JW subtitle extractor

JW电视：2026年6月——第159届基列学校毕业典礼

Video Other languages Share text Share link Show times

欢迎收睇JW电视
2026年3月14号
第159届基列学员
完成咗为期5个月嘅圣经课程
毕业礼嘅节目帮助学员适应改变
做好委派俾佢哋嘅工作
节目提到嘅圣经原则
对我哋都好有用㗎
因为我哋嘅生活都系不断改变㗎
睇嘅时候 请谂吓有啲乜嘢原则
系我哋可以用出嚟㗎
欢迎大家参加呢个毕业典礼
无论你喺现场 定系喺线上
我哋都好欢迎你
而且好开心
见到咁多位即将毕业嘅学员
喺呢5个月嘅课程
你哋真系好勤力呀
我哋睇得出
你哋用尽咗每一分力
所以而家你哋就喺度喇
真系戥你哋开心
另外仲有你哋嘅屋企人、朋友
仲有喺现场同世界各地
收睇呢个毕业礼嘅弟兄姊妹
都一样戥你哋开心呀
哗！真系好兴奋呀
终于嚟到毕业礼喇
你哋系咪等到颈都长埋呢？
我谂都系嘞
我哋知㗎
唔使几耐
你哋就会去到之后嘅工作岗位
除咗可以将呢5个月以嚟
学到嘅宝贵知识用出嚟
你哋仲可以有机会同弟兄姊妹一齐
和睦团结 并肩工作
讲起和睦
你哋会唔会有啲担心呢？
如果你要去新嘅地方服务
你可能会担心
同嗰度嘅人相唔相处到
又或者你系返番去原来嘅地方
又可能会谂
“弟兄姊妹会唔会好留意我
期望我有好大嘅进步呢？”
如果你担心都正常嘅
所以今日我呢个演讲嘅题目系
《努力同人好好相处》
要保持和睦
几时都唔系一件容易嘅事嚟㗎
其实耶稣嘅说话都表明呢一点
佢喺马太福音5:23,24提到一个情况
请留意吓耶稣喺呢段经文裏面
想讲啲乜嘢吖
一齐睇吓 马太福音5:23,24
耶稣同门徒讲
“所以 当你将礼物
带去祭坛嘅时候
如果谂起有个弟兄对你不满
就要将礼物留喺祭坛前面
去同个弟兄讲和先
返嚟先至献礼物”
啲门徒听完耶稣咁讲之后
可能都会谂“边有可能做到呀？”
请谂吓 喺举行节期嘅时候
耶路撒冷根本周围都系人
人山人海咁
如果要你将啲祭物摆喺个祭坛前面先
然之后喺成千上万嘅人入面
揾到嗰个对你不满嘅人同佢讲和
跟住再赶返去圣殿献祭
睇嚟真系冇乜可能做到㗎
我哋喺耶稣嘅说话睇出一个事实
就系有时同其他人保持和睦
真系唔容易
我哋都可以问吓自己两个问题
第一 点解同人好好相处咁难嘅呢？
第二 情况好紧张果阵
可以点样做呢？
要回答呢两个问题
我哋会先讲吓三个
妨碍我哋同人好好相处嘅障碍
我哋会睇吓亚伯兰
即系亚伯拉罕嘅例子
本来佢同侄仔罗得嘅关系
可以变到非常之差㗎
但系有乜嘢
推动佢克服障碍 保持和睦呢？
先讲吓第一个障碍吖
就系惊唔受人重视
有阵时我哋嘅内心会冇咩安全感
冇乜自信
于是一个自然嘅反应就系
好努力咁表现自己
好想话俾人听自己系得嘅
但系好多时嘅结果就系
踩低咗其它人
咁样做亦都破坏咗同人嘅关系
亚伯拉罕佢又点呢？
头先讲嘅障碍有冇影响到佢呢？
请打开圣经去到创世记13章
呢章提到亚伯拉罕同罗得嘅牧人
因为争土地而有拗撬
亚伯拉罕可能睇出
呢件事会影响佢同罗得嘅关系
而家 我哋一齐睇吓
亚伯拉罕点样做吖
创世记13:8,9
经文话
“亚伯兰[即系亚伯拉罕]同罗得讲
‘我哋都系弟兄 唔应该嗌交
我嘅牧人同你嘅牧人都唔应该嗌交
呢片土地唔系喺你面前咩？
请你同我分开啦
你去左边 我就去右边
你去右边 我就去左边’”
亚伯拉罕 佢真系好谦卑呀
佢真系一啲都冇担心
罗得会睇佢唔起
其实亚伯拉罕本来可以
摆出一个高姿态踩低罗得
佢可以同罗得讲
“等等先 而家喺边个带住边个呀？
系你跟住我㖞
耶和华系吩咐我嚟呢度
唔系吩咐你呀”
咁都解决到问题嘅
不过关系就肯定会破裂啰
所以亚伯拉罕冇咁做
虽然佢同我哋一样想受人尊重
唔想俾人睇小
不过佢都保持谦卑
俾罗得拣住边度先
到底系乜嘢
推动亚伯拉罕咁样做嘅呢？
简单嚟讲
佢最在意嘅系耶和华点样睇佢
而唔系其他人点睇
而家佢已经喺
上帝承诺赐俾佢嘅土地入面
系明显嘅证据 证明上帝认可佢
所以只要喺呢片土地入面
佢住边度都冇所谓
呢个亦都系耶稣想强调嘅重点
记唔记得马太福音5:23,24呢？
佢话努力同弟兄讲和
跟住先至返嚟
返嚟献礼物俾上帝
亚伯拉罕佢最重视嘅
就系同耶和华上帝有好嘅关系
得到佢嘅认可
喺亚伯拉罕身上我哋学到嘅
第一样嘢就系
有时我哋可能担心
其他人唔知我哋几叻
唔知道我哋有啲乜嘢职责
或者唔知道我哋受过基列嘅培训
不过等等先
我哋嘅呢种担心会令自己
不知不觉咁踩低咗其他人
结果反而妨碍咗我哋
同其他人有好嘅关系
我哋可以点样克服呢个障碍呢？
就系要好似亚伯拉罕咁样
得到咗耶和华嘅认可就够嘞
仲有啲乜嘢比得上呢件事呢
其他乜嘢福分 乜嘢服务机会
都只不过系次要嘅啫
我地再睇吓
亚伯拉罕同罗得吖
亚伯拉罕乐意让步
咁佢会唔会谂
“罗得都应该要咁样对我㖞
咁咪皆大欢喜啰”
呢个就同第2个障碍有关
就系惊以后俾人攞着数
即系点呢？
当有唔同意见嘅时候
我哋让咗步嘞
可能会担心
对方觉得我哋咁易话为
以后就会不断喺我哋身上揾着数
咁咪好蚀底咯
又讲返亚伯拉罕吖
一齐睇吓创世记13章
头先我哋睇过13:8,9
嗰度讲到亚伯拉罕为咗保持和睦
俾罗得拣先
而家我哋一齐睇吓10至12节吖
经文话“罗得放眼望过去
见成个约旦河区 直到琐珥
都水源充足
（嗰时耶和华仲未毁灭所多玛同蛾摩拉）
嗰一带就好似耶和华嘅园子
又好似埃及地区
于是罗得就拣咗成个约旦河区
罗得将佢嘅营地迁移去东边
佢哋就分开喇
亚伯兰住喺迦南 至于罗得
佢住喺约旦河区嘅城镇之间”
罗得系咪因爲见到亚伯拉罕
咁谦卑、咁易话为
就乘机攞着数呢？
老实讲 成件事嘅细节
我哋根本唔知道
所以我哋唔可以下定论
阵间会有个演讲
讲吓呢一点㗎
大家真系要留心 唔好瞌眼瞓呀
假设 亚伯拉罕完全冇谂过
罗得会咁样拣
跟住觉得自己好蚀底
咁佢就可能会谂
“有冇搞错呀
唉！让佢做乜嘢吖
而家蚀晒底喇
我唔应该对罗得咁好㗎”
佢系可以咁样谂㗎
不过佢实际点样做呢？
经文点样讲呢?
