JW subtitle extractor

Man̈ano mbalatsara anaro rahalahy ndreky anabavy!
Efa tsy ela hanomboko zioty lamoziky video fampidiran̈a.
Izikoa anaro fa mizaha izio,
aleva onon̈o tsarabe
Nan̈ino fiezahantsika tsy mivadika amy zioty
hahavy atsika ho ravoravo mare aminy hoavy?
Izikoa anao nitondra telefony na fitaovan̈a elektroniky hafa, azafady!
Ataova raha hahavy izio
baka tsy hanabataba olo hafa.
Zioty, areha lamoziky video fampidiran̈a.
Tonga soa ndraiky amy fizaran̈a amy fivoriambentsika “Miravoravoa fo.”! ty.
Fizaran̈a ty niny Dimansy maraindrain̈y amy programo ampelatan̈anaro an̈y.
Andiniteny ioren̈any programo niany Salamo 37:4
Ho izy: “Miravoravoa amy Jehovah,
fa amiany anao edy raha iriny fonao.”
Asainay anaro zioty hitsangan̈a atsika hiaraka han̈ano Hira 22.
Titranany:
“Efa Mitondra Ilay Fanjakana”
Koa fa vita hira io mety ajanon̈onaro hely
han̈anovanaro vavaka fanokafan̈a aminaro an̈y.
Hira 22:
Mety mipetraka anaro.
Atsika ma mbala ho afaka ho ravoravo fo
ndray tojy fitsapan̈a sarotro mare.
Baiboly man̈amia toky fa
atsika mbala afaka fo
Kabaro mifampitohy misy fizaran̈a fito ty
han̈azava amintsika akory an̈ampiany Jehovah atsika havita zen̈y.
Iro pan̈ano kabaro aby io fo hampiditry olo handimby iro.
Hanombohan̈a izy
Alo atsika hitandren̈y Rahalahy Kenneth Flodin,
Pan̈ampy amy komitiny fampianaran̈a.
Izy han̈ano tapany voanalohany aminany ty.
Titranany: “Atsika Afaka Ho Ravoravo Fo
Ndray... Mijaly”
Asa niremarikenaro fa
isaka titra kabaro amy kabaro mifampitohy ty,
mampiasa volan̈a “ndray”?
Volan̈a “ndray” io man̈aboaka fa
tsisy raha mahasakana izy raha araiky,
tsy voabada.
Dikanizen̈y,
tsisy raha mahasakana atsika tsy ho ravoravo.
Atsika afaka ny ho ravoravo ndray misy fitsapan̈a.
Karaha raha tsy ho posibla ndraiky zen̈y, tsy marin̈y?
Zaho koa fa mandiniky olo ravoravo zen̈y
matetiky olo mahazo kado raha avy an̈aty jerinaka,
fa tsy fitsapan̈a.
Ary ten̈a marin̈y zen̈y.
Afaka ho ravoravo fo atsika
ndray misy fitsapan̈a
nohony kadoa amiany Jehovah atsika.
Handeha handiniky aroe na telo atsika
amy kabaro mifampitohy ty:
fifandraisantsika amy Jehovah,
iro rahalahintsika aby io,
ndreky fan̈antinan̈antsika be voninahitry aminy hoavy.
Biafa amy Romanina 5:3-5 ao baka azafady Baibolinaro,
zahava aminy andininy aby io kado voanalohany amiany Jehovah atsika,
fifandraisantsika amy Jehovah io.
Romanina 5:3-5 mivolan̈a:
‘Ary tsy zen̈y fo,
fa alo atsika hiravoravo an̈atiny fahorian̈a,
fotony haintsika fa
fahorian̈a mitondra fiaretan̈a,
fiaretan̈a ndraiky mitondra fankasitrahany Zan̈ahary.’
Hitanaro, koran̈iny iô,
“fankasitrahany Zan̈ahary.”
Hoizy koa: ‘Fankasitrahany Zan̈ahary ndraiky
mitondra fan̈antinan̈a,
avio fan̈antinan̈a tsy mba mitondra fahadisoampan̈antinan̈a.’
Nan̈ino atsika tsy ho diso fan̈antinan̈a?
Nohony fifandraisan̈a amy Jehovah.
Volan̈iny: ‘Fotony fitiavan̈a Zan̈ahary
efa naidin̈y ampontsika ao
baka tamy fan̈ahy masin̈y, namian̈a atsika.’
Ke izikoa fa miaritry fitsapan̈a atsika,
atsika afaka mahazo fankasitrahany Jehovah,
zen̈y han̈ampy atsika ho ravoravo
ndray misy raha sarotro.
Zahava koa baka Romanina 8:38, 39.
Haintsika fa fitsapan̈a nahazo Paoly nifandimbindimby,
fa izy mbala resy lahatra fo fa
tsisy fitsapan̈a afaka mampisaraka izy amy Jehovah,
afaka mampisaraka izy amy fitiavany Zan̈ahary,
fifandraisan̈a maharitry mare.
Romanina 8:38, 39 mivolan̈a:
‘Fa matoky zaho
fa na fahafatesan̈a,
na fiain̈ana,
na anjely,
na fitondrampanjakan̈a,
na raha zioty, na raha ho avy,
na angovo, na an̈abo, na ambany,
[ izy avio nivolan̈a]
na zavaboary hafa,
tsisy hahasaraka atsika amy fitiavany Zan̈ahary,
aboaka baka amy Kristy Jesosy Tompontsika.’
Man̈ampy atsika hiatriky fitsapan̈a
fifandraisan̈a tsara anan̈antsika amy Zan̈ahary.
Fa karakory momba lay kado faharoe amiany Jehovah?
1 Petera 5:9,
Satana mifen̈y mampiasa fitsapan̈a
han̈akivian̈a atsika,
fa aleva onon̈o torohevitry aminy andininy faha 9 ty.
Hoizy:
“Anaro aza man̈eky,
finoan̈anaro ataova fatatra fo.”
Ke ino han̈ampy?
Volan̈iny:
“Fotony hainaro tsarabe fa
tsy anaro zaraiky mijaly [fitsapan̈a zen̈y]
karaha io fa
rahalahinaro amy tany jiaby koa.”
Tsapantsika fa
ten̈a man̈ampy atsika ankitin̈y iro rahalahintsika aby io,
hitantsika tsarabe raha zen̈y tan̈aty tsiota fanjava farany zay.
Masontsika foeky nahita zen̈y.
Koran̈iny Romanina 12:12 kado fahatelo amiany Jehovah.
Raha han̈ampian̈a atsika hiaritry fitsapan̈a.
Romanina 12:12,
mazava tsara fomba ikoran̈any zio.
Hoizy:
“Miravoravoa amy fan̈antinan̈a.”
Ty koa tohiny:
“Miareta fahorian̈a.
Mahareta amy vavaka.”
Ke fifandraisantsika amy Jehovah,
iro rahalahintsika aby io,
ndreky fan̈antinan̈antsika
han̈ampy atsika hahay hiatriky fitsapan̈a mahazo atsika,
baka io mety arakaraka zay raha misy.
Ty baka ohatra araiky,
rahalahy araiky amy prizon zioty
mety tsy afaka hifandray amindro rahalahy aby io.
Ke ino fo han̈ampy izy?
Ke, izikoa zen̈y,
tsy maintsy fifandraisany amy Jehovah foeky.
Mety tsaroanao zioty Rahalahy Harold King
tamy Tele JW in̈y.
Tan̈aty 4 taon̈o sy tapany,
izy nigadra manokan̈a tamy prizon ta Chine tan̈y.
Fa latsatokan̈a ankitin̈y ma izy?
Zen̈y raha tan̈aty jerindro manampahifan̈a aby io,
kanefa ten̈a tsara namany,
marikitry izy tio fo Jehovah.
Karaha ty hoizy tamy video in̈y:
“Nifandray tsarabe tamy Jehovah zaho.
Ten̈a tiako izy.
Ten̈a misy koa izy fa tsy raha nofinofy fo.”
Ia, ke ndray tio fitsapan̈a nahazo Rahalahy King
niravoravo fo izy
fotony ten̈a nifandray tsarabe tamy Jehovah Zan̈aharinany.
Ohatra hafa koa:
mety ho sarotro mare amy rahalahy na ranabavy kivy
hifandray fo amy Jehovah zen̈y.
Fa misy kado hafa baka amy Jehovah
han̈ampian̈a izy amy zen̈y.
Mety ho hisy zioty rahalahy araiky
na maromaro von̈ono fo hanohan̈a izy.
Raha zen̈y mira olo araiky sempotro
miady mare baka hahazo fahin̈ana.
Izy mbala velon̈o fa
izy fo miady mare vo mahazo fahin̈ana.
Fa baka io amy zay
izy ampiany dokotera maromaro,
ke izy komansy mahay mihatsara fo,
loso mahazo fahin̈ana tsara.
Iro rahalahintsika aby io
afaka man̈ampy atsika
ndreky afaka manohan̈a atsika
izikoa atsika fa kivy
na sendra fitsapan̈a sarotro mare.
Nan̈ino ma afaka man̈ampy atsika fan̈antinan̈antsika io
koa fa misy fitsapan̈a?
Ohatra zioty,
misy amintsika manan̈a raimandreny efa matoe
ndreky efa tsy mahavitra raha maro karaha taloha,
ke miteraka fitsapan̈a amintsika.
Azo ampiran̈iny aminolo tatrany aksidan raha zen̈y,
ke izy tsy maintsy tafiditry lopitaly.
Sady tsy mahakarakara ain̈inany.
Fa dokotera koa fa navy,
izy nivolan̈a:
“Anao ho janga fo.”
Miteraka fan̈antinan̈a zen̈y.
Mitovy amy zen̈y koa amy raimandrenintsika efa matoe aby io
fotony azo antoko fan̈antinan̈antsika aminy hoavy.
Jehovah mira mivolan̈a karaha ty,
‘Ho salama tsara,
ho afaka aminy hirifiriny hatoezan̈a io izy.’
Ten̈a man̈ampy atsika ho ravoravo fan̈antinan̈a io.
Na ino raha mandalo na fitsapan̈a,
afaka man̈ampy atsika baka ho ravoravo fo,
araiky na maromaro amindro raha amian̈a atsika aby io.
Alo baka zahavantsika Romanina toko faha-8,
Romanina toko faha-8,
hivakintsika aminy andininy 35 ndreky 37.
Amy kabaro mifampitohy ty,
hidinihintsika tsiaraikiaraiky
iro fitsapan̈a fito koran̈iny andininy 35.
Alo zahantsika miaraka iro io.
Romanina 8:35 mivolan̈a:
‘Ino hampisaraka atsika amy fitiavany Kristy?
Voanalohany fahorian̈a sa
faharoe fijalian̈a, sa
fan̈injehan̈a sa, mosary sa,
tsisy lamba, sa faharatsian̈a, sa sabatra?’
Misy fito aby iro io,
fa zahava andininy 37.
Volan̈iny:
‘Mifanohitry amy zen̈y,
fa amy raha jiaby zen̈y [amindro jiaby fito io]
atsika tafiboaka ho pandresy tanteraka,
baka aminy araiky tia atsika.’
Isaka kabaro amy kabaro mifampitohy ty
han̈aboaka videony rahalahy na ranabavy tojy fitsapan̈a,
araiky sarotro mare.
Ndreky hizahavantsika
ino tamindro kado aby in̈y
nan̈ampy iro baka ho ravoravo
ndray tio fahorian̈a io.
Alo hizavantsika araiky voanalohany nikoran̈iny Paoly,
izio nikahin̈a fahorian̈a.
Fijalian̈a vokatra raha sarotro andalovan̈a
tiany hikoran̈iny amy fahorian̈a io.
Mety ho tehotehoko vokatrany aretin̈y zen̈y.
Alo baka hizahavantsika
2 Korintianina toko faha 12,
2 Korintianina toko faha 12,
aminy andininy 7 ndreky 8.
Misy raha araiky nanahiran̈a mare Paoly,
nampijaly mare,
ke fatsiky amy nofotronany nikahiany izio.
2 Korintianina 12:7, 8 mivolan̈a:
‘Ke baka tsy hahavy zaho hanjary han̈ambony ten̈a,
nasian̈a fatsiky amy nofotro zaho,
anjeliny Satana,
baka hamango zaho tsy mahaivita.
Amy zen̈y, zaho baka tsy hanjary han̈ambony ten̈a.
Intelo zaho niangavy Tompo amy raha zen̈y,
baka hialanizen̈y aminaka.’
‘Fatsiky amy nofotro’ hoizy,
ke raha zen̈y tsy maintsy aretin̈y amy vatan̈a,
sady izy nivolan̈a izio
‘mamango mare izy tsy mahaivita.
Ke tsy nety nijanon̈o.
Izio tsy mira lafilafievra na sery fo,
ke efa janga afaka herin̈iandra araiky.
Raha nitohy fo izio.
Izy tsy maintsy niady taminany io fo.
Koa zahan̈a Soratra Masin̈y,
maro olo mino fa
izio mety aretin̈y nahazo masonany,
ke nahaigravy fo.
Azo antoko fa
mety nampakivy mare Paoly zio.
Sady izy nivavaka intelo baka hialany izio.
