JW subtitle extractor

Asa anao mba efa navy nampijalianolo
na navoa raha tsy rariny?
Efa navy nisy raha nataonolo na
nivolan̈inolo ma nampaneloko anao mare?
Tsisy olo tsy tatrany zen̈y.
Izikoa aminolo tsy mahay Jehovah edy,
matetiky iro koa fa mandamin̈y
problemo karaha zen̈y,
iro tsy man̈ano raha hihavan̈ana zen̈y.
Iro tsy man̈eky fa mila mamaly faty
olo nan̈ano raha ratsy tamindro in̈y fo.
Fa atsika tsy karaha zen̈y.
Haintsika fa Jehovah mahita raha jiaby.
Ary vitany koa mandamin̈y izio.
Ke tsara tsy hadin̈antsika volan̈any Jesosy ty:
“Sambatra olo malemy toetry.”
“Sambatra olo pampihavan̈a.”
Amy Baiboly ao misy
tantaranolo araiky nalemy toetry,
sady tia fihavan̈ana oe,
ndray izy nandalo raha farany sarotro,
ndreky niasaloha mare.
Ndray natetiky izio,
izy nifidy tsy hiady foeky fa
nifen̈y mare fo izy
nizaha hevitry hihavan̈ana.
Azovy ma izio?
I Jakoba.
Isaka an̈arany babany Jakoba.
Baka taminany nianarany
ho tia fihavan̈ana karaha zen̈y.
Tandraraiky nisy kere tamy tany nisy iro.
Ke nindesiny Isaka nifindra
ta Gerara fianakavian̈anany.
Abimeleka panjakany Gerara taminio,
izy panjakany Filistiny.
Alô tandrin̈esantsika
ino problemo nisy tamy zen̈y,
avio akory nataony Isaka nandamin̈y izio.
Azafady areva amy Baibolinaro
Genesisy toko faha-26 manomboko
aminy andininy faha-12:
Ke Isaka nikomansy namafy voendraha
tamy tany io tan̈y.
Tamy taon̈o io fo izy efa nahazo
vokatra injatony mahazatra,
fotony Jehovah nitahy izy.
Ke nanjary pan̈arivo izy,
avio tsy basiny zen̈y fo fa mbala
nahainaro fo fanan̈ananany,
ke nanjary pan̈arivo mare izy.
Nahazo ondrikondriky maro
ndreky aomby maro
avio panompo maro koa izy,
ke nanjary be fô izy iro Filistiny aby io.
Nan̈ovo fotaka amy zay iro Filistiny aby io,
ke nandeha nitotofandro vovo jiaby
nangadiany panompony Abrahama,
babany Isaka taminizy mbala velon̈o in̈y.
Ke Abimeleka nivolan̈a karaha ty taminy Isaka:
Mialà aminay eto anao.
Anao ndraiky nahery mare
nandilatra zahay kale.
Ke Isaka in̈y niala tao,
avio nitoby tamy vavasahany Gerara tan̈y.
Nipetraka tao amy zay izy.
Isaka baka tiô nandavaka ndraiky koa iro vovo aby
efa nangadiany taminy andrany
Abrahama babany in̈y,
vovo efa nitotofany Filistiny
tafarany nifatesany Abrahama raha io.
Efa namiany Abrahama an̈aran̈a
aby iro vovo jiaby io,
ke zen̈y fo nikahiany Isaka iro io.
Ke iro panompony Isaka aby io koa
fa nangady tamy vavasaha io,
iro nahazo vovo misy rano madio tsara.
Fa iro piambin̈y ondrikondrikiny Gerara aby io,
nivadiky nila ady tamy piambin̈y
ondrikondrikiny Isaka koa.
Ho iro:
Ninay i vovo io!
Ke Eseka nataony Isaka an̈arany vovo io,
fotony iro nankany taminany.
Nangady vovo hafa ndraiky koa
panompony Isaka,
fa mbala nitadiavandro ady fo koa iro.
Sitna nataony Isaka an̈arany vovo io.
Niala tiô izy tafaranizin̈y,
ke loso nangady vovo hafa koa.
Tsy niadivandro taminany eky raha io.
Rehobota nataony an̈arany vovo io,
fotony ho izy:
Jehovah efa nan̈amia atsika tany malalaka oe,
ke nataony nanjary maro mare
atsika amy tany ty.
Iro koa fa niala tiô
iro nanonga ta Beri-sheba tan̈y.
Alin̈izin̈y Jehovah niboaka taminany,
ke nivolan̈a taminany karaha ty:
Zaho Jehovah
zaho Zan̈ahariny Abrahama babanao.
Aza mavozo anao fa zaho han̈ampy anao.
Baka iô nohony Abrahama panomponaka,
zaho hitahy anao
ke ataoko hanjary marobe taranakanao.
Iro Filistiny aby io be fô Isaka,
ke nitadiavandro ady fo iro,
kanefa vovo io vovo nangadiany Abrahama.
Avio panjakany Filistiny koa
nan̈iraka Isaka hiala ta Gerara.
Ke safe nila nangala desizion Isaka tiô.
Olo sasany mety nivolan̈a taminany
midôha fo.
Miniminia hely baka raha mety
nivolan̈indro taminany:
‘Anao kony Isaka tsisy
raha ratsy nataonao ay!
Jehovah lastio efa nivolan̈a taminao fa
anao ndreky taranakanao hahazo tany io.
Tsisy raha tokony havozoanao.
Anao manan̈a panompo maro,
avio iro io mahery mandilatra
iro Filistiny aby io.
Anao aza man̈eky foeky!
Hiadiva an̈y lan̈iany olo miady vovo aminao.’
Izikoa anao tamy plasiny Isaka,
ino eky raha nataonao?
Fa Isaka,
nifidy nan̈ano raha hihavan̈ana fo.
Safe izy tapakevitry hiala tamy tany io.
Fa tsy mora taminany nan̈ano zen̈y.
Isaka baka nanan̈a panompo maro,
ndreky ondrikondriky maro,
ndreky biby hafa maro koa.
Avio koa izy tan̈y efa nanan̈a tany,
efa nitsabo voandraha maro mare,
raha io amy zen̈y koa namoa tsara.
Fa kanefa nialany aby raha jiaby zen̈y,
izy loso nifindra.
Fa tsy vita tiô problemony Isaka io.
Tamy tany nifindrany io tan̈y,
panomponany aby io nangady vovo,
ke nahazo rano madio tsara.
Fa iro piambin̈y ondrikondriky
tamy tany io nivolan̈a:
“Ninay i vovo io!”
Nangady vovo hafa koa Isaka.
Fa iro piambin̈y ondrikondriky tamy
tany io mbala niady izy fo koa.
Tamy zen̈y,
Isaka mbala tsy niady tamindro fo koa.
Isaka nifindra ndraiky koa,
ke farany amy zay,
izin̈y nahita tany tsara nipitrahan̈a fo,
tsisy pan̈abataba.
Hitany Jakoba fa
nisy vokany tsara raha nataony babany,
tia nan̈ano raha hihavan̈ana io.
Avio hainy fa,
Jehovah nitahy Isaka nohony
fanan̈any toetry tsara zen̈y.
Ino raha hianarantsika baka amy zen̈y?
Anaro raimandreny,
Kaza adin̈a foeky fa
toetry tsaranaro io,
misy vokany maventy
amindro zanakanaro aby io.
Jakoba nisy rahalahy amban̈a taminany,
Esao.
Tamy renindro niteraka iro,
Esao niboaka voanalohany.
Fa rango efa ela fo Jehovah efa nan̈ambara fa
amindro roe io,
Esao talan̈olo io hanompo zandriny aminany,
fa tsy karaha fomba mahazatra.
Efa hitany Jehovah tsialohaloha
han̈ano karakory toetrindro roe lahy io.
Ary efa hainy koa fa
fifandraisan̈a amy Jehovah zen̈y
raha tsisy dikany aminy Esao.
Izy tsy olo tia raha arapan̈ahy.
Niboaka tsarabe baka raha zen̈y,
taminizy nanakalo zòny talan̈olonany
tamy lantihy bakoly araiky.
Nifanta izy fa nandafo
zòny talan̈olo io tamy Jakoba.
Fa nisy raha maventy koa tafiditry amizio.
Taminizy nandafo zòny talan̈olo in̈y,
namiany Jakoba koa zònany
hahazo tsodrano baka amy babany,
tsodrano misy ifandraisany amy faminanian̈a.
Koa fa nandeha taon̈o,
natoe amy zay baka Isaka in̈y,
ke izy nanapakevitry fa
tiô fotoan̈a han̈amezany tsodrano
talan̈olonany.
Tsy hainy Isaka foeky fa
Esao efa nandafo zòny
talan̈olonany io tamy Jakoba.
Ke safe,
izy nivolan̈a taminy Esao fa
handeha hitsodrano izy.
Fa izy fo nivolan̈iny taminany,
Esao mila mandeha mitifitry
biby an̈aty ala an̈y,
aloky masiro baka iô amian̈a babany.
Ren̈iny Rebeka baka tambadiky tao
koran̈any Esao ndreky Isaka io,
ke izy nandresy lahatra Jakoba
han̈ano sary Esao,
Esao koa fa mandeha mitifitry
biby an̈aty ala an̈y.
Nahomby raha ankitin̈y tetikindro in̈y.
Tsy hainy Isaka izio tsy Esao,
izy nitsodrano Jakoba.
Fa Esao ndraiky koa fa nimpody baka tan̈y in̈y,
nahay raha io,
neloko mare izy!
Alô tandrin̈esantsika tantaranizio,
amy Genesisy toko faha-27,
manomboko aminy andininy faha-41.
Ke Esao koa fa tsy nahazo tsodrano
baka taminy Isaka in̈y,
izy nanjary be fô Jakoba fo.