一齐睇吓11节嘅最尾嗰句
同第12节吖 经文话
“佢哋就分开喇
亚伯兰佢住喺迦南”
咁就完咗嘞
佢冇投诉 冇争取啲乜嘢
冇话唔公平
亚伯拉罕唔系表面上扮客气
而系发自内心 谦卑咁对待人
对亚伯拉罕嚟讲
同罗得有好关系
重要过拥有更好嘅土地
咁我哋又喺呢件事学到啲乜嘢呢？
有阵时我哋可能会担心
有啲人因为我哋易相处就嚟攞着数
例如攞咗我哋嘅服务机会
或者抢咗我哋嘅功劳
我哋可能会觉得谦卑同让步
根本冇价值
咁就好难同人有好嘅关系嘞
所以千祈唔好有咁嘅谂法
我哋要好似亚伯拉罕咁
深信耶和华教我哋嘅方式
先至系最好㗎
可能我哋让步之后
当时嘅结果未必系咁好
事情发展唔系我哋谂嘅咁顺利
但系唔紧要㗎 因爲我哋已经
得到上帝嘅认可
同佢有好嘅关系
后嚟 罗得嘅选择
令到佢同家人遇到危险
亚伯拉罕点样做呢？
佢会摆低以往嘅事吖
定系佢会一直放唔低耿耿于怀呢？
我哋会喺节目嘅后部分回答呢个问题
而家又嚟到《基列有约》嘅时间喇
大家都好钟意毕业礼入面嘅呢个环节
你哋肯定都好期待喇
咁多位 想喺传道工作方面
做多啲嘅弟兄姊妹
你哋睇完今集嘅《基列有约》
就会知道有啲咩方法
为耶和华扩大服务
杰里米·克拉克弟兄会主持呢个环节
我哋一齐嚟睇吓吖
欢迎收睇《基列有约》
喺马太福音5:6 耶稣话
“好想正义得到伸张嘅人系有福嘅
因为呢个愿望会实现”
各位年轻人
耶和华会点样帮你实现呢个愿望呢？
就系通过你嘅父母
但系 如果你嘅父母唔系崇拜上帝
咁又点呢？
喺圣经时代
耶和华通过一啲成熟嘅人咁样做
例如大祭司耶何耶大去帮约阿施
又或者撒迦利亚去教导乌西雅
呢一集嘅《基列有约》
一啲基列学员会分享
佢哋细个嗰阵得到乜嘢帮助
令佢哋同耶和华更亲密
更热心传道
而家亦都继续开心咁为耶和华服务
首先我哋邀请嚟自美国嘅
卡拉维弟兄同佢太太
真系好欢迎你哋
我知道你哋喺美国都服务咗好多年嘞
可唔可以同我哋讲吓
你哋嘅成长背景呀？
安特朗先喇
我喺南卡罗来纳州出世同长大
父母都喺耶和华见证人
我喺爸爸身上学到点样仁慈咁对人
我妈妈都经常帮助我
喺崇拜方面定立同埋达到一啲目标
喺会众入面都有其他弟兄好关心我
我记得其中一个弟兄
仲约我同堂阿哥一齐研读箴言
点解拣箴言嘅？
当时我只系得十零岁啫
而箴言裏面有好多实用嘅建议
佢觉得我哋研读呢本书可以睇出
上帝嘅话语系好有智慧㗎
仲有一个弟兄都帮咗我好多
我哋喺同一个会众
后嚟佢去伯特利服务咗几年
返嚟之后佢同我讲
“你真系要试吓去伯特利服务呀”
咁我就认真谂吓
佢仲鼓励我学一种新嘅语言
我就去试吓嘞
会众入面有啲咁关心人嘅弟兄
真系好好呀
雷贝卡你呢？
你又讲吓吖
我系西班牙长大
父母都系见证人
屋企好近分部
所以细个嗰阵我哋间中都会
邀请啲伯特利成员嚟屋企食饭
有咁多伯特利成员嚟你哋屋企
对你有咩帮助呢？
虽然佢哋拥有嘅嘢唔多
但系佢哋需要嘅耶和华都有俾佢哋
呢个令我睇出
耶和华真系一直都有照顾佢嘅仆人
我留意到佢哋成日都好开心
每次见到佢哋都系面带笑容嘅
佢哋嘅喜乐真系感染咗我
我都好想好似佢哋咁呀
真系好呀
咁你嘅父母仲做咗啲乜嘢去帮你呢？
以前我爸爸每晚都会
同我哋三姊妹一齐向耶和华祷告
除咗咁 佢亦都会听吓
我哋系点样同上帝祷告嘅
所以我真系感受到
佢好想我哋将耶和华睇得真实
另外我都记得 妈咪成日都鼓励我哋
多啲同啲先驱一齐 同佢哋做好朋友
因为咁 我哋几姊妹由好细个开始
就钟意一齐去传道嘞
哗 睇嚟你哋两位嘅父母
都真系做得好好㖞
佢哋帮助你哋对上帝更加有信心
热心为佢服务
咁之后呢？
之后点样呀？
后嚟我同安特朗拍拖
当时佢喺伯特利成员 喺纽约服务
不过冇几耐之后
佢收到通知 要去乌干达分部服务
乌干达？
我都估唔到我要去乌干达
不过同时我都好开心
我哋继续拍拖 跟住喺马德里结婚
婚礼之后几日
雷贝卡就同我一齐去到乌干达
做伯特利成员嘞
哦 呢度就系乌干达嗱？
系呀 喺分部影嘅
喺嗰度服务系点㗎？
喺嗰度服务嘅经历真系好难忘
不过要喺咁短时间之内适应咁多转变
真系一啲都唔容易呀
我啱啱结婚 要适应伯特利嘅生活
仲要学习嗰度嘅文化、语言
嗰度食嘅嘢同啲人嘅思考方式
都同我以前好唔同
不过都学到好多嘢㗎
我哋更加了解自己
亦都学识尊重其他人嘅谂法
咁你细个喺箴言学到嘅嘢
咪好有用啰？
系呀 我记得以前讨论箴言19:11
经文话“唔追究过失 就系佢嘅美德”
呢节经文帮助我学到
如果一个人愿意宽恕人
包容其他人做得唔好嘅地方
耶和华会好欣赏佢
喺乌干达嘅弟兄
佢哋就系咁样做嘞
我哋做嘅嘢可能令佢哋觉得唔舒服
不过佢哋从来都冇怪我哋
而系继续用爱心包容我哋
嗰度嘅弟兄姊妹
就好似系我哋嘅屋企人咁
特别系当我哋好挂住屋企人嗰阵
佢哋真系帮我哋好多呀
我学到只要主动去爱人
其他人都会爱我哋
我特别记得一对特派传道员夫妇
佢哋好留意我哋嘅需要
亦都好关心我哋 经常陪我哋
佢哋做嘅嘢令我哋觉得
耶和华就好似喺我哋身边
好关心同埋好爱我哋
咁你喺嗰度服务咗几耐呀？
都有成10年喇
走嗰阵咪好唔舍得？
系呀 我哋两个知道要走
都喊得好犀利呀
喊到飞哩啡呢至啱呀
系呀 所以我哋而家
都有同嗰度嘅弟兄姊妹保持联络
特别系其中几个好熟嘅姊妹
佢哋对我哋好到
我哋都唔记得自己系个外国人
喺走之前
佢哋送咗只山羊同埋一块地俾我哋
等我哋随时都可以返去㖞
欸 有得谂㖞
睇嚟你哋细个嗰阵受到嘅训练
真系好有用
而家你哋都准备好
用呢几个月学到嘅嘢
去帮助更多弟兄姊妹
好多谢你哋接受访问呀
有啲学员嘅父母当中得一个
系耶和华见证人
嚟自台湾嘅林佳慧姊妹就系咁嘞
我哋一齐访问吓佢吖
佳慧 欢迎你呀
多谢
你可唔可以讲吓
你嘅背景俾我哋听呀？
好呀 我喺台湾出世同长大
我10岁嗰阵
妈妈就学圣经同埋受浸
好好㖞 咁你爸爸呢？
爸爸好支持我哋学圣经
不过佢仲未系见证人
所以系妈咪教识我同细佬爱耶和华
亦都训练我哋向人传道
欸 呢个系你妈妈同你
系呀
仲有你细佬？
系呀 喺聚会所
咁你妈咪系点样
帮你越嚟越爱耶和华呢？
嗯 嗰阵时我妈咪一边做全职工
一边做先驱
仲要凑埋我同细佬
不过佢传道嗰阵
真系好热心、好投入
佢好钟意传道㗎
我记得每次见到佢
