JW subtitle extractor

!Welkam!
Long apdet ya, mifala i gat sam nambawan samting blong talemaot.
!I sua se bae yufala i glad tumas long hem!
Manis ya i makem 10 yia nao,
we yumi kasem Niu Wol Translesen we oli wokem bakegen long Inglis,
we i kamaot long anuel miting blong 2013.
Bitim 1.4 milian brata mo sista long 31 kantri,
oli wajem program ya, long ples we oli holem anuel miting long hem
o tru long intenet.
Naoia, Niu Wol Translesen
i kamaot finis long 158 lanwis.
Be sipos yumi ademap
ol lanwis we oli transletem fulwan Grik Haf blong Baebol
o sam haf blong hem nomo,
hemia i mekem namba ya i go kasem
279 lanwis.
Ating yufala i luksave se Baebol ya i givhan bigwan long yufala
long wok blong prij.
Mo naoia Hed Kampani i apruvum wan narafala tul,
we i save givhan long yumi blong faenem kwiktaem
ol vas blong Baebol.
Yumi evriwan i bilif se
Baebol i save leftemap tingting blong yumi mo lidim yumi.
From samting ya,
i gat sam vas we yumi laekem tumas
mo yumi stap tingbaot bakegen mo bakegen.
?Be olsem wanem?
I gat samtaem we yu tingbaot ol toktok blong wan vas,
?be yu no save weples blong faenem?
Samtaem i stap hapen long mi tu.
O maet yu wantem leftemap tingting blong wan man,
be yu wantem yusum wan vas we hem i no stap harem oltaem.
Sipos i olsem,
bambae yu glad tumas blong save se
yumi kasem wan niufala tul,
hemia buk ya
“Ol Vas Blong Givhan Long Kristin Laef.”
I gat plante samting long buk ya we klosap i sem mak
long wan buk we i bin kamaot long 1965,
hemia buk ya
“Make Sure of All Things; Hold Fast To What Is Fine”
Long fran pej blong buk ya oli raetem se,
“Insaed long buk ya i gat 123 stamba tok,
mo aninit long olgeta wanwan i gat ol vas blong Baebol.”
?From wanem nao
oli bin wokem buk ya?
Oli wokem buk ya blong mekem bilif blong ol man blong God i strong
long ol tijing blong Baebol,
mo blong ansarem ol kwestin we ol narafala oli askem.
Plante brata mo sista oli laekem tumas buk ya.
Traem harem tingting we tu pablisa i gat.
Mi laekem buk ya tumas.
Long buk ya i gat ol defdefren topik,
mo aninit long wanwan topik i gat lis blong ol vas.
Hemia i givhan long mi blong kasem save
long ol stamba trutok blong Baebol.
Taem buk ya i kamaot,
mifala i stap paenia long wan ples we plante man oli save Baebol,
mo oli laekem tokbaot.
Wan taem mifala i stap storian wetem wan woman,
mo hem i tokbaot stori blong rijman mo Lasaros.
So mifala i yusum buk ya “Make Sure,” long haf we i tokbaot helfaea,
mo mifala i givhan long hem blong i kasem save.
Long taem ya we mi kasem trutok, mi stap joen long ami.
Mo buk ya nao i halpem mi, blong kasem save from wanem
mi no mas joen long faet,
politik,
mo ol samting blong wol.
Mo kasem tede, mi stap yusum yet.
Buk ya i givhan bigwan long mifala,
mo oltaem mifala ol paenia i putum insaed long basket blong mifala.
Sem mak olsem buk ya “Make Sure”
we naoia oli no moa printim,
niufala buk ya, “Ol Vas Blong Givhan Long Kristin Laef,”
i wan buk we i gat ol vas aninit long bitim 100 topik.
Buk ya i blong givhan long yumi,
blong mekem samting
we 2 Timoti 2:15 i talem,
hemia blong “tijim ol man long trutok long fasin we i stret.”
Naoia i gud yumi tekem smoltaem
blong tokbaot olsem wanem blong yusum buk ya,
long JW Library.
Buk ya “Ol Vas Blong Givhan Long Kristin Laef” o scl,
i mekem i isi blong faenem ol vas mo ol stori blong Baebol
blong halpem yumi blong winim ol jalens
mo leftemap tingting blong ol narafala.
Buk ya i no tokbaot evri vas we i joen wetem wan topik,
be i mekem i isi blong faenem ol impoten vas.
Blong faenem wan topik,
taepem topik ya long bokis blong lukaotem,
o luk tru long ol defdefren seksen blong buk ya.
Long buk ya i gat 7 seksen,
hemia Ol Jalens,
Ol Aksen,
Kongregesen,
Evri Dei Laef,
Famle,
Wosip,
mo Ol Fasin.
Jusum wan long ol seksen ya,
mo faenem topik we yu stap lukaotem.
Be sipos yu no save se topik we yu lukaotem i stap long wanem seksen,
yu go long Evri Topik blong faenem.
Taem yu go insaed long wan topik,
plante taem i gat ol kwestin o toktok long bigfala raeting.
Aninit i gat ol vas blong Baebol we oli sapotem toktok ya,
o ansarem kwestin.
Samtaem oli putum sam moa vas we i se, “Yu Save Luk,”
mo plante taem i gat “Ol Stori Long Baebol.”
?Bambae yumi yusum buk ya olsem wanem?
Buk ya i no olsem buk ya “Make Sure,”
we oli wokem blong yusum long wok blong prij.
Be niufala buk ya i blong givhan long yumi ol Kristin,
blong winim ol jalens mo mekem ol waes desisen.
