JW subtitle extractor

Na Izaías 60:17, Jeová ta fla:
“Envês di kóbri N ta ben traze oru,
envês di féru N ta ben traze prata.”
Ku kes palavra li, Jeová mostra
ma se organizason li na téra
ta ben midjoraba poku-poku.
Sima anu ba ta pasa,
el ba ta midjora manera ki se trabadju ta fazedu
i kel-li ta inklui kel trabadju ki ta fazedu li na Betel.
Kel trabadju ki nu ta faze li na Betel ten dôs obijetivu inportanti:
El ta djuda más algen ki nu ta pode resebe
kes informason ku bazi na Bíblia
i el ta djuda trabadju di pregason na mundu interu.
Tudu bês ki Grupu Enkaregadu ta faze un mudansa
na trabadju ki ta fazedu li na Betel,
é pa djuda na kes obijetivu li.
Sima anus ba ta pasa, dja nu faze txeu mudansa, sima
manera ki nu ta inprimi nos publikason,
ki nu ta uza tekinolojia,
ki nu ta faze trabadju di konstrusons
i ki enkaregadus ta faze ses trabadju na tiritóriu di txeu filial.
Família di Betel na mundu interu sta ta apoia kes mudansa li
pamodi es sta ta sigi kel orientason ki sta na Kolosensis 3:23:
“Kalker kuza ki nhos faze,
nhos trabadja na el di tudu alma, sima ki é pa Jeová envês di ómis.”
Txeu di nos dja ten un monti anu ta sirbi na Betel
di manera fiel i dja nu xinti kes mudansa li na nos vida.
Sima Jeová, nu ta da txeu valor pa kes ki ta oferese
di livri vontadi pa sirbi li na Betel.
Es ten kel mésmu atitudi di Izaías, ki fla:
“Ale-m li! Manda-m ami!”
Na mundu interu, nunbru di irmons jóvens ki sta
prenxe pitison pa Betel sta ta omenta.
Má omésmu ténpu, sénpri nu ta meste di irmons trenadu
ki ten un amizadi fórti ku Jeová pa prega i djuda kongregason.
Pa djuda ku kel ki Betel meste i trabadju di pregason na mundu interu,
nu analiza i nu disidi faze un mudansa
na manera ki nu debe odja sirvisu di Betel.
Di gósi pa dianti, sirvisu di Betel ka debe odjadu
sima un trabadju pa vida interu.
Betel ta kontinua ta ser un lugar
undi ki irmons ta ben trabadja duru
i resebe trenu ki es pode ben uza na Se organizason.
Má, gósi irmons ku irmans pode spera
ma es ta ben uza kel trenu ki es resebe na pregason
i na kalker lugar ki organizason di Jeová meste más.
Pa nu faze kel-li, nu sta kontenti di fla nhos
ma ta ben ten alguns mudansa na Betel.
Primeru, ta ben ten más mudansa di irmons
ki sta na kanpu pa sirbi na Betel
i di irmons ki sta na Betel pa sirbi na kanpu.
Sima dja nu flaba, nu ka debe odja sirvisu di Betel
sima un diziginason pa tudu ténpu.
Enbóra sénpri nu ta ben meste di kes irmon ku más idadi
ki ten spiriénsia pa trena kes más jóven na Betel,
txeu di kes ki ta ben pa Betel ta ben sirbi pa un ténpu,
ta resebe trenu, ta ganha spiriénsia ki ten txeu valor,
trena otus i dipôs ba aplika kel trenu na otus diziginason.
Na algun momentu duránti sirvisu di un betelita,
nu ta ben odja na undi ki kel trenu ki el resebe
pode uzadu di midjór manera.
Modi ki kel mudansa li ta ben djuda organizason?
Nu ta konvida nhos pa nhos presta txeu atenson
na kes entrivista ki nu sta ben odja.
Kel trenu ki N resebe na Betel
djuda-m ser un algen más umildi.
Gósi mi é ansion i N ta tra pruvetu di kes kuza ki N prende
di trabadja ku kes irmon ku irmans
maduru ki ta kunfia na Jeová.
Ses izénplu inxina-m kunfia na Jeová,
na nha diziginason i faze tudu kel ki N ta pode pa nhas irmon
ku irmans na kongregason
sima N ta fazeba na nha sirvisu na Betel.
Na komésu, kantu ki nu mudadu di diziginason
nu kumesa ta lé ivanjélhus otu bês
i éra kel-la própi ki N staba ta meste.
Sikrê dja N leba kes palavra antis,
kantu nu resebe kel novu diziginason,
kes palavra da-m serteza ma Jeová ta ama-nu
i ma si nu kolaboraba ku el na kel novu diziginason
el ta kontinua ta abensuaba nos.
Na Betel, bu ten oportunidadi di konxe txeu algen.
Bu ta pode faze amizadi ku kes algen ki bu ta trabadja ku el.
Bu ta konxe txeu irmons ki ta ben vizita Betel.
Nton, bu ta odja ma organizason di Jeová
é más grandi di ki sô bu kongregason.
I bu ta kumesa ta da valor pa kel família
grandi di irmons ku irmans ki bu ten.
