JW subtitle extractor

Jeová ta da txeu valor pa koraji di se sérvus lial.
Má, nu ta mostra koraji di verdadi pa kuzas ki nu ta faze,
sima ta kontise ku kes otu kualidadi.
Pur izénplu,
‘fé sen óbras sta mortu.’
Di mésmu manera, nu ka debe mostra amor sô na bóka,
má sima Bíblia ta fla,
‘pa kuzas ki nu ta faze i di verdadi.’
É si tanbê ku koraji.
Pa nu ta lida ku prublémas
nu meste ten kunfiansa na Jeová,
má tanbê nu meste faze kuzas ki ta mostra kel kunfiansa.
Si nu ka faze nada ô nu ka toma ninhun disizon,
kel-li pode mostra ma nu meste más koraji.
Koraji debe djuda-nu pâpia i aji sen medu.
Asi, Jeová ta abênsua nos koraji
i el ta djuda-nu ten bons rezultadu.
Nu ta odja kel-li na stória di Davidi ki sta na Bíblia.
Sénpri ki asuntu éra faze vontadi di Jeová,
Davidi mostra ma el éra un ómi di koraji.
Mésmu dipôs ki el faze kuzas mariadu i el pasa pa txeu sufrimentu,
Davidi kontinua lial pa Jeová ti fin di se vida.
Poku ténpu antis di el móre,
el fla dianti di tudu kes algen inportanti
ma éra Salumon ki ta fazeba ténplu di Jeová.
Imajina modi ki Salumon xinti
kantu Davidi da-l kel prujétu di konstruson
ki Jeová daba el!
Di sertéza, Salumon fika txeu preokupadu.
Má Davidi, se pai, da-l koraji
i kes palavra ki Davidi fla-l pode nkoraja-nu tanbê,
óras ki nu sta pasa pa prublémas.
Pur isu, nu ta konvida tudu algen,
kriansas ku jóvens tanbê,
pa obi leitura di Bíblia ku atenson.
Kel stória ki sta ben ledu sta na 1 Crónicas 28,
versíklus 1 ti 20.
Más un bês,
é 1 Crónicas kapítlu 28,
el ta kumesa na versíklu 1.
Nton, Davidi djunta na Jiruzalen tudu prínsipis di Israel:
kes prínsipi di tribus,
kes xéfi di grupu ki ta sirbiba rei,
kes xéfi di 1000,
kes xéfi di 100,
kes enkaregadu di tudu rikézas i animal di rei i di se fidjus,
i tanbê kes xéfi di palásiu i tudu kes ómi fórti i kapás.
Dipôs, Rei Davidi labanta i el fla:
Nhos obi-m, nhas irmon i nha povu.
Nha dizeju di korason
éra faze un kaza pa ser un lugar di diskansu
pa Arka di Kontratu di Jeová
i pa ser lugar ki nos Deus ta poi pé,
i dja N pripara pa kel konstruson.
Má Deus verdaderu fla-m:
‘Bu ka ta faze un kaza pa nha nómi,
pamodi bo é un ómi di géra i bu tra sangi.’
Má, Jeová, kel Deus di Israel,
skodje-m na meiu di tudu algen na kaza di nha pai
pa N bira rei di Israel pa tudu ténpu.
Pamodi el skodje Judá pa ser líder,
i di kaza di Judá el skodje kaza di nha pai,
i di fidjus di nha pai é mi ki el skodje,
pa el faze-m rei di tudu Israel.
I di tudu nhas fidju,
pamodi Jeová da-m txeu fidju,
el skodje Salumon, nha fidju,
pa xinta na tronu di reinu di Jeová riba di Israel.
El fla-m:
‘É Salumon bu fidju,
ki ta faze nha kaza i nhas pátiu,
pamodi N skodje-l pa el ser nha fidju
i N ta bira se pai.
N ta finka se govérnu pa tudu ténpu,
si el kontinua disididu na obi ku nhas mandamentu i nhas órdi,
sima el sta ta faze oji.’
Pur isu,
N ta fla nhos dianti di tudu Israel, ki é kongregason di Deus,
i pa nos Deus obi:
nhos konxe i nhos obi ku kuidadu
ku tudu mandamentus di Jeová, nhos Deus,
pa nhos pode fika na es téra sábi
i pa nhos da nhos fidjus el
sima un eransa pa tudu ténpu.