‘Adosoa aminaka izy ty.’
Tsarova koa fa olo tamy zen̈y mbala tsy nanan̈a solomaso
han̈ampy iro hahita tsara.
Mbala tsisy dokotera afaka nandidy maso.
Ke tsy maintsy nila niady tamy zio fo izy.
Fa diniha baka ty:
Baka tamy fan̈ahy masin̈y,
impirimpiry i Paoly nafaka nampajanga olo narary.
Ke nety nora taminany nieritreritry:
‘Nan̈ino ma fan̈ahy masin̈y ndraiky tsy mampajanga zaho?
Zaho mila tahan̈a.’
Fa ino nan̈ampy Paoly ho ravoravo fo
ndray tio raha nampijaly izy?
Tsy maintsy fifandaisany marikitry tamy Jehovah.
Alo hivakintsika 2 Korintianina toko faha-12,
hivakintsika aminy andininy 9.
Karaha ty nivolan̈iny Jehovah tamy Paoly:
‘Anao tsy tahan̈a amy fomba mahagaga.’
Aminy andininy 9:
“Fa karaha ty ho izy taminaka:
‘Ampy anao hatsarampan̈ahy tsisy ambaka izy
aboakako aminao.
Anao koa malemy,
aminin̈y edy angovonaka miasa aminao amy fomba feno.’
Jehovah mivolan̈a,
‘Tsy tahan̈a anao,
fa zaho han̈amia anao angovo
hiaretanao fahorian̈a io.’
Aleva onon̈o baka
fifandraisan̈a tsara nanan̈any Paoly
tamy Jehovah
amy farany andininy io.
Izy nivolan̈a:
‘Ke sitrany zaho mirehareha amy fahalimian̈anaka,
baka hidoko aminaka karaha tran̈olay in̈y
angovony Kristy.’
Izy niravoravo taminy angovo namiany Jehovah.
Zahava baka andininy 10,
izy nivolan̈a:
“Ke ndray misy raha mampalemy zaho,
ndray tihitihinolo,
ndray lera zaho tsisy raha,
ndray an̈atiny fan̈injehan̈a
ndreky an̈atiny raha sarotro,
ravoravo fo zaho fotony niny Kristy an̈anovako izity.
Fa lera zaho malemy,
aminin̈y edy zaho matanjaka.”
Tianay zioty anaro hizaha video araiky,
man̈aboaka raha mampijaly iro rahalahy aby io.
Ino raha nan̈ampy rahalahy ty
ndreky vadiny ho ravoravo fo
ndray tojy fahorian̈a
karaha ataony aretin̈y araiky fatatra?
Tan̈atiny 45 taon̈o zay zaho nan̈ano pisava lalan̈a,
piandraikitry faritry
avio efa elaela zay za manompo amy Betela.
Salama tsara za taloha,
tsiary ndraiky nararirary zen̈y.
Tandraraiky,
nangan̈a lohanaka.
Nahainan̈adary fo.
Karaha tsy nahitahita aby masoko.
Nandeha tamy dokoterany Betela zahay,
avio nirahiny nandeha nizaha spesialisty.
Ke spesialisty io amy zay koa fa nizaha,
kanserany betro hoizy raha nahazo za in̈y,
glioblstome an̈arany.
Nididian̈a izy kamisinizin̈y.
Koa fa vita zin̈y,
sady natao scanner izy natao chimiothérapie.
Nididian̈a ndraiky koa izy taon̈o araiky tafaranizio.
Efa inefatrany zioty koa izy natao chimiothérapie.
Tamy somilany narariany io
ten̈a sarotro taminaka nahita izy tsy nahavita ten̈a eky
fa mila olo mikarakara fo.
Nidon̈ako baka tsao handrobaka fiarahan̈anay
ndreky fifandraisanay aminolo raha io.
Ten̈a nan̈ampy zahay iro piaramanompo aby io.
Rahalahy araiky zay koa fa nahay fa za handeha hididian̈a,
namakiany andininy araiky za,
baka io zahay nivavaka.
Tsy mety adin̈ako raha zen̈y.
Efa zen̈y edy raha nilaiko taminio.
Nankahery za mare koa madamonaka.
Izy man̈ampy zaho man̈oman̈a fivorian̈a
ndreky amy fanompoan̈a.
Ke zen̈y mahavy za mahavita mikoran̈a aminolo
ndreky mankahery iro.
Miasa amy Sampandraharahany Fanompoan̈a zaho izioty.
Misy rahalahy araiky na aroe
avy man̈ampy za amy birônaka ao.
Mamparavoravo za mare raha zen̈y.
Ravoravo mare zaho ndray hely fo raha mety vitako.
Loso tsy sarotro aminaka miatriky problemo io,
fotony izy ten̈a manetry ten̈a.
Fatatra finoan̈anaka,
avio zaho tsy voly hankafatatra izio fo
ndreky hanompo Jehovah fo firaka amy donia vaovao,
na ino na ino raha mandalo.
Hitantsika tio fa
nanan̈a fifandraisan̈a tsara tamy Jehovah i Scott ndreky Sara Shoffner.
Nanohan̈a tsara Scott fo Sara.
Fa asa hitanao,
ino koa kado hafa namiany Jehovah tio?
Nivolan̈iny Scott tio
iro rahalahintsika aby io ten̈a nan̈ampy mare iro koa.
Tsaroany zioty
nisy vavaka voafaritry tsara
ndreky andininteny nivakiny rahalahy araiky taminany
alohany handeha handidian̈a izy,
baka io nisy rahalahy tanora navy nandeha nan̈ampy izy
taminy andraikitrinany.
Izikoa amy volan̈a hafa
izy nivolan̈a fa
zen̈y nitondra “haravoan̈a mare” taminany,
ndray tio raha sarotro io.
Ke anao koa karakory?
Ino amindro kado amiany Jehovah aby io koa man̈ampy anao
ho ravoravo fo
ndray misy raha sarotro na fahorian̈a?
Fifandraisanao amy Jehovah?
Iro rahalahy aby io,
fan̈antinan̈anao,
sa mety kado hafa amiany Zan̈ahary?
Koa fa mahakivy anao jaly na fahorian̈a andalovanao,
aleva onon̈o ty:
Mizaha anao Jehovah
sady ten̈a mikarakara anao,
malahelo fonany mahita zen̈y.
Karaha mivolan̈a amintsika in̈y izy:
‘Kalma fo.
Mbala ho tsara fo anao io.’
Ke na karakory tehotehoko,
na karakory fahorian̈a,
anò atsika angala onon̈o fo
volan̈a amy Romanina 8:37, 39:
‘Mifanohitry amy zen̈y,
fa amy raha jiaby zen̈y atsika tafiboaka ho pandresy tanteraka,
baka aminy araiky tia atsika.’
Avio aminy andininy 39,
izio mivolan̈a fa
tsisy raha,
tsisy foeky,
tsisy fahorian̈a foeky
‘hahasaraka atsika amy fitiavany Zan̈ahary,
aboaka baka amy Kristy Jesosy Tompontsika.’
Miravoravo fo
ndray misy raha mampijaly.
Rahalahy Samuel Herd,
an̈isany Filankevipitantan̈ana
han̈ano fizaran̈a maran̈aka amy kabaro mifampitohy ty,
“Atsika Afaka ho Ravoravo Fo Ndray ...
Miasaloha.”
Efa nisy fotoan̈a ma anao
mba kivy
na niasaloha?
Izikoa anao mbala tsiary kivy,
anao tsy olombelon̈o,
fotony olo jiaby amy fiain̈ana fohiky anan̈antsika amy zioty io
miatriky raha mampiasaloha mampakivy aby.
Fa ino ma hakivian̈a zen̈y?
Misy mivolan̈a fa izio asaloha dila loatra.
Sasany ndraiky mivolan̈a fa izio alahelo.
Baka io misy vitsivitsy koa mivolan̈a
izio tehotehoko.
Ino aby raha hahavy olo
ho kivy?
Maro antony zen̈y.
Fa ty misy sasany amy zen̈y:
Ohatra maty vady.
Baka io faharoe man̈araka zen̈y
aretin̈y ndreky alahelo.
Misy koa olo very asa
ke miasa loha amy fomba hamiloman̈a fianakavian̈anany.
Misy koa olo kivy
fotony tsy afaka mandray anjara maro be karaha itiavany izy
amy fitorian̈a vaovao tsara momba Fanjakan̈a io.
Ten̈a miteraka hakivian̈a amintsika raha aby zen̈y.
Fa tsy raha aby zen̈y fo miteraka hakivian̈a
fa maro koa raha mety hahavy olo ho kivy.
Mba karakory eky?
Ino zioty ohatra
raha tsapanao izikoa anao fa kivy?
Anao ma malahelo?
Karaha zen̈y ma raha tsapanao?
Sa anao koa miasaloha?
Misy mivolan̈a fa
karaha zen̈y raha tsapany.
Sasany koa mivolan̈a fa
manjary tsy ravoravo na ketraka.
Avio
tsisy angovo handeha han̈anovan̈a raha foeky iro.
Sasany koa mivolan̈a fa
iro tsy tihiaroharo aminolo sady mitomoan̈y fo.
Ia, matetiky karaha zen̈y fo raha tsapanolo
izikoa fa kivy.
Fa
afaka ny ho ravoravo fo ma atsika
ndray miasaloha nohony hakivian̈a?
Hitansika fa
misy ohatra momba zen̈y amy Baiboly ao.
Maro ohatra momba zen̈y amy Baiboly ao.
Hikoran̈a araiky
na aroe amy amindro io atsika.
Niravoravo fo ohatra apostoly Paoly
ndray nisy raha nampakivy izy.
Afaka niravoravo fo izy
ndray zen̈y raha tsapany.
Biafa amy 2 Korintianina ao baka
Baibolinaro azafady ,
hivakintsika amy 2 Korintianina 7:5.
Karaha ty koran̈iny ao:
‘Koa fa navy ta Makedonia teto zahay,
ain̈inay tsisy fangalan̈a kajo foeky,
fa mbala nampijalin̈y tamy lafiny jiaby fo zahay:
[aleva onon̈o ty]
Nisy ady tambelany,
avio tahotro tan̈atiny.’
“Nisy ady tambelany,
avio tahotro tan̈atiny.”
Niatriky raha sarotro apostoly Paoly,
hainy raha zen̈y,
fa tsy nahavy izy tsy ho ravoravo zen̈y.
Fa nan̈ino ma ten̈a mafy taminany raha nahazo izy io?
Nan̈anten̈a hahita Titosy ta Troasy tan̈y izy talohany zen̈y.
Fa izy baka tio tsy mba naharen̈y vaovao tamy Titosy.
Azo antoko fa izy niasaloha taminany.
Niasaloha izy
tsao fo nisy raha nahazo Titosy.
Izy niasaloha
tsao fo mety nanan̈a problemo
tamy rahalahy tamy fiangonan̈a ta Korinto tan̈y
Titosy.
Ke tihahay tsarabe momba zen̈y izy.
Nampiasaloha izy momba namany io.
Ndray atsika koa
mety ho karaha zen̈y
izikoa ohatra
fa niambin̈y vaovao baka amy namantsika
kanefa tsy namaly izy.
Nampiasaloha mare
sady nampijaly sain̈y Paoly zen̈y.
Nieritreritry izy fa
ela loatra niambesany Titosy,
namany io.
Fa hely tavela iro hifankahita.
Tamy farany,
iro nifankahita ta Makedonia tao.
Ke ino raha nisy?
Izikoa fa ren̈iny fa
ten̈a nandray torohevitry namiany,
iro rahalahy ndreky ranabavy ta Korinto tan̈y,
ten̈a ravoravo izy,
izikoa zahan̈a raha volan̈iny 2 Korintianina toko faha-7,
hitanaro zen̈y amy andininy faha 6 ndreky 7.
Nan̈ampy izy iro rahalahy aby io.
Afaka mahazo fan̈ampian̈a
baka amindro rahalahy ndreky ranabavy aby io koa atsika.
Afaka man̈ampy atsika iro,
iro rahalahy ndreky ranabavy namiany Jehovah atsika aby io.
Ho hitantsika fa
iro ho iô fo,
sady hanohan̈a atsika
izikoa fa misy raha sarotro andalovantsika,
amy zen̈y atsika ho ravoravo.
Kanefa mety hisy fotoan̈a koa atsika ho ketraka na ho kivy
nohony raha misy amintsika.
Aminy ankapobeny mety hiboaka raha zen̈y ndraikindraiky.
Maro be baka raha miboaka mety hahavy zen̈y.
Ty baka misy raha sasany amy zen̈y:
alahelo fotony naty olo araiky tianten̈a,
ohatra mety vady.
Fa tan̈aty taon̈o maromaro
niaraka niain̈y anaro
sady nofotro araiky fo koa anaro roe,
karaha nikoran̈iny Jehovah
tamy zaridainy Edena in̈y.
Fa raha nisy koa fa nandeha fotoan̈a
naty vadinao tianao io,
namanao be io.
Ke ten̈a nahavy anao ho ketraka mare zen̈y.
Malahelo mare
sady mangirifiry mare aminao koa.
