JW subtitle extractor

Inda ben ki téma di es diskursu é
“Kuatu lison ki nu ta prende ku 9.700 ómi”,
envês di “9.700 lison ki nu ta prende ku kuatu ómi”,
sinon nu ka ta saíba di li oji.
Má ken ki éra kes 9.700 ómi i kuzê ki nu pode prende ku es?
Favor, nhos abri nhos Bíblia na Juízis kapitlu 7.
Si dja nhos tene el abértu na kapitlu 7,
nu ta ben lé versiklu 7 djuntu.
Ken ki éra kes ómi?
Juízis 7:7 ta fla:
“Jeová fla Jidion:
‘É ku kes 300 ómi li ki panha agu ku mô i bebe ki N ta salva nhos
i ki N ta intrega kes midianita na bu mô.
Má tudu kes otu ómi debe volta pa kaza.’”
Nton kel stória li é sobri Jidion i kes 300 ómi.
Má nu ka sta ben konsentra na Jidion, nen na kes 300 ómi.
N ta ben pâpia di kes “otu ómi”,
kes 9.700 ómi ki mudadu di dizignason kantu
es mandadu volta pa kaza.
Nton, kuzê ki nu ta prende ku es?
Nhos novu dizignason é djuda
i fortalese irmons na tiritóriu di nhos filial
na un ténpu ki txeu di es ta pasa pa mudansas grandi.
I talvês bo tanbê bu sta ta pasa pa mudansas grandi
ô bu pode ben pasa na futuru:
novu trabadju, novu filial, novu país, novu língua,
ô talvês mudansas na bu vida.
Bu pode fika kontenti ku alguns di kes mudansa li,
má otus pode ser difísil.
Kuzê ki pode djuda-nu adapita i fortalese otus
óras ki es pasa pa mudansa?
Nu ben prende kel-li ku kes ómi.
Modi ki nhos ta atxa ma es xinti ku kel mudansa?
Nu ben poi na ses lugar.
Kapitlu 6 ta djuda-nu intende ses situason.
Kapitlu 6:1 ti 6 ta fla ma dja tinha 7 anu
ki es staba ku medu di kes ataki di kes midianita.
Es ta sukundiba na kavérna. Es tinha poku kumida.
Dja es staba kansadu, preokupadu i póbri.
Na versiklu 14, Jeová fla Jidion pa luta kóntra kes inimigu.
Na versiklu 34 i 35,
el toka buzina i el manda mensajeru pa kes disendenti
di Abiezer, Manasés, Azer, Zebulon i Naftali.
I kes ómi li ta fazeba párti di kel grupu
di 32 mil algen ki djunta pa apoia Jidion.
Es dexa tudu kuza pa tras pa es apoia Jidion.
Un grandi mudansa, es ka staba ta sukundi más na kavérnas.
Dipôs, na kapitlu 7:3,
es dadu oportunidadi di volta pa kaza.
Si es staba preokupadu ô ku medu,
es podia voltaba pa kaza.
22 mil ómi volta pa kaza.
Má kes otu fika. Es ka tinha medu.
Es staba ku vontadi di odja Jeová ta salva se povu
sima el faze na Mar Brumedju i na Jerikó.
Es krê staba la. Es dexa tudu pa tras pa es sta la.
Pa es éra inportanti.
I dipôs? Kontise kel ki nu lé na versiklu 7.
Sikrê ki es staba ku vontadi di sta la,
es fladu pa ‘es volta pa kaza.’
Pamodi?
Sima versiklu 6 ta fla, é pamodi es “poi juelhu na txon” pa bebe agu.
Modi ki es xinti?
‘Nhos da-nu más un xansi. Nunka más
N ka ta poi juelhu na txon pa N bebe.’
‘Kel-li é ka justu.
Ami é más fórti di ki el, más rápidu ki el
i N tene más spiriénsia di ki kalker un di es. N ten ki fika.’
Imajina modi ki es xinti kantu ki es staba ta volta pa kaza,
má kes ómi txoma-s:
‘Ei, nhos dexa nhos buzina i nhos kumida li,
nhos dexa tudu ki nhos ten, i dipôs nhos pode bai pa kaza’.
Modi ki bu ta atxa ma es xinti? Diziludidu?
Bu ta atxa ma es fika tristi?
Éra normal es xinti si.
Es faze sakrifisiu. Es krê staba la.
I kel-li é nos primeru lison:
É normal un algen xinti tristi óras ki el perde
un dizignason ki el gosta.
É ka falta di fé.
Nen un atitudi mariadu.
Kel-li ta mostra ses zelu i ma es ta da valor pa ses trabadju.
Es faze-l di korason. Es faze sakrifisiu. Éra inportanti pa es.
Modi ki nu pode inkoraja-s?
Es ka meste di un algen pa fla-s lógu
di tudu kes vantajen di kel novu mudansa.
Ku ténpu es ta odja kel-la.
Má nu pode obi-s i poi na ses lugar.
Nu pode fla-s ma nu ta da valor pa tudu kel trabadju ki es faze,
lenbra-s ma es ten valor,
ma nu ta ama-s i ma Jeová ta ama-s tanbê.
Nu odja ma é normal xinti tristi óras
ki nu pasa pa mudansas difísil,
má si kel-li kontise ku nos, nu ka krê kontinua tristi.
Nton, kuzê ki pode djuda-nu?
Nu ben odja kel sugundu lison.
Pamodi ku es mandadu pa kaza?
Éra sô pamodi manera ki es bebe agu mê?
Nu lé Juízis 7:2 i nu ben odja pamodi ki es mandadu pa kaza.