I bo Salumon, nha fidju,
konxe Deus di bu pai
i sirbi-l di tudu bu korason i di tudu bu alma,
pamodi Jeová ta djobe tudu korason
i el sabe tudu tendénsia di pensamentus.
Si bu djobe-l, el ta dexa-u atxa-l,
má si bu bandona-l,
el ta nega-u pa tudu ténpu.
Lenbra sénpri ma Jeová skodje-u pa bu faze un kaza
pa ser sima un santuáriu.
Ten koraji i kumesa trabadju.
Nton, Davidi da Salumon, se fidju,
prujétu di arkitetura di portons i di kes txeu divizon di kaza,
kes armazén,
kes sala di riba,
kes kuartu di déntu
i kel divizon undi ta fikaba kel tanpu di arka.
El da-l prujétu di arkitetura di tudu kel ki el resebe através di inspirason,
pa kes pátiu di kaza di Jeová,
pa kes lugar di kume na se volta,
pa kes tizoru di kaza di Deus verdaderu
i kes tizoru di kes kuza ki biradu sagradu.
Tanbê el da-l instruson sobri kes turma di saserdótis i di kes levita,
sobri tudu kes trabadju ki sta ligadu ku sirvisu di kaza di Jeová
i sobri tudu kes material ki ta uzadu na sirvisu di kaza di Jeová.
El fla-l pézu di oru ki el debe uzaba,
oru éra pa tudu kes material ki ta uzadu na txeu tipu di sirvisu,
pézu di tudu kes material di prata,
di tudu kes material ki ta uzadu na txeu di kes sirvisu;
tanbê pézu di kes kandelabru di oru
i di ses lánpida di oru,
di kada kandelabru i di ses lánpida;
pézu di kes kandelabru di prata,
di kada kandelabru i di ses lánpida,
di akordu ku manera ki es ta uzadu;
pézu di oru pa kes méza di pon,
pa kada méza;
pézu di prata pa kes méza di prata;
pézu di garfus,
di tijélas i di jarus di oru puru;
pézu di kes tijelinha di oru, di kada tijelinha;
i pézu di kes tijelinha di prata, di kada tijelinha.
Tanbê el da pézu di oru refinadu pa altar di insénsu
pa reprizentason di karu,
ki é kes kerubin di oru
ki sta ku azas abértu ta kubri kel arka di kontratu di Jeová.
Davidi fla:
Mô di Jeová staba riba mi,
i el da-m ntendimentu
pa N skrebe tudu kuza na prujétu di arkitetura.
Dipôs, Davidi fla se fidju Salumon:
Ten koraji i ser fórti, i kumesa trabadju.
Ka bu xinti medu i nen ka bu dexa medu toma kónta di bo,
pamodi Jeová, nha Deus, sta ku bo.
El ka ta dexa-u
nen el ka ta bandona-u,
ma el ta ben sta ku bo ti ki finda tudu trabadju
ki ten aver ku sirvisu na kaza di Jeová.
Imajina trabadju ki Salumon tinha!
El mandadu faze un ténplu pa adorason verdaderu
ki ka éra igual ku ninhun otu kaza,
má ki tanbê tinha ki sérba ‘rei di bunitu’
i se fama ku se bunitéza ta sérba ‘konxedu na tudu téra’.
Talvês Salumon ka tinha spiriénsa na konstruson.
Davidi sabia ma txeu prubléma staba pa frenti.
Tanbê,
Salumon ta ben tinha opozison déntu i fóra di se família.
Pur isu, Davidi fla se fidju pa ser obidienti i lial pa Jeová.
Tanbê el insentiva Salumon
pa ‘ten koraji i pa ser fórti, i pa kumesa trabadju.’
Salumon podia dexaba medu toma kónta di el.
Si el fikaba ta pensa ma kel trabadju éra difísil dimás,
el podia ti bandonaba kel prujétu.
Si kel-li kontiseba,
Jeová podia fikaba txeu tristi.
Pur isu, Davidi torna fla-l:
‘Kumesa trabadju.’
