JW subtitle extractor

JW電視：2026年6月——第159屆基列學校畢業典禮

Video Other languages Share text Share link Show times

歡迎收看JW電視
2026年3月14號
是第159屆
基列學員的畢業典禮
怹接受了五個月優良的培訓
畢業典禮的節目
幫助怹適應生活的改變
嘛為未來的委派做好準備
節目講著的原則
嘛仝款會當幫助咱
面對生活的改變
咧看的時請想看覓
你會當按怎給學著的用出來
首先
阮想欲歡迎
當咧收聽
及觀看這个畢業典禮的所有的人
特別歡迎在座的學員
過去這五個月
恁攏足認真咧讀冊
阮知影恁的頭殼
可能強欲貯袂落矣
希望恁會當好好仔享受
今仔日的節目
阮嘛希望恁厝內的人
朋友
毋管是佇現場參加
抑是佇線頂收看的人
攏會當享受今仔日的節目
哇
這工總算到矣
今仔日就是恁的畢業典禮
相信恁已經期待足久矣
一定是的
這馬
恁就欲出發
去恁的委派
給恁佇過去這五個月
學著的寶貴的智識運用出來矣
恁嘛會及兄弟姊妹和睦鬥陣
做伙為耶和華服務
毋過講著和睦
你敢會感覺
有一點仔緊張
若是你互人派去一个新的所在
你可能會想講
我敢有法度及別人和睦鬥陣
若是你會轉去原本的委派
你可能會想
逐家是毋是攏會注意我
看我敢有進步
有遮的煩惱攏是正常的
所以
我今仔日演講的主題就是
愛促進和睦
其實
欲促進和睦對任何人來講
攏無簡單
耶穌佇馬太福音第5章
嘛講著這點
請掀開你的聖經
咱來看伊按怎講
佇遮伊講著一个狀況
請注意咱會當學著啥物
馬太福音5:23,24
「耶穌對門徒講
所以
你給禮物紮來到祭壇的時
若是佇遐想著有兄弟對你不滿
就愛給禮物留佇咧祭壇前
先去
及兄弟講和
了後
才轉來獻禮物」
耶穌的這个吩咐
對彼當時的聽眾來講
差不多是做袂到的
想看覓
你欲去揣一个人
恁兩个因為一寡代誌無歡喜
毋過
這馬是節日期間
有上千上萬的人
攏佇這个城市內底
而且
你愛先給禮物留佇咧祭壇前
然後揣著這个人
及伊和好
了後
閣趕轉去聖殿
給禮物獻互耶和華
耶穌講著遮爾濟細節
是欲說明
促進和睦
有時真正無簡單
所以
續落來
咱會來做伙討論
為啥物
促進和睦無簡單
閣有
就算無簡單
咱猶是會當按怎做
為著欲回答遮的問題
咱會來討論三个顧慮
這三个顧慮會妨礙咱促進和睦
咱嘛會講著亞伯蘭
也就是亞伯拉罕的例
咱會看
亞伯拉罕及羅得之間
捌發生啥物代誌
嘛會討論
為啥物伊有法度促進和睦
咱先來講第一个顧慮
就是無想欲互別人感覺咱軟弱
其實
真濟人攏會感覺家己無啥物價值
但是愈按呢想
人就會愈想欲互家己看起來閣較重要
比其他的人閣較𠢕
閣較厲害
毋過咱按呢做
是無法度互家己及別人有好的關係的
若按呢
亞伯蘭
敢有法度克服這款的顧慮
請掀開聖經
到創世記13章
這个記載講著
亞伯蘭的牧人及羅得的牧人
因為土地無夠來起冤家
亞伯蘭知影
這可能會影響伊及羅得的關係
咱來看創世記13:8,9
看彼陣發生啥物代誌
經文講
「亞伯蘭就對羅得講
咱攏是兄弟
無應該冤家
我的牧人及你的牧人
嘛無應該冤家
這片土地敢毋是佇你的面前
請你及我分開
你若去倒爿
我就去正爿
你若去正爿
我就會去倒爿」
哇
亞伯蘭佇羅得面前主動給身段放互軟
伊真正足謙卑的
想看覓
亞伯蘭無給家己
看甲比羅得閣較重要
伊無對羅得講
等咧
這馬是你咧綴我
毋是我咧綴你呢
是上帝派我來遮的
你只是綴我來的爾
亞伯蘭按呢講
應該會當得著伊想欲愛的
毋過
一定會破壞家己及羅得的關係
咱知影
伊並無按呢講
亞伯蘭及咱仝款
可能嘛有一寡顧慮
毋過伊猶是佇羅得面前表現謙卑
樂意讓步
是按怎亞伯蘭會當做到這點咧
簡單來講
伊要緊的
毋是別人按怎看伊
是耶和華按怎看伊
對伊來講
蹛佇迦南的啥物所在
毋是上重要的
只要伊留佇迦南
也就是耶和華叫伊去的彼塊土地
伊就會當得著耶和華的認可
這就是馬太福音5:23,24
耶穌想欲強調的要點
耶穌講
人去及兄弟講和了後
愛倒轉來
轉來到祭壇前
向耶和華獻上禮物
這正正是亞伯蘭上看重的代誌
及上帝有和睦的關係
所以
咱從亞伯蘭身上
學著的第一點是啥物咧
咱可能無想欲互人感覺咱軟弱
咱嘛可能會煩惱
別人無蓋看重咱有啥物經驗
做啥物服務
抑是煩惱
別人無重視咱基列學校畢業生的身份
遮的顧慮
會互咱無法度及別人有和睦的關係
若按呢
咱會當按怎克服遮的顧慮咧
咱愛及亞伯蘭仝款
有耶和華的認可
就感覺滿足
這是一个人
會當有的
上大的榮幸
其他的福份
抑是委派
攏毋是上重要的
既然
亞伯蘭已經佇羅得面前
表現出謙卑的態度
伊敢會想講
羅得應該嘛會按呢對待我
伊若按呢做
真好著無
講到遮
咱來講第二種顧慮
就是
煩惱會去互人偏去
比如講
咱及別人意見袂合的時
可能會煩惱
咱若是讓步
別人就會感覺咱好欺負
然後就對咱軟塗深掘
亞伯蘭按怎做咧
咱閣來看創世記13章
對拄才的記載繼續讀落去
請拍開創世記13章
拄才咱讀著
亞伯蘭對羅得足好的
伊主動促進和睦
然後第10到12節的經文講
「羅得攑頭看約旦河區規片的土地
一直到瑣珥
攏水源充足
彼時
耶和華猶未毀滅所多瑪及蛾摩拉
彼搭遐就像耶和華的園仔
嘛像埃及的地
羅得就選擇約旦河區彼片土地
羅得給伊的營地遷徙去東爿
怹就分開矣
亞伯蘭蹛佇迦南
羅得蹛佇約旦河區的城鎮」
亞伯蘭
敢有因為讓步
就去互羅得偏去咧
老實講
咱毋知影
咱毋知影
及這件代誌有關的所有的細節
毋過
咱會佇畢業典禮的最後一个演講
進一步討論這點
逐家會當期待一下
若按呢
羅得
伊的選擇
敢有互亞伯蘭感覺足意外
甚至互伊足受氣咧
亞伯蘭敢會想講
哪會按呢
哪會及我想的完全無仝
表現謙卑根本無路用啊
早若知我應該對伊較硬咧
亞伯蘭本底會當按呢想
毋過
伊敢有這種想法
無
請注意11節的最後一句話
及12節一開始是按怎講的
「怹就分開矣
亞伯蘭蹛佇迦南」
你看亞伯蘭
無表達家己的不滿
嘛無維護家己的利益
伊的謙卑毋是裝出來的
毋是假仙的
伊表現謙卑
毋是欲互家己得著好處
