JW subtitle extractor

Li Jesuse
oy kʼusi labal sba laj
yakʼbe yil li jtakbol Juane,
ti echʼ jayibuk siglo
sventa xkʼot ta pasele,
jaʼo kʼalal mi la slajes
yajkontratak li Jeovae.
Li ta Apokalipsis 11:18
chal ti jaʼ yajkontratak Dios
li buchʼutik yakal
tsokesik li balumile.
Xi chal sjunul li versikuloe,
Apokalipsis 11:18:
«Pe ilinik li lumetike,
vaʼun lik skʼakʼal avoʼonton
xchiʼuk kʼot yorail
sventa xichʼik chapanel
li animaetike
xchiʼuk sventa xavakʼbe
stojol li amosotak
ti jaʼik j˗alkʼopetike,
li buchʼutik chʼule xchiʼuk
li buchʼutik ta xiʼtaik abie,
chavakʼbe stojolik li
buchʼutik tsots skʼoplalik
xchiʼuk li buchʼutik
muʼyuk tsots skʼoplalike,
jaʼ sventa xalajes
li buchʼutik yakal
tsokesik li balumile».
Li teksto liʼe
jamal chakʼ ta ilel ti
oy kʼusi tspas Jeova
sventa mu xa
sokesik li balumile.
¿Mi jaʼ skʼoplal ti
chikʼubtasik li balumile
o ti muʼyuk lek tstunesik
li kʼusitik oy ta balumile?
O ¿mi oy to van
yan kʼusi smakoj?
Sventa jnabetik li stakʼobile,
kalbetik batel skʼoplal
chanib sjakʼobil
ti tsotsik skʼoplale:
¿Kʼusi smelolal kʼalal
balumil xi li Vivliae?
¿Kʼuxi ti tsok batel
jech kʼuchaʼal chal
Apokalipsis 11:18?
¿Bakʼin oy kʼusi
tspas Jeova
sventa mu xa sokesike?
¿Kʼusi smelolal
ti chjalij ta sbatel
osil li balumile?
Baʼyel,
¿kʼusi skʼan xal
kʼalal balumil xie?
Sventa jtakʼtike,
chkalbetik skʼoplal
li batsʼi balumile
xchiʼuk li krixchanoetike.
¿Kʼu yuʼun ti krixchanoetike?
Yuʼun kʼalal «balumil» xie,
oy kʼusitik yan smakoj
jech kʼuchaʼal yan
kʼopetik chal ta Vivliae.
Jun skʼelobile
jaʼ kʼalal «vinajel» xie.
Kʼalal «vinajel» xie,
jaʼ chakʼ jnoptik
li kʼusi toyole
xchiʼuk xuʼ van ep
kʼusi smakojbe skʼoplal.
Yuʼun li ta Jenesis 27:28
kʼalal laj yakʼbe
bendision Jakob li Isaake,
xi laj yalbee:
«Akʼo yakʼbot melel Dios
li job osil ta vinajele».
«Li job osil ta vinajele».
Kʼalal «vinajel» xie,
jaʼ skʼoplal li batsʼi
vinajel xkiltike.
Pe jkoʼoltastik
xchiʼuk Daniel 4:26.
Li ta versikulo liʼe,
li Daniele jaʼ chalbe
skʼoplal xvayich li ajvalil
Nabukodonosore.
Xi laj yalbee:
«Chachaʼoch ta ajvalil
mi laj xa ox anaʼ
ti jaʼ ch˗ajvalilaj ta
vinajel li Diose».
Kʼalal
«vinajel» xi li ta teksto liʼe,
jaʼ chalbe skʼoplal
ti oy sderecho tspasvan
ta mantal li Jeovae.
Jaʼ noʼox jech ek kʼalal
«balumil» xi li Vivliae,
ep kʼusi smakoj.
Baʼyel, kalbetik skʼoplal
li batsʼi balumile.
Li yan planetaetike
sbi jecheʼ diosetik akʼbilik,
pe li ta Jenesis kapitulo
1 chal ti Jeovae
«balumil» laj yakʼbe
sbi ti bu nakalutike.
Li sbiik li yan planetaetik
ti muʼyuk leke
poʼot xa yichʼ jelel.