Gósi N ta pode konta kes irmon ku irmans di kel
kongregason novu ki nu sta kes spiriénsia ki N tevi,
djuda-s odja ma ten txeu kuza ki es pode faze na sirvisu pa Jeová
i insentiva-s pa es sta dispostu na faze más.
Organizason di Jeová é un organizason grandi
ki ta djuda-nu i ki ta da-nu serteza ma Jeová ta ama-nu
i ma el ta preokupa ku nos.
I bu pode pâpia ku otus di kes kuza
bon ki bu pasa pa el na organizason.
Sima kes spiriénsia li ta mostra,
sikrê sirvisu di Betel é ka pa vida interu,
el ta muda vida di algen.
Nton kel-li krê fla ma tudu kenha ki gósi sta na Betel,
ku ténpu ta ben mudadu pa kanpu?
Nau.
Inda nu ta kontinua ta meste di irmons jóven
i tanbê di kes ki ten más idadi.
Provérbios 20:29 ta fla:
‘Glória di jóvens é ses forsa,
i bunitéza di kes algen grandi é ses kabelu branku.’
Sentinéla di 15 di marsu di 1993,
ta faze un komentáriu sobri kel versiklu li:
“Óras ki jóvens ki ten más forsa ta trabadja djuntu
ku kes di más idadi ki ten sabedoria i spiriénsia,
es ta pode faze un bon trabadju djuntu.”
Dja ten txeu ténpu ki kel-li sta ta kontise na Betel.
Nu meste di kes irmon di más idadi ki ten un fé fórti
i txeu anu di spiriénsia.
Má talvês bu sta ta pergunta:
‘Si ta ben ten más algen ta sai i ta entra na Betel,
modi ki tudu kel trabadju ta ben kontinua ta fazedu?’
Kel-li ta leba-nu pa kel sugundu mudansa.
Nu sta ben konsentra na trena pesoas más faxi ki nu ta pode.
Nu krê djuda irmons ku irmans más rápidu ki nu ta pode
dizenvolve kel kapasidadi ki es meste na kes diziginason.
Kel trenu li ta involve da irmons jóven responsabilidadi más sédu.
Irmons di más idadi ta ben djuda i trena irmons más jóven,
asi pa es pode ten más responsabilidadi
i faze trabadju di enkaregadu na Betel.
Pamodi kel trenu li, es ta ben uzadu más midjór na Betel,
ta pripara-s pa kalker diziginason ki es pode ten na futuru
i ti mésmu ta djuda-s dizenvolve kes kualidadi i kapasidadi
ki ta ben ser di txeu valor na mundu novu.
Modi ki aplika kel orientason li
sta ta djuda Betel na mundu interu?
Favor, nhos presta txeu atenson na kes komentáriu li.
Kel trenu sta ta bira kada bês más midjór i más faxi.
Envês di trena tudu algen di mésmu manera,
nu ta pensa dretu na manera di ser di kada algen,
kuzê ki es bon na el,
ses kapasidadi i tanbê na undi ki
es meste di ajuda pa es midjora.
Nu ta ten midjór rezultadu
óras ki nu ta konsentra na trena kada algen.
Kantu ki mi éra jóven,
parse-m ma N ka resebe txeu trenu.
N resebe diziginasons, má N ka resebe txeu trenu.
Organizason sta ta kria,
pur isu trena jóvens é inportanti
i é bon odja ma kel trenu li sta ta bira más rápidu pa trabadju pode fazedu.
Organizason sta ta ten bons rezultadu
na trena i na da irmons jóven más responsabilidadi.
Nu sta ta odja irmons jóven ta traze txeu forsa
i novus ideia timenti kes di más idadi
ta da ses sabedoria i spiriénsia.
Óras ki bu ta djunta kes kuza li,
nu ta odja modi ki organizason sta kontinua ta kria
i konsigi lida ku novus mudansa.
Kel tirseru mudansa inportanti
ta involve manera ki nu ta organiza kes txeu irmon
ki oferese di livri vontadi pa sirbi Jeová di novus manera.
Nu sta ben konsentra na uza ku sabedoria kes commuter,
kes ki ta trabadja pa Betel di kaza
i kes ki ta trabadja pa Betel duránti alguns ténpu.
Kel-li krê fla ma nu ta ben disidi kantu algen
ki nu ta ben uza pa trabadja na Betel,
asi pa maioria di irmons
faze kel trabadju más inportanti, ki é pregason.
Faze kel-li sta da bons rezultadu.
Nu ben odja alguns spiriénsia.
Nu pasa ta da txeu valor pa sirvisu di Betel,
ka pamodi nu sta na Betel,
má pamodi é un sirvisu sagradu.
El é un trabadju ki pode fazedu na kalker párti di mundu.
N ba sirbi na Betel kantu N tinha 19 anu,
N pasa alguns anu la, dipôs N sai, N kaza,
N tevi fidju i pasa alguns anu
i gósi N sta trabadja ku Betel otu bês.
N ta trabadja alguns dia pa simana di kaza
i N sta kontinua ta odja bons rezultadu di kel trabadju li
i modi ki el sta ta djuda-m.
