JW subtitle extractor

Li kʼusi chkalbe skʼoplal tanae
jaʼ liʼe «mu me stikʼ xiʼel
ta avoʼontonik li Satanase».
¿Kʼusi smakojbe skʼoplal taje?
Jaʼ kʼalal oy buchʼu tsujvan
sventa oyuk kʼusi jpastike,
pe tsibtasvan un.
Li Satanase jaʼ yabtelinoj
spasel taje.
Jaʼ sventa spas krixchanoetik
li kʼusi tskʼane.
Yan li Jeovae, mu jechuk,
ta slekil yoʼonton
chalbutik mantal.
Li jpʼel kʼop xiʼel xie,
oy jayibuk velta chvinaj li ta
nota li ta Vivlia de estudioe
xchiʼuk oy yan textoetik ta
Vivlia
ti te chvinaj li jpʼel kʼop taj
eke.
Jech kʼu chaʼal ta
Deuteronomio 1:17.
Li Moisese xi laj yalbe
li jchapanvanejetike:
«Mu xa xiʼik yuʼun junuk vinik».
Skʼan mu xtʼujvanik.
Manchuk mi muʼyuk ep ta
velta ta Vivlia chvinaj
li jpʼel kʼop xiʼel xie,
pe oy onoʼox butik
ti jech kʼot ta pasele.
Jkʼeltik avil junantik.
Nopik avaʼiik ta sventa li
Goliate, jun to snatil,
tskʼan tstikʼbe xiʼel ta
yoʼonton li Davide.
¿Mi xvul ta ajolik
kʼusi laj yalbe?
Jkʼeltik ta baʼyel slivroal
Samuel 17:44
«Laʼ liʼe sventa xkakʼbe
stiʼ mutetik ta
vinajel li abekʼtale
xchiʼuk chkakʼbe
stiʼ chonbolometik
ta osiltik».
‹Mi la nopaj tale kerem,
chakʼot ta sveʼel xulem
xchiʼuk tsʼiʼ›.
Chakʼ xiʼel maʼ taje.
¿Mi xvul ta a jolik xtok li
Rabsake ta skʼakʼalil Esekias ti
tsotsik xa ye ta ebreo kʼop
la skʼopon li Judaetik
sventa stikʼbe xiʼel
ta yoʼontonike?
¿Mi xvul ta a jolik xtok li
Sanbalat xchiʼuk
Tobias ti la slabanik li
Neemias xchiʼuk Judaetik
kʼalal la svaʼanik li muroe?
Ti bu lokʼem tal li teksto
avi kʼakʼale,
chal ti Nabukodonosore
la suj oxvoʼ j-ebreoetik
sventa xichʼik ta mukʼ
jun lokʼol.
¿Kʼusi la spas li ajvalile?
Li ta Daniel 3:1 chal ti la
svaʼan jun mukʼta lokʼol
ti 27 metro snatil xchiʼuk
jutuk mi 3 metro sjamlej.
Li mukʼta lokʼol taje
chakʼ xa noʼox xiʼel,
pe li ta versikulo 2,
chal xtok ti la sta
ta ikʼel li satrapaetik,
bankilal jpasmantaletik,
itsʼinal ajvaliletik,
jtojobtasvanejetik.
¿Buchʼu xa noʼox la mu’yuk chi’?
Li ta versikulo 4 kʼalal ta 6,
oy buchʼu xi tsots laj yale:
«Mi laj avaʼiik bakʼ li kachue,
li amae, li arpae, […]
skʼan me xakejan abaik
xchiʼuk skʼan me xavichʼik
ta mukʼli lokʼol[e]».
«Li buchʼu mu skejan sba
sventa xichʼ ta mukʼe
ta ora noʼox chichʼ jipel ochel
ta orno ti xtiltun skʼakʼale».
¡Chakʼ xiʼel!, ¿mi mu jechuke?
Pe li oxvoʼ j-ebreoetike,
chʼabal och xiʼel ta yoʼontonik.
Kʼu chaʼal laj xa kaltike,
jaʼ jech tskʼan tstikʼ xiʼel
ta koʼontontik li Satanas eke.
Mi mu la achʼun
lavichʼ chʼichʼe,
jpʼel skʼoplal chacham›.
‹Mi mu xa chʼam li abtelal liʼe
(xuʼ van junuk abtelal ti
chakʼ avokol ta mantale)
chcham me ta viʼnal
li avutsʼ avalale›.
‹Mi mu xakʼan xa sikʼolaje,
yuʼun xiʼel vinikot›.
‹Kʼupil aba chilot, ¿kʼu yuʼun
ti mu xakʼan xa kʼopone?
¿Mi yuʼun gueyot?›
Jamal xvinaj ti tskʼan
tsibtasutik li Satanas eke.