Pe li Jeovae
jamal yaloj kʼusi tspasbe
ta mas jelavel li balumile,
yuʼun la smeltsan sventa
te xkom˗o sbatel osil.
Li Eklesiastes 1:4 chal
ti akʼo mi xtal xbat
li jaykʼol kuxlejale,
«li balumile te
oy˗o sbatel osil»,
jaʼ xkaltik li batsʼi balumile.
Li Salmo 104:5 eke
chal ti «sbatel osil muʼyuk
bu chichʼ lokʼesel ta yavil»
li balumile.
Jaʼ yuʼun, muʼyuk chichʼ
lajesel li balumile.
Li kʼusi oy ta yoʼonton
Dios ta sventa li balumile
ta xkʼot ta pasel.
¿Kʼusi ti oy ta yoʼontone?
Jaʼ ti xkuxiik ta balumil
li buchʼutik
chchʼunik mantale,
ti xtukʼibike
xchiʼuk ti xmuyubajikuk
noʼox sbatel osile.
Jaʼ yuʼun, kalbetik
skʼoplal li krixchanoetike,
ti jaʼ sventaik ti laj yichʼik
meltsanbel li balumile.
Jaʼ onoʼox van chtal
ta joltik krixchanoetik
kʼalal chkalbetik
skʼoplal li balumile.
Yuʼun ep teksto ta Vivlia
kʼalal «balumil» xie,
jaʼ skʼoplal li krixchanoetike.
Jkʼeltik bal junantik.
Li Jenesis 11:1 xi chale:
«Spʼejel li balumile
jun noʼox li skʼopike».
Li ta Jenesis 24:3
te laj yal Abraan ti jaʼ
Dios ta balumil li Jeovae.
Xi chal Isaias 49:13:
«Vinajel, avanan
ta muyubajel;
balumil, kuxetuk
avoʼonton».
Jech xtok, li ta
Apokalipsis 19:2
xi chalbe skʼoplal li
jecheʼ relijione:
«Li jchonbail ants
ti tsots sjuʼel
ti jaʼ la sokes balumil
ta skoj ti chmulivaje».
Taje
jamal chakʼ kiltik
ti
krixchanoetik
chalbe skʼoplale,
yuʼun chkʼopojik
chichʼik ta mukʼ Dios,
xmuyubajik xchiʼuk xuʼ
sokik ta skoj mulivajel.
Avie kilojtik xa tal
ti kʼalal «balumil» xie,
bakʼintike jaʼ skʼoplal
li batsʼi balumile
xchiʼuk ti kʼusi tskʼan
spas ta balumil li Diose.
Kilojtik xa tal
xtok ti bakʼintike
jaʼ skʼoplal li krixchanoetike.
Li xchibal sjakʼobil une jaʼ:
¿kʼusi ti yakal
chichʼ sokesel
jech kʼuchaʼal chal
Apokalipsis 11:18?
¿Mi jaʼ li batsʼi balumile, li
krixchanoetike o xchaʼtosal?
Baʼyele,
jaʼ li batsʼi balumile.
Li Jeovae chopol chil
ti sokem xa tajeke.
Chopol chil ti chikʼubtasike,
ti sokem xa tajek
li sikil xkʼixnal osile,
ti chopol tstunesik
li kʼusitik oye
xchiʼuk ti sokem tajek
chkom kʼalal tspasik kʼope.
Oy ta yoʼonton
spasbentak li Jeovae.
Yuʼun kʼalal spasoj
xa ox li balumile,
laj yal ti lek laj yile.
Taje jech chal li
ta kapitulo 1
xchiʼuk 2 ta Jenesise.
¡Muyubaj tajek li Jeovae!
Stuk noʼox jech li balumile,
yuʼun jaʼ yakʼojbe
ta smoton krixchanoetik
jech kʼuchaʼal chal
li Salmo 115:16.
¿Kʼusi xuʼ xkaltik ta sventa
li krixchanoetike?
Yuʼun laj kiltik ti sokem
xa li balumile
xchiʼuk ti chopol
chil li Jeovae.
¿Mi jech sokem xa li
krixchanoetik eke?
Sokem xa.
