JW subtitle extractor

Ezekias foi un di kes poku rei bon
ki povu di Jeová tevi.
Jeová ta amaba Ezekias
i el faze alguns milagri pa djuda-l.
Má tevi un momentu ki Jeová dexa-l disidi el sô.
2 Krónikas kapitlu 32 ta mostra
kuzê ki kontise antis ki kel-li.
Na versiklu 24 ta fla ma
Ezekias fika duenti i el staba kuazi ta móre,
nton el faze orason pa Jeová.
Má na fin di versiklu ta fla
ma Jeová “responde-l i da-l un sinal.”
Kal ki éra sinal?
Éra un sónbra ki volta pa tras.
Kel milagri li involve sol ku téra.
Si na séu di Jiruzalen staba ta parse ma sol volta pa tras,
talvês kel-li kontise na tudu lugar,
ti na kes lugar ki es ta adoraba sol,
sima Babilónia.
Versiklu 31 ta fla ma
kes prínsipi di Babilónia manda ses mensajeru
pa ba pergunta-l sobri kel sinal ki kontiseba na país.
Kuzê ki nhos ta atxa ma kontise na kel runion?
Kes algen ki ta adoraba sol na Babilónia,
talvês leba Ezekias prezenti,
mostra-l ruspetu,
i es dimira-l.
Modi ki Ezekias ta reajiba?
Jeová krê odjaba kel-li.
Repara kuzê ki Jeová faze dipôs.
Versiklu 31 ta fla:
“Deus verdaderu dexa Ezekias disidi el sô
pamodi Deus krê poba el na próva,
asi pa el sabeba tudu kuza ki tinha na se korason.”
Jeová “dexa-l disidi el sô”.
Kuzê ki kel-li krê fla?
Kel-li talvês krê fla ma Jeová ka da-l ninhun orientason
i nen el ka oferese-l ajuda.
Jeová krê odjaba
kuzê ki el ta fazeba.
Kuzê ki Ezekias faze?
Pur izénplu, Jeová ka manda proféta Isaías pa mostra-l
kuzê ki el ta flaba kes algen di Babilónia.
I pamodi kel-li,
Ezekias mostra kuzê ki el tinha na korason.
El mostra-s tudu kuza ki staba na kaza di tizoru.
Ta parse ma Ezekias staba ta bira orgulhozu,
el krê txomaba atenson pa se kabésa
i el staba ta xinti ma el éra inportanti.
Na ki ténpu ki Jeová odja
pa primeru bês ma Ezekias staba ta bira orgulhozu?
Será ki foi kantu el djunta txeu rikéza
i pesoas kumesa ta dimira-l?
Ô kantu Jeová faze un milagri pa kura-l di se duénsa?
Ô nhos ta atxa ma foi kantu Jeová manda un anju
pa mata 185 mil asíriu na un noti
i pamodi kel-li tudu kes otu nason kumesa ta ruspeta-l?
Bon, nu ka sabe na ki ténpu ki el kumesa ta bira orgulhozu,
má nu sabe kal ki foi rezultadu.
Dipôs proféta Isaías ba atxa-l i el fla-l
ma es ta ba lebaba
tudu kes kuza ki el mostra, pa Babilónia.
Isaías mostra-l
ma el faze un kuza mariadu.
Si bu staba na se lugar, modi ki bu ta reajiba?
Nu ben odja modi ki Ezekias reaji.
Versiklu 26 ta fla:
“Má, Ezekias mostra umildadi
i el para di ser orgulhozu”.
Ezekias odja ma el meste mudaba i el faze kel-li.
Pamodi kuzê ki kontise,
el da kónta ma el staba ta bira orgulhozu
i el intende kuzê ki Jeová krê pa el fazeba.
É interesanti di odja ma Ezekias bira orgulhozu
poku ténpu dipôs ki Jeová vense kes asíriu
i faze un milagri pa kura-l.
Kuzê ki nu pode prende ku kel-li?
Óras ki nu ta faze más na sirvisu pa Jeová
ô óras ki nu resebe un dizignason spesial;
Jeová pode dexa-nu disidi nos sô asi pa el pode odja
kuzê ki nu ten na korason.
Nton, kal ki foi últimu bês ki bu
resebe un dizignason inportanti?
Talvês nhos sta ta pensa na oji,
pamodi nhos ta forma na skóla di Jiliade.
Irmons ta ben odja rezultadu di kel trenamentu,
i pamodi kel-li nhos ta ben resebe txeu ilojiu.