看會出來
亞伯蘭
給和睦
看甲比家己的利益閣較重要
咱會當對伊的身上
學著啥物咧
咱可能會煩惱
咱若是讓步
別人就會得著咱足想欲愛的服務機會
抑是咱做真濟工課
得著呵咾的卻是別人
這時咱可能會想
謙卑及讓步
根本無路用
毋過千萬毋通按呢想
因為這會破壞和睦
咱著愛向亞伯蘭學習
愛相信
耶和華的方法
是上好的方法
愛按照伊的方法來促進和睦
有時按呢做可能無啥物成果
毋過
就算結果毋是咱期待的
咱卻會得著耶和華的認可
及伊有和睦的關係
這才是上重要的
後來
羅得拄著足大的麻煩
亞伯蘭按怎做咧
伊敢有給代誌放下
抑是伊一直計較進前發生的代誌
給代誌記牢牢咧
有關這个問題
咱等咧才來回答
續落來
咱會來看逐家攏足佮意的一个節目
就是《基列有約》
這期的節目一定嘛會足精彩的
有的兄弟姊妹
足想欲效法特派傳道員的好模樣
搬去需要閣較濟傳道員的所在
本期的節目會幫助恁想看覓
家己會當按怎達到這个目標
傑里米·克拉克兄弟
會為咱主持這期的《基列有約》
請欣賞
歡迎來到基列有約
佇馬太福音5:6
耶穌講
「對正義感覺枵餓
喙焦的人有福氣矣
因為怹會得著滿足」
按呢耶和華按怎幫助少年人滿足心靈的需要咧
就是通過怹的父母
毋過怹的父母若是無崇拜耶和華
伊會按怎幫助怹咧
咱佇聖經看著
耶和華會通過成熟的長輩幫助怹
比如大祭司耶何耶大
捌幫助少年的約阿施王
撒迦利亞捌幫助少年的烏西雅王
佇本期的節目
咱會聽著一寡學員的經歷
怹少年的時攏捌得著別人的幫助
這激勵怹追求目標
擴大服務
這馬怹攏喜樂的崇拜耶和華
首先接受訪問的
是來自美國的卡拉韋翁仔某
咱做伙歡迎怹
多謝恁接受訪問
恁佇美國已經服務一段時間矣
毋過阮足想欲了解恁的生長背景
敢會當給阮講
好
我是佇南卡羅來納州出世大漢的
自細漢就及爸仔媽仔學聖經
我對阮爸爸身軀頂學著
愛按怎對待別人
阮媽媽一直教導我愛耶和華
嘛愛全力去追求崇拜方面的目標
會眾一寡兄弟嘛足關心我
我會記得有一个兄弟
伊特別撥時間及我
閣有我叔伯兄哥
做伙讀箴言
為啥物是讀箴言咧
因為彼陣我才十幾歲仔
伊感覺箴言內底有真濟實用的智慧
阮讀這本冊
就會當看出上帝的話語
是偌爾仔有智慧
閣有一位兄弟
對我的影響嘛足大
阮本底佇仝一个會眾
後來伊去伯特利服務幾若冬
伊轉來了後
對我講
你一定愛試看覓仔去伯特利服務
我有認真考慮伊的建議
伊嘛鼓勵我愛學另外一个語言
我嘛有認真學
後來你真正去伯特利矣
怹真正攏足用心咧幫助你
蕾韋卡
你嘛是佇真理中大漢的嗎
是啊
我佇西班牙大漢
阮兜就佇分部附近
所以會記得細漢的時陣
定定有伯特利成員來阮兜
定定及參與全時服務的人來往
對你有啥物影響咧
雖然怹生活真簡單
毋過就像聖經講的
怹「啥物好物都無欠」
我看出
耶和華真正佇各方面攏給怹照顧
逐改看著怹
怹總是笑微微
足歡喜的
這真正感動我
足想欲及怹仝款
過遮爾快樂的生活
足好的
按呢你的父母咧
怹按怎幫助你咧
我會記得逐工暗時
爸爸攏會及阮三姊妹仔做伙祈禱
毋過伊嘛會聽阮家己按怎向耶和華祈禱
我想伊應該是希望
阮會當給耶和華看甲足真實的
我嘛會記得
阮媽媽鼓勵阮三个
愛加及會眾的先鋒做伙
阮嘛按呢做矣
所以
阮自細漢就攏足佮意出去傳道
看會出來恁的父母攏互恁真好的教導
所以恁兩个攏真熱心嘛真有信心
按呢恁是按怎擴大服務的咧
阮咧談戀愛的時陣
伊是佇紐約的伯特利服務
毋過
後來伊就互人派去烏干達的分部服務
烏干達
嘿啊
收著這个委派的時我嘛真意外
毋過我嘛足期待的
阮兩个嘛繼續談戀愛
後來阮就佇馬德里結婚矣
阮結婚了後
蕾韋卡嘛開始佇烏干達分部服務
這是佇烏干達翕的乎
著 這是佇分部翕的
佇遐的生活按怎咧
彼是一段美好的經歷
毋過老實講
我一下仔愛做出遮濟改變
真正無簡單
彼陣我拄結婚
嘛拄到伯特利
我閣愛適應無仝的文化 語言 食物
甚至連思考的方式嘛攏無仝
毋過通過按呢的經歷
我閣較熟似家己
嘛閣較了解別人
阮閣較通情達理矣
你進前佇箴言學著的物件
敢對你有幫助
一定是有的
上課的時陣嘛有講著箴言19:11
「無計較別人的過失
就是伊的美德」
我學著
雖然耶和華創造的真濟事物攏足媠
毋過咱受著冒犯的時
願意原諒別人
這佇伊眼中閣較媠
其實烏干達的兄弟姊妹
對待阮的方式就是按呢
阮今仔到遐的時
講話做代誌的方式
可能互怹感覺無爽快
毋過怹攏表現包容的美德
無和阮計較
著啊
烏干達的兄弟姊妹
及阮就親像一家伙仔
我學著
你若是真心愛兄弟姊妹
怹嘛會足愛你
怹真正足關心阮的
特別是阮想厝的時陣
有一對特派傳道員翁仔某
一直攏足注意阮的狀況
嘛真關心阮的感受
怹定定撥時間參阮做伙
看著怹遮爾愛阮
真正互阮感受著
耶和華對阮的愛護及關心
恁佇烏干達幾冬咧
阮佇遐10冬
無想欲離開乎
著啊真正足毋甘的
阮欲走的時陣吼甲淒慘的
嘿啊
吼甲目睭攏腫起來
著啊
阮佇遐真正交著足濟好朋友
到這馬阮猶是一直有保持聯絡
著啊
雖然阮是外國人
毋過怹真正給阮當做是家己人
阮欲走進前
怹閣講
怹有留一隻羊及一塊地互阮
按呢阮隨時會當轉去
遮好
恁家己受著真好的訓練
嘛幫助真濟人滿足心靈的需要
相信以後恁有機會
會當幫助閣較濟的人
多謝恁接受阮的採訪
有的兄弟姊妹
父母只有其中一个崇拜耶和華
來自台灣的林佳慧姊妹就是按呢
咱歡迎林姊妹
佳慧 歡迎你來
謝謝
敢會當請你先自我介紹一下
好
我是佇台灣出世及大漢的
我10歲的時陣
媽媽開始學聖經
嘛受浸矣
真好
啊恁爸爸咧
這馬阮爸爸猶毋是兄弟
毋過伊無給阮反對
顛倒足支持阮的
一開始是媽媽幫助我及弟弟學習真理
嘛幫助阮愛耶和華及傳道工課
這是恁媽媽及你
著 佇聚會所
閣有恁弟弟
著啊
真好
恁媽媽按怎幫助你
培養對耶和華的愛咧
我媽媽有全時的工課
閣愛照顧兩个囡仔
毋過伊猶是報名做先鋒
而且伊毋是有達到傳道時間就好
伊是真正足愛傳道的
我閣會記得
媽媽傳道轉來的時陣滿面的笑容
伊攏會足歡喜的給我講
伊佇傳道的時拄著啥物人
有啥物好的經歷
是因為地區的人反應攏足好嗎
其實佇台灣