Karaha ty raha tsy niala tan̈aty fônany tao:
Efa mahaimarikitry fo ziô andra
han̈anaovan̈a fisaon̈ana babako in̈y.
Izikoa vita izin̈y,
io tsy maintsy voneko fo Jakoba rahalahiko io.
Koa fa ren̈iny Rebeka taminolo
volan̈a Esao talan̈olonany io,
direkty efa nirahiny nikahian̈a
Jakoba faralahinany io.
Nivolan̈iny tamy Jakoba:
Karaha ty zanako ay!
Hitanao Esao rahalahinao in̈y,
izy mila hamaly faty anao,
ke anao io tiany vonen̈a ay.
Ke areha raha volan̈iko aminao ty ay,
mindao milefa amy Labana
anadahiko a Harana an̈y anao.
Midôha aminany an̈y antsendriky anao,
ziska helokony rahalahinao in̈y mba kirikiry.
Ke izikoa fa afaka helokony rahalahinao aminao,
ke efa hadin̈any raha nataonao taminany in̈y,
misy olo hirahiko hangala anao an̈y.
Tsy din̈iko hahita anaro roe hofoaty
an̈aty andra araiky zen̈y ay!
Tafaranizin̈y,
Rebeka tsy vôly nivolan̈a taminy Isaka karaha ty:
Empaka zalahy zaho amindro tsaiky
man̈angy zanakany Hetita aby ty ay!
Ke Jakoba koa mbala hanambady
man̈angy zanakany Hetita
karaha iro tsaiky man̈angy tompintany aby io,
sintrany fo zaho maty ay!
Ke nikahiany Isaka Jakoba,
avio Isaka nitsodrano izy
sady nisofin̈iny tsarabe karaha ty izy:
Anao zalahy aza mangala vady
a Kanana eto ay.
Mindao a Padana-arama,
antran̈ony Betoela anadahiny mamanao an̈y.
Ke zanaka Labana anadahiny mamanao,
man̈angy zen̈y aleva ataonao vadinao.
Zan̈ahary Farany Mahery hitahy anao
ke ataony manan̈a taranaka anao,
sady ataony hanjary marobe taranakanao.
Ke hanjary firenena maventy anao.
Avio koa izy hitahy anao ndreky taranakanao,
karaha nataony nitahy Abrahama in̈y.
Ho azonao amy zen̈y tany nivahinian̈anao ty,
tany efa namezany Zan̈ahary Abrahama ty.
Ke Jakoba baka tiô nalefany Isaka nandeha,
ke loso izy nandeha ta Padana-arama tan̈y,
handeha amy Labana
zanakany Betoela aramianin̈y
sady anadahiny Rebeka
reniny Jakoba ndreky Esao.
Raimandreniny Jakoba
nan̈iraka izy handeha lavitry,
tamy tontonany tan̈y tamy Labana,
handeha hitady vady.
Sosoko dianany fo zen̈y fa
hilefa Esao ten̈a dianany tan̈y.
Diniha baka koran̈antsika taloha tarỳ.
Isaka nanan̈a problemo tamindro Filistiny aby io.
Izikoa zahan̈a karaha io,
karaha efa ady fo mahalamin̈y problemo io.
Fa karakory nataony Isaka taminio?
Izy nandeha nifindra.
Mbala miramira zen̈y fo koa
problemo tojy izy eto.
Rahalahiny io neloko mare taminany,
ke Jakoba nandeha.
Tsy vitany niala tanàna fo izy fa
nialany koa lafaminany.
Avio lavitry mare koa tany himboan̈y io,
ke tsy maintsy ela izy vo navy tan̈y.
Azony Jakoba natao tsarabe nifidy
tsy hiala tany nisy iro io,
fotony efa nazony zòny talan̈olo in̈y.
Mety vitany tsarabe koa nivolan̈a
tamy babany ndreky reniny karaha ty:
‘Zaho koa efa tsy tsaiky ay.
Zaho efa olo 77 taon̈o!’
Fa tsy zen̈y foeky nataony.
Koran̈iny Baiboly karaha ty:
“Narehany Jakoba volan̈any
babany ndreky reniny
ke izy nandeha.”
Ino hianarantsika amy zen̈y?
Atsika koa tojo problemo
karaha tsy voalamin̈y izikoa tsisy ady,
mazava ho azy fa atsika tsy
han̈ano karaha Jakoba,
ke handeha hilefa antany hafa fo.
Fa kanefa ndraikindraiky atsika,
mety voatery tsy maintsy miala antsendriky
amy tany mety hampiady io.
Koran̈iny Ohabolana 17:14:
“Mira olo mamaky barazindrano fo
lan̈ianolo mitady ady aminolo,
ke mialà sandra
dieny mbala tsy vaky ankany.”
Jakoba koa fa tamy lalan̈a
handeha tamy tontonany tan̈y in̈y,
Jehovah niboaka taminany tamy nofy.
Nan̈amia toky Jakoba Jehovah fa
han̈ampy izy ndreky hiaro izy.
Fa zen̈y ndraiky edy tsy mivolan̈a fa
Jakoba efa tsy ho tojy problemo eky edy ay.
Tody tamy tontonany tan̈y izy,
ke izy niaraka nipetraka tamindro.
Koa fa ela ny ela,
tojy problemo koa Jakoba tamy tontonany tao.
Ke naboakany Jakoba koa tamy zen̈y fa
izy olo tia fihavan̈ana aminy ankitin̈y.
Alô baka tandrin̈esantsika
Genesisy toko faha-29,
manomboko aminy andininy faha-16.
Labana niteraka aroe vavy.
An̈arany araiky zoky Lea,
fa an̈arany araiky zandry ndraiky Rahely.
Fa masony Lea tsy tsara
ke tsy manaitry foeky,
fa Rahely ndraiky tsara sora
sady tsara forma koa.
Jakoba efa tia Rahely mare,
ke volan̈iny tamy Labana:
Zaho von̈ono hanompo anao fito taon̈o
amy zen̈y zaho mahazo Rahely faravavinao io.
Ke ho Labana taminany:
Sady sintrany anao mahazo izy
tozay izy azonolo hafa.
Fa anao edy aza miala ato ay.
Ke Jakoba nanompo izy tan̈atiny fito taon̈o,
baka ho azony Rahely io.
Tiany mare baka i Rahely,
ke hitany nalaky oe fito taon̈o io.
Avio Jakoba nivolan̈a tamy Labana:
Efa tapitry fito taon̈o nifan̈arahantsika in̈y fa
ameza zaho amy zay vadiko ay.
Ambilà amy zay zaho han̈ano firaisan̈a aminany.
Ke Labana in̈y nan̈ano fety be,
namory olo jiaby tanàna araiky.
Fa andra koa fa hariva,
Lea zanany man̈angy in̈y ndraiky nalain̈y
nindesin̈y tamy Jakoba tan̈y
han̈anaovany Jakoba firaisan̈a.
Avio namezany Labana atao
panompovaviny Lea zanany koa
i Zilpa panompovavinany.
Koa fa kiaka andra,
zahany Jakoba kaiky Lea tao.
Ke ho Jakoba tamy Labana:
Nan̈ino ma zaho nifitahinao?
Baka amy Rahely kony
nahavy zaho nanompo anao ay!
Nan̈ino zaho nataonao karaha io?
Fa ho Labana taminany:
Tsy fomba aminay atỳ kony zandry
mandeha aloha zay vo zoky zen̈y ay.
Ke anao man̈anaova fety miaraka
aminy araiky zoky io antsendriky
an̈atiny herin̈iandra,
fa afaranizio mbala hamian̈a anao
koa araiky zandry,
fa anao fo mila manompo zaho
fito taon̈o, atao takalony.
Ke Jakoba nan̈ano fety tan̈atiny herin̈iandra
niaraka taminy araiky talan̈olo io,
avio namezany Labana izy koa
Rahely zanany man̈angy nataony vady.
Namezany Labana Rahely koa
Bilaha panompovavinany,
atao panompony Rahely.
Nisy antony ankitin̈y nampaneloko Jakoba.
Iro roeny Labana efa nifan̈araka
fa hiasa aminany fito taon̈o izy
baka hazahoany Rahely.
Fa izikoa fa tapitry fito taon̈o in̈y,
navy lera han̈anaovan̈a fetiny vadian̈a io,
fa natao ndraiky man̈angy nisaron̈o voaly io,
tsy Rahely fa i Lea!
Miniminia hely baka Jakoba
meloko amy Labana,
sady Labana aminio koa tsy mba nan̈eky diso,
fa izy mbala niaro ten̈a fo.
Fa mety ho ino hevitry
navy tan̈atiny jeriny Jakoba tao?
Asa mba nidinihiny
fa Jehovah io mbala man̈atanteraka
fampan̈antinan̈any
hahavy taranaka Jakoba ho maro
“hanjary ho maro ambony tany
karaha hamarozany laposiera in̈y”?
Tsy haintsika ay!
Koa fa ela ny ela,
Lea ndreky Jakoba nananjanaka 6 lahy,
an̈atiny zen̈y i Levy ndreky Joda.
Iro io an̈isany lohany fianakavian̈a
ten̈a najain̈y tamy fokony Israely tamy zen̈y.
Tsiary hainy Jakoba taloha
fa mbala ho hisy raha karaha zen̈y.
Fa
Jakoba io olo tia fihavan̈ana,
ke izy nan̈eky nanambady Lea fo.
Avio ndray tsy pare raha nitadiaviny
Labana taminany in̈y,
nikeny fo izin̈y ke nanompo
Labana ndraiky izy tan̈atiny 7 taon̈o,
misy hazahoany Rahely.
Ino leson?
Ten̈any mety handiso fan̈antinan̈a atsika
izikoa misy olo araiky tsy nitan̈a
volan̈a nataony.
