JW subtitle extractor

Tiany Jehovah atsika ho ravoravo manompo izy.
Zen̈y koran̈iny Salamo 100:2:
“Miravoravoa manompo Jehovah.”
Maro raha mamparavoravo namiany atsika.
Namiany fahin̈ana atsika,
namiany Baiboly baka ahaizantsika hankafy fiain̈ana.
Avio ataony koa raha hahavy atsika hanan̈a raha maro mamparavoravo hitantaraintsika.
Baka amy Jehovah ankitin̈y mamparavoravo atsika.
Tsy karaha zen̈y foeky Satana.
Tsy tiany atsika ravoravo manompo Jehovah.
Fotony nan̈ino?
Hainy fa atsika koa ravoravo,
tsy ho voly hitory ndreky hampianatra atsika,
kanefa tanjon̈onany hampijanon̈o asa io.
Ke mifen̈y izy man̈ano raha tsy hamparavoravo atsika.
Mampiasa fanjakan̈a aby io izy hanohitry asantsika,
na koa mety fianakaviantsika
ndreky olo tanàna araiky amintsika.
Tiany Satana izikoa hely fo fotoan̈a hanompoantsika Jehovah,
fa handany lera amy tady vola baka hivangan̈a raha tsy ilain̈y.
Tiany baka atsika hieritreritry fa
ho ravoravo mare atsika,
izikoa tsy voly mamory fanan̈ana.
Zen̈y zala tsy izy e.
Tetiky Satana io tsy raha vaovao.
Alo baka atsika hamaky tapatapany amy bokiny Ezra,
Hagay ndreky Zakaria.
Zahava ino raha hitanao mba mety hataontsika,
baka atsika ho ‘ravoravo fo manompo Jehovah.’
Aleva onon̈o tsarabe
ino raha namparavoravo olony Jehovah taloha tan̈y,
avio nan̈ino iro nivadiky tsy ravoravo koa.
Diniha koa
nan̈ino atsika mila ‘haravoan̈a baka amy Jehovah’,
avio akory hataontsika ho ravoravo fo,
ndray atsika misy problemo.
Ezra io pisoron̈o salakady panoratra Lalàn̈any Mosesy.
Izy nanoratra bokiny Ezra.
Mbala manohy tantarany Israelita voakoran̈a amy farany Tantara Faharoe izy
aminy Ezra io.
Mbala izy fo koa nanoratra izio.
Maro Jiosy nimpody ta Joda tan̈y tamy taon̈o 537 T.K.
Tan̈atiny 70 taon̈o iro andevo ta Babylony,
fotony iro nanompo sampy.
Tontohitry iro koa fa nijaly,
ke nahazo jery tsy himpody hanompo sampy eky.
Tamy zen̈y nan̈ampian̈a iro olo ta Jerosalema tao
baka iro himpody hanompo Jehovah amy fomba tiany ndraiky koa.
Tantarainizio ao fanjakan̈andro panjaka Persianin̈y aby io,
nanomboko tamy Panjaka Kyrosy.
Ten̈a namparavoravo raha nataony tamy zen̈y.
Areha amy Baibolinaro azafady,
famakian̈a Ezra 1:1-6.
Baka tanteraka volan̈a Jehovah nambarany Jeremia,
tamy taon̈o voanalohany nanjakany Kyrosy panjakany Persy,
Jehovah nandrisiky Panjaka Kyrosy
han̈ambara volan̈a aby ty amy tany jiaby nanjakany sady nanoratra izio:
Karaha ty ho Kyrosy, panjakany Persy:
“Efa namiany Jehovah Zan̈ahariny lan̈itry zaho fanjakan̈a jiaby ambony tany eto.
Zaho nirahiny han̈amboatra tran̈onany a Jerosalema, a Joda an̈y.
Irarian̈a Zan̈ahary tsy hiala anaro,
lan̈iany manompo izy.
Avio manongà a Jerosalema a Joda an̈y anaro,
han̈amboatra tran̈ony Jehovah ta Jerosalema in̈y.
Izy ten̈a Zan̈ahary.
Lan̈iany mbala tavela kanefa mbala hiala tany misy iro,
na aia na aia izio,
iro olo amy tany misy iro han̈ampy iro,
han̈amia iro volafotsy,
volamena ndreky fanan̈ana,
avio biby tarimin̈y
ndreky fan̈atitry antsitrapo.
Hampiasain̈y amy tran̈ony Zan̈ahary a Jerosalema raha jiaby zen̈y.”
Ke iro lohany fianakaviambeny Joda ndreky Benjamina, ndreky pisoron̈o ndreky Levita,
olo jiaby narisiky Zan̈ahary,
nioman̈a hanonga, han̈amboatra tran̈ony Jehovah ta Jerosalema tan̈y.
Iro olo jiaby nan̈odidin̈y nan̈ampy iro,
nan̈amia iro fitaovan̈a volafotsy, ndreky volamena, ndreky fanan̈ana,
ndreky biby tarimin̈y ndreky raha maro valera,
niaraka tamy raha jiaby namian̈a antsitrapo.
Iritrireta hely baka!
Jehovah nahavy Kyrosy nan̈amia didy han̈amboaran̈a tempoly,
ke tafimpody tamy tanindro iro Jiosy aby io.
Naro Jiosy ravoravo nimpody tan̈y han̈ano asa io.
Sasany tamindro ndraiky tsy nafaka nimpody tan̈y,
fa iro fo nanohan̈a lan̈iany olo nafaka nandeha.
Kadiriny taminy Avrily taon̈o 537 T.K.,
efa tsy ela ho 50 000 Israelita niala ta Babylony.
Nitariky diandro tamy zen̈y
Jesoa na Josoa pisoron̈obe,
avio Zerobabela governera nifidiny Kyrosy.
Ravoravo iro navy ta Joda,
kadiriny tamy faramparany Oktobra
na voalohandohany Novambra tio!
Fa karakory nataondro baka iro ho ravoravo fo?
Zahava baka raha nataondro, niaraka iro navy tan̈y.
Alo tandrin̈esantsika
Ezra 3:1-6:
Tamy fanjava fahafito,
efa tamy tanànandro iro Israelita aby io taminio,
iro jiaby nivory ta Jerosalema.
Jesoa zanaka Jozadaka
ndreky iro pisoron̈o aby io
ndreky Zerobabela zanaka Sealtiela
ndreky iro rahalahiny aby io
nitsangana nan̈amboatra alitarany Zan̈ahariny Israely,
baka iro mahavita man̈ano soron̈o iroan̈a tio.
Zen̈y raha voasoratra amy Lalàn̈any Mosesy,
olony Zan̈ahary marin̈y.
Ke nan̈amboatra alitara iro,
tamy tany nisy izy taloha in̈y fo,
ndray iro navozo firenena nan̈odidin̈y iro.
Iro baka tio efa nan̈ano soron̈o iroan̈a niny Jehovah edy,
isaka maraindrain̈y ndreky arivariva.
Iro amy zay nan̈ano Fetiny Tran̈o Rantsakazo mifan̈araka amy raha efa voasoratra.
Nan̈ano soron̈o iroan̈a iro isanandra,
erakany kontiny mila hatao isanandra.
Baka io iro nan̈ano fan̈atitry iroan̈a efa mahazatra in̈y fo koa,
ndreky fan̈atitry isaka fanjava tondroen̈y,
ndreky fan̈atitry amy lerany fety masin̈y jiaby niny Jehovah.
Nan̈ano fan̈atitry iroan̈a koa lan̈iany olo narisikiny fondro,
nan̈amia Jehovah fan̈atitry antsitrapo.
Ke nanomboko taminy andra voanalohany tamy fahafitony fanjava,
mbala tsy vita fototrony tempoliny Jehovah taminio,
iro nan̈amia Jehovah soron̈o iroan̈a.
Asa niremarkenaro tio fa
iro Jiosy aby io nimpody nanompo Jehovah fo,
ndray iro ‘navozo iro firenena nan̈odidin̈y iro’?
Ravoravo mare iro tamy zen̈y,
fotony nisy korazy nan̈ano asany Jehovah.
Zen̈y raha efa nivolan̈iny Mosesy,
taminizy nan̈iraka iro Israelita aby io han̈ano Fetiny Tran̈o Rantsankazo.
Ho izy:
“Ho ravoravo ankitin̈y anaro.”
Koa fa nierin̈y taon̈o,
vita fan̈amboaran̈a fototrony tempoly io.
Alo baka tandrin̈esantsika raha koran̈iny Ezra3:10-13:
Koa fa napetrakandro pan̈amboatra tran̈o io fototrony tempoliny Jehovah io,
nitsangana nidera Jehovah iro pisoron̈o nan̈ano lambany fisoron̈ana aby io,
niaraka tamy trompetindro,
ndreky iro Levita aby io,
ndreky iro zanakany Asafa aby io,
nifan̈araka tamy raha nan̈irahany Davida Panjakany Israely.
Nanomboko nan̈ano hira nifamalimaly amy zay iro nidera Jehovah, ‘fotony tsara izy;
tsy ho ravan̈a foeky fitiavany Israely.’
Olo jiaby amy zay nihira naresaka nidera Jehovah,
fotony vita fototrony tran̈ony Jehovah.