I óras ki nhos ta inxina es pode pensa:
‘Serteza el forma na Jiliade.’
Na komésu nhos pode ka gosta di tudu kes ilojiu li
pamodi nhos prende pensa sima Jeová.
Má sima ténpu ta ba ta pasa,
bu pode kumesa ta gosta di kel-li.
Bu pode atxa-l sábi
i dipôs bu pode bira ta faze kuzas
pa resebe más ilojiu i atenson.
Ti bu pode kumesa ta pensa:
‘N sabe ma N tene kes kapasidadi li
pamodi kel trenamentu ki Jeová da-m.
Má é mi ki el skodje pa trena.
I dja ki el trena-m,
mi ki debe ser primeru na resebe más priviléjiu.’
Si kes pensamentus li kumesa ta kria na bu korason,
talvês bu meste pensa na kel pergunta li:
‘Jeová dja dexa-m disidi mi sô
pa el odja kuzê ki N ten na korason?’
I si bu da kónta ma bu sta ta bira orgulhozu,
kuzê ki bu meste faze?
Bu meste faze kel ki Ezekias ka faze na komésu.
Nu volta pa versiklu 25,
i nu ben odja kuzê ki el ka faze:
“Ezekias ka da valor pa kel bondadi ki fazedu pa el
pamodi se korason bira orgulhozu.”
El meste mostraba gratidon i da valor
pa tudu kes bensons ki Jeová daba el.
Kel versiklu li ta inxina-nu ma orgulhu
sta ligadu ku falta di gratidon.
Di mésmu manera,
nos gratidon ta djuda-nu ser pesoas umildi.
Kel versiklu li ta inxina-nu ma nu ka debe
konsentra na tudu kes kuza bon ki nu faze pa otus,
má nu debe mostra gratidon pa kuzê ki otus ta faze pa nos.
Ki kuzas bon
ki otus faze pa nhos na kes últimu sinku mês?
Pur izénplu, alguns betelita na nhos filial
sta ta trabadja na nhos lugar
asi pa nhos pode pasaba
kes sinku mês li ta studa
na skóla di Jiliade.
I kes betelita li na Patterson
trabadja duru pa bu tra pruvetu
di tudu kel trenamentu ki bu dadu.
I pensa na kel ajuda ki bu resebe na sala di aula.
Talvês bu djudadu intende alguns párti di Bíblia
ki bo sô bu ka konsigi intendeba.
I tudu kel-li foi posível pamodi
kel bon kumida spritual ki nu ta resebe
através “skravu fiel i prudenti”.
I kel-li ka ta kontiseba si Jeová ka daba nhos Bíblia
i se spritu santu pa nu pode intende-l.
Pensa na tudu kes kuza li ta djuda-nu ser gratu.
I gratidon ta djuda-nu ka bira orgulhozu.
Stória di kel éru ki Ezekias faze,
ta parse na Bíblia três bês
i na três livru diferenti.
Má kel-li é primeru kuza ki bu ta lenbra di el
óras ki bu ta pensa na Ezekias?
Ta parse ma nau.
Jeová poi kes skritor di Bíblia pa konsentra
na kes bon kualidadi ki Ezekias tinha.
Pur isu sénpri nu ta lenbra
di se fé i se koraji.
Nu ben odja kuzê ki Jeová ta lenbra di el
óras ki el ta pensa na Ezekias?
Nhos abri nhos Bíblia
na 2 Krónikas 29:2.
Kuzê ki Jeová fla sobri rei Ezekias?
Versiklu 2 ta fla:
“Ezekias ta fazeba kes kuza ki Jeová
ta atxaba ma éra dretu,
sima Davidi, se família, ta fazeba.”
Kel-li é bunitu.
Kel-li é midjór kuza ki Jeová pode flaba
pa un rei na téra.
Fla-l ma el é sima rei Davidi.
Kel-li ta mostra modi ki Jeová ta amaba Ezekias.
Na kel momentu el dexa-l disidi el sô
pa el odja kuzê ki el tinha na korason.
Má dipôs el lenbra di ses bon kualidadi.
Nton, pa nu tirmina,
kuzê ki Jeová ta odja na bo?
Bu pode ten serteza ma si bu
kontinua ta mostra gratidon
pa kes benson ki Jeová ta da-u,
i agradese-l tudu dia,
bu ta bira más umildi
i Jeová ta fika kontenti ku kuzê ki el ta odja
óras ki el dexa-u ‘disidi bo sô’.

Joel Kelly: Jeová dexa-l disidi el sô — Formatura di turma nunbru 159 di Skóla di Jiliade