出完传道返嚟都好开心
仲会同我哋分享嗰日佢传道发生嘅事
同埋遇到点样嘅人
咁我想知啲人嘅反应究竟系点㗎？
嗯 其实喺台湾
好多人嘅生活都好忙
佢哋挂住赚钱
所以对圣经冇乜兴趣
不过我妈咪成日都揾到啲肯听嘅人
我谂呢个系因为佢真系好热心
好关心佢遇到嘅每一个人
呀 我记得《圣经新世界译本》
入面咪有个“圣经入门”嘅
佢好识得用呢部分嘅资料
去同人传道㗎
你妈妈真系充满神圣力量㖞
既然你话你哋嗰度好多人都挂住揾钱
咁嗰度嘅传道工作进展系点呢？
嗯 其实都几好㗎
我有条片就系讲呢样嘢嘅
你想唔想睇吓？
好呀 一齐睇吓吖
“Ilha Formosa”美丽之岛
以前葡萄牙人就系咁样形容台湾
真系好贴切㗎
呢度有壮丽嘅山脉 广阔嘅海岸
不过呢度最靓嘅风景
始终都系嗰啲崇拜耶和华嘅人
1948年 基列学校第8届嘅毕业生
钟志丹弟兄嚟到台湾
佢探访咗好多地方
仲参加咗一场大会
当时差唔多有成300人受浸
真理嘅种子喺呢度不断生长
而家台湾嘅传道员已经超过1万1000人喇
台湾系一个人口好密集嘅地方
净系台北市
就已经有超过200万人住喺度喇
虽然呢度有好多赚钱嘅机会
不过弟兄姊妹都学习
早期特派传道员嘅好榜样
全心全意宣扬上帝王国嘅好消息
细个果阵 我成日听到阿爸阿妈
因为钱而闹交
所以当时我就决心
大个之后要揾好多钱
咁样屋企先会幸福、开心
我17岁嘅时候学圣经
学到一个重要嘅道理就系
耶和华想我哋将来喺乐园生活
而且我都学到
知足嘅人先会开心 有真正嘅快乐
我喺1999年受浸
我同以弘结咗婚之后
都有目标去需要
更多传道员嘅地方做先驱
不过嗰阵我爸爸已经中咗风8年
系个植物人 所以好需要我哋照顾
慢慢我越嚟越钟意我份工
我嘅工作亦都令我好有成就感
所以我有时都会谂
究竟我系咪用
照顾屋企嘅需要嚟做借口
其实系想赚多啲钱享受生活呢？
每次我哋听到弟兄姊妹扩大服务嘅经历
或者佢哋读SKE系几咁开心
我哋都会谂吓
究竟我哋系咪可以调整自己嘅生活
后嚟我嘅爸爸过咗身
我哋就知道机会嚟嘞
我哋决定简化生活
所以我同以弘两个好快就辞咗份工
搬去需要更多传道员嘅地区
亦都开始做先驱
当我同老板辞职嗰阵
佢好大反应
佢好激动咁样同我讲
“以弘 你傻咗呀？
你谂清楚至好㖞 你以后点算呀？
你唔使谂你屋企人㗎？”
但系我好坚定 冇俾佢影响
耶和华真系有赐福俾我哋
所以我好快就钟意咗呢种生活
我哋有好多时间
可以同会众嘅弟兄姊妹一齐
亦都帮咗唔少圣经学生
同耶和华做朋友
我哋真系好钟意呢种生活方式呀
我觉得撒但嘅世界会俾一种假象人
令人觉得可以喺呢度得到好多嘢
好吸引
但系 其实真正有价值嘅系
我哋同耶和华有好嘅关系
我哋可以喺乐园裏面永远崇拜耶和华
先至系最开心㗎
如果我当初有勇气早啲改变
用更加多时间为耶和华服务就好喇
我体会到箴言10:22讲嘅系啱㗎
耶和华赐嘅福真系令人富足
早期嘅特派传道员
喺崇拜方面为弟兄姊妹打好根基
佢哋嘅好榜样
激励咗成千上万嘅弟兄姊妹
献出自己 热心宣扬好消息
真系好开心见到
台湾嘅弟兄姊妹咁热心传道
系呀
佳慧呀 除咗你妈妈之外
系咪仲有其他弟兄姊妹都帮过你呢？
系呀 曾经有一段时间
我唔系好投入崇拜活动
有时仲冇去聚会
嗰时会众有对特派传道员夫妇好好㗎
佢哋好想帮我
见到我冇嚟聚会嘅话
佢哋就会主动关心我
哦 同你哋一齐影相嘅就系佢哋嗱
嗯 佢哋都读过基列㗎㖞
系呀 佢哋喺《直到地极》
嗰个影片度出现过㗎
我真系好钟意佢哋呀
但系后嚟 佢哋去咗另一个地方服务
真系有啲唔舍得
但系耶和华又俾咗另一个朋友我
就系嚟台湾扩大服务嘅一个日本姊妹
佢成日都约我一齐
参与唔同形式嘅传道工作
佢真系好关心你㖞
咁佢仲点样帮你呀？
嗯 当时组织出版咗
《青年人问——点样结交真朋友》呢套影片
佢邀请咗我去同佢一齐睇
当我睇到 剧入面嘅先驱姊妹
帮助一位年轻姊妹嘅时候
我意识到呢位日本姊妹
而家就系咁样帮紧我喇
其实我一直都觉得圣经讲嘅嘢系啱嘅
从来都冇怀疑过
不过自从认识咗
呢位咁关心我嘅姊妹之后
我就开始感受到
耶和华都系一样咁锡我㗎
我觉得好感动
好想同耶和华做好朋友
真系好嘞
你妈妈同其他人咁用心帮你
呢个激励你后嚟点样做呢？
我开始做正规先驱
后嚟去咗英文会众度帮手
可以帮人知道耶和华系好爱佢哋
真系好开心呀
另外见到咁多弟兄姊妹
表现自我牺牲嘅精神
搬去台湾服务
热心支持嗰度嘅传道工作
真系令我觉得好感动呀
我都好同意
可以帮助人认识耶和华
教佢哋圣经 真系好开心㗎
多谢你呀佳慧
我哋会继续为
你同台湾嘅弟兄姊妹祷告
多谢你同我哋分享呀
多谢
我哋当中有好多弟兄姊妹
父母都唔系崇拜耶和华嘅
咁边个帮佢哋呢？
我哋访问吓
嚟自美国嘅道格·特雷尔呀
好欢迎你呀
你最初系点样接触到真理㗎？
讲真吖 我18岁嗰阵
情况都唔系咁好
当时系点㗎？
我唔系细细个就学圣经
我阿妈好辛苦先凑大我哋几个
但系呢 我就唔系好生性喇
成日都群埋啲坏人
个人好暴躁
好易焦虑 又唔开心
情况差到阿妈要好认真咁同我倾吓
嗰阵时我都有返唔同嘅教会
因为我真系好想认识上帝
我去过天主教教会、五旬节会
循道会我都去过
帮唔帮到你呢？
我觉得佢哋讲嘅嘢好空泛
打动唔到我
我记得 嗰次阿妈同我倾完之后
我跪低 喊住咁样向上帝祷告
讲咗好耐 求佢帮我认识佢
解答我心裏面嘅疑问
咁你有啲咩疑问呢？
我想知道上帝叫咩名？
好人点解都会受苦嘅？
点解而家啲宗教咁虚伪嘅呢？
好多人都想揾到呢啲问题嘅答案㗎
后嚟点呀？
我祷完告之后两星期
就有见证人嚟探我喇
不过我哋通常都唔会应门嘅
哦 点解今次又会应门嘅？
今次好唔同
因为敲我门嗰两个姊妹
其中一个系我中学老师嚟嘅
我中四嗰年佢教过我
佢对啲学生好好㗎
我见到系佢 就应门嘞
佢问咗我一个问题
“你知唔知道上帝叫咩名？”
佢俾我睇诗篇83:18
跟住佢又揭去约翰一书5:19
话俾我知全世界都受撒但控制
听到佢咁答我
我真系好开心
从来都未试过咁开心
好好呀
除咗佢之外 仲有冇其他人
帮你喺崇拜方面继续进步呢？
有㗎 我学圣经之后
有一次去咗亚特兰大
我遇到位弟兄
后嚟同佢做咗好朋友
哗 讲嚟听吓吖
嗰阵我已经学咗圣经一年左右