Maro koa pisoron̈o ndreky Levita
ndreky iro matoelahy lohany fianakaviambendro nahita tran̈o io rango taloha tan̈y,
nitomoan̈y mare iro koa fa nahita fototro tran̈o io navoamboatra.
Maro koa nihira mare erakany efandro.
Ke efa tsy hainolo eky nan̈avaka hira ndreky tomoan̈y,
fotony ren̈y firaka farany lavitry feonolo aby io.
Ny raha nisy baka,
tsy nazonazony sasany taminolo matoendro firenena aby io antsain̈y foeky fa
ho be voninahitry mandilatra tempoliny Solomona tempoly araiky io.
Fa ndray zen̈y,
haravoan̈anolo aby naresaka be in̈y narereny tomoan̈indro.
Fa iro firenena nan̈odidin̈y iro ndraiky
tsy ravoravo foeky.
Iro nan̈ano raha tsy hamparavoravo iro Israelita aby io.
Alo baka tandrin̈esantsika Ezra 4:1-3:
Koa fa ren̈indro fahavalony Joda ndreky Benjamina fa
miasa tempoliny Jehovah Zan̈ahariny Israely iro Jiosy baka andevo in̈y,
direkty iro nan̈aton̈o Zerobabela
ndreky iro lohany fianakaviambe aby io,
ke ho iro karaha ty:
Alo anaro tahitahinay.
Zahay koa anie mba manompo Zan̈aharinaro e,
man̈ano fan̈atitry ninany
rango tamy faha Esara-hadona panjakany Asyria,
nitondra zahay nan̈aty.
Fa ho Zerobabela
ndreky Jesoa
ndreky iro lohany fianakaviambe aby io tamindro:
Zahay tsy mila anaro mitahitahy zahay
man̈amboatra tran̈ony Zan̈aharinay.
Zahay zaraiky fo hiasa tran̈ony Jehovah Zan̈ahariny Israely io,
fotony zen̈y didy efa nambarany Panjaka Kyrosy zahay.
Hainy Zerobabela fa vandiny fahavalondro aby in̈y fo iro nivolan̈a hitahitahy iro in̈y.
Ke iro koa fa tsy nan̈eky aminjay,
nikorontan̈indro iro Jiosy niasa tempoly io.
Zahava baka andininy 4 firaka 7:
Iro olo aby tamy tany io tsy voly nan̈ano raha nampakivy vahoakany Joda aby io,
baka iro tsy hazoto eky aminy asa ataondro io.
Nikarama olo hangalandro hevitry iro,
baka tsy ho vita asa io,
rango tamy nanjakany Kyrosy Panjakany Persa,
firaka tamy nanjakany Dariosy Panjakany Persa.
Tamy voanalohany nanjakany Ahasoerosy,
nanoratra taratasy handeha amy panjaka iro,
nivolan̈a raha tsy marin̈y momba vahoakany Joda ndreky Jerosalema.
Nanoratra taratasy handeha tamy panjaka Artaksersesy koa ry Bislama
ndreky Mitredata
ndreky Tabela ndreky namandro hafa koa.
Taratasy io nadika tamy volan̈a aramianin̈y,
ke alfabe aramianin̈y nanoratandro izio.
Alo atsika hitandren̈y raha nisoratiny sefo responsablany fanjakan̈a ndreky iro fahavalony Israely aby io tamy panjaka.
Aleva onon̈o ino raha tsy marin̈y nivolan̈indro momba Israelita aby io.
Ezra 4:11-16:
Ty kopìny taratasy nalefandro taminany.
Ampanjaka Artaksersesy,
zahay panomponao baka amy faritry aby andaforeny Ten̈arano.
Tianay ho hainao panjaka fa iro Jiosy nanonga baka taminao tan̈y in̈y,
navy a Jerosalema an̈y e.
Man̈amboatra tanàna mahery andra ndreky ratsy iro ao.
Natsanganandro ndraiky koa lakoro vato in̈y,
avio iro ao efa man̈amboatra fototro koa
Ke tsara hainao panjaka fa tanàna io koa vitandro ndraiky
miaraka amy lakoronizio,
iro tsy han̈efa latety ndreky hetrany lalan̈a eky.
Ho matiantoko eky trezorompanjakan̈a azondro.
Zahay koa baka panjaka mangala karama baka amy lapa an̈y,
avio tsy mety aminay
izikoa mizaha karaha io fo iro olo aby mila hampafahity panjakanay.
Zen̈y aminjay nahavy zahay nandefa taratasy ty han̈ambaran̈a izio aminao,
amy zen̈y mba misy fikarohan̈a hatao amy boky misy tantarany razan̈anao.
Ho hitanao amy boky io ao ndreky ho hainao fa
tanàna io mahery andra
ndreky mampamatiantoko fanjakan̈a ndreky faritany ankitin̈y.
Ary efa baka tamy zen̈y edy nandravan̈ana tanàna io.
Ke tianay ho hainao panjaka fa tanàna io ndreky lakoronany io koa voamboatra,
tsy anao eky hamehy tanàna andaforeny Ten̈aranao atỳ.
Tsy mira vandy volan̈indro izioty fo raha zen̈y?
Matetiky karaha zen̈y fo raha volan̈indro fahavalontsika aby io izioty:
“Iro io tsy man̈efa latety.
Iro io manohitry fanjakan̈a.
Iro io mandrisiky olo tsy han̈araka lalàn̈a.
Iro tsy mety volan̈iny foeky.”
Vandy aby raha jiaby zen̈y!
Nisy vokany taminy asandro Israelita aby io raha zen̈y.
Nirahiny panjaka najanon̈o fan̈amboaran̈a tempoly in̈y,
ke ny raha mampalahelo,
nijanon̈o ankitin̈y iro!
Tsy navozo olo iro Jiosy aby nan̈ano asany Jehovah io,
tamy somilany iro tafimpody ta Jerosalema.
Fa ndraikinity ndraiky iro navozo.
Mahaimaro fo koa izioty namantsika tsy imboan̈a man̈ano asany Jehovah.
Tsy ho ravoravo foeky atsika
izikoa man̈eky han̈ambela asa nampan̈anoviny Jehovah atsika io.
Fa atsika ndraiky koa tsy mivadiky amy Jehovah ndray atsika hinjehin̈y farany mare,
atsika zala ho ravoravo mare e.
Mba marin̈y edy zen̈y va?
Diniha baka tantara ten̈a nisy ty.
Nisy ranabavy araiky ndreky zanany
nivoriany lelahy maro romotro,
niforse iro hivanga karty politiky.
Akory nataondro ranabavy aby io?
Iro koa man̈eky hivadiky ke hivanga karty io,
ho ravoravo iro olo aby man̈enjiky iro io.
Fa iro ranabavy aby io baka io fo ho sahirantsain̈y,
fotony haindro fa iro tsy nan̈araka volan̈a Babandro andan̈itry an̈y.
Fa iro ranabavy aby io tsy nan̈eky foeky.
Marin̈y ndraiky fa tsy mamparavoravo iro,
iro adroedroen̈y ndreky ampijalin̈y,
fa iro madio eritreritry.
Ravoravo mare iro,
fotony haindro fa iro tsy nivadiky tamy Jehovah.
Fa karakory ndraiky iro Jiosy aby taminy andrany Ezra?
Maro tamindro io niala fiain̈ana nilamin̈y ta Babylony tan̈y,
fa nan̈eky nan̈ano dia sarotro nimpody ta Joda tan̈y.
Tafaraniro ninjehin̈y tan̈atiny 14 taon̈o,
nanomboko taminiro nan̈ano fototrony tempoly io firaka tamindro ninjehin̈y,
nanjary tsy nazoto eky iro nan̈ano asany Jehovah.
Fan̈anovan̈a soron̈o fo raha nahasofy iro
fa tsy hankefa fan̈amboaran̈a tempoly io,
kanefa zen̈y raha nan̈irahany Jehovah iro.
Tan̈atiny jerindro,
matoa nisy olo nan̈enjiky iro nan̈ano asa io,
dikanizen̈y mbala tsy tiany Jehovah ho vita tamy zen̈y asa io.
Ndray Zerobabela Governera ndreky Jesoa pisoron̈obe
mbala mila namian̈a korazy fo koa taminio.
Nan̈iraka paminan̈y Hagay Jehovah hankahery iro.
Avadiha amy bokiny Hagay toko 1 baka Baibolinaro.
Nazava ndreky nahery hafatra nambarany Hagay,
kadiriny tan̈atiny efatra fanjava tio.
Nambarany mazava ino ten̈a problemo tamy zen̈y.
Alo tandrin̈esantsika Hagay 1:2-11:
Ty raha nivolan̈iny Jehovah tompiny tafiky:
“Honolo aby io:
‘Tsendriky lera tokony han̈amboaran̈a tran̈ony Jehovah izioty.’”
Fa navy tamy paminan̈y Hagay ndraiky koa volan̈a Jehovah ty:
“Izioty ma fotoan̈a tokony hipitrahanaro amy tran̈onaro nipitahan̈a kakazo tsara,
kanefa tran̈o ty ravan̈a?”
Karaha ty nivolan̈iny Jehovah tompiny tafiky:
“Anaro mba mandiniha raha ataonaro.
Be raha afafinaro,
kanefa hely fo vokatra azonaro.
Mihina fo anaro fa tsy voky.