Davidi sabia
ma nu ta mostra koraji i kunfiansa na Jeová pa kel ki nu ta faze.
El prende kel-li pa kuzas ki el pasa pa el.
Nu ben odja alguns kuza ki kontise na vida di Davidi ki ta izijiba koraji.
Timenti nu sta obi kel stória,
pergunta bu kabésa:
‘Davidi éra algen ki ta duraba ku tomaba disizon
ô el ta dexaba medu toma kónta di el pamodi prublémas?’
Tanbê pensa na ki ténpu ki Davidi skodjedu pa ser rei di Israel.
Saul inda éra rei,
má Jeová dja negaba el pamodi el ka obi ku el.
Obi leitura di kes palavra ki sta na 1 Samuel 16 versílku 1 ti 23.
Más un bês 1 Samuel kapítlu 16 versílu 1 ti 23 .
Nton, Jeová fla Samuel:
Ti ki ténpu bu ta kontinua tristi pamodi Saul,
si dja N ka krê-l más pa el ser rei di Israel?
Intxi ólhu na un txifri i bu bai.
N sta manda-u na Jesé, kel belemita,
pamodi N skodje un di se fidjus pa ser rei.
Má Samuel fla:
Modi ki N ta bai?
Óras ki Saul da kónta di kel-li, el ta mata-m.
Jeová responde-l:
Leba un boi novu djuntu ku bo i fla:
‘N ben pa N oferese un sakrifisiu pa Jeová.’
Konvida Jesé pa sakrifisiu,
i dipôs N ta fla-u kuzê ki bu debe faze.
Bu debe skodje pa mi kel ki N mostra-u.
Samuel faze kel ki Jeová fla.
Kantu el txiga na Belen,
kes ansion di sidadi bai nkontra ku el ta treme di medu, i es fla:
Bu vizita é di pas?
El responde:
É di pas.
N ben pa N oferese un sakrifisiu pa Jeová.
Nhos santifika i nhos ben ku mi pa sakrifisiu.
Nton, el santifika Jesé ku se fidjus.
Dipôs, el txoma-s pa sakrifisiu.
Kantu es entra i Samuel odja Eliabi, el fla:
Ka ta fadja é própi kel-li ki Jeová skodje.
Má, Jeová fla Samuel:
Ka bu djobe pa kel ki el ta parse
nen pa se altura,
pamodi N ka skodje-l.
Pamodi Deus ka ta odja sima ómi ta odja;
ómi ta odja pa kel ki ta parse,
má Jeová ta odja korason.
Dipôs di kel-li, Jesé txoma Abinadabi,
el pô-l pasa dianti di Samuel, má el fla:
Kel-li tanbê Jeová ka skodje.
Dipôs, Jesé aprizenta Samá, má el fla:
Nen kel-li tanbê Jeová ka skodje.
Nton, Jesé poi 7 di ses fidju ta pasa dianti di Samuel,
má Samuel fla Jesé:
Jeová ka skodje ninhun di kes-li.
I Samuel pergunta Jesé:
Kes-li é tudu fidjus ki bu ten?
El responde:
Inda sta falta kel más pikinoti;
el sta ta kuida di ovelhas.
Nton, Samuel fla Jesé:
Manda txoma-l,
pamodi nu ka ta xinta pa nu kume timenti el ka txiga.
El manda txoma-l i el ben.
El éra burmedju,
el tinha odju bunitu
i se róstu tanbê éra bunitu.
Nton Jeová fla:
Labanta,
é kel-li!
Bu debe skodje-l.
Samuel panha kel txifri ku ólhu
i el pô-l olhu na kabésa dianti di se irmons.
Désdi kel dia, spritu di Jeová da Davidi puder.
Dipôs, Samuel, volta pa Ramá.
Spritu di Jeová dja saíba di Saul,
i un spritu mau ki ben di Jeová, bira ta tormenta-l.
Kes sérvu di Saul fla-l:
Un spritu mau di Deus sta ta tormenta nho.
Favor, manda kes sérvu di nho ki sta li,
pa djobe un ómi ki é bon na toka arpa.
Óras ki kel spritu mau di Deus ben riba nho, el ta toka,
i nhu ta xinti midjór.
