JW subtitle extractor

Nos téma ten bazi na 2 Koríntius 1:3, 4:
“Pa kel Deus i Pai di nos Sinhor Jizus Kristu lovadu.
El é Pai xeiu di mizerikórdia i Deus di tudu konsolu,
ki ta konsola-nu na tudu nos prubléma,
asi ku kel konsolu ki nu ta resebe di Deus,
nu pode konsola otus,
ka ta inporta ki prubléma ki es sta pasa pa el.”
Désdi ki nu nase, nos tudu nu meste di konsolu.
Bu ka ta lenbra primeru bês ki bu txora pamodi bu staba ku fómi,
kasábi, ô bu mesteba di algen pa karegaba bo,
má talvês bu ta lenbra di últimu bês
ki bu mesteba di konsolu.
Di serteza, txeu di nos sta ta meste di konsolu gósi.
Kel-li ta da pa intende, pamodi Salmo 90:10
ta splika nos vida inperfeitu di kel manera li:
‘Nos vida ta dura 70 anu ô 80 anu,
pa kes ki é más fórti.
Má kes anu li sta xeiu di difikuldadi i tristéza.
Es ta pasa faxi i nu ta dizaparse faxi.’
Ten txeu kuza ki pode traze-nu difikuldadi
i tristéza, diziluzon i dór.
Alguns di kes kuza li é normal
pamodi nos tudu é inperfeitu,
nu ta duense, fika bédju
i fika tristi óras ki un algen ki nu ta ama móre.
Otus kuza ki pode traze-nu difikuldadi
é kuzas ki ka ta kontise ku tudu algen,
sima asidenti, divórsiu, falta di dinheru, dizastri na naturéza,
abuzu seksual ô otu tipu di krimi, géra ô bai prézu.
Tanbê nu pode sufri pamodi kel ki nu ta kridita na el,
pur isu nu ta meste di konsolu.
Talvês nu ta mora ku kes ki ka ta adora Jeová,
nu ta pirsigidu na trabadju ô nu ta fazedu trosa na skóla,
ô nu pode podu prézu.
Ô talvês un família ô amigu ki nu krê txeu bandona Jeová.
Kes algen ki rapende i volta pa kongregason,
tanbê meste di konsolu.
Ka ta inporta si nu sta ta sufri pamodi
kuzas ki ta kontise ku tudu algen
ô pamodi nu ta adora Jeová,
nos tudu nu meste di konsolu.
Kel-li é un kuza ki ta kontise na mundu interu.
1 Pedru 5:9 ta fla ma
nos “irmons na mundu interu
sta ta pasa pa kes mésmu sufrimentu.”
Má, 1 Pedru 5:6, 7 ta fla-nu kenha ki ta da-nu konsolu.
Kes versiklu ta fla:
“Pur isu, nhos umilha dibaxu di mô fórti di Deus,
pa el pode engrandese nhos na ténpu sértu,
timenti nhos ta bota tudu nhos preokupason riba di el,
pamodi el ta kuida di nhos.”
Jeová sénpri foi kel midjór fonti di verdaderu konsolu.
Muizés tinha serteza ma Jeová ta djudaba i konsolaba el,
ka ta inporta ki situason ki el pasaba pa el.
Ku kunfiansa,
el skrebe kel ki sta na Deuteronómiu 33:27 ki ta fla:
“Deus é un proteson désdi ténpu antigu,
ses brasu ki ta dura pa tudu ténpu, sta bu baxu.”
Óras ki nu sta dizanimadu i nu meste di konsolu,
Jeová ta poi ses brasu nos baxu,
el ta labanta-nu ku kuidadu,
i el ta djuda-nu fika di pé otu bês.
Livru di Salmos txeu bês ta pâpia di amor ki Jeová ten pa nos,
i modi ki el ta konsola-nu.
Pur izénplu, skritor di Salmo 94:19
mostra se gratidon pa Jeová kantu ki el fla:
‘Kantu preokupasons toma kónta di mi,
Bu konsola-m i bu pô-m ta fika kalmu.’
Romanus 15:4 tanbê fla:
“Tudu kes kuza ki skrebedu antis, skrebedu pa inxina-nu.