足濟人攏無閒趁錢
對聖經無啥興趣
毋過阮媽媽
猶是定定會當揣著願意聽的人
我感覺這是因為伊真正足愛傳道
而且發自內心關心人
我閣會記得伊足𠢕用《聖經新世界譯本》
頭前的聖經入門做話題及住戶開講
恁媽媽真正靠神聖力量滿腹熱誠
既然遐的人攏想欲過富裕的生活
按呢遐的傳道工課狀況按怎咧
其實傳道工課的發展猶袂䆀喔
阮有準備一塊影片
你想欲看覓無
好啊 來看覓
Ilha Formosa
美麗的島
過去葡萄牙人就是按呢形容台灣的
遮有足懸的山嶺
嘛有美麗的海岸
毋過上媠的風景
原仔是佇這片土地上崇拜耶和華的人
1948年
基列學校第8屆的畢業生
鍾志丹兄弟來到台灣
伊探訪足濟所在
閣參加一場大會
彼陣有差不多300个人受浸
真理的種子佇遮繼續成長
這馬台灣的傳道員
已經超過1萬1000人矣
今仔日台灣人口的密度誠懸
干焦佇台北市
就有超過200萬个居民
遮四界攏有趁錢的機會
毋過兄弟姊妹
攏效法早期特派傳道員的好模樣
全心全意宣揚王國的好消息
細漢聽著爸爸媽媽咧冤家
定定是為著錢
所以彼陣我就下定決心
大漢欲趁大錢
按呢我的家庭較會幸福快樂
我17歲的時陣開始學聖經
我學著一个重要的道理就是
耶和華上帝欲互咱生活佇樂園
而且我嘛學著
有知足的態度
較有真正的幸福
我佇1999年受浸
我及以弘結婚了後
阮攏有目標去需求較大的所在做先鋒
毋過彼陣阮爸爸已經中風8冬矣
伊嘛是一个植物人
需要阮的照顧
時間過去
我愈來愈佮意我的工課
這个工課嘛互我足濟成就感
所以有時陣我會想
我是毋是用滿足家庭開銷做理由
互家己嘛會當享受較四序的生活
逐改阮聽著兄弟姊妹去擴大服務的經歷
抑是怹去上SKE彼種喜樂
真正攏足鼓勵阮的
嘛幫助阮思考
是毋是愛調整家己的生活
後來阮爸爸就過往矣
阮知影阮的機會來矣
所以阮需要過簡單的生活
阮兩個足緊就給工課攏辭掉矣
然後阮就搬去需求大的地區
彼个時陣我嘛開始做先鋒
我給阮頭家講我欲辭職的時陣
伊非常的無歡喜
伊無法度相信伊聽著的
伊就問我講
以弘 你是起痟呢
你愛考慮清楚喔
你的未來 你的家庭是欲按怎生活
但我猶是足堅定做這个決定
耶和華真正賜福互阮
我足緊就開始享受新的生活矣
阮會當用足濟時間
及會眾的兄弟姊妹來往
而且嘛幫助袂少的聖經學生
及耶和華閣較親近
阮真正足佮意這種的生活方式
我感覺撒但的世界會創造一種假象
看起來會當互人足濟物件
足吸引人的
毋過真正有價值的是
咱及耶和華有好的關係
咱會當佇樂園
有永遠的性命侍奉耶和華
較是上讚的
我足希望我彼當時會當
有勇氣較早採取行動
用閣較濟時間為耶和華服務就好矣
我體會著一个真理
就是箴言10:22講的
「 耶和華所賜的福份互人富足」
早期來台灣的特派傳道員
為傳道工課建立一个真好的基礎
怹的好模樣鼓勵兄弟姊妹獻出家己
繼續佇這片土地上熱心宣揚好消息
看著遐的兄弟姊妹熱心傳道
真正足鼓勵人的
著啊
按呢佳慧
除了恁媽媽
敢閣有其他的人幫助你進步
有啊
有一段時間我的信心較軟弱
有時我會無去參加聚會
毋過彼陣
阮會眾有一對特派傳道員的翁仔某
怹足關心我的
怹若看著我無來聚會
姊妹就會來問我最近按怎
就是相片頂面這對翁仔某嗎
無毋著
怹嘛上過基列學校嗎
是啊
而且怹閣有出現佇
《直到地極》這塊影片內底喔
我真正足歡喜會當及怹佇仝一个會眾
後來怹互人派去別的所在矣
我真正足傷心的
毋過耶和華閣互我一个好朋友
伊是來台灣擴大服務的日本姊妹
伊定定招我
作伙做無仝形式的傳道工課
伊真正足有愛心的
伊閣按怎鼓勵你咧
彼陣
組織今仔出版
《青年人問—怎樣結交真朋友》這塊影片
姊妹就邀請我及伊做伙看
影片內底有一个先鋒姊妹
足用心咧幫助會眾的一个少年人
我才發現
原來這个日本姊妹嘛咧用仝款的方式幫助我
其實
對我來講
我一直攏相信聖經講的是真理
毋過這个姊妹為我所做的
互我真正體會著耶和華對我的愛
這感動我想欲及耶和華閣較親近
想欲及伊做朋友
真好呢
恁媽媽及其他的兄弟姊妹足用心幫助你
按呢你後來閣有啥物進步咧
我報名做固定先鋒
後來閣加入英語會眾
我真歡喜會當幫助別人
嘛感受著耶和華的愛
我嘛看著真濟兄弟姊妹
對世界各地搬來台灣傳道
怹攏為耶和華表現自我犧牲的精神
真正互我足受鼓勵的
幫助別人認捌耶和華
教導怹真理
真正是一件足喜樂的代誌
佳慧多謝你
阮會為你閣有台灣的兄弟姊妹祈禱
多謝你及阮分享你的經歷
多謝
真濟兄弟姊妹
父母攏無崇拜耶和華
按呢啥人來幫助怹咧
續落來
咱會採訪來自美國的道格·特雷爾
道格 歡迎你來
敢會當及阮分享
你是按怎開始學聖經的
我差不多18歲開始學聖經
彼个時陣我的狀況足無好的
是按怎講咧
阮爸爸媽媽攏毋是見證人
毋過阮媽媽
一直誠用心晟養阮三个囝仔
但彼陣我真袂曉想
交著一寡歹朋友
我嘛定定感覺足鬱卒
足煩的
磕袂著就受氣
後來阮媽媽真正看袂落
就揣我好好仔講一下
其實彼當陣我真正足想欲認捌上帝
所以我去過真濟教會
比如天主教 五旬節教會
閣有衛理公會
感覺按怎咧
我感覺攏足假的
佇遐我並無感覺閣較親近上帝
我會記得阮媽媽揣我講了
我就跪落來向上帝祈禱
那流目屎那求上帝講
求你幫助我認捌你
幫助我揣著我的問題的答案
你的疑問是啥物咧
我足想欲知影上帝敢有一个名
為啥物好人顛倒會受苦
閣有
為啥物宗教會變甲遐爾虛假
真濟人攏想欲揣著遮的問題的答案
後來按怎咧
我祈禱了後差不多過兩禮拜
耶和華見證人就來挵門矣
通常我是袂給怹開門的
是乎
啊是按怎彼改你欲開門咧
彼改真正蓋特別
是兩个姊妹來挵門
其中一个竟然是我高中的老師
伊人足好的
足疼阮遮的學生
我看著是伊就開門矣
伊問我講
你敢知影上帝叫啥物名
然後伊互我看詩篇83:18
後來伊閣互我看約翰一書5:19
而且解說
「全世界攏受彼个惡者控制」
是啥物意思
聽伊講了
我的心情變有夠好的
我從來毋捌遐爾歡喜過
真好呢
按呢除了恁高中老師以外
敢閣有其他的人嘛捌幫助你親近耶和華
有
我開始學聖經了後
有一改我有代誌去亞特蘭大
佇遐我熟似著我上好的朋友
是喔
