JW subtitle extractor

Mișto avilean co JW Broadcasting!
Savore camas te cheras lașe alosarimata caște jias po drom o lașio.
Anda codoia, butivar trebul amen lașe îndrumări.
Cado șion va avela te dichas cai arachas-len hai sar daisaras te las amen pala lende.
Va prinjianasa la familia Tshomba cai așundea catar le îndrumări hai cadaia andea lenghe but miștimata.
Va avela te rodas sumnacai ando lil Habacuc
hai va avela te sichioas sar te așias liniștime chiar vi cana nachas prin iech situația zurales phari.
Bucurisaras amen te dichas iech ghies anda i viața ieche phraleschi cai slujil cai si mai bari nevoia,
andi Republica Dominicano.
Abia ajucăras te dichas i emisiunea anda cado șion!
„Jianen pe savo drom te jian?”
Cadai tema sili cărdi pala o Iosua 3:4.
Cadal dumes sas-le phende cana le israeliți trebunas te jian ando Them Promiso pala so ajucărde 40 bărșa.
Cu sea cadala, so trebunas te cheren ci sas ușoro.
Trebulas-len but zuralimos, pachiamos hai tromai caște bucurin-pe catar o Them Promiso.
Tha so trebunas te cheren?
Te citisaras Iosua 3:2-4 caște hachiaras sar ajutil o Iehova pesche manușen, caring te jian ande cadal phare ghiesa.
„Pala trin ghiesa, codola cai sas-le angla lende nachle prin i tabăra hai phende le poporosche:
«Cana va dichena că i arca le Iehovaschi, tumare Devleschi, sili phiradi catar le rașaia leviți,
te tiliaren anda o than cai san hai te jian pala late.
Tha mașcar tumende hai late te mechen cam 2 000 coți; te na pașion mai but latar.
Cadea, va jianena pe savo drom te jian, că ci mai sanas pe cado drom ji acana.»”
Von trebunas te len-pe pala i arca legământului caște jianen caring te jian.
Chiar cana fal-pe că sas ușoro, le israelițenghe sas pharo te cheren cadaia
anda codoia că dichenas caring le manușa imperfecto cai încărenas i arca.
Lengo puchiarimos cărdea-len te cheren numai so camenas von.
So hachiaras de catar?
Vi amen traisaras andel phare timpuri.
Sea le buchia cai întâmplon-pe aghies sicaven că traisaras ande le „palutne ghiesa”
hai pa țâra timpo va astarela o baro necazo cai îngărel co Armaghedono.
Caște așias andi viața trebul te așunas.
Catar va jianasa caring te jias?
Cadea sar andel ghiesa le Iosuasche trebul te das amari sama sar îndrumil o Iehova pesche poporos
hai sar daisaras te las amen pala leste.
Caște hachiaras mai mișto te arachas o răspunso ca trin pușimata:
1. Catar jianas pe savo drom te jias?
2. Sar te așias pe codo drom?
3. Sar te na așias palal?
Te dichas o iechto pușimos: Catar jianas pe savo drom trebul te jias?
Cana le israeliți sas-le ando șuco than angla lende sas o Moise hai o Aaron,
von jianenas pe savo drom camelas o Iehova te jian,
cana po ghies lenas-pe pala o stâlpo norosco hai pi riat pala o stâlpo iagaco.
Tha o Iehova parudea o modo sar delas îndrumări.
Acana, le israeliți trebunas te pachian ciaces că o Iehova conducilas-len prin o Iosua.
O Iosua șiutea angla lende i arca le legământoschi caște dichen penghe iachența că le Iehovastar sile conducime, na lestar.
Cas folosil aghies o Iehova?
Te dichas o răspunso co Matei 24:45:
„Con si ciaces o sclavo fidelo hai prevăzătorii, saves lesco stăpâno șiutea-les opral le slujitori anda lesco chăr
caște del-len haben cana trebul?”
„O sclavo fidelo hai prevăzătorii” con si?
O Corpo de Guvernare le Martorengo le Iehovasche cai si ande cadai poza.
Vo del amen haben spiritualo, îndrumil amen hai ajutil sea le phralen pa i phuv cai nachen prin pharimata.
Citisardeam butivar anda lende andi Biblia.
Tha si mișto te pușias amen sostar pachias amen ande lende?
Ando lil „Bucurisar-tu”, i lecția 54 del duma anda o sclavo fidelo hai prevăzătorii.
Code si dui pușimata anda codola cai sichion:
„Sostar pachias că o Corpo de Guvernare si tela o vast le Isusosco?”
hai „Pachias că o Corpo de Guvernare si «o sclavo fideo hai prevăzătorii»?”
Lașe pușimata si cadala.
So răspunso va avela te des?
Cana sichios corcoro sau la familiasa, va ajutila tut dacă mai diches cadai lecția sau i secțiunea „Rode mai but”.
Sostar si importanto cadaia?
Gândin tumen, i națiunea Israel trebulas te jial pala le manușa cai phiravenas i arca hai te nachen prin iech baro pai.
Caște cheren cadaia trebunas te pachian ciaces că cadal manușa cherenas so phenelas o Iehova.
Sa cadea, dacă camas te așunas catar o Corpo de Guvernare ande cadal phare ghiesa,
trebul te pachias ciaces că o Iehova îndrumil-len prin lesco șiavo, o Isus.
Te dichas o răspunso co iechto pușimos, „Catar jianas pe savo drom te jias?”.
Cadea sar le israeliți, vi amen las amen pala codola cai șiutea-len o Iehova te conducin amen.