I nu ta ten speransa,
pamodi Skrituras ta djuda-nu aguenta firmi
i es ta da-nu konsolu.”
Ka ta inporta kuzê ki sta ta dizanima-nu,
nu ta atxa testus di Bíblia ki ta da-nu konsolu.
Livru Testus di Bíblia ki ta djuda-nu faze vontadi di Jeová
ten un párti ki é “Konsolu”
ki ten txeu izénplu di kuzas ki pode dizanima-nu.
El ka sô ta mostra-nu testus di Bíblia
ki ta da-nu serteza ma Jeová ta ama-nu,
má tanbê el ta da-nu izénplu di pesoas
ki Bíblia ta pâpia di el ki pasa pa mésmu prubléma
i modi ki Jeová djuda-s.
Un di kes midjór manera di resebe konsolu di Jeová,
é pidi-l pa el konsola-nu.
Na Salmo 145 rei Davidi lova Jeová
pa manera ki el responde ses orason.
Nu lé vérsus 18 i 19.
Davidi skrebe:
‘Jeová sta pértu di tudu kes ki ta invoka-l,
Di tudu kes ki ta invoka-l di verdadi.
El ta faze vontadi di tudu kes algen ki ten grandi ruspetu pa el,
El ta obi-s óras ki es pidi ajuda i el ta libra-s.’
Sima un pai ku un mai ki ta ama ses fidju
ta djuda-s óras ki es sta ta txora,
tanbê Jeová ta obi-nu i el ta djuda-nu
óras ki nu ta pidi-l ajuda.
1 Samuel kapitlus 1 i 2 ta fla ma Ana
staba tristi i ‘dizanimadu dimás’
pamodi el ka tinha fidju, ki el ka staba nen ta konsigi kume.
Kantu ki el bai pa tabernáklu,
el ‘kumesa ta faze orason... i ta txora sen para’.
Jeová obi i responde orason umildi di es mudjer.
Dipôs, Ana ‘bai se kaminhu,
el kume i se róstu ka staba ta parse tristi más.’
Nos tanbê, Jeová pode konsola-nu,
óras ki nu ta pâpia ku el sobri nos preokupason na orason.
Óras ki nu ta odja tudu kuza ki Bíblia ta fla sobri konsolu,
nu ka ta fika dimiradu ku kuzê ki
2 Koríntius 1:3, 4 ta fla.
Favor, nhos abri es testu ki é téma pa nos diskursu.
Timenti nu ta lé-l otu bês,
pensa na modi ki kes palavra li pode djuda-nu konsola otus,
sikrê óras ki nos tanbê
nu sta ta pasa pa prublémas difísil.
2 Koríntius 1:3, 4 ta fla:
“Pa kel Deus i Pai di nos Sinhor Jizus Kristu lovadu.
El é Pai xeiu di mizerikórdia i Deus di tudu konsolu,
ki ta konsola-nu na tudu nos prubléma,
asi ku kel konsolu ki nu ta resebe di Deus,
nu pode konsola otus,
ka ta inporta ki prubléma ki es sta pasa pa el.”
Kes palavra “xeiu di mizerikórdia”
ta ben di un palavra ki ta mostra ma nu ta fika tristi
óras ki otus algen ta sufri.
El ta mostra kuzê ki Jeová ta xinti óras ki se sérvus fiel ta sufri.
Paulu tanbê fla ma Jeová é “Deus di Tudu Konsolu.”
Nton, tudu konsolu di verdadi ta ben di Jeová.
Versiklu 4 ta pâpia di un manera spesial ki Jeová ta konsola-nu,
ki é óras ki el ta uza nos irmons ku irmans.
Nu lé-l otu bês.
El ta fla ma Jeová ta konsola-nu
na tudu nos prubléma,
asi ku kel konsolu ki nu ta resebe di Deus,
nu pode konsola otus,
ka ta inporta ki prubléma ki es sta pasa pa el.”
Bu repara modi ki óras ki nu resebe konsolu,
nu ta konsigi konsola otus?
Jeová ta konsola-nu,
i dja ki el faze-nu sima se imajen,
se spritu santu ta pô-nu ta konsola otus algen sima el konsola-nu.
Pur isu, sérvus di Jeová ka sta divididu na dôs grupu:
kes ki ta da konsolu i kes ki ta resebe konsolu.