不过我需要学识点样实践真理
而佢真系好关心我㗎
佢系好热心嘅先驱
努力帮我实践真理
就系因为咁
我决定搬去亚特兰大
佢就继续帮我学习圣经
之后我哋做咗7年嘅室友呀
嗯 佢真系你嘅真朋友呀
唔单止关心你
仲关心你崇拜方面嘅需要
咁之后又点呢？
我记得 有一次佢邀请分区监督
嚟同我一齐讨论圣经
呢位分区监督对我好友善
经过呢次讨论之后
我就向耶和华祷告
求佢帮我喺崇拜上定立目标
咦 呢度有幅相㖞
佢哋系边个嚟㗎？
最右边嘅系当初敲我门嘅中学老师
而最左边就系我最好嘅朋友
呢张相喺我受浸嗰阵影㗎
哦 所以系你好朋友
介绍分区监督俾你识嘅
呢个点样帮到你呢？
喺读圣经之前
我有一啲坏习惯
当时已经克服咗㗎嘞
不过仍然影响紧我
所以我好需要有人帮吓我
呢位分区监督 佢好关心我
一直留意我有咩需要
佢教我做一个更加有技巧嘅传道员
佢亦都帮我提升教导同牧养嘅技巧
仲有点样应付自己嘅负面情绪
冇几耐之后
我都成为咗分区监督
好精彩呀
喺真理嘅路上 有咁多人都帮过你
你有咩感觉呢？
我谂起一个圣经人物
奥尼西慕
佢成为基督徒之前
系一个逃走嘅奴隶
嗰阵时奴隶只系主人嘅财产
但系当佢做咗基督徒
使徒保罗就任用佢嚟鼓励会众
我觉得自己就好似奥尼西慕
喺成为基督徒之前冇咩价值
唔值得俾人尊重
但系耶和华就用咗现代嘅使徒保罗
即系我中学老师啦
我嘅好朋友 仲有分区监督
佢哋帮我睇到自己嘅潜质同价值呀
恭喜你达成崇拜方面嘅目标呀
你嘅经历都帮我哋睇出
去关心同帮助年轻人亲近耶和华
系好值得㗎
多谢你讲你嘅故事俾我哋听呀
满足到我哋嘅心灵需要
可以点样推动我哋为耶和华做多啲呢？
而家我哋会访问喺泰国服务嘅一对夫妇
安迪同朱莉娅
安迪 朱莉娅
你哋都喺英国长大㗎㖞
你哋经历咗啲咩事
最后去咗泰国嘅？
其实呢 以前我哋一直都好想
喺英国嘅伯特利服务㗎
但系申请咗之后
一啲回音都冇
我哋觉得有啲失望 有啲迷惘
唔知要点做好
虽然有时我哋嘅目标好清晰
但系结果呢 可能同我哋谂嘅好唔同
咁你哋嗰阵点样做呀？
嗰阵我哋继续向耶和华祷告
然后我哋就有机会去泰国
呢个有需要嘅地方服务
呢个机会点嚟㗎？
其实我阿妹同佢老公
本身已经喺嗰度服务㗎喇
佢哋就鼓励我哋去嗰度试吓啦
嗰阵我哋住喺曼彻斯特
附近啱啱成立咗一个泰语小组
我地加入咗呢个小组
后嚟就搬咗去泰国
嗰度点样㗎？
我哋都好钟意呀
但系嗰阵每6个月
我哋都要返番英国做嘢赚钱
而每次我哋返去
啲圣经学生就要交晒俾人
再去泰国嗰阵
所有嘢好似又要由头嚟过嘞
老实讲吖 我哋嘅心一直
都好想喺英国嘅伯特利服务
所以喺呢两个方向入面
我哋要拣一个嘞
究竟系继续喺泰国服务吖
定系返番去英国继续做正规先驱呢？
喺嗰阵时英国分部都系冇邀请你哋㖞
咁你哋点做呀？
祷告咗好多次之后
我哋决定留喺泰国
点解最后拣呢个嘅？
我哋衡量过呢两个选择
我哋觉得泰国呢个地方
真系好需要多啲传道员去嗰度帮手呀
所以我哋暂时唔考虑自己嘅喜好
专心喺泰国服务
而且对我哋嚟讲
感觉就好似去探险一样
点解话做呢个决定好似去探险咁嘅？
离开熟悉嘅地方
感觉真系好似探险咁
踏出一步 唔顺住感觉去做决定
真系要信赖耶和华先至得㗎
不过我哋咁样做
就同耶和华嘅关系更加亲密
多谢你哋嘅付出呀
好开心你哋做咗探险家呀
喺泰国传道系点嘅呢？
嗰度好好㗎
呢张相系我同朱莉娅
喺曼谷出传道嗰阵影嘅
嗰度好多人想学圣经
可能你都知道
曼谷甚至成个泰国
有好多人都系信奉佛教嘅
但系都有唔少人 特别系后生仔
好想揾到一啲问题嘅答案
所以好多人都想了解圣经
我哋准备咗一套影片呀
咁一齐睇吓吖
欢迎嚟到泰国
呢度系一个好靓嘅地方
周围你都会闻到好香嘅街头小食
泰国人好亲切㗎
所以呢度又叫做“微笑之国”
呢度嘅人真系好热情好客
而且好重视屋企人同朋友
好多人都谂过一啲同人生有关嘅问题
佢哋好想知道
人点先可以生活得开心同有意义
一齐听吓娜鲁蒙同埋卡妮达嘅经历吖
由细到大
佛堂裏面带头嗰啲人
都系讲一套做一套
唔系一个好榜样
我细细个就会谂
如果带头嘅人都唔系好人
点解我哋仲要听佢哋嘅话
咁崇拜佢哋呀？
但系好多时啲人都系同我讲
因为佢哋系僧人
我哋需要尊重同埋跪拜佢哋㗎
不过我觉得佢哋讲嘅嘢一啲都唔合理
我爸爸份人好好㗎
不过佢有一个好大嘅问题
就系佢有严重嘅酒瘾
以前我哋系信佛教嘅
佛经话 如果人有酒瘾
或者饮好多酒
嗰个人就可能要落地狱受苦
我真系觉得好得人惊
我唔想爸爸要落地狱
于是我去咗一间寺庙
想睇吓有咩方法可以帮我爹哋
不过啲僧人话 都冇乜嘢可以帮佢
就算佢做返几多好嘢
都唔可以抵消做过嘅坏事
但系如果你捐多啲钱
咁佢就可以喺地狱过得好啲
佢哋咁样讲 我真系觉得好失望呀
所以我就试吓自己去揾答案
我想知道其他宗教到底系点讲㗎
自细啲大人就教我哋
信就得㗎喇 唔需要问点解
不过我觉得咁样系好迷信
我好想自己相信嘅嘢系有根据
所以我加入咗一啲社交平台嘅群组
同网上面嘅人倾吓同宗教有关嘅话题
我发现好多人都同我一样
想改变自己嘅信仰
有啲人叫我试吓返教会
不过我就有啲惊
有一次我见到本《圣经》
我谂呢本书可能会揾到我想要嘅答案
所以我想借呢本书返屋企睇
但系佢哋话
“你想攞返屋企就要俾钱买”
我就问“要几多钱呀？”
佢哋话“要31蚊美金”
我就谂 可能我可以喺网上面
揾到免费嘅圣经睇㖞
于是我就喺网上面搜寻“圣经”
揿咗入第一个连结
入到去网站之后
我见到上面写住“免费嘅圣经课程”
我心谂 系咪真系免费咁好呀
不过我都照试咗先
后嚟先知道嗰个网站就系JW.ORG
跟住我就填咗个表格
我同我自己讲
如果佢收我钱 我就唔会学
亦都唔会再同佢哋联络
两日之后 有个姊妹打俾我
我问咗佢好多次
“系咪真系免费㗎？”
佢就答我
“真系免费㗎 唔使担心”
有一日我有机会同我上司一齐食饭
食嘢之前我见到佢咪埋眼
我好好奇 好想知道佢点解咁做
佢掰大眼之后
我就问“你头先做咩呀？”
佢话 佢头先祷告多谢上帝
原来佢系一个基督徒
我就同佢讲
“其实我想改变自己嘅信仰
如果我想了解吓其他宗教
可以点做呀？”
佢话“我免费教人圣经㗎
你想唔想试吓？”
我即刻应承咗
我爸爸喺2019年过咗身喇