Fa karaha ty,
alo alaintsika onon̈o ndraiky
iro raha telo man̈ampy atsika
baka ho ravoravo fo in̈y,
ndray misy raha sarotro atrefintsika amy fiain̈ana.
Ino aby iro in̈y?
Araiky voanalohany amy zin̈y,
fifandraisantsika amy Jehovah.
Nanan̈a fifandraisan̈a tsara tamy Jehovah Davida.
Avadia amy 1 Samoela toko faha 30 ao baka Baibolinaro,
areha fa ho fintin̈inko iro andininy aroe,
telo na efatra voanalohany amizio.
Alo atombokontsika aminy andininy 1,
amy 1 Samoela toko faha-30.
Izikoa fa nirondro Amalekita aby io tanàna
ndreky nangala vadindro ndreky zanakandro,
an̈isany zen̈y vadiny Davida,
nitady hamono Davida iro lelahy niaraka taminany aby io
nohony amy vady ndreky zanakandro.
Ke ten̈a kivy mare Davida,
izikoa zahavanaro fitantaran̈a io.
Fa karaha ty koran̈iny amy tapany farany aminy andininy 6:
“Ke nankahery ten̈a
baka tamy Jehovah Zan̈aharinany foeky Davida.”
Zen̈y koa han̈ampy atsika
tsy ho ketraka mare koa.
Izikoa milampy amy Jehovah atsika,
izy iô fo han̈ampy atsika,
ke izy hankahery atsika.
Izy baka Zan̈ahariny fankahirezan̈a,
zen̈y baka raha koran̈iny Volan̈anany,
Baiboly io.
Ke raha voanalohany man̈ampy atsika:
fifandraisantsika aminany.
Ty koa araiky faharoe:
Iro rahalahintsika aby io.
Ten̈a mankahery atsika iro rahalahy aby io!
Aleva onon̈o Salamo faha-133,
karaha ty raha koran̈iny amy voanalohany ao
“Farandraha tsara ndreky pare eky
izikoa olo pirahalahy mahay miaraka miain̈y sady miray sain̈y!”
Haintsika tsarabe fa ten̈a marin̈y zen̈y.
Fa ty koa haintsika:
Ataony Satana raha ampigadra atsika
hahavy atsika tsy hiaraka amy piaramanompo aby io.
Fa ndray miboaka zen̈y,
ke migadra marin̈y atsika,
mbala afaka miaraka amindro fo atsika.
Ke karakory hataontsika
izikoa fa azony fandriky zen̈y atsika
sady iro rahalahintsika aby io
tsy ankilantsika iô nohony atsika migadra?
Karaha ty:
man̈ampy atsika raha tsara tsaroantsika.
Aleva kahie fandraisanao antsoratra,
ndreky raha fasianao sary,
amy lohanao ao.
Zen̈y ndraiky tsy arabakiteny fa an̈aty lohanao ao.
Fitadidian̈a an̈aty betrontsika ao.
Ino aby ma zen̈y?
An̈isany zen̈y zioty
fotoan̈a niarahantsika niaraka tamindro rahalahy ndreky ranabavy aby io.
Mimenimeny raha tsara aby zen̈y,
mankahery sady mahavy atsika ho ravoravo.
Matetiky man̈ano raha karaha zen̈y
iro olo efa be taon̈o mitovy taon̈o aminaka aby io.
Efa tsy dia afaka man̈ano raha maro eky atsika,
ke atsika mimenimeny ndreky mitantara raha niain̈antsika taloha.
Ke mamparavoravo fontsika raha zen̈y.
Ke zen̈y raha faharoe:
iro rahalahintsika aby io.
Raha fahatelo fan̈antinan̈antsika.
Fan̈antinan̈antsika
hanompo Jehovah amy fomba ankasitrahiny tsisy farany.
Tsisy farany zen̈y, mandrakizay.
Tsy mahaitapitry.
Mitohy fo,
mitohy fo.
Ohatra, anao ziô koa fa misan̈andra,
tsy hitanao fanombohany na farany lan̈itry io.
Karaha zen̈y mandrakizay,
mitohy fo.
Afaka ny ho ravoravo tsisy farany,
anao hiain̈y mandrakizay io.
Zioty zahava amy video man̈araka ty
ino amy raha namiany Jehovah aby io,
nan̈ampy rahalahy ndreky ranabavy aby ty
ho ravoravo fo ndray iro kivy
Rango zahay vo han̈orin̈y tokantran̈o,
efa tan̈atiny programonay edy hiteraka zen̈y.
Ke haravoan̈a tsisy ambaka izy ninay,
zaho koa fa navesatra.
Ravoravo mare zaho izikoa fa nivolan̈iny taminaka fa izy mavesatra.
Karaha efa babany tsaiky in̈y fahitako zaho tamy zen̈y.
Efa nataonay pare raha momba tsaiky io.
Karaha efa izy teraka in̈y fitiavanay izy.
Narary vadiko tandraraiky.
Nisy kamaradinay nivolan̈a taminay:
“Anaro mila mande dokotera e.”
Ke zahay nandeha.
Zahay amy zay koa fa navy tan̈y,
nitarafin̈y tsaiky io.
Dokotera amy zay nivolan̈a fa
tsaiky io fa tsy miain̈y eky.
Nafy taminay naharen̈y zen̈y
Tsisy andra an̈adin̈asako zen̈y.
Nanjary tsisy varany baka raha jiaby nataonay in̈y,
fan̈oman̈ana jiaby in̈y,
tsisy varany e
Mbala malahelo zanakanay in̈y fo zahay.
Karaha misy raha manky be amy fiain̈ananay,
ke karaha efa tsisy raha mahasolo izy eky.
Sarotro aminay man̈adin̈a izy.
Tsy hainay foeky raha natao.
Fa taminio nisy fivorian̈a hariva,
ke zahay nandeha nivory.
Hainay baka fa ten̈a nila fan̈ahy masin̈iny Jehovah zahay
han̈ampy zahay.
Izikoa angovonay tompiny fo tamy zen̈y,
tsy vitanay foeky niatriky izio.
Ten̈a nila Jehovah zahay
Koa fa haindro ranadahy ndreky rahavavy aby io raha nahazo zahay,
maro tamindro kaiky nahatsapa raha mahazo zahay io,
fotony iro koa mba fa navy tatrany raha karaha ninay io.
Ke tsy nahatsiaro latsatokan̈a foeky zahay.
Jehovah nan̈amia zahay naman̈a ten̈a tsy nahafoe zahay,
naman̈a ‘tia mandilatra rahalahy ankitin̈y.’
Hitandro fo zahay koa efa malahelohelo,
ke iro miaraka mivavaka aminay,
indesindro mandehandeha zahay.
Iro mitandren̈y zahay.
Haiko baka amy zen̈y fa
baka amy Jehovah raha jiaby zen̈y.
Miezaka fo zahay baka ho ravoravo.
Misy andininy araiky zay hitako tamy zaho nan̈ano fianaran̈a manokan̈a,
amy Salamo 139.
Koran̈inizio ao fa hitany Jehovah fo atsika na aia na aia misy atsika.
Antena koa baka fa voa raha,
mivadiky mahiziky raha jiaby.
Koran̈iny Salamo io fa Jehovah tsy voasakan̈a hiziky zen̈y.
Ten̈a hitako man̈ampy zaho mare misaintsain̈y raha zen̈y.
Tsapako marin̈y fa Jehovah man̈ampy zaho tsihelihely,
baka zaho ho ravoravo fo.
Atsika koa fa kivy,
Jehovah han̈ampy atsika.
Tsy hambelany ho diso fan̈antinan̈a atsika.
Ohatra zioty,
amy 2 Korintianina 4, ao mivolan̈a amintsika zen̈y.
Zahava baka,
aminy andininy faha-8
amy 2 Korintianina 4.
Karaha ty vakinizio:
‘Zahay voasery amy lafiny jiaby,
kanefa tsy tery loatra ke tsy afaka mihetsiky.
Very hevitry zahay,
kanefa tsy raha tsisy lalan̈a iboahan̈a foeky.’
Lamariky amy pazy ambany mivolan̈a:
“tsy ambela
ho diso fan̈antinan̈a.”
Jehovah tsy han̈ambela atsika ho diso fan̈antinan̈a.
Ke ino amindro raha amiany Jehovah aby io
man̈ampy anao ho ravoravo fo
ndray anao mijaly fotony maro raha mampiasa loha
ndreky mampakivy
mety tojy anao amy zioty?
Fifandraisanao amy Jehovah,
sa iro rahalahy aby io,
sa fan̈antinan̈antsika,
sa raha hafa?
Ankoatrany iro raha amiany Jehovah aby io,
areha koa iro torohevitry mahatsara aby ty:
Mihinana hanin̈y mahasalama.
Baka io koa mifen̈a ho ampy toromaso tsara,
sady mba man̈anova spaoro.
Ke anao mety man̈ano listy,
araiky, problemo mety ho voavahanao,
ndreky araiky koa,
problemo mety tsy ho voavahanao amy zioty.
Man̈anova raha hamahan̈a iro amy listy voanalohany io,
fa apitraha amy Jehovah araiky faharoe io.
Koran̈a aminy antipan̈ahy,
na amy namanao matotro,
na olo atokisanao,
na raimandreninao
raha mahazo anao.
Azo antoko fa
han̈ampy atsika iro
sady von̈ono hizara amintsika fahalalan̈a anan̈andro iro.
Sady ho tsara fan̈ahy mare iro
han̈ano zen̈y aminao.
Aleva onon̈o fa misy fotoan̈a anao mila man̈aton̈o dokotera
amy karazan̈a fahakivian̈a sasany.
Karaha zen̈y raha nivolan̈iny Jesosy
amy Lioka 5:31:
“Tsy ny salama mila dokotera,
fa ny marary.”
Ia, ndraiky,
miankiny aminao hanapakevitry momba raha zen̈y,
fa zen̈y fo raha koran̈iny Soratra Masin̈y.
Anao ohatra mety mila fan̈ampiana baka amy dokotera,
olo nahazo fampiofan̈ana han̈ampy anao amy raha sasany.
Miravoravoa amy fahaizanao fa
Jehovah ten̈a mankasitraka anao.
Aza misalasala amy zen̈y,
na an̈aty fotoan̈a hely fo.
Marin̈y, tsy mora ndraiky miatriky raha mampiasaloha
na mampakivy.
Fa aleva onon̈o fa
Jehovah mahay raha mahazo anao,
sady izy han̈ampy anao hiaritry izio.
Anao miaritry sady tsy mivadiky aminany io,
hahavy izy hankasitraka anao,
ke zen̈y an̈isany raha araiky maventy mamparavoravo atsika.
Kaza hadin̈a fa
Zan̈ahary tsy han̈ary anao.
Izy ten̈a tia anao,
ke miaro anao ndreky mitahy anao.
Ke miravoravoa amy fahaizanao zen̈y,
avio mifen̈a ho ravoravo fo
ndray misy raha mampiasaloha
mampakivy anao.
Rahalahy Gerrit Lösch,
an̈isany Filankevipitantan̈ana,
han̈ano fizaran̈a man̈araka amy kabaro mifampitohy ty,
“Atsika Afaka ho Ravoravo Fo Ndray ...
Injehin̈y.”
Ninjehin̈y Kristianin̈y nanomboko tamy taonjato voanalohany.
Biafa amy 2 Korintianina 11: ao baka Baibolinaro azafady.
Niatriky fan̈injehan̈a zioty Paoly izikoa zahan̈a 2 Korintianina 11:23-25,
karaha ty hoizy:
‘Panompony Kristy ma iro?
Mamaly mira olo adala zaho,
fa miavaka mandilatra iro zaho:
Taminy asa mafy maro,
tamy fidiran̈a amy prizon impirimpiry,
tamy popoko dila loatra,
avio saiky maty matetiky.
Indimy zaho nipopohiny Jiosy inefapolo latsaka araiky,
intelo zaho nipopohin̈y tamy kakazo,
indraiky zaho nitorahan̈a vato,
intelo vaky sambo,
andra araiky ndreky alin̈y araiky tan̈aty rano lalin̈y.’
Tafara heliny izy baka nikoran̈a raha sarotro maro nahavoa izy io,
amy toko 12, andininy 10, Paoly nanoratra:
‘Ke ndray misy raha mampalemy zaho, ndray tihitihinolo,
ndray lera zaho tsisy raha,
ndray an̈atiny fan̈injehan̈a ndreky an̈atiny raha sarotro,
ravoravo fo zaho fotony niny Kristy an̈anovako izity.
Fa lera zaho malemy, aminin̈y edy zaho matanjaka.’
Ia, tsy fan̈injehan̈a zen̈y ndraiky raha naharavoravo izy,
fa izy ravoravo fotony nahavita nanohan̈a zony Jehovah hitondra
baka taminizy niaritry.
Alo atsika hamaky Filipianina 1:14, baka io koa andininy 18.
Baka amy fan̈injehan̈a io koa
ahitan̈a fa miaro vahoakanany Jehovah
ndreky izy man̈amia voninahitry an̈aranany.
Han̈ampy olo hianatra raha momba Jehovah zen̈y.