Yuʼun jech chal li
Jenesis 6:11, 12,
te chal ti sokem
xa laj yil Dios
li balumil ta
skʼakʼalil Noee.
Jkʼeltik batel
kuxi ti koʼol chalbe
skʼoplal li balumil
xchiʼuk li krixchanoetike.
Jkʼeltik Jenesis kapitulo 6,
chlik jkʼeltik
ta versikulo 11.
Xi chale:
«Li melel Diose laj yil
ti sokem li balumile
xchiʼuk ti noj ta choplejale.
Ta melel li Diose laj yil
ti sokem li balumile,
yuʼun skotol krixchano
jaʼ tspasik li kʼusitik
toj chopole».
¿Mi la avakʼik venta?
Li Vivliae jmoj chalbe
skʼoplal xchaʼtosal,
yuʼun chal ti
sokem xa balumil
ta skoj ti tspasik
kʼusitik chopol
li krixchanoetike.
Jaʼ jech li avi eke,
yakal chichʼ sokesel
li batsʼi balumile
xchiʼuk yakal tsok stalelal
li krixchanoetik
ta skoj ti yakal
tspas mantal ta
balumil li Satanase.
Jaʼ yuʼun, yakal chichʼ
sokesel xchaʼtosal.
Kalbetik jayibuk skʼelobil.
Li jecheʼ relijion xchiʼuk
li jlom krixchanoetike
tstijbeik yoʼontonik yantik
sventa mu xchʼunbeik
smantal Jeova.
Chkakʼtik venta ti chchʼakvan
ti skʼanoj slumalike,
ti oy paskʼope,
ti tspʼaj sbaik ta skoj
ti yan˗o slumalike
xchiʼuk yan kʼusitik.
Chalik ti muʼyuk chopol
li syalesel olole
xchiʼuk muʼyuk chopol
chilik ti chikʼ sbaik
li buchʼutik xchiʼil noʼox
sbaik ta vinikal o ta antsile.
¿Kʼusi xuʼ xkaltik ta
sventa ti xi chal li
krixchanoetik xtoke:
«Mu ventauk mi vinik
o mi ants lavokʼ,
voʼot chatʼuj atuk li
kʼusi chakʼane»?
¿Mi jech ta melel?
¿Kʼusi tsnop li Jeovae?
Ta Deuteronomio 22,
versikulo 5
li Jeovae xi laj yalbe
li jteklum Israele:
«Li antse mu me stakʼ
slapbe skʼuʼ spokʼ li vinike,
jech li vinik eke mu me stakʼ
slapbe skʼuʼ spokʼ li antse.
Yuʼun toj chopol chil
Jeova Dios avuʼun
li buchʼu jech tspase».
Mi jaʼ jech tsnop li Jpasvanej
ta sventa li jkʼuʼtike,
jamal xvinaj kʼusi tsnop
ta stojolal li krixchanoetik
ti kʼu yelan tslap
skʼuʼ spokʼ li antsetik
xchiʼuk viniketike.
Achʼtik toe
li Organización Mundial
de la Salude
laj yalbe skʼoplal
ti maʼuk noʼox
vinik ants oye.
Laj yal
ti ep ta tos li vinike xchiʼuk
ep ta tos li antse.
Ta jpʼelchaʼpʼel noʼoxe
mu persauk vinikutik˗o
o antsutik˗o.
Yuʼun xuʼ spas sba ti
kʼu yelan tskʼan stuke.
¿Pe mi jech van taje?
Tsokesik yaʼiik li kʼusi
xchapanoj Jeovae
Xchiʼuk oy junantik
yaj˗abteltak ajvalil
ti jaʼ jech tsnopik eke.
Jech xtok, tslabanik
li buchʼutik muʼyuk jech
tsnopik kʼuchaʼal stukike.
Li ta Proverbios
19:3 xi chale:
«Ta skoj sbolil stuk li
jun vinike, tsokes li sbee,
vaʼun ch˗ilin ta stojolal
Jeova li yoʼontone».
Li Jeovae la spas
li nupunel
sventa sbatel osile,
jun vinik xchiʼuk
jun ants la spas.
