JW subtitle extractor

Mbala tanora Maria nifidiny Jehovah,
han̈ano asa araiky ten̈a sarotro.
Araiky fo ndraiky asa io fa
ten̈a mitaky finoan̈a matanjaka.
Izio hikarakara ndreky hitaiza
zanaka lahitokan̈any Zan̈ahary,
Jesosy Kristy.
Zen̈y tombontsoa araiky tsisy ambaka izy.
Fa asa io ten̈a nitaky
finoan̈a matanjaka tamy Maria,
fotony izio tsy vitany fa andraikitry maventy fo fa
mbala asa mahadin̈y an̈atiny taon̈o maro koa.
Fa tsy zen̈y fo fa
talohany Maria han̈eky izio,
izy mety nisy raha nampiasa loha izy.
An̈isany zen̈y zio
ino raha handeha hivolan̈indro
kamaradiny aby io,
piaramonin̈y taminany,
ndreky ry havany,
avio Josefa fiansenany.
Salakady anjely io tsy raha nivolan̈a taminany,
“anao aza miasa loha fa zaho handeha
hikoran̈a aminolo jiaby mahay anao,
karaha io iro tsy ho meloko aminao.”
Ke misaora tsy nora mare tamy Maria,
handeha han̈ano andraikitry maventy be io.
Fa asa azonao sary antsain̈y
karakory valinteninany?
Han̈ampy atsika amy zen̈y,
alô atsika hizaha video hely ty.
Zaho efa fianseny Josefa,
nieritreritry zaho fa fiain̈ananay
ho tsotra sady hilamin̈y.
Fa tampoko tio,
niova raha jiaby.
Haiko ndraiky fa ndraikindraiky,
Zan̈ahary man̈iraka atsika han̈ano raha sarotro.
Fa araiky ty,
karaha tsy ho posibla ho vitanay foeky.
Kanefa haiko fa Jehovah tsy maintsy han̈ampy zaho.
Koa zahay tsy mivadiky aminany,
ke karakarainay tsara Zanakanany io,
izy koa tsy hivadiky aminay foeky,
ke han̈amia zahay raha ilainay.
Izikoa zahavantsika fiain̈anany Maria,
izy nan̈iry hanan̈a fiain̈ana milamin̈y,
tsisy raha mankasarotro.
Fa tio fo, niova fiain̈ananany jiaby
ndray izy aby mety hitany
karaha tsy posibla aminany foeky,
handeha han̈eky andraikitry io.
Kanefa ino raha nivolan̈iny baka tio?
Azafady sambora Baibolinaro,
avio sokafa amy Lioka 1:38.
Lioka 1:38.
Karaha ty raha nambarany Maria:
“Intỳ aho mpanompovavin’i Jehovah!
Enga anie ho tanteraka amiko
izany araka ny teninao!”
Izy ten̈a nanampinoan̈a sady nanetry ten̈a,
ke nikeny asa sarotro be io.
Hainy baka fa Jehovah ho iô fo han̈ampy izy.
Fa ino raha nan̈ampy Maria ho
fatatra finoan̈a karaha zen̈y?
Hitantsika valiny zen̈y,
aminy andininy faha-46 amy toko io fo.
Amy Lioka 1:46, tsy vakintsika andininy io.
Fa fan̈azavan̈a amy Baiboly fianaran̈a
amy teny angiley mivolan̈a,
hoizy:
“Mandilatrany in-20 amy
volan̈a fideran̈a nataony Maria
aminy andininy faha-46-55 ao io,
volan̈a hita amy Soratra Hebreo an̈y.
Hita amy volan̈anany aby io
fa Maria nifandray tsara tamy Jehovah,
sady mahay tsarabe Soratra Masin̈y.
Hita baka amizio koa fa izy nahay nankasitraka.
Maria nivolan̈a fa,
Jehovah mampietry olo an̈abo
ndreky olo matanjaka
fa man̈ampy olo ambany ndreky masikiny
man̈iry han̈ompo izy.”
Volan̈a aby io man̈aboaka fa
lalin̈y ankitin̈y finoan̈any Maria.
Finoan̈any Maria io,
niorin̈y baka tamy raha hainy
tan̈atiny Soratra Masin̈y.
Kanefa izy mety tsy manan̈a Soratra Masin̈y io
vita dika mitovy taminany tao.
Fa mety raha ren̈iny nivakina
tamy Synagoga tan̈y,
izy nalainy onon̈o io.
Maharikian̈a, tsy zen̈y?
Tadidiny Maria, sady tiany mare
iro volan̈a tan̈atiny Soratra Hebreo tao.
Volan̈a aby io baka efa
tafiditry mare tan̈atiny fonany tao,
ke niboaka ho azy iro io,
izikoa izy efa nidera Jehovah.
Maria dikany zen̈y
ten̈a fatatra finoan̈a.