Filipianina 1:14, 18, Paoly nanoratra:
‘Mahay masaky mitory volan̈a Zan̈ahary
ndreky tsy mavozo ankamarozandro rahalahy amy Tompo,
fotony mahazo toky iro nohony zaho voafehy amy prizon ato.’
Andininy 18: ‘Ke ino vokany?
Izikoa tsy ty fo:
Na amy fomba karakory,
na amy fomba karakory,
na amimpihatsarambelatsihy na amy fô madio,
efa voatory raha momba Kristy,
ke zen̈y mamparavoravo zaho.
Ary zaho ho ravoravo fo koa.’
Fan̈injehan̈a io,
izio tsy raha mahavy finoan̈antsika hihen̈y fo,
fa izio koa afaka mahavy atsika hifandray mare amy Jehovah
ndreky hatoky fampan̈antinan̈anany.
Karaha ty koa raha volan̈iny Paoly amy Romanina 5:3, 4 ao:
‘Irarian̈a atsika hiravoravo an̈atiny fahorian̈a, …
fiaretan̈a mahavy fankasitrahany Zan̈ahary,
fankasitrahany Zan̈ahary ndraiky mahavy fan̈antinan̈a,
avio fan̈antinan̈a tsy mba mitondra fahadisoampan̈antinan̈a.’
Ten̈a marin̈y,
raha ten̈a man̈ampy atsika hiaritry fanan̈ana fan̈antinan̈a io.
Mampiasa volan̈a “fan̈antinan̈a” io amy fomba maro Baiboly.
Ohatra, fan̈antinan̈a famonjian̈a,
an̈isanizen̈y zioty fanan̈ana fifandraisan̈a tsara amy Jehovah aminy hoavy.
Iô koa fan̈antinan̈a ho tafitsaka velon̈o aminy Aramagedona,
fan̈antinan̈a hiain̈y tsisy farany amy Paradisa ambony tany.
Misy koa man̈anten̈a hiain̈y tsisy farany andan̈itry an̈y.
Ino ma fan̈antinan̈a nikoran̈iny amy Romanina 5:3, 4 io?
Momba fan̈antinan̈a andan̈itry izio.
Zahava teny man̈odidin̈y.
Romanina 5:2,
aminy tapany faharoe amizio mivolan̈a:
‘Alo atsika hiravoravo nohony fan̈antinan̈a voninahitry Zan̈ahary.’
Nan̈anten̈a hiain̈y andan̈itry an̈y aby
Kristianin̈y jiaby tamy taonjato voanalohany.
Fan̈antinan̈andro tsy raha problemo
na raha manahiran̈a amy donia ty ho voavaha fo
na iro handeha ho janga aminy aretin̈y fo.
Fa fan̈antinan̈adro fan̈antinan̈a handeha andan̈itry an̈y.
Kolosianina 1:3, 5 mivolan̈a:
‘Zahay man̈ano mersy Zan̈ahary fo … zahay koa fa mivavaka ninaro …
nohony fan̈antinan̈a voakajy andan̈itry an̈y ninaro.’
Zioty avadia amy Romanina 8:20, 21.
Vahoaka be na ankamarozany Vavolombelon̈o Jehovah amy zioty,
man̈anten̈a hiain̈y tsisy farany ambony tany eto.
Fan̈antinan̈a zen̈y nivolan̈iny Paoly
izikoa izy fa nanoratra Romanina 8:20, 21:
‘Fa nambela hanjary tsisy dikany zavaboary,
kanefa tsy baka amy sitraponany fa
baka amy sitrapony araiky nan̈ambela zen̈y handalo.
Ia, nambela handalo zen̈y, miorin̈y amy fan̈antinan̈a ty:
Zavaboary koa hadoso amy fan̈andivozan̈any fahalovan̈a,
ke hanan̈a fahafahan̈a be voninahitrindro Zan̈aka Zan̈ahary.’
Kanefa, Paoly koa fa nivolan̈a Romanina 12:12,
“miravoravoa amy fan̈antinan̈a” io,
fan̈antinan̈a andan̈itry an̈y raha tiany koran̈iny.
Kanefa afaka miravoravo amy fan̈antinan̈a
natao man̈oloan̈a iro koa iro “ondrikondriky hafa” aby io.
Ke afaka mivaravoravo atsika jiaby.
Donia ty tsy manan̈a fan̈antinan̈a
fa atsika tsy karaha zen̈y.
Ho ravan̈a donia ty,
fa raha antin̈aintsika ndraiky ho tanteraka.
Ho diso fan̈antinan̈a donia ty
fa atsika ndraiky ho tafiboaka.
Ke amy donia vaovao efa marikitry be io,
fan̈antinan̈antsika, na andan̈itry an̈y na ambony tany eto,
ho tanteraka aby ndreky atsika ho ravoravo mandrakizay.
Karaha ty baka koran̈iny Titosy 2:13:
‘Zen̈y ataontsika ampiambesan̈a raha mamparavoravo antinaintsika
ndreky fisehoan̈a be voninahitry Zan̈ahary tsisy ambaka izy ndreky Kristy Jesosy.’
Ankoatranizen̈y, koran̈iny Romanina 8:24, 25 fa
man̈ampy atsika hiaritry fan̈antenan̈a io.
‘Fan̈antinan̈a raha efa hita,
efa tsy fan̈antinan̈a…
Fa izikoa man̈anten̈a raha tsy hitantsika atsika,
atsika miambin̈y zio fo, ke miaritry’,
zen̈y volan̈iny Soratra Masin̈y.
Afaka hahaimatanjaka fan̈antinan̈antsika io.
Akory atao hampatanjaka fan̈antinan̈antsika io?
Amy Baiboly,
volan̈a griky el·pisʹ, nadika fan̈antinan̈a io.
Dikanizio ‘ man̈aten̈a raha tsara.’
Koa andininy io zahan̈a,
mikoran̈a raha maromaro mifandray amy fan̈antinan̈a Paoly.
Koran̈iny afarany fahorian̈a, fiaretan̈a,
avio fankasitrany Zan̈ahary.
Tsy resaka fan̈antinan̈a tsapantsika tamy atsika vo sambany naharen̈y vaovao tsara zen̈y,
fa hafatarany fan̈antinan̈a anan̈antsika
izikoa atsika efa baka niaritry.
Izikoa Kristianin̈y tsy mivadiky niaritry
fo koa fa misy fitsapan̈a,
afaka matoky izy fa Zan̈ahary mankasitraka izy.
Ke zen̈y mahavy fan̈antinan̈anany hahay hatanjaka fo.
Karaha Paoly, atsika afaka ravoravo ndray misy fan̈injehan̈a.
Mety han̈ano raha mampakivy atsika piara mianatra,
piara miasa, ndreky havantsika.
Baka io mety hisakana asantsika koa fanjakan̈a.
Amy Matio 5:11, 12,
tamy Toriteninany Tan̈abony Bongo in̈y, Jesosy nivolan̈a karaha ty:
“Sambatra anaro izikoa baka aminaka mahavy anaro tihitihinolo ndreky ampijalindro,
baka io amoron̈andro vandy,
volan̈indro fa nan̈ano karazan̈a raha ratsy jiaby io.
Miravoravoa ndreky mitsinjaha mare anaro,
fotony maventy radinaro andan̈itry an̈y.
Iro paminan̈y talohanaro koa anie mba efa nampijalindro karaha zen̈y e.”
Ke izikoa anao fa mizaha video man̈araka ty,
aleva onon̈o ino raha nan̈ampy rahalahy ndreky ranabavintsika aby io
ho ravo fo ndray ninjehin̈y iro.
Maraindrain̈y be, nisy polisy navy niditry forsé tantran̈onay.
Nigadraindro tamy menoty tan̈anaka, avio nisavaindro tran̈onay.
Nindesindro tamy birôny posty polisy za baka tio natao ankety.
Afaka andra aroe amy zay za nalefandro tamy prizon niambin̈y didimpitsaran̈a.
Navozo za fotony tsy haiko ino raha ataondro za lera za avy a prizon an̈y.
Nahainavozo fo za koa fa nisy sefo zay nimenasy za.
Nivolan̈iny,
za koa tsy man̈eky nivolan̈a fa nan̈ano raha tsy mety ndreky tsy man̈amia an̈arandro rahalahy aby io,
hahaihampijalindro fo za.
Nalahelo vadiko mare koa za, fotony za tsy tankilanany.
Tsisy raha momba Baiboly nivakin̈y foeky zaho tan̈atiny fanjava aroe, ke za nitady hevitry.
Vadiko nandefa raha mety anoratan̈a,
ke isanandra za manoratra zay andininy azoko onon̈o.
Za koa fa nahavita dimanjato andininy, tio vo nisy olo nan̈amia Baiboly za.
Nazony efa loatra za tsy namaky Baiboly,
efatra fanjava fo, fa vitako vaky Baiboly in̈y.
Tan̈atiny fotoan̈a jiaby zen̈y za nanoratra tamy vadiko, namako,
raha hitako nahalian̈a za tamy vaky Baiboly in̈y.
Nahazo taratasy baka tamindro ndreky baka tamindro rahalahy ndreky ranabavy aby io koa za,
ke za tsy natsiaro latsatokana,
fotony nira niaraka nigadra taminaka fo iro.
Karaha tankilanaka fo fahitako iro tamy zen̈y.
Iro polisy aby io,
vitandro mampisaraka olo amy fiarahamonin̈y,
fa iro tsy mahavita mampisaraka olo amy Jehovah.
Impirimpiry za nivavaka tamy Jehovah isanandra,
sirto isaka za alohany hoandry.
Nambesako olo jiaby nandry,
in̈y za nan̈ambara Jehovah zay raha tiako nikoran̈iny taminany.
Nan̈araraotro mare koa za isaka za zaraiky fo tavela tamy tany nigadrandro zahay tao.
Nandohaliky za nitomoan̈y nivavaka tamy Jehovah.
Nataoko listy tamy taratasy raha jiaby nangatahiko tamy Jehovah,
baka io nasiako mariky lan̈iany efa nivaly.
Nan̈eky marin̈y za fa Jehovah ten̈a tsy niala za ankitin̈y.
Nihira moramora hira amy fihiranantsika koa za isanandra.
Fa izikoa fa za zaraiky fo tao,
za nihira mare erakany vitako.
Nan̈araraotro nitory fo koa za isaka afaka nan̈ano zen̈y.
Naro raha nikoran̈inay, rango tamy tatoazy firaka tamy “panjakany avaratra.”
Tsisy niboaka raha jiaby nidon̈ako hataondro za in̈y.
Tsisy raha navoa za tan̈atiny 343 andra nitanandro za ta prizon tao.
In̈y taon̈o hitako farany niavaka rango nahaolombelon̈o za.
In̈y lekoly nampianatra za hankatsara fanompoako Jehovah.
Ten̈a nahatsiaro narikitry Jehovah za tamizin̈y.
Tombontsoa tsisy ambaka izy
nanohan̈a zony Jehovah hitondra tampigadran̈a tan̈y!
Ino raha han̈ampy anao ho ravoravo koa amy zioty
ndray ino ndray ino fanoheran̈a mety ho tojy anao?
Ten̈a han̈ampy anao fifandraisanao amy Jehovah,
iro rahalahintsika aby io,
ndreky fan̈antinan̈anao,
na andan̈itry an̈y na ambony tany eto.
Miravoravoa fotony ten̈a tia anao Jehovah
ndreky iro rahalahy aby io.
Izikoa anao miaritry fan̈injehan̈a,
matokisa fa iro rahalahinao aby io,
tsy zisty namanao fo, ndreky tsy iro piaramanompo amy fiangonan̈a misy anao fo,
fa iro jiaby erantany an̈y, samy mivavaka ninao.
Mandiniky anao koa iro anjely aby io
ke ravoravo izikoa anao tsy mivadiky.
Aleva onon̈o fa mankahery iro anjely aby io anao izikoa tsy mivadiky.
Karaha Jehovah, ndreky Jesosy,
avio anjely aby io,
mirehareha ndreky ravoravo aminao iro rahalahinao aby io,
nohony fiaretan̈anao ndreky finoan̈anao
ndray iô fan̈injehan̈a.
Rahalahy William Turner, pan̈ampy amy Komitiny Fanompoan̈a,
zioty han̈ano fizaran̈a man̈araka amy kabaro mifampitohy ty,
“Atsika Afaka ho Ravoravo Fo Ndray …
Mosary.”
Ino raha tsapanao
izikoa misy fotoan̈a anao tsy mihinankanin̈y indraiky,
na tsy mahita raha hoanin̈y?
Aminolo maro,
raha zen̈y hahavy iro ho kamokamo
sady tsy hifantoko tsara,
ndraikindraiky koa hahavy iro tsy hisain̈y tsara foeky.
Fa akory ndraiky izikoa tsisy raha azontsika atao foeky
na tsy mahita raha hoanin̈y foeky atsika
an̈atiny fotoan̈a lavalava?
Karaha zen̈y baka raha nahazo apostoly Paoly
taminizy nan̈ano fanompoan̈anany.
Ohatra,
amy 2 Korintianina 11:27 ao,
Paoly nivolan̈a fa
izy ‘mosary ndreky sakara
sady nifady hanin̈y matetiky.’
Karaha zen̈y ohatra raha nisy
izikoa fa nisy fotoan̈a ohatra izy nandalo tamy tany sasatra rano
na tany paiky.
