JW subtitle extractor

Disizons:
désdi mininu ti nu bira algen grandi,
tudu óra nu ten ki toma disizon:
kuzê ki nu ta faze i kuzê ki nu ta fla?
Na tudu ária di nos vida nu ten ki skodje un kuza
i dexa kel otu pa la.
I nos disizon pode traze bons ô maus rezultadu.
Nton, modi ki nu pode toma bons disizon?
Talvês, un ilustrason ki Jizus uza pode djuda-nu.
Na ténpu di Jizus,
óras ki pesoas ta kumeba,
es ta kustuma xintaba na un sofá na formatu di U,
undi ki méza ta fikaba na meiu.
Kes romanu ta txomada es di triclinium,
ki siginifika “sala di três sofá.”
Má, el ka éra sô un sala pa kume.
Pesoas ta xintaba di akordu ku puzison ki es tinha na sosiadadi.
Pur izénplu,
na un di kes sofá ta fikaba kes algen
ki pesoas ta atxaba ma éra ménus inportanti.
Na kel otu sofá, ta fikaba kes algen más ô ménus inportanti.
I na kel últimu, ta fikaba kes algen más inportanti.
Kada lugar ki un algen ta xintaba tinha un siginifikadu diferenti.
Pesoas ta atxaba ma kel ki xinta na ladu skerda
di donu di kaza éra más inportanti
di ki kel ki xintaba na ladu direita.
Pur izénplu, na kel imajen li
nu pode odja na undi ki donu di kaza
ta kustuma xintaba.
Nton, kel lugar más inportanti ki kalker algen pode xintaba
é lógu na ladu skerda di donu di kaza,
sima nu sta ta odja na es imajen.
Nton dexa-m fla nhos un kuza interesanti.
Kada konvidadu ta disidiba
na undi ki el ta xintaba,
má el tinha ki tomaba txeu kuidadu.
Lukas 14:1
ta mostra ma Jizus konvidadu pa bai kume
na kaza di un farizeu na sábadu,
djuntu ku otus ómi ki konxeba Lei dretu.
I es tudu staba di odju na Jizus.
Má kenha ki staba di odju na kenha própi?
Nu ben odja kel-li na Lukas 14:7.
El ta fla:
“Kantu el [Jizus] odja ma kes konvidadu
staba ta skodje kes midjór lugar pa es,
el konta-s kel ilustrason li:
‘Óras ki un algen konvida-u pa un fésta di kazamentu,
ka bu xinta na kel midjór lugar.’”
Pamodi?
Li ki es tinha ki tomaba kuidadu.
“Talvês un algen más inportanti ki bo konvidadu tanbê.
Nton, kel algen ki konvida nhos dôs ta txiga i el ta fla-u:
‘Dexa kel ómi li xinta na bu lugar.’
Nton, bu ta ba xinta na kel últimu lugar ku vergónha.”
Ai!
Repara ma donu di kaza ka fla-u
na undi ki bu debe xinta,
má na undi ki bu ka debe xinta.
Nton nu ten ki disidi más un bês,
i sima Jizus mostra na kel ilustrason,
nu ta kaba pa djobe kel últimu lugar,
asi pa nu ka fika na vergónha otu bês.
Nhos kes 54 ki sta xintadu li na frenti,
nhos toma txeu bons disizon, pur isu nhos sta li.
Má inda nhos ten ki ben toma txeu disizon na futuru.
Nton, modi ki bu pode ten serteza
ma bu ta ben toma bons disizon?
Nu ben lé kel ilustrason na Lukas kapitlu 14 otus bês,
pamodi li nu ta atxa un segredu pa nu toma bons disizon.
Nu ben kumesa na versiklu 10.
Lukas 14:10.
El ta fla: “Má óras ki bu konvidadu,
bai i xinta na kel últimu lugar,
asi óras ki kel ómi ki konvida-u ben, el ta fla-u:
‘Nha amigu, ba xinta na un lugar más inportanti.’
Asi bu ta dadu ónra na frenti di tudu kes otu konvidadu.
Pamodi tudu kenha ki engrandese se kabésa
ta rabaxadu,
i kenha ki rabaxa se kabésa ta engrandesedu.”
Nton, kal ki é segredu pa toma bons disizon?
É umildadi.
Óras ki nu ta ser umildi na toma disizons,
nu ta resebe ónra envês di fika na vergónha.
