JW subtitle extractor

!Welkam ol gudfala brata mo sista long apdet ya!
Bambae yumi stat wetem wan smol ripot
long saed blong ol disasta
we i stap gohed blong spolem ol brata mo sista blong yumi.
Long Septemba, ol brata sista long Gris
oli fesem strong ren mo bigfala flad we i ron.
Long Oktoba,
ol brata sista long Meksiko
oli fesem wan strong hariken we i kategori 5
mo i spolem plante ples.
Mo long Novemba,
wan bigfala etkwek blong 6.7 magnitude
i kasem ol brata sista long Filipin.
Sori tumas.
Bigfala etkwek ya
i kilim wan sista blong yumi i ded
mo i givim kil long ten brata sista blong yumi.
Yumi gohed blong prea from olgeta evriwan
we oli stap fesem ol disasta
we i stap hapen olsem raon long wol.
Be mifala i talem tangkiu
from ol sapot mo ol prea blong yufala.
Sam long yufala
i wok strong wetem disasta rilif.
Mo plante long yufala
i glad blong givim presen mane,
we i givhan bigwan long ol nid blong ol brata mo sista
mo i givhan blong bildim ol haos blong olgeta
mo ol Haos Kingdom.
!Mifala i glad tumas long yufala!
Long bihaf blong Hed Kampani,
mifala i wantem talem, !Tangkiu tumas!
Be naoia, long haf blong apdet ya,
bambae yumi tokbaot topik ya se,
“Yumi Soemaot Se Yumi Minista blong God.”
Aposol Pol i talem olsem long 2 Korin 6:4 se:
“Long olgeta samting we mifala i mekem,
mifala i soemaot se mifala i minista blong God.”
?Hemia i minim wanem?
Stadi not blong vas ya long Inglis i se:
“Grik tok we oli tanem i kam ‘mifala i soemaot’
i givim tingting ya se
‘mifala i pruvum mifala wan.’”
?Be olsem wanem yumi soemaot o pruvum se
yumi minista blong God?
Wan impoten rod hemia se
yumi wan yumi luk olsem wanem.
Yumi wantem se lukluk blong yumi
i soemaot gudfala fasin blong Jehova God.
Yumi mekem olsem
taem yumi folem stamba trutok blong Baebol.
Wan eksampol,
traem tingbaot stamba trutok we i stap
long 1 Timoti 2:9,10:
“Taem ol woman oli flasem olgeta,
oli mas putum ol klos we i stret nomo,
mo oli mas soemaot se oli gat respek mo stret tingting,
mo oli no mas tanem hea blong olgeta
long ol stael we i flas tumas
mo putum gol mo perel long hem,
mo oli no mas werem ol klos
we praes blong olgeta i antap tumas.
Be oli mas flasem olgeta long fasin we i stret
long ol woman we oli stap talem se oli wosipim God.
Oli mas mekem ol gudfala wok
mo hemia nao i flasem gud olgeta.”
I tru se advaes ya i go stret
long ol Kristin sista,
be stamba trutok ya
i blong ol Kristin brata blong yumi tu.
So wan rod we yumi evriwan
i ‘soemaot se yumi man blong God’
hemia taem yumi meksua
se ol klos blong yumi
o ol hea blong yumi oli klin,
mo oli soemaot stret tingting mo respek.
?Be hemia i min se evri Witnes blong Jehova
oli mas mekem sem desisen long saed ya?
?Evri stael blong hea blong yumi i mas sem mak?
?O ol klos blong yumi tu oli sem mak
olsem wan unifom?
No nogat.
I gat bitim eit milian
Witnes blong Jehova raon long fulwol,
mo yumi evriwan i kamaot
long ol defdefren kaen kalja.
Yet, Jehova i pulum ol milian man mo woman ya,
mo hem i lavem yumi evriwan.
Be wan kwestin:
?Olsem wanem sipos wan brata i lego mustas?