Li ta Mateo 19:4, 5
te laj yal Jesus
ti jaʼ noʼox xuʼ xikʼ sbaik
jun vinik xchiʼuk jun antse.
Yuʼun la xchaʼal li kʼusi
chal Jenesis 2:24:
«¿Mi muʼyuk akʼelojik
ti la spas jun vinik
xchiʼuk jun ants
ta slikebal li
buchʼu pasvane
xchiʼuk ti xi laj yale:
‹Jech oxal, ta xikta komel
stot xchiʼuk smeʼ li vinike,
jaʼ xa chchiʼin˗o ta
naklej li yajnile,
vaʼun tspas ta jun
sbekʼtalik li chaʼvoʼike›?».
‹La spas jun vinik
xchiʼuk jun ants
xchiʼuk tspas ta jun
sbekʼtalik li chaʼvoʼike›.
Jamal xvinaj kʼusi
snop li Jeovae.
Li krixchanoetik avie
tsnopik ti xuʼ xnupun
li chaʼvoʼ ants o
chaʼvoʼ viniketike.
¿Melel?
¿Mi jech van taje?
Jnaʼojtik lek ti jaʼ oy
ta yoʼonton Satanas
tsokes li krixchanoetike.
Ti ibaluk sba
tajek chil Jeova
li kʼusi tspasike xchiʼuk
ti xchʼay ta sjol
li kʼusi oy ta yoʼonton
ta sventa li krixchanoetik
liʼ ta balumile.
Pe mu jechuk
chkʼot ta pasel,
yuʼun li kʼusi oy ta
yoʼonton Dios ta
sventa li krixchanoetik
xchiʼuk li balumile
chkʼot ta pasel.
Jech kʼuchaʼal ti chchʼay
skʼoplal li sbi jecheʼ diosetik
ti akʼbil li planetaetike,
li jecheʼ chanubtaseletike
xchiʼuk ti kʼu yelan
chmulivaj li krixchanoetike
chlaj skʼoplal sbatel osil.
Sventa tsakubtas
sbi li Diose
xchiʼuk sventa spoj li
buchʼutik kʼanbilik yuʼune,
ta slajes li buchʼutik yakal
tsokesik li balumile.
Li voʼotike
jnaʼojtik xa kʼusi tsnop
Jeova sventa taje.
Pe ¿kʼusi yakal ta jpastik
yoʼ stsakik ta venta yantik
li kʼusi tsnop Jeova
ta sventa li balumile,
li krixchanoetike
xchiʼuk li kʼusi
tspas ta jelavele?
Jamal kalojbetik skʼoplal
li kʼusitik ta sventa taje.
Jaʼ yuʼun, xuʼ jun
koʼontontik yuʼun.
Li ta jpajinatik ta Internete
oy junantik mantaletik ti
xuʼ te skʼel li krixchanoetike.
Jech kʼuchaʼal liʼe,
¿kʼusi chal ta Vivlia ta
sventa li syalesel olole,
ta sventa li buchʼutik
chnupunik
ti xchiʼil noʼox ta
antsil o vinikale?
xchiʼuk ¿Cómo explicar
lo que dice la Biblia sobre
la homosexualidad?
Jtunel tajek li
abtejebaletik taje
sventa jkoltatik li yantike.
Jaʼ yuʼun, kʼusi mas
tsots skʼoplal chil li Jeovae
¿mi jaʼ li li balumile
o li krixchanoetike?
Ep sbalil chil xchibal,
jaʼ yuʼun ta xjalij xchibal
sbatel osil.
Pe mas to tsots
skʼoplal chil
li krixchanoetike,
yuʼun laj yakʼ
xkuxlejal Xnichʼon
sventa spoj
li krixchanoetike,
maʼuk li balumile.
Ta Juan 3:16 chal
ti «skʼanoj tajek
krixchanoetik li Diose,
jaʼ yuʼun laj yakʼ
li jun noʼox Xnichʼon
sventa mu xichʼ lajesel,
lajesel...
li buchʼu chakʼ xchʼunel
yoʼonton ta stojolale».
