JW subtitle extractor

Nton, nhos sta preokupadu?
Talvês nhos sta ta pensa sobri:
‘Kuzê ki nu sta spera di nhos?’.
Nhos staba na Jiliade i já-já nhos ta ben forma.
Kel-li é un kuza grandi.
N ta atxa ma el muda-u,
el muda bu vida i manera ki organizason
di Jeová ta ben uza-u na futuru.
I un di kes kuza é ki dja ki nhos dadu txeu,
ta izijidu más di nhos.
I alén di kel-li,
talvês nhos ta ben dadu novus
dizignason i responsabilidadi.
Nu kunfia txeu na nhos.
Nton i gósi, bu sta preokupadu?
Nhos ta xinti pézu di kel-li?
Nhos situason é sima kel di Juzué kantu ki Muizés móre.
Kantu Muizés móre, Juzué bira líder di kel nason.
Nton el éra kel-li ki ta pasaba ku es di riu Jurdon
pa kel téra ki Deus prometeba es
i el tinha ki tomaba es.
Talvês el fika preokupadu.
Pensa na kel-li:
Sô un ómi tinha ki lideraba
un nason interu i tomaba otus nason.
Sin, talvês el fika preokupadu.
Kuzê ki Jeová fla talvês pô-l ta xinti midjór.
Nhos abri nhos Bíblia na Juzué, Juzué 1:2.
Jeová sta pâpia ku Juzué i el fla-l:
“Nha sérvu Muizés dja móre.
Gósi, pripara i trabesa Jurdon,
bo ku tudu kel povu li,
i bai pa kel téra ki N sta ben da povu di Israel.
N ta da nhos tudu lugar ki nhos poi pé,
sima N promete Muizés.
Nhos tiritóriu ta bai di dizértu ti Líbanu
i ti kel riu grandi, riu Eufratis,
tudu kel téra di kes itita, i ti Mar Grandi, na oésti.
Timenti bu sta bibu ningen ka ta pode vense-u.
N ta sta ku bo, sima N staba ku Muizés.
N ka ta dexa-u i nen N ka ta bandona-u.
Ten koraji i ser fórti,
pamodi é bo ki ta ben poi kel povu li
ta erda kel téra ki N jura ses gentis grandi ma N ta daba es.”
I nhos repara versiklu 3 otu bês:
“N ta da nhos tudu lugar ki nhos poi pé.”
Uau!
Ô versiklu 5:
“Timenti bu sta bibu ningen ka ta pode vense-u.
N ka ta dexa-u i nen N ka ta bandona-u.”
Juzué talvês fika ku serteza ma Jeová ta ba djudaba el.
Kel-li éra un grandi dizignason i responsabilidadi.
Es tinha ki ben tomaba un lugar grandi,
nton ta sérba un géra tras di kel otu,
na un sidadi pa kel otu,
di un nason pa kel otu nason.
Kel-la éra un grandi responsabilidadi.
Kuzê ki Jeová ta fazeba pa priparaba el?
Kuzê ki Jeová fla Juzué pa faze?
Odja versiklu 7:
“Sô ten koraji i ten txeu forsa,
i sigi ku kuidadu tudu Lei ki Muizés, nha sérvu, da-u.
Ka bu disvia di el nen pa direita nen pa skerda,
pa bu pode aji ku sabedoria na undi ki bu bai.
Bu ka debe tra kel livru di Lei li di bu bóka.
Bu debe lé-l ku vós baxu dia ku noti,
pa bu pode kunpri ku kuidadu
tudu kuza ki sta skrebedu na el.
Asi, bu ta ten bon rezultadu na bu kaminhu
i bu ta aji ku sabedoria.
N ka fla-u pa bu ten koraji i pa bu ser fórti?
Ka bu dexa medu toma kónta di bo,
pamodi Jeová, bu Deus, ta sta ku bo pa undi ki bu bai.”
Má, más un bês, na versiklu 8,
Jeová ta fla-l pa el ‘lé Lei tudu dia i pa el kunpri-l.
Asi el ta tinha bon rezultadu i el ta ajiba ku sabedoria’
Na komésu nu pode pensa: ‘Kel-li é bon.
Má pa ser sinseru,
el ka tinha ki fazeba más nada alén di kel-li?’
Nhos pensa na kel-li:
El ta ba saíba pa txeu géra,
el ta ba lideraba povu i el ta ba giaba trópas na géra.
Alén di Jeová fla Juzué ma el tinha ki leba Lei,
nhos imajina ma Jeová flaba el si:
“Tudu dia duránti dôs óra,
nhos ten ki ta prátika modi ki nhos debe uza spada na géra.
Tanbê bu debe tra dôs óra pur dia pa bu studa géra,
modi ki bu ta orienta trópas i alguns strateja di géra.”
Jeová ka pidi-l pa el faze kel-li.
Talvês bu pode pergunta: ‘Pamodi?’
Jeová sabia ma el ta ba djudaba kes israelita na géra.
El ta ba lutaba pa es.
Tanbê bu pode pergunta:
‘Modi ki bu ta pripara pa manera ki Jeová ta géra?’
Nton pensa na kel primeru sidadi ki es toma, ki é Jerikó.
Kal ki éra stratéjia di géra kóntra Jerikó?
Jeová fla Juzué pa poi kes trópa pa marxa na vólta di sidadi
djuntu ku 7 saserdóti ku ses buzina di txifri di karneru,
djuntu ku saserdótis ta karega Arka
i trópas ta bai tras di Arka.