Te dichas o duito pușimos: „Sar te așias pe codo drom?”.
Cana primisaras iech îndrumarea cai placial amen las amen sigo pala late.
Tha cana i îndrumarea ci sili cadea sar camas amen si mai pharo te las amen pala late. So va avela te cheras?
Te dichas so exemplo mechlea amenghe o Pavel.
Ando Faptele 21 dichas că o Pavel gălea ando Ierusalimo hai phendea le phurenghe prin so nachlea.
Von sas-le bucurime anda so așunde, tha sas vi iech problema.
Te dichas so phenel-pe anda chichiva evrei ando Faptele 21:21:
„Tha von așunde că phiren dumes anda tute că sicaves sea le iudeien andal națiuni te mechen i Legea le Moiseschi,
hai phenes lenghe te na cheren i circumicizia penghe șiavenghi hai te na mai len-pe pala amare obiceiuri”.
Cade ci phenel-pe că vo cărdea cadaia.
Tha cadal dumes phirenas anda leste.
So phende lesche le phure?
Te dichas ando Faptele 21:24:
„Le tusa cadale murșen, ujiar tut ande iech than lența ceremonialo hai pochin tu anda lende,
caște daștin te randen pengo șăro.
Cadea, savore va jianena că le dumes cai așunde-pe anda tute nai-le ciace, tha phires cadea sar trebul hai vi încăres i Legea.”
So cărdea o Pavel?
Vo ci halea-pe lența.
Sar dichas ando verseto 26, „chiar ando duito ghies, vo hai codola murșa ujiarde-pe ceremonialo”.
Caște sicavel că codol dumes sas numai hohaimata,
o Pavel dea anda pesche love hai cărdea so ci mai
manghelas-pe catar le creștini. Sostar?
Că așilea loialo codolenghe cai o Iehova șiutea-len te conducin.
So sichioas?
Cana si amenghe dini iech îndrumarea cai fal-pe că nai-li lași sau ci sili sar amen camas,
pachias amen ando Iehova hai las amen pala late?
Orisavi îndrumarea cai primisaras-la cai ci uștiarel niciech principio trebul te las amen pala late.
O Iehova jianel sostar del amen iech îndrumarea.
Hai Vo va pochinela amen cana așunas lestar.
Cana așunas catar le îndrumări amare vieți sile salvime.
Ando filmo „Mech andel vasta le Iehovasche chi rig” le phrala andai Africa nașle caște salvin penghi viața.
Vi aghies, but phrala trebun te nașen anda pengo them. Duchal amen o ilo lendar.
Cana dichleam cado materialo video daștil-pe că pușleam amen so avelas te cheras dacă primisardeamas iech îndrumarea
cai fal-pe că na-i lași sau că manghel-pe prea but amendar.
Daisaras te mai dichas cado video cana sichioas sar familia caște dichas so paruimata te cheras.
Sostar si importanto?
Te pușias amen:
Va avela te primisaras vi amen îndrumări claro anda so te cheras hai so te na cheras ando baro necazo?
Sar va avela te primisaras-len?
Pachias că va ajutina amen?
Dacă va avela te pachias amen cu sea ando Iehova hai ando Isus,
va avela te așunas sea o timpo codolendar cai sile angla amende.
Cadea că dichleam pe savo drom trebul te jias hai sar te așias pe leste.
O trinto pușimos sas: „Sar te na așias palal?”.
Len sama te na mechen tumen perade cana nachen prin pharimata sau persecuții.
Sea cadala cheren amen ca țâra po țâra te na mai așunas codolendar cai sile angla amende.
Sar exemplo, cana avel iech îndrumarea catar o Corpo de Guvernare, așunas sigo.
Tha so cheras cana i îndrumarea avel catar le phure sau catar o phral cai vizitil le congregații?
Len prinjianas-len mișto hai dichas lenghe covlimata.
Mai așunas lendar sa cadea de sigo?
Pachias mai dur că le îndrumări sile catar o Iehova?
Trebul te așias pașa i organizația le Iehovaschi.
Sostar si importanto?
Întâmplosardea-pe tumenghe vroiechdata te încăren tumen pala iech mașina hai de iech data te na mai dichen-la
hai pala codoia dean tumari sama că lea-la pe aver drom hai tumen nachlean lestar?
Sostar?
Că așilean prea palal.
Cadea că si zurales importanto te așias pașa i organizația le Iehovaschi.
Sar?
Cana cheras le buchia cai sile amenghe phende.
Sar avenas, te jias ca le întruniri, te citisaras ande fiesavo ghies andai Biblia,
te sichioas corcore andai Biblia, te mangas amen hai te jias andi predicarea.
Cadal buchia va ajutina amen te na așias palal.
Chichiva phrala den duma nasul anda so alosarel te cherel amari organizația.
Anda codoia arăsăn te na mai cheren chanci anda o Iehova hai chiar te nai mai aven ca le întruniri.
Von ci hachiaren că cadea sar andi națiunea Israel,
le buchia ci daștin te aven perfecto anda codoia că nici le phrala cai sile angla amende nai-le perfecto.
O ciacimos si că niciech organizația na-i perfecto.
O corcoro manuș perfecto sas o Isus.
Hai le phrala imperfecto den sea penghi zor te len-pe pala lesche îndrumări.
Iech phral cai vizitil le congregații phenelas butivar:
„Cadai organizația imperfecto si i mai lași pa sea i phuv”.
Hai ciacimos sas-les.
Avel ande amari goghi i relatarea anda Ioan o capitolo 6.