我真系好伤心 好挂住佢
但系我而家唔惊喇
因为我知道上帝会将佢复活
我一定会喺乐园见返爸爸
可以好似以前噉咁开心
我学到《美好生命》书第27课嗰阵
真系觉得好感动
圣经老师帮我睇出
耶和华真系好爱我哋
耶稣嘅牺牲令我明白到
佢嘅爱唔系只系口头上
而系有实际嘅行动㗎
耶稣先至系我哋应该学习嘅对象
因为佢真系好有爱心
好有自我牺牲嘅精神
真系好开心
可以见到呢两位姊妹学习圣经
同埋开始崇拜耶和华
呢个就系点解我哋一直努力向人传道
因为真理真系可以改变人嘅一生
你哋系咪识嗰两个姊妹㗎？
系呀 我哋啱啱去到泰国嗰阵
娜鲁蒙学紧圣经
我哋喺同一个会众嘅
唔怪得知你咁钟意呢个地区啦
咁你啱啱嚟到泰国嗰阵
其他人点样帮你哋适应呢？
真系有好多人帮过我哋㗎
特别系一对特派传道员夫妇
佢哋都读过基列
佢哋同我哋讲要揾啲时间
了解吓当地嘅文化
亦都要识得平衡工作同生活
同埋都教我哋要将间屋整得舒服
有屋企嘅感觉
咁我哋就可以好好休息
第二日就更加有精神出去传道嘞
有啲咁有经验嘅弟兄姊妹帮我哋
真系好好呀
咁系乜嘢令你哋开始想为耶和华
同佢嘅组织做多啲呢？
可唔可以同我哋分享吓呀？
我阿爸阿妈对我影响好大
佢哋都好爱耶和华
佢哋好仁慈 好慷慨
成日都帮弟兄姊妹
特别系我阿爸
因为以前我成日都同佢一齐
喺建筑队嗰度帮手
谂返起嗰阵都好开心呀
另外喺我嘅会众
有两个长老系我嘅同事嚟㗎
佢哋两个都有份去建筑队度帮手
佢哋嘅榜样都激励我
想喺崇拜方面继续进步
更加爱耶和华
呢个系你？
系呀 我同阿爸阿妈
好温馨㖞
我阿爸阿妈都系我嘅好榜样嚟㗎
细个嗰阵妈咪受浸
几年之后就到我爸爸
由嗰阵时开始
我哋一家就好固定咁样参加崇拜嘅活动
我哋屋企有7个小朋友
所以一啲都唔简单㗎
不过无论发生咩事都好
阿爸阿妈都一定会带我哋参加聚会
同埋出去传道
我记得细个嗰阵
放学返到屋企就会见到阿妈
坐咗喺厨房嗰张台前面研读
朝早起身
通常就见到阿爸喺度睇《守望台》
佢哋同耶和华嘅关系咁好
我都好想好似佢哋咁呀
呢个小朋友就系你呀？
系呀 一张同妈咪影
一张就同爹哋
你哋嘅父母同埋其他成熟嘅弟兄姊妹
真系帮咗你哋好多呀
年轻人真系好需要人帮助佢哋
培养对上帝嘅信心
之后就可以为上帝做多啲嘞
多谢你哋两个同我哋分享呀
耶和华会通过我哋身边嘅人
喺崇拜方面帮助我哋
你哋系咪都有类似嘅经历呢？
耶和华又点样通过你
去鼓励身边嘅弟兄姊妹呢？
各位父母
你哋尽力帮助仔女爱上帝
亦都帮助佢哋喺崇拜方面进步
真系做得好好呀
就算你冇另一半嘅支持
耶和华都一定会帮你
如果你系会众嘅长老
年长嘅弟兄姊妹
或者先驱
你哋要花时间帮助年轻人
咁样做好重要㗎
你哋努力帮助佢哋
将最好嘅献俾耶和华
日后佢哋亦都会帮助其他人咁做
希望你哋钟意今届学员嘅分享吖
下一集《基列有约》再同大家见面
好精彩呀
多谢克拉克弟兄
同埋所有有份参与嘅弟兄姊妹
见到世界各地
原来仲有咁多人想认识真理
我哋嘅心都好似火一样燃烧
我睇完之后真系好想返番去
以前特派传道员嘅岗位吖
不过冇办法喇 唔到我哋拣㗎嘛
唔知大家仲记唔记得喺节目开头嗰阵
我哋讲过亚伯拉罕同罗得之间
发生嘅事呢？
你认为罗得系个点样嘅人呢？
会唔会觉得佢有啲自私呢？
中央长老团成员戴维·斯普莱恩弟兄
会用另一个角度去分析吓
罗得系个点样嘅人
佢发表嘅演讲题目系
《先入为主？不如相信对方》
今日见到你哋
就令我谂返
我喺大约60年前
去到布鲁克林伯特利嗰度
接受基列学校嘅培训
真系好难忘呀
当然同你哋一样啦
5个月之后就毕业喇
所以我谂我应该都几明白
你哋而家有咩感受嘅
今日对你哋嚟讲
一定系一个好重要嘅日子
我哋真系睇得出你哋做得好好
你哋好勤力
耶和华都赐福俾你哋
你哋亦都好清楚参加基列嘅目标
唔系为咗炫耀
自己有几叻 识几多嘢
而系好想更加亲近耶和华
更加爱我哋嘅弟兄姊妹
所以喺呢个演讲
我都会集中讲吓呢一点
我哋点样可以
更加爱我哋嘅弟兄姊妹
首先 我哋知道耶和华上帝
系最清楚了解我哋每一个人㗎
就系因为咁
我哋可以好肯定
喺终结嘅时候 作出嘅判决
一定系公正㗎
佢唔会忽略任何一个细节
佢会记得我哋经历过啲乜嘢
做过嘅所有嘢
耶和华一定会考虑晒所有因素
先至作出判决
不过正如耶和华同撒母耳讲过
佢话“人睇嘅系外表”
即系话我哋睇到嘅好有限
冇可能完全知道所有嘢
所以未必能够正确咁判断一个人
就好似头先杰明讲过
我喺呢个演讲入面
会继续用罗得做例子
我哋会答以下问题
唔好先入为主
反而相信人有好嘅一面
点样帮我哋更加爱弟兄姊妹
我哋喺罗得嘅经历
会学到乜嘢呢？
讲个题外话吖
杰明同我
都用罗得呢个人物嚟做例子
系因为我哋打笼通㗎
使徒彼得都曾经讲过罗得呢个人
就记载喺彼得后书第2章
我哋一齐睇吓呢段经文吖
我哋会睇吓彼得后书2:7,8
留意吓经文点样形容罗得呢个人吖
俾啲时间你哋揾吖
如果你同我一样都系有风湿
啲手指系会郁得慢啲
冇咁灵活㗎喇
彼得后书2:7,8
经文入面讲嘅“佢”系耶和华
经文话“不过佢救咗正义嘅罗得
(嗰啲无法无天嘅人行为无耻
令罗得好心痛
呢个正义嘅人生活喺佢哋当中
每日睇到佢哋无法无天嘅行为
听到佢哋讲嘅嘢
佢正义嘅心就饱受折磨)”
咁系边个认为罗得系正义嘅呢？
系咪使徒彼得自己嘅睇法？
唔系呀
因为呢封信
系佢受神圣力量推动而写㗎
所以彼得系受神圣力量推动
去拣呢个形容词嚟形容罗得㗎
咁即系话神圣力量推动彼得
3次用正义呢个词描述罗得
不过系边个发出神圣力量呢？
系耶和华
所以经文话罗得系正义嘅人
讲咗3次
呢个就系耶和华 话俾我哋知
佢点样评价罗得呢个人
咁我哋又系咪咁样睇罗得
觉得佢系正义嘅呢？
定系我哋只系留意到罗得唔好嘅一面？
有啲人可能话
罗得嘅叔叔亚伯拉罕
俾罗得拣喺迦南地住边度先
罗得就拣咗最好嘅地方
但系佢唔系应该让俾长辈先咩
佢咁做仲唔系自私？
当你读呢段记载
又冇乜细节
得咁少资料
我哋认为罗得系自私嘅
呢个谂法都系可以理解嘅
但系我哋嘅判断
系咪真系啱嘅呢？
会唔会
有啲我哋冇留意到嘅细节
系可以帮我哋
更加全面了解呢件事？
改变我哋对罗得嘅睇法？
讲吓其中一点吖
罗得虽然系亚伯拉罕嘅侄仔