Migiaka fo anaro fa ndray izy tsy mampamamo anaro aby.
Misikiny fo anaro fa anaro tsy mafana aby.
Avio lan̈iany mikarama,
mahazo karama hatao an̈aty saka loaka.’
Zen̈y mahavy Jehovah tompiny tafiky mivolan̈a aminaro:
“Anaro mba mandiniha raha ataonaro.
Mindao manonga an̈abony bongo an̈y mangala kakazo.
Amboara tran̈o ty ho Jehovah,
baka zaho ravoravo ndreky han̈amezan̈a voninahitry zaho.
‘Be raha nantinainaro,
kanefa hely fo azonaro.
Fotony nan̈ino’,
ho Jehovah tompiny tafiky?
‘Fotony anaro samby milomoay man̈amboatra tran̈onaro tompiny fo,
kanefa tran̈onaka ravan̈a.
Ke lan̈itry io tsy handatsaka vontro aminaro,
avio tany tsy hamokatra eky.
Avio za tsy voly nikaiky haintany
hamango tany ndreky bongo,
ndreky voandraha,
ndreky divain vaovao,
ndreky menaka,
ndreky vokatra tany,
ndreky olo,
ndreky biby tariminaro,
ndreky raha jiaby niasainy tan̈anaro.’”
Nampitovisiny Jehovah tamy piasa nahazo karama,
nan̈ano karama tan̈aty saka niloahany koroko
vokatrany asa mare nataondro Jiosy tia ten̈a aby io.
Tsy nitahy iro Jehovah,
fotony iro nan̈adin̈a tran̈ony Jehovah.
Niasa mare iro namboly fa,
hely fo vokatra nazondro,
ke iro tsy ravoravo.
Sasany tamindro io varian̈a nankatsara tran̈ondro tompiny fo,
kanefa fanan̈ana io tsy azahoantsika fahafahampo mitovy amy fahaizan̈a Jehovah ndreky fanompoan̈a izy.
Mampitandrin̈y atsika aminino zen̈y?
Tsy ratsy manan̈a raha tsara.
Kanefa fanan̈ana io tsy mitondra ten̈a haravoan̈a ndreky haravoan̈a maharitry,
sirto atsika koa mitady izio
ke man̈adin̈a asa ampan̈anoviny Jehovah atsika.
Aza adin̈a Salamo 127:1:
Dikanizen̈y,
izikoa atsika tsy tia ten̈a fa ‘man̈ano voalohantoeran̈a Fanjakan̈any Zan̈ahary ndreky fahamarin̈ananany’,
izy han̈amia raha ten̈a ilaintsika sady amy fotoan̈a ilantsika izy koa.
Karaha zen̈y koa Ohabolana 10:22:
Fa izio ma tempoly io koa vita,
tsy ho mira voninahitriny tempoly namboariny Solomona in̈y marin̈y,
karaha nivolan̈inolo sasany in̈y?
Nampiasa Hagay Jehovah nan̈amia toky iro fa
voninahitriny tempoly io ho be mandilatra niny tempoliny Solomona.
Alo baka tandrin̈esantsika Hagay 2:3-9.
“Azovy aminaro ma nahita voninahitriny tran̈o ty taloha?
Akory fahitanaro izy izioty?
Misy fotiny fahitanaro izy ziô io izikoa ampitovisin̈y aminy araiky taloha in̈y?
Ke korazy anao Zerobabela”, ho Jehovah.
“Matanjaha anao Josoa pisoron̈obe, zanaka Jozadaka.
Korazy koa anaro olo jiaby amy tany ty”,
ho Jehovah, “ke ataova asa io.
Zaho miaraka aminaro”, ho Jehovah tompiny tafiky.
“Tsarova raha nampan̈antinaiko anaro taminy anaro niala ta Ezipty,
tamy fan̈ahinaka mbala taminaro in̈y.
Aza mavozo.”
Fa karaha ty nivolan̈iny Jehovah tompiny tafiky:
“Mbala hihozonkozon̈iko ndraiky koa lan̈itry
ndreky tany
ndreky ranomasin̈y
ndreky tany maiky.
Efa tsy ela raha zen̈y.
Hihozonkozon̈iko koa firenena jiaby,
ke hiditry raha valera jiabiny firenena aby io.
Hifinoako voninahitry tran̈o ty”,
ho Jehovah tompiny tafiky.
“Zaho tompiny volafotsy ndreky volamena io”,
ho Jehovah tompiny tafiky.
“Ho be mandilatrany taloha voninahitriny tran̈o ty”,
ho Jehovah tompiny tafiky.
Izikoa Pamoron̈o ndreky Tompiny raha jiaby man̈ambara fikasan̈anany,
azovy na
ino mahavita misakan̈a izy tsy han̈atanteraka zen̈y?
Tsisy e!
Raha koa fa volan̈iny Jehovah,
io tsy maintsy tanteraka fo.
Fa mbala nila namian̈a korazy fo iro Jiosy nimpody baka ta Babylony aby io.
Jehovah nan̈iraka anjelinany araiky tamy paminan̈y hafa koa,
Zakaria.
Avadiha amy Zakaria 1:12-16 Baibolinaro,
baka io tandrin̈esantsika anjely io,
nan̈amia toky iro Israelita aby io.
Zakaria 1:12-16.
Ke nivolan̈iny anjeliny Jehovah karaha ty:
Anao Jehovah tompiny tafiky,
firaka ombian̈a ma anao tsy hamindra fô amy Jerosalema
ndreky tanànany Joda,
olo fa nisazinao tan̈atiny 70 taon̈o?
Jehovah tsara fan̈ahy ndreky nivolan̈a volan̈a mankahery,
izikoa fa namaly volan̈any anjely nikoran̈a taminaka in̈y.
Ke karaha ty nivolan̈iny anjely nikoran̈a taminaka in̈y:
Rontona karaha ty:
“Karaha ty nivolan̈iny Jehovah tompiny tafiky:
“Mampamarahy zaho mare Jerosalema ndreky Ziona.
Meloko mare amindro firenena miadan̈a aby io zaho.
Taminy helokonaka mbala hely fo,
nan̈ody nampitombosindro fo antambo.’
Ke karaha ty nivolan̈iny Jehovah:
‘Himpody a Jerosalema eto ankitin̈y zaho,
ke hamindra fô amindro.
Haorin̈y eto tran̈onaka, ho Jehovah tompiny tafiky,
‘baka io hinjan̈iny a Jerosalema eto tady fandrifesan̈a.’”
Mbala nirahiny Jehovah nankamafisiny anjely in̈y fo fa izy hiaro iro.
Amy Zakaria 2:7-9:
Mavia Ziona!
Milifasa anao miaraka mipetraka amy Babylony zanaka man̈angy io.
Karaha ty nivolan̈iny Jehovah tompiny tafiky
tafarany nan̈amezan̈a voninahitry izy in̈y,
fotony izy nan̈iraka zaho handeha amy firenena nan̈andevo anaro an̈y:
“Lan̈iany mikasiky anaro mikasiky masonaka.
Aifiko amindro tan̈anaka,
ke ho andevony panompondro iro.
Asa imboanao izikoa masonao izioty tsobohinolo amy tan̈ana?
Tsy imboanao!
Jehovah koa tsy han̈omba iro fahavalony Israely aby io hampijaly iro.
Amy Zakaria 3:1, 2,
anjely in̈y nivolan̈a
azovy mandrosoko iro panohitry aby io.
Naboakany zaho i Josoa pisoron̈obe mitsangana man̈oloan̈a anjeliny Jehovah,
ndreky Satana mitsangana ankavanan̈anany manohitry izy.
Ke ho anjeliny Jehovah io tamy Satana:
Anò hivolan̈iny Jehovah mare anao Satana.
Anò Jehovah nifidy Jerosalema io hivolan̈a anao!
Tsy tapaka motro nalain̈y baka tan̈aty motro fo ma olo io?
Raha jiaby zen̈y ma natao hahatsapandro Israelita aby io fa iro mila matoky fahaizan̈andro?
Contrairanizen̈y!
Tsy nila nadin̈andro fa
nila fan̈ampian̈a baka amy Jehovah fo iro amy raha jiaby ataondro.
Tandrin̈esa tohiny volan̈any anjely tamy Zakaria in̈y,
amy Zakaria 4:6, 7:
Karaha ty volan̈a Jehovah handeha tamy Zerobabela:
“‘Tsy aminy alalany tafiky
na angovo
fa aminy alalany fan̈ahinaka’,
ho Jehovah tompiny tafiky.
Azovy ma anao bongo be io ô?
Hanjary tany ketraka man̈oloan̈a Zerobabela anao.
Ke hihira mare karaha ty olo mahita zen̈y:
‘Tsara mare izy zen̈y e!
Tsara ankitin̈y!’ ”
Nahazo angovo baka tamy volan̈a Jehovah nivolan̈indro paminan̈y aroe in̈y iro Jiosy aby io,
ke tsy nisalasala eky iro fa Jehovah han̈ampy iro marin̈y,
ke nitohizandro fan̈amboaran̈a tempoly io.