Daștil-pe că chichiva sas-le perade cana o Isus phendea te han anda lesco mas hai anda lesco rat.
Anda codoia but anda „lesche discipoli risaile parpale ca le buchia cai mechlea-len palal hai ci mai găle lesa”.
O Isus pușlea le apostolen: „Ci camen te jian vi tumen?”
So phende von?
O Petru phendea le dumes cai sile ando Ioan 6:68:
„Raia, caste te jias? Tut si tut le dumes cai îngăren ca i viața veșnico”.
„Caste te jias?”
Nici o Petru hai le apostoli ci hachiarde so camlea te phenel o Isus.
Tha von jianenas ciaces că ci sas-len caste te jian.
Cadea si vi aghies.
Te dichas cuci so si amen.
Cai mai daisaras te primisaras i îndrumarea, o haben spiritualo hai i mângâierea
cai o Iehova del-len amenghe ande peschi organizația?
Ande niciech aver than.
Te na mechas ca le buchia cai ci hachiaras-len te cheren amen te na mai dichas cuci so si amen.
So camas te încăras ande amari goghi?
Sea so întâmplol-pe aghies sicavel că traisaras ande le palutne ghiesa hai că mai si iech țâra te jias andi lumea nevi.
Cadea sar le Israeliți, cana arăsle co Iordano, dacă așunas catar le îndrumări așias andi viața.
Si zurales importanto te pachias ciaces că o Iehova îndrumil amen prin o Corpo de Guvernare.
Te na mechas amen perade catar so phenen sau so cheren le coaver.
Te anas amenghe amintea că si amen i bari pachiv te cheras partea anda i organizația le Iehovaschi
chiar cana sili imperfecto, tha chidini.
Hai te pachias ciaces că oriso pharimata va avena pe amende,
dacă va avela te așias andi organizația le Iehovaschi hai așunas latar, va jianasa sea o timpo pe savo drom te jias.
O Loic hai leschi phei Yohari Tshomba, anda o Congo,
dichle chichi de ciaces si cadal dumes cana line-pe pala le îndrumări hai lenghi viața sas salvime.
I drama „Mech andel vasta le Iehovasche chi rig” zuriardea man but
anda codoia că vi me mânra familiasa nachleam prin sa codo pharimos.
Ande 1990 amari viața sas lași.
Le mai but mașcar amende samas tărne tha pala so avilea o războio amari familia nașlea anda o Congo.
Le phrala catar o Betelo phende amenghe sea so trebulas te cheras hai ci sas pharo.
Tha na sea le phrala cărde so sas amenghe phendo, cadea că von hai lenghe familii mule.
Mânre dades ci sas-les destul love te îngărel amen savoren ande iech than caște avas ferime.
Mânri dei, me hai încă ștar anda mânre phrala, tiliardeam hai arăsleam andi Tanzania.
Hai mânro dad phendea amenghe claro o than cai trebulas te arachas amen.
Anda codoia că așundeam lestar, arachleam amen hai samas pale ande iech than.
Cana le șiave anda i drama „Mech andel vasta le Iehovasche chi rig”,
arachle penghe dades hai deia, andem manghe amintea prin so nachleam vi amen.
Da, sas phari i viața andi tabăra de refugiați.
Le soldați sea o timpo daravenas amen hai phenenas că aven pe amende.
Code, sas manghe pharo te zuriarav mânro pachiamos ando Iehova.
Trebuisardea te tiliaras vi andai Tanzania hai găleam ando Mozambic.
Anav manghe amintea că beșleam palal ande iech camiono.
O drom ci sas lașio, șiudelas amen cana opre cana tele hai ji la urmă așileam po than, cadea că camlem te sovav.
Sas o ceaso trin teharaco hai mânro dad phendea amenghe: „Aven tele șiavorralen te citisaras o texto le ghiesesco!”
Sar șiavorre ci placialas amen. Camleam numai te sovas.
Ci daștiv te bâstrav niciechdata că mânro dad ci mechelas le buchia importanto anda o Iehova,
ande orisavo pharimos samas.
Dichlem că mânro dad sea o timpo pachialas-pe ando Iehova.
O manglimos sas leschi viața.
Vo manghelas-pe sea o timpo hai ajucărelas o răspunso le Iehovasco.
Mânri dei pelea nasfali ando Mozambic
hai trebuisardea te tiliaras ando Cape Town andi Africa de Sud caște îngăras-la ca le doctori.
Tha von ci daisarde te ajutin-la hai ande 2003 mulea.
Cadea că amaro dad lea corcoro sama amendar.
Chiar cana sas-lo duchado pala so mulea mânri dei, vo sea o timpo pachialas-pe ando Iehova.
Dea sea peschi zor te bariarel amen ando ciacimos. Camelas zurales but te dichas pale amara deia.
Mânro dad sea o timpo phenelas amenghe iech buchi:
„Cheren mai but anda o Iehova hai na hasaren tumaro timpo andi lumea”.
Adică te das le Iehovas sea so si amen mai lașio. Sea so cheras ande cadai lumea si de ivea.
Vo phenelas sea o timpo: „Cheren mai but anda o Iehova, așen pașa leste hai den-les sea so si tumen mai lașio”.
Pala so terminisardem i școala, astardem o pionierato.
Hai ando timpo so cărdem o pionierato, cărdem buchi vi ca le construcții.
Si man i bari pachiv te cherav buchi co Betelo. Acana, ande fiesavo ghies, dav so si man mai lașio le Iehovasche.
Somas achardi te cherav buchi ca le construcții co Betelo.