Koa zen̈y raha miboaka,
mandiniha fo ke,
mizahava antony tokony hamelan̈a heloko,
ke man̈anaova raha
baka hitohizany fihavan̈ana io fo.
Efa nanompo Labana tan̈atiny
14 taono i Jakoba tamy zen̈y,
zay vo nazony vadiny aroe io.
Avio koa izy mbala niasa tamy Labana
tan̈atiny 6 taon̈o koa,
zay vo nahazo tariminany.
Farany Jehovah nivolan̈a taminany,
ke navoriny fianakavian̈anany jiaby,
ndreky tariminany jiaby,
avio izy niala tamy Labana tao.
Fa izy tsy nirasa volan̈a tamy Labana.
Neloko mare Labana
koa fa hainy fa loso ry Jakoba.
Nihanin̈y iro baka tiô, ke tatrany.
Raha mare tamy zen̈y!
Fotony mety ho hisy ady baka.
Miniminia hely baka raha nandalo tamy zen̈y.
Iry Jakoba efa navy tan̈y tan̈abony bongo tan̈y.
Kadiriny efa maraindrain̈y andra taminio,
ke nisy tsiko manintsy mare.
Avio mety nantsintsin̈y mare koa iro biby aby io,
avio koa tiô fofokondro,
iry ondrikondriky, boriky, samô,
ndreky biby maro koa.
Iro panomponany aby io fo
nikarakara iro io,
ke iro taminio efa nan̈amboamboatra
koa hanohy diandro io.
Fa tiô fo mety nihaikihaiky
iro panompo aby io nitady vonjy.
Zahavandro amy zay Labana navy,
avio tsy izy zaraiky fo koa,
nisy lelahy maro fatatra niaraka taminany.
Iro nijotso baka tao niondran̈a samô.
Fa tsy raha tsara antony naviany
Labana nan̈araka iro tan̈y.
Sady iro lelahy aby io aminio,
efa von̈ono han̈araka
zay raha volan̈iny Labana.
Direkty efa nivorivory iro
panompony Jakoba aby io,
niambin̈y ino raha hiboaka.
Masondro jiaby amy Labana
ndreky Jakoba mikoran̈a.
Alin̈y talohanizio,
Jehovah baka efa nampitandrin̈y
Labana tamy nofy fa
mila hidinihiny tsara raha
handeha hivolan̈iny amy Jakoba.
Fa
Labana mbala neloko ndreky
nitady ady tamy Jakoba fo.
Labana nivolan̈a raha aroe
tsy nitiavany Jakoba.
Voanalohany ho izy karaha ty:
“Anao ma nazonino?
Ahia zaho nandeha nifitifitahanao
ke iro zanako man̈angy aby io nindesinao
mira olo nazo sesintany baka amy lagera in̈y?
Nan̈ino ma anao nijokojoko
niala taminaka tao
fa tsy nirasa volan̈a taminaka,
zaho handeha hifitsifitsenao?”
Nazava volan̈a nambarany Jakoba taminany.
Karaha ty raha nivolan̈iny:
“Navozo anao baka zaho in̈y ke
tsy nahasaky nivolan̈a.
Nidaon̈o mare zaho tan̈atiny jerinaka tan̈y,
tsao iro zanakanao man̈angy aby io
mbala forsenao adoso aminaka koa.”
Raha faharoe tsy nitiavany Labana Jakoba,
nangalariny Jakoba zen̈y Zan̈aharinany.
Izio baka nangalariny Rahely
Zan̈ahariny babany io,
fa Jakoba tsy nahay zen̈y foeky nata ny hely.
Namango nitadiaviny raha io fa
tsy hita foeky tany nan̈asitrihiny izy.
Nan̈azava tamy Labana amy zay
baka i Jakoba baka tiô.
Alô tandrin̈esantsika Genesisy toko faha-31,
manomboko aminy andininy faha-36.
Ke nanjary neloko mare Jakoba
avio Labana namiany tsin̈y mare.
Ho Jakoba karaha ty tamy Labana:
Mba ino ma raha ratsy nataoko anao,
ino loatra ma fahotan̈a vitako ke anao
mandeha man̈ian̈a zaho mare karaha ty?
Fanan̈ananaka jiaby ziô nisavainao,
fa ino raha baka tantran̈onao tan̈y hitanao tao?
Alô aboaha amasony rahalahiko
ndreky rahalahinao iô raha jiaby zen̈y,
avio ambilà iro hitsara atsika pianaka.
Tan̈atiny 20 taon̈o nipitrahako taminao tao,
mbala tsiary ndraiky nisy
ondrikondrikinao ndreky benginao ke
tsy nahavan̈ono anaka zen̈y.
Baka iô zaho tsiary nihina lahinondrikondrikinao.
Ndray izy aby misy amy biby
tariminao aby io nivoneny bibidỳ,
fa tsiary nambarako anao fa nisoloako hafa fo.
Fa izy ndraiky isaka nisy biby tariminao
nangalarinolo mantsan̈a na alin̈andra,
io tsy maintsy nampan̈ifainao zaho fo.
Zaho amy zen̈y niaritry tanin̈iandra
izikoa fa mantsan̈a andra,
avio niaritry nintsinandra izikoa fa alin̈y andra.
Tsiary ndraiky nazontoro foeky.
Efa 20 taon̈o amiziô io nipitrahako taminao tao.
Zaho nanompo anao tan̈atiny 14 taon̈o
baka nazahoako iro roe vavy in̈y,
avio zaho niasa taminao tan̈atiny 6 taon̈o
nazahoako ondrikondriky ndreky bengy taminao.
Avio karamanaka efa impolo nivoanao.
Izikoa donko Zan̈ahariny babako,
Zan̈ahariny Abrahama
ndreky Zan̈ahary atahorany Isaka
in̈y tsy nan̈ampy zaho,
zaho donko efa nalefanao nody
tan̈ampolo foeky ay.
Efa hitany Zan̈ahary jalinaka
ndreky asa mare nataoko in̈y,
ke zen̈y nahavy izy nampitandrin̈y anao alin̈y in̈y.
Fa ho Labana tamy Jakoba:
Iro man̈angy aby io zanako man̈angy,
iro tsaiky aby io zanako,
iro ondrikondriky ndreky bengy aby io
ondrikondriky ndreky benginaka,
iro fanan̈ana jiaby hitanao io
fanan̈ananaka ndreky
fanan̈anany zanako man̈angy.
Ke ino ma raha ratsy mety ataoko amindro io,
ndreky amindro tsaiky aby naterakandro io?
Alô atsika han̈ano fifan̈ikian̈a,
zaho ndreky anao,
ke izio ataontsika vavolombelon̈o amintsika roe.
Ke Jakoba in̈y nangala vato
avio natsangany tiô natao tsangambato.
Ho Jakoba tamy rahalahiny aby io:
Mindao mangala vato!
Nandeha nangala vato iro
ke raha io nataondro nifanaingitaingin̈y.
Iro baka tiô nihina tan̈abony vatobe
navorivorindro io.
Nataony Labana Jegara-sahadota
an̈arany raha io,
fa Galeda ndraiky nikahiany Jakoba izio.
Ho Labana baka tiô:
Iro vato mivovon̈o aby ty
vavolombelon̈o aminaka ndreky aminao niany.
Zen̈y nahavy izy nikaiky izio Galeda
ndreky Tilikambo Fiambesan̈a.
Fotony ho izy:
Sintrany Jehovah man̈aramaso atsika
atsika koa fa tsy fankahita eky.
Ke anao koa mampijaly iro zanako aby io
na manambady olo hafa ankoatrany iro io,
aza adin̈a fa
ndray tsisy olo mahita raha zen̈y,
Zan̈ahary ho vavolombelon̈o
aminaka ndreky aminao.
Karaha ty koa ho izy tamy Jakoba:
Iro vato aby navorintsika ty
ndreky tsangambato natsanganantsika ty,
iro ty lamarikiny fifan̈ikian̈a nifan̈anaovantsika.
Iro vato aby navorintsika ty
ndreky tsangambato natsanganantsika ty,
iro io vavolombelon̈o fa
zaho tsy handeha hihoatra iro vato aby io
handeha han̈isian̈a ratsy anao,
baka iô koa anao tsy hihoatra
iro vato aby mivovon̈o aby ty
ndreky iro tsangambato aby ty
baka handeha han̈isian̈a ratsy zaho.
Irarian̈a Zan̈ahariny Abrahama
ndreky Zan̈ahariny Nahora,
sady Zan̈ahariny babandro io
hitsara atsika.
Ke Jakoba amy zay nifanta taminy
an̈arany Zan̈ahary atahorany babany io.
Tafarany zen̈y,
nan̈ano soron̈o tamy bongo io Jakoba,
avio nikahiany niaraka nihina
taminany rahalahiny aby io.
Ke iro koa fa baka nihina,
iro nandry tan̈abony bongo tiô.
Maraindrain̈y Labana efa nifoha
nihoroko iro zanany man̈angy aby io
ndreky iro zafiny aby io, avio nitsodrano iro.
Loso amy zay Labana baka tiô
nandeha nody tamy tran̈onany tan̈y.
Jakoba nanompo Labana tan̈atiny 20 taon̈o,
tsiary nivadiky taminany
ndray Labana taminio namitaka izy
ndreky nan̈araraotro izy.
Labana tsy tihahalala zen̈y foeky!
Raha jiaby nanan̈any Jakoba zen̈y ho izy,
ndray olo io ndray biby tarimin̈y,
ninany aby zen̈y jiaby.
Labana baka tiô nangataka iro
han̈ano fifan̈ikian̈a fa hihavan̈a,
ke fianakavian̈any baka an̈ila ndreky an̈ila
samby tsisy hifan̈ano ratsy.
Fa ndray izy man̈ano zen̈y,
raha nataony Labana io tsy mivolan̈a
fa izy olo tia fihavan̈ana.