但系佢嘅年纪
大过亚伯拉罕
仲可能大好多添
呢个会唔会改变咗你嘅睇法呢？
伯特利成员就知喇
年资好重要㗎
喺伯特利入面
当有啲房空出嚟嘅时候
我哋会有一个特别嘅方法
去决定边个得到呢间房
我哋唔系抽签
唔系掷银仔
唔系用猜包剪揼去决定
亦都唔会拗手瓜
咁我哋会点呢？
所有有资格申请换房嘅人
可以去嗰啲房度睇吓
当有个人见到间房佢好钟意
佢就可以话俾伯特利办事处知
咁如果两个人睇中同一间
点算呢？
间房就会分俾年资较高嘅嗰一位
即系话间房会分俾
全时服务比较长嘅嗰个伯特利成员
咁得唔到呢间房嘅嗰个人呢
佢唔会走去同拎到房嘅嗰个人讲
“你咁自私㗎
我都想要呢间房
你应该让俾我”
唔会㗎
间房分俾年资高嘅嗰个
系大家都同意嘅做法
假设罗得真系大过佢叔叔亚伯拉罕
甚至大到可以做佢爸爸添
当然呢个只系假设啫
因为喺创世记入面
有啲细节系冇交代清楚嘅
但系有几样嘢我哋可以肯定
就系亚伯拉罕有两个兄弟
哈兰同拿鹤
而亚伯拉罕睇嚟系三兄弟入面
最细嘅嗰个
点解我哋咁讲呢？
你估下亚伯拉罕出世嗰阵
佢爸爸他拉几岁？
系咪60岁呢？
唔系
咁系咪100岁？
唔系
其实亚伯拉罕出世嗰阵
佢爸爸他拉已经差唔多130岁喇
其实都几好笑㗎
亚伯拉罕100岁嗰阵
以为自己太老生唔到仔
但系佢爸爸他拉
就喺130岁嗰阵
生佢出嚟
无论系点
我哋知道亚伯拉罕应该系
三兄弟之中最细嘅
另外我哋可以根据圣经资料计到条数
亚伯拉罕出世嗰阵
佢嘅大哥当时已经60岁喇
佢大哥可能系罗得嘅爸爸
因为佢系三兄弟入面最早死㗎
嗰个年代嘅男人
通常30岁就会做爸爸
所以亚伯拉罕出世嘅时候
罗得嘅爸爸已经60岁
咁当时罗得会唔会已经系一个青少年
甚至系成年人呢？
如果真系咁嘅话
亚伯拉罕俾罗得拣边笪地先
其实可能只系因为罗得嘅年纪
比亚伯拉罕大啫
如果你曾经因为年资申请到一间房
我相信你绝对唔会反对
呢一种方法㗎
可能有人会话
你讲咁多
但系你都冇证据
证明罗得真系比亚伯拉罕年纪大呀
圣经冇讲㖞
就系想你讲呢句
你都证明唔到佢细过亚伯拉罕呀
呢个演讲唔系要证明啲乜嘢
亦都唔系为罗得辩护
罗得只系一个例子啫
演讲嘅重点系
喺我哋对一件事未有全面了解之前
要相信人有好嘅一面
就好似罗得嘅呢个例子咁
我哋知道嘅都好有限
不过又可能会有人话
罗得唔系咁钟意住喺帐篷入面㖞
佢想住得舒服啲
所以先搬去所多玛城之嘛
咁佢仲唔系重视物质咩？
咁讲都未必系错嘅
不过我哋系咪知晒所有嘢呢？
我哋系咪真系知道
点解罗得要搬去所多玛？
系咪真系想过更舒适嘅生活呢？
定系为咗一家人嘅安全呢？
要记得 罗得曾经俾人俘虏过
如果你曾经俾人俘虏过
你仲会唔会想
住喺荒山野岭嘅帐篷入面呢？
定系想住喺有城墙保护嘅地方？
就好似 而家有好多弟兄姊妹
都住喺大城市入面
有时唔系因为佢哋好想
享受舒适嘅生活
而系周围嘅地区都好危险
冇乜选择
关于罗得 彼得知道嘅嘢
同我哋都差唔多
但系彼得话“罗得系一个正义嘅人”
唔系自私㖞
亦都唔系贪图享受
而系正义呀
罗得唔系离开咗所多玛之后
先变成正义嘅
而系佢本身就系一个正义嘅人
佢一定系做咗一啲嘢
令耶和华觉得佢系正义嘅
所以耶和华就喺所多玛救佢出嚟
当然 罗得当初拣最好嘅嗰笪地
都有可能出于自私嘅
或者佢真系想享受生活
先至搬去所多玛
就算系咁都好
佢肯定做过好多其他好嘅嘢
好多耶和华认可嘅事
所以耶和华先叫佢做正义嘅人
只系我哋唔知道所有细节
所以我哋学到
要全面了解 先好落结论
不过有时我哋就系唔会知道所有细节
如果我哋未了解所有事
就落结论嘅话
好容易会搞到自己好尴尬
古代以色列人就系咁喇
佢哋征服咗一部分应许之地之后
吕便部族、迦得部族同玛拿西半个部族
留低咗喺约旦河嘅东面
因为嗰度嘅土地好适合放牧
一齐打开约书亚记22章
睇下发生咩事吖
俾啲时间大家揾吓吖
喺约书亚记第22章
我哋会睇下经文第10节
约书亚记22:10
“吕便部族、迦得部族同玛拿西半个部族
到咗迦南嘅约旦河区
就喺约旦河边
起咗一座坛
一座高大壮观嘅祭坛”
其他部族一听到呢件事之后
就即刻认定佢哋起呢个坛
系用嚟拜假神 背叛耶和华
甚至准备出兵攻打佢哋
但系呢两个半部族其实系点嘅呢？
冇几耐之前
佢哋先至同其他以色列人
一齐并肩作战 征服应许之地
而且仲系冒住生命危险咁做
我哋点知呢？
佢哋系企喺最前线㗎
呢两个半部族
每次打仗都系打头阵
系最危险 最容易战死沙场㗎
佢哋好勇敢
另外冇任何证据
显示佢哋会对耶和华不忠
不过好可惜嘅系
其他以色列人唔相信佢哋
甚至仲讲咗以下呢番说话
就记载喺约书亚记22:16-18
耶和华嘅全体子民话
“你哋点解对以色列嘅上帝不忠呢？
今日你哋为自己建造祭坛
反叛耶和华 背弃耶和华
以前我哋喺琵珥山犯嘅罪仲唔够咩？
耶和华嘅子民因为嗰件事遭受灾祸呀
直到今日 我哋嘅罪仍然未洗净
而家你哋仲要背弃耶和华？
今日你哋反叛耶和华
听日佢就会向以色列全体民众发嬲”
佢哋仲未讲完㗎
仲讲咗好多嘢
当呢十部族
讲完一大轮 停落嚟抖啖气嗰阵
呢两个半部族
先至有机会解释话
我哋嘅祭坛唔系用嚟献祭
而系用嚟提醒约旦河另一边嘅部族
我哋都系同大家一样崇拜耶和华㗎
你想唔想象到
嗰啲大祭司同以色列嘅长老
发现自己搞错咗 有几尴尬呢？
演讲开头
我哋讲过耶和华最清楚了解我哋
所以唔会妄断我哋
同样我哋越了解弟兄姊妹
佢哋嘅家庭背景
佢哋面对嘅问题
就会越积极咁睇佢哋每一位
当我哋知道有啲人克服咗好多困难
先行到今日呢一步
我哋就会更加爱佢哋
弟兄姊妹同佢未信主嘅屋企人相比
已经系做得最好嗰个喇
有时我哋可能同某个人
喺相处上有少少问题
但系如果我哋知道佢嘅家庭背景
例如佢屋企 得佢一个崇拜耶和华
或者佢啲屋企人生活放荡
咁你就会发现 佢系一粒宝石
耶和华好爱呢个人
所以如果有人令我哋有啲唔开心
我哋可以问下自己
耶和华会唔会认为佢系一个正义嘅人？
系正义嘅弟兄？
正义嘅姊妹？
系呀 佢好烦
好唔顺眼
但系喺耶和华眼中
佢可能系正义㗎
所以问题系
我只系睇到佢唔顺眼嘅地方
但系我唔了解佢嘅一切
好多年前喺另一个分部
有一位好后生嘅弟兄
要同一位年长嘅姊妹
合作一段时间