Tamy fotoan̈a zen̈y,
nety mosary ndreky sakara izy tamy toeran̈a aby zen̈y
fotony izy vahiny
ke tsisy olo afaka nan̈amia hanin̈y nilainy.
Tsy naharaka hivangan̈a hanin̈y tamy toeran̈a aby io koa
vola nanan̈any.
Nisy fotoan̈a koa Paoly
niain̈y tamy fotoan̈a nisy mosary mare,
mosary naharitry mandilatra telo taon̈o,
ke nanjary sahiran̈a mare olo ta Joda
ndreky ta Jerosalema.
Fa ndray izy niatriky fotoan̈a aby tsy nahitany hanin̈y zen̈y,
mahalian̈a fa nanan̈a toetsain̈y tsara fo apostoly Paoly.
Amy 2 Korintianina 6:10,
karaha ty hoizy momba ten̈anany
ndreky Kristianin̈y namany:
“karaha malahelo kanefa ravoravo fo.”
Ke nikeny Paoly fa
fotoan̈a sarotro io
mety hiteraka fahorian̈a ndreky fijalian̈a aminolo.
Fa karakory nahafahany ho ravoravo fo,
nanan̈a fo haravoan̈a an̈aty io,
ndray izy niaritry mosary?
Zahava baka raha nivolan̈iny.
Azafady avadiha baka Baibolinaro,
amy bokiny Filipianina.
Alo atsika hamaky
Filipianina 4:11-13.
Paoly nivolan̈a:
‘Tsy raha an̈atiny tsy fisian̈a ndraiky zaho izikoa mivolan̈a zen̈y,
fotony efa nianatra ho afapo zaho
na ino na ino raha iain̈ako.
Haiko tsara an̈atiny tsy fisian̈a zen̈y,
avio haiko tsara koa manan̈a be zen̈y.
Tamy raha jiaby
ndreky tan̈aty karazandraha jiaby,
zaho efa nianatra ho voky
ndreky ho mosary,
avio hanan̈a be
ndreky hihafy.
Baka aminy araiky man̈amia angovo zaho in̈y
mahavy zaho manan̈a angovo hindesin̈y hiatriky karazandraha jiaby.’
Asa hitanao taminy andininy 12,
Paoly nivolan̈a fa
izy efa nianatra ‘ho voky ndreky ho mosary.’?
Dikanizen̈y baka,
izy nan̈ankiny tamy Jehovah
mikasiky raha nilainy tamy fiain̈ana
ndreky nifen̈y ho afapo tamy raha namiany Jehovah izy.
Zen̈y ankitin̈y raha nataony Paoly.
Izy niasa baka hahazahoany vola,
hahavy izy tsy hanjary entan̈a mavesatra aminolo.
Nifantoko mare tamy fanompoan̈a izy,
ke tsy naro be raha nanan̈any.
Fa izy ten̈a nankasitraka iro piaramanompo aby io.
Iro rahalahy aby io nan̈amia izy raha nilainy,
ke izy ten̈a nankasitraka raha zen̈y.
Nianatra raha maro Paoly tamy raha niain̈any aby io.
Hitany fa ten̈a nan̈ampy izy tamy fiain̈anany Jehovah,
ke hitany fa na ino na ino raha mandalo,
izy nila nitavandra Jehova fo
baka han̈amia izy raha nilainy.
Aleva onon̈o aminy andininy 13?
Nanohan̈a Paoly i Jehovah.
Nan̈amia angovo izy.
Ke Paoly koa fa niatriky raha sarotro isankarazany aby zen̈y,
izy mbala afapo fo,
mbala ravoravo fo,
ndreky nifantoko tamy fanompoan̈anany.
Ke ino raha ianaranao baka aminy ohatrany Paoly in̈y?
Atsika koa mety tsy ho hisy hanin̈y karaha raha nahazo Paoly in̈y
baka aminy antony maro.
Ohatra,
misy mosary,
mety hahavy zen̈y krizy aratoekarena,
na maresaka loatra grevo ataonolo.
Ndreky nohony raha misy amy zioty io,
maro olo very asa,
an̈isany zen̈y rahalahintsika aby io.
Koa zen̈y raha misy,
atsika mety tsy maintsy hiain̈y mifan̈araka amy zen̈y.
Mety hahavy atsika tsy ho hisy hanin̈y koa fan̈injehan̈a.
Izikoa fa nitanan̈a tamy toby fitanan̈a Nazỳ,
ohatra,
iro rahalahintsika aby io,
nataony Satana raha hahavy iro ho azony mafo mare,
amy zen̈y iro hivadiky.
Baka io koa raha zen̈y
mety handalo koa aminolo araiky manakatra tanjon̈o arapan̈ahy.
Sasany amintsika ohatra nan̈ano fan̈ovoan̈a
sady nianatra ho afapo amy raha hely anan̈any
baka hahafahan̈a mifindra amy tany mila pitory maro.
Ke hita fa, amy raha isankarazany,
anao ndreky zaho
mety tsy ho hisy hanin̈y
na mety ho azony mosary,
ke raha zen̈y mety hampahinihiny
ndreky hampakivy.
Fa fatokisan̈a ndreky filampian̈a amy Jehovah
ten̈a han̈ampy atsika amy zen̈y.
Hitanaro,
izikoa atsika man̈ano zen̈y,
hahavy atsika ho kalma
ndreky handiniky niny andra niany fo antsendriky.
Izikoa fa nanonga vidindraha tamy tany araiky,
nisy baba araiky nivolan̈a:
“Ty raha nangatahiko tamy Zan̈ahary
izikoa zaho fa nivavaka
“Amia zahay niany hanin̈y sahaza zahay niany.”
Atsika tokony hankasitraka raha namiany Jehovah.
Nisy fotoan̈a
baba nikoran̈intsika tio in̈y
handeha hividy hanin̈y tamy tany fivarotan̈a araiky,
fa karazan̈a hanin̈y tsy tiany fo raha hitany tavela tao.
Ke ino raha nataony?
Izy nivolan̈a:
“Tsy tiako ndraiky izio,
fa izio hanin̈y fo.
Ke izio raha nihoaninay taminy alin̈y io.”
Izy nankasitraka Jehovah nan̈amia izy zio.
Kanefa amy zioty
mbala tsy mitovy amy zen̈y raha iain̈antsika
fa atsika afaka mihina zay raha tiantsika.
Kanefa izikoa misy fiovan̈a,
atsika ma ho afaka hiain̈y mifan̈araka amy raha misy sady ho ravoravo fo?
Tsy mankahery ma mahay fa
mikarakaraka sady man̈amia raha ilaintsika fo Jehovah?
Avio raha ten̈a maventy,
koa atsika miravoravo fo amy zay raha amiany Jehovah atsika.
Alo atsika zioty han̈araka video ty an̈y.
Izikoa anao mizaha zio
aleva onon̈o ino raha nan̈ampy ranabavintsika ty
ho ravoravo fo
ndray tatrany mosary.
Nilamin̈y fiain̈ananay ta Veneziela teto talohany nisiany krizy be ty.
Zahay izioty sahiran̈a amy vola.
Kanefa taloha zahay mandeha mivanga hanin̈y,
zahay afaka nivanga zay hanin̈y tadiavinay.
Nanjary sahiran̈a mare zahay efa dimy taon̈o loso zay.
Sahiran̈a mare zahay vo mahita raha mety ahanin̈y,
ary na firaka amy fototsakafo tsisy.
Isaka anao mandeha mividy raha,
ndray raha hividin̈y foeky tsisy.
Presky isanandra,
misy antipan̈ahy aroe avy aminay, mitondra hanin̈y ilaiko.
Miasaloha amindry zanako fo zaho isaka zaho mandoky ndreky mamoatra,
tsao tsy ho ampy iro hanin̈inay.
Tsy maintsy nindro fo ataoko bebeny ninaka.
Ndray zanako faralahy man̈ontany zaho:
“A Mama, io fo hanin̈inao?”
Volan̈iko: “Ia zanako, io fa pare.”
Hoizy: “Io tsy mahampy Mama e.”
Zaho mieritreritry fa mahavelon̈o zaho fo hanin̈y hoaniko,
kanefa izio tsy fandanja aminy habezan̈anaka.
Zahay amizay koa fa nandeha nivory dimansy maraindrain̈y araiky zay,
zaho intelo toran̈a,
nakiry izy zanako man̈angy narikitry zaho tio.
Zaho koa fa tampodian̈a,
nitantarainy taminaka raha io fa zaho nifamatra mare.
Zaho in̈y amizay direkty nindesindro ranadahy aby io tamy doktera.
Doktera io nivolan̈a fa zaho tsy ampy hanin̈y mare.
Nan̈ano fandaharan̈a ranadahy aby io han̈ampian̈a zaho.
Iro man̈atriky hanin̈y efa masaka,
avio ambesandro zaho mihina firaka hanin̈inaka lany.
Zaho ndraiky mbala tsendriky maventy karaha zaho taloha fa,
mbala mahia fo.
Fa zaho fo efa tsaratsara.
Iro antipan̈ahy aby io mbala mikarakara zaho fo,
ke matsiaro misy angovo fo zaho.
Man̈ano mersy Jehovah zaho fotony zaho tsiary ndraiky tsy ravoravo!
Zaho mankasitraka Jehovah, fotony izy mampisikiny zaho,
mampihina zaho
ndreky man̈amia zaho kamarady tsara.
Kado baka aminany raha jiaby zen̈y.
Asa hitanao ino raha nan̈ampy ranabavintsika io?
Voanalohany,
fifandraisany tamy Jehovah,
izy nihevitry fa
ten̈a raha maventy mifandray marikitry aminany
ndreky tsy manapaka mandeha mivory,
avio koa, fan̈ampiandro rahalahy aby io.
Tsy mankahery ma mahita fa
ten̈a tia man̈ampy iro antipan̈ahy aby in̈y,
nan̈ontany raha nilainy isanandra,
nan̈amia hanin̈y izy ndreky fianakavian̈anany,
nataondro azo antoko fa ampy izy tsara hanin̈y nihoaniny?
Ke mira zen̈y fo,
mifandray tsara amy Jehovah,
mahazo fan̈ampian̈a amindro rahalahy aby io,
ndreky misaintsain̈y fo fan̈antinan̈antsika,
raha aby zen̈y han̈ampy atsika ho ravoravo fo
ndray misy mosary.
Atsika man̈eky,
atsika ten̈a resy lahatra amy raha nivolan̈iny Paoly
amy Filipianina 4:12.
Jehovah afaka man̈ania raha ilaintsika amy fiain̈ana
ndray ino ndray ino raha mandalo.
Izikoa fa misy mosary,
aradàlan̈a atsika izikoa miasaloha amy raha momba vatan̈antsika
ndreky niny fianakavian̈antsika.
Fa hitantsika tio fa,
atsika mbala afaka ho ravoravo fo
ndray atsika tatrany mosary.
Fa ino han̈ampy atsika?
Ianara sekrenany.
Maro olo tihahay raha sekre.
Fa Jehovah ravoravo mare man̈ambara sekrenizio amintsika,
fa atsika fo mila matoky izy
ke ho hitantsika edy ino raha ataony.
Ho ravoravo mare Jehovah
lera izy mahita panomponany tsy mivadiky
dreky ravoravo fo,
sady matoky fa Jehovah tsy han̈ary izy foeky!
Rahalahy Robert Luccioni,
pan̈ampy amy Komity Miandraikitry Asa Fan̈anovan̈a Pirinty,
han̈ano tapany man̈araka aminany ty,
“Atsika Afaka ho Ravoravo Fo Ndray ...
Tsisy Lamba.”
Atsika ma afaka ho ravoravo fo
ndray mandalo fitsapan̈a ten̈a sarotro?
Efa hitantsika tio karakory nataony apostoly Paoly ho ravoravo fo
ndray izy nijaly na tojy fahorian̈a,
niasaloha,
ninjehin̈y,
na koa mosary.
Maro aminaro koa nandalo raha karaha zen̈y taloha,
na mandalo zen̈y amizioty.
Ke ten̈a nankahery anaro kabaro aby in̈y.
Fa karakory ndraiky izikoa misy antambo
na ady antran̈o ke manjary very an̈y fanan̈anantsika jiaby?
Ohatrany Paoly koa ma afaka man̈ampy atsika?
Amy Romanina 8:35, andininteny ioren̈any fotokevitrintsika ty,
Paoly nivolan̈a fa ndray “tsisy lamba”,
zen̈y tsy “hampisaraka atsika amy fitiavany Kristy.”
Sady efa niain̈any raha zen̈y.
Zahava baka 2 Korintianina 11:27.
Nikoran̈iny ao karakory raha sarotro nahazo izy, hoizy:
“Taminy asa mare ndreky hakajoan̈a,
taminy alin̈y matetiky tsy nahitan̈a toromaso,
tamy mosary ndreky sakara,
matetiky tsisy hanin̈y,
tamy nintsy ndreky tsy fisiany lamba.”
Tsy baka taminy hakamoan̈a nahavy Paoly tsisy lamba.
Baiboly mivolan̈a fa izy niasa mare mba hazahoan̈a raha nilainy.
