hem i faswan taem
bakegen afta 3 yia,
we mi joen long paenia miting
long Haos Asembli long Queens.
Mi stap wokem krae nomo,
from i klia se Jehova i kasem
save long filing blong yumi
taem yumi stap gotru
long pandemik.
Jehova i wan God we i gud tumas.”
I sua se plante long ol paenia blong yumi
raon long wol oli harem sem mak.
Yumi glad blong harem tu se
ol wok blong Lokol Disaen/Konstraksen
i stap gohed bakegen.
Long ol ples we gavman
i karemaot restriksen long hem,
wok blong bildim Haos Kingdom
i stat bakegen.
?Wanem ol tiokratik projek
blong yumi long fiuja?
Naoia, i gat nid blong bildim bitim
15,700 niufala Haos Kingdom,
mo bigfala wok blong riperem
olgeta raon long wol.
Yumi nidim ol Haos Kingdom ya
blong mekem ol miting.
Long yia ya nomo, i gat bitim 1,600 projek
finis we oli rere blong mekem raon long wol.
Ol branj ofis tu oli wok had
blong rerem ol ples
blong mekem ol eria asembli
long hem mo ol skul,
we bambae oli stat long Jenuware 2023.
?Olsem wanem?
?Yu tu yu naf blong givhan long ol bilding projek ya?
Askem ol elda long kongregesen blong yu
blong moa infomesen.
I naes tumas blong luk olsem wanem
ol yangfala oli glad tumas blong joen long wok ya.
Traem tingbaot trening
we oli stap kasem naoia.
Oli save yusum tu long ol bilding projek
afta long Amagedon.
Yumi gat wan narafala apdet
long saed blong fridom blong wosip.
Olsem we Jisas i talem long Matiu 10:22,
bae yumi fesem plante fasin agens.
Jisas i se, “Mo bambae ol man
oli no laekem yufala nating
from we yufala i holem nem blong mi.”
I no longtaem i pas, yumi gat wan niu dipatmen
long branj ofis blong Sentrol Yurop,
blong dil wetem ol kes we i
afektem wosip blong yumi.
Dipatmen ya bae i oganaesem
ol wok blong halpem yumi
blong difendem raet blong yumi
blong wosip long Yurop.
Nao, maet yu askem se,
‘?I nidim wan dipatmen olsem?
From ol Witnes oli stap wosipim Jehova
long Yurop plante yia finis.’
Yes, i nidim.
Eksampol, long Nowei,
eni oganaesesen we i rejista olsem wan relijen,
i save kasem sam help we i kam long gavman.
Be naoia gavman i stop blong givhan
long Ol Witnes Blong Jehova.
Bambae Brata Jørgen Pedersen
i eksplenem moa long saed ya.
Mifala i sek taem mifala
i kasem wan leta
we i kam long ol haeman blong
gavman blong Nowei long Oslo,
se oli wantem tekemaot raet
blong yumi olsem wan relijen.
!Ol Witnes Blong Jehova oli bin stap talemaot
gud nius long Nowei blong bitim 120 yia finis!
Taem Nasi gavman i rul long
Nowei long Wol Wo Tu,
Ol Witnes Blong Jehova oli
fesem strong fasin agens.
Mo long taem ya, Ol Witnes Blong Jehova nomo
oli stanap strong agensem gavman blong Nasi.
From samting ya,
wan man we i minista blong relijen bifo i se:
‘Olgeta man long kantri oli sud save stori ya.
Hemia bambae i givhan, speseli long ol yangfala.’
Ol man oli save gud se
yumi ol gudfala sitisen.
Wan pablik ripot i se:
‘Ol Witnes Blong Jehova oli lukaot gud
blong obei long ol loa blong kantri.’
Naoia gavman i stop blong sapotem yumi,
be ol narafala relijen we
i bitim 700 long olgeta,
gavman i gohed nomo
blong sapotem olgeta.
Desisen ya i no folem loa
blong kantri, mo tu i no stret,
from i agensem raet blong wan
relijen blong wosip long Nowei.
Niufala dipatmen we i lukaot long
raet blong yumi blong wosip,
i help blong dil wetem situesen ya.
Long semtaem, mifala i stap toktok
wetem ol ofisa blong gavman,
mo mifala i prea se evri samting
bambae i rongud blong stretem problem ya.
Tangkiu Brata Pedersen.
Yes, ol haeman blong
gavman blong Nowei
oli wantem karemaot raet
blong yumi olsem wan relijen,
from yumi stap folem tijing blong Baebol
long saed blong ol disfelosip.
Mo long fiuja, bae ol gavman oli gohed
blong agensem fasin blong yumi blong wosip.
Mo bae oli save fosem yumi tu
blong jenisim bilif blong yumi.
Be bambae yumi no obei long olgeta.