Ol elda,
niufala buk ya bambae i givhan bigwan long yufala,
taem yufala i go blong leftemap tingting blong ol brata mo sista,
mo taem yufala i rerem ol tok.
Ol hed blong famle,
bambae yufala i save yusum niufala buk ya
long famle wosip blong yufala.
Mo ol pablisa,
bambae yufala i save yusum ol topik ya blong mekem risej
long prapa stadi blong yufala.
Mo yu save yusum tu blong givhan long ol Baebol stadi,
blong oli lanem blong folem ol stamba trutok blong Baebol,
taem oli mekem ol desisen.
Hed Kampani i apruvum blong oli transletem buk ya
long bitim 300 lanwis.
?Weples yu save faenem buk ya?
Mo ating yu wantem save:
?Wetaem bae yu save kasem?
Mifala i glad blong talemaot se
niufala buk ya i kamaot finis
long JW Library,
mo biaen yu save kasem tu hemia we oli printim.
Naoia we i stap,
yu save faenem buk ya long JW Library
long “What’s New.”
Mo wan narafala rod blong faenem,
hemia blong go long haf ya Library we i stap daon,
mo afta yu go long Ol Buk.
Buk ya i kamaot finis long Inglis mo sam narafala lanwis,
mo i no longtaem bae i kamaot long sam moa lanwis.
Hed Kampani i hop se
buk ya “Ol Vas Blong Givhan Long Kristin Laef,”
bae i halpem yumi blong folem advaes blong 2 Timoti 3:17
blong yusum Tok blong God
blong mekem se yumi ‘naf blong wok,
mo gat evri samting we yumi nidim blong mekem evri gudfala wok.’
Mo hemia i impoten tumas,
from we yumi stap kam klosap long en blong ol lasdei.
?I gat sam samting we i mekem se yu fraet
long ol yia we i pas?
Maet yu fraet se bae yu sik,
se bae yu lusum wok blong yu,
o se bae yu no naf blong lukaot long famle blong yu.
Maet i gat wan disasta long ples blong yu,
maet ol man oli agens, o i gat faet.
Maet yu harem se filing ya blong fraet,
i stap longtaem finis long yu.
Sipos i olsem,
?hemia i minim wanem?
?I minim se bilif blong yu i no strong?
!Nogat!
Ol gudfala man bifo tu,
samtaem oli fraet.
Traem tingbaot Deved.
King Sol i wantem blong kilim Deved i ded.
From samting ya,
i no sef nating blong Deved i stap long Isrel,
taswe hem i ronwe long kantri ya.
Ale, ?hem i go wea?
Hem i go long Gat,
hemia ples blong Golaeat bifo.
Taswe yumi save se ol man long ples ya oli no laekem Deved.
From samting ya, Baebol i talem se,
“Deved . . . i fraet tumas
long King Akis blong Gat.”
Hemia wan taem long laef blong Deved we i denja tumas.
Mo long taem ya nao, hem i raetem Ol Sam 56.
I gud yumi go long Ol Sam 56, mo yumi ridim stat long vas 1.
I se,
“O God, yu kaen long mi, from we ol man oli stap atakem mi.”
Vas ya i soemaot wan impoten poen.
Nating se wan haeman i luk olsem se i gat paoa,
be hem tu,
i wan “man” nomo.
Hem tu i nidim wota mo kakae blong laef.
Mo sipos Jehova
i tekemaot ol samting ya,
bambae man ya i ded.
Naoia i gud yumi ridim vas 8.
Deved i se,
“Yu stap wajem mi long evri ples we mi go long hem.”
Yes Jehova i luk Deved,
nomata weples Deved i stap long hem.
Deved i gohed i se,
“Plis yu fulumap ol wota blong ae blong mi long skin botel blong yu.
Yu yu makemdaon olgeta long buk blong yu finis.”
Deved i wan strong man blong faet,
be hem i no sem blong talemaot se
samtaem hem i stap krae,
mo samtaem hem tu i fraet.
Be long semtaem, Deved i no harem nogud gogo
tingting blong hem i foldaon olgeta.
Hemia from we hem i save
se Jehova i stap luk hem,
mo i kasem save from wanem Deved i harem nogud.
I olsem we Jehova i makemdaon long buk blong hem.
Deved i sua se wan dei, Jehova bae i openem buk ya bakegen,
mo bae givimbak long ol man ya
we oli mekem Deved i krae.
Ating yumi harem gud blong save se Jehova i luk taem yumi krae,
mo i tingbaot yumi.
Taem wan samting i mekem yu harem nogud o fraet,
yu prea.
Sipos yu naf blong stretem problem ya,
prea from waes.
Sipos yu no naf blong mekem wan samting,
prea from pis.
Taem wan samting i hapen we i mekem yumi fraet,
tingbaot spesel presen ya we Jehova i givim,
hemia presen ya
blong prea.
Sipos yumi talemaot hat blong yumi long Jehova,
bambae hem i lesin long yumi mo givhan long yumi.
Naoia i gud yumi gobak long vas 3.
Vas ya i sot nomo,
be i impoten tumas.
Hem i se,
“Taem mi fraet,
mi trastem yu.”
Vas ya i soemaot
se samtaem yumi evriwan i fraet,
be i talem tu samting we yumi mas mekem,
hemia blong trastem
Jehova.
Nekis yia,
bae yumi gat janis blong tingting dip moa long ol tok blong vas ya,
from we Hed Kampani
i jusum vas ya
olsem vas blong yia blong 2024.
Bambae yumi ridim bakegen Ol Sam 56:3
“Taem mi fraet,
mi trastem yu.”
Long Wol Hedkwota blong ol Witnes blong Jehova,
hemia hem i JW Brodkasting.

2023 Hed Kampani Apdet #7