?I stret we hem i save jus blong mekem olsem?
Blong ansa long kwestin ya,
bambae yumi wajem wan video
mo traem luk
wan smol histri blong ol man blong Jehova
long saed blong mustas.
Long taem bifo we bifo olgeta,
hem i nomol we ol man oli lego mustas blong olgeta.
Ol man Isrel tu oli stap mekem olsem.
Be wan man Isrel i sevem mustas blong hem nomo
taem hem i sem o taem hem i krae
from hem i harem nogud.
Eksampol,
taem king blong Amon i sevemaot mustas
blong ol wokman blong Deved we i mekem oli sem,
Deved i tingbaot filing blong olgeta nao i se:
“Yufala i stap fastaem long Jeriko
go kasem we mustas blong yufala i gru bakegen,
nao biaen yufala i kambak.”
Plante handred yia i pas,
profet Esikel i sevemaot mustas blong hem
mo hed blong hem blong soemaot bigfala trabol
we bambae i kasem Jerusalem i no longtaem.
?Olsem wanem long Jisas?
?Hem tu i lego mustas blong hem?
Bifo, blong sam yia,
ol pija blong Jisas long sam buk blong yumi,
oli soemaot se Jisas i nogat mustas.
Hemia from we yumi folem risej
blong sam man blong archaeology we oli mekem.
Be long 1968,
Wajtaoa i tokbaot moa pruf we yumi faenem long histri
mo long ol vas blong Baebol.
I nogat wan long ol fofala Gospel we i soemaot se
lukluk blong Jisas i defren long ol narafala.
Hem i mekem i sem mak
olsem ol man Jiu long taem ya.
Hem i lego mustas blong hem.
Mo naoia, ol video mo pija long ol buk blong yumi
oli gohed blong soemaot Jisas
olsem wan man we i lego
mo i mekem gud mustas blong hem.
Taem ol Kristin kongregesen oli jes stat,
ol man Rom oli gat fasin ya finis
blong sevemaot mustas blong olgeta.
?So, olsem wanem?
?Ol Kritin man Jiu tu oli mas
sevemaot mustas blong olgeta?
Mo olgeta we oli no man Jiu,
?oli mas lego mustas blong olgeta olsem ol man Jiu?
Nogat.
I no gat wan loa long Baebol we i talem se
ol trufala Kristin oli mas lego
o sevemaot mustas blong olgeta.
Hemia i desisen blong wanwan man.
Long ol yia bitwin 1870 mo 1914,
ol Baebol studen oli lego mustas blong olgeta,
olsem ol foto ya we yumi luk blong ol brata we oli stap travel
blong mekem wok blong oganaesesen.
Brata Rasel tu i lego mustas blong hem.
Wan man blong niuspepa i singaot hem se
wan “minista we i luk naes.”
Hem i se:
“Mi ting se hem i sem mak nomo
long plante narafala man we oli stap prij.
Be ol sofsof waet mustas blong hem,
i mekem hem i luk olsem wan papa.
Mo i mekem se yumi wantem trastem hem.”
I no longtaem afta long Wol Wo Wan,
fasin blong sevem mustas i kam popula.
Long 1919, taem oli tekem foto ya blong ol brata,
plante long olgeta oli no gat mustas.
Nating se ol buk blong yumi
oli no givim plante save long saed ya,
be i nogat plante brata we oli lego mustas blong olgeta.
Long stat blong ol yia 1960, long plante kantri,
fasin blong lego mustas
i joen wetem fasin blong rebel agensem gavman.
From samting ya,
plante man wetem ol Witnes tu,
oli jusum blong sevemaot mustas blong olgeta.
From we ol man oli ting se fasin blong lego mustas
i joen wetem fasin rebel,
plante brata we oli lego mustas blong olgeta,
oli no save mekem wok olsem
man blong givhan o wan elda.
Naoia we ol taem i pas, long sam kantri,
fasin blong lego mustas
i no moa joen wetem fasin rebel.