Dikany nan̈anaovany izin̈y donko,
mety izy tihangala toky fa
izikoa izy maty,
Jakoba efa sira fa tsy
himpody aminany an̈y eky,
ke tsy hangala lovandro zanany lelahy aby io.
Fa na ino na ino antony,
Jakoba tsy olo sarotro atao.
Izy nan̈eky fo,
ke iro in̈y nilamin̈y nefa tsy niady aby.
Iro nanangana tsangambato
hampatsiaro fifan̈ikian̈a nataondro
fa iro efa tsy hiady eky.
Ndray Labana nampijaly Jakoba
tan̈atiny taon̈o taon̈o,
Jakoba mbala nan̈ano fifan̈ikian̈a
hihavan̈a taminany fo.
Izy tsy nitana heloko tampô foeky,
sady izy koa tsy namaly faty.
Nefa koa edy problemo araiky in̈y ay!
Fa ziô hisy problemo hafa koa tojo izy.
Jakoba nandefa pitondra hafatra
nandeha taminy Esao tan̈y.
Iro io nivolan̈a taminany fa
Jakoba efa avy baka ao
handeha hitady fihavan̈ana aminany an̈y.
Iro olo aby pitondra hafatra
aby io baka tiô nimpody
nan̈ambara Jakoba fa
ry Esao koa efa amy lalan̈a baka ao
handeha hifanojy aminany,
misy 400 lahy miaraka aminany.
Raha han̈ino eky?
Mbala neloko tamy Jakoba fo ma Esao in̈y?
Hay tsarabe fa
niasaloha mare Jakoba tamy zen̈y.
Izy baka tsy tihiady
taminy Esao rahalahinany io.
Alô baka tandrin̈esantsika
akory nataony taminio.
Azafady biafa amy Genesisy 32:13 Baibolinaro.
Ke nandry tiô izy taminy alin̈izin̈y.
Nisy raha aby ty nalainy tamy fanan̈ananany
handeha ataony kadôny Esao rahalahiny io:
bengivavy 200, bengilahy 20,
ondrikondrikivavy 200, ondrikondrikilahy 20,
samôvavy mampinono 30,
aombivavy 40, aombilahy 10,
borikivavy 20, avio borikilahy 10.
Namezany iro panomponany aby io
amy zay iro biby jiaby zen̈y,
baka iô nivolan̈iny tamindro karaha ty:
Anaro mandihan̈a antsendriky
mitsaka an̈y alohanaka.
Avio ataova misy elan̈elany iro biby aby io.
Avio karaha ty koa komandy nivolan̈iny
tamy panomponany araiky voanalohany in̈y:
Tsao sendra fanojy anao Esao
ke man̈ontany anao:
“Anao panomponjovy,
avio anahia anao io,
avio ninjovy biby aby alohanao aby io?”
Volan̈a aminany:
“Iro io niny Jakoba panomponao.
Izio nalefany baka tao handeha
atao kadônao Esao tompoko anao,
fa izy efa amy lalan̈a
man̈araka baka afara ao.”
Namiany komandy koa araiky faharoe,
ndreky araiky fahatelo,
ndreky iro jiaby nan̈araka iro biby aby io.
Ho izy:
Karaha zen̈y karaha zen̈y
raha volan̈inaro aminy Esao,
anaro koa fa fanojy izy.
Baka iô koa volan̈a aminany,
“Ao avy afaranay ao Jakoba panomponao.”
Nampivolan̈a jery karaha ty baka Jakoba:
Izikoa izy andifasako kadô tsialohaloha,
mety hampakalma izy raha zen̈y,
ke mety hiraisin̈y tsara zaho
lera zahay roe fanojy.
Jakoba ten̈a tihihavan̈a amy
rahalahinany ankitin̈y.
Izy nafoe kadô amian̈a Esao,
biby mandeha 100 manan̈amby,
baka iro hihavan̈a tsarabe.
Ke raha nataony Jakoba zen̈y
ma mivolan̈a fa
izy olo dindery sady tsotra loatra?
Aha, tsy zen̈y foeky!
Fa talohanizy hifanojy taminy Esao,
Jakoba nitolon̈o taminy anjely
nahampy kiakandra.
Nan̈ano zen̈y izy
hangalan̈a toky tsarabe fa
Jehovah mbala hitahy izy fo.
Alô tandrin̈esantsika
karakory nataondro roe lahy
iro koa fa fanojy.
Azafady avadiha amy
Genesisy 33:1 Baibolinaro:
Jakoba koa fa nitazan̈a baka alavitry tarỳ
hitany Esao navy,
avio nisy 400 lahy niaraka taminany.
Ke nirasarasainy taminiry Lea
baka iô iro panompovavinany aroe in̈y
iro zanany aby io.
Nataony talohanany amy zay
panompovavinany ndreky zanakandro,
fan̈arakaraka amy zay Lea ndreky zanakandro,
avio Rahely ndreky Josefa amy zay tafarandro io.
Fa Jakoba baka tiô nandeha talohandro
avio nankohoko tamy tany impito aby,
mandrapaviany narikitry rahalahiny tiô.
Fa Esao baka tiô nilomoay
handeha hitsen̈a Jakoba,
izy baka tiô nifihin̈iny mare avio nirôfiny.
Tomoan̈y amy zay iro roe mirahalahy.
Esao amy zay koa fa nahita iro
man̈angy ndreky iro tsaiky aby io,
izy nan̈ontany,
ho izy:
Azovy ma iro dia araiky aminao io?
Ho Jakoba taminany:
Iro io tsaiky namezany Zan̈ahary
zaho panomponao.
Ke iro panompovaviny Jakoba aby io
ndreky zanakandro baka tiô nan̈aton̈o,
baka iô nankohoko.
Avio nan̈aton̈o koa i Lea ndreky iry zanany
baka iô nankohoko koa.
Nan̈aton̈o amy zay koa Josefa ndreky Rahely,
baka iô nankohoko koa.
Esao baka tiô nivolan̈a:
Nan̈ino fo ma anao nandefa
iro olo aby io ndreky iro biby aby io
nandeha nifanojy taminaka?
Ho Jakoba:
Baka zaho tompoko anao
mba mahazo fankasitrahan̈a aminao.
Esao avio nivolan̈a:
Hitanao rahalahy,
tanà ninao fo iro fanan̈ananao aby io
fa zaho fa misy maro.
Fa ho Jakoba taminany:
Azafady Esao ô!
Azafady izikoa anao
mankasitraka zaho ankitin̈y,
mba aleva kony iro raha
namezako anao aby io ô!
Zaho baka mba efa tihahita soranao mare
ke nindesiko ninao raha aby io.
Nahita soranao ankitin̈y zaho niany,
karaha efa nahita sorany Zan̈ahary ay,
fotony zaho niraisinao tsarabe.
Mba aleva kony azafady iro
kadô nindesiko ninao aby io ô!
Iro io tsodrano baka aminaka.
Efa nankasitrahany Zan̈ahary baka zaho,
ke manan̈a raha jiaby ilaiko.
Niainsisty fo Jakoba
ke farany nalainy Esao fo kadônany io.
Nisy vokany tsara ankitn̈y raha
nataony Jakoba in̈y.
Tsy araka nieritreretan̈a izy raha niboaka,
fotony iro tsy niady fa nihavan̈a tsarabe.
Nifampitolon̈o iro roe,
baka iô samby nitomoan̈y.
Mbala naboakany Jakoba fo tiô fa
izy olo tia fihavan̈ana.
Nan̈ino atsika mivolan̈a zen̈y?
Izy nivavaka,
avio izy nan̈ano raha nifan̈araka
tamy vavaka nataony in̈y.
‘Tompoko’ ho izy tamy rahalahiny.
Zen̈y man̈ambara fa izy nan̈aja rahalahiny io,
ndreky nan̈amia voninahitry izy.
Tsy basiny zen̈y fo fa
izy mbala nankohoko tamy
rahalahiny io impito aby!
Ino raha hianarantsika baka amy zen̈y?
Hianarantsika baka amy tantara io fa
mila mifen̈y mare fo atsika
man̈ano raha hihavan̈ana
amindro rahalahintsika aby io
ndreky amindro ranabavintsika aby io.
Maro raha hianarantsika baka amy Jakoba,
momba fan̈anaovan̈a raha
hihavan̈ana aminolo io.
Rahalahiny koa fa nimenasy hamono izy,
loso izy nifindra tanàna.
Avio Labana koa fa namitaka izy
tamy Rahely ndreky Lea in̈y,
izy nandefitry fo.
Labana ndray nan̈aratsy izy
ndreky nan̈odihody raha tsy nataony,
izy mbala nan̈eky nan̈ano
fifan̈ikian̈a hihavan̈a tamy Labana fo.
Izy amy zay koa fa handeha
hifanojy taminy Esao,
namiany kadô Esao.
Aza adin̈a fa tamy raha jiaby nandalo io,
tsisy raha tokony nan̈anaovany
Jakoba azafady.
Fa kanefa tamy fiain̈ananany jiaby,
Jakoba olo tia fihavan̈ana.
Izy natoky Jehovah,
ke Jehovah nitahy izy.
Jehovah tsy mety han̈adin̈a Jakoba,
ndreky izy nifen̈y nan̈ano raha hihavan̈ana,
na taminjovy na taminjovy.
Ke atsika koa man̈ano ambaka zen̈y,
man̈ano raha hihavan̈ana aminolo fo
ndray tsy rariny raha nataondro tamintsika,
avio atsika nata injehinolo,
na amy problemo madinidiniky izio
na amy problemo maventy be,
tsy adin̈any Jehovah atsika
izikoa mitady fihavan̈ana.
Jehovah tsy maintsy hitahy atsika koa
izikoa atsika tia fihavan̈ana,
karaha nataony Jakoba in̈y.

