JW subtitle extractor

Ten más kópia di Bíblia na mundu di ki kalker otu livru.
Má simé txeu algen ta atxa ma Bíblia
é un livru konplikadu ô grandi dimás pa lé.
Si é si ki bu ta xinti, bu ka sta bo sô.
Odja alguns kuza ki pode djuda-u
kumesa ta lé i ta gosta di Bíblia.
Primeru, skodje un traduson modérnu,
di kunfiansa i ki é fásil di lé.
Alguns Bíblia ki é txeu konxedu
traduzidu dja ten un monti anu
i es uza palavras ki é difísil di intende oji.
É más fásil bu intende Bíblia
si bu lé un traduson modérnu
ki ten palavras ki pesoas ta uza oji.
Pur izénplu, Bíblia Traduson di Mundu Novu
é un di kes traduson más izatu i fásil di lé ki ten.
Sugundu, skodje na undi ki bu ta kumesa.
Talvês bu pode pensa ma bu ten ki kumesa
na primeru livru di Bíblia.
Bu pode faze kel-la.
Má Bíblia é un livru ki ten 66 livru pikinoti.
Alguns ta pâpia di stória i otus ten puéma, vizon i profesias.
Envês di lé Bíblia di komésu pa fin,
alguns algen ta disidi kumesa pa kes livru
ki es ta atxa más interesanti
i ki ta toka-s más txeu.
Pur izénplu, si bu gosta di puéma,
bu pode kumesa ta lé Salmus
ki ten txeu puéma bunitu i bons konsedju.
Ô bu pode kumesa ta lé livru di Markus
ki é un livru pikinoti i sábi ki ten stória di vida di Jizus Kristu.
Si bu lé livru di Markus sô alguns minutu pa dia,
bu ta pode lé kel livru interu na ménus di 10 dia.
Tirseru, obi gravason di Bíblia.
El ta djuda-u imajina kes stória di Bíblia i intende-s más faxi.
“Kantu Jizus entra na Jiruzalen, sidadi interu staba ajitadu
i gentis staba ta fla: “Kel-li é kenha?”  
Kes monti di algen responde:
“Kel-li é Jizus, kel proféta di Nazaré di Galilea!””
Si ten un gravason di Bíblia na bu língua,
bu pode obi leitura di Bíblia kalker óra ki bu krê.
Kuartu, si bu krê atxa respósta pa perguntas di Bíblia,
bu pode faze piskiza.
Bu pode faze kel-li na jw.org.
Kel-li pode djuda-u atxa testus di Bíblia
ki ta pâpia di asuntus ki é inportanti pa bo,
sima modi ki bu pode lida ku fadiga.
Tanbê bu pode diskarega Traduson di Mundu Novu
ki é un traduson di Bíblia sinplis
ki ten txeu feraménta di piskiza ki pode djuda-u.
El sta disponível di grasa na más di 100 língua.
Ka ta inporta modi ki bu disidi lé Bíblia,
bale péna studa i prende más sobri el.
El ten bons konsedju ki pode uzadu na kalker ténpu ô kultura
i el ta responde perguntas difísil i inportanti di vida.
Milhons di algen ki dja lé Bíblia diskubri ma
faze kel-li é sábi i ma dja midjora ses vida.
Pamodi ki bu ka ta tenta faze kel-li?
Pa bu prende más sobri Bíblia bai na jw.org.

Modi ki bu pode kumesa ta lé Bíblia