Fa raha niain̈any tamy fanompoan̈a
nahavy izy niatriky nintsy ndreky tsisy lamba.
Ohatra, asa azonao onon̈o,
sambo niondran̈any Paoly navy nahifiky tsiko farany maresaka
tamy ranomasin̈y Méditerranée,
ke vaky tan̈y.
Vakivaky sambo io.
Paoly ndreky olo hafa namahan̈a tamy tapatapaka kakazo
ndreky ambiny sambo io.
Mety lamba hely fo tamindro, na tsisy foeky, taminiro navy tantety.
Zen̈y nahavy, koa azonaro onon̈o,
olo tamy nosy Malta io namelon̈o motro baka olo aby io hafana.
Nisy fotoan̈a koa, Paoly tsy maintsy nilefa an̈avotan̈a ain̈inany,
Nisy fotoan̈a koa, izy nipopohin̈y na nitoran̈a vato,
ke tsy maintsy natriatriaka lambanany.
Hitantsika aminy Asan’ny Apostoly 16:22 koa zioty,
fa ‘iro tompinandraikimpanjakan̈a aby io’ koa fa baka ‘nan̈endaka lambany Paoly ambelan̈a’,
izy nirahindro nipopohin̈y tamy kakazo, baka io nigadrain̈y.
Tantara aby io man̈ampy atsika hahazo tsara volan̈a Paoly amy 1 Korintianina 4:11.
Karaha ty hoizy amy 1 Korintianina 4:11:
“Firaka amy lera zioty,
zahay mbala mosary ndreky sakara fo,
ndreky zara izikoa misikiny,
ampijalin̈y ndreky tsisy tany ipitrahan̈a.”
Ndray tio raha sarotro aby zen̈y,
ino raha nampirisihiny Paoly ataony Kristianin̈y namany?
Volan̈iny aminy andininy 16:
“Zaho mandrisiky anaro:
Irarian̈a anaro han̈ano karaha zaho.”
Izy nandrisiky iro hangala tahaka izy,
ke ho ravoravo fo ndray misy fitsapan̈a.
Amy Romanina 12:12, izy mivolan̈a amindro: “Miravoravoa amy fan̈antinan̈a.
Olo masin̈y mba an̈ameza amy raha anan̈anaro,
mifan̈araka amy raha ilaindro.”
Hitantsika iô, fa ndray tio raha sarotro nahazo Paoly,
izy mbala ravoravo fo,
sady mbala afaka nan̈ampy olo hafa koa.
Maro amy rahalahy ndreky anabavintsika koa zioty nandalavony antambo.
Diniha hely baka raha nisy tamy taon̈o loso:
Nisy horohorontany tan Albanie,
Philippine, Porto Rico,
ndreky tantany hafa.
Nisy ranobe mahery ta Kongo,
tan Espan̈e ndreky tan Etazonỳ.
Nisy syklony maresaka sady matomboko ta Bahamas ndreky Philippine.
Nisy motro maresaka tan Ostraly ndreky Etazonỳ.
Mbala tsy jiaby!
Ke maro amy rahalahy ndreky anabavintsika, maro aminaro,
sasakalin̈y jiaby in̈y,
tsy maintsy niala tran̈onaro miaraka lamba ankoditry fo.
Nisy ndraiky, ravan̈a foeky fanan̈anandro jiaby.
Malahelo atsika lera maharen̈y tatitry karaha zen̈y.
Ndray iô raha nandalovanaro zen̈y,
rahalahy ndreky ranabavy,
tsara ho hainaro fa zahay mivavaka ninaro fo.
Sady ndray tio raha aby zen̈y,
iro rahalintsika aby io mbala ravoravo fo.
Amy fomba akory?
Aleva onon̈o amy video man̈araka ty,
ino raha nan̈ampy rahalahy ndreky ranabavintsika ho ravoravo fo
ndray nisy fotoan̈a iro tsy ampy lamba.
Zahay mipetraka amy tananàny New Work eto.
Lomolomay lava fo fiain̈ananolo aminay aty.
Nanjary mekimeky karaha zen̈y koa zahay.
Nandeha tsara fiain̈ananay taloha
Pisava lalan̈a zahay fivadiany.
Avio zahay niasa azahoanay raha ten̈a ilainay.
Olo ratsy fo raha niasainay loha zahay koa fa nandeha tamy lalan̈a tamy zen̈y.
Nitoditodiky fo zahay.
Zahay tsy nan̈ampo foeky fa
mbala handalovany sikilony aminay eto.
Zen̈y raha tsy niasainay loha foeky.
Fa tandraraiky nisy filazan̈a momba sikilony nazonay.
Taminio nisy mahalen̈y ndreky tsiko nare
Zahanay amizay rano mihamanonga fo amy parkin̈y amy tany ipitrahanay.
Tio zaho vo nahay fa hoavy marin̈y sikilony io.
Zahay tsy nahatondra raha nilefa fa lamba ankoditry fo.
Nandrobadraha mare sikilony in̈y.
Alin̈y araiky fo fa ravan̈a raha jiaby.
Tsiary ndraiky navy tan̈aty jeriko
ke tran̈onay ty mbala ho ravan̈a
handrobaka fanan̈ananay jiaby.
Firaka amy lambanay.
Sambany zaho tatrany raha karaha ty.
Nangotsoko mare fonaka.
Zaho nieritreritry
akory hiafaranay fivadiany?
Nisy fivoriambe zahay tamy farany herin̈andranizio.
Zaho tsisy lamba ndreky kravaty
Taminio zaho vo nahay fa
ndray lamba io mbala mety hijalian̈a fo kaiky.
Naro baka izio taminaka.
Iro ranadahy ndreky rahavavy aby io nanampy zahay mare tamy zen̈y.
Ren̈iko iro nikon̈okon̈o tran̈onay andra Joma.
Nanaterandro lamba ataonay telo andra ndreky kiraro zahay.
Nivangaindro lamba zahay ten̈a tsy nampoizinay raha zen̈y.
Nitolon̈ondro zahay baka io namiandro anvelopy misy vola.
Ten̈a resy lahatra zahay fa Jehovah tia zahay ankitin̈y.
Ke nandrisiky iro nan̈amia zahay lamba aby io.
Ravoravo zahay afaka nan̈anton̈o fivoriambe io
ndreky nankafy raha jiaby naianaran̈a tan̈y,
ndray tsy mora raha nahazo zahay.
Ndray ravan̈a raha jiaby nanan̈anay,
zahay mbala nan̈ano pisava lalan̈a fo ziska zioty.
Jehovah efa nampan̈anten̈a fa
atsika koa man̈ano voalohantoeran̈a fanjakan̈anany
Izy hikarakara raha jiaby ilaintsika.
Zen̈y raha namparavoravo zaho.
Na ino na ino raha mahazo atsika,
ndray atsika tsisy lamba.
Tsisy raha mahavita mandravan̈a fihavan̈antsika amy Jehovah Zan̈aharintsika io.
Asa hitanaro ino raha nan̈ampy iro fivadiany?
Tan̈atiny alin̈y araiky fo baka, very fanan̈anandro jiaby.
Tsy haindro foeky ino raha atao, han̈ano akory iro.
Fa, azonaro onon̈o fanapahankevitrindro?
Karaha ty ho Brian:
‘Na ino na ino raha mahazo atsika,
ndray atsika tsisy lamba,
tsisy raha mahavita mandravan̈a fihavan̈antsika amy Jehovah.’
Ten̈a namparavoravo iro nahazo fan̈ampian̈a baka tamy rahalahindro.
Iro nan̈anten̈a Jehovah fo sady nieritreritry fan̈antinan̈andro.
Ino raha ianarantsika baka amy zen̈y?
Ianarantsika fa ndray misy fitsapan̈a mahazo atsika,
ke izio mety hahavy atsika ho very fanan̈ana na tsy ho hisy lamba,
atsika afaka ho ravoravo fo.
Tadidia raha telo hitantsika tio,
man̈ampy atsika amy zen̈y:
Mifandray tsara amy Jehovah fo,
fan̈ampian̈a baka amindro rahalahy aby io,
baka io mifantoko amy fan̈antinan̈antsika.
Maro aminaro koa amizioty,
direkty man̈ampy izikoa fa mahita rahalahy ndreky anabavy sahiran̈a.
Ten̈a hankasitrahanay raha zen̈y.
Mahaimaro sady mahaimaresaka fo antambo amizioty.
Ke atsika vo maika mila man̈ampy iro rahalahintsika aby io fo.
Ke derainay anaro,
sady mersy amy raha jiaby ataonaro.
Nan̈ino?
Maro aminaro baka von̈ono
nandeha tamy toeran̈a nila fan̈ampian̈a.
Ohatra, tafarany Syklony Dorian ta Bahamas in̈y,
nisy piloty na pitondra avion Vavolombelon̈o Jehovah
nitondra piasa antsitrapo mandilatra 700, nandeha tan̈y.
Sasany aminaro ndraiky man̈ampy piaramanompo amy tany misy anaro.
Nisy ady antran̈o, ohatra, ta Kongo,
ke maro tamy rahalahintsika tsy maintsy nilefa niala tran̈ondro ndreky tanànandro,
lamba ankoditry fo tamindro.
Ke akory eky ataondro?
Tsisy raha foeky baka tamindro, tsisy raha hiviloman̈a.
Marin̈y fa masikiny koa iro rahalahy ndreky anabavindro
tamy fiangonan̈a tamy tany nifindrandro,
kanefa iro nan̈amia vola,
hanin̈y, lamba,
ndreky firaka amy tran̈o pitrahan̈a.
Fiangonan̈a a Bolivie ndreky Venezuéla an̈y koa ohatra,
raha ataondro mizara hanin̈y.
Zahava koa baka raha ataony piaramanompo amintsika,
amy valan̈aretin̈y COVID-19 izioty.
Iro man̈amia hanin̈y,
man̈ampy,
mankahery
ndreky man̈ampy amy lafiny arapan̈ahy.
Fiangonan̈a ndreky fianakavian̈a koa samby mifan̈ampy.
Ke baka aminaro manan̈a toetsain̈y mafoeten̈a ndreky fan̈amezan̈a ataonaro,
mahavy anaro ho ten̈a fitahian̈a
amindro rahalahy ndreky ranabavy erantany.
Mira man̈amia tefaka Satana in̈y atsika amy zen̈y.
Nan̈ino atsika mivolan̈a zen̈y?
Mety tsaroanaro amy Joba 1:11 ao,
Satana nankaratsy Jehovah ndreky panompony Jehovah jiaby.
Izy nivolan̈a fa
tsy hanompo Jehovah zen̈y eky atsika izikoa miatriky fitsapan̈a.
Alo baka zahavantsika Joba 1:11.
Hoizy:
“Ampara baka tan̈anao, azafady,
adosoa aminany raha jiaby anan̈any,
zahavako izy tsy han̈ozon̈o anao zen̈y.”
Satana resy lahatra mare fa izikoa atsika tsy maintsy hifidy:
‘Hafoe fanan̈antsika sa tsy hivadiky amy Jehovah’,
fanan̈anantsika hoizy tsy maintsy fidintsika.
Satana resy lahatra fa
izikoa atsika tsy maintsy mifidy: ‘Ain̈intsika sa han̈ampy olo hafa’,
ain̈intsika zen̈y tsy maintsy fidintsika.
Diso hevitry izy!
Ke meloko mare izy mahita raha misy an̈ivony fandaminan̈a Jehovah amizioty io.
Ke ino raha mila ataontsika?
Ataova fo raha mampameloko izy.
Mifen̈a fo han̈ampy iro rahalahy ndreky ranabavy mila fan̈ampian̈a.
Izikoa atsika man̈ano zen̈y,
tsy atsika fo ho ravoravo,
fa atsika koa man̈ampy iro,
iro rahalahintsika aby io ho ravoravo koa.
Ry namako aby,
irarian̈a atsika jiaby samby ho tapakevitry ho ravoravo fo
ke han̈ano raha telo aby ty:
Hifandray tsara amy Jehovah fo,
hankasitraka fitiavan̈a ndreky fan̈ampian̈a baka amindro rahalahy aby io,
baka io hisaintsain̈y fan̈antinan̈antsika tsarabe io.
Avio aza adin̈a foeky,
izikoa atsika tsy mivadiky amy Jehovah foeky,
ndray tsisy lamba,
ndray very fanan̈ana jiaby,
atsika hamparavoravo fony Jehovah.
Zen̈y an̈isany raha ten̈a mamparavoravo atsika.
Izioty Rahalahy Ralph Walls,
pan̈ampy amy Komitiny Piasa,
han̈ano fizaran̈a man̈araka amy kabaro mifampitohy ty,
“Atsika Afaka ho Ravoravo Fo Ndray .
Iô Faharatsian̈a.”
Titra kabarontsika ty tsy natao forama question,
fa izio fehezanteny man̈ambara raha misy.
Atsika hoizy afaka ho ravoravo fo ndray iô faharatsian̈a.
Azafady arevanaro baka, izikoa atsika fa mizaha modely nambelany apostoly Paoly.
Ndray tio faharatsian̈a, izy nahavita ravoravo fo.
Maro problemo tojy izy lera izy nanompo.