Som zurales bucurime că sea mânre șiave sile co ciacimos.
Dichlem o vast le Iehovasco ande mânri viața, chiar vi ande le mai phare ghiesa.
Ci trebulas numai te las sama le șiavorrendar, tha poiechdata ci jiangleam cai trebulas te tiliaras sau so va avela amara viațasa.
Tha o Iehova sas-lo sea o timpo pașa amende. Sea o timpo pachiaiam amen ande leste.
Andai drama „Mech andel vasta le Iehovasche chi rig”
hachiardem că o Iehova na numai dichel tha vi jianel prin so nachas.
Cana așunas le Iehovastar si amen but miștimata. Hai cana ci hachiaras so phenel amenghe, te așunas lestar.
Vo jianel so si mai lașio anda amende.
So șucar phendea o phral Leon Tshomba anda so ajutisardea-les les hai lesche șiaven te așen andi viața
hai te na hasaren pengo pachiamos.
Mai jianen so phendea?
„Niciechdata ci gândisardeam amen te na mai pachias amen ando Iehova”.
I familia Tshomba phendea că o video „Mech andel vasta le Iehovasche chi rig” andea lenghe amintea prin so von nachle.
Zuriaras tumen te dichen pale cado șucar video
hai te len sama sode de importanto si te așunas le Iehovastar cana nachas prin pharimata.
Si mai phares te așunas le Iehovastar cana sam darade hai ci mai jianas so te cheras.
So but buchia sichioas catar o Habacuc, vo așilea liniștime hai așundea le Iehovastar vi andel pharimata.
Abia ajucărav te sichioas sar familia anda o lil Habacuc.
Vi me. Va avela te arachas but sumnacai andi Biblia bi te rodas ande aver thana.
Cames te diches anda so del-pe duma ande cado lil?
Sar te na! Cade phenel-pe că o Habacuc dea cingar anda o ajutorii. „Ji cana, o Iehova?”
Prinjianas mișto cadal dumes. Tha so sas ande lesco ilo?
Te dichas sar sas ande codol ghiesa hai te cheras iech phanglimos le buchianța cai prinjianas-len.
Mișto!
Cade dichas că o Habacuc traisardea cana railas o Iosia sar rege ji cana astardea te rail o Ioiachim.
Anav manghe amintea că le profeți le Iehovasche sas dichle mișto sode timpo railas o Iosia.
Sas iech timpo lașio anda o Habacuc.
Tha iech corcori săgeata parudea sea, o Iosia sas mudardo, arăsle te rain regi nasul,
hai le israeliți arăsle te anen pale închinarea avere devlenghe hai te cheren buchia nasul.
Da, fal-pe că ci parude-pe ciaces. Le profeți sas-le persecutime catar o Ioiachim.
Vo chiar mudardea le Urias. Gândisar tut so avelas ando ilo le profetosco Habacuc dacă vi vo avelas persecutime sa cadea?
Si sar cana sea le buchia jian mișto hai de iech data trebul te nașes caște na aves mudardo.
Anda codoia o Habacuc dea cingar pala ajutorii anda sea pesco ilo.
Da. Tha sar dea-les o Iehova răspunso?
Hmm.
Ando timpo so citis anda o lil Habacuc, dichlean te doșarel-les o Iehova hai te phenel: „Con san tu te pușes man cadaia?”
Hmm. Nici.
Nici me. Sichioas but vi anda so ci phenel o Iehova.
Da, vo așundea-les. Hachiardea so sas ande lesco ilo hai jianglea sostar phendea cadal dumes.
Mai but, o Iehova mechlea te scriil prin so nachlea caște zuriarel vi averen. Oare sar simțolas-pe o Habacuc?
O Iehova si lașio. Hai dichel cuci so camas te phenas lesche anda sea o ilo.
Mm-hmm. Lesa daisaras te das duma oricana. Si sar cana phenelas: „Jianav sostar phendean cadaia.
Va avela te phiravav man tusa cadea sar phiradem man le profetosa”.
Placiaia man but so phenel o Iehova vi ando capitolo 2 o verseto 4:
„Tha codo orta va avela te trail prin pesco pachiamos”.
So șucar!
Chiar scriisardem manghe vareso cade: „Cado verseto nai-lo scriime de ivea. Sicavel amenghe iech baro ciacimos”.
O Iehova phendea pesche profetosche: „Codola orta va traina”.
Hai cadea sas. O Ieremia, o Baruc, o Ebed-Melec hai le recabiți așile andi viața cana sas distrugime o Ierusalimo.
Tha vi le referințe ajutin amen te prinjianas mai but buchia.
Dich, caște zuriarel le anglune creștinen cai nachenas prin pharimata, o Pavel phendea lenghe cadal dumes trin-var:
„O Iehova mechlea scriime cadal buchia anda amende”.
Si sar cana phenelas: „Na bâstăr so phendem caring o Habacuc”.
O Habacuc sas-lo zuriardo anda so phendea lesche o Iehova.
Ando capitolo 3 o verseto 18 vo phenel că „va avela voime ando Iehova” hai anav manghe amintea că,
ande iech închinarea de teharin phendea-pe că te aves voime însemnol vi te „hutes opre bucuriatar.”
So bari buchi! Chiar cana ci parudea-pe leschi situația, vo sas-lo voime anda codoia că pâtărdea pesco ilo angla o Iehova.
Cadea si. O Iehova sas-lo gata te așunel-les hai sas demno pachiamasco anda codoia vo ci mai sas cadea de duchado.
So șucar!