Sady finoan̈anany io niorin̈y
tamy Soratra Masin̈y.
Zen̈y nahavy mety tsara,
izikoa izy nirahin̈y nan̈ano asa io.
Fa karakory atsika?
Akory mety hangalantsika tahaka
finoan̈a matanjaka nanan̈any Maria io?
Lera anao mizaha video araiky ty,
aleva onon̈o fa mila manan̈a finoan̈a matanjaka
mira izy atsika,
ndray samihafa asa ampan̈irahan̈a atsika.
Taminy iro vo nikoran̈a izio taminaka,
ho zaho,
‘tsao mba diso hevitry iro e!
Ahia ke zaho edy,
handeha hiandraikitry sampanasa araiky,
amy fivoriambe iraisampirenena!’
Zaho nieritreritry,
‘karaha tsy ho vitako ndraiky izity e!’
Fa zaho efa nieritreritry karaha zen̈y koa
taon̈o maro loso zay,
tamy zaho nirahiny nanompo
tamy Komitiny Vonjy Rano Vaky,
ndreky tamy zaho nanompo
tamy Komity Mifandray aminy Hopitaly.
Raha ny marin̈y zaho mahatsapa karaha zen̈y fo,
isaka misy asa vaovao
ampan̈irahany Jehovah zaho.
Fa raha nianarako,
Jehovah von̈ono fo han̈ampy.
Ke izikoa fa misy raha karaha sarotro hoe,
hirahiny Jehovah ataoko,
direkty zaho mampatsiaro ain̈inaka,
zaho mila mivavaka ndreky mifen̈y tsy mivadiky,
baka io mifen̈y fo hanan̈a finoan̈a,
fa izy han̈amia zaho raha ilaiko.
Anao ma fa nahatsapa karaha rahalahy tiô in̈y?
Atsika mety efa navy nahatsapa
karaha raha nivolan̈iny:
‘Taminiro vo nikoran̈a izio taminaka,
ho zaho,
tsao mba diso hevitry iro e!’
Azo antoko fa efa navy nisy tamintsika
nieritreritry karaha zen̈y.
Fa ino nan̈ampy rahalahy in̈y?
Tadidiny fa efa navy nisy fotoan̈a,
Jehovah nan̈ampy izy tamy raha karaha zen̈y.
Asa tsaroanao taminizy nangala onon̈o fotoan̈a,
taminizy an̈isany Komitiny Vonjy Rano Vaky in̈y?
Mbala tanora izy taminio.
Kanefa iro rahalahy niaraka niasa taminany aby io,
niambin̈y toromariky baka taminany.
Maventy andraikitry zen̈y.
Baka io nisy fotoan̈a koa izy nisolo ten̈a
Komity Mifandray amy Lopitaly.
Tsaroanao taminizy nipetraka tamy koloara in̈y
baka io nisy man̈angy nitondra izy?
Tsy mba nitokitokiky foeky
sorany man̈angy io fa mentitry hoe.
Ndray iro piasany lopitaly aby tan̈aty
tran̈o in̈y tao koa karaha zen̈y.
Ten̈a tsy mora man̈ano
andraikitry karaha zen̈y.
Fa ino nivolan̈iny rahalahy in̈y?
Raha nan̈ampy izy hoizy
vavaka, tsy fivadihan̈a,
avio fanan̈ana finoan̈a.
Ke miran̈a Maria,
atsika afaka mamparavoravo Jehovah,
izikoa atsika mifen̈y ho fatatra finoan̈a.
Atsika mila mifen̈y fo
manetry ten̈a ndreky matoky tanteraka Jehovah.
Mikoran̈a momba fatokisan̈a io,
amy bokiny Salamo.
Alô zahavantsika Salamo 56:3,4.
Salamo 56:3,4:
“Rehefa matahotra aho, dia mitoky aminao.
Tafaray amin’Andriamanitra aho,
ka hidera ny teniny.
Andriamanitra no itokisako,
ka tsy hatahotra aho.
Inona moa no azon’ny olona atao amiko?”
Karaha panoratra Salamo io ndreky Maria,
atsika koa afaka matoky tanteraka Jehovah.
Irarian̈a atsika,
han̈aboaka finoan̈a matanjaka,
izikoa atsika ampan̈anaovin̈y asa sarotro.
Atsika mila matoky Jehovah,
matoky fa izy hamaly hatsaran̈a atsika,
miran̈a nataony tamy Maria.
Han̈ano tapany man̈araka
amy kabaro mifampitohy ty,
Rahalahy Leonard Myers,
pan̈ampy amy Komitiny Fan̈oratan̈a.
Titrany kabaronany,
“Aleva Tahaka iro Man̈angy Fatatra Finoan̈a!
Man̈angy Fenisianin̈y In̈y.”

Geoffrey W. Jackson: Aleva Tahaka iro Man̈angy Fatatra Finoan̈a!—Maria Reniny Jesosy