Li jbankilal j˗abtel
ti jaʼ li Jesuse
chvinaj kʼusi tsnop ta
sventa li krixchanoetik
ti te chal ta
Proverbios 8:31:
«Limuyubaj yuʼun li balumil
ti xuʼ xichʼ naklebinele
xchiʼuk jaʼ la jkʼan tajek li
xnichʼnab krixchanoetike».
¿Kʼusi skʼan jechuk˗o jpastik?
Skʼan jtsaktik ta venta
xchiʼuk ta slekiluk koʼonton
jkoltatik yantik sventa
snaʼik kʼusi tsnop li Jeovae.
Muuk xijkʼexav ta yalel
li lekil aʼyejetike,
yuʼun maʼuk noʼox
chkalbetik skʼoplal li paraisoe.
Yuʼun chichʼ albel skʼoplal
ti skotol krixchanoetike
chchʼunbeik
smantal li Jeovae.
Taje
chpatbat yoʼonton
li totil meʼiletik ti yakal
tstsʼites yalab xnichʼnabik
xchiʼuk ti chakʼik
persa xchabiele,
yuʼun li Satanase
oy ta yoʼonton tsokesbe
snopben xchiʼuk yoʼontonik
sventa spasik
li kʼusi chopole
xchiʼuk ti xchʼunik li
jecheʼ chanubtaseletike.
¡Bal to ti poʼot
xtal li lajebale!
Akʼo avilik venta kʼusi chal
Apokalipsis 14:6, xchiʼuk 7.
Kʼalal ta jkʼeltik batele,
kakʼtik venta
kʼusi lekil aʼyej
chal jun anjel.
Xi chal Apokalipsis
14:6, xchiʼuk 7:
«Laj kil yan anjel ti te
xvilet ta oʼlol vinajel
ti yakal chchol
lekil aʼyejetik
sventa sbatel osile,
jaʼ chcholbe li buchʼutik te
nakalik ta sba balumile,
ta skotol lumetik,
nitilulaletik, jeltos kʼopetik
xchiʼuk ta skotol
jteklumetik, xi tsots chale:
‹Xiʼtaik xchiʼuk albeik
smukʼulal li Diose,
yuʼun kʼot xa yorail ti
chchapanvane,
jaʼ yuʼun ichʼik ta mukʼ
li buchʼu la spas vinajel,
balumil, nab xchiʼuk
li nioʼetike›».
Jaʼ yuʼun chaʼa,
¿kʼusi smakoj
li lekil aʼyejetik ti laj yal li
anjel li ta teksto la jkʼeltike?
Xi chale:
«Xiʼtaik xchiʼuk albeik
smukʼulal li Diose»
¿Kʼu yuʼun?
«Yuʼun kʼot xa yorail ti
chchapanvane».
Taje lekil aʼyej chaʼiik
li buchʼutik tspasik
li kʼusi leke.
Jaʼ yuʼun, ta sjunul
koʼonton chkaltik batel ek
kʼalal ta jcholtik mantale.
Li ta Vivliae
jamal chalbutik
li ta Echos 17:31
ti ‹xchʼakojbe xa jun
skʼakʼalil Jeova
sventa lek tukʼ chchapan
skotol li krixchanoetik›
ta stojolal li Xnichʼone.
¡Jaʼ to me jun xa
yoʼonton chaʼi sbaik
li buchʼutik tskʼan chtunik
ta stojolal Jeovae!
Li ta mantal liʼe
laj kiltik xa ti kʼalal
«balumil» xi li Vivliae,
xuʼ jaʼ skʼoplal
li batsʼi balumile
o jaʼ skʼoplal
li krixchanoetike.
Laj kiltik xtok
ti kʼalal yakal chichʼ
sokesel balumil xie,
maʼuk noʼox skʼoplal ti
yakal chichʼ ikʼubtasel
o ti muʼyuk lek chichʼ
tunesel li kʼusitik oye,
yuʼun oy to kʼusitik
yan smakoj.
Li Satanas xchiʼuk
li sbalumile
yakal tsokesbeik stalelal
li krixchanoetike,
li spasben Jeovae.
Akʼo mi chakʼik
persa kʼusi tspasik,
muʼyuk onoʼox
chuʼ yuʼunik.