彼陣我學聖經已經差不多1冬矣
毋過
我猶毋知影欲按怎給聖經原則運用出來
彼个朋友真正足關心我
伊教我欲按怎照學著的去做
伊嘛是一个熱心的先鋒
後來我搬去亞特蘭大市
伊就變成我的聖經老師
而且有7冬的時間阮攏是室友
哇 遮好
伊毋若關心你
閣幫助你親近耶和華上帝
啊後來咧
我會記得伊後來邀請分區監督
參加我的聖經課程
彼个分區監督真關心我
對我真好
所以後來我就向耶和華祈禱
求伊幫助我會當佇崇拜方面有目標
這張相片內底有啥物人咧
這是我受浸彼工的相片
上正爿的就是向我作見證的高中老師
啊佇上倒爿的就是我上好的朋友
按呢伊介紹分區監督互你熟似
對你有啥物幫助咧
我學習聖經進前做的一寡代誌
當時猶原對我有一寡無好的影響
所以我需要別人的幫助
彼个時陣我的分區監督特別關心我
伊幫助我提升傳道方面的能力
培養教導的技巧
教我按怎牧養別人
嘛幫助我學會曉應付消極的情緒
一段時間以後
我嘛開始做分區探訪的工課矣
哇 實在太好矣
想著遮的一路上捌給你幫助的人
你有啥物感想咧
我想著一个聖經人物
奧尼西慕
伊成為基督徒進前
是一个偷走出去的奴隸
彼陣的奴隸
干焦互人看做是主人的財產
毋過伊成為基督徒以後
使徒保羅就訓練伊為會眾服務
我感覺家己就親像奧尼西慕
認捌真理進前
我就像一个奴隸
無前途嘛無希望
毋過耶和華通過現代的使徒保羅
比如我的高中老師及我的好朋友
閣有分區監督
幫助我看出
其實有真濟代誌是我做會到的
你真正有達到目標做閣較濟的服務
阮嘛看出
關心少年人
幫助怹愛耶和華真正足重要的
多謝你和阮分享家己的經驗
咱的心靈需要得著滿足了後
就會真想欲加為耶和華服務
最後接受採訪的是奧爾頓翁仔某
怹目前佇泰國服務
咱做伙歡迎怹
安迪 朱莉婭
恁攏是英國人
這馬煞佇泰國服務
為啥物恁會去遐服務咧
其實阮進前的目標
一直攏是去英國分部服務
毋過阮申請了後攏無消息
所以阮有淡薄仔失望
嘛毋知影續落來欲做啥物
確實有的人定目標了後
代誌無照怹想的按呢發展
怹就會感覺真失望
按呢恁是按怎做的咧
彼个時陣阮就是
繼續為這件代誌祈禱
然後阮就聽講
泰國需要閣較濟傳道員會當去遐服務
恁是聽啥人講的
彼个時陣阮妹妹及妹婿
已經搬去泰國服務矣
怹鼓勵阮嘛試看覓
阮彼陣發現
佇曼徹斯特有一个泰語小組
離阮蹛的所在無遠
阮就先加入彼个小組
然後才搬去泰國
後來按怎咧
佇泰國傳道足讚的
毋過阮需要半冬一改
轉去英國做工課趁所費
這時阮就愛請其他的兄弟姊妹
繼續拜訪對聖經有興趣的人
所以逐擺轉去泰國
阮就閣愛對頭開始
講實在的
阮心內猶是無放棄
去英國分部服務的目標
毋過阮知影
阮需要做出一个選擇
看是欲繼續留佇泰國服務
抑是欲搬轉去英國做先鋒
毋過英國分部
猶是一直攏無邀請恁
所以後來
恁決定按怎做咧
阮祈禱足濟改
最後決定留佇泰國
恁是按怎下定決心的咧
阮考慮過無仝的選擇了後
看出泰國真正有足大的需要
遮有真濟工課愛做
所以阮決定
先莫考慮家己較愛去佗位
先專心佇泰國服務
毋過欲做這个決定
阮猶是有一點仔煩惱
敢會當講看覓
是啥物原因互恁遮煩惱
去泰國服務
就表示阮愛離開慣勢的環境
所以阮去泰國了後
需要全心倚靠耶和華
結果阮及耶和華的關係閣較親近矣
雖然恁足煩惱的
毋過嘛是勇敢去做
按呢泰國的傳道工課如何咧
佇遐傳道真正足讚的
這張相片是我及茱莉婭
佇曼谷傳道的時陣翕的
阮拄著真濟人攏對真理有興趣
雖然泰國大部份的人攏信佛教
毋過猶是有真濟人
尤其是少年人
想欲滿足心靈的需要
所以有袂少人願意接受真理
阮嘛有準備一个影片
按呢就來看覓
歡迎來到泰國
這片土地有豐富的色彩
有足濟好食的路邊攤仔
遮的人熱情友善
所以泰國嘛叫做微笑之國
遮的人足有慷慨好客的精神
怹嘛非常重視厝裡的人及朋友
毋過
足濟人攏猶閣咧揣
怹攏猶閣咧走揣人生的意義
及內心的安寧
咱做伙來聽娜魯蒙及卡妮達的故事
佇我大漢的所在有真濟宗教老師
怹本底應該做信徒的好模樣
毋過怹定定講一套做一套
所以我細漢的時定定會想講
既然遮的宗教老師做甲遐䆀
為什麼閣有遐濟人
會敬重怹閣給怹拜咧
逐擺我問遮的問題
得著的答案攏是
因為怹是和尚 是出家人啊
所以你愛尊重怹 向怹行禮
聽著怹按呢講
我實在無法度接受
阮爸爸真善良
是一个好人
毋過伊有一个問題
就是 伊真愛啉酒
佛教的教義有講著
一个人若啉酒啉傷濟
閣定定啉甲醉茫茫
伊就可能會落地獄
這互我感覺足驚的
因為我無希望阮爸爸落地獄
所以我就去廟寺問師父
看有啥物辦法
莫互這種代誌發生
但是怹講
無法度
因為做功德袂當消業障
善行嘛袂當及惡行相拄
毋過你會使捐物件互廟寺積功德
按呢恁爸爸佇地獄的時會較好過
這種講法
我感覺真無合理
自彼陣
我就開始接觸其他的宗教
想欲聽看覓仔
怹按怎解說這件代誌
我從細漢就定定聽人講
信就好
毋免問遐濟
按呢講足無道理的
毋過我真想欲揣著答案
嘛希望有合理的解說
後來我加入網路頂面的一个群組
內底的人攏想欲改變信仰
嘛捌有一寡人招我去教會
我是誠有興趣
毋過
我毋敢去
有一工我看著《聖經》這本冊
我想講
內底應該有我欲揣的答案
所以我想欲給伊借轉去看
毋過宗教老師講
袂當借
愛用買的才會使
我問怹一本偌濟
怹講大約愛1000箍
差不多是美金31箍
我咧想
網路敢會有免費的聖經通好看
我就佇手機仔拍聖經這兩字
然後
點走出來的第一个網站
我掰到下跤就看著頂面寫
免費的聖經課程
後來我才知影這个網站是
JW.ORG
我心內想講
敢真正毋免錢
雖然按呢
我猶是給資料添添咧送出去
然後對家己講
怹若欲給我收錢
我就無愛學矣
過兩工
有一个姊妹敲電話互我
我一直問伊講
敢真正是免費的
伊講
著啊
是完全免費的
有一工我及我的頭家做伙食飯
欲開始食進前
我看伊頭向向
目睭瞌瞌
我就感覺足奇怪
毋知影伊咧創啥
伊目睭剝開了後
我就問伊講
啊你拄才咧做啥物啊
伊講伊咧祈禱
伊是一个基督徒
伊咧祈禱感謝上帝
所以我講
其實我真想欲改變信仰
我會當按怎做啊
伊講
喔
我有咧免費教人讀聖經
啊你有興趣無
我隨講好啊
