JW subtitle extractor

Nhos é ben-vindu pa JW Broadcasting®.
Di vês en kuandu txeu di nos ta konsulta
pa sabe si nu sta odja dretu.
Má nu ta faze kel-li na sentidu spritual tanbê?
Kuzê ki nu debe faze si nu da kónta
ma nu sta ta fika distraídu,
i ma dja nu para di konsentra na nos amizadi ku Jeová?
Un kuza ki sta djuda alguns irmon mante konsentradu
na ses sirvisu pa Jeová é oferese pa djuda na Betel.
Modi ki é un dia na vida di un
algen ki ta kolabora ku Betel?
Tanbê nu ta ben prende sobri un stória
interesanti di nos traduson di Bíblia.
Kel-li é JW Broadcasting!
Modi ki bu vista sta?
Si bu ta uza lenti di kontatu ô óklus sima mi,
nton bu vista ka sta bon.
Nha prubléma é miupia,
N ka ta odja dretu di lonji.
Kes imajen ki ta entra na nha odju
ta fika konsentradu na párti di frenti di retina
envês di na retina própi,
ki ta fika na párti di tras di nha odju
i é pamodi kel-li ki N ta odja turvu di lonji.
Talvês bu prubléma é kontráriu,
sima otus algen, bu pode ka odja dretu di pértu.
Kel-li ta kontise pamodi imajen ki ta entra na bu odju
ta fika konsentradu tras di retina.
Alguns algen ten prubléma di odja di pértu ku un odju
i odja di lonji ku kel otu odju.
Di tudu manera, nu ta uza lenti di kontatu
ô óklus asi pa nu pode odja más dretu.
Ten otus prubléma di vista sima fika ségu,
ki ta ben rezolve sô na novu mundu di Deus.
Má, ten un prubléma di vista más gravi inda
di ki kes ki N kaba di pâpia di el.
Jizus pâpia sobri kel-li na kel diskursu ki el faze na monti.
Nu ben lé kes palavra ki el fla na Mateus 6:22, 23:
“Lus di korpu é odju.”
Nu para li.
Kuzê ki Jizus krê flaba ku “lus di korpu é odju”?
El staba ta faze un konparason.
Odju é sima lus na un lugar sukuru
asi pa un algen pode anda sen tropesa.
Má, Jizus tanbê staba ta pensa na vizon sinbóliku.
Kel-li krê fla,
modi ki nu ta odja kes kuza ki Deus krê pa nu faze.
Jizus kontinua i el pâpia di dôs
kuza ki pode kontise ku nos.
Nu lontinua ta lé.
“Nton, si bu odju sta fokadu,
bu korpu interu ta límia.
Má, si bu odju é invejozu,
bu korpu interu ta ser sukuru.”
Li ta pâpia di diferénsa entri
un odju ki sta fokadu i un odju ki é invejozu.
Kel primeru ta límia vida di un algen
i kel sugundu ta pô-l na sukuru.
Kel ki nu ta disidi konsentra na el
ta pô-nu ta ten bons ô maus rezultadu.
Nu meste konsentra na nos amizadi ku Jeová
i na kuzê ki el krê pa nu faze.
É pur isu ki téma pa oji é:
“Konsentra sénpri na faze vontadi di Deus.”
Bon, kal ki é vontadi di Deus pa nos?
Di manera sinplis, el krê pa nu konxe-l,
pa nu bira se amigu,
pa nu obi ku el i pa nu ama-l
i sirbi-l di tudu nos korason.
Jizus dexa-nu un izénplu.
Na Juan 6:38, el fla ma se obijetivu na vida
ka éra ‘faze se vontadi,
má faze vontadi di kel ki manda-l.’
Jizus kontinua konsentradu na un obijetivu,
se trabadju di pregason.
El uza se ténpu i forsa na trabadju di Reinu.
El ka staba interesadu na tenta ganha glória di mundu,
nen ser riku ô famozu.
Pur isu, Jizus inxina ses disiplu tanbê
pa mante konsentradu na sirbi Jeová.
El fla-s ma kenha ki ta entra na se Reinu
é sô kes ki ‘ki ta faze vontadi di se Pai.’
Nos tudu debe fóka na mésmu kuza,
ki é konsentra na faze vontadi di Deus,
buska Reinu primeru i prega ku zelu pa otus algen.
Ten odju fokadu krê fla ten un vida sinplis, sen kuzas txeu.
Nu ka pode fika ta kóre sô tras di kel ki nu krê,
ta tenta ten tudu kes kuza sábi ki mundu ta oferese.