Nton, Saul fla se sérvus:
Favor, nhos djobe, un ómi ki ta toka dretu
i nhos traze-m el.
Un di kes ajudanti fla:
N kustuma odja un di kes fidju di Jesé, kel belemita, ta toka,
i el é bon na toka arpa
i el é un trópa korajozu i balenti.
El ta pâpia ben, el é bunitu i Jeová sta ku el.
Saul manda mensajerus na Jesé pa fla-l:
Manda-m kel bu fidju Davidi, ki ta sta ku ribanhu.
Nton, djuntu ku se fidju Davidi,
Jesé manda Saul un buru karegadu di pon,
un barkinu di vinhu i un kabritu.
Davidi bai ti na Saul i el kumesa ta sirbi-l.
Saul bira ta gosta txeu di el,
i el bira se skuderu.
Saul manda fla Jesé:
Favor, dexa Davidi fika ta sirbi-m,
pamodi N sta kontenti ku el.
Óras ki un spritu mau di Deus binha riba Saul,
Davidi ta panhaba arpa i el ta tokaba
i Saul ta fikaba kalmu i el ta xintiba dretu,
i kel spritu mau ta saíba di el.
Bu konsigi odja Davidi,
se pai i tudu se irmons dianti di proféta Samuel?
Dipôs Jeová mostra ma éra Davidi ki ta sérba rei
i el manda Samuel pa skodje-l.
Má, Saul inda staba ta governa
i pesoas inda ta odjaba el kómu rei di Israel.
Di sertéza, kel-li éra un ténpu ki Davidi mesteba di koraji.
Pensa na kel-li,
modi ki Saul ta reajiba
óras ki el daba kónta ma Davidi skodjedu pa ser rei?
É klaru ki Saul ta krê mataba el.
Nton, imajina modi ki Davidi xinti
kantu el konvidadu pa sirbi na kaza di Saul
i ser se ajudanti!
Di sertéza el fika txeu preokupadu.
I nos oji?
Nu pode fika txeu preokupadu pamodi prublémas na família,
prublémas di saúdi,
falta di dinheru,
pamodi nu sta pirsigidu ô pamodi nos tendénsia di faze kuzas mariadu.
Má, nu ka debe dexa kes prubléma li prujudika nos sirvisu
i nos amizadi ku Jeová.
Si nu sta pasa pa alguns di kes prubléma li,
nu debe buska ajuda di Jeová na orason,
na se Palavra i na kongregason.
Asi, nu ta sabe modi ki nu ta lida ku kes prubléma.
Sikrê kes prubléma ka kaba,
nu debe faze nos midjór
i mante okupadu na faze vontadi di Jeová.
Kel-li ki é koraji di verdadi!
Kantu Davidi txomadu, pa el bai na Saul,
el ka dexa medu toma kónta di el.
El mostra koraji i el bai!
El seta se diziginason,
pamodi el sabia ma Jeová podia djudaba el faze se trabadju.
Kel-li poi Saul ta kumesa ta gosta txeu di Davidi
i Saul skodje-l pa el ser se skuderu.
Favor, obi leitura dramatizadu di 1 Samuel 17:1 ti 51.
É kel otu kapítlu.
1 Samuel kapítlu 17 i el ta kumesa na versíklu 1.
Kel-li é un stória ki ta mexe txeu ku nos!
El ta mostra modi ki Davidi aji ku sabedoria
i modi ki el mostra koraji.
I kes filisteu djunta ses trópa pa géra.
Es djunta na Sokó, ki ta faze párti di Judá,
i es arma kanpamentu entri Sokó i Azeka, na Efis-Damin.
Saul i kes ómi di Israel djunta i es arma kanpamentu na vali di Elá,
i es fika priparadu pa géra pa es nfrenta filisteus.
Kes filisteu fika na un ladu di monti
i kes israelita fika na kel otu ladu di monti.
I kel vali staba na ses meiu.
Nton, un ómi kanpion di géra sai di akanpamentu di filisteus.
Se nómi éra Gulias,
el éra di Gati
i el tinha kuazi três métru di altura.
El ta uzaba un kapaseti di kóbri
i el ta bistiba un koleti di féru.