阮爸爸佇2019年去世
雖然這件代誌互我真艱苦
毋過我袂像較早按呢遐爾驚
因為我知影
佇未來阮兩个人會當閣見著面
伊閣活過來的時
阮就會當像過去按呢開講講話矣
我對《永遠享受美好的性命》
第27課印象足深的
咧學這課的時
老師幫助我看出
耶和華及耶穌的愛有偌偉大
耶穌犧牲性命
證明伊的愛毋是干焦用喙講講咧爾
是有實際的行動的
我感覺這款的對象
才值得我跟綴及學習
因為怹真有愛心
嘛願意自我犧牲
真濟人就像這兩位姊妹仝款接受真理
這真正互阮足歡喜的
所以阮會繼續走揣對真理有興趣的人
因為真理會當改變怹的人生
恁嘛熟似這兩个姊妹著無
是啊
阮拄到泰國的時陣
娜魯蒙猶閣咧學聖經
彼陣阮佇仝一个會眾
看的出來恁真正足佮意佇遐傳道
按呢恁佇泰國的期間
敢有得著別人的幫助
有啊
真濟人攏捌給阮鬥相共
特別是一對特派傳道員的翁仔某
怹嘛捌上過基列學校
怹幫助阮學會曉按怎骨力做工課
但是嘛會當保持平衡
好好仔適應當地的生活
怹嘛給阮講
愛給厝裡佈置互較四序咧
按呢佇厝裡就會當好好仔歇睏
第二工才有體力會當認真傳道
怹互恁遮爾實用的建議
真正足好的
按呢敢會當給阮講
是啥物激勵恁兩个
想欲加為耶和華服務咧
對我來講
是父母的好模樣鼓勵我的
怹攏足愛耶和華
怹人嘛攏足好的
對兄弟姊妹攏真慷慨
我少年的時陣
定定及爸爸
做伙參與王國聚會所的建築工程
我足佮意及爸爸做伙做這項工課
會眾有兩个長老
嘛幫助我足濟
阮佇仝一个所在上班
伊嘛定定參與聚會所的建築工程
遮的兄弟攏給我鼓勵
互我閣較愛耶和華
嘛幫助我定下崇拜方面的目標
這是你嗎
著 這是我及阮爸爸媽媽
多謝你
我嘛仝款
阮爸爸媽媽嘛立下真好的模樣
我細漢的時
媽媽就受浸矣
無幾冬後
爸爸嘛受浸
了後
阮兜佇崇拜方面
一直攏維持真好的習慣
其實這真無簡單
因為阮兜有七个囡仔
毋過
毋管按怎
阮攏一定會去傳道及聚會
這是阮兜一定會做的代誌
我會記得下課轉去厝
定定看著媽媽佇廚房咧研讀
透早起床
嘛攏會看著爸爸咧讀《守望台》
我看出
怹及耶和華真正有足好的關係
我真想欲向怹學習
這兩張相片攏是你嗎
嘿啊
這是我及阮媽媽
閣有阮爸爸
阮真正看出
父母
特派傳道員及會眾的兄弟姊妹
會當發揮足大的作用
怹會當幫助家己的囡仔
抑是其他的少年人
學會曉信賴耶和華
追求崇拜方面的目標
多謝恁及阮分享家己的經歷
咱嘛看出
耶和華會當通過任何人
來滿足人的心靈需要
怹的故事
敢有互你想著家己的經歷
耶和華是毋是當咧通過你
去滿足某一个人的心靈需要咧
做父母的
恁用心付出
幫助囡仔愛耶和華
給上好的獻互伊
恁做了非常的好
就算配偶無侍奉耶和華
恁嘛會當成功教導囝兒
會眾受委任的兄弟
特派傳道員
先鋒抑是年長的兄弟姊妹
恁嘛會當幫助會眾的少年人
恁會當幫助怹
給上好的獻互耶和華
然後
怹就閣會當去幫助閣較濟的人
希望逐家佮意本期的訪問及影片
期待後一期的《基列有約》再相會
真正足精彩的
多謝克拉克兄弟
嘛感謝所有參與節目的人
看著有遮爾濟內心正直的人需要聽著真理
咱的心敢毋是像火咧著
我毋知影恁按怎想的
毋過這个節目互我足想欲轉去做特派傳道員
毋過
這毋是我會當決定的
恁敢會記得
佇節目的一開始
咱有講著亞伯拉罕及羅得之間發生的代誌
你是按怎看羅得這个人的咧
你敢會感覺伊是一个自私的人
續落來
中央長老團成員戴維·斯普萊恩兄弟
會發表一个演講
伊會幫助咱對無仝的角度來看羅得
伊演講的題目是
愛積極看待別人
我猶會記得
差不多
欲60冬前
我嘛
受邀請上基列學校
我就去布魯克林伯特利報到
我猶記甲足清楚
5個月後
我就參加基列學校的畢業典禮
所以
我應該會當體會
恁這馬是啥物款的心情
對恁來講
今仔日是一个足重要的日子
阮嘛為恁感覺驕傲
恁真認真
耶和華嘛賜福份互恁
阮相信恁佇基列學校學著遮爾濟
毋是為著欲互人知影恁有偌濟智識
是為著欲親近耶和華
及親近兄弟姊妹
佇這个演講
我嘛想欲及逐家討論這點
就是咱應該按怎看待兄弟姊妹
咱攏知影
耶和華上帝
十分的了解咱
知影咱的一切
所以
咱會當確信
伊最後的審判
絕對是
完全公正的
咱每一个人做過的每一件代誌
耶和華攏袂放袂記得
攏袂落勾去
伊會考慮所有的情況了後
才做出判決
毋過咱人咧
上帝捌給撒母耳講
人看的是外表
所以
咱無可能完全了解別人的情況
嘛無可能對人做出完全公正的判斷
拄才楊杰明兄弟
講著羅得的例
咱嘛會來討論羅得
咱會來想看覓
有關按怎積極看待別人
咱會當對羅得的記載
學著啥物
無毋著
我及楊杰明兄弟已經參詳好勢
攏欲用羅得做事例
阮已經串通好矣
使徒彼得
就捌講著羅得
請逐家拍開聖經到彼得後書第2章
彼得後書第2章
咱會來讀第7節及第8節
佇遮就有一个有關羅得的記載
你會當慢慢仔掀
我的指頭仔嘛是無蓋猛掠
需要較濟時間才掀會著
彼得後書2:7,8
講耶和華上帝伊
「卻拯救正義的羅得
遐个無法無天的人行為無恥
互羅得非常的痛心
這个正義的人生活佇怹當中
逐工看著
聽著怹無法無天的行為
伊正義的心就足折磨的」
請問
是啥人講羅得是正義的咧
這敢是彼得伊家己的看法
毋是
這是彼得受啟示寫落來的第二張批
所以彼得
是佇神聖力量的引𤆬之下
按呢來形容羅得的
彼得受神聖力量的推動
三擺講羅得是正義的人
按呢
神聖力量是對佗位來的咧
耶和華上帝
所以
聖經三擺講
羅得是正義的人
其實就是耶和華上帝
欲互咱知影
伊是按怎看羅得的
你咧
你嘛一直攏感覺
羅得是一个正義的人嗎
抑是你感覺
羅得有真濟做了無好的所在咧
有的人可能會按呢想
伊的阿叔亞伯拉罕
互伊選擇迦南的土地的時陣
伊給上好的彼部分揀去矣
伊應該互比伊年長的人先選矣
這毋就表示伊足自私嗎
咱家己讀這个聖經記載的時
因為這个記載提供的細節並無濟
咱可能會得著按呢的結論
這个結論可能嘛是著的
毋過
羅得敢真正是自私的人
抑是講
有一寡其他的細節
會當幫助咱閣較全面的看這件代誌
會當對羅得有無仝的看法咧
比如講敢有可能
雖然亞伯拉罕是羅得的阿叔
毋過其實是羅得較濟歲
甚至可能比亞伯拉罕加足濟歲