Jakoba: Olo Tia Fihavan̈ana
- 

Jakoba: Olo Tia Fihavan̈ana

Asa anao mba efa navy nampijalianolo
na navoa raha tsy rariny?
Efa navy nisy raha nataonolo na
nivolan̈inolo ma nampaneloko anao mare?
Tsisy olo tsy tatrany zen̈y.
Izikoa aminolo tsy mahay Jehovah edy,
matetiky iro koa fa mandamin̈y 
problemo karaha zen̈y,
iro tsy man̈ano raha hihavan̈ana zen̈y.
Iro tsy man̈eky fa mila mamaly faty
olo nan̈ano raha ratsy tamindro in̈y fo.
Fa atsika tsy karaha zen̈y.
Haintsika fa Jehovah mahita raha jiaby.
Ary vitany koa mandamin̈y izio.
Ke tsara tsy hadin̈antsika volan̈any Jesosy ty:
“Sambatra olo malemy toetry.”
“Sambatra olo pampihavan̈a.”
Amy Baiboly ao misy
tantaranolo araiky nalemy toetry, 
sady tia fihavan̈ana oe,
ndray izy nandalo raha farany sarotro,
ndreky niasaloha mare.
Ndray natetiky izio,
izy nifidy tsy hiady foeky fa
nifen̈y mare fo izy
nizaha hevitry hihavan̈ana.
Azovy ma izio?
I Jakoba.
Isaka an̈arany babany Jakoba.
Baka taminany nianarany 
ho tia fihavan̈ana karaha zen̈y.
Tandraraiky nisy kere tamy tany nisy iro.
Ke nindesiny Isaka nifindra
ta Gerara fianakavian̈anany.
Abimeleka panjakany Gerara taminio,
izy panjakany Filistiny.
Alô tandrin̈esantsika
ino problemo nisy tamy zen̈y,
avio akory nataony Isaka nandamin̈y izio.
Azafady areva amy Baibolinaro
Genesisy toko faha-26 manomboko
aminy andininy faha-12:
Ke Isaka nikomansy namafy voendraha
tamy tany io tan̈y.
Tamy taon̈o io fo izy efa nahazo
vokatra injatony mahazatra,
fotony Jehovah nitahy izy.
Ke nanjary pan̈arivo izy,
avio tsy basiny zen̈y fo fa mbala
nahainaro fo fanan̈ananany,
ke nanjary pan̈arivo mare izy.
Nahazo ondrikondriky maro
ndreky aomby maro
avio panompo maro koa izy,
ke nanjary be fô izy iro Filistiny aby io.
Nan̈ovo fotaka amy zay iro Filistiny aby io,
ke nandeha nitotofandro vovo jiaby
nangadiany panompony Abrahama,
babany Isaka taminizy mbala velon̈o in̈y.
Ke Abimeleka nivolan̈a karaha ty taminy Isaka:
Mialà aminay eto anao.
Anao ndraiky nahery mare
nandilatra zahay kale.
Ke Isaka in̈y niala tao,
avio nitoby tamy vavasahany Gerara tan̈y.
Nipetraka tao amy zay izy.
Isaka baka tiô nandavaka ndraiky koa iro vovo aby
efa nangadiany taminy andrany
Abrahama babany in̈y,
vovo efa nitotofany Filistiny
tafarany nifatesany Abrahama raha io.
Efa namiany Abrahama an̈aran̈a
aby iro vovo jiaby io,
ke zen̈y fo nikahiany Isaka iro io.
Ke iro panompony Isaka aby io koa
fa nangady tamy vavasaha io,
iro nahazo vovo misy rano madio tsara.
Fa iro piambin̈y ondrikondrikiny Gerara aby io,
nivadiky nila ady tamy piambin̈y
ondrikondrikiny Isaka koa.
Ho iro:
Ninay i vovo io!
Ke Eseka nataony Isaka an̈arany vovo io,
fotony iro nankany taminany.
Nangady vovo hafa ndraiky koa
panompony Isaka,
fa mbala nitadiavandro ady fo koa iro.
Sitna nataony Isaka an̈arany vovo io.
Niala tiô izy tafaranizin̈y,
ke loso nangady vovo hafa koa.
Tsy niadivandro taminany eky raha io.
Rehobota nataony an̈arany vovo io,
fotony ho izy:
Jehovah efa nan̈amia atsika tany malalaka oe,
ke nataony nanjary maro mare
atsika amy tany ty.
Iro koa fa niala tiô
iro nanonga ta Beri-sheba tan̈y.
Alin̈izin̈y Jehovah niboaka taminany,
ke nivolan̈a taminany karaha ty:
Zaho Jehovah
zaho Zan̈ahariny Abrahama babanao.
Aza mavozo anao fa zaho han̈ampy anao.
Baka iô nohony Abrahama panomponaka,
zaho hitahy anao
ke ataoko hanjary marobe taranakanao.
Iro Filistiny aby io be fô Isaka,
ke nitadiavandro ady fo iro,
kanefa vovo io vovo nangadiany Abrahama.
Avio panjakany Filistiny koa 
nan̈iraka Isaka hiala ta Gerara.
Ke safe nila nangala desizion Isaka tiô.
Olo sasany mety nivolan̈a taminany
midôha fo.
Miniminia hely baka raha mety 
nivolan̈indro taminany:
‘Anao kony Isaka tsisy
raha ratsy nataonao ay!
Jehovah lastio efa nivolan̈a taminao fa
anao ndreky taranakanao hahazo tany io.
Tsisy raha tokony havozoanao.
Anao manan̈a panompo maro,
avio iro io mahery mandilatra 
iro Filistiny aby io.
Anao aza man̈eky foeky!
Hiadiva an̈y lan̈iany olo miady vovo aminao.’
Izikoa anao tamy plasiny Isaka,
ino eky raha nataonao?
Fa Isaka,
nifidy nan̈ano raha hihavan̈ana fo.
Safe izy tapakevitry hiala tamy tany io.
Fa tsy mora taminany nan̈ano zen̈y.
Isaka baka nanan̈a panompo maro,
ndreky ondrikondriky maro,
ndreky biby hafa maro koa.
Avio koa izy tan̈y efa nanan̈a tany,
efa nitsabo voandraha maro mare,
raha io amy zen̈y koa namoa tsara.
Fa kanefa nialany aby raha jiaby zen̈y,
izy loso nifindra.
Fa tsy vita tiô problemony Isaka io.
Tamy tany nifindrany io tan̈y,
panomponany aby io nangady vovo,
ke nahazo rano madio tsara.
Fa iro piambin̈y ondrikondriky 
tamy tany io nivolan̈a:
“Ninay i vovo io!”
Nangady vovo hafa koa Isaka.
Fa iro piambin̈y ondrikondriky tamy
tany io mbala niady izy fo koa.
Tamy zen̈y,
Isaka mbala tsy niady tamindro fo koa.
Isaka nifindra ndraiky koa,
ke farany amy zay,
izin̈y nahita tany tsara nipitrahan̈a fo,
tsisy pan̈abataba.
Hitany Jakoba fa 
nisy vokany tsara raha nataony babany,
tia nan̈ano raha hihavan̈ana io.
Avio hainy fa,
Jehovah nitahy Isaka nohony
fanan̈any toetry tsara zen̈y.
Ino raha hianarantsika baka amy zen̈y?
Anaro raimandreny,
Kaza adin̈a foeky fa
toetry tsaranaro io,
misy vokany maventy
amindro zanakanaro aby io.
Jakoba nisy rahalahy amban̈a taminany,
Esao.
Tamy renindro niteraka iro,
Esao niboaka voanalohany.
Fa rango efa ela fo Jehovah efa nan̈ambara fa
amindro roe io,
Esao talan̈olo io hanompo zandriny aminany,
fa tsy karaha fomba mahazatra.
Efa hitany Jehovah tsialohaloha
han̈ano karakory toetrindro roe lahy io.
Ary efa hainy koa fa
fifandraisan̈a amy Jehovah zen̈y
raha tsisy dikany aminy Esao.
Izy tsy olo tia raha arapan̈ahy.
Niboaka tsarabe baka raha zen̈y,
taminizy nanakalo zòny talan̈olonany
tamy lantihy bakoly araiky.
Nifanta izy fa nandafo
zòny talan̈olo io tamy Jakoba.
Fa nisy raha maventy koa tafiditry amizio.
Taminizy nandafo zòny talan̈olo in̈y,
namiany Jakoba koa zònany
hahazo tsodrano baka amy babany,
tsodrano misy ifandraisany amy faminanian̈a.
Koa fa nandeha taon̈o,
natoe amy zay baka Isaka in̈y,
ke izy nanapakevitry fa
tiô fotoan̈a han̈amezany tsodrano
talan̈olonany.
Tsy hainy Isaka foeky fa
Esao efa nandafo zòny
talan̈olonany io tamy Jakoba.
Ke safe, 
izy nivolan̈a taminy Esao fa
handeha hitsodrano izy.
Fa izy fo nivolan̈iny taminany,
Esao mila mandeha mitifitry
biby an̈aty ala an̈y,
aloky masiro baka iô amian̈a babany.
Ren̈iny Rebeka baka tambadiky tao
koran̈any Esao ndreky Isaka io,
ke izy nandresy lahatra Jakoba
han̈ano sary Esao,
Esao koa fa mandeha mitifitry
biby an̈aty ala an̈y.
Nahomby raha ankitin̈y tetikindro in̈y.
Tsy hainy Isaka izio tsy Esao, 
izy nitsodrano Jakoba.
Fa Esao ndraiky koa fa nimpody baka tan̈y in̈y,
nahay raha io,
neloko mare izy!
Alô tandrin̈esantsika tantaranizio,
amy Genesisy toko faha-27,
manomboko aminy andininy faha-41.
Ke Esao koa fa tsy nahazo tsodrano
baka taminy Isaka in̈y,
izy nanjary be fô Jakoba fo.