Nau, nos tudu nu ten responsabilidadi di da konsolu,
sikrê anos nu sta ta meste di konsolu.
Modi ki nu pode faze kel-li?
Odja izénplu di Paulu.
Duránti kel ténpu ki el podu na Roma pa primeru bês,
el mostra se gratidon pa txeu irmons
ki bira “un fonti di grandi konsolu” pa el.
Na Kolosensis kapitlu 4,
el fla nómi di alguns di es: Aristarku, Tikiku i Markus.
Nu ta ben pâpia más sobri kes ómi li
na otu párti di es Broadcasting.
Paulu éra txeu gratu pa kes irmon ki bai vizita-l na kadia,
ki konsola-l i djuda-l ku kes kuza ki el staba ta meste.
Má Paulu ka kria sô resebeba.
Duránti kel ténpu ki el staba na kadia,
el anima tudu kes ki bai djobe-l
i el skrebe kartas ki ta da koraji pa kongregasons.
Un irman na Áfrika di Sul ki txoma Klaudine
imita izénplu di Paulu dipôs ki el faze un operason gravi.
Pamodi COVID-19, el ka pode resebeba vizitas.
Má, Klaudine staba disididu na ka fika ta pensa sô na se situason
i el pidi Jeová pa da-l forsa pa el konsola otus.
Klaudine txoma un mudjer ki el ta fazeba studu antis.
Kel mudjer kumesa ta studa Bíblia otu bês
i ta sisti runion pa internet.
Dipôs, Klaudine kumesa ta studa Bíblia ku irman di kel mudjer,
ki da-l nómi di más kuatu mudjer ki krê studaba Bíblia.
Pamodi Klaudine staba disididu na konsola otus algen,
sikrê el staba ta lida ku se própi prublémas,
el konsigi kumesa 16 studu di Bíblia.
Alvês, kes algen ki sta dizanimadu
i ki sta ta meste di konsolu pode ka krê seta ajuda.
Pur izénplu, primeru bês ki Muizés fla israelitas
ma Deus ta ba traba es di Ijitu,
es ‘ka obi ku Muizés pamodi es staba dizanimadu’.
Dipôs, es obi ku Muizés.
Nuemi, ki se nómi siginifika “Nha dosura”,
éra stranjeru na otu téra pamodi fómi na Israel.
El éra viúva, i el staba tristi pamodi se dôs fidju móre.
Kantu ki el konsigi vólta pa Israel,
kes mudjer di Belen kunprimenta-l ta fla:
“Kel-li é Nuemi?”
El ta pensaba ma éra Jeová ki tinha el na kel situason,
pur isu, el responde kes mudjer:
“Ka nhos txoma-m Nuemi. Nhos txoma-m Mara,
pamodi Tudu-Poderozu poi nha vida ta bira margós dimás.”
Má, Nuemi fika djuntu ku povu di Deus,
i el seta ajuda ki el dadu ku amor.
El ka staba tristi más, má el staba kontenti.
Si bu sta ta sufri,
bu pode krê fika bo sô,
má sforsa pa bu ka faze kel-la.
Kel-li é difísil,
má spiriénsia ta mostra ma óras ki
nu ta sforsa pa sta ku otus algen,
nu ta konsigi resebe konsolu ki Jeová ta da
através di palavras i manera ki nos irmons ku irmans
ta aji ki ta mostra konpaxon.
Kel konsolu ki Jeová ta da-nu
óras ki nu sta ta pasa pa prublémas,
pode trena-nu pa nu sabe modi ki nu ta djuda otus algen.
I kel-li é primeru pasu pa nu da konsolu.
Nu meste djobe kes algen ki sta ta meste di konsolu.
Txeu bês, nu ta konsigi odja kel-li klaru,
un irmon pode panha un asidenti, el pode perde se trabadju
ô un amigu ô un algen di se família móre.
Má alvês, kel-li é ka mutu klaru.
Alvês es pode aji diferenti
ô es pode sta ta parse preokupadu ô tristi,
i kel-li ta mostra ma es tene algun prubléma.
Nu ka krê pô-s sen jetu,
má ku bondadi nu pode txiga na es
i tenta sabe kuzê ki sta pasa.