Aminy andininy araiky fo zioty,
izy nikoran̈a raha valo aby mety hamono nandalovany,
tafiditry amy zen̈y ‘seky nidiranandra tamy pangalatra.’
Ta Efesosy zioty,
Paoly mety nisy fotoan̈a natoraka tamy bibidy tan̈atiny stady be.
Azafady baka zahava 2 Korintianina 1, vakintsika andininy 8-11.
Zahava raha volan̈iny:
“Fa tsy tianay tsy ho hainaro, rahalahy aby,
fahorian̈a nahazo zahay tamy faritry Asie.”
Izy nanoratra izy ty baka, taminizy ta Eropy, ta Makedonia.
Ty tohiny:
“Fa zahay navoasery farany mare,
mandilatrany din̈inay,
ke na fahin̈ananay fo efa tsy ten̈a azonay antoko eky.
Ia, efa karaha olo handeha hivonen̈a in̈y fahitanay zahay.
Amy zen̈y baka zahay hatoky Zan̈ahary,
araiky mamelon̈o olo maty,
fa tsy aminy ain̈inay.
Fa izy nan̈avotro zahay
tamy fahafatesan̈a seky navoa zahay ndreky mbala han̈avotro zahay,
ary man̈anten̈a izy zahay fa
mbala hanohy han̈avotro zahay fo koa izy.
Anaro koa afaka man̈ampy zahay izikoa fa miangavy amy vavaka, ninay.
Baka ho maro han̈ano mersy Zan̈ahary nohony aminay,
nohony hatsarampan̈ahy aboaka aminay, vokatrany vavaka ataonolo maro.”
Tsy ampy taon̈o araiky talohanizen̈y,
izy nanoratra taratasinany voanalohany nandeha tamy Korintianin̈y.
Tamy zen̈y, izy tan Asie, tanànany Efesosy.
Amy toko faha 15 amy taratasy io,
mivolan̈a karaha ty aminy andininy 32:
“Fa izikoa zaho niady tamy bibidy ta Efesosy, karaha olo sasany,
ino ma hatsaran̈a azoko amy zen̈y?”
Izikoa zahan̈a volan̈anany io,
mety ho ten̈a bibidy arabakiteny ankitin̈y raha natrefiny taminio.
Fa Paoly nino fa olo maty mbala hivilomin̈y, ke zen̈y nan̈amia angovo izy.
Izy nivolan̈a:
“Amy zen̈y baka zahay hatoky Zan̈ahary,
araiky mamelon̈o olo maty,
fa tsy aminy ain̈inay.”
Iro piaramanompo aby io koa ten̈a nankahery izy.
Karaha ty baka hoizy:
“Anaro koa afaka man̈ampy zahay
izikoa fa miangavy amy vavaka, ninay.
Baka ho maro han̈ano mersy Zan̈ahary nohony aminay,
nohony hatsarampan̈ahy aboaka aminay,
vokatrany vavaka ataonolo maro.”
Ravoravo koa atsika fotony manan̈a piaramanompo maro amy fiangonan̈a.
Iro io man̈ampy atsika amy fomba isankarazany.
Nisy fotoan̈a, tamy fanompoan̈a,
Paoly ndreky olo dia araiky taminany
nahatsapa karaha “navoasery farany mare”
baka io ‘fahin̈anandro efa tsy ten̈a azondro antoko eky.’
Taia nazahoany Paoly fan̈ampian̈a?
Tsy taia fa taminy piaramanompo aby io.
Iro nan̈aton̈o izy nankahery ndreky nan̈ampy izy.
Izikoa fa misy antambo, na raha manahiran̈a hafa mandala,
impirimpiry,
efa iro rahalahintsika aby io edy voanalohany avy amy toeran̈a iô
mba han̈ampy ndreky hankahery Kristianin̈y namandro
ndreky olo hafa mila fan̈ampian̈a koa.
Amy zioty, Kristianin̈y efa tsy atoraka amy bibidy an̈atiny stady zen̈y eky.
Fa karaha Paoly,
atsika afaka ho ravoravo fo
ndray iô faharatsian̈a na raha mety hamono mety ho tojy atsika.
Atsika koa samby mety tafiany pangalatra,
na avoa bomabomaka,
intsaka eky izikoa fa misy korontan̈a ataony vahoaka.
Baiboly efa nivolan̈a fa “aminandra farany”,
olo ho “mora masiaka,
tsy ho tia ny tsara.”
Zahava amy video ty,
ino raha nan̈ampy fianakavian̈a araiky ho ravoravo fo
ndray tio faharatsian̈a.
Zaho teraka ta Caracas, fa zioty zahay mipetraka amy tanànanany Petare.
Tsy ialany olo kafiry ndreky mamono olo aminay aty.
Efa taon̈o maromaro zay, ten̈a mampalahelo,
ranabavy pisava lalan̈a araiky zay naty voatifitry.
Karaha zen̈y koa raha navoa zanakanay.
Nisy olo niady narikitry zahay teto
ke izy amy zay navoa bala perdu,
ke direkty naty tiô ny iô.
Malahelo fo zaho koa fa mandeha amy sambranany ao mahita fandrian̈anany.
Karaha zen̈y koa zaho koa fa mahita kiraronany ndreky lamba ten̈a tiany aby io.
Mitomoan̈y fo koa zaho isaka mahita armoiranany.
Tsy nora taminay niatriky izio tamy zen̈y.
Koa fa ren̈indro rahalahy ndreky ranabavy aby io raha nahazo zahay,
iro fa navy edy nan̈ampy.
Iro fo namango nikarakara raha jiaby mifototro fandiven̈ana zanakanay in̈y.
Tafaranizin̈y, za nanjary navozo mare hiboaka tran̈o handeha hitory.
Sambarako hivonenolo fo zahay roeny vadiko.
Nivavaka tamy Jehovah zaho,
ke izy nan̈amia zaho fahendrena,
ke zaho in̈y tapakevitry nandeha nitory fo.
Misy lera za loso eritreritry mandiniky zanakanay in̈y,
azoko onon̈o raha jiaby momba izy.
Karaha mivadiky mahinihiny zaho,
avio za fa tomoan̈y edy.
Fa raha hitako man̈ampy zaho miaritry,
zaho mifantoko amy fampan̈antinan̈any Jehovah, hamelon̈o olo maty.
Ten̈a tiako koa tantarany Lazarosy in̈y,
ke zaho misaintsain̈y zin̈y fo.
Misy volan̈a Marta zay baka amy zin̈y:
‘Haiko fa izy mbala hitsangana aminy andra farany.’
Tsisy ny hafa amy zen̈y koa fatokisako Jehovah.
Haiko fa mbala hivilominy zanakanay in̈y.
Mbala hamiany zahay ndraiky izin̈y.
Tsy ravoravo hely zaho tamy fotoan̈a nisiany raha nandalo in̈y.
Fa izikoa fa nandeha fotoan̈a,
nanjary ravoravo fo zahay
fotony mifantoko amy fan̈antinan̈a familoman̈a olo maty.
Karaha ren̈iko Jehovah mivolan̈a aminaka:
‘Kalma fo anao.’
Izy mira mamepeky za moramora mivolan̈a aminaka:
‘Aloha fo anao fa za han̈ampy anao.
Aza mivadiky,
matokisa fo fa zanakanao in̈y mbala hamiako anao.’
Asa hitanaro ino raha nan̈ampy fianakavian̈a in̈y ho ravoravo fo?
Vavaka,
fan̈antinan̈a familoman̈a olo maty,
fan̈ampian̈a baka amindro rahalahy aby io,
baka io koa fan̈ahiny Jehovah.
Akory koa fomba han̈ampiany Jehovah anao ho ravoravo fo
ndray io faharatsian̈a mety ho tojy anao?
Asa izio fifandraisan̈anao amy Jehovah,
sa iro rahalahy aby io,
sa fan̈antinan̈antsika,
sa raha hafa?
Aminy andra farany zio,
feno ‘fiain̈ana sarotro’ amizioty io,
atsika hampirisihiny ho ravoravo amy fan̈antinan̈antsika,
tsy ho ela tsy ho hisy eky faharatsian̈a io.
Atsika miambin̈y farany donia ratsy ty, karaha Habakoka fo.
Izy koa mba niambin̈y havotin̈a taminolo ratsy fan̈ahy.
Zahava baka Habakoka toko 1.
Iritrireta hely asalohanany.
Man̈odidin̈y izy feno olo kafiry, tia malo avio mampijaly.
Izy nan̈ontany:
‘Jehovah e, firaka ombian̈a … ?
Firaka ombian̈a zaho hangataka vonjy aminao nohony kafiry … ?
Nan̈ino ma zaho ampahitanao raha ratsy?
Nan̈ino ma karaha zahanao fo raha ratsy mandalo io?
Nan̈ino ma olo mamono olo ndreky olo mandrava fo man̈odidin̈y zaho?
Baka io nan̈ino koa misy olo mankany ndreky mimalo?’ Hoizy:
Nan̈ino?
Nan̈ino?
Nan̈ino?
Nan̈ino?
Firaka ombian̈a?
Fa aleva onon̈o baka raha nivolan̈iny amy 2:3:
“Fa mbala amy fotoan̈a voatondro,
zay vo ho tanteraka fahitan̈a io,
sady milomoay mare man̈aton̈o farany ke tsy havandy.
Avio ndray somary ela,
iambesa fo izio!
Fotony, izio tsy maintsy ho tanteraka.
Izio tsy ho tara zen̈y!”
Karaha Habakoka, atsika koa matoky Jehovah.
Atsika matoky fa tsy ho ela Izy han̈afoan̈a faharatsian̈a ndreky kafiry.
Hainy Habakoka fa izy afaka man̈anten̈a Jehovah fo,
ke direkty izy nangataka vonjy taminany.
Habakoka tsy niasaloha be tamy raha navoa izy,
ke hitavandra fo fahaizan̈anany.
Fa izy nivavaka,
nikoran̈iny tao asalohanany ndreky raha tsapany.
Ke ten̈a modely tsara raha zen̈y.
Fanapahankevitrinany io koran̈iny aminy 3:18.
Hoizy:
“Fa zaho mbala hiravoravo amy Jehovah fo,
ndreky hiravoravo amy Zan̈ahary pamonjy zaho.”
Amy zioty koa tiany Jehovah “Pitandren̈y vavaka” io
atsika hatoky izy ke hikoran̈a aminany amy vavaka
raha jiaby mampiasaloha atsika.
Jehovah tsy nan̈asiaka Habakoka taminizy nikoran̈a raha nampiasaloha izy in̈y.
Ndray izio nirahiny nisoratiny,
mba han̈aboahan̈a fa
aradalàn̈a izikoa atsika mahatsapa karaha zen̈y ndraikindraiky.
Fa tiany Jehovah atsika hivavaka aminany.
Izikoa atsika man̈ano zen̈y, hivaliny vavaka ataontsika,
aboakany atsika fitiavany atsika
ke hampiany atsika hahay raha tokony atao.
Ampiany hahay fomba fisain̈anany atsika
na ino na ino problemo mahazo atsiaka.
Vavaka ataontsika baka amy fô,
an̈isany fomba araiky maventy han̈aboahantsika fatokisantsika Jehovah.
Ravoravo atsika mahay fa
Jehovah von̈ono han̈avotro atsika
amy faharatsian̈a jiaby mety hamono atsika.
Rahalahy David Schafer, pan̈ampy amy Komitiny Fampianaran̈a,
zioty handeha han̈ano fizaran̈a farany amy kabaro mifampitohy ty,
“Atsika Afaka ho Ravoravo Fo
Ndray... Iô Sabatra.”
Tamy Paoly nigadra voanalohany ta Roma tan̈y,
kadiriny tamy taon̈o 59 firaka tamy taon̈o 61,
izy nambelandro nipetraka tamy tran̈o nifodroeny,
ndreky nisy maramila niambin̈y izy tao isanandra.
Tan̈aty taon̈o aroe,
izy nitory tamy lan̈iany olo navy taminany tao
sady nanoratra taratasy aby ty:
Efesianina, Filipianina,
Kolosianina, Filemona,
ndreky Hebreo.
Koa fa baka tio amy zay
navosotro izy.
Afaka nan̈ano asany misionera ndraiky izy.
Nafaka nanoratra tamy Timoty izy,
nanompo ta Efesosy Timoty tamy zen̈y.
Nanoratra tamy Titosy koa izy,
tamy Titosy nanompo ta Kreta.
Tafara heliny zen̈y,
nisy tatitry baka tamy Néron panjaka Romanin̈y,
fa ho sazin̈y Kristianin̈y aby io nohony motro nan̈oro tanàna ta Roma tan̈y.
Ke nivahorandro silisily ndraiky Paoly.
Tafarany iro taon̈o maro,
izy tsy nivadiky fa nanohy fanompoan̈a fo io,
ino raha tsapany Paoly?
Hitantsika tamy taratasy faharoe nisoratiny
handeha tamy Timoty taminizy nigadra, valinizen̈y.
Avadia amy 2 Timoty toko 4 ao baka Baibolinaro.
Nitondra sabatra ma iro lelahy nanambotro Paoly aby io?
Azo antoko zen̈y.