Es marxa na vólta di sidadi un bês pa dia duránti 6 dia.
I na sétimu dia es da 7 vólta.
I na sétimu vólta óras ki es obiba son di txifri di karneru,
es debe daba un gritu di géra.
I dipôs, muralha di sidadi ta kaíba na txon
i es ta tomaba kel sidadi.
Kel-li foi strateja kóntra Jerikó.
Bu ka ta atxa un statéjia di géra
sima kel-li na un livri ki é ómis ki skrebe.
Pa nos kel-li ka ta faze sentidu,
má é di kel manera li ki Jeová géra.
Ô pensa na kes otu géra ki Jeová luta pa kes israelita,
sima kantu trópas di Jeozafá bai géra
ku inimigus ki tinha karu di géra.
Jeová fla Jeozafá:
“Géra é ka di nhos má é di Deus.”
Envês di géra, el poi kantoris na frenti di trópas
ta lova Jeová ku kántikus.
Es ka meste lutaba.
Jeová ta lutaba pa es.
Ô pensa na kel ki kontise ku Jidion.
300 trópa pa bai géra kóntra 135 mil trópa.
Pa umanus kel-li ka ta faze sentidu.
Kel-li ka stratéjia di géra ki nu ta
atxa na un livru ki ómis ki skrebe,
má kel-li é manera ki Jeová ta géra.
É klaru ki Jeová sabia di kel-li
kantu ki el pâpia ku Juzué.
El sabia ma el ta ba lutaba pa es.
Nton nu ben lé versiklu 8 otu bês.
Kuzê ki Jeová pidi Juzué pa faze?
1:8, Jeová fla:
“Bu ka debe tra kel livru di Lei li di bu bóka.
Bu debe lé-l ku vós baxu dia ku noti.”
Jeová fla Juzué pa el lé Lei tudu dia i pa el sigi-l.
Pamodi ki Jeová pidi-l pa el faze kel-li?
Séra ki Jeová krê sô manteba el okupadu?
Dja ki Jeová sabia ma el ta ba lutaba pa es,
Jeová staba ta fla-l sô pa el lé Bíblia,
asi pa el pode mante okupadu?
Nau.
Kel ki Jeová staba ta pidi Juzué pa faze éra inportanti.
Kel ki Jeová pidi Juzué pa faze éra un kuza
ki ta ba djudaba povu tinha bons rezultadu na futuru.
Jeová pidi Juzué pa faze un kuza
ki Jeová ka ta pode fazeba pa el.
Talvês nhos pode pergunta:
‘Ten algun kuza ki Jeová ka ta pode faze pa nos?’
Sin, ten sin.
Jeová staba ta pidi Juzué pa sirbi-l di manera fiel,
pa el protejeba se korason, fazeba kel ki é dretu i sigiba Lei.
Jeová sabia ma el ka ta pode
obrigaba Juzué pa fazeba kel-li.
É sô Juzué ki podia fazeba kel-li.
Si Juzué ka fazeba kel-li,
povu ka ta pode tinha bons rezultadu.
Es ta ba mesteba di ajuda di Jeová.
Es ta ba lutaba ku nasons, ki sima Jeová fla,
éra ‘más grandi i más fórti di ki es.’
Sen ajuda di Jeová es ka ta konsigiba.
Nton nhos pensa na kuzê ki ta kontiseba
si Juzué dexaba di ser fiel.
I nu ka meste imajina kel-li.
Nu sabe kuzê ki ta kontiseba
pamodi kontise un kuza sima kel-li
kantu ki es bai ataka sidadi di Ai.
Pamodi Akan foi infiel,
es perde géra i ómis móre.
I Akan éra sô un sinplis trópa.
Imajina si éra Juzué ki biraba infiel.
Juzué, éra líder di nason,
nton si el biraba infiel,
nason interu ka ta tinha bons rezultadu.
Kel ki Jeová pidi Juzué pa faze éra inportanti,
i éra sô Juzué ki podia fazeba kel-la.
El tinha ki ‘protejeba se korason i kontinuaba lial.’
I si el fazeba kel-li povu ta tinha bon rezultadu.
Jeová ta abensuaba es i ta lutaba pa es.
N ta atxa ma kel-li é un lison pa nos tudu
i pa nhos tanbê ki sta forma oji na Skóla di Jiliade.
Pa lugaris ki nhos sta bai,
nhos ta ba resebe novus dizignason.
Nhos ta bai apoia trabadju di Reinu,
nhos ta bai luta pa Jeová.
Má kel géra é ka di nhos é di Jeová Deus.
Pur isu, nhos tanbê nhos ta meste di se ajuda,
di se benson i Jeová ta djuda nhos ten bons rezultadu.
Kuzê ki Jeová flaba Juzué?
El flaba:
‘Nhos ta ben vense na tudu lugar ki nhos poi pé.’
Má kuzê ki bu meste faze?
“Bu ka debe tra kel livru di Lei li di bu bóka.”
Kel-li krê fla:
‘Lé Bíblia tudu dia, faze sima bu prende, proteje bu korason,
i Jeová ta ba sta ku bo; el ta abênsua-u
i el ta djuda-u ten bons rezultadu.’
Nton, bu ka meste fika preokupadu.

Per Christensen: Nhos sta preokupadu? — Formatura di turma nunbru 159 di Skóla di Jiliade