Tio fo fa nila hampijanon̈o asandro koa, namandro fahavalony Israely aby io,
nitaritiny Tatenay ndreky Setara-bozenay
Alo ndraiky atsika himpody amy bokiny Ezra toko 5,
tandrin̈esantsika andininy 3-5:
Tamy zen̈y Tatenay governera tandaforeny Ten̈arano taty,
ndreky Setara-bozenay ndreky namandro navy tamindro tio
nan̈ontany iro karaha ty:
Azovy nan̈amia beko anaro han̈amboatra tran̈o ty
ndreky handrafitry kakazo aby io?
Avio iro nan̈ontany:
Azovy aby an̈arany lelahy miasa tran̈o io?
Fa Zan̈ahary nitsinjo iro antipan̈ahiny Jiosy aby io,
ke tsy vitandro nampijanon̈o asa io mandrapandifasan̈a tatitry tamy Dariosy,
ndreky firaka lera azahoan̈a valiny taratasy momba zen̈y.
Ty fianaran̈a azontsika baka amy zen̈y:
Atsika koa misy korazy fo man̈ano asany Jehovah, ndray atsika injehinolo,
Jehovah mitahy ezakantsika ke hahavita hanompo izy fo atsika.
Nanomboko taminio iro Jiosy aby io ninjehinolo fo nan̈ano asa io,
fa iro fo tsy voly.
Anaro mahay?
Fito fanjava tafaranizen̈y fo
efa naty panjaka nitariky fan̈injehan̈a iro in̈y.
Ke Tatenay ndreky iro namany aby io nivolan̈a raha tsy marin̈y tamy Dariosy,
panjaka vaovao.
Jiosy aby io nan̈odiandro nan̈ano raha ratsy zen̈y,
ke iro nivolan̈a tamy Dariosy fa
Zerobabela zen̈y nan̈ano nahazo beko tamy Panjaka Kyrosy
han̈amboatra tempoly.
Iro nan̈iraka Panjaka Dariosy hangala toky tsarabe asa marin̈y raha zen̈y.
Ke Dariosy nan̈amia beko.
Ke ino desiziony Dariosy?
Asa namparavoravo iro Jiosy aby vo nahazo korazy ndreky tapakevitry aby io raha zen̈y?
Sa nahainikorontan̈a fo jerindro?
Nazava tamy Dariosy fa Kyrosy ankitin̈y nan̈iraka iro nan̈amboatra tempoly io.
Aminy Ezra 6:6-12 tandrin̈esantsika volan̈a Dariosy.
Aza man̈aton̈aton̈o zahay foeky Tatenay governera baka andaforeny Ten̈arano
ndreky Setara-bozenay
ndreky iro governera lefitry namandro andaforeny Ten̈arano an̈y.
Aza tabitabainaro foeky fiasan̈a tran̈ony Zan̈ahary io.
Ambilà governerany Jiosy
ndreky iro antipan̈ahindro Jiosy aby io han̈amboatra tran̈ony Zan̈aharindro,
amy tany nisy izy taloha in̈y.
Zaho nan̈amia beko anaro
amy raha tokony hataonaro amindro antipan̈iny Jiosy aby io,
baka ho voamboatra tran̈ony Zan̈ahary io.
Angalà vola amy trezorompanjakan̈a,
araiky misy latety baka andaforeny Ten̈arano an̈y.
Direkty amia iro lelahy aby io raha zen̈y,
han̈ifan̈a lan̈iany raha lanindro
firaka asandro io vita.
Tsy maintsy hamianaro iro koa raha jiaby ilaindro isanandra:
Aomby vantodahiny
ndreky ondrikondriky
ndreky zanaka ondrikondriky hatao fan̈atitry iroan̈a niny Zan̈ahariny lan̈itry.
Avio varimbazaha,
ndreky sira
ndreky divain,
avio menaka,
eraka raha nivolan̈indro pisoron̈o a Jerosalema an̈y,
amy zen̈y iro tsy voly han̈ano fan̈atitry tiany Zan̈ahariny lan̈itry,
avio hivavaka niny panjaka
ndreky niny zanaka panjaka.
Zaho koa nan̈amia beko
fa lan̈iany olo tsy man̈araka didy zen̈y,
hangalan̈a kakazo araiky amy tran̈onany,
ke hahanton̈o amizio izy.
Tran̈onany io amy zay
hatao kabonemponkonolo.
Ke anò Zan̈ahary nan̈apetraka an̈aranany a Jerosalema an̈y
handrongana lan̈iany panjaka
ndreky lan̈iany olo mitady han̈ano raha tsy aradalàn̈a,
ke mandravan̈a tran̈ony Zan̈ahary an̈y io!
Zaho Dariosy man̈amia beko zen̈y.
Direkty ataova raha nivolan̈iko.”
Tsisy raha nazony Tatenay ndreky namany aby io natao eky,
iro koa fa nahazo bekonampanjaka in̈y.
Sady voly nanabataba iro niasa tempoly iro,
avio tsy maintsy nan̈amia vola iro koa!
Ravoravo mare iro Jiosy tsy nivadiky aby io!
Koran̈iny andininy 22 ty fa
ravoravo koa iro nitokana tran̈ony Jehovah io,
tamy taon̈o 515 T.K.
Ravoravo koa iro nan̈ano Fetiny Mofo Tsisy Levira,
tan̈atiny fito andra.
Nataony Jehovah raha namparavoravo iro,
ke nataony raha nampiova fô panjakany Asyria,
nanjary nan̈ampy iro taminy asa momba tran̈ony ten̈a Zan̈ahary io,
Zan̈ahariny Israely zen̈y.
Aminandra izioty koa,
ravoravo atsika izikoa misy manampahifan̈a mahazo onondraha,
mampiasa fahifan̈andro han̈ampian̈a atsika.
Fa Jehovah ten̈a ataontsika mersy,
fotony baka aminany avianizen̈y.
Koran̈iny Ohabolana 21:1:
Ke atsika tsy tokony han̈apetraka fan̈antinan̈a amy pitondra ndreky fikambanan̈a misy amy donia ty.
Tsisy amindro io mahavita mamonjy atsika maharitry.
Ny raha ho hisy,
aloha heliny handravanan̈a doniany Satana ty,
firenena aby io hanohitry atsika vahoakany Zan̈ahary.
Fa mbala ho ratsiratsiny raha nahazo Tatenay in̈y raha hahazo iro amy zen̈y.
Ino aby ma fianaran̈a azontsika baka raha nikoran̈iny Ezra,
Hagay ndreky Zakaria in̈y?
Voanalohany,
Jehovah mitahy, izikoa atsika tapakevitry han̈ano asanany, ndray misy raha sarotro,
ke tsy ambelany handresy foeky iro panohitry atsika aby io.
Faharoe,
ho ravoravo mare atsika izikoa man̈ano voalohantoeran̈a asany Jehovah,
fa tsy varian̈a mamory fanan̈ana.
Ino ma asa nan̈irahany Jesosy atsika izioty?
Nambarany mazava raha zen̈y amy volan̈anany tamindro pianatranany aby io:
“Ke mandihana,
ataova pianatra olo baka amy firenena jiaby.”
Asa aboakantsika amy raha iritriretintsika ndreky raha ataontsika fa
asa io raha ten̈a maventy amintsika izioty, fa tsy tanjon̈o hanandraha?
Naminan̈y Hagay fa andra araiky an̈y,
tempoliny Jehovah io mbala ho be voninahitry mandilatrany tempoly namboariny Solomona.
Tanteraka raha zen̈y izioty.
Mampiasa fitorian̈a ataontsika io Jehovah
han̈ozonkozon̈ana iro firenena aby io.
Antapitrisany “raha valera”,
dikanizen̈y
olo vaovao manompo Jehovah man̈aton̈o izy.
Iro io ravoravo mivory amy tempoly arapan̈ahy,
tsy ino zen̈y fa
fandaharan̈a nataony Jehovah hanompoan̈a izy miorin̈y amy soron̈o nataony Jesosy.
Zioty efa tsy fotoan̈a ifantohan̈a amy ‘tran̈o nipitahan̈a kakazo tsara’
ndreky tsy fotoan̈a andanian̈a lera amy raha tsy tena ilain̈y eky.
Ten̈a efa hely tavela,
aminy andra araiky tsy ampoizintsika an̈y,
ho tapitry doniany Satana ty,
atsika hiditry amy donia vaovao.
Maro raha ataony Satana hampakivy atsika aminy andra izioty,
kanefa aza atao sakana tsy hamparavoravo anao manompo Jehovah raha zen̈y!
Izikoa mifen̈y fo atsika manompo Jehovah,
ho ravoravo atsika sady hilamintsain̈y amy donia vaovao an̈y,
baka io hanompo izy an̈atiny haravoan̈a mandrakizay.
Zerobabela,
Jesoa,
Hagay,
baka io Zakaria
nifen̈y mare nan̈ampy iro Israelita aby io
hatoky Jehovah ndraiky koa.
Taminy 468 T.K.,
Ezra foeky nandeha ta Jerosalema tan̈y
nanohan̈a fivavahan̈a marin̈y.
Ten̈a nila fan̈ampian̈a iro vahoaka aby io.
Ke Jehovah nan̈andefa pitariky araiky misy korazy mare.
Aminy andra aroe man̈araka io,
atsika hianatra momba lelahy araiky tsy nivadiky ndreky lelahy natanjaka,
tsy azovy fa Nehemia.