Karaha ty raha tsy niala tan̈aty fônany tao:
Efa mahaimarikitry fo ziô andra
han̈anaovan̈a fisaon̈ana babako in̈y.
Izikoa vita izin̈y,
io tsy maintsy voneko fo Jakoba rahalahiko io.
Koa fa ren̈iny Rebeka taminolo
volan̈a Esao talan̈olonany io,
direkty efa nirahiny nikahian̈a
Jakoba faralahinany io.
Nivolan̈iny tamy Jakoba:
Karaha ty zanako ay!
Hitanao Esao rahalahinao in̈y,
izy mila hamaly faty anao,
ke anao io tiany vonen̈a ay.
Ke areha raha volan̈iko aminao ty ay,
mindao milefa amy Labana
anadahiko a Harana an̈y anao.
Midôha aminany an̈y antsendriky anao,
ziska helokony rahalahinao in̈y mba kirikiry.
Ke izikoa fa afaka helokony rahalahinao aminao,
ke efa hadin̈any raha nataonao taminany in̈y,
misy olo hirahiko hangala anao an̈y.
Tsy din̈iko hahita anaro roe hofoaty
an̈aty andra araiky zen̈y ay!
Tafaranizin̈y,
Rebeka tsy vôly nivolan̈a taminy Isaka karaha ty:
Empaka zalahy zaho amindro tsaiky
man̈angy zanakany Hetita aby ty ay!
Ke Jakoba koa mbala hanambady
man̈angy zanakany Hetita
karaha iro tsaiky man̈angy tompintany aby io,
sintrany fo zaho maty ay!
Ke nikahiany Isaka Jakoba,
avio Isaka nitsodrano izy
sady nisofin̈iny tsarabe karaha ty izy:
Anao zalahy aza mangala vady 
a Kanana eto ay.
Mindao a Padana-arama,
antran̈ony Betoela anadahiny mamanao an̈y.
Ke zanaka Labana anadahiny mamanao,
man̈angy zen̈y aleva ataonao vadinao.
Zan̈ahary Farany Mahery hitahy anao
ke ataony manan̈a taranaka anao,
sady ataony hanjary marobe taranakanao.
Ke hanjary firenena maventy anao.
Avio koa izy hitahy anao ndreky taranakanao,
karaha nataony nitahy Abrahama in̈y.
Ho azonao amy zen̈y tany nivahinian̈anao ty,
tany efa namezany Zan̈ahary Abrahama ty.
Ke Jakoba baka tiô nalefany Isaka nandeha,
ke loso izy nandeha ta Padana-arama tan̈y,
handeha amy Labana
zanakany Betoela aramianin̈y
sady anadahiny Rebeka
reniny Jakoba ndreky Esao.
Raimandreniny Jakoba
nan̈iraka izy handeha lavitry,
tamy tontonany tan̈y tamy Labana,
handeha hitady vady.
Sosoko dianany fo zen̈y fa
hilefa Esao ten̈a dianany tan̈y.
Diniha baka koran̈antsika taloha tarỳ.
Isaka nanan̈a problemo tamindro Filistiny aby io.
Izikoa zahan̈a karaha io,
karaha efa ady fo mahalamin̈y problemo io.
Fa karakory nataony Isaka taminio?
Izy nandeha nifindra.
Mbala miramira zen̈y fo koa
problemo tojy izy eto.
Rahalahiny io neloko mare taminany,
ke Jakoba nandeha.
Tsy vitany niala tanàna fo izy fa
nialany koa lafaminany.
Avio lavitry mare koa tany himboan̈y io,
ke tsy maintsy ela izy vo navy tan̈y.
Azony Jakoba natao tsarabe nifidy
tsy hiala tany nisy iro io,
fotony efa nazony zòny talan̈olo in̈y.
Mety vitany tsarabe koa nivolan̈a
tamy babany ndreky reniny karaha ty:
‘Zaho koa efa tsy tsaiky ay.
Zaho efa olo 77 taon̈o!’
Fa tsy zen̈y foeky nataony.
Koran̈iny Baiboly karaha ty:
“Narehany Jakoba volan̈any 
babany ndreky reniny
ke izy nandeha.”
Ino hianarantsika amy zen̈y?
Atsika koa tojo problemo
karaha tsy voalamin̈y izikoa tsisy ady,
mazava ho azy fa atsika tsy 
han̈ano karaha Jakoba,
ke handeha hilefa antany hafa fo.
Fa kanefa ndraikindraiky atsika,
mety voatery tsy maintsy miala antsendriky
amy tany mety hampiady io.
Koran̈iny Ohabolana 17:14:
“Mira olo mamaky barazindrano fo
lan̈ianolo mitady ady aminolo,
ke mialà sandra
dieny mbala tsy vaky ankany.”
Jakoba koa fa tamy lalan̈a
handeha tamy tontonany tan̈y in̈y,
Jehovah niboaka taminany tamy nofy.
Nan̈amia toky Jakoba Jehovah fa
han̈ampy izy ndreky hiaro izy.
Fa zen̈y ndraiky edy tsy mivolan̈a fa
Jakoba efa tsy ho tojy problemo eky edy ay.
Tody tamy tontonany tan̈y izy,
ke izy niaraka nipetraka tamindro.
Koa fa ela ny ela,
tojy problemo koa Jakoba tamy tontonany tao.
Ke naboakany Jakoba koa tamy zen̈y fa
izy olo tia fihavan̈ana aminy ankitin̈y.
Alô baka tandrin̈esantsika 
Genesisy toko faha-29,
manomboko aminy andininy faha-16.
Labana niteraka aroe vavy.
An̈arany araiky zoky Lea,
fa an̈arany araiky zandry ndraiky Rahely.
Fa masony Lea tsy tsara 
ke tsy manaitry foeky,
fa Rahely ndraiky tsara sora
sady tsara forma koa.
Jakoba efa tia Rahely mare,
ke volan̈iny tamy Labana:
Zaho von̈ono hanompo anao fito taon̈o
amy zen̈y zaho mahazo Rahely faravavinao io.
Ke ho Labana taminany:
Sady sintrany anao mahazo izy
tozay izy azonolo hafa.
Fa anao edy aza miala ato ay.
Ke Jakoba nanompo izy tan̈atiny fito taon̈o,
baka ho azony Rahely io.
Tiany mare baka i Rahely,
ke hitany nalaky oe fito taon̈o io.
Avio Jakoba nivolan̈a tamy Labana:
Efa tapitry fito taon̈o nifan̈arahantsika in̈y fa
ameza zaho amy zay vadiko ay.
Ambilà amy zay zaho han̈ano firaisan̈a aminany.
Ke Labana in̈y nan̈ano fety be,
namory olo jiaby tanàna araiky.
Fa andra koa fa hariva,
Lea zanany man̈angy in̈y ndraiky nalain̈y
nindesin̈y tamy Jakoba tan̈y
han̈anaovany Jakoba firaisan̈a.
Avio namezany Labana atao
panompovaviny Lea zanany koa 
i Zilpa panompovavinany.
Koa fa kiaka andra,
zahany Jakoba kaiky Lea tao.
Ke ho Jakoba tamy Labana:
Nan̈ino ma zaho nifitahinao?
Baka amy Rahely kony
nahavy zaho nanompo anao ay!
Nan̈ino zaho nataonao karaha io?
Fa ho Labana taminany:
Tsy fomba aminay atỳ kony zandry
mandeha aloha zay vo zoky zen̈y ay.
Ke anao man̈anaova fety miaraka
aminy araiky zoky io antsendriky
an̈atiny herin̈iandra,
fa afaranizio mbala hamian̈a anao
koa araiky zandry,
fa anao fo mila manompo zaho
fito taon̈o, atao takalony.
Ke Jakoba nan̈ano fety tan̈atiny herin̈iandra
niaraka taminy araiky talan̈olo io,
avio namezany Labana izy koa 
Rahely zanany man̈angy nataony vady.
Namezany Labana Rahely koa
Bilaha panompovavinany,
atao panompony Rahely.
Nisy antony ankitin̈y nampaneloko Jakoba.
Iro roeny Labana efa nifan̈araka
fa hiasa aminany fito taon̈o izy
baka hazahoany Rahely.
Fa izikoa fa tapitry fito taon̈o in̈y,
navy lera han̈anaovan̈a fetiny vadian̈a io,
fa natao ndraiky man̈angy nisaron̈o voaly io,
tsy Rahely fa i Lea!
Miniminia hely baka Jakoba 
meloko amy Labana,
sady Labana aminio koa tsy mba nan̈eky diso,
fa izy mbala niaro ten̈a fo.
Fa mety ho ino hevitry 
navy tan̈atiny jeriny Jakoba tao?
Asa mba nidinihiny
fa Jehovah io mbala man̈atanteraka
fampan̈antinan̈any
hahavy taranaka Jakoba ho maro
“hanjary ho maro ambony tany
karaha hamarozany laposiera in̈y”?
Tsy haintsika ay!
Koa fa ela ny ela,
Lea ndreky Jakoba nananjanaka 6 lahy,
an̈atiny zen̈y i Levy ndreky Joda.
Iro io an̈isany lohany fianakavian̈a
ten̈a najain̈y tamy fokony Israely tamy zen̈y.
Tsiary hainy Jakoba taloha
fa mbala ho hisy raha karaha zen̈y.
Fa
Jakoba io olo tia fihavan̈ana,
ke izy nan̈eky nanambady Lea fo.
Avio ndray tsy pare raha nitadiaviny
Labana taminany in̈y,
nikeny fo izin̈y ke nanompo
Labana ndraiky izy tan̈atiny 7 taon̈o,
misy hazahoany Rahely.
Ino leson?
Ten̈any mety handiso fan̈antinan̈a atsika
izikoa misy olo araiky tsy nitan̈a
volan̈a nataony.