Li jtakbol Pedroe laj yal ti
xkoʼolajta ta jkot leon
li Satanase,
ti x-avet noʼoxe.
Jaʼ sventa stikʼ xiʼel ta
koʼontontik kʼuchaʼal tspas
jkot leone.
Li ta livro perspicacia chal
ti kʼalal xloket noʼox snukʼ
li jkot leone,
chjatav lokʼel yuʼun
li chonbolometik
ta skoralike,
vaʼun, chʼabal xa kʼusi
xchabiatik-o.
Pe oy kʼusi ta jakʼboxuk,
¿kʼusi chakʼ jchantik
li oxvoʼ j-ebreoetik
ti lek tsots yoʼontonike?
¿Kʼuxi xuʼ skoltautik
sventa mu stikʼ xiʼel ta
koʼontontik li Satanase?
Kaltik avaʼiik jaytosuk.
Li baʼyuke,
jaʼ ti jechuk-o jpat koʼontontik
ta stojolal Jeova,
mu ventauk kʼusi spas
li Satanase.
Li ta Daniel 3:16
te chkakʼtik venta ti la spat
lek yoʼontonik ta
stojolal Jeovae,
manchuk mi xiʼel sba kʼusi
la snuptanik.
Xi chale: «Li Sadrak,
Mesak xchiʼuk Abednegoe
xi la stakʼbeik li
ajvalile: ‹Nabukodonosor,
mu persauk jtakʼkutik li
kʼusi chavale […].
Mi laj kichʼkutik jipel ochel ta
orno ti xtiltun skʼakʼale,
jaʼ xuʼ spojunkutik
lokʼel li Jdioskutik
ti chitunkutik ta stojolale
xchiʼuk jaʼ tspojunkutik lokʼel
ta akʼob.
Pe mi muʼyuk la spojunkutike,
jamal chkalkutik avaʼi ajvalil
ti muʼyuk onoʼox bu chitunkutik
ta stojolal li adiostake
mi jaʼuk chkichʼkutik ta mukʼ
li lokʼol ta oro la apase›».
La spat yoʼontonik ta
stojolal Jeova.
Xchibal kʼusi chakʼ jchantik.
Li chʼul espiritue
jaʼ tskoltautik sventa junuk
noʼox koʼontontik
xchiʼuk ti xtakʼbe kuʼuntik li
buchʼutik tskontrainutike.
¿Mi avakʼik venta kʼu yelan
takʼavik li oxvoʼ j-ebreoetike?
Jun tajek yoʼontonik.
Lek ti kʼu yelan la stakʼbeik
li ajvalile.
Jamal xvinaj ti jaʼ koltaatik
yuʼun li chʼul espiritue.
Li avi eke,
li Jeovae chakʼbutik
xchʼul espiritu sventa
skoltautik.
Li ta Lukas 12:11 xchiʼuk 12,
te laj yal Jesus
ti kʼalal chkichʼtik ikʼel batel
ta stojolal j-abteletike,
skʼan mu jvul koʼontontik
kʼusi chkaltik,
yuʼun jaʼ tskoltautik li
chʼul espiritue.
Yoxibal kʼusi chakʼ jchantik:
sventa skoltautik Jeova ta
jtosuk vokolile,
jaʼ tstunes li ya j-anjeltake.
Jnaʼojtik lek
ti la spas kʼelobil juʼelal
sventa spoj lokʼel li oxvoʼ
j-ebreoetike.
Kʼalal la skʼel ochel yut
orno li ajvalile,
muʼyuk laj yil ti te xa xbalet
yakal chkʼakʼik ta kʼokʼe,
li kʼusi noʼoxe, chanvoʼ
jun yoʼontonik te chanavik.
Li june, jnaʼojtik ti jaʼ jun
anjele.
Kʼalal la slokʼesik tal ta
ornoe,
li Daniel 3:27 chal ti «mi
jaʼuk laj yikʼinik chʼail[e]».
Muʼyuk kʼakʼ jpʼejuk
stsotsil sjolik.
¿Mi oy achiʼiinojik li
buchʼu tsikʼolaje?
Ta jlikele, yuʼun xvaʼet xa
kikʼtik ek.
Kaltik avaʼiik kermanotak,
li stsotsil joltike, toj anil
me chkʼakʼ.
Jun velta kʼalal ta jtsan ox
j-estufae,
mukʼ xi tojob, jutuk mu kʼakʼ
sjunul stsotsil jkʼob.
Pe li keremetik ti jaʼik
j-ebreoetike,
muʼyuk kʼakʼ jsetʼuk stsotsilik,
mi jaʼuk la yikʼinik chʼail.
Li avie jnaʼojtik ti tskoltautik
li anjeletike,
pe maʼuk xa ta skʼelobil
juʼelal,
pe tstunesatik onoʼox
yuʼun Jeova sventa skoltautik.