“Jehovah Nan̈ano Raha Hamparavoravo Iro”
- 

“Jehovah Nan̈ano Raha Hamparavoravo Iro”

Tiany Jehovah atsika ho ravoravo manompo izy.
Zen̈y koran̈iny Salamo 100:2:
“Miravoravoa manompo Jehovah.”
Maro raha mamparavoravo namiany atsika.
Namiany fahin̈ana atsika,
namiany Baiboly baka ahaizantsika hankafy fiain̈ana.
Avio ataony koa raha hahavy atsika hanan̈a raha maro mamparavoravo hitantaraintsika.
Baka amy Jehovah ankitin̈y mamparavoravo atsika.
Tsy karaha zen̈y foeky Satana.
Tsy tiany atsika ravoravo manompo Jehovah.
Fotony nan̈ino?
Hainy fa atsika koa ravoravo,
tsy ho voly hitory ndreky hampianatra atsika,
kanefa tanjon̈onany hampijanon̈o asa io.
Ke mifen̈y izy man̈ano raha tsy hamparavoravo atsika.
Mampiasa fanjakan̈a aby io izy hanohitry asantsika,
na koa mety fianakaviantsika
ndreky olo tanàna araiky amintsika.
Tiany Satana izikoa hely fo fotoan̈a hanompoantsika Jehovah,
fa handany lera amy tady vola baka hivangan̈a raha tsy ilain̈y.
Tiany baka atsika hieritreritry fa
ho ravoravo mare atsika,
izikoa tsy voly mamory fanan̈ana.
Zen̈y zala tsy izy e.
Tetiky Satana io tsy raha vaovao.
Alo baka atsika hamaky tapatapany amy bokiny Ezra,
Hagay ndreky Zakaria.
Zahava ino raha hitanao mba mety hataontsika,
baka atsika ho ‘ravoravo fo manompo Jehovah.’
Aleva onon̈o tsarabe
ino raha namparavoravo olony Jehovah taloha tan̈y,
avio nan̈ino iro nivadiky tsy ravoravo koa.
Diniha koa
nan̈ino atsika mila ‘haravoan̈a baka amy Jehovah’,
avio akory hataontsika ho ravoravo fo,
ndray atsika misy problemo.
Ezra io pisoron̈o salakady panoratra Lalàn̈any Mosesy.
Izy nanoratra bokiny Ezra.
Mbala manohy tantarany Israelita voakoran̈a amy farany Tantara Faharoe izy
aminy Ezra io.
Mbala izy fo koa nanoratra izio.
Maro Jiosy nimpody ta Joda tan̈y tamy taon̈o 537 T.K.
Tan̈atiny 70 taon̈o iro andevo ta Babylony,
fotony iro nanompo sampy.
Tontohitry iro koa fa nijaly,
ke nahazo jery tsy himpody hanompo sampy eky.
Tamy zen̈y nan̈ampian̈a iro olo ta Jerosalema tao
baka iro himpody hanompo Jehovah amy fomba tiany ndraiky koa.
Tantarainizio ao fanjakan̈andro panjaka Persianin̈y aby io,
nanomboko tamy Panjaka Kyrosy.
Ten̈a namparavoravo raha nataony tamy zen̈y.
Areha amy Baibolinaro azafady,
famakian̈a Ezra 1:1-6.
Baka tanteraka volan̈a Jehovah nambarany Jeremia,
tamy taon̈o voanalohany nanjakany Kyrosy panjakany Persy,
Jehovah nandrisiky Panjaka Kyrosy
han̈ambara volan̈a aby ty amy tany jiaby nanjakany sady nanoratra izio:
Karaha ty ho Kyrosy, panjakany Persy: 
“Efa namiany Jehovah Zan̈ahariny lan̈itry zaho fanjakan̈a jiaby ambony tany eto.
Zaho nirahiny han̈amboatra tran̈onany a Jerosalema, a Joda an̈y.
Irarian̈a Zan̈ahary tsy hiala anaro,
lan̈iany manompo izy.
Avio manongà a Jerosalema a Joda an̈y anaro,
han̈amboatra tran̈ony Jehovah ta Jerosalema in̈y.
Izy ten̈a Zan̈ahary.
Lan̈iany mbala tavela kanefa mbala hiala tany misy iro,
na aia na aia izio,
iro olo amy tany misy iro han̈ampy iro,
han̈amia iro volafotsy,
volamena ndreky fanan̈ana,
avio biby tarimin̈y
ndreky fan̈atitry antsitrapo.
Hampiasain̈y amy tran̈ony Zan̈ahary a Jerosalema raha jiaby zen̈y.”
Ke iro lohany fianakaviambeny Joda ndreky Benjamina, ndreky pisoron̈o ndreky Levita,
olo jiaby narisiky Zan̈ahary,
nioman̈a hanonga, han̈amboatra tran̈ony Jehovah ta Jerosalema tan̈y.
Iro olo jiaby nan̈odidin̈y nan̈ampy iro,
nan̈amia iro fitaovan̈a volafotsy, ndreky volamena, ndreky fanan̈ana,
ndreky biby tarimin̈y ndreky raha maro valera,
niaraka tamy raha jiaby namian̈a antsitrapo.
Iritrireta hely baka!
Jehovah nahavy Kyrosy nan̈amia didy han̈amboaran̈a tempoly,
ke tafimpody tamy tanindro iro Jiosy aby io.
Naro Jiosy ravoravo nimpody tan̈y han̈ano asa io.
Sasany tamindro ndraiky tsy nafaka nimpody tan̈y,
fa iro fo nanohan̈a lan̈iany olo nafaka nandeha.
Kadiriny taminy Avrily taon̈o 537 T.K.,
efa tsy ela ho 50 000 Israelita niala ta Babylony.
Nitariky diandro tamy zen̈y
Jesoa na Josoa pisoron̈obe,
avio Zerobabela governera nifidiny Kyrosy.
Ravoravo iro navy ta Joda,
kadiriny tamy faramparany Oktobra
na voalohandohany Novambra tio!
Fa karakory nataondro baka iro ho ravoravo fo?
Zahava baka raha nataondro, niaraka iro navy tan̈y.
Alo tandrin̈esantsika
Ezra 3:1-6:
Tamy fanjava fahafito,
efa tamy tanànandro iro Israelita aby io taminio,
iro jiaby nivory ta Jerosalema.
Jesoa zanaka Jozadaka
ndreky iro pisoron̈o aby io
ndreky Zerobabela zanaka Sealtiela
ndreky iro rahalahiny aby io
nitsangana nan̈amboatra alitarany Zan̈ahariny Israely,
baka iro mahavita man̈ano soron̈o iroan̈a tio.
Zen̈y raha voasoratra amy Lalàn̈any Mosesy,
olony Zan̈ahary marin̈y.
Ke nan̈amboatra alitara iro,
tamy tany nisy izy taloha in̈y fo,
ndray iro navozo firenena nan̈odidin̈y iro.
Iro baka tio efa nan̈ano soron̈o iroan̈a niny Jehovah edy,
isaka maraindrain̈y ndreky arivariva.
Iro amy zay nan̈ano Fetiny Tran̈o Rantsakazo mifan̈araka amy raha efa voasoratra.
Nan̈ano soron̈o iroan̈a iro isanandra,
erakany kontiny mila hatao isanandra.
Baka io iro nan̈ano fan̈atitry iroan̈a efa mahazatra in̈y fo koa,
ndreky fan̈atitry isaka fanjava tondroen̈y,
ndreky fan̈atitry amy lerany fety masin̈y jiaby niny Jehovah.
Nan̈ano fan̈atitry iroan̈a koa lan̈iany olo narisikiny fondro,
nan̈amia Jehovah fan̈atitry antsitrapo.
Ke nanomboko taminy andra voanalohany tamy fahafitony fanjava,
mbala tsy vita fototrony tempoliny Jehovah taminio,
iro nan̈amia Jehovah soron̈o iroan̈a.
Asa niremarkenaro tio fa
iro Jiosy aby io nimpody nanompo Jehovah fo,
ndray iro ‘navozo iro firenena nan̈odidin̈y iro’?
Ravoravo mare iro tamy zen̈y,
fotony nisy korazy nan̈ano asany Jehovah.
Zen̈y raha efa nivolan̈iny Mosesy,
taminizy nan̈iraka iro Israelita aby io han̈ano Fetiny Tran̈o Rantsankazo.
Ho izy: 
“Ho ravoravo ankitin̈y anaro.”
Koa fa nierin̈y taon̈o,
vita fan̈amboaran̈a fototrony tempoly io.
Alo baka tandrin̈esantsika raha koran̈iny Ezra3:10-13:
Koa fa napetrakandro pan̈amboatra tran̈o io fototrony tempoliny Jehovah io,
nitsangana nidera Jehovah iro pisoron̈o nan̈ano lambany fisoron̈ana aby io,
niaraka tamy trompetindro,
ndreky iro Levita aby io,
ndreky iro zanakany Asafa aby io,
nifan̈araka tamy raha nan̈irahany Davida Panjakany Israely.
Nanomboko nan̈ano hira nifamalimaly amy zay iro nidera Jehovah, ‘fotony tsara izy;
tsy ho ravan̈a foeky fitiavany Israely.’
Olo jiaby amy zay nihira naresaka nidera Jehovah,
fotony vita fototrony tran̈ony Jehovah.