个姊妹同佢老公都系受任命嘅基督徒
佢老公系我见过最温柔最善良嘅人
而个姊妹呢
嗯
对耶和华好忠贞嘅
积极啲睇人吖嘛
但系 如果你做嘅嘢
达唔到呢位姊妹嘅要求
佢就会省到你立立令
我估佢可能唔当自己系一位姊妹
而系大家嘅嫲嫲呀
我好欣赏呢个后生仔处事成熟
佢冇嬲 亦都冇觉得
点解一位姊妹可以咁样同弟兄讲嘢
佢邀请咗呢对夫妇去自己间房
听佢哋讲吓
点样喺禁制期间 为耶和华服务
之后 佢对嗰位姊妹嘅睇法改变咗
而嗰位姊妹
都可能对呢位弟兄嘅睇法
同之前唔一样喇
所以当弟兄姊妹
做咗啲嘢令我哋唔舒服
我哋就应该了解佢哋多啲
花时间同佢哋一齐吖
约下佢哋出传道
请下佢哋饮咖啡
越了解就会越爱佢哋
如果有人下星期约你饮咖啡嘅话
有啲人可能怕丑啲
或者个样睇落好严肃
好少见到佢笑
可能我哋觉得佢好冷漠、骄傲、冇爱心
但系其实未必系咁㗎
有时只系因为佢天生个样生成咁啫
有啲人可能因为健康唔好
或者其他原因 做嘅嘢未必有我哋多
佢可能唔想同人讲自己嘅情况
但系我哋就以为佢好懒
不过喺耶和华眼中
佢已经尽晒力喇
相反 有啲人可能好好精力
做嘢比我哋快 比我哋多
我哋可能就以为佢想出位
想人留意自己
但系可能系佢受过嘅培训、成长环境
令佢觉得咁做
先系将最好嘅献俾耶和华
以前做分区监督
探访过一群会众
我听到有啲人咁样讲一位姊妹
佢哋话嗰位姊妹话自己病
但系又见到佢去超市买嘢㖞
出得街就即系精神啦
但系又唔系时时见到佢嚟聚会㖞
好在我后嚟有去探呢位姊妹
我先知道原来佢有一个好严重嘅病
长期都唔舒服 周身痛
不过有阵时
佢嘅身体都会好一啲 冇咁痛
佢就会即刻出去买啲日用品
因为佢系自己一个住
冇人帮到佢
当好痛嗰阵
佢根本落唔到床
只能够留喺屋企
如果其他人系帮助佢
而唔系批评佢 你话几好呢？
就好似头先讲
呢个演讲
唔系要为罗得
或者任何人辩护
为佢哋证明啲乜嘢
而系要帮助大家记得
只有耶和华 先至清楚了解所有嘢
佢好爱弟兄姊妹
亦都想我哋爱佢哋
我哋相信人有好嘅一面
耶和华会好开心
我哋好肯定
你哋会咁样睇弟兄姊妹
同佢哋并肩工作
各位毕业生
我哋真系好爱你哋每一个呀
你哋忠贞咁为耶和华服务
耶和华一定会赐福俾你哋
好嘞 大家系咪好想知道
啲学员会派去边呢？
嗯 我哋都好期待呀
跟住落嚟
罗纳德·柯赞弟兄
会帮手读出学员嘅名
而家我哋会开始逐一颁发毕业证书
俾每个学员
首先系阿雅翁弟兄
佢会返番西非分部
阿利默内司库弟兄同佢嘅太太
会返番罗马尼亚分部
奥尔顿弟兄同佢嘅太太
会去赞比亚分部
阿夏沙里尔弟兄会返番格鲁吉亚分部
比希弟兄同佢嘅太太会返番美国分部
卡佩切弟兄同佢嘅太太
会返番莫桑比克分部
卡莱尔弟兄同佢嘅太太
会去葡萄牙分部
卡迈克尔弟兄同佢嘅太太
会返番美国分部
卡拉韦弟兄同佢嘅太太
会去赞比亚分部
科利莫尔弟兄会去西非分部
菲格利弟兄会返番捷克斯洛伐克分部
藤田弟兄会返番日本分部
加特巴西弟兄同佢嘅太太
会去卢旺达分部
吉尔马弟兄同佢嘅太太
会返番埃塞俄比亚分部
冈萨雷斯弟兄同佢嘅太太
会返番西班牙分部
赫耶格弟兄同佢嘅太太
会返番西非分部
赫伦弟兄同佢嘅太太
会去尼日利亚分部
胡戈弟兄同佢嘅太太
会返番斯堪的纳维亚分部
拉恩加瓦塔蒂尼弟兄同佢嘅太太
会返番斐济分部
拉坦齐弟兄同佢嘅太太
会去西班牙分部
林佳慧姊妹会返番台湾分部
洛佩斯弟兄会去南非分部
麦克唐纳弟兄会返番美国分部
毛里弟兄同佢嘅太太
会返番南太平洋分部
米塔尔弟兄会返番东非分部
纳尔逊弟兄会返番斯堪的纳维亚分部
奥索古弟兄同佢嘅太太
会返番尼日利亚分部
佩拉尔塔弟兄会返番哥伦比亚分部
沙基奇姊妹会返番克罗地亚分部
斯皮纳弟兄同佢嘅太太
会去卢旺达分部
特雷尔弟兄会返番美国分部
瓦特库斯弟兄会返番芬兰分部
姜润弟兄会返番美国分部
扎普弟兄会返番美国分部
跟住呢？
想唔想一齐见吓所有毕业生呀？
有请咁多位
我哋真系好戥你哋开心呀
见到你哋喺呢个课程里面咁努力
终于嚟到今日 你哋毕业喇
耶和华真系有赐福俾你哋每一个
而家我哋有请
南太平洋区分部嘅艾丹·毛里弟兄
代表全班同学读出感谢信吖
亲爱嘅中央长老团
我哋真系好多谢你哋
可以接受守望台基列圣经学校嘅培训
我哋真系觉得好荣幸
第一日嚟到呢度
你哋同埋成个伯特利家庭
都好热情咁样欢迎我哋
我哋感受到你哋嘅爱心
亦都好期待呢个课程
你哋抽时间同我哋一齐
教咗我哋咁多嘢
仲有你哋嘅助手 各位亲爱嘅导师
同埋圣经教育培训部嘅弟兄姊妹
为我哋付出咗咁多
我哋真系好感动
有你哋嘅帮助
我哋就好似亲眼见到伟大嘅导师咁
呢个课程帮助我哋更加认识耶和华
佢对人唔自私、好有温情同埋爱心
人类犯罪之后
耶和华就即刻安排好
点样同我哋修补关系
深入沉思佢喺伊甸园嘅承诺
同亚伯拉罕仲有大卫立嘅约
同埋喺摩西法典讲到嘅安排
特别系赎罪日
令我哋更加感激耶和华提供赎价
耶稣喺地上做过嘅每一件事
令我哋睇出耶和华嘅爱心
同埋佢嘅美好特质
耶稣对佢嘅使徒好有耐性
亦都好尊重女性 对佢哋好仁慈
而且佢愿意为人类受苦
俾人钉喺苦刑柱上面
佢无私嘅爱 真系令我哋好感动
耶稣咁识得体恤人
有佢做我哋嘅君王同埋大祭司
真系好安心呀
圣经嘅预言加强咗我哋嘅信心
令我哋更加相信
耶和华嘅承诺一定会实现
亦都帮助我哋有勇气
面对将来发生嘅事
例如撒迦利亚嘅异象
提到有4架战车
由两座山之间冲出嚟
拯救上帝嘅子民
呢个异象帮我哋睇出
无论系古代定系今日
耶和华喺天上嘅军队
都会保护上帝嘅子民
就算世界嘅情况越嚟越差
知道有呢啲天使喺我哋身边
我哋都可以有信心
喺大患难嚟到嗰阵
继续支持耶和华嘅至高统治权
另外《用爱心帮助人成为基督徒》
呢本册子真系好实用
帮我哋传道嗰阵更加热心
我哋真系好钟意课程入边嘅示范
呢啲示范帮我哋睇出
传道员喺唔同情况之下要点样做
我哋受到激励
好想将学到嘅特质表现出嚟
同人分享王国嘅好消息
因为“田地已经成熟 可以收割嘞”
伟大嘅导师耶和华上帝
喺呢5个月教咗我哋好多嘢
我哋真系好想将学到嘅用出嚟
我哋会学习耶稣嘅榜样
决心同你哋
仲有世界各地嘅弟兄姊妹
一齐团结一致咁崇拜上帝
荣耀同埋赞美
我哋喺天上嘅爸爸耶和华
你哋嘅弟兄
第159届嘅基列学员