這敢會改變你對羅得的看法
伯特利成員應該會
因為年資的關係
你可能嘛知影
佇伯特利
阮是按怎決定
啥物人會當蹛佇佗一間房間咧
阮袂抽鬮仔
嘛袂撚匼笑抑是烏白
嘛毋是耍鉸刀 石頭仔 紙
阮更加袂遏手把
阮會按怎做咧
一旦有空的房間
所有符合資格的人
攏會當去看 去選
伊若佮意就會當給分部辦事處講
毋過若是兩个人攏佮意仝一間房間
欲按怎咧
這个時陣
房間就會分配互
年資較久的人
也就是做全時服務的時間較久的人
這个時陣
無得著房間的人
絕對袂對彼个得著房間的人講
你傷自私矣
我足佮意這个房間
你應該讓我才著
袂按呢
因為房間就是會分配互
年資較久的人
按呢敢有可能
羅得比怹阿叔閣較濟歲
甚至會當做怹爸爸仔咧
咱無法度確定
因為創世記提供的細節並無蓋濟
毋過咱猶是會當揣著一寡趣味的線索
亞伯拉罕有兩个兄弟
哈蘭及拿鶴
亞伯拉罕
真有可能是三个兄弟當中上細漢的
咱哪會知影咧
請問亞伯拉罕出世的時陣
怹老父幾歲矣咧
敢是60幾歲
毋是喔
抑是100歲矣
嘛毋是
亞伯拉罕
出世的時陣
怹老父已經差不多130歲矣
真有意思 著無
亞伯拉罕100歲的時陣
感覺家己已經傷老矣無法度生囝
毋過伊家己出世的時陣
怹老父已經130歲矣
所以
亞伯拉罕的兩个兄弟
應該攏是伊的兄哥
咱根據聖經
嘛會當計算出
亞伯拉罕出世的時陣
怹大兄已經60歲矣
這个大兄可能就是
羅得的父親哈蘭
因為伊是三个兄弟第一个去世的
當時的人一般是佇30歲左右生囡仔
所以
若是亞伯拉罕出世的時陣
羅得的父親已經60歲矣
按呢彼當時
羅得可能就已經是一个少年家
甚至已經是大人矣
若誠實是按呢
亞伯拉罕佇迦南互羅得先揀土地
就只不過是互年紀較大的人先揀
你若是彼个年資較久的人
會當得著家己佮意的房間
我相信
你一定袂有啥物意見
你可能會講
聽起來是真有道理
毋過你無法度證明
羅得真正比亞伯拉罕較濟歲矣
聖經曷無按呢講矣
你講了無毋著
但你嘛無法度證明羅得較細漢啊
這个演講毋是欲證明啥物
重點嘛毋是羅得
咱只是用羅得做例爾
這个演講的重點是
咱若無了解所有的情況
就無應該
隨便對人下結論
就像這个例
咱對羅得的了解嘛真有限
毋過
有人猶是會按呢想
羅得伊無想欲蹛佇布棚內底
伊想欲過四序的生活
所以才搬去所多瑪城蹛
這毋就證明伊真重視物質嗎
嘛是有這種可能
毋過咱敢真正了解所有的事實
咱敢真正知影
羅得為啥物欲搬去所多瑪城
伊真正是欲過四序的生活嗎
抑是講
伊其實是希望厝內底的人
會當較安全咧
莫袂記得
羅得捌互人掠去
你若捌互人綁票
你會希望恁兜的人
蹛佇曠闊的所在的布棚內
抑是有城牆保護的城內咧
愛知影
真濟兄弟姊妹攏蹛佇治安無好的大都市
其實怹嘛無希望按呢
怹毋是佮意佇大都市過四序的生活
是怹根本都無啥物選擇
其實有關羅得
咱知影的
使徒彼得嘛攏知影
毋過伊猶是講羅得是一个正義的人
伊並無講伊自私
抑是看重物質
只有講伊是正義的
羅得毋是因為離開所多瑪
才互上帝看做正義
反倒轉
是因為羅得本底就是正義的人
上帝毋才會𤆬伊離開所多瑪
伊一定捌做過真濟上帝看做正義的代誌
就算講
羅得佇迦南給上好的土地揀去
真正是因為自私
就算伊搬入去所多瑪城
是因為看重物質
就算真正是按呢
伊嘛一定做過真濟正義的代誌
真濟互上帝歡喜的代誌
上帝毋才會講伊是正義的人
只是咱毋知影遮的代誌爾
所以重點就是
咱需要了解所有的情況
毋過有時陣
咱就是無法度了解所有的情況
咱若無全面去了解就下結論
可能就會做出錯誤的判斷
以色列人佔領上帝賜給怹的土地了後
就捌發生按呢的代誌
當時呂便部族
迦得部族
及半个瑪拿西部族
留佇約旦河的東爿
因為遐真適合飼怹的精牲
咱來看約書亞記第22章
看發生啥物代誌
我會互恁時間慢慢仔揣
約書亞記
第22章
咱會來讀第10節的經文
約書亞記22:10
「呂便部族
迦得部族
及瑪拿西半个部族
來到迦南的約旦河區
就佇約旦河邊起一座壇
一座足大足壯觀的祭壇」
其他的以色列人聽著這件代誌
就馬上斷定
這兩个半的部族欲反背耶和華
甚至已經準備好欲去攻打怹矣
毋過有關這兩个半的部族
咱知影啥物咧
進前
怹攏及其他的以色列人做伙作戰
去征服上帝承諾欲賜互怹的土地
而且怹是冒著性命的危險按呢做的
咱哪會知咧
聖經講
這兩个半的部族
是排佇以色列全軍的上頭前
也就是講
作戰的時
怹攏是衝第一的
嘛是上危險的
怹真勇敢 著無
咱敢有看著
怹有啥物對耶和華不忠的情形
無
毋過
真可惜
其他的以色列人
並無積極看待
這兩个半的部族
怹按怎講咧
咱來讀約書亞記22章
16到18節
「耶和華的全體子民講
『恁為啥物對以色列的上帝不忠
今仔日恁為家己起祭壇
離開耶和華
反背耶和華
以前咱佇琵珥山所犯的罪猶無夠 是毋
耶和華的子民因為彼件代誌遭受災厄
到今咱的罪猶未洗清氣
這馬恁竟然閣欲越頭離開耶和華
恁今仔日反背耶和華
明仔載
伊就會對全體以色列人受氣矣』」
我先讀到遮
其實怹猶未講了
怹閣一直講
講甲怹忝矣以後
這兩个半的部族的人
才總算有機會解說
怹起的這个壇
毋是用來崇拜抑是獻祭
是欲用來提醒其他的以色列人
怹佇約旦河的東爿
嘛仝款咧崇拜耶和華上帝
這時大祭司及其他的長老
才發現家己誤會矣
彼个時陣怹毋知影有偌歹勢
演講一開始
咱有講著
耶和華完全了解咱每一个人
所以仝款
咱愈了解咱的兄弟姊妹
了解怹的成長背景
閣有怹面對啥物考驗
咱就愈會當對怹有積極的看法
咱若知影怹付出偌濟努力
才成為咱的兄弟姊妹
咱就會足愛怹
愛知影
佇上帝的眼中
怹是足寶貴的
有時陣
咱會對別人有一點仔意見
毋過後來咱才知影伊有啥物款的成長背景
可能怹兜的人攏無佇真理內底
嘛有可能大部分攏咧過無道德的生活
但是只有伊無仝款
耶和華一定非常的愛伊
所以
若是有人互你感覺無啥爽快
咱就愛問家己
佇耶和華眼中
伊敢是一个正義的人
伊確實有一寡缺點
但可能佇耶和華看來
伊是一个正義的人
所以我應該愛調整家己的想法
我無應該一直看伊小小的缺點
我應該愛想著
我並無完全了解伊這个人