Nahita sabatra zen̈y ma nahavy Paoly
nahatsiaro Panjaka Heroda Agripa I
namono Jakoba,
rahalahiny Jaona, tamy sabatra in̈y?
Mety ho zen̈y.
Fa hainy Paoly fa
hivonen̈a amy sabatra izy
izikoa zahan̈a raha koran̈iny Timoty faha-2.
Baka io misy raha hafa koa koran̈iny ao.
Hitantsika ao raha telo nan̈ampy Paoly
baka hanan̈any finoan̈a matanjaka fo ndray hivonen̈a izy.
Alo baka hivakintsika
2 Timoty 4:6-8:
‘Fa efa araraka mira fan̈atitry raha igian̈a zaho,
avio efa marikitry fotoan̈a voatondro han̈adosoan̈a zaho.’
Raha tiany volan̈iny io,
izy hofoaty,
fa afara an̈y izy
mbala hivilomin̈y ndraiky handeha amy Fanjakan̈any Kristy.
Avio karaha ty andinin̈y faha-7
‘Efa niady ady tsara zaho,
efa nahavita lomoainaka zaho.’
‘Nahavita’ hoizy,
efa nazony antoko fa
handresy firaka amy farany izy.
Ho izy baka tio:
‘Efa nitana finoan̈a zaho.
Manomboko zioty,
efa akajin̈a ninaka satroboninahitriny fahamarin̈ana.’
Ke hitantsika eto fa
ten̈a nan̈atanjaka izy fan̈antinan̈anany.
Hoizy baka tio:
‘Tompo, pitsara marin̈y io,
han̈amia zaho valisoa zen̈y aminy andra zen̈y.’
Tsy hitanao baka amy zen̈y fa
ten̈a natanjaka fifandraisany Paoly tamy Jehovah?
Ndreky izy natoky tsarabe fa
ten̈a hamaly hatsaran̈a izy Zanaka Zan̈ahary?
Avio izy nivolan̈a:
‘Avio tsy ninaka zaraiky fo fa
ninolo jiaby man̈iry mare ny hiboahany koa.’
Ten̈a tia iro rahalahiny aby io Paoly
sady tsy nan̈adin̈a iro.
Ten̈a nahavy Paoly ho ravoravo,
ndray izy handeha hivonen̈a,
fisiandro rahalahiny aby io,
fifandraisany tamy Jehovah,
ndreky fan̈antinan̈anany.
Paoly ndraiky tsy nan̈iry hofoaty.
Raha ny marin̈y
tiany izy ho velon̈o sady hanompo Jehovah
miaraka amindro rahalahy ndreky ranabaviny aby io fo.
Fa izy ten̈a nisy korazy,
ke zen̈y nahavy izy von̈ono hofoaty.
Izy niravoravo taminy hatsaran̈a miambin̈y izy.
Afaka ho ravoravo karaha nataony Paoly koa atsika
ndray hivonen̈a koa.
Amy fomba akory?
Hizahavantsika Romanina 8:35,
andininteny fototro aminizity,
hahitantsika zen̈y.
Ino valiny fan̈ontanian̈a napetraka Paoly ty:
‘Ino hampisaraka atsika amy fitiavany Kristy?
Fahorian̈a sa fijalian̈a,
sa fan̈injehan̈a,
sa mosary, sa tsisy lamba,
sa faharatsian̈a, sa sabatra?’
Mamaly zen̈y andininy faha 38
ndreky 39:
‘Fa matoky zaho fa
na fahafatesan̈a,
na fiain̈ana,
na anjely, fitondrampanjakan̈a,
na raha zioty, na raha ho avy,
na angovo,
na an̈abo, na ambany,
na zavaboary hafa,
tsisy hahasaraka atsika amy fitiavany Zan̈ahary,
aboaka baka amy Kristy Jesosy Tompontsika.’
Jehovah mbala tia panomponany fo
ndray iro mbala mijanon̈o an̈aty fasan̈a an̈y an̈aty fotoan̈a fohiky.
Mbala tiany Jehovah fo ma Abrahama, Isaka, ndreky Jakoba?
Akory koa momba Saraha,
Rebeka, Joba, ndreky Daniela?
Karakory koa momba iro jiaby naty nigadra, tamy toby fitanan̈a tan̈y,
nohony finoan̈andro in̈y?
Jehovah ma mbala tia iro?
Matokisa fa tiany iro.
Mbala tiany koa iro rahalahy ndreky ranabavy anjatony
natiny aretin̈y COVID-19 tamy fanjava tato zay.
Tiany koa dadinao,
papanao,
ndreky iro kibo araiky aminao.
An̈aty fitadidian̈anany ao aby iro jiaby,
sady mbala himpody hivilomin̈y koa.
Raha zen̈y man̈ampy atsika tsy havozo
izikoa fa hivonen̈a amy sabatra karaha Paoly in̈y.
Zioty
aleva onon̈o amy video man̈araka ty
ino raha namiany Jehovah nan̈ampy Rahalahy Baite Michael Dugbe
ho ravoravo fo ndray izy handeha hivonen̈a.
Izikoa miovaova fiain̈ananao,
izikoa tsisy raha mety atokisanao,
efa fifandraisanao amy Jehovah edy raha mety tavandrain̈y.
An̈arako Baite Michael Dugbe.
Za teraka ta Monrovie a Libéria,
taminy 1980.
Nilamin̈y fiain̈ananay tan̈y, tamy mbala tsendriky nisy lagera.
Ry olobeko tia zaho mare.
Tran̈onay tsara,
baka io lekoly nianaranay koa tsara.
Fa tamy za sivy taon̈o,
tio fo niova raha jiaby.
Nikoran̈iny vaovao fa
nisy olo panohitry aby io mila han̈ongampanjakan̈a.
Navozo olo jiaby taminio.
Tsisy olo niasa. Tsisy raha nandeha.
Salakady tsisy jiro,
baka io tsisy rano koa.
Tapaka jiaby.
Ten̈a tsy nilamin̈y foeky taon̈o maromaro tafaranizio.
Taminy 1996,
ravan̈a eky raha jiaby, fotony vaky lagera.
Niditry tantanàna iro pan̈ongampanjakan̈a aby io.
Maro olo niravainolo.
Tifitifitry fa tsy volan̈iny foeky.
Nampijalindro mare olo, izikoa tsy nan̈eky han̈ano lagera miaraka amindro.
Koa fa misy raha karaha zen̈y mandalo,
antena mavozo tsy somasoma.
Izikoa antena mavozo be karaha zen̈y,
raha farany tsara atao
mivavaka amy Jehovah,
mangataka taridalan̈a aminany,
mba hahaizan̈a raha tokony hatao.
Nahainan̈aton̈o tany nisy zahay fo lagerandro io,
ke zahay tsy tafidoko eky.
Tsy maintsy nilefa zahay,
safe zahay nandeha tamy birony sampan̈a tan̈y.
Tsara fan̈ahy iro rahalahy tao,
ke zahay nikarakaraindro tsara.
Arapan̈ahinay koa nikarakaraindro tsara.
Mankasitraka Jehovah za tsy naty tamizin̈y.
Nisy raha aroe nan̈ampy zahay niaritry.
Voanalohany,
fifandraisanay tamy Jehovah.
Zen̈y ten̈a nahavy zahay tsy nikorontantsain̈y foeky.
Faharoe,
fan̈ampiandro rahalahy ndreky ranabavy aby io koa
nahavy zahay tsy naty tamizin̈y.
Hitanay tamizin̈y fa ten̈a ilain̈y iro rahalahy ndreky ranabavy aby io.
Ravoravo mare zaho zioty miasa amy Sampandraharahany Feo Ndreky Video.
Tiako koa iro rahalahy ndreky ranabavy miaraka miasa aminaka.
Mankasitraka Jehovah zaho
fotony mbala velon̈o
ndreky manompo izy fo isanandra.
Video in̈y nampatsiaro atsika fa
mety hofoaty olo
na lera karakory na lera karakory,
izikoa mbala amy donia ty.
Fa ino raha nan̈ampy Rahalahy Dugbe
ho ravoravo fo ndray izy handeha hivonen̈a?
Fifandraisany tamy Jehovah,
avio koa iro rahalahiny aby io
nan̈ampy izy baka hanan̈a fan̈antinan̈a fo
tamy fianaran̈a tsy tapaka,
fivorian̈a, ndreky fanompoan̈a.
Mety tsy maintsy hofoaty nohony finoan̈antsika koa ma sasany amintsika
karaha iro Kristianin̈y tamy taonjato voanalohany
ndreky karaha Vavolombelon̈o sasany?
Ia.
Tsy azo antoko fa tsy hisy problemo atsika amy donia ty.
Ary mety nohony antony maro,
iô aretin̈y, aksidan,
na nohony antony hafa efa tsy vaovao amintsika
aminy andra farany zioty.
Atsika mety hofoaty alohany donia vaovao avy,
karaha maro amindro rahalahy ndreky anabavintsika aby io fo.
Na atsika mety ho tafitsaka velon̈o amy fahorian̈a be an̈y.
Ndray karakory,
tokony ho tapakevitry tsy hivadiky amy Jehovah
firaka amy farany atsika.
“Lan̈iany miaritry firaka amy farany fo ho voavonjy.”
Izikoa atsika mihevitry fa
atsika tsy hofoaty alohany donia vaovao avy,
mety tsy ho von̈ono hifoaty atsika izikoa ilain̈y zen̈y
baka tsy hivadihan̈a.
Mira zen̈y fo,
izikoa atsika mieritreritry fa atsika hofoaty alohany fahorian̈a be avy,
atsika tsy ho von̈ono hiatriky raha sarotro hiboaka amy zen̈y.
Fa ndray karakory,
ho von̈ono atsika
izikoa mifandray tsara amy Jehovah fo,
ndreky mitadidy fa
andra farany zioty.
“Ke anaro miambesa fo”, ho Jesosy,
“fotony tsy hainaro andra haviany Tomponaro.”
Tokony handiniky tsarabe raha nahavy apostoly Paoly tsy hivadiky atsika,
karaha volan̈iny Romanina 8:35.
Ke ino raha nianarantsika tamy kabaro mifampitohy ty?
Hitantsika baka tamy Romanina 8:35-39 fa
tsisy raha sarotro
afaka manakan̈a Jehovah tsy ho tia atsika.
Fahaizantsika fa atsika ankasitrahiny Jehovah sady ten̈a tiany,
ten̈a han̈ampy atsika ho ravoravo ndray misy fahorian̈a,
fijalian̈a,
fan̈injehan̈a,
mosary,
tsy fanan̈ana lamba,
faharatsian̈a,
sabatra na raha sarotro hafa.
Ke mifen̈a fo hifandray marikitry aminy araiky ten̈a tia anao,
Jehovah.
Hankafatara fatokisanao Jehovah
baka amy fianaran̈a manokan̈a, ndreky vavaka.
Ameza toky fo fonao fa anao ten̈a tiany.
Tiava mare iro rahalahinao aby io,
mifandraisa tsara amindro fo.
Ankafiza fan̈antinan̈anao baka amy Zan̈ahary,
avio saintsain̈a fo “ten̈a fiain̈ana” ambesantsika io.
Ty farany,
aza hadin̈a vavaka voasoratra amy Kolosianina 1:11 ao.
Na ino na ino raha sarotro mahazo atsika, rahalahy aby,
ho ravoravo karaha apostoly Paoly fo koa atsika
izikoa man̈ano raha aby io.
Aleva onon̈o raha mankahery
koran̈iny Kolosianina 1:11 ty:
‘Avio irarian̈a anaro
hatanjahin̈y aminy angovo jiaby,
eraka habezany angovonany be voninahitry.’
Man̈ano karakory ma habezany ‘angovo be voninahitry Zan̈ahary’ io?
Tsy azontsika sary antsain̈y raha zen̈y.
Koran̈iny Baiboly raha efa nataony Jehovah
ndreky raha mbala hataony aminy hoavy
baka amy fan̈ahy masin̈y,
angovo farany mahery io.
Ino koa antony mahavy izy man̈amia anao fan̈ahy masin̈y io?
Tsy raha baka hahavy anao hahavita hiaritry fo
na baka hahavy anao hiaritry firaka amy farany fo,
na baka hahavy anao hiaritry
ndreky hanan̈a faharetan̈a fo,
tsy zen̈y fo,
fa baka hahavy anao hahavita hiaritry
sady ho ravoravo.
Ke raha zen̈y ten̈a han̈ampy atsika ho afaka hiaritry
raha sarotro isankarazany
ndray karakory ndray karakory
fotony
hataony Babantsika be fitiavan̈a io
hahavy atsika ho ravoravo fo
amy zioty
firaka mandrakizay.
Man̈ano mersy anaro rahalahy tamy kabaro mankahery aby in̈y.
Ndreky zahay man̈ano mersy Jehovah
fotiny izy man̈amia raha ilainay baka hahavy zahay ho ravoravo fo.
Alô atsika zioty hitsangan̈a
hiaraka han̈ano Hira 9:
“Jehovah no Mpanjakantsika”
Hira 9:

Fivoriambeny Vondroparitry 2020 “Miravoravoa Fo”!: Dimansy Maraindrain̈y (Fizaran̈a 1)