Olsem we Brata Pedersen i talem,
ol brata oli stap wok strong
blong dil wetem situesen ya.
So naoia we i stap, plis,
i gud yumi gohed blong prea from olgeta.
Taem pandemik i jes stat, plante long ol wok
blong yumi i mas stop blong smoltaem.
Be naoia plante samting i jenis,
mekem se yumi save gohed
bakegen long ol wok blong yumi.
Mo yumi no sapraes, from jariot blong Jehova
long heven i stap muv spid, olsem laetning.
Makem olsem wanem Esikel i tokbaot
samting ya, long Esikel 1:16,17.
Esikel i luk nambawan jariot
blong Jehova long wan vison,
nao hem i tokbaot se i olsem:
“Ol wil ya mo sep blong olgeta oli saen olsem krisolaet,
mo ol fofala wil ya oli sem mak nomo.
Sep blong olgeta i luk olsem we wan wil
i stap insaed long wan narafala wil.
Taem oli muv, oli save muv i go long eniwan
long ol fo saed we oli no nid blong tanem olgeta.”
Hemia wan nambawan vison blong oganaesesen
blong Jehova we i stap long heven.
Pure Worship buk i talem se,
“Jehova i gat paoa blong lidim jariot blong hem,
blong i go long eni ples we hem i wantem se i go long hem.
Olsem mining blong nem blong hem, Jehova i save jenis
i kam eni samting, blong mekem stamba tingting blong hem i kamtru. . . .
Yumi no mas wari se God blong yumi
bae i let blong givhan long yumi,
o se oganaesesen blong hem bae i no naf blong go tru long
eni trabol we yumi stap fesem long wol ya.
Yumi mas tingbaot se oganaesesen blong
Jehova i stap muv spid i go fored.”
I klia nomo se oganaesesen blong Jehova
i stap lidim yumi long taem blong pandemik.
Mo tangkiu tumas long fasin blong yufala
blong folem ol jenis we oganaesesen i mekem.
Taem pandemik i jes stat,
yumi no moa save joen fes tu fes.
Be from we yumi folem
daereksen blong oganaesesen,
yumi gohed yet blong mekem ol miting
mo wok blong prij tru long intenet.
Mo i gud tumas we
naoia ol samting oli jenis,
mo yumi glad blong joen bakegen
fes tu fes wetem ol narafala.
Mo long manis blong Julae we i pas,
Hed Kampani i sanem wan anaonsmen
long olgeta kongregesen
long saed blong ol miting.
?Yu tingbaot yet sam long ol poen
we i kamaot long anaonsmen ya?
I se: “Taem mifala i lukluk ol risal blong
fasin ya long gobak bakegen
long Haos Kingdom
blong mekem ol miting . . . ,
mifala i luksave se i klia we
Jehova i stap blesem arenjmen ya.
Yumi talem tangkiu long Jehova
from janis ya we yumi gat bakegen
blong save luk ol brata
mo sista fes tu fes,
joen wanples blong singsing
blong presem Jehova,
mo mekem ol narafala gudfala samting
blong soemaot lav long ol Kristin brata mo sista.
Afta bitim 2 yia we yumi no save
go long ol Haos Kingdom,
naoia yumi glad tumas we
yumi save joen long ol miting,
long ol Haos Kingdom bakegen.
Hemia i rili leftemap
tingting blong yumi
mo i mekem bilif blong yumi
i kam strong moa.”
Anaonsmen ya i gohed mo i se,
“Yumi kasem save se i gat samfala we oli olfala,
sam oli sik mo sam oli gat sam narafala problem,
we i mekem se oli no save kam
long miting long Haos Kingdom.
Long saed blong olgeta ya,
plis tingbaot naesfala rimaenda ya
long Hibru 6:10 we i se,
‘Oltaem God i stap
mekem i stret nomo.
Hem i no save fogetem
ol wok ya we yufala i mekem.
Hem bambae i stap tingbaot
we yufala i lavem nem blong hem.’”
Bae Jehova i neva fogetem yu
mo gudfala wok blong yu.
Yu yu stap gohed blong soemaot se
yu lavem nem blong hem,
taem yu joen oltaem long
ol miting tru long Zoom,
mo hemia i leftemap tingting
blong kongregesen.
Nao, sam long yumi i lan blong mekem
evri samting tru long Zoom.
Be long saed blong mi, mi mekem miting
tru long Zoom nomo,
from hemia nao rod we Jehova
i stanemap long taem blong pandemik.
Be taem Haos Kingdom i open bakegen,
mi mo waef i glad tumas blong gobak.
Filing ya blong joen bakegen wetem
ol brata sista fes tu fes i nambawan tumas.
Mo mi kasem save se
sam oli no save kam,
be mi glad tumas blong
gobak long Haos Kingdom.
Mo plante oli gat sem filing olsem.