真濟年前佇一个伯特利
一个少年兄弟有一段真長的時間
愛及一个年長的姊妹做伙做工課
這位姊妹及怹翁
攏是受神聖力量任命的基督徒
怹翁
是一个非常友善
非常溫和的人
姊妹呢
非常的
忠貞
咱愛積極看待人嘛
這个姊妹
若是你工課無做甲互伊滿意
伊就會給你罵甲臭頭
伊可能感覺家己需要做逐个人的阿媽
好好仔給怹管教
毋過這个兄弟真正足成熟的
伊做了足好
兄弟伊攏無受氣
伊嘛無講
一个姊妹哪會當按呢對兄弟講話
伊顛倒邀請怹去伊房間開講
伊才知影
這對翁仔某
佇咧傳道工課受禁止的時
嘛一直保持忠貞
這馬
伊對這个姊妹有無仝的看法矣
希望姊妹嘛對這个兄弟有無仝的看法
所以咱若及兄弟姊妹發生一寡摩擦
咱就愛加熟似怹
撥時間及怹做伙
加及怹做伙傳道
抑是請怹啉咖啡
你愈捌怹
就會愈愛怹
所以後禮拜若是有人欲請你啉咖啡
一个人可能看起來真閉思
抑是表情攏足嚴肅的
你嘛足少看著伊笑
咱可能就感覺
伊對人冷淡
驕傲
無好鬥陣
毋過事實可能毋是按呢
伊可能父母生成就是較烏昏面
有的人是因為身體無好抑是破病
會當做的真有限
毋過咱可能因為毋知影伊的情況
就感覺伊誠貧惰
毋過耶和華知影伊
已經盡力咧做矣
有的人是
足活骨足有體力
不時都看伊咧做啥物服務
咱敢會感覺伊是想欲展風神
互人知影伊做了足好
可能伊從細漢父母就是按呢教伊的
伊就是按呢
盡力咧為耶和華服務
我做探訪的時
捌去過一个會眾
我一直聽著人咧講一个姊妹
怹攏會按呢講伊
伊講伊家己破病矣
毋過阮攏會佇超市看著伊呢
伊有彼个氣力去超市買物件
煞講伊無氣力來參加聚會
我就去探望彼个姊妹
佳哉我有按呢做
原來伊致著一種足嚴重的病
身軀一直攏會足疼的
毋過總是有的時陣
身軀較袂遐疼
伊就會把握機會
出去買一寡生活用品
伊一个人蹛
無人給伊鬥相共
身軀咧疼的時
伊就干焦會當倒佇眠床頂
逐家若加給伊鬥相共
較莫批評咧
毋是會較好嗎
就像進前講的
這个演講
毋是欲證明羅得抑是其他啥物人
是毋是一个正義的人
咱只是想欲提醒逐家
只有耶和華了解所有的情況
伊愛每一个兄弟姊妹
伊嘛希望咱會當愛怹
咱若積極看待別人
伊就會足歡喜的
阮相信以後
恁及兄弟姊妹作伙服務的時陣
一定會按呢做的
阮嘛希望恁知影
阮深愛恁每一个人
願恁繼續忠心為耶和華服務
伊一定會大大賜福互恁
這馬
逐家敢想欲知影怹互人派去佗位
總算來到逐家上期待的部分矣
續落來
我會請羅納德·柯贊兄弟
幫我讀出畢業生的名
阮會頒發畢業證書互怹
首先是阿雅翁兄弟
伊會轉去西非分部
續落來是阿利默內司庫兄弟姊妹
怹會轉去羅馬尼亞分部
奧爾頓兄弟姊妹
怹會去贊比亞分部服務
阿夏沙里爾兄弟
會轉去格魯吉亞分部
比希兄弟姊妹
會倒轉去美國分部
卡佩切兄弟姊妹
會轉去莫桑比克分部
卡萊爾兄弟姊妹
會去葡萄牙分部服務
卡邁克爾兄弟姊妹
會轉去美國分部
卡拉韋兄弟姊妹
會去贊比亞分部服務
科利莫爾兄弟
會去西非分部服務
菲格利兄弟會轉去捷克斯洛伐克分部
藤田兄弟會轉去日本分部
加特巴西兄弟姊妹
會去盧旺達分部服務
吉爾馬兄弟姊妹
會轉去衣索比亞分部
岡薩雷斯兄弟姊妹
會轉去西班牙分部
赫耶格兄弟姊妹會轉去西非分部
赫倫兄弟姊妹會去奈及利亞分部服務
胡戈兄弟姊妹會轉去斯堪的納維亞分部
拉恩加瓦塔蒂尼兄弟姊妹會轉去斐濟分部
拉坦齊兄弟姊妹會去西班牙分部服務
林佳慧姊妹會倒轉去台灣分部
洛佩斯兄弟會去南非分部服務
麥克唐納兄弟會轉去美國分部
毛里兄弟姊妹會轉去南太平洋分部
米塔爾兄弟會轉去東非分部
納爾遜兄弟會轉去斯堪的納維亞分部
奧索古兄弟姊妹會轉去奈及利亞分部
佩拉爾塔兄弟會轉去哥倫比亞分部
沙基奇姊妹會轉去克羅地亞分部
斯皮納兄弟姊妹會去盧旺達分部服務
特雷爾兄弟會轉去美國分部
瓦特庫斯兄弟會轉去芬蘭分部
姜潤兄弟會轉去美國分部
扎普兄弟會轉去美國分部
這馬
給逐家介紹第159屆
全體的畢業生
阮真為恁感覺驕傲
恁這幾个月足認真咧學習
今仔日總算欲畢業矣
阮嘛真歡喜看著耶和華賜福份互恁
這馬請來自南太平洋分部的
艾丹·毛里兄弟
為逐家讀出畢業生的感謝批
阮想欲向中央長老團表達阮上深的感謝
感謝恁互阮遮爾仔寶貴的機會
會當接受基列學校的培訓
阮一來到遮
恁就對阮表現慷慨好客的精神
整個的伯特利家庭嘛對阮表現溫暖的愛心
這互阮對續落來的培訓充滿期待
多謝恁撥出寶貴的時間來幫阮上課
恁教導阮
關心阮
助手及導師
閣有培訓部的所有的兄弟姊妹
攏為阮付出足濟
這深深打動阮
互阮若像親目睭看著咱偉大的導師
基列的課程嘛互阮對耶和華溫柔閣無私的愛
有閣較深的體會
人類的祖先犯罪了後
耶和華馬上採取行動
無惜任何代價幫助人及伊和好
沉思伊佇伊甸園的承諾
閣有伊及亞伯拉罕
大衛所立下的約
以及伊賜下的摩西法典
特別是贖罪日的安排
互阮對伊的愛子獻出的贖價更加感激
阮研讀耶穌佇地上的生活及傳道活動
閣有伊按怎完美的反映天父的特質
阮對耶和華的愛就閣較深矣
耶穌對門徒真有耐心
伊善待嘛尊重婦女
後來伊佇苦刑柱受盡折磨死去
表現出無私的愛
這一切攏互阮真感動
阮偌爾仔感激
有按呢的君王及充滿憐憫的大祭司
研究聖經的預言按怎應驗
互阮對耶和華的承諾閣較有信心
嘛互阮會當勇敢面對未來
比如撒迦利亞先知佇異象看著
四台戰車前往地的四方
耶和華的神聖力量留佇咧北方
這互阮確信
無論是佇古代抑是現代
耶和華的天使大軍
攏會保護上帝的子民
雖然世界的情況不斷惡化
毋過
知影天使及阮同在
互阮閣較有信心
會當佇現在及將來的大患難
攏支持耶和華的統治權
阮上課的時嘛討論著
《用愛心幫助人成為基督徒》這本簿仔
激發阮對傳道的熱心
課程的學生練習
嘛幫助阮學會曉
佇無仝的情況下傳道
需要表現啥物美好的特質
這攏推動阮
抱著上大的愛心
溫情及緊急感
及人分享上帝王國的好消息
因為田地已經熟矣
會當收成矣
過去這五個月
阮從偉大的導師遐學著真濟
阮決心欲給所有學著的攏運用出來
阮嘛決心欲效法咱的頭耶穌基督
阮想欲及恁閣有全球的兄弟姊妹
團結一心
做伙服務
願所有的讚美榮耀
攏歸互咱的天父耶和華