Koa zen̈y raha miboaka,
mandiniha fo ke,
mizahava antony tokony hamelan̈a heloko,
ke man̈anaova raha 
baka hitohizany fihavan̈ana io fo.
Efa nanompo Labana tan̈atiny
14 taono i Jakoba tamy zen̈y,
zay vo nazony vadiny aroe io.
Avio koa izy mbala niasa tamy Labana
tan̈atiny 6 taon̈o koa,
zay vo nahazo tariminany.
Farany Jehovah nivolan̈a taminany,
ke navoriny fianakavian̈anany jiaby,
ndreky tariminany jiaby,
avio izy niala tamy Labana tao.
Fa izy tsy nirasa volan̈a tamy Labana.
Neloko mare Labana 
koa fa hainy fa loso ry Jakoba.
Nihanin̈y iro baka tiô, ke tatrany.
Raha mare tamy zen̈y!
Fotony mety ho hisy ady baka.
Miniminia hely baka raha nandalo tamy zen̈y.
Iry Jakoba efa navy tan̈y tan̈abony bongo tan̈y.
Kadiriny efa maraindrain̈y andra taminio,
ke nisy tsiko manintsy mare.
Avio mety nantsintsin̈y mare koa iro biby aby io,
avio koa tiô fofokondro,
iry ondrikondriky, boriky, samô,
ndreky biby maro koa.
Iro panomponany aby io fo
nikarakara iro io,
ke iro taminio efa nan̈amboamboatra
koa hanohy diandro io.
Fa tiô fo mety nihaikihaiky
iro panompo aby io nitady vonjy.
Zahavandro amy zay Labana navy,
avio tsy izy zaraiky fo koa,
nisy lelahy maro fatatra niaraka taminany.
Iro nijotso baka tao niondran̈a samô.
Fa tsy raha tsara antony naviany 
Labana nan̈araka iro tan̈y.
Sady iro lelahy aby io aminio,
efa von̈ono han̈araka
zay raha volan̈iny Labana.
Direkty efa nivorivory iro
panompony Jakoba aby io,
niambin̈y ino raha hiboaka.
Masondro jiaby amy Labana
ndreky Jakoba mikoran̈a.
Alin̈y talohanizio,
Jehovah baka efa nampitandrin̈y
Labana tamy nofy fa
mila hidinihiny tsara raha
handeha hivolan̈iny amy Jakoba.
Fa 
Labana mbala neloko ndreky
nitady ady tamy Jakoba fo.
Labana nivolan̈a raha aroe
tsy nitiavany Jakoba.
Voanalohany ho izy karaha ty:
“Anao ma nazonino?
Ahia zaho nandeha nifitifitahanao
ke iro zanako man̈angy aby io nindesinao
mira olo nazo sesintany baka amy lagera in̈y?
Nan̈ino ma anao nijokojoko
niala taminaka tao
fa tsy nirasa volan̈a taminaka,
zaho handeha hifitsifitsenao?”
Nazava volan̈a nambarany Jakoba taminany.
Karaha ty raha nivolan̈iny:
“Navozo anao baka zaho in̈y ke
tsy nahasaky nivolan̈a.
Nidaon̈o mare zaho tan̈atiny jerinaka tan̈y,
tsao iro zanakanao man̈angy aby io
mbala forsenao adoso aminaka koa.”
Raha faharoe tsy nitiavany Labana Jakoba,
nangalariny Jakoba zen̈y Zan̈aharinany.
Izio baka nangalariny Rahely 
Zan̈ahariny babany io,
fa Jakoba tsy nahay zen̈y foeky nata ny hely.
Namango nitadiaviny raha io fa
tsy hita foeky tany nan̈asitrihiny izy.
Nan̈azava tamy Labana amy zay
baka i Jakoba baka tiô.
Alô tandrin̈esantsika Genesisy toko faha-31,
manomboko aminy andininy faha-36.
Ke nanjary neloko mare Jakoba
avio Labana namiany tsin̈y mare.
Ho Jakoba karaha ty tamy Labana:
Mba ino ma raha ratsy nataoko anao,
ino loatra ma fahotan̈a vitako ke anao
mandeha man̈ian̈a zaho mare karaha ty?
Fanan̈ananaka jiaby ziô nisavainao,
fa ino raha baka tantran̈onao tan̈y hitanao tao?
Alô aboaha amasony rahalahiko 
ndreky rahalahinao iô raha jiaby zen̈y,
avio ambilà iro hitsara atsika pianaka.
Tan̈atiny 20 taon̈o nipitrahako taminao tao,
mbala tsiary ndraiky nisy
ondrikondrikinao ndreky benginao ke
tsy nahavan̈ono anaka zen̈y.
Baka iô zaho tsiary nihina lahinondrikondrikinao.
Ndray izy aby misy amy biby 
tariminao aby io nivoneny bibidỳ,
fa tsiary nambarako anao fa nisoloako hafa fo.
Fa izy ndraiky isaka nisy biby tariminao
nangalarinolo mantsan̈a na alin̈andra,
io tsy maintsy nampan̈ifainao zaho fo.
Zaho amy zen̈y niaritry tanin̈iandra 
izikoa fa mantsan̈a andra,
avio niaritry nintsinandra izikoa fa alin̈y andra.
Tsiary ndraiky nazontoro foeky.
Efa 20 taon̈o amiziô io nipitrahako taminao tao.
Zaho nanompo anao tan̈atiny 14 taon̈o
baka nazahoako iro roe vavy in̈y,
avio zaho niasa taminao tan̈atiny 6 taon̈o
nazahoako ondrikondriky ndreky bengy taminao.
Avio karamanaka efa impolo nivoanao.
Izikoa donko Zan̈ahariny babako,
Zan̈ahariny Abrahama
ndreky Zan̈ahary atahorany Isaka
in̈y tsy nan̈ampy zaho,
zaho donko efa nalefanao nody
tan̈ampolo foeky ay.
Efa hitany Zan̈ahary jalinaka
ndreky asa mare nataoko in̈y,
ke zen̈y nahavy izy nampitandrin̈y anao alin̈y in̈y.
Fa ho Labana tamy Jakoba:
Iro man̈angy aby io zanako man̈angy,
iro tsaiky aby io zanako,
iro ondrikondriky ndreky bengy aby io
ondrikondriky ndreky benginaka,
iro fanan̈ana jiaby hitanao io
fanan̈ananaka ndreky
fanan̈anany zanako man̈angy.
Ke ino ma raha ratsy mety ataoko amindro io,
ndreky amindro tsaiky aby naterakandro io?
Alô atsika han̈ano fifan̈ikian̈a,
zaho ndreky anao,
ke izio ataontsika vavolombelon̈o amintsika roe.
Ke Jakoba in̈y nangala vato
avio natsangany tiô natao tsangambato.
Ho Jakoba tamy rahalahiny aby io:
Mindao mangala vato!
Nandeha nangala vato iro
ke raha io nataondro nifanaingitaingin̈y.
Iro baka tiô nihina tan̈abony vatobe
navorivorindro io.
Nataony Labana Jegara-sahadota
an̈arany raha io,
fa Galeda ndraiky nikahiany Jakoba izio.
Ho Labana baka tiô:
Iro vato mivovon̈o aby ty
vavolombelon̈o aminaka ndreky aminao niany.
Zen̈y nahavy izy nikaiky izio Galeda
ndreky Tilikambo Fiambesan̈a.
Fotony ho izy:
Sintrany Jehovah man̈aramaso atsika
atsika koa fa tsy fankahita eky.
Ke anao koa mampijaly iro zanako aby io
na manambady olo hafa ankoatrany iro io,
aza adin̈a fa
ndray tsisy olo mahita raha zen̈y,
Zan̈ahary ho vavolombelon̈o
aminaka ndreky aminao.
Karaha ty koa ho izy tamy Jakoba:
Iro vato aby navorintsika ty
ndreky tsangambato natsanganantsika ty,
iro ty lamarikiny fifan̈ikian̈a nifan̈anaovantsika.
Iro vato aby navorintsika ty
ndreky tsangambato natsanganantsika ty,
iro io vavolombelon̈o fa
zaho tsy handeha hihoatra iro vato aby io
handeha han̈isian̈a ratsy anao,
baka iô koa anao tsy hihoatra
iro vato aby mivovon̈o aby ty
ndreky iro tsangambato aby ty
baka handeha han̈isian̈a ratsy zaho.
Irarian̈a Zan̈ahariny Abrahama
ndreky Zan̈ahariny Nahora,
sady Zan̈ahariny babandro io
hitsara atsika.
Ke Jakoba amy zay nifanta taminy
an̈arany Zan̈ahary atahorany babany io.
Tafarany zen̈y,
nan̈ano soron̈o tamy bongo io Jakoba,
avio nikahiany niaraka nihina
taminany rahalahiny aby io.
Ke iro koa fa baka nihina,
iro nandry tan̈abony bongo tiô.
Maraindrain̈y Labana efa nifoha
nihoroko iro zanany man̈angy aby io
ndreky iro zafiny aby io, avio nitsodrano iro.
Loso amy zay Labana baka tiô
nandeha nody tamy tran̈onany tan̈y.
Jakoba nanompo Labana tan̈atiny 20 taon̈o,
tsiary nivadiky taminany
ndray Labana taminio namitaka izy
ndreky nan̈araraotro izy.
Labana tsy tihahalala zen̈y foeky!
Raha jiaby nanan̈any Jakoba zen̈y ho izy,
ndray olo io ndray biby tarimin̈y,
ninany aby zen̈y jiaby.
Labana baka tiô nangataka iro
han̈ano fifan̈ikian̈a fa hihavan̈a,
ke fianakavian̈any baka an̈ila ndreky an̈ila
samby tsisy hifan̈ano ratsy.
Fa ndray izy man̈ano zen̈y,
raha nataony Labana io tsy mivolan̈a
fa izy olo tia fihavan̈ana.