Maro koa pisoron̈o ndreky Levita
ndreky iro matoelahy lohany fianakaviambendro nahita tran̈o io rango taloha tan̈y,
nitomoan̈y mare iro koa fa nahita fototro tran̈o io navoamboatra.
Maro koa nihira mare erakany efandro.
Ke efa tsy hainolo eky nan̈avaka hira ndreky tomoan̈y,
fotony ren̈y firaka farany lavitry feonolo aby io.
Ny raha nisy baka,
tsy nazonazony sasany taminolo matoendro firenena aby io antsain̈y foeky fa
ho be voninahitry mandilatra tempoliny Solomona tempoly araiky io.
Fa ndray zen̈y,
haravoan̈anolo aby naresaka be in̈y narereny tomoan̈indro.
Fa iro firenena nan̈odidin̈y iro ndraiky
tsy ravoravo foeky.
Iro nan̈ano raha tsy hamparavoravo iro Israelita aby io.
Alo baka tandrin̈esantsika Ezra 4:1-3:
Koa fa ren̈indro fahavalony Joda ndreky Benjamina fa
miasa tempoliny Jehovah Zan̈ahariny Israely iro Jiosy baka andevo in̈y,
direkty iro nan̈aton̈o Zerobabela
ndreky iro lohany fianakaviambe aby io,
ke ho iro karaha ty:
Alo anaro tahitahinay.
Zahay koa anie mba manompo Zan̈aharinaro e,
man̈ano fan̈atitry ninany
rango tamy faha Esara-hadona panjakany Asyria,
nitondra zahay nan̈aty.
Fa ho Zerobabela
ndreky Jesoa
ndreky iro lohany fianakaviambe aby io tamindro:
Zahay tsy mila anaro mitahitahy zahay
man̈amboatra tran̈ony Zan̈aharinay.
Zahay zaraiky fo hiasa tran̈ony Jehovah Zan̈ahariny Israely io,
fotony zen̈y didy efa nambarany Panjaka Kyrosy zahay.
Hainy Zerobabela fa vandiny fahavalondro aby in̈y fo iro nivolan̈a hitahitahy iro in̈y.
Ke iro koa fa tsy nan̈eky aminjay,
nikorontan̈indro iro Jiosy niasa tempoly io.
Zahava baka andininy 4 firaka 7:
Iro olo aby tamy tany io tsy voly nan̈ano raha nampakivy vahoakany Joda aby io,
baka iro tsy hazoto eky aminy asa ataondro io.
Nikarama olo hangalandro hevitry iro,
baka tsy ho vita asa io,
rango tamy nanjakany Kyrosy Panjakany Persa,
firaka tamy nanjakany Dariosy Panjakany Persa.
Tamy voanalohany nanjakany Ahasoerosy,
nanoratra taratasy handeha amy panjaka iro,
nivolan̈a raha tsy marin̈y momba vahoakany Joda ndreky Jerosalema.
Nanoratra taratasy handeha tamy panjaka Artaksersesy koa ry Bislama
ndreky Mitredata
ndreky Tabela ndreky namandro hafa koa.
Taratasy io nadika tamy volan̈a aramianin̈y,
ke alfabe aramianin̈y nanoratandro izio.
Alo atsika hitandren̈y raha nisoratiny sefo responsablany fanjakan̈a ndreky iro fahavalony Israely aby io tamy panjaka.
Aleva onon̈o ino raha tsy marin̈y nivolan̈indro momba Israelita aby io.
Ezra 4:11-16:
Ty kopìny taratasy nalefandro taminany.
Ampanjaka Artaksersesy,
zahay panomponao baka amy faritry aby andaforeny Ten̈arano.
Tianay ho hainao panjaka fa iro Jiosy nanonga baka taminao tan̈y in̈y,
navy a Jerosalema an̈y e.
Man̈amboatra tanàna mahery andra ndreky ratsy iro ao.
Natsanganandro ndraiky koa lakoro vato in̈y,
avio iro ao efa man̈amboatra fototro koa
Ke tsara hainao panjaka fa tanàna io koa vitandro ndraiky
miaraka amy lakoronizio,
iro tsy han̈efa latety ndreky hetrany lalan̈a eky.
Ho matiantoko eky trezorompanjakan̈a azondro.
Zahay koa baka panjaka mangala karama baka amy lapa an̈y,
avio tsy mety aminay
izikoa mizaha karaha io fo iro olo aby mila hampafahity panjakanay.
Zen̈y aminjay nahavy zahay nandefa taratasy ty han̈ambaran̈a izio aminao,
amy zen̈y mba misy fikarohan̈a hatao amy boky misy tantarany razan̈anao.
Ho hitanao amy boky io ao ndreky ho hainao fa
tanàna io mahery andra
ndreky mampamatiantoko fanjakan̈a ndreky faritany ankitin̈y.
Ary efa baka tamy zen̈y edy nandravan̈ana tanàna io.
Ke tianay ho hainao panjaka fa tanàna io ndreky lakoronany io koa voamboatra,
tsy anao eky hamehy tanàna andaforeny Ten̈aranao atỳ.
Tsy mira vandy volan̈indro izioty fo raha zen̈y?
Matetiky karaha zen̈y fo raha volan̈indro fahavalontsika aby io izioty:
“Iro io tsy man̈efa latety.
Iro io manohitry fanjakan̈a.
Iro io mandrisiky olo tsy han̈araka lalàn̈a.
Iro tsy mety volan̈iny foeky.”
Vandy aby raha jiaby zen̈y!
Nisy vokany taminy asandro Israelita aby io raha zen̈y.
Nirahiny panjaka najanon̈o fan̈amboaran̈a tempoly in̈y,
ke ny raha mampalahelo,
nijanon̈o ankitin̈y iro!
Tsy navozo olo iro Jiosy aby nan̈ano asany Jehovah io,
tamy somilany iro tafimpody ta Jerosalema.
Fa ndraikinity ndraiky iro navozo.
Mahaimaro fo koa izioty namantsika tsy imboan̈a man̈ano asany Jehovah.
Tsy ho ravoravo foeky atsika
izikoa man̈eky han̈ambela asa nampan̈anoviny Jehovah atsika io.
Fa atsika ndraiky koa tsy mivadiky amy Jehovah ndray atsika hinjehin̈y farany mare,
atsika zala ho ravoravo mare e.
Mba marin̈y edy zen̈y va?
Diniha baka tantara ten̈a nisy ty.
Nisy ranabavy araiky ndreky zanany
nivoriany lelahy maro romotro,
niforse iro hivanga karty politiky.
Akory nataondro ranabavy aby io?
Iro koa man̈eky hivadiky ke hivanga karty io,
ho ravoravo iro olo aby man̈enjiky iro io.
Fa iro ranabavy aby io baka io fo ho sahirantsain̈y,
fotony haindro fa iro tsy nan̈araka volan̈a Babandro andan̈itry an̈y.
Fa iro ranabavy aby io tsy nan̈eky foeky.
Marin̈y ndraiky fa tsy mamparavoravo iro,
iro adroedroen̈y ndreky ampijalin̈y,
fa iro madio eritreritry.
Ravoravo mare iro,
fotony haindro fa iro tsy nivadiky tamy Jehovah.
Fa karakory ndraiky iro Jiosy aby taminy andrany Ezra?
Maro tamindro io niala fiain̈ana nilamin̈y ta Babylony tan̈y,
fa nan̈eky nan̈ano dia sarotro nimpody ta Joda tan̈y.
Tafaraniro ninjehin̈y tan̈atiny 14 taon̈o,
nanomboko taminiro nan̈ano fototrony tempoly io firaka tamindro ninjehin̈y,
nanjary tsy nazoto eky iro nan̈ano asany Jehovah.
Fan̈anovan̈a soron̈o fo raha nahasofy iro
fa tsy hankefa fan̈amboaran̈a tempoly io,
kanefa zen̈y raha nan̈irahany Jehovah iro.
Tan̈atiny jerindro,
matoa nisy olo nan̈enjiky iro nan̈ano asa io,
dikanizen̈y mbala tsy tiany Jehovah ho vita tamy zen̈y asa io.
Ndray Zerobabela Governera ndreky Jesoa pisoron̈obe
mbala mila namian̈a korazy fo koa taminio.
Nan̈iraka paminan̈y Hagay Jehovah hankahery iro.
Avadiha amy bokiny Hagay toko 1 baka Baibolinaro.
Nazava ndreky nahery hafatra nambarany Hagay,
kadiriny tan̈atiny efatra fanjava tio.
Nambarany mazava ino ten̈a problemo tamy zen̈y.
Alo tandrin̈esantsika Hagay 1:2-11:
Ty raha nivolan̈iny Jehovah tompiny tafiky:
“Honolo aby io:
‘Tsendriky lera tokony han̈amboaran̈a tran̈ony Jehovah izioty.’”
Fa navy tamy paminan̈y Hagay ndraiky koa volan̈a Jehovah ty: 
“Izioty ma fotoan̈a tokony hipitrahanaro amy tran̈onaro nipitahan̈a kakazo tsara,
kanefa tran̈o ty ravan̈a?”
Karaha ty nivolan̈iny Jehovah tompiny tafiky:
“Anaro mba mandiniha raha ataonaro.
Be raha afafinaro,
kanefa hely fo vokatra azonaro.