Long ol ples olsem,
sam brata we oli gat mustas
oli kam ol man blong givhan o ol elda.
Long taem blong yumi,
fasin blong lego mustas
i kam wan nomol samting long plante moa kantri.
?Taswe, wanem tingting blong yumi long wan brata
we i jusum blong lego mustas blong hem tede?
Video ya i finis wetem wan intresting kwestin:
?Wanem tingting blong yumi long wan brata
we i jusum blong lego mustas tede?
Hed kampani i askem mi blong ridim
anaonsmen ya long yufala evriwan:
“Plante branj ofis raon long wol
oli raet i kam long mifala
from we i gat plante kwestin
long saed blong mustas,
se i stret ya blong wan brata
we i gat wok long oganaesesen
i lego mustas o nogat.
Afta ol storian mo ol prea
we Hed kampani i mekem long saed blong situesen ya,
desisen blong olgeta i olsem:
Hed kampani
i nogat problem wetem wan brata we i lego mustas.
?From wanem?
From i nogat wan vas blong Baebol
we i talem se fasin ya i no stret.
Mo tu,
long ol taem we i pas,
mifala i makem se long plante kantri,
i stret nomo we wan man we i gat posisen long wan bisnes
mo i wok blong gavman
i lego mustas blong hem.
Taswe, fasin blong lego mustas
hem i desisen blong wanwan man.
Mak blong wan brata
blong kam wan elda o wan man blong givhan,
i dipen long fasin fren
blong hem wetem Jehova,
be i no from we hem i lego mustas blong hem o nogat.
Daereksen ya
i blong olgeta tu we oli mekem
spesel fultaem wok long Betel,
mo olgeta we oli mekem wok blong spesel paenia,
ol misinari mo ol eria elda.
Folem vas blong Rom 14:4,
ol elda o eni narafala kristin,
oli mas lukaot se oli no jajem wan brata
sipos hem i jusum blong lego mustas blong hem.
Mifala i sua se daereksen ya
bambae i halpem yumi blong no letem eni samting
i spolem fasin joengud
blong yumi ol man blong God.”
En blong anaonsmen we i kam long Hed Kampani.
Maet daereksen ya,
i mekem se yufala i gat sam kwestin.
Eksampol, wan hemia:
?From wanem Hed Kampani
i givim daereksen ya naoia?
Folem vas long 1 Korin 7:31,
tabu spirit i pulum aposol Pol blong raetem se:
“Ol samting we oli stap hapen long wol ya oli stap jenis”
Folem vas ya,
maet aposol Pol i stap tingbaot ol samting we i stap jenis,
long wan drama we ol man oli aktem long wan stej,
mo ol akta oli kwik blong jenis blong go
mo kamaot long stej.
Folem stamba trutok ya we Pol i raetem,
stael blong klos mo hea tu i
stap jenis long ol yia we i pas.
Eksampol,
plante moa man naoia we oli gat mustas,
ol man long komuniti blong olgeta,
oli respektem olgeta.
Wan nara kwestin hemia:
?Yumi mas gat wanem tingting
long wan brata we i lego mustas blong hem?
Yes, yumi mas folem advaes blong Jisas
long Jon 7:24 we i se:
“Stop blong jajem ol man from samting we yufala i luk.”
Olsem we yumi luk long video,
taem taem i pas, stael blong hea i stap jenis.
I no evri jenis we i nogud.
Traem tingbaot:
I nogat wan long yumi we yumi wantem jenis sem mak
olsem ol man long Baebol bifo,
o ol man blong wan handred yia we i pas.
Trutok se
plante oli wantem folem ol stael we oli stret naoia,
i no blong taem blong bifo.
Blong talem stret,
i no rong blong werem ol klos o mekem hea
olsem ol man long komuniti blong yumi tede.
Be yumi mas lukaot nomo se ol stael ya
oli no brekem ol stamba trutok blong Baebol.