“Jeová fla Jidion: ‘Bu tene trópas dimás djuntu ku bo
pa N intrega midianitas na bu mô.
Israel pode ingaba na nha kusta i fla: “N vense ku nha própi mô.”’”
Nton pamodi ki es mandadu volta pa kaza?
Pa kes trópa fikaba poku,
asi es ta odjaba ma é Jeová ki djudaba es ganha kel géra.
Es mandadu bebe agu sô pa disidi ken ki ta fikaba.
Má más inportanti éra daba Jeová glória.
Si kes ómi staba la pamodi es krê daba Jeová glória,
sikrê na komésu es pode xintiba tristi,
dipôs es ta fikaba kontenti pamodi volta pa kaza
ta daba Jeová mutu más glória
di ki kalker kuza ki es podia fazeba na géra.
Kel-li é nos sugundu lison:
Nu ten ki lenbra ma nos dizignason prinsipal é da Jeová glória,
i sénpri el ta ser kel más inportanti.
Ka ten nada ki ta pode muda kel-li.
Ningen ka ta pode tra-nu el.
Nunka nu ka ta ser bédju dimás pa kel dizignason li.
Si da Jeová glória é kel kuza más inportanti pa nos,
si el é kel kuza ki más ta da-nu alegria na vida,
nton sikrê alvês nu fika diziludidu,
nu ta kaba pa ser filís ka ta inporta na undi ki nu sirbi.
Kel-li é tirseru lison:
Nos tudu nu ta pasa pa mudansas.
Na es stória kel-li ka kontise sô ku kes 9.700 ómi.
Kuzê ki kontise ku kes 300 ki fika?
Es xinti sábi ku kes pó ku lumi, ku kes jaru
i kantu ki es bai tras di kes midianita.
Má kel-li dura sô un noti.
Juízis 8:28 ta fla
ma dipôs ki es ganha kes midianita,
“téra tevi pas duránti 40 anu.”
Versiklu 29 ta fla ma ti mésmu Jidion ‘volta pa kaza i el fika la.’
Nos tudu ta pasa pa mudansa.
Nton, kuzê ki pode djuda-nu kontinua filís si nos dizignason muda?
Uns misionáriu ki dja tinha uns 30 anu ta sirbi na Burkina Fasu
xinti tristi kantu es dexa ses dizignason.
Má es fla: “Ka ta inporta si bu gosta di bu dizignason
ô si bu ta atxa-l difísil,
konsentra na kes kuza bon i xinti alegria timenti bu sta na el.”
Pa djuda-nu intende midjór, N krê konta nhos un stória.
Un jóven ki txomaba Kenneth tinha sonhu
di trabadja na Betel désdi pikinoti.
Un dia, el konvidadu pa trabadja na Wallkill.
El gostaba txeu di trabadja na Betel,
má dipôs el tevi un prubléma di saúdi i el tevi ki volta pa kaza.
El fika tristi pamodi el krê kontinuaba na Betel.
El fla ma tudu dia el ta xintiba vontadi di volta pa Betel.
Tudu dia el ta oraba pa el volta.
Nhos sabe kuzê ki kontise?
Sinku anu dipôs, el volta pa Betel.
Má el fla ma óras ki el ta odja pa tras
ten sô un kuza ki el ta rapende di el.
El ta rapende di ka tra ténpu pa pruveta
di kel priviléjiu spesial ki el tinha,
di ser pioneru djuntu ku se mai i se irman.
Lenbra ma kada dizignason ten ses benson,
ti mésmu kes dizignason más difísil.
Da valor pa kes benson timenti bu tene es.
Nu ben odja kel kuartu lison, i talvês kel-li é kel ki más N gosta.
Kes 300 ómi toka buzina,
kebra jaru i kes midianita kumesa ta fuji.
Kuzê ki kontise dipôs?
Nu volta pa kapitlu 7:23:
“Kes ómi di Israel di tribu di Naftali,
di Azer i di tribu di Manasés txomadu
i es bai tras di kes midianita.”
Pamodi ki kel-li é inportanti?
Bu ta lenbra di kes tribu li?
Sima ki nu lé na versiklu 6,
alguns di kes ómi txomadu di kes tribu li,
i é pa la ki es volta kantu ki es mandadu pa kaza.
Inda tinha kuzas inportanti pa faze.
Es txomadu pa bai tras di kes midianita,
má es meste staba prontu pa adapita.
Kel-li é kuartu lison:
Kes kuza ki organizason meste pode muda.
Nton sta prontu pa adapita i pa trabadja
di korason na undi ki meste.
É verdadi ma alvês nu pode fika diziludidu ku alguns mudansa,
má ka bu dexa kel-li pô-u ta fika dizanimadu.
Kontinua ta mostra umildadi sima sénpri bu faze,
pamodi Jeová ta fika kontenti ku kel-li.
Asi el ta kontinua ta uza-u, ka ta inporta kuzê ki kontise.
Nton, kuzê ki nu prende ku kes 9.700 ómi?
Kontinua ta poi na lugar di kes ki sta pasa pa mudansas.
I si bu sta pasa pa mudansa, konsentra na kel ki sta pa frenti,
konsentra na kes kuza bon i fika kontenti ku es.
I nunka ka bu skese ma bu dizignason prinsipal é da Jeová glória.
I kontinua disididu na faze kel-li pa tudu ténpu.

D’Arcy MacEwan: Kuatu lison ki nu ta prende ku 9.700 ómi — Formatura di turma nunbru 159 di Skóla di Jiliade