Mihina fo anaro fa tsy voky.
Migiaka fo anaro fa ndray izy tsy mampamamo anaro aby.
Misikiny fo anaro fa anaro tsy mafana aby.
Avio lan̈iany mikarama,
mahazo karama hatao an̈aty saka loaka.’
Zen̈y mahavy Jehovah tompiny tafiky mivolan̈a aminaro:
“Anaro mba mandiniha raha ataonaro.
Mindao manonga an̈abony bongo an̈y mangala kakazo.
Amboara tran̈o ty ho Jehovah,
baka zaho ravoravo ndreky han̈amezan̈a voninahitry zaho.
‘Be raha nantinainaro,
kanefa hely fo azonaro.
Fotony nan̈ino’,
ho Jehovah tompiny tafiky?
‘Fotony anaro samby milomoay man̈amboatra tran̈onaro tompiny fo,
kanefa tran̈onaka ravan̈a.
Ke lan̈itry io tsy handatsaka vontro aminaro,
avio tany tsy hamokatra eky.
Avio za tsy voly nikaiky haintany
hamango tany ndreky bongo,
ndreky voandraha,
ndreky divain vaovao,
ndreky menaka,
ndreky vokatra tany,
ndreky olo,
ndreky biby tariminaro,
ndreky raha jiaby niasainy tan̈anaro.’”
Nampitovisiny Jehovah tamy piasa nahazo karama,
nan̈ano karama tan̈aty saka niloahany koroko
vokatrany asa mare nataondro Jiosy tia ten̈a aby io.
Tsy nitahy iro Jehovah,
fotony iro nan̈adin̈a tran̈ony Jehovah.
Niasa mare iro namboly fa,
hely fo vokatra nazondro,
ke iro tsy ravoravo.
Sasany tamindro io varian̈a nankatsara tran̈ondro tompiny fo,
kanefa fanan̈ana io tsy azahoantsika fahafahampo mitovy amy fahaizan̈a Jehovah ndreky fanompoan̈a izy.
Mampitandrin̈y atsika aminino zen̈y?
Tsy ratsy manan̈a raha tsara.
Kanefa fanan̈ana io tsy mitondra ten̈a haravoan̈a ndreky haravoan̈a maharitry,
sirto atsika koa mitady izio
ke man̈adin̈a asa ampan̈anoviny Jehovah atsika.
Aza adin̈a Salamo 127:1:
Dikanizen̈y,
izikoa atsika tsy tia ten̈a fa ‘man̈ano voalohantoeran̈a Fanjakan̈any Zan̈ahary ndreky fahamarin̈ananany’,
<i>izy</i> han̈amia raha ten̈a ilaintsika sady amy fotoan̈a ilantsika izy koa.
Karaha zen̈y koa Ohabolana 10:22:
Fa izio ma tempoly io koa vita,
tsy ho mira voninahitriny tempoly namboariny Solomona in̈y marin̈y,
karaha nivolan̈inolo sasany in̈y?
Nampiasa Hagay Jehovah nan̈amia toky iro fa
voninahitriny tempoly io ho be mandilatra niny tempoliny Solomona.
Alo baka tandrin̈esantsika Hagay 2:3-9.
“Azovy aminaro ma nahita voninahitriny tran̈o ty taloha?
Akory fahitanaro izy izioty?
Misy fotiny fahitanaro izy ziô io izikoa ampitovisin̈y aminy araiky taloha in̈y?
Ke korazy anao Zerobabela”, ho Jehovah.
“Matanjaha anao Josoa pisoron̈obe, zanaka Jozadaka.
Korazy koa anaro olo jiaby amy tany ty”,
ho Jehovah, “ke ataova asa io.
Zaho miaraka aminaro”, ho Jehovah tompiny tafiky.
“Tsarova raha nampan̈antinaiko anaro taminy anaro niala ta Ezipty,
tamy fan̈ahinaka mbala taminaro in̈y.
Aza mavozo.”
Fa karaha ty nivolan̈iny Jehovah tompiny tafiky:
“Mbala hihozonkozon̈iko ndraiky koa lan̈itry
ndreky tany
ndreky ranomasin̈y
ndreky tany maiky.
Efa tsy ela raha zen̈y.
Hihozonkozon̈iko koa firenena jiaby,
ke hiditry raha valera jiabiny firenena aby io.
Hifinoako voninahitry tran̈o ty”,
ho Jehovah tompiny tafiky.
“Zaho tompiny volafotsy ndreky volamena io”,
ho Jehovah tompiny tafiky.
“Ho be mandilatrany taloha voninahitriny tran̈o ty”,
ho Jehovah tompiny tafiky.
Izikoa Pamoron̈o ndreky Tompiny raha jiaby man̈ambara fikasan̈anany,
azovy na
ino mahavita misakan̈a izy tsy han̈atanteraka zen̈y?
Tsisy e!
Raha koa fa volan̈iny Jehovah,
io tsy maintsy tanteraka fo.
Fa mbala nila namian̈a korazy fo iro Jiosy nimpody baka ta Babylony aby io.
Jehovah nan̈iraka anjelinany araiky tamy paminan̈y hafa koa,
Zakaria.
Avadiha amy Zakaria 1:12-16 Baibolinaro,
baka io tandrin̈esantsika anjely io,
nan̈amia toky iro Israelita aby io.
Zakaria 1:12-16.
Ke nivolan̈iny anjeliny Jehovah karaha ty:
Anao Jehovah tompiny tafiky,
firaka ombian̈a ma anao tsy hamindra fô amy Jerosalema
ndreky tanànany Joda,
olo fa nisazinao tan̈atiny 70 taon̈o?
Jehovah tsara fan̈ahy ndreky nivolan̈a volan̈a mankahery,
izikoa fa namaly volan̈any anjely nikoran̈a taminaka in̈y.
Ke karaha ty nivolan̈iny anjely nikoran̈a taminaka in̈y:
Rontona karaha ty:
“Karaha ty nivolan̈iny Jehovah tompiny tafiky:
“Mampamarahy zaho mare Jerosalema ndreky Ziona.
Meloko mare amindro firenena miadan̈a aby io zaho.
Taminy helokonaka mbala hely fo,
nan̈ody nampitombosindro fo antambo.’
Ke karaha ty nivolan̈iny Jehovah:
‘Himpody a Jerosalema eto ankitin̈y zaho,
ke hamindra fô amindro.
Haorin̈y eto tran̈onaka, ho Jehovah tompiny tafiky,
‘baka io hinjan̈iny a Jerosalema eto tady fandrifesan̈a.’”
Mbala nirahiny Jehovah nankamafisiny anjely in̈y fo fa izy hiaro iro.
Amy Zakaria 2:7-9:
Mavia Ziona!
Milifasa anao miaraka mipetraka amy Babylony zanaka man̈angy io.
Karaha ty nivolan̈iny Jehovah tompiny tafiky
tafarany nan̈amezan̈a voninahitry izy in̈y,
fotony izy nan̈iraka zaho handeha amy firenena nan̈andevo anaro an̈y: 
“Lan̈iany mikasiky anaro mikasiky masonaka.
Aifiko amindro tan̈anaka,
ke ho andevony panompondro iro.
Asa imboanao izikoa masonao izioty tsobohinolo amy tan̈ana?
Tsy imboanao!
Jehovah koa tsy han̈omba iro fahavalony Israely aby io hampijaly iro.
Amy Zakaria 3:1, 2,
anjely in̈y nivolan̈a
azovy mandrosoko iro panohitry aby io.
Naboakany zaho i Josoa pisoron̈obe mitsangana man̈oloan̈a anjeliny Jehovah,
ndreky Satana mitsangana ankavanan̈anany manohitry izy.
Ke ho anjeliny Jehovah io tamy Satana:
Anò hivolan̈iny Jehovah mare anao Satana.
Anò Jehovah nifidy Jerosalema io hivolan̈a anao!
Tsy tapaka motro nalain̈y baka tan̈aty motro fo ma olo io?
Raha jiaby zen̈y ma natao hahatsapandro Israelita aby io fa iro mila matoky fahaizan̈andro?
Contrairanizen̈y!
Tsy nila nadin̈andro fa
nila fan̈ampian̈a baka amy Jehovah fo iro amy raha jiaby ataondro.
Tandrin̈esa tohiny volan̈any anjely tamy Zakaria in̈y,
amy Zakaria 4:6, 7:
Karaha ty volan̈a Jehovah handeha tamy Zerobabela:
“‘Tsy aminy alalany tafiky
na angovo
fa aminy alalany fan̈ahinaka’,
ho Jehovah tompiny tafiky.
Azovy ma anao bongo be io ô?
Hanjary tany ketraka man̈oloan̈a Zerobabela anao.
Ke hihira mare karaha ty olo mahita zen̈y:
‘Tsara mare izy zen̈y e!
Tsara ankitin̈y!’ ”
Nahazo angovo baka tamy volan̈a Jehovah nivolan̈indro paminan̈y aroe in̈y iro Jiosy aby io,
ke tsy nisalasala eky iro fa Jehovah han̈ampy iro marin̈y,
ke nitohizandro fan̈amboaran̈a tempoly io.