Yuʼun li Jeovae laj
yakʼ tal Xnichʼon
sventa tskolta li
buchʼutik tukʼ chakʼ sbaike
xchiʼuk chkʼot ta pasel yuʼun
li kʼusi tskʼan
yoʼonton Diose.
Yoxibal sjakʼobil:
¿Bakʼin tslajes Jeova li
buchʼutik tsokes balumile?
Li stakʼobile jaʼ ti jutuk
xa tajek skʼane.
Li Jeovae muʼyuk
chakʼ permiso ti jechuk˗o
sokesik li balumile
mi jaʼuk li krixchanoetike.
Jpʼeluk me ta koʼontontik,
li Jeovae ta
onoʼox me slajes.
Oy smalael yuʼun,
yuʼun «mu skʼan ti oy
buchʼu xbat ta lajelal junuke».
Kʼotem xa ta nopel yuʼun,
yuʼun stʼujojbe xa
skʼakʼalil li Jeovae.
Li ta 2 Pedro 3:13
chal ti «oy achʼ vinajel
xchiʼuk jun achʼ balumil
ti jmalaojtik ti jech
onoʼox yaloje».
Li achʼ balumile jaʼ skʼoplal
li buchʼutik chichʼik ta mukʼ
xchiʼuk chtunik ta sbatel
osil ta stojolal
li melel Diose.
Li buchʼutik
tsokesik balumile
muʼyuk te skʼoplalik.
Li ta Mateo 19:28
li Jesuse laj yalbe
skʼoplal xchiʼuk laj yal
ti jaʼo «kʼalal ch˗achʼub
skotol li kʼusitike».
Li nota ta Biblia de
Estudio ta españole
chal ti oy to jpʼel kʼop
sventa chalbe skʼoplale,
jaʼ «spasel ta achʼ».
Laje chal ti «jaʼo tspasik
ta achʼ kʼusitik oy
li Kristo xchiʼuk li
buchʼutik ch˗ajvalilajike,
ti chchaʼta yav jech
kʼuchaʼal ta skʼakʼalil
li Adan xchiʼuk Eva
kʼalal muʼyuk toʼox
spasoj smulike».
¡Kʼupil sba!
Ti tspasik ta achʼe
xuʼ xkaltik ti tsmeltsan
li kʼusi sok tal
kʼalal la stoy sba ta
stojolal Diose.
Jech chkʼot ta pasel li
kʼusi tskʼan yoʼonton Dios
liʼ ta balumile.
Vaʼun chaʼa,
¿kʼusi li «balumil»
ti yakal tsokesike?
Jech kʼuchaʼal
laj kiltik xae,
jaʼ skʼoplal li batsʼi balumile
xchiʼuk li krixchanoetik
ti oyik ta sjuʼel Satanase.
Xchanibal sjakʼobil:
¿Kʼusi li «balumil» ti te
chkom o sbatel osile?
Jaʼ li batsʼi balumile,
jech kʼuchaʼal laj kiltik xae,
li Vivliae jamal chal ti
te chkom o sbatel osile
xchiʼuk jaʼ skʼoplal
li krixchanoetik
kʼalal «achʼ balumil» xie,
ti jaʼ laj yakʼ˗o
xkuxlejal li Jesuse
xchiʼuk ti chchʼamik
li mantale.
Poʼot xa x˗achʼub skotol,
li Jesuse chakʼbe
yipal abtel skotol kʼakʼal
li ta jmil jabile.
Jujun kʼakʼal chakʼ-o yip.
Jpʼel ta yoʼonton chakʼ
ta ichʼel ta mukʼ Jeova
xchiʼuk tspas li kʼusi oy ta
yoʼonton Dios li ta balumile.
Kʼun ta aʼibel smelolal
li kʼusi oy ta yoʼonton
Dios xchiʼuk li kʼusi
tspas ta jelavele.
Poʼot xa x˗achʼub skotol,
vaʼun achʼ balumil xa ox
ti bu chijnakie,
ti bu naka
xa tukʼil krixchano oye,
ti skʼanojik Jeovae
xchiʼuk ti jmoj
chijtun ta stojolale.
Taje jaʼ li balumil
ti te chkom˗o sbatel osile.

Kenneth Cook: Te oy-o sbatel osil li balumile