I Jeová da nhos un prezenti bunitu ki é liberdadi di skodje.
I el krê pa bu uza kel prezenti bunitu li di midjór manera
Pur izénplu, si bu resebe un novu dizignason na un otu país,
modi ki bu ta txiga la?
Bu ta sérba umildi sima Jizus
i bu ta txigaba la na un buru,
ki é un animal di karga?
Ô bu ta txigaba la na un kabalu i bu ta tenta txomaba
atenson pa bu kabésa?
Ô modi ki bu ta xintiba si bu volta pa undi
ki bu staba antis i bu xinti ma
irmons ka sta ta da-u ónra
ô presta atenson na bo sima bu ta spera?
Bu ta volta sima kel fidju ki perde
na kel otu ilustrason ki Jizus konta:
ser umildi i sta prontu pa seta kalker dizignason ki bu dadu?
Ô bu ta atxa ma kel trenu ki bu resebe na Jiliade
ta da-u direitu di resebe más responsabilidadi?
Bu ta fikaba kontenti di skodje kel últimu lugar
ô déntu di bo bu ta kreba kel más inportanti?
Lenbra: é bo ki ta disidi.
É klaru ki, sima nu odja na kes últimu sinku mês li,
nu ten tudu kunfiansa ma nhos ta toma kel midjór disizon.
Nton, kontinua ta uza kalker autoridadi ki bu dadu
pa djuda kes algen ki bu dizignadu pa kuida di el.
Disidi faze tudu kel ki bu ta pode pa djuda otus.
Si bu faze si,
bu ta midjora vida di kes algen ki ta sta na bu vólta,
sima Jizus faze.
Lenbra di kes palavra di Jizus ki sta na Mateus 11:28.
El faze un konviti bunitu li.
Mateus 11:28, Jizus fla:
“Nhos ben pa mi, nhos tudu
ki sta trabadja duru i ki sta kansadu”.
Repara ma Jizus konvida tudu algen,
tanbê kes ki ten prubléma.
El ka pensa ma ta sérba difísil dimás lida ku es.
El ka tenta ivita-s.
Nau.
Envês di kel-li, el fla na versiklu 29:
“Nhos poi nha kanga riba nhos i nhos prende ku mi.”
Na kel ténpu, tinha un kanga ki ta daba
pa un animal karegaba tudu kel pézu.
I tinha un otu kanga ki ta daba pa dôs animal dividiba kel pézu.
Ki kanga ki bu ta atxa ma Jizus staba ta pensa na el?
Nu sabe kal ki el sta papiaba di el.
Kuzê ki el krê flaba é:
‘Nhos ben fika dibaxu di nha kanga, djuntu ku mi.’
Pa nhos irmons, óras ki nhos bai pa nhos dizignason,
ka nhos sô dizigna algen pa faze un trabadju ô un prujétu.
Má nhos trabadja djuntu ku es.
Dipôs Jizus fla:
“Pamodi ami é mansu i umildi di korason.”
Kes palavra li ka sô ta mostra
modi ki Jizus ta sérba, má el éra kel tipu di algen li.
I dipôs el ta fla: “I nhos ta xinti aliviadu.”
I nhos irmans, nhos ta pode djobe oportunidadis
pa poi otus ta xinti aliviadu óras ki nhos ta trabadja ku es?
Nu sabe ma sin.
Nu sabe di kel-li.
Nton, pa tirmina, nu volta pa kel izénplu di Jizus.
Sô sta na prezénsa di Jizus,
poi kes algen ta xinti aliviadu,
ma Jizus ta intende-s i ta da-s valor.
I nhos ki sta ta forma,
nhos pode skodje faze mésmu kuza, si nhos lenbra
i nhos aplika kel lison di triclinium.
Jizus uza kel ilustrason pa djuda ses sigidor odja
ma es meste dizenvolveba umildadi,
ki é un kualidadi bunitu
ki ta atrai pesoas pa bo.
Si nhos dexa umildadi orienta nhos
óras ki nhos ta toma disizons,
nhos ta resebe ónra ka ta inporta na undi ki nhos bai.
Nton, na undi ki bu ta bai xinta?
Lenbra: é bo ki ta disidi.

Richard Chilton: É bo ki ta disidi — Formatura di turma nunbru 159 di Skóla di Jiliade