Tio fo fa nila hampijanon̈o asandro koa, namandro fahavalony Israely aby io,
nitaritiny Tatenay ndreky Setara-bozenay 
Alo ndraiky atsika himpody amy bokiny Ezra toko 5,
tandrin̈esantsika andininy 3-5:
Tamy zen̈y Tatenay governera tandaforeny Ten̈arano taty,
ndreky Setara-bozenay ndreky namandro navy tamindro tio
nan̈ontany iro karaha ty:
Azovy nan̈amia beko anaro han̈amboatra tran̈o ty
ndreky handrafitry kakazo aby io?
Avio iro nan̈ontany:
Azovy aby an̈arany lelahy miasa tran̈o io?
Fa Zan̈ahary nitsinjo iro antipan̈ahiny Jiosy aby io,
ke tsy vitandro nampijanon̈o asa io mandrapandifasan̈a tatitry tamy Dariosy,
ndreky firaka lera azahoan̈a valiny taratasy momba zen̈y.
Ty fianaran̈a azontsika baka amy zen̈y:
Atsika koa misy korazy fo man̈ano asany Jehovah, ndray atsika injehinolo,
Jehovah mitahy ezakantsika ke hahavita hanompo izy fo atsika.
Nanomboko taminio iro Jiosy aby io ninjehinolo fo nan̈ano asa io,
fa iro fo tsy voly.
Anaro mahay?
Fito fanjava tafaranizen̈y fo
efa naty panjaka nitariky fan̈injehan̈a iro in̈y.
Ke Tatenay ndreky iro namany aby io nivolan̈a raha tsy marin̈y tamy Dariosy,
panjaka vaovao<i>.</i>
Jiosy aby io nan̈odiandro nan̈ano raha ratsy zen̈y,
ke iro nivolan̈a tamy Dariosy fa
Zerobabela zen̈y nan̈ano nahazo beko tamy Panjaka Kyrosy
han̈amboatra tempoly.
Iro nan̈iraka Panjaka Dariosy hangala toky tsarabe asa marin̈y raha zen̈y.
Ke Dariosy nan̈amia beko.
Ke ino desiziony Dariosy?
Asa namparavoravo iro Jiosy aby vo nahazo korazy ndreky tapakevitry aby io raha zen̈y?
Sa nahainikorontan̈a fo jerindro?
Nazava tamy Dariosy fa Kyrosy ankitin̈y nan̈iraka iro nan̈amboatra tempoly io.
Aminy Ezra 6:6-12 tandrin̈esantsika volan̈a Dariosy.
Aza man̈aton̈aton̈o zahay foeky Tatenay governera baka andaforeny Ten̈arano
ndreky Setara-bozenay
ndreky iro governera lefitry namandro andaforeny Ten̈arano an̈y.
Aza tabitabainaro foeky fiasan̈a tran̈ony Zan̈ahary io.
Ambilà governerany Jiosy
ndreky iro antipan̈ahindro Jiosy aby io han̈amboatra tran̈ony Zan̈aharindro,
amy tany nisy izy taloha in̈y.
Zaho nan̈amia beko anaro
amy raha tokony hataonaro amindro antipan̈iny Jiosy aby io,
baka ho voamboatra tran̈ony Zan̈ahary io.
Angalà vola amy trezorompanjakan̈a,
araiky misy latety baka andaforeny Ten̈arano an̈y.
Direkty amia iro lelahy aby io raha zen̈y,
han̈ifan̈a lan̈iany raha lanindro
firaka asandro io vita.
Tsy maintsy hamianaro iro koa raha jiaby ilaindro isanandra:
Aomby vantodahiny
ndreky ondrikondriky
ndreky zanaka ondrikondriky hatao fan̈atitry iroan̈a niny Zan̈ahariny lan̈itry.
Avio varimbazaha,
ndreky sira
ndreky divain,
avio menaka,
eraka raha nivolan̈indro pisoron̈o a Jerosalema an̈y,
amy zen̈y iro tsy voly han̈ano fan̈atitry tiany Zan̈ahariny lan̈itry,
avio hivavaka niny panjaka
ndreky niny zanaka panjaka.
Zaho koa nan̈amia beko
fa lan̈iany olo tsy man̈araka didy zen̈y,
hangalan̈a kakazo araiky amy tran̈onany,
ke hahanton̈o amizio izy.
Tran̈onany io amy zay
hatao kabonemponkonolo.
Ke anò Zan̈ahary nan̈apetraka an̈aranany a Jerosalema an̈y
handrongana lan̈iany panjaka
ndreky lan̈iany olo mitady han̈ano raha tsy aradalàn̈a,
ke mandravan̈a tran̈ony Zan̈ahary an̈y io!
Zaho Dariosy man̈amia beko zen̈y.
Direkty ataova raha nivolan̈iko.”
Tsisy raha nazony Tatenay ndreky namany aby io natao eky,
iro koa fa nahazo bekonampanjaka in̈y.
Sady voly nanabataba iro niasa tempoly iro,
avio tsy maintsy nan̈amia vola iro koa!
Ravoravo mare iro Jiosy tsy nivadiky aby io!
Koran̈iny andininy 22 ty fa
ravoravo koa iro nitokana tran̈ony Jehovah io,
tamy taon̈o 515 T.K.
Ravoravo koa iro nan̈ano Fetiny Mofo Tsisy Levira,
tan̈atiny fito andra.
Nataony Jehovah raha namparavoravo iro,
ke nataony raha nampiova fô panjakany Asyria,
nanjary nan̈ampy iro taminy asa momba tran̈ony ten̈a Zan̈ahary io,
Zan̈ahariny Israely zen̈y.
Aminandra izioty koa,
ravoravo atsika izikoa misy manampahifan̈a mahazo onondraha,
mampiasa fahifan̈andro han̈ampian̈a atsika.
Fa Jehovah ten̈a ataontsika mersy,
fotony baka aminany avianizen̈y.
Koran̈iny Ohabolana 21:1:
Ke atsika tsy tokony han̈apetraka fan̈antinan̈a amy pitondra ndreky fikambanan̈a misy amy donia ty.
Tsisy amindro io mahavita mamonjy atsika maharitry.
Ny raha ho hisy,
aloha heliny handravanan̈a doniany Satana ty,
firenena aby io hanohitry atsika vahoakany Zan̈ahary.
Fa mbala ho ratsiratsiny raha nahazo Tatenay in̈y raha hahazo iro amy zen̈y.
Ino aby ma fianaran̈a azontsika baka raha nikoran̈iny Ezra,
Hagay ndreky Zakaria in̈y?
Voanalohany,
Jehovah mitahy, izikoa atsika tapakevitry han̈ano asanany, ndray misy raha sarotro,
ke tsy ambelany handresy foeky iro panohitry atsika aby io.
Faharoe,
ho ravoravo mare atsika izikoa man̈ano voalohantoeran̈a asany Jehovah,
fa tsy varian̈a mamory fanan̈ana.
Ino ma asa nan̈irahany Jesosy atsika izioty?
Nambarany mazava raha zen̈y amy volan̈anany tamindro pianatranany aby io:
“Ke mandihana,
ataova pianatra olo baka amy firenena jiaby.”
Asa aboakantsika amy raha iritriretintsika ndreky raha ataontsika fa
asa io raha ten̈a maventy amintsika izioty, fa tsy tanjon̈o hanandraha?
Naminan̈y Hagay fa andra araiky an̈y,
tempoliny Jehovah io mbala ho be voninahitry mandilatrany tempoly namboariny Solomona.
Tanteraka raha zen̈y izioty.
Mampiasa fitorian̈a ataontsika io Jehovah
han̈ozonkozon̈ana iro firenena aby io.
Antapitrisany “raha valera”,
dikanizen̈y
olo vaovao manompo Jehovah man̈aton̈o izy.
Iro io ravoravo mivory amy tempoly arapan̈ahy,
tsy ino zen̈y fa
fandaharan̈a nataony Jehovah hanompoan̈a izy miorin̈y amy soron̈o nataony Jesosy.
Zioty efa tsy fotoan̈a ifantohan̈a amy ‘tran̈o nipitahan̈a kakazo tsara’ 
ndreky tsy fotoan̈a andanian̈a lera amy raha tsy tena ilain̈y eky.
Ten̈a efa hely tavela,
aminy andra araiky tsy ampoizintsika an̈y,
ho tapitry doniany Satana ty,
atsika hiditry amy donia vaovao.
Maro raha ataony Satana hampakivy atsika aminy andra izioty,
kanefa aza atao sakana tsy hamparavoravo anao manompo Jehovah raha zen̈y!
Izikoa mifen̈y fo atsika manompo Jehovah,
ho ravoravo atsika sady hilamintsain̈y amy donia vaovao an̈y,
baka io hanompo izy an̈atiny haravoan̈a mandrakizay.
Zerobabela,
Jesoa,
Hagay,
baka io Zakaria
nifen̈y mare nan̈ampy iro Israelita aby io
hatoky Jehovah ndraiky koa.
Taminy 468 T.K.,
Ezra foeky nandeha ta Jerosalema tan̈y
nanohan̈a fivavahan̈a marin̈y.
Ten̈a nila fan̈ampian̈a iro vahoaka aby io.
Ke Jehovah nan̈andefa pitariky araiky misy korazy mare.
Aminy andra aroe man̈araka io,
atsika hianatra momba lelahy araiky tsy nivadiky ndreky lelahy natanjaka,
tsy azovy fa Nehemia. 


-