Dikany nan̈anaovany izin̈y donko,
mety izy tihangala toky fa
izikoa izy maty,
Jakoba efa sira fa tsy
himpody aminany an̈y eky,
ke tsy hangala lovandro zanany lelahy aby io.
Fa na ino na ino antony,
Jakoba tsy olo sarotro atao.
Izy nan̈eky fo,
ke iro in̈y nilamin̈y nefa tsy niady aby.
Iro nanangana tsangambato
hampatsiaro fifan̈ikian̈a nataondro
fa iro efa tsy hiady eky.
Ndray Labana nampijaly Jakoba
tan̈atiny taon̈o taon̈o,
Jakoba mbala nan̈ano fifan̈ikian̈a
hihavan̈a taminany fo.
Izy tsy nitana heloko tampô foeky,
sady izy koa tsy namaly faty.
Nefa koa edy problemo araiky in̈y ay!
Fa ziô hisy problemo hafa koa tojo izy.
Jakoba nandefa pitondra hafatra
nandeha taminy Esao tan̈y.
Iro io nivolan̈a taminany fa
Jakoba efa avy baka ao
handeha hitady fihavan̈ana aminany an̈y.
Iro olo aby pitondra hafatra
aby io baka tiô nimpody
nan̈ambara Jakoba fa
ry Esao koa efa amy lalan̈a baka ao
handeha hifanojy aminany,
misy 400 lahy miaraka aminany.
Raha han̈ino eky?
Mbala neloko tamy Jakoba fo ma Esao in̈y?
Hay tsarabe fa
niasaloha mare Jakoba tamy zen̈y.
Izy baka tsy tihiady
taminy Esao rahalahinany io.
Alô baka tandrin̈esantsika
akory nataony taminio.
Azafady biafa amy Genesisy 32:13 Baibolinaro.
Ke nandry tiô izy taminy alin̈izin̈y.
Nisy raha aby ty nalainy tamy fanan̈ananany
handeha ataony kadôny Esao rahalahiny io:
bengivavy 200, bengilahy 20,
ondrikondrikivavy 200, ondrikondrikilahy 20,
samôvavy mampinono 30,
aombivavy 40, aombilahy 10,
borikivavy 20, avio borikilahy 10.
Namezany iro panomponany aby io
amy zay iro biby jiaby zen̈y,
baka iô nivolan̈iny tamindro karaha ty:
Anaro mandihan̈a antsendriky
mitsaka an̈y alohanaka.
Avio ataova misy elan̈elany iro biby aby io.
Avio karaha ty koa komandy nivolan̈iny
tamy panomponany araiky voanalohany in̈y:
Tsao sendra fanojy anao Esao
ke man̈ontany anao:
“Anao panomponjovy,
avio anahia anao io,
avio ninjovy biby aby alohanao aby io?”
Volan̈a aminany:
“Iro io niny Jakoba panomponao.
Izio nalefany baka tao handeha
atao kadônao Esao tompoko anao,
fa izy efa amy lalan̈a
man̈araka baka afara ao.”
Namiany komandy koa araiky faharoe,
ndreky araiky fahatelo,
ndreky iro jiaby nan̈araka iro biby aby io.
Ho izy:
Karaha zen̈y karaha zen̈y
raha volan̈inaro aminy Esao,
anaro koa fa fanojy izy.
Baka iô koa volan̈a aminany,
“Ao avy afaranay ao Jakoba panomponao.”
Nampivolan̈a jery karaha ty baka Jakoba:
Izikoa izy andifasako kadô tsialohaloha,
mety hampakalma izy raha zen̈y,
ke mety hiraisin̈y tsara zaho
lera zahay roe fanojy.
Jakoba ten̈a tihihavan̈a amy
rahalahinany ankitin̈y.
Izy nafoe kadô amian̈a Esao,
biby mandeha 100 manan̈amby,
baka iro hihavan̈a tsarabe.
Ke raha nataony Jakoba zen̈y
ma mivolan̈a fa
izy olo dindery sady tsotra loatra?
Aha, tsy zen̈y foeky!
Fa talohanizy hifanojy taminy Esao,
Jakoba nitolon̈o taminy anjely
nahampy kiakandra.
Nan̈ano zen̈y izy
hangalan̈a toky tsarabe fa
Jehovah mbala hitahy izy fo.
Alô tandrin̈esantsika
karakory nataondro roe lahy
iro koa fa fanojy.
Azafady avadiha amy
Genesisy 33:1 Baibolinaro:
Jakoba koa fa nitazan̈a baka alavitry tarỳ
hitany Esao navy,
avio nisy 400 lahy niaraka taminany.
Ke nirasarasainy taminiry Lea
baka iô iro panompovavinany aroe in̈y
iro zanany aby io.
Nataony talohanany amy zay 
panompovavinany ndreky zanakandro,
fan̈arakaraka amy zay Lea ndreky zanakandro,
avio Rahely ndreky Josefa amy zay tafarandro io.
Fa Jakoba baka tiô nandeha talohandro
avio nankohoko tamy tany impito aby,
mandrapaviany narikitry rahalahiny tiô.
Fa Esao baka tiô nilomoay
handeha hitsen̈a Jakoba,
izy baka tiô nifihin̈iny mare avio nirôfiny.
Tomoan̈y amy zay iro roe mirahalahy.
Esao amy zay koa fa nahita iro
man̈angy ndreky iro tsaiky aby io,
izy nan̈ontany,
ho izy:
Azovy ma iro dia araiky aminao io?
Ho Jakoba taminany:
Iro io tsaiky namezany Zan̈ahary
zaho panomponao.
Ke iro panompovaviny Jakoba aby io 
ndreky zanakandro baka tiô nan̈aton̈o,
baka iô nankohoko.
Avio nan̈aton̈o koa i Lea ndreky iry zanany
baka iô nankohoko koa.
Nan̈aton̈o amy zay koa Josefa ndreky Rahely,
baka iô nankohoko koa.
Esao baka tiô nivolan̈a:
Nan̈ino fo ma anao nandefa
iro olo aby io ndreky iro biby aby io
nandeha nifanojy taminaka?
Ho Jakoba:
Baka zaho tompoko anao
mba mahazo fankasitrahan̈a aminao.
Esao avio nivolan̈a:
Hitanao rahalahy,
tanà ninao fo iro fanan̈ananao aby io
fa zaho fa misy maro.
Fa ho Jakoba taminany:
Azafady Esao ô!
Azafady izikoa anao
mankasitraka zaho ankitin̈y,
mba aleva kony iro raha
namezako anao aby io ô!
Zaho baka mba efa tihahita soranao mare
ke nindesiko ninao raha aby io.
Nahita soranao ankitin̈y zaho niany,
karaha efa nahita sorany Zan̈ahary ay,
fotony zaho niraisinao tsarabe.
Mba aleva kony azafady iro
kadô nindesiko ninao aby io ô!
Iro io tsodrano baka aminaka.
Efa nankasitrahany Zan̈ahary baka zaho,
ke manan̈a raha jiaby ilaiko.
Niainsisty fo Jakoba
ke farany nalainy Esao fo kadônany io.
Nisy vokany tsara ankitn̈y raha
nataony Jakoba in̈y.
Tsy araka nieritreretan̈a izy raha niboaka,
fotony iro tsy niady fa nihavan̈a tsarabe.
Nifampitolon̈o iro roe,
baka iô samby nitomoan̈y.
Mbala naboakany Jakoba fo tiô fa
izy olo tia fihavan̈ana.
Nan̈ino atsika mivolan̈a zen̈y?
Izy nivavaka,
avio izy nan̈ano raha nifan̈araka 
tamy vavaka nataony in̈y.
‘Tompoko’ ho izy tamy rahalahiny.
Zen̈y man̈ambara fa izy nan̈aja rahalahiny io,
ndreky nan̈amia voninahitry izy.
Tsy basiny zen̈y fo fa
izy mbala nankohoko tamy
rahalahiny io impito aby!
Ino raha hianarantsika baka amy zen̈y?
Hianarantsika baka amy tantara io fa
mila mifen̈y mare fo atsika 
man̈ano raha hihavan̈ana
amindro rahalahintsika aby io
ndreky amindro ranabavintsika aby io.
Maro raha hianarantsika baka amy Jakoba,
momba fan̈anaovan̈a raha 
hihavan̈ana aminolo io.
Rahalahiny koa fa nimenasy hamono izy,
loso izy nifindra tanàna.
Avio Labana koa fa namitaka izy
tamy Rahely ndreky Lea in̈y,
izy nandefitry fo.
Labana ndray nan̈aratsy izy
ndreky nan̈odihody raha tsy nataony,
izy mbala nan̈eky nan̈ano 
fifan̈ikian̈a hihavan̈a tamy Labana fo.
Izy amy zay koa fa handeha
hifanojy taminy Esao,
namiany kadô Esao.
Aza adin̈a fa tamy raha jiaby nandalo io,
tsisy raha tokony nan̈anaovany
Jakoba azafady.
Fa kanefa tamy fiain̈ananany jiaby,
Jakoba olo tia fihavan̈ana.
Izy natoky Jehovah,
ke Jehovah nitahy izy.
Jehovah tsy mety han̈adin̈a Jakoba,
ndreky izy nifen̈y nan̈ano raha hihavan̈ana,
na taminjovy na taminjovy.
Ke atsika koa man̈ano ambaka zen̈y,
man̈ano raha hihavan̈ana aminolo fo
ndray tsy rariny raha nataondro tamintsika,
avio atsika nata injehinolo,
na amy problemo madinidiniky izio
na amy problemo maventy be,
tsy adin̈any Jehovah atsika
izikoa mitady fihavan̈ana.
Jehovah tsy maintsy hitahy atsika koa
izikoa atsika tia fihavan̈ana,
karaha nataony Jakoba in̈y.


-