El sta kontinua ta trena-m.
Más un bês, N sta ta konsigi odja modi ki Jeová
sta ta orienta se organizason.
Nu debe sta prontu pa faze mudansa.
Ka ta inporta na undi ki kel algen ta mora
ô ki kuza ki el ten pa faze,
nu ta faze kel ki nu ta pode pa nu pode ten serteza
ma kes irmon ki ta trabadja di kaza pa Betel
ta konsigi trabadja ku nos.
Nu pode sta na otu párti di mundu,
má óras ki nu ta pâpia es ta krê obi bu opinion.
Es ta pô-u xinti ma es ta kunfia na bo
i ma bu ta faze párti di ekipa.
Nu ka ta skodje kenha ki nu krê pa trabadja ku nos.
Má simé, Jeová ta da-nu irmons ku irmans
ki ten txeu kapasidadi pa djuda-nu faze nos trabadju.
Si nu sta dispostu na seta novus ideia
sobri modi ki nu pode faze nos trabadju,
nu pode ten ménus algen ta trabadja na Betel
i simé nu pode faze un bon trabadju na nos dipartamentu.
Si bu ta trabadja pa Betel,
un kuza ki ta djuda-u txeu é óras ki kongregason ta intende
modi ki kel-li ta afeta bu prugrama.
Dja nu kumesa ta trabadja ku Betel na mundu interu
pa faze kes mudansa li poku-poku
i dja nu sta ta odja bons rezultadu di faze kel-li.
Irmons di Kumison di Filial sta ta repara
ma sta ta ten más oportunidadi pa
irmons ku irmans na Betel resebe trenu.
I pamodi kel-li,
más jóvens tene vontadi di oferese ses kabésa
pa sirbi Jeová di novus manera.
Alén di kel-li, Kumison di Filial sta ta fla
ma kes ki volta pa kanpu sta ta ten bons rezultadu
na djuda na trabadju di pregason na mundu interu.
Txeu di es sta ta faze más na ses trabadju
i es sta dispostu na djuda na otus trabadju, sima
na Dipartamentu di Dizenhu i Konstruson na ses tiritóriu,
Kumison di Ligason ku Ospital,
i tistimunhu públiku spesial na kes sidadi grandi.
Alguns muda pa undi ki mestedu di más publikador,
kursa Skóla pa Pregadoris di Reinu i faze otus kuza.
Kes três mudansa li ta ben da más irmons ku irmans
oportunidadi di resebe trenamentu i spiriénsia
ki sirvisu di Betel ta da.
Asi, es pode uza kel trenu li
pa sirbi Jeová di txeu manera.
Efézius 4:16 ta mostra modi ki korpu di Kristu
ta trabadja dretu tudu djuntu
i kada párti ta trabadja di “akordu ku kunpanheru.”
Nu ta spera ma kel mudansa li ta ba djuda nhos tudu
kontinua ta trabadja dretu djuntu
i kontinua ta sigi orientason di Jizus,
ki é kabésa di kongregason.
Irmons jóven, nu ta insentiva nhos
pa nhos faze orason i pa nhos pensa
si gósi é ka midjór óra pa nhos prenxe pitison pa Betel.
Na 1960, duránti diskursu di didikason
di un prédiu di Betel na Brooklyn,
irmon Frederick Franz, ki ta fazeba párti
di Grupu Enkaregadu di Óbra,
fla ma Betel é “kel midjór skóla ki ten na mundu.”
I más di 65 anu dipôs,
inda nu ta konkorda ku el 100 pursentu.
Sirbi na Betel é un oportunidadi ki ka ten konparason
ki bu pode resebe trenu
ki pode djuda abo i organizason gósi i na futuru,
i ti mésmu na mundu novu.
Pai ku mai, nhos djuda nhos fidju ten méta di sirbi na Betel,
asi pa es pode resebe kel trenu li ki ten txeu valor.
Kel-li é un manera ki nhos pode djuda-s
‘trabadja pa Jeová di tudu alma na kalker kuza ki es ta faze.’
Pa nhos ki dja sai di Betel i ki dja resebe novus diziginason,
nhos pode ten serteza ma nu ta ama nhos
i ma nhos ten txeu valor pa nos.
Kel spiriénsia ki bu ganha é un prezenti.
Da otus irmon kel prezenti li tanbê.
Insentiva irmons ku irmans pa sirbi Jeová di tudu alma
na ‘kalker kuza ki es ta faze’,
asi pa es pode ten kel mésmu spiriénsia i benson ki bu tevi.
Bu bon izénplu ta djuda otus txeu.
Kes ki bu ta insentiva gósi
nunka más ka ta ben skese di amor ki bu mostra-s.
Di akordu ku Izaías 60:17,
nu ten serteza ma Jeová ta kontinua ta faze mudansas
li na Betel di akordu ku kel ki se organizason meste.
Tanbê nu ten serteza ma nos amor pa Jeová
i pa se organizason ta motiva nos tudu pa sirbi Jeová
di tudu alma na kalker kuza ki nu ta faze
gósi i na futuru tanbê.

Sirbi na Betel — Un párti inportanti di ‘kalker kuza ki nu faze’