Traem harem tingting
blong sam brata sista,
taem oli gobak bakegen
long ol Haos Kingdom.
Mi harem nogud we, taem oli talem se bae i no moa
gat miting long Haos Kingdom from COVID.
Mi harem se mi fas ya nao,
from mi no save go long Haos Kingdom
blong kasem kakae long saed blong spirit.
Gudfala slef i mekem arenjmen
blong mifala i lesin long miting
tru long radio blong 2 yia.
From we mi no gat wan radio,
mi stap go long haos blong ol defdefren
brata blong lesin long miting.
Biaen, ol elda oli mekem arenjem
blong mekem miting tru long Zoom.
Mi no gat wan smatfon, so mi stap go long haos
blong ol brata sista long kongregesen.
Samtaem taem mi kasem haos blong olgeta,
mi faenemaot se data blong intenet i finis.
Problem blong pandemik ya
i mekem i had tumas long mi.
Be taem mi harem nius we
“gudfala slef we i waes” i talem se
bae yumi save gobak bakegen
long Haos Kingdom,
!mi harem se mi glad we mi glad!
Naoia mi save luk ol
brata sista bakegen
we mi no save luk olgeta
long taem blong pandemik.
Naoia mi gobak long Haos Kingdom,
mo mi harem gud blong kasem
ol kakae long saed blong spirit olsem bifo.
Taem yumi no save gobak
long Haos Kingdom,
hemia i wan jalens long mi.
I no isi nating.
Be mi glad tumas long Zoom, from yumi gohed
blong kasem kakae long saed blong spirit.
Hem i wan blesing,
be yet mi misim ol brata sista.
Taem mi harem se bae yumi gobak
bakegen, mi glad we mi glad.
Mi mi olsem wan smol pikinini we mi harem gud
tumas blong go pem loli long stoa.
I wan gudfala samting.
I givim paoa long mi.
Mi harem olsem se
mi laef bakegen.
Yumi evriwan i gat ol jalens, yumi taed,
so yumi evriwan i nidim
blong kasembak paoa.
So, naoia we yumi save gobak long
Haos Kingdom bakegen, i gud we yumi gobak.
Mi save luk ol fren blong mi bakegen,
olgeta we oli olfala
o yangfala moa long mi,
mo ol pikinini oli ron i kam holem yu.
Hemia i mekem yu glad
bigwan mo yu smael.
Mo mi ting se hemia nao filing we
Jehova i wantem yumi gat
taem yumi stap wetem ol brata sista.
So mi harem gud moa taem
mi stap long Haos Kingdom.
!Mi glad tumas!
Yumi glad tumas blong harem
ol ekspiriens blong olgeta.
Mo yumi gat plante moa gudfala ripot olsem
we i soemaot glad blong ol brata sista.
Eksampol, branj ofis
blong Burundi i raetem se,
“Desisen ya blong gobak bakegen
long ol Haos Kingdom blong mekem ol miting,
i wan bigfala blesing blong
ol brata sista long Burundi.
I tru se oli mekem bes blong olgeta
blong konek tru long intenet.
Be blong talem stret, plante
long olgeta oli no naf
blong joen long ol miting olsem.
Be naoia, namba blong ol man
we oli joen bakegen
long Haos Kingdom long
kantri ya i go antap bigwan.
Eksampol, long wan kongregesen,
namba blong ol man we i stap kam
long ol miting tru long intenet, hem i 140.
Be afta we oli stat bakegen blong
gobak long ol Haos Kingdom,
namba blong olgeta
i go antap go kasem 227.”
Yumi gobak long anaonsmen blong yumi.
Mifala i wantem se yufala i tingbaot
wan haf blong anaonsmen ya.
Yumi jes tokbaot se samfala bambae
oli no naf blong kam long ol Haos Kingdom,
from maet oli sik o oli olfala
o gat sam nara problem.
Be afta anaonsmen i gohed mo i talem wan
poen we yumi mas tingbaot, i se:
“Long narafala saed,
sam brata mo sista,
hemia we oli yangfala mo
olgeta we oli gat gudfala helt,
maet oli naf blong save kam
long Haos Kingdom oltaem,
we i nogat samting i
blokem olgeta blong kam.
Be, i luk olsem se samfala oli gat fasin ya
blong wantem stap nomo long Zoom
blong joen long ol miting, be rili se oli naf
blong save kam long Haos Kingdom.”
Hemia nao mesej we i kam long yumi.
Mo yumi wantem gohed
blong tingbaot samting ya.
!Jariot blong Jehova i stap muv spid!
Ol plan blong yumi oli rere finis blong mekem
ol Eria Asembli mo ol Bigfala Asembli.
So naoia hem i gudfala taem
blong skelem fasin blong yumi wan
long saed blong joen wanples
long Haos Kingdom.
Bakegen, mifala i kasem save se samfala
bae oli no naf blong mekem olsem.