Cadea că, so sichioas catar? Tut so placiaia tut?
Că o Iehova silo gata te așunel amen.
Cadaia ajutil man te șiorav oricana mânro ilo angla leste hai că ci trebul te încărav man parpale
sau te alosarav mișto so te phenav lesche, vo deja jianel so si ande mânro ilo.
O Iehova camel te phenav lesche sea, chiar vi le buchia cai ci avelas te phenav-len varecasche.
So șucar! Camav ca le coaverenghe te na avel pharo te den duma manța.
Cherav cadaia prin so phenav, prin so ci phenav hai sar phiravav man lența.
Camav ca vi tu hai vi le coaver te den duma manța anda oriso.
Hai cana varecon phenel vareso ca i holi, ci camav
te doșarav-les, tha camav te hachiarav sostar phendea.
Cadea si! Vi man placial man că daisaras te pachias amen ando Iehova.
Som siguro că sea so phenel o Iehova anda o viitorii
va pherela-pe. „Codola orta va traina”.
Cado si iech baro ciacimos andai Biblia. Camav vi me te avav cadea de voime sar o Habacuc oriso avelas.
Cana gândiv man ca so cărdea o Iehova andel puraimata, pachiav man sea mai but ande leste
hai ande so vo phenel manghe chiar cana le buchia va jiana sea mai nasul.
Na-i importanto cana avel o sfârșito, si importanto te așias zurale ando pachiamos.
So șucar si că o Iehova camel te pașioas lestar hai te șioas amaro pachiamos ande leste!
Dich so but sumnacai arachleam chiar cana rodeam numai andi Biblia
hai cărdeam phanglimata le buchianța cai jiangleam-len.
Hai încă ci deam duma anda sar sicadea o Iehova răbdarea caring o Habacuc sau sostar ajucărdea-pe vo te avel ortosardo.
Mai si amen but te sichioas.
Hmm, mai si amen timpo te rodas. Pușiav man so sas ande lesco ilo…
„Codo orta va traila prin pesco pachiamos”.
O Habacuc cadea traisardea hai sa cadea daisaras vi amen.
Sar ajutil amen o pachiamos cana trebul te așunas?
O phral William Turner va del amen o răspunso andi închinarea de teharin.
Aghies camas te das duma anda o pachiamos, camas te jianas dacă pachias amen cu sea ando Iehova.
Tha cana rodas mai but anda o pachiamos ande amare lila,
va avela te dichas că si zurales importanto te sicavas pachiamos ando anav le Iehovasco,
andi Biblia, ande leschi organizația hai ande lesco Șiavo.
Tha dacă amen pachias amen cu sea ando Iehova, sostar mai trebul te pachias amen vi ande le coaver buchia?
Mai anglal, te dichas so însemnol te pachias amen cu sea ando Iehova.
Te dichas ande iech than so phenel-pe andi Biblia, andel Proverbe 3:5, 6.
Cade citisaras:
„Pachia tut ando Iehova anda sea o ilo hai na le tut pala chi goghi.
Încăr conto lestar ande sea che riga hai vo va lașiarela che droma.”
Cadal versetea arachas-len andi aplicația JW Library®, ca i secțiunea „Versetea biblico explichime” andi șib gajicani.
Jian ca i pagina principalo, ca i biblioteca, pala codoia „Publicații”, „Serii andal articole” hai „Versetea explichime”.
Jian ji tele hai arachen o lil Proverbe 3:5, 6. Dichen so scriil cade ca o titlo „Pachia tut ando Iehova anda sea chio ilo”.
Ando paragrafo, mai co mașcar, phenel-pe:
„Cadea că, cana pachias amen ando Del, cadaia ci însemnol te las amen pala amaro ilo.
Amen alosaras te pachias amen ande leste anda codoia că pachias că amaro creatorii jianel so si mai mișto anda amende.”
O ciacio pachiamos ci avel anda so simțosaras. Si iech alosarimos.
Amen jianas sostar alosardeam te pachias amen ando Iehova.
Chiar cana si buchia save ci hachiaras-len.
Te dichas iech exemplo andi Biblia hai mangav tumen te pâtren manța co 2 Regi o capitolo 9.
Cade dichas sar o Iehu sas-lo machlo sar rege.
Ande le versetea 1 ji co 3, o profeto Elisei sicavel ieches anda le șiave le profețenghe sar te machel-les.
Hai phenel lesche sea le buchia cai trebul te jianen-len cana va avela te machel le reges.
Pala so o profeto cărdea sea so sas lesche phendo, te dichas so dea duma o Iehu hai le comandanți anda i armata.
Te citisaras anda o 2 Regi 9, catar o verseto 11:
«Cana o Iehu risardea-pe ca le slujitori pesche raiesche, von pușle-les:
„Sea si mișto? Sostar avilea tute cado dilo?”.
Vo phendea lenghe: „Tumen jianen so felo manuș silo vo hai sar del duma.”
Tha von phende: „Te na hohaves amen! Phen amenghe, mangas tut, so phendea tuche”.
Hai vo phendea lenghe: „Vo dea duma manța cadea hai cadea.
Pala codoia mai phendea: «Ita so phenel o Iehova: „Machav tut sar rege opral o Israelo”».»
Te așiavas amen iech țâra. Ji acana dichleam dui buchia.
Iech, le comandanți ci hachiarde so cărdea o profeto.
Cadal buchia fanas-pe lenghe dilivane.
Cu sea cadala, von dine penghi sama că le dumes cai phendea-le o profeto ci avenas varecastar neprinjiando.