Kel koleti di féru ta pezaba uns 57 kilu.
El ta uzaba kaneleras di kóbri
i el ta karegaba un lansa di kóbri na kósta.
Kabu di madera di se lansa éra sima silindru di tesedor,
i lámina di féru di se lansa ta pezaba kuazi 7 kilu.
I se skuderu ta baba se frenti.
Nton, Gulias para i el grita pa trópas di Israel:
Pamodi ki nhos sta ta fika priparadu pa géra?
Ami é ka filisteu
i nhos é ka sérvus di Saul?
Nhos skodje un di nhos ómi i nhos dexa-l ben luta ku mi.
Si el konsigi luta kóntra mi
i el mata-m, nu ta bira nhos skravu.
Má si N ganha i N mata-l,
nhos ta bira nos skravus i nhos ta sirbi-nu.
Kel filisteu torna fla:
Oji N sta ta dizâfia trópas di Israel.
Nhos manda un ómi pa luta ku mi!
Kantu Saul i tudu trópas di Israel obi kes palavra di kel filisteu,
es fika ku txeu medu, ki toma kónta di es.
Davidi éra fidju di un efratita di Belen na Judá,
ki txomaba Jesé,
ki tinha 8 fidju i na ténpu di Saul dja el staba di idadi.
Kes três fidju más bédju di Jesé,
dja baba géra djuntu ku Saul.
Nómi di se três fidju éra Eliabi kel primeru,
Abinadabi kel sugundu i Samá kel tirseru.
Davidi éra kel más novu;
kes três más bédju dja baba djuntu ku Saul.
Davidi ta baba na Saul
i el ta voltaba pa kuida di ovelhas di se pai na Belen.
I duránti 40 dia, di sédu i na bóka noti,
kel filisteu ta txigaba pértu i el ta tomaba se puzison.
Un dia, Jesé fla Davidi, se fidju:
Favor, toma es éfa di serial toradu ku kes 10 pon
i bai faxi bu leba bus irmon ki sta na kanpamentu.
I leba es 10 keju pa kel xéfi di 1000.
Tanbê, odja modi ki bus irmon sta
i traze algun próva ki ta mostra-m ma es sta dretu.
Es staba djuntu ku Saul
i ku tudu kes ómi di Israel na vali di Elá,
ta luta kóntra kes filisteu.
Davidi labanta sédu palmanhan
i el dexa algen ta kuida di ovelhas.
El pripara kes kumida sima Jesé dja mandaba el.
Kantu ki el txiga na kanpamentu,
kes trópa staba ta sai pa lugar di géra,
i es da un gritu di géra.
Israel i kes filisteu fika na puzison di géra, frenti-frenti.
Kel óra, Davidi dexa bagaji pa guarda di bagaji toma kónta di el
i el kóre ti linha di géra.
Kantu el txiga, el pergunta se irmons si es staba dretu.
Timenti el staba ta pâpia ku es,
Gulias, ki éra un filisteu di Gati, kanpion di géra,
sai di linha di géra di filisteus
i el ripiti kes palavra ki dja el flaba antis,
i Davidi obi-l.
Kantu ki es odja kel ómi,
tudu kes israelita fika xeiu di medu i es fuji.
Kes ómi di Israel staba ta fla:
Nhos sta ta odja kel ómi ki sta ta sai?
El sta ta dizâfia Israel.
Kel ómi ki mata-l, rei ta da-l txeu rikéza
i tanbê se própi fidju-fémia,
i el ta fika livri di obrigasons di kaza di se pai na Israel.
Davidi pergunta kes ómi ki staba pértu di el:
Kuzê ki ta dadu pa kel ómi ki mata kel filisteu
i kaba ku vergónha di Israel?
Má, kenha ki é kel filisteu li ki é ka sirkunsidadu,
pa dizâfia trópas di kel Deus bibu?
Nton, es fla-l kel mésmu kuza ki dja es flaba el antis:
É kel-li ki ta dadu pa kel ómi ki mata-l.
Kantu ki Eliabi, se irmon más bédju, obi-l ta pâpia ku kes ómi,
el fika xatiadu ku Davidi i el pergunta-l:
Pamodi ki bu ben li?