Si nu konsentra nos odju na faze vontadi di Deus,
é sima si nos vida ta límia.
Nos vida é txeu diferenti di kes algen
ki ses odju é invejozu
i ki ka ta kosigi konsentra na kel
ki é más inportanti!
Es ta kóre tras sô di kuzê ki es krê.
Nunka es ka ta kontenta ku kel ki es ten.
Provérbius 17:24 ta fla ma ses odju “ta anda sen rumu
ti kes lugar más lonji di téra.”
Ses pensamentu i ses dizeju sta spadjadu
pa li, pa la, pa tudu lugar ménus pa undi ki es debe sta.
Konsentra na kuzas material envês di sirbi Deus
ta rezulta na un korpu ki é sukuru.
Nu pode uza nos kapasidadi di odja
pa djuda-nu intende ilustrason di Jizus.
Kel dizenhu li, publikadu na 1915 pa William Hill,
ki éra un algen famozu pamodi dizenhus ki el ta fazeba.
Kel-li é un dizenhu ki bu pode odja-l di dôs manera.
Kel-li é kabésa i onbru di dôs mudjer,
un jóven i un mudjer di idadi.
Bu sta konsigi odja-s?
Kel mudjer jóven tene róstu pa la.
Kel-li é ladu skérdu di se róstu,
se orédja skérdu, se nariz, se pistana,
se kexada i un fita ki el tene na piskôs.
Kel-li é se kabelu i se xapéu.
Kel-li é ses onbru.
Gósi odja pa kel mudjer di idadi.
El sta ta djobe pa bu skérda.
Kel-li é se nariz, se odju skérdu, se bóka i se barbéla.
Kel-li é se kabelu, se xapéu i se onbru.
Bu ka ta konsigi odja kes mudjer omésmu ténpu.
Bu ten ki skodje kal ki bu sta konsentra na el
i dipôs bu menti ta intende kuzê ki bu sta ta odja.
Nton gósi nu faze un ligason
ku kuzê ki nu sta ta pâpia di el.
Modi ki bu ta odja kel mundu bédju li
konparadu ku kel mundu novu di Deus ki sta pa ben?
Satanás krê pa nu odja pa kel mundu di sel li
sima un lugar sábi di sta, ku txeu kuza bunitu pa kunpra
i ku un monti di oportunidadi.
Na verdadi, mundu di Satanás sta ta fika bédju
sima es mudjer di idadi na es dizenhu li.
Já-já Reinu di Deus ta ben distruí-l konpletamenti.
Envês di kel-li, nu ta konsentra na kel mundu novu
ki é sima kel mudjer jóven na kel dizenhu.
El ta ben ser un mundu sábi,
ku txeu kuza sábi di faze ki nunka ka ta ben kaba,
na undi ki ‘dizeju di tudu kuza bibu ta ben realiza’.
Nu ten ki uza nos kapasidadi di intendimentu ki Deus da-nu,
pa nu odja diferénsa entri mundu mau di Satanás
i kel mundu novu di Deus
sima Jeová inxina-nu na Bíblia, ki é se Palavra.
É ka posível nu konsentra na tudu dôs.
Un sérvu di Jeová ka pode adora Deus
di manera ki el ta merese
i omésmu ténpu konsentra se vida na es mundu.
Apóstlu Juan ta odjaba mundu sima Jeová.
Nu ben lé kuzê ki el fla sobri kel-li na 1 Juan 2:15-17.
I la el ta pâpia sobri dôs kuza ki nu ka debe ama.
Timenti N ta lé, pensa na kel-li:
‘Di kes dôs kuza, kal ki é más fásil N ka ama?’
“Ka nhos ama mundu nen kes kuza di mundu.
Si algen ta ama mundu, amor di nos Pai ka sta na el.
Pamodi tudu kuza ki ten na mundu,
dizeju di karni, dizeju di odju
i izibi kes kuza ki nu ten,
ka ta ben di nos Pai, má el ta ben di mundu.
Alén di kel-li, mundu sta ta pasa i se dizeju tanbê,
má ken ki ta faze vontadi di Deus
ta vive pa tudu ténpu.”
Di kes dôs kuza ki nu ka debe ama,
“mundu i kes kuza di mundu,”
kal di es ki é más fásil nu ka ama?
Bu ka ta konkorda ma é más fásil nu ka ama mundu?
Nu ten vontadi di odja es mundu di Satanás
djuntu ku relijion falsu, govérnus koruptu
i komérsiu ganansiozu di es mundu
ta distruídu pa tudu ténpu.