Jaʼ yuʼun xuʼ jta kabteltik.
O xuʼ jtatik junuk
doktor ti tstsak
ta venta li kʼusi ta jnoptik
ta sventa li chʼichʼe.
O moʼoj xtoke,
xuʼ stunes anjeletik
sventa stsatsubtasutik xchiʼuk
sventa tukʼuk xkakʼ
jbatik kʼalal ta jnuptantik
vokoliletike.
Jkʼeltik li xchantosale.
Manchuk mi xkichʼtik albel
ti chkichʼtik milele,
mi jchʼunojtik ti oy
chaʼkuxesele,
jaʼ chakʼ yipal koʼontontik.
Li oxvoʼ j-ebreoetike, xuʼ
van snaʼojik ta sjolik li kʼusi
chal Job 14:13.
Li Jobe la skʼanbe vokol Jeova
ti xnakʼat to ta mukinale
xchiʼuk ti xchaʼkuxesate.
Xvul ta sjolik xtok
ti chaʼkuxesvanik li Elias
xchiʼuk Eliseoe.
Li oxvoʼ j-ebreoetike, mu snaʼik
mi chpojatik yuʼun li Jeovae,
pe jpʼel ta yoʼontonik
ti chchaʼkuxesatik ta jelavele.
Jaʼ jech tspas ta jtojolaltik
ta jelavel ek.
Mi jchʼunojtik lek ti oy
li chaʼkuxesele,
mu xa me stikʼ xiʼel ta
koʼontontik li Satanase.
Akʼo mi xijcham,
pe mu masuk chkat koʼontontik
ta skoj ti jnaʼojtik
ti chijchaʼkuxi ta jelavele.
Svoʼobal kʼusi chakʼ jchantik.
Mi muʼyuk chijxiʼutik-o
li Satanase,
lek me chkom skʼoplal
kuʼuntik li Jeovae.
¿Mi xvul ta ajolik kʼusi kʼot
ta pasel kʼalal
kuxul lokʼik tal ta orno
li oxvoʼ j-ebreoetike?
Li ajvalile xi laj yale:
«Kʼupil kʼoptabiluk
li Dios yuʼun Sadrak,
Mesak xchiʼuk Abednego
[...], yuʼun chʼabal yan Dios
ti xuʼ yuʼun chkoltavan jech
kʼuchaʼal li Sdiosike».
Jnoptik avaʼiik liʼe:
mi te skʼoplalik
Nabukodonosor
xchiʼuk yan jbabiloniaetik
li ta buchʼutik muʼyuk
tukʼik chal ta Echos 24:15,
tstabeik sbalil,
yuʼun xojtikinik xa onoʼox
jutuk Jeova mi chaʼkuxiik tale,
vaʼun xuʼ xkʼot ta nopel yuʼunik
ti xlik tunikuk ta stojolale.
Jnoptik xtok ta sventa
li buchʼutik jipvanik
ochel ta ornoe,
mi chaʼkuxiik tale, chichʼik
chapbel kʼusi kʼot ta pasel.
Vaʼun xuʼ van xtijbat
yoʼontonik xtunik ta stojolal
Jeova li ta achʼ balumil eke.
Li avie jech chkʼot ta pasel ek.
Mi muʼyuk
kʼusi chij-xiʼo yuʼune,
lek skʼoplal chkom li Diose.
Yuʼun ep buchʼutik
yojtikinojik Jeova
kʼalal tukʼ chkakʼ jbatike.
Jaʼ yuʼun chaʼa,
laj xa jchantik li
voʼtos kʼusi xuʼ jpastik
sventa mu xij-xiʼe,
jaʼ ti jchanbetik
li oxvoʼ j-ebreoetike.
Baʼyel,
jpat koʼontontik
ta stojolal Jeova,
mu ventauk mi tskʼan
tsibtasutik li Satanase.
Xchibal,
chakʼbutik jun-oʼontonal
li chʼul espiritue.
Yoxibal,
li Jeova tstunes
yaj-anjeltak sventa
skoltautik ta kʼusiuk vokolik
ti xibal sba yiluke.
Xchanibal,
mi jchʼunojtik lek ti
oy chaʼkuxesele,
jaʼ tstsatsubtas koʼontontik
sventa mu xij-xiʼ,
manchuk mi xijchamutik.
Svoʼobal,
mi muʼyuk kʼusi chij-xiʼoe,
lek skʼoplal chbat
kuʼuntik li Jeova ta
stojolal li krixchanoetike.
Jaʼ yuʼun chaʼa kermanotak,
jchanbetik stalelal
li oxvoʼ j-ebreoetike,
mu me xkakʼtik
sibtasutik li Satanase.

Stephen Lett: Mu me stikʼ xiʼel ta avoʼontonik li Satanase (Deut. 1:17)