Es pode meste di ténpu pa es xinti avontádi
pa fla kuzê ki es sta ta xinti.
Pur isu, nu meste ten paxénxa.
Segundu pasu pa nu da konsolu é
ora pa nu sabe kuzê ki nu pode faze.
Talvês nu pode ka konsigi kaba ku kes prubléma ki tene-s tristi.
Pur izénplu, un irmon ki dja ten txeu anu misionáriu,
ki se mudjer móre, fla:
“N ka krê skese nha mudjer,
N krê prende modi ki N ta lida ku es dór.”
Un kuza txeu inportanti ki nu meste faze
é aplika kel ki Provérbios 3:27 ta fla:
‘Ka bu dexa di faze kel ki é dretu pa kenha ki bu debe faze-l,
Si bu ta konsigi djuda.’
Nu pode ka sabe kuzê ki nu debe fla ô faze.
Si bu ta xinti si, pensa na kuzê ki palavra
gregu “konsolu” na Bíblia ta siginifika.
El ta siginifika “txoma pa bu ladu”.
Kel-li krê fla da kel tirseru pasu,
ki é dexa kel algen sabe ma bu krê djuda-l.
Ka bu atxa ma bu ten ki ba fla txeu kuza.
Nos irmons ku irmans meste sabe
ma nu ta inporta ku es
i sô di sta djuntu ku es nu pode konsola-s.
Es pode sta ta meste sô di un
algen pa es pâpia ku el.
Si é kel-li, obi-s ku atenson.
Si bu lé un testu di Bíblia pa es,
djuda-s odja modi ki Jeová sta ta
xinti ku kuzas ki es sta ta pasa pa el.
Más inportanti di ki kel ki bu ta fla ô faze,
é óras ki bu ta mostra ma bu ta intende ses sufrimentu
i bu ta mostra konpaxon di korason.
Pur izénplu, pai ku mai di un irman
ki ta sirbi li na Sédi Mundial
móre duránti pandemia.
Dipôs di pasa un dia interu na ospital
ku se mai ki staba kuazi ta móre,
el volta pa kaza i el atxa un sestu di fruta
ki ses kolega di trabadju na
Betel poi na se pórta.
El fla:
“Kel ki konsola-m ka éra kes fruta
ki dja N kumeba txeu bês,
nen kel dikorason bunitu na kel sestu,
má é pamodi N sabia ma kes
algen ki daba mi kel prezenti,
ta amaba mi i krê djudaba mi
duránti kel ténpu más difísil di nha vida.
Kantu kontise un tremor di téra fórti,
i un tsunami na Japon, na marsu di 2011,
irmons na Japon i na otus país kumesa ta djuda lógu.
Dôs anu i meiu dipôs,
mi ku nha mudjer, nu bai vizita
alguns kongregason na kes lugar.
Irmons di Nepal manda mensajen
pa inkoraja un kongregason.
Irmons na un otu kongregason manda un mensajen sima kel-li
ku txeu kuza skrebedu na língua di Filipinas.
Irmons di Japon fla:
“Nu ka ta konsigi lé kes mensajen, má simé es ta konsola-nu.”
Di serteza kes mensajen kurtu li da
nos irmons na Japon txeu konsolu!
Timenti nu staba na Japon,
un béntu fórti staba ta kontise na kes ilha di Filipinas.
Kes irmon di Japon fla:
“Gósi é nos bês di konsola
nos irmons di Filipinas.”
Gósi ki nu sta pértu di fin,
di es ténpu di fin konplikadu,
nu ta meste más konsolu inda di ki antis.
Nos é txeu gratu pamodi Jeová
é “Pai xeiu di mizerikórdia” i
“Deus di tudu konsolu”!
El da-nu orason ki é un prezenti,
Bíblia ki é se palavra i ki sta xeiu di konsolu
i nos irmons ku irmans na
mundu interu, ki ten konpaxon.
Timenti tudu kes kuza li ta konsola-nu,
nu pode tenta djobe otus
ki sta ta meste di konsolu.
Pensa na modi ki bu pode djuda-s,
i faze alguns kuza pa konsola otus,
timenti nu ta lida ku kes ténpu difísil li.

James Mantz: Konsola otus ki sta na situasons konplikadu