Nu tene vontadi pa kel-la kontise!
Má ten txeu kuza na es mundu di Satanás ki pode distrai-nu.
Alguns kuza na mundu ta parse txeu bunitu,
ta txoma-nu nos atenson i nu pode gosta di es.
Di tudu kes kuza ki Satanás ta
uza pa dizenkaminha pesoas,
“kel dizeju di odju”
é kel arma más poderozu ki el ta uza kóntra pesoas.
Pensa na kuzê ki el konsigi faze ku Eva
kantu el uza sô un fruta.
Nu meste izamina nos korason sénpri
pa odja si nu ka sta tentadu pa algun kuza na mundu.
Si un sérvu di Deus konsentra
ô ti mésmu dizeja un di “kes kuza di mundu,
“ta fika txeu difísil pa el konsentra
na kel ki é más inportanti,
ki é faze vontadi di Deus.
Envês di kel-li,
nu debe konsentra na ama Jeová di tudu nos korason
i da-l nos midjór.
Sima é inportanti di vês enkuandu nu faze un izámi
pa nu odja modi ki nos vista sta,
tanbê é bon di vês enkuandu nu izamina nos kabésa
pa nu odja ki mudansa ki nu meste faze
asi pa nu pode kontinua ku
bon vizon na sentidu spritual.
Modi ki nu ta izamina nos vizon
na sentidu spritual?
Bíblia ta da-nu un kuadru ki ta
djuda-nu faze kel izámi li.
Má é ka sima kel ki dotor ta uza.
É un lista di kualidadis ki nu ta atxa na 2 Pedru 1:5-7.
Nu lé:
“Pur isu, nhos faze tudu kel ki nhos ta pode
pa djunta nhos fé ku virtudi,
nhos virtudi ku konhisimentu,
nhos konhisimentu
ku nhos kapasidadi di kontrola nhos kabésa,
nhos kapasidadi di kontrola nhos kabésa
ku kapasidadi di aguenta firmi,
nhos kapasidadi di aguenta firmi
ku adorason pa Deus,
nhos adorason pa Deus ku amor di irmon,
nhos amor di irmon ku amor pa tudu algen.”
Modi ki nu sta ta mostra kes kualidadi li na nos vida?
Nu ben pâpia di kada un di es.
Fé:
nu meste di kel kualidadi li
pamodi el ta djuda-nu dizenvolve tudu kes otu.
I nu meste kontinua ta fortalese-l.
Ku un fé fórti
nu ta konsigi kridita na tudu kuza ki Jeová promete-nu
i ku nos odju di fé
nu ta odja ma kes promésa ta ben kunpri.
Virtudi:
un algen ki ten virtudi
ta faze kel ki Deus ta fla ma é dretu.
El ta djuda-nu ivita faze kuzas mariadu
ô prujudika otus algen i el ta motiva-nu
pa djobe maneras pa faze kuzas dretu pa otus algen.
Konhesimentu:
nu meste-l pa nu distrinsa dretu di mariadu,
inda más óras ki nu ta pasa pa próvas di fé.
Através di un studu profundu di Bíblia,
nu ta fika ta sabe kal ki é vontadi di Deus pa nos
i modi ki nu pode mostra sabedoria
na tudu ária di nos vida.
Kapasidadi di kontrola bu kabésa:
na grégu, el siginifika ‘pega riju na bo mê’.
Óras ki nu ta kontrola nos kabésa,
nu ta kontrola kuzê ki nu ta pensa,
kuzê ki nu ta fla i kuzê ki nu ta faze
asi pa nu sigi leis Deus i ka faze pekadu.
Kapasidadi di aguenta firmi:
Óras ki nu ten kel kualidadi li nu ka ta dizisti
pamodi nu ta kunfia ma Jeová ta da-nu forsa.
El ka ta dexa-nu perde speransa óras
ki nu ta pasa pa prublémas.
El ta djuda-nu intende ma Jeová sta da-nu forsa
pa nu ka kai na tentason i mante lial óras ki nu ta pirsigidu.
Adorason pa Deus:
Kel-li ta afeta kel ki nu ta xinti pa Jeová,
el ta pô-nu ta mostra ruspetu pa el
i ser lial pa direitu ki el ten di governa.
El ta djuda-nu odja modi ki Jeová ta trata se povu
i el ta djuda-nu vive di un manera ki ta agrada Deus
pamodi nu ta ama-l.
Amor di irmon:
Pa nu imita Jeová nu ten ki ama nos irmons.