I ku kenha ki bu dexa kes poku ovelha na dizértu?
N konxe dretu bu orgulhu
i intenson mariadu di bu korason;
bu ben li sô pa bu ben odja géra.
Davidi responde-l:
Kuzê ki N faze di es bês?
É sô un pergunta ki N faze!
Dipôs di kel-li, el bai na kes otu,
el pergunta-s mésmu kuza i es da-l kel mésmu respósta.
Alguns algen obi palavras di Davidi i es ba konta Saul.
Pur isu, Saul manda txoma-l.
Davidi fla Saul:
Ningen ka debe fika dizanimadu pamodi kel filisteu.
Bu sérvu ta bai luta ku el.
Má, Saul fla Davidi:
Abo, bu ka pode luta ku kel filisteu,
pamodi abo é un rapazinhu inda,
i el é trópa désdi se juventudi.
Davidi fla Saul:
Nha sinhor, ami é pastor di ribanhu di nha pai.
Kantu ben un lion i tanbê un ursu i el pega un ovelha na ribanhu,
N bai se tras i N ataka-l,
N salva kel ovelha di se bóka.
Kantu ki el ben pa mi, N pega-l na piskós,
N da-l pankada i N mata-l.
Sérvu di nho dja mata un lion i un ursu,
i el ta faze mésmu kuza ku kel filisteu ki ka é sirkunsidadu,
pamodi el dizâfia trópas di kel Deus bibu.
I tanbê Davidi fla:
Jeová ki libra-m di mô di lion i di ursu,
tanbê é el ki ta libra-m di mô di es filisteu.
Nton, Saul fla Davidi:
Bai, Jeová ta sta ku bo.
Nton, Saul bisti Davidi se ropa di géra.
El pô-l un kapaseti di kóbri na kabésa
i el pô-l un koleti di féru.
Davidi prende spada riba ropa i el tenta anda,
má el ka konsigi pamodi el ka staba kustumadu ku tudu kes kuza.
Davidi fla Saul:
N ka ta konsigi anda ku kes kuza li
pamodi N ka ten ábitu di uza-s.
Nton Davidi tra-s.
El panha se pó, el skodje sinku pédra lizu di riu
i el pô-s na bolsu di se saku di pastor.
Dipôs, el ba ta txiga pértu di filisteu ku se funda na mô.
Kel filisteu ba ta txiga kada bês más pértu di Davidi,
i se skuderu staba ta bai se frenti.
Kantu kel filisteu odja ma Davidi éra jóven inda, burmedju i bunitu,
el dispreza-l i el faze-l trósa.
Kel filisteu fla Davidi:
Bu pensa ma mi é algun katxor
ki bu ta ben da-m ku pó?
Nton kel filisteu pidi Davidi praga na nómi di se deus.
El fla Davidi:
Ben ti ki bu txiga na mi,
N ta da pasus na séu ku animal brabu bu karni pa es kume.
Davidi responde kel filisteu:
Bu sta ben kóntra mi ku spada, lansa i dardu,
má ami N sta bai kóntra bo na nómi di Jeová di izérsitus,
kel Deus di trópas di Israel,
kel ki bu dizâfia.
Oji mê, Jeová ta ntrega-u na nha mô;
N ta mata-u i N ta korta-u kabésa.
I oji N ta da pasus na séu ku animal brabus na téra,
korpu di trópas di filisteus.
Asi, algen di tudu téra ta fika ta sabe ma ten un Deus na Israel.
I tudu algen ki sta li djuntadu ta fika ta sabe
ma é ka ku spada nen ku lansa ki Jeová ta salva,
pamodi géra é di Jeová,
i el ta ntrega nhos tudu na nos mô.
Nton, kel filisteu ba ta txiga kada bês más pértu pa nfrenta Davidi.
Davidi tanbê kóre pa linha di géra, pa el nfrenta kel filisteu.
Davidi mete mô na saku, el panha un pédra i el da ku funda.
Kel pédra panha kel filisteu, entra-l déntu tésta, i el kai na txon di róstu.
Nton, Davidi ganha kel filisteu géra ku un funda i un pédra.