Be olgeta we oli naf, oli save
kam long ol Haos Kingdom.
?Wanem i save givhan long yumi blong tinghae
long fasin ya blong joen wanples tugeta?
Bakegen, long anaonsmen blong yumi
i gat tri vas blong Baebol
we i save halpem yumi
blong save tingting blong
Jehova long saed ya.
Bae yumi ridim wan long ol vas ya
long Ol Sam 22:22:
“Bambae mi talemaot nem blong yu
long ol brata blong mi,
mo long medel blong kongregesen,
bambae mi presem yu.”
Yumi glad tumas long nambawan janis ya
blong stap long “medel blong kongregesen”
long ol miting blong yumi.
Long en blong anaonsmen ya i se:
“Yumi nidim strong bilif mo
fasin blong stanap strong,
blong save fesem ol situesen
blong wol ya we i stap kam mowas.
Taswe, mifala i tekem janis ya blong talem bigfala tangkiu
long yufala ol gudfala brata mo sista
from strong bilif blong yufala,
lav we yufala i gat,
mo fasin blong yufala blong gohed blong
presem nambawan God blong yumi, Jehova.
!Mifala i lavem yufala tumas!”
Ol brata sista blong yumi long Yukren
oli fesem ol hadtaem
we i mekem se i had long olgeta
blong joen fes tu fes long ol miting.
Nating se i olsem,
i no longtaem i pas
klosap 100 kongregesen
long Yukren
oli save joen tugeta long ol miting
bakegen, long ol ples we i moa sef.
Ol brata sista oli glad tumas
blong joen bakegen wanples.
Traem harem samting we samfala oli talem
we i soemaot glad we oli kasem
taem oli joen bakegen long Haos Kingdom.
Sista Svitlana i talem se,
“Taem mi harem anaonsmen ya
blong gobak long Haos Kingdom bakegen,
faswan samting we mi mekem
hemia se mi prea long Jehova
blong talem tangkiu long hem,
from ol miting long Haos Kingdom
oli save givim paoa long mi bakegen.
Taem mi hagem ol brata sista,
storian wetem olgeta,
hemia i mekem mi harem gud we,
mo i halpem mi blong no tingbaot ol aoa we
mifala i bin spenem long wan besmen
mo harem ol bom oli stap faerap.”
Nadia i se, “Ol miting tru long Zoom i olsem wan
reskiu bot we i halpem yumi blong flot.
Be taem yumi gobak long Haos Kingdom,
i olsem we yumi stap insaed
long wan bigfala turis bot.
Wo we i stap gohed i mekem
se mifala i taed tumas.
Be taem mi stap long miting
long Haos Kingdom,
mi no moa tingbaot ol problem blong mi,
ol wari blong mi, mo wo ya.
Brata Stanislav, we i baptaes
long taem blong pandemik
mo i no gat janis blong joen long
wan miting long Haos Kingdom, i se,
“Mi laekem teknoloji,
so miting tru long Zoom
long mi i oraet nomo.
Be taem mi joen long miting long Haos Kingdom,
mi luk se i nambawan tumas,
i mekem mi sapraes we.
Mo mi faenem se i isi moa blong lesin long ol tok
long Haos Kingdom mo rimemba ol poen.”
Nating se oli fesem plante jalens,
be ol brata sista blong yumi long Yukren
oli leftemap tingting blong yumi
blong joen wanples long miting.
Eksampol blong olgeta i mekem
yumi tingbaot Ol Sam 122:1:
“Mi mi glad tumas taem oli talem long mi se:
‘Yumi go long haos blong Jehova.’”
?So yumi lanem wanem long apdet ya?
Olsem we yumi luk long vison blong Esikel,
yumi mas rere blong folem eni jenis
we oganaesesen blong Jehova i mekem.
Yumi mekem olsem taem yumi joen oltaem
long ol miting mo tu long wok blong prij,
mo tu taem yumi gohed blong mekem
ol prapa stadi blong yumi wanwan.
Taem yumi folem spid
blong jariot blong Jehova,
yumi stap soemaot se yumi
respektem mo trastem Jehova.
Taem yumi mekem olsem,
bambae yumi kasem wan nambawan
samting we Ol Sam 29:11 i talem:
“Jehova bambae i givim
paoa long ol man blong hem.
Jehova bambae i blesem ol man blong hem,
i mekem oli gat pis.”
Yes, taem yumi joen long
oganaesesen blong Jehova,
bambae yumi save kasem paoa mo pis
we Jehova nomo i save givim.
I gud yumi folem jariot blong Jehova
we i stap muv spid i go fored,
mo harem gud long
ol blesing blong hem.
Long Wol Hedkwota blong
Ol Witnes Blong Jehova,
hemia hem i JW Brodkasting.

2022 Hed Kampani Apdet #8