最后我哋有啲说话想同你哋讲㗎
你可能都记得之前问过一个问题
罗得嘅选择令到佢同家人遇到危险
亚伯拉罕知道之后有咩反应
佢点做呢？
呢个同第3个障碍有关
第3个阻碍我哋同人好好相处
保持唔到和睦嘅障碍系乜嘢呢？
摆唔低以往嘅事
罗得去咗所多玛同蛾摩拉之后冇几耐
嗰度爆发咗战争
结果罗得同埋佢一家人
俾嗰啲入侵者捉走咗
如果亚伯拉罕真系好介意
罗得之前拣咗个好地方
耿耿于怀
你估下佢嘅反应会系点？
“哈哈哈 你都有今日喇
嗱 睇吓你
当初你唔好咁自私咪冇事啰”
佢真系可以咁谂㗎㖞
不过佢有冇咁谂呢？
不如睇吓圣经点讲吖
创世记14章
睇之前请谂吓
亚伯拉罕会唔会担心
如果唔同罗得计较
咪即系等于话
罗得之前咁样对自己系啱嘅？
佢会唔会咁谂呢？
不如 睇吓佢听到罗得
俾人捉咗之后点样做吖
我哋一齐睇吓 创世记14:14
经文话
“亚伯兰一听到佢嘅侄仔
俾人俘掳咗
就出动318个喺佢屋企出世
训练有素嘅仆人去追赶敌人
一直追到去但”
佢要咁样做唔容易㗎
因为由幔利去到但
有成差唔多200公里咁远
佢可能要赶几日路
而且亦都要付出一定嘅代价
同面对唔少嘅危险
不过佢一啲都冇犹豫呀
之后喺21至23节 经文提到
因为亚伯拉罕唔单止救咗罗得一家
仲帮咗所多玛王
所以呢个王提议俾啲财物佢
不过亚伯拉罕拒绝咗
因为佢唔系为咗钱去救人
虽然 罗得嘅做法
可能令亚伯拉罕不满
不过佢好谦卑
当罗得因为自己嘅决定
而遇到麻烦嗰阵
亚伯拉罕都即刻去帮佢
因爲佢关心嘅系同罗得嘅关系
所以佢肯摆低以前嘅事
我哋从呢件事学到乜嘢呢？
你有冇试过好似亚伯拉罕咁让步呢？
假设你提出咗个意见
不过大部分人都唔同意
所以你就让步嘞
但喺最终佢哋嘅方法系行唔通㖞
呢个时候 你会唔会同佢哋讲
“一早话咗唔得㗎喇”
或者走去同其他人讲
“呢个唔关我事㗎
我提咗佢哋㗎喇”
系咪似曾相识呢？
我哋千祈唔好 一直喺度耿耿于怀
要学亚伯拉罕
就算你真系好唔同意某一个决定
只要大家决定咗就全力支持啦
真系行唔通嘅话
都要好似亚伯拉罕咁保持谦卑
帮手收拾残局
而唔系喺度讲风凉话
或者埋怨佢哋最初唔听你讲
点解呢？
因为我哋想保持和睦
同人好好相处
我哋尽力咁样做
就可以同耶和华有好嘅关系
呢个先系最重要㗎
今日讲咗3个阻碍我哋
同人好好相处嘅障碍
亦都睇咗亚伯拉罕嘅好榜样
唔惊其他人唔重视佢
唔担心自己会蚀底
同埋唔会对以前嘅事耿耿于怀
究竟亚伯拉罕咁样做
有冇蚀底咗呢？
为咗同罗得好好相处
佢牺牲咗咁多
罗得有冇感激佢呢？
唔知 因为圣经冇讲
斯普莱恩弟兄嘅演讲亦都解释咗嘞
不过呢个唔重要吖
因为亚伯拉罕唔系为咗呢啲原因
保持和睦
咁系为咗咩呢？
请留意圣经记载到
亚伯拉罕两次为咗同罗得保持和睦
实际做咗一啲嘢之后
耶和华都同亚伯拉罕讲咗啲嘢
如果你睇吓创世记13:14
同后少少15章第1节
就会见到耶和华先后两次对亚伯拉罕
表达佢嘅爱同认可
呢个就系亚伯拉罕重视㗎
佢好想去祭坛献礼物
同耶和华有好嘅关系
而佢真系做得到呀
有时要同人好好相处
都真系几难㗎
无论系喺伯特利定系会众
或者喺屋企
都有可能遇到挑战㗎
不过唔好放弃 要保持谦卑
好似圣经讲主动去揾对你不满嘅人
努力克服障碍 同佢和好
容唔容易呢？
唔容易㗎
我哋咁样做
其实对方都未必会领情添
但系上帝呢？
会好欣赏你
跟住呢？
你就可以返番去祭坛嗰度献上礼物
耶和华等紧你㗎
佢一定会好钟意你献嘅礼物
点解？
因为你努力促进和睦
同人好好相处
各位第159届基列学校嘅毕业生
我哋好爱你哋 亦都会祷告
希望你哋无论去边度服务
都可以得到耶和华赐福
毕业礼嘅其他演讲
好快就可以喺JW网站
同埋JW Library App上面睇到
大家记得留意最新资料喇
最后等我哋一齐飞去澳洲
探吓嗰度嘅弟兄姊妹吖
喺地球嘅七大洲入面
澳洲系最平坦嘅大陆
亦都系第二干旱嘅大洲
仅次于南极洲
澳洲呢个名系嚟自拉丁语
意思系“未知嘅南方土地”
呢度有好丰富嘅宝石出产
例如白蛋白石
澳洲系一个文化好多元嘅国家
有成270个种族嘅人住喺嗰度
其中有超过四分之一嘅澳洲人
都唔系喺本地出世嘅
大部分嘅澳洲人都好钟意户外活动㗎
例如同朋友一齐去滑浪
玩澳式足球
同埋烧嘢食
烧嘢食呢一个活动
可以话系澳洲人生活嘅一部分
去其他人屋企嗰阵
大家都钟意带埋食物一齐分享
所以喺呢啲场合
就会食到好多唔同地方嘅菜式嘞
澳洲人成日都食维吉麦酱
呢一款酱系1923年
喺墨尔本研制出嚟
维吉麦酱主要系用酿酒嘅酵母制成
佢嘅颜色系深啡色嘅
味道咸咸哋 好特别㗎
有人形容食落有肉嘅味道
当地人好钟意搽一层薄薄嘅维吉麦酱
喺多士或者饼干上面
好多澳洲人都钟意饮咖啡㗎
有超过七成嘅人
每日都会饮番返一杯
当地95%嘅咖啡店
都唔系集团经营
佢哋通常都会入口优质嘅咖啡豆
仲会喺咖啡上面拉花
所以杯咖啡唔单止好饮 仲好靓添
喺18世纪末
英国嘅“第一舰队”
将过百本圣经运到去澳洲
去到19世纪
上帝嘅名就开始喺当地
被翻译成原住民嘅语言
耶和华被译成Yehóa或者Jehovah
因为咁圣经嘅信息
开始打动当地人嘅心
就好似11岁嘅卡坦亚
用佢嘅母语写低咗以下嘅说话
“要崇拜耶和华 耶和华系创造主
耶和华拯救我哋摆脱罪”
嚟自澳洲西部嘅阿瑟·威利斯
好想帮人认识上帝
喺1931年
当时19岁嘅佢开始做先驱
去到澳洲比较偏远嘅地方传道
1932年佢开始同澳洲嘅原住民作见证
嚟到1943年
阿瑟住咗喺平杰利镇
接触到当地一个原住民家庭
就系詹姆斯同埋佢太太玛贝尔
佢哋有17个小朋友
好多都有学圣经
呢个家庭系澳洲第一批
原住民嘅传道员
亦都系当时会众嘅主要成员
澳洲有超过7万1000个传道员
当中包括詹姆斯同埋玛贝尔嘅后代
澳洲嘅弟兄姊妹
会去好多唔同嘅地方传道
例如沙滩、农场或者热闹嘅市区
为咗传道 佢哋会学习新嘅语言
例如中文
亦都会努力融入佢哋嘅文化
墨尔本卡尔顿会众嘅弟兄姊妹好热心
佢哋传道嘅地区系墨尔本嘅商业中心
嗰度好热闹
有好多唔同嘅种族同埋文化
呢群会众
由21个国籍嘅弟兄姊妹组成
佢哋好想送上温暖嘅问候俾大家
我哋都好爱你哋呀
呢度系耶和华见证人世界总部嘅JW电视