Oltaem yumi mas lukaot se ol stael blong klos mo hea
oli klin, oli soem respek
mo tu, oli soem stret tingting.
Wan moa kwestin hemia:
?Olsem wanem blong gat wan tingting
long saed blong daereksen ya?
Ating afta long program ya,
maet bae samfala oli kwik
blong talem strong tingting blong olgeta.
Eksampol,
maet samfala bae oli harem se
tingting blong olgeta i go antap mo oli se:
“Samting ya nao mi stap tokbaot longtaem finis.
!Yu luk!
!Tingting blong mi long saed ya i stret nomo!”
O maet ol narafala oli harem nogud from,
nao oli se:
“Mi stap folemgud ol daerekesen
long saed blong hea long taem finis.
!Be naoia mi harem se mi slak!”
?Yu ting se tufala tingting ya i stret?
No nogat.
Makem tok blong aposol Pol we hem i raetem
long 1 Korin 1:10:
“Ol brata, long nem blong Masta blong yumi Jisas Kraes,
mi mi talem strong long yufala se yufala evriwan
i mas toktok we yufala i gat wan tingting nomo,
mo yufala i no mas seraot,
be yufala evriwan i mas joen gud long wan maen,
mo fasin blong yufala blong tingting i mas sem mak.”
?Olsem wanem advaes ya i save givhan long yumi?
Sipos yumi stap leftemap tingting
blong yumi nomo long saed ya
mo yumi no halpem ol narafala blong
folem daereksen blong Jehova,
?yumi stap joengud o yumi seraot?
Sipos tingting blong yumi wan i strong,
bambae yumi seraot
mo bambae yumi no joengud.
Sipos yumi stap gat ol tingting olsem,
i gud we yumi jenisim tingting blong yumi kwiktaem.
Be nao sipos,
yumi holemstrong long Jehova longtaem finis i kam
from we yumi wantem sapotem hem,
bambae yumi no rigret nating
long ol jenis we oganaesesen blong hem i mekem.
Yes, Jehova i tinghae long fasin ya,
mo hem i glad tumas
taem ol man blong hem, oli obei long hem
mo taem oli folem ol daerekesen
we i kam long oganaesesen blong hem.
Long ol faswan handred yia,
sam Kristin oli letem situesen blong sakomsaes
i seraotem olgeta.
Be tabu spirit i lidim Hed Kampani
blong stretem situesen ya
mo halpem ol brata blong joengud.
Long sem fasin,
tede Hed Kampani i wok strong blong yumi joen gud.
Yumi no mas letem situesen blong lego mustas
i mekem se yumi seraot.
Yumi evriwan i mas tingbaot se
oganaesesen blong Jehova long wol
i stap traehad oltaem blong joengud
wetem oganaesesen blong Jehova long heven.
I mas folem spid blong hem.
?Yu tingbaot olsem wanem Esikel i tokbaot spid blong jariot?
“Olsem laet blong laetning.”
Taswe, sipos yumi wantem mekem ol jenis fastaem
bifo we oganaesesen blong Jehova i mekem,
o sipos yumi no folem
ol jenis we oganaesen blong Jehova i mekem finis,
yumi stap soemaot se
yumi no wantem folem spid blong jariot blong Jehova.
?So, olsem wanem?
?Yumi glad long stret daereksen blong Jehova
long saed blong mustas?
Yes Jehova i stap ona long yumi.
Hem i letem wanwan brata
i fri blong jus sipos i hem i wantem
blong lego mustas o nogat.
Mifala i bilif strong se bae yufala i traehad
blong folem daereksen ya blong Jehova,
jenisim tingting sipos i nidim,
mo gohed blong sapotem Jehova oltaem.
Nao, bambae lav mo pis
i stap wetem yufala ol brata mo sista.
Long Wol Hedkwota
blong Ol Witnes Blong Jehova,
hemia hem i JW Brodkasting.

2023 Hed Kampani Apdet #8