O felo sar phiradea-pe o Iehu sicavelas că întâmplosardea-pe iech bari buchi.
Cana o Iehu phendea lenghe so sas lesche phendo, so o Iehova phendea lesche prin lesco profeto,
te dichas so cărde le comandanți ando verseto 13.
«Atunci savore line sigo penghe hureaimata hai șiute-len po trepte, tela leste.
Hai ghilabade co corno hai phende: „O Iehu cărdilea rege!”.»
Chiar cana ci jiangle hai ci hachiarde sea le buchia, von gândisarde-pe ca le buchia cai jiangle-len de mai anglal.
Von dine penghi sama catar avenas le îndrumări hai sigo cărde so phendea o profeto.
Gândin tumen iech țâra,
so daștilas te întâmplol-pe dacă le comandanți ci pachianas le profetos hai lenas-pe pala pengo ilo?
Daștilas te avel perado o Iehu anda lengo phiraimos?
Ando verseto 11 o Iehu sicavel că ci sas cadea de importanto so dea duma le profetosa.
I Biblia ci phenel amenghe sostar o Iehu cărdea cadaia.
Tha vo sas-lo zuriardo cana dichlea că le comandanți sas-le pașa leste
hai pachiaie că so phendea o profeto avelas le Iehovastar.
Mai dur, ando verseto 14, dichas sar o Iehu camlea anda sea pesco ilo te cherel i buchi cai sas leche dini sar rege.
So sichioas catar?
Ande le palutne bărșa primisardeam but îndrumări anda o Betelo hai anda i predicarea
anda codoia că i lumea parudea-pe.
O Iehova jianel so si ande amaro ilo.
Hachiarel că sam darade hai îngrijorime, vi mai but cana ci prinjianas hai ci hachiaras sea le buchia.
Gândin tumen so si ando ilo le Iehovasco cana vi amen, cadea sar le comandați,
pachias amen ande le îndrumări cai aven catar amari organizația hai vi cheras so si amenghe phendo.
Cana alosaras te așunas le îndrumări hai te las amen pala lende, o Iehova bucuril-pe hai dichel amen vi cuci.
Cado phiraimos sicavel că iubisaras le Iehovas hai că pachias amen cu sea ande leste.
Cadaia va avela te ajutil vi codolen de pașa amende.
Hai na-i cadea phralale că savoren sas amen miștimata?
Tha savo si o phanglimos mașcar so dichleam hai o pachiamos,
ando anav le Devlesco, ande lesco Cuvânto hai andi leschi organizația?
Na-i cadea că, cana phenas vareso vi trebul te sicavas că cheras so phendeam?
Jianas că o ilo le Iehovasco bariol cana phenas lesche că iubisaras-les hai că pachias amen ande leste.
Cana sicavas lesche cadaia prin le buchia cai cheras-len amaro amalimos le Iehovasa silo vi mai zuralo.
Cadaia însemnol te pachias amen ando Iehova că vo jianel te cherel mișto le buchia.
Te pachias amen ande lesco Șiav, că vo conducil mișto i congregația.
Te pachias amen vi ando „sclavo fidelo hai prevăzătorii”.
Hai te pachias amen vi ande le phure cai așunen catar le îndrumări.
Cadal phrala sile imperfecto tha cu sea cadala o Iehova pachial-pe ande lende.
Cana alosaras te pachias amen ande lende, cadea sar o Iehova, ajutisaras vi averen.
Jianas că o Iehova pregătisardea amenghe șucar buchia.
Tha ji atunci, cadea sar dichas andi lumea, traisaras phare ghiesa cai phares cărdiol lenghe fața.
Cadea că, acana mai but sar oricana, trebul te cheras so phenel-pe ando Isaia 30:15:
„Dacă așen liniștime hai si tumen pachiamos, (adică pachian tumen cu sea ando Del) va avena zurale”.
O pachiamos ci însemnol te las amen pala so simțosaras, si iech alosarimos.
Jianas că sea so cherel o Iehova si anda amaro miștimos.
Cana savore pachias amen ande leste hai ande leschi organizația, așias chidine.
I ghili anda cado șion sicavel că daisaras te așias zurale ande cadai lumea nasul
anda codoia că sam chidine amare phralența.
Cana nachas prin iech dezastro, le phrala machen amare ile cana ajutin amen.
Hai amaro pachiamos andi organizația le Iehovaschi zuriarel vi le coaveren.
Gule tărne, pachian tumare amala că daștin te slujin le Devlesche ande mai but feluri?
Sar daștil iech tărno te arachel o ciacimos?
Te dichas sar dui tărne rodine te dichen savi si i ciaci religia.
Sostar si pharo te pachias că si iech corcori religia ciaci?
Ca i școala savore cheren tut te pachias că orisavi religia sili lași hai că oriso cheres si mișto.
Ande iech ghies, andi predicarea iech murș phendea manghe:
„Mânri religia vazdel spitalea, ajutil averen, tha tumen so cheren?”
Sas-les ciacimos, von chiar cadea cherenas.
Phendem manghe: „Amen sostar ci cheras cadea? Dacă vi aver religii cheren lașe buchia, numai amen si amen i religia ciaci?”
Mânro pachiamos covliardea-pe.
Ca i școala anda le asistenți medicalo dea-pe duma, sar daștin le religii te ajutin le nasfalen.
Ande iech ghies dea-pe duma anda le homosexuali hai anda codola cai camen te paruven pengo sexo.
Pala codoia pușlea amen so pachias amen anda lende.
Pe thaneste camlem te pharavel-pes i phuv hai te perav andre. Mulem lajiavestar.
So cărdea tut te pachias că tu si tut o ciacimos?
Ando Matei 7:13, 14 phenel-pe că si dui droma. Tha numai iech si lașio.
Jianglem că trebul te zuriarav mânro pachiamos hai te pachiav că alosardem o lașio drom, o drom chidino.
Cana sichilem corcoro anda o Iehova gândisardem man ca so phendea manghe codo murș
hai rodem răspunsuri ca lesche pușimata.
Arachlem le versetea anda o Matei 7:22, 23.
Code chiar o Isus phenel că na sea codola cai „cheren bare buchia ande lesco anav” va avena aprobime.
Gândisardem man ca so cheras amen: ci șioas amen andi politica,
iubisaras sea le manușen hai predichisaras i vestea lași pe sea i phuv.
Cadal buchia phendea amenghe o Isus te cheras-len.
Sigo phendem iech manglimos.
O Iehova dea man zor te phenav că ci traiv mânri viața sar me camav, tha cadea sar camel o Del.
Ando Ioan 18:38, o Pilat phendea le Isusosche: „So si o ciacimos?”
Vo pachialas că o Isus ci prinjianel sea o ciacimos.
Sea o timpo sas manușa cai pachiaie că ci si iech corcoro ciacimos hai că daștin te train penghi viața sar von camen.
Ando Proverbe 22:3 phenel-pe că „o manuș goghiaver dichel de mai anglal o nasulimos hai garavel-pe.”
Cadea că angla te astarel i ora dichlem anda so va avela te das duma.
Caște jianav so te phenav gălem po site-o jw.org
caște rodav articolea caște phenav ande iech modo simplo ande soste pachiav.
Jianav că ci trebulas te mechav man perado, tha trebulas te jiav mai dur andi predicarea.
Pala chichiva curche, daisardem te sicavav avere manușesche ande so pachiav.
Chiar cana ci daștis te cheres varecas te pachial ande so phenel i Biblia daștis te zuriares tu chio pachiamos.
Sar ajutisardea tut cadaia?
Me som mai lajiavuni hai cadaia daștil te cherel man te na mai pachiav ande soste pachiaiem,
tha o ciacimos si că o Iehova aprobil iech corcori religia.
Ando 1 Corinteni 1:10 phenel-pe că trebul te „gândisaras ande sea codo felo”. Si iech corcoro ciacimos, na mai but.
Na-i man sar te mulțumisarav le Iehovasche că dea man i bari pachiv te prinjianav-les hai că jianav savi si i religia ciaci.
Cadaia zuriarel man te cherav sea so daștiv te dav duma vi averenghe anda leste.
Si iech cadouo cai daștiv te dav-les le manușenghe.
Pachiav că si iech corcori religia ciaci. Cadaia ajutisardea man te alosarav mișto chiar cana nachav prin pharimata.
Ando than te pușiav man dacă si man o ciacimos acana rodav ando Cuvânto le Devlesco, i Biblia,
cai sicavel manghe so trebul te cherav ande orisavi situația.
Amari organizația ci vazdel spitalea, tha amari predicarea salvil vieți. Amen ajutisaras le manușen te pașion le Iehovastar.
Pușle tut sa cadea buchi vi che profesori sau che colegi?
Av gata te zuriares chio pachiamos cadea sar i Naomi hai o Vince.
Dacă des sea chi zor te rodes o ciacimos, o Iehova va ajutila tut te araches-les hai te pașios lestar.
O Iehova del but miștimata codolen cai camen te cheren mai but anda leste.
Hai le phrala cai cheren cadaia phenen că cadea si.
Te train, som o Robert McGee, hai slujiv ande Republica Dominicano.
Si zurales șucar te predichis andi Republica Dominicano.
Cade si șucar plaje hai șucar veșa, tha le manușa cheren șucar cado than.
De șiavorro camlem te avav misionaro hai te predichiv le manușenghe anda aver thema.
Ande fiesavo ghies cherav cadaia acana.
Cana slujis cai si mai bari nevoia, poiechdata si tut pharimata hai lel tut vi o doro le chărestar.
Tha le amala de cathar sile sar iech familia anda mande.
Von ajutin sea o timpo codolen cai aven ande lengo them.
Me somas nevo code hai chiar ajutisarde man te arachav manghe iech than cai te beșav
hai butivar avenas mande te dichen sar som hai anenas manghe haben.
Cade na-i man le buchia cai sas man chăre, tha le phrala de cathar dine manghe sea so trebulas man.
Bucuriv man că ci mechlem man hai că dem sea mânri zor ande predicarea.
Aven te dichas so cherav ande iech ghies.
Ușteav cal 7:15 tehareaco
hai tiliarav de chăral co 8:30.
Le manușen de cathar na-i len mașina, tha phiren but la motocicletasa anda codoia că si mai ieftino.
Angla te avav cade, ci jianglem te phirav la motocicletasa
hai nici na gândisardem man că va avela te cherav cadaia vroiechdata.
Tha le phrala sicade man hai acana jianav te jiav zurales mișto.
Cam 15 minutea cherav ji ca i Sala le Regatoschi.
Som andi congregația de i șib le Semnenghi Americano.
Pala i întrunirea, jias andi predicarea.
Hai cade na-i pharo te predichis.
Le manușa sile zurales lașe hai daștis te des duma lența.
Le manușa cai nai-le cașuche îngăren amen ca codola cai sile.
Tha poiechdata, phiras but telal caște arachas-len.
Cana avilem i iechto data cade, somas darado. Tha le phrala hai pheia ajutisarde man te na mai darav.
Si șucar că le manușa chiar ajutin tut te araches le cașuchen. Von bucurin-pe cana varecon rodel-len.
Le manușa de cathar pachian andi Biblia, anda codoia așunen amen.
Pala i predicarea jias chăre, anda codoia că pala mismeri si zurales tato. Cadai buchi placiaia man o mai but.
Andi pauza hav la bandera, mânro mai lașio haben.
Ande leste si orezo, făsâi hai mas.
Pala codoia piav iech cafeaua, beșav iech țâra hai sichioav andai Biblia.
Pala chichiva ceasurea, jias pale andi predicarea caște sichioas le manușența andai Biblia ji cana mechel-pe i riat.
Placial man but că cade daștis te sichios chichi mai bute manușența.
Cana gândis tut chichi trebul te des, si ușoro te gândis tut so va avela te hasares.
Tha trebul te gândis tut vi ca so va avela te câștighis.
Mânro suno sas te sichioav le manușența andai Biblia, hai me daisardem te cherav cadaia.
Hai chichiva chiar bolde-pe. Dacă beșlemas chăre ci simțosardemas niciechdata cadai bucuria.
O Iehova dea man phrala, pheia, deia hai dada, niciechdata ci som corcoro.
Oricai jias si amen phrala hai pheia, tha cana arăsas te prinjianas-len amen si aver varesar.
Ando Psalmo 34:8 phenel-pe: „Len hai dichen so lașio si o Iehova!”.
Cana cheras cadea si sar cana has but lașio haben.
Chanci na-i mai șucar sar te sicaves le manușen o ciacimos anda o Iehova.
Dacă ci daștis te cheres mai but anda o Iehova acana, so aver vareso daștis te cheres?
Ande cado șion sichileam că trebul te las amen pala le îndrumări cai o Iehova del-len amenghe prin leschi organizația
hai cadala va salvina amare vieți.
Cadea sar o Habacuc te șioras amaro ilo angla o Iehova caște așias liniștime hai te pachias amen vi mai but ande leste.
I familia Tshomba pachiaia-pe cu sea ando Iehova hai lea-pe pala le îndrumări chiar cana sas lenghe zurales pharo.
Sa cadea, vi amen trebul te pachias ciaces savo si o ciacimos
cana camas te las amen pala le îndrumări cai aven catar o „scalvo fidelo hai prevăzătorii”.
Ande cado șion va dichasa le phralen andai Serbia.
Andi Serbia si but lașe phuvea, tha pașa late ci si marea.
Mai si but bazinea hai bare plaina.
Ande cadai lași phuv bariol but haben.
Sar exemplo, i zmeura. But thema aven hai chinen-la de catar.
Mai si bare phuvea pherde rapița anda le animalea.
Anda o mas cherel-pe ćevapi, cado haben sicavel sar le mici hai le maușen de catar placial-len zurales but.
Cado mas șiol-pe andel manre țâne hai opral leste șiol-pe caimac cărdo anda șuclo chiral.
Andi Serbia si iech tradiția ca o sfârșito le curchesco
te chiden-pe mai but jene caște han ande iech than hai te zuriaren-pe iech averes.
But jene dine duma anda o Regato le Devlesco andi purani Iugoslavia, o than cai si i Serbia acana.
Iech mașcar lende sas iech soldato cai bușiolas Nica Tralea.
Ando timpo so cherelas partea andai aramata Austro-Ungară ande 1918,
sas astardo catar le ruși hai sas îngărdo andi Siberia.
Cade vo arachlea o ciacimos. Pala so risardea-pe chăre astardea te încărel întruniri.
Aver jeno sas iech tărno frizerii cai bușiolas Franz Brand.
Daștil-pe că anen tumenghe amintea lestar cana deam duma anda o Montenegro.
Vo sas-lo prinjiando sar „o frizerii cai pachialas-pe andi Biblia”.
Vo hai o Rudolf Kalle, cai mai anglal șinelas pesche bala leste,
jianas but andi predicarea ande iech than hai pala iech timpo cărde-les supraveghetori co Betelo.
Cam andel bărșa 30, biș zurale pionieri hai vi o Martin Poetzinger, sas bișalde cade caște predichin.
Von ci jianenas i șib sârbo-croato tha folosinas țâne lila andi predicarea.
O Martin Poetzinger anel pesche amintea sar jialas andel gava
hai îngărelas but lila ande iech rucsaco caște predichil codolenghe cai camenas te prinjianen le Devles.
Aghies, but phrala hai pheia cheren phares buchi caște predichin i vestea lași andi Serbia.
Le manușen anda i Vojvodina, silen but buchi cana trebul te chiden i recolta,
cadea că le phrala jian but la bicicletasa caște arăsăn ca le manușa cai cheren buchi i phuv.
Andi Serbia del-pe duma but șiba, sar avelas i rusa, i chineza, o urdu, i persana hai i rromani.
Caște predichin le rromenghe, le phrala jian andel thana cai jianen că beșen mai but rroma.
Lenghe țâne chăra sile iech pașa aver.
Von chiar așunen-len anda sea o ilo.
Andi Congregația Belgrade Rromani si 46 manușa cai sichion andai Biblia hai ca le întruniri chiden-pe zurales but jene.
Le phrala hai le pheia anda cadai congregația phenen amenghe că iubin amen.
Vi amen meras anda tumende.
Dichlean o JW Broadcasting catar o Sedio Mondialo le Martorengo le Iehovasche!

JW Broadcasting – iulia 2026