Davidi da kel filisteu na txon i el mata-l,
nbóra el ka tinha spada na mô.
Davidi kóre i el fika sakédu riba di kel filisteu.
El tra kel filisteu se spada ki el tinha na ladu
i pa kaba di mata-l,
el korta-l kabésa.
Kantu kes filisteu odja ma ses trópa balenti dja moreba,
es fuji.
Stória di Davidi ku Gulias é un lison di koraji.
Má tanbê, el ta inxina-nu modi ki nu ta mostra sabedoria i fé.
Davidi staba ta trabadja
kantu se pai pidi-l pa el leba kumida pa se irmons ki staba na géra.
Nton, Davidi tinha ki fazeba dôs kuza omésmu ténpu.
Modi ki el ta tomaba kónta di ovelhas di se família
i leba kumida pa ses irmon ki staba lonji?
El mostra sabedoria.
Tanbê el mostra ma el éra un algen di kunfiansa.
Bíblia ta fla:
‘Davidi labanta sédu palmanhan
i el dexa algen ta kuida di ovelhas.
El pripara kes kumida sima Jesé dja mandaba el.’
Lógu dipôs, kontise un kuza ki el podia fikaba ku txeu medu.
Davidi ba djobe se irmons
i el atxa trópas di Israel ku txeu medu,
pamodi tamanhu di Gulias i se amiasas.
Kuza ki Davidi faze kel óra,
mostra ma el tinha koraji.
El pergunta pamodi ki ningen inda ka kaba ku kel ómi orgulhozu
ki sta ta pâpia mal di Jeová.
Má se irmon Eliabi txoma-l atenson na meiu di tudu algen
i el fla ma el tinha mau intenson.
El txoma-l di orgulhozu
i el fla-l ma el bandona ribanhu di ses pai.
Simé, Davidi oferese pa luta ku Gulias, má nen es ka liga-l.
Saul fla Davidi ma el ka ta konsigi ganha Gulias
pamodi inda el éra ‘un rapazinhu’!
Kuzê ki Davidi faze na kel situason li?
El mostra koraji.
Kel koraji da-l forsa ki el mesteba pa el aji.
El lenbra di kuzê ki Jeová dja fazeba pa el.
Davidi nunka ka skese modi ki Jeová libra-l di un ursu i di un lion.
Kes dôs animal li, ten más forsa i es ta kóre más faxi di ki un algen.
Jeová tanbê djuda-l mata kes dôs animal runhu.
Pur isu, Davidi podia flaba ku kunfiansa:
‘Jeová ki libra-m di mô di lion i di ursu,
tanbê el ta libra-m di mô di es filisteu.’
Óras ki nu sta txeu tristi ô dizanimadu,
é bon nu pensa na maneras ki Jeová dja djuda-nu lida ku prublémas
ki ta parseba ma ka tinha soluson.
Davidi foi korajozu i el aji.
El toma bons disizon ki da bons rezultadu.
Pur izénplu, Davidi tenta bisti kel ropa di géra pizadu ki Saul oferese-l.
Má, lógu el da kónta
ma kel kapaseti di kóbri,
kel koleti di féru i kel spada, ka ta djudaba el.
Nton kuzê ki el faze?
El tra tudu kes kuza i el bai sen ninhun pézu.
I nos?
Talvês sima ténpu ta ba ta pasa,
nu pode djunta txeu kuza i faze alguns atividadi ki ka é inportanti.
Kes kuza li pode distrai-nu di sirbi Jeová.
Si kel-li sta kontise ku bo,
pamodi ki bu ka ta faze algun kuza?
Faze un lista di tudu kes kuza ki bu ten,
bus ábitu i tra tudu kes kuza ki sta trapadja-u.
Óras ki nu ta bira nos vida más sinplis,
é más faxi nu mante konsentradu na nos sirvisu pa Jeová.
Davidi éra inperfetu sima nos tudu.
Má se koraji i disizon ki el toma,
pô-l ta ser un grandi amigu di Jeová.
Pur isu, na fin di se vida,
Davidi podia flaba se fidju:
‘Ten koraji i ser fórti, i kumesa trabadju.’

‘Ten koraji, ten forsa i kumesa trabadju’!