El ta djuda-nu iginora kes inperfeisons
di nos irmons ku irmans,
trata-s sima párti di nos família
i faze tudu kel ki nu ta pode pa djuda-s sénpri.
Amor pa tudu algen:
Nu ta ama tudu algen ka sô nos irmons ku irmans.
Nu ta imita Jeová óras ki nu ta trata tudu algen igual
i nu ta mostra kel-li óras ki nu ta pâpia
sobri kel mensajen di Bíblia
ku tudu algen ki nu ta pode.
Gósi ki dja nu lé kel kuadru spritual li,
nu ta atxa rezultadu na kel otu dôs versiklu:
“Pamodi si kes kuza li izisti na
nhos i es ba ta omenta,
nhos ta uza nhos konhisimentu izatu
sobri nos Sinhor Jizus Kristu
i nhos ka ta ser inativu
i nen nhos ka ta dexa di da frutu.
Pamodi ken ki ka ten kes kuza li é ségu,
el ta fitxa odju pa lus.”
É txeu inportanti nu ten bon vizon na sentidu spritual.
Si nu faze sima Pedru insentiva-nu
i nu faze tudu kel ki nu ta pode
asi pa kes kualidadi omenta na nos,
nunka nu ka ta ser inativu na nos adorason.
Envês di kel-li nu ta ser filís
pamodi nu ta faze tudu kel
ki nu pode pa Jeová.
Má si nu ka dizenvolve i mostra kes kualidadi li,
nu ta perde fé na Jeová
i nu ta bira ségu na sentidu spritual.
Talvês nu ta da kónta ma nu pode mostraba
alguns di kes kualidadi li midjór.
Nu pode meste midjora nos vizon
asi pa nu konsentra na kel ki é dretu.
Modi ki nu pode faze kel-li?
Nu odja kuatu manera.
Primeru, studa i midita na Palavra di Deus.
Si nu ten un prubléma na odju
un dotor pode pasa-nu un ramedi
pa djuda-l midjora
i el ta kubri-l ku un kuza pa el pode diskansa
asi pa kel ramedi faze efeitu.
Anos tanbê si nu lé Bíblia tudu dia,
Palavra di Deus ta ser sima un
ramedi ki ta djuda-nu midjora.
Midita na ses orientason ta djuda-nu
intende kel ki nu sta ta lé asi pa nu pode aplika-l.
Kel-li ta djuda-nu ka skese di vontadi di Jeová,
kes kuza bunitu ki dja el faze
i kel speransa ki el da-nu pa futuru.
Un studiozu di Bíblia ki txoma William Barclay fla:
“Pa un kriston verdaderu,
studa Palavra di Deus é ka un trabadju,
má é un kuza sábi pamodi el sabe
ma kel-la ta ba inkoraja-l i da-l forsa.”
Sugundu, aplika kel ki bu prende.
Alguns prubléma di vista
pode midjora ku alguns izersísiu di vista.
Óra ki nu ta aplika kes prinsípiu di Bíblia na nos vida
é sima si nu sta ta faze izersísiu.
Tanbê nu ta faze kel-li
óra ki nu ta prega notísia sábi ku zelu
i óras ki nu ta da komentáriu na nos runion.
Tirseru, sigi orientason di spritu santu.
Pa alguns prubléma na vista dotor pode uza laser
pa konpo retina ô otus prubléma déntu di odju.
Nu pode fla ma spritu santu di Deus
tanbê é sima un bon laser.
Si nu sigi orientason di spritu santu
na manera ki u ta pensa i aji,
nos fé ta fika más fórti i nu ta bira más amigu di Jeová.
Kuartu: seta ajuda di otus algen.
Na alguns kazu un bon dotor pode fla-u ma
bu meste faze un operason na vista.
Ansions ki ten spiriénsia
pode meste uza Palavra di Deus,
ki é más afiadu di ki kalker lámina
ki un dotor pode uza,
pa da-nu konsedju dirétu ô un reprenson.
Si nu seta i aplika kel konsedju,
nu ta midjora nos vizon na sentidu spritual.
Bon, kuzê ki nu prende?
Un odju spritual ki sta konsentradu
é kel ki ta djuda nos menti odja klaru
kal ki é vontadi di Deus pa nos,
kuzas ki ten aver ku Reinu i kel promésa di mundu novu.
Un odju invejozu ta pô-nu ta odja turvu
i ta kridita na kes iluzon di kel mundu li.
Sima N mostra antis
nos odju ka ta pode konsentra na
dôs kuza ô