恁的兄弟姊妹
第159屆基列學員
最後
阮閣有一寡話想欲對恁講
敢會記得我拄才留互逐家一个問題
就是後來羅得拄著麻煩的時
亞伯蘭有啥物反應
伊按怎做咧
這馬咱來講第三種顧慮
這嘛可能會妨礙咱及別人有好的關係
這種顧慮就是
足歹給過去無歡喜的代誌放袂記得
咱攏知影羅得搬去所多瑪及蛾摩拉
彼搭遐無偌久
當地就發生戰爭
伊及怹厝內的人攏互人掠去
這个時陣
假使亞伯蘭一直給過去發生的代誌記牢牢
伊可能會按怎想咧
嘿嘿嘿
彼是伊應該的啦
是伊家己做得來的
啥人叫伊當初欲按呢對待我
伊本底會當按呢想
但是伊按怎做咧
這馬請拍開聖經
到創世記第14章
亞伯蘭本來會當有按呢的顧慮
就是如果伊原諒羅得
就等於是講
伊感覺羅得進前按呢對待伊無啥物問題
毋過咱來看一下仔創世記14:14
看覓仔亞伯蘭佇聽著羅得互人掠去以後
伊按怎做
創世記14:14講
「亞伯蘭聽著怹孫仔互人掠去
就𤆬318个佇怹兜出世
受過訓練的僕人去逐敵人
一直逐到但」
亞伯蘭選擇去救伊
對幔利一直逐到但
差不多有200公里遐爾遠
這需要幾若工的時間
而且一路上需要一寡開銷
嘛可能會拄著危險
雖然按呢
亞伯蘭猶是去救伊
咱對創世記14:21-23會當看出
亞伯蘭給羅得救轉來了後
其實伊原本會當得著一寡財物
毋過伊無愛
伊只是想欲幫助羅得爾
無其他的目的
雖然羅得進前的做法可能互亞伯蘭真無歡喜
毋過羅得去互人掠去的時
亞伯蘭煞真願意幫助伊
伊決心給遮的無歡喜的代誌放下
一心想欲促進和睦
若按呢
咱會當按怎學習亞伯蘭的好模樣咧
你敢捌有按呢的經驗
你佇某一件代誌及大多數的人的想法無仝
後來你讓步
照怹的想法去做
結果無蓋好
這个時陣你敢會想講
你看我早就給恁講過矣
抑是咱可能會給別人講
我一開始並無贊成彼个做法
咱攏做過這款代誌
咱愛給心中的不滿放下
愛向亞伯蘭學習
就算有一寡決定你無同意
嘛愛盡力支持逐个人的決定
若是別人給代誌舞害去
嘛愛向亞伯蘭學習
毋好批評毋好怪別人
愛表現謙卑
愛盡力幫忙收煞
為啥物咧
因為按呢做會促進和睦
咱盡力按呢做
就會當及上帝有和睦的關係
這才是咱上看重的代誌
今仔日
咱討論著三个顧慮
咱攏會當向亞伯蘭學習
伊真努力促進和睦
伊毋驚別人看伊軟弱
毋驚互人偏
嘛毋驚給過去無歡喜的代誌放下
伊敢有因為做遮的代誌來食虧
伊促進和睦
羅得敢有感激伊
老實講
咱毋知影
因為聖經無講
拄才斯普萊恩兄弟的演講
嘛有講著這點
毋過這並無重要
因為亞伯蘭毋是因為這个原因
才追求和睦的
按呢是啥物原因咧
聖經兩改記載
亞伯蘭真想欲及羅得保持和睦的關係
而且伊嘛有採取實際的行動
值得注意的是
伊兩改按呢做了後
耶和華攏有賜福份互伊
咱若看創世記的13章及15章就會知影
耶和華這兩改攏向亞伯蘭表明
伊足愛伊
嘛認可伊
這才是亞伯蘭想欲愛的
伊想欲佇咧到祭壇前的時
及上帝有和睦的關係
伊嘛真正得著伊想欲愛的
有時陣
你可能感覺欲保持和睦足無簡單的
這可能發生佇伯特利
抑是發生佇會眾
嘛有可能發生佇厝內
你應該按怎做咧
愛給心中的顧慮放下
謙卑的去揣對你不滿的人
盡力及伊和好
欲按呢做敢有簡單
無簡單
咱按呢做
對方敢一定會有好的反應
嘛無一定
毋過耶和華攏有看著
所以咧
你就會當轉去祭壇前
獻上你的禮物
耶和華會佇遐等你
伊會足歡喜接受你的禮物
為啥物
因為你已經盡力和別人保持和睦的關係
第159屆基列學校的畢業生
阮非常的愛恁
嘛會為恁祈禱
無論恁去到佗位服務
願耶和華攏賜福分互恁
真緊
你就會當佇jw.org網站
及JW Library®app觀看畢業典禮其他的節目
節目的最後
咱來去澳洲看覓咧
澳洲的面積誠大
伊是世界上地勢上平的大陸
嘛是南極以外上焦燥的大陸
澳洲這个名是對拉丁語來的
意思是猶無人知影的南方大陸
遮會當揣著足濟美麗的寶石
比如白色的蛋白石
澳洲是世界上其中一个文化上多元的國家
遮的居民來自270外个無仝的民族
超過四分之一的人攏是佇其他的國家出世的
大部份的澳洲人攏真佮意戶外的活動
比如講怹佮意去衝湧
踢澳洲跤球
怹嘛足佮意佇外口BBQ
也就是烘肉
會當講
烘肉是澳洲人生活的一部份
人客通常嘛會紮一寡食物
所以怹的桌頂攏會有足濟國家
各種各樣的食物
澳洲有一種足有名的食物叫做Vegemite
這是一種咖啡色的醬
是1923年佇墨爾本發明的
伊是用激酒的過程賰落來的酵母做的
這種醬有一種特別的氣味
食起來閣有像肉的味
澳洲人足佮意佇麭抑是餅頂面
抹一重薄薄的Vegemite來食
澳洲人足愛啉咖啡
四分之三的澳洲人逐工攏會啉咖啡
百分之九十五的咖啡店攏是當地的人家己開的
通常怹用的咖啡豆仔
是進口
品質好的豆仔
怹拉花的技術嘛真好
所以怹的咖啡好看閣好啉
1788年
從英國來的第一艦隊
給幾若百本的聖經送來澳洲
到19世紀
真濟原住民的族群攏知影上帝的名
而且給這个名翻譯做家己的語言
就按呢
聖經的信息慢慢仔打動當地的人的心
有一个11歲的查某囡仔叫卡坦亞
伊用家己的母語寫講
永遠攏愛崇拜耶和華
耶和華是創造主
耶和華拯救咱脫離罪
來自澳洲西部的阿瑟·威利斯
足想欲幫助人認捌上帝
1931年
伊19歲的時開始做先鋒
伊嘛去足濟偏遠的所在傳道
1932年
伊開始向原住民傳道
1943年
伊佇平傑利這个鎮蹛落來
佇遐伊熟似一對原住民的翁仔某
詹姆斯及瑪貝爾
怹有17个囡仔
阿瑟為怹規家伙仔主持聖經課程
後來
怹規家伙仔攏受浸
怹是澳洲第一批接受真理的原住民
今仔日
詹姆斯及瑪貝爾的囝孫嘛攏佇真理內底
這馬
澳洲總共有7萬1000外个熱心的傳道員
怹會佇無仝的所在傳道
比如講足媠的海沙埔
偏遠的農場
抑是鬧熱的城市
為著欲向人傳道
怹會學新的語言
比如中文
嘛會好好仔熟似這个語言的文化
墨爾本卡爾頓會眾的兄弟姊妹非常的熱心
怹的傳道地區包括墨爾本繁華的商業中心
遮足熱鬧
文化嘛真多元
會眾的兄弟姊妹來自21个無仝的民族
怹想欲向大家表達溫暖的愛心及問好
阮嘛欲向大家表達阮的愛心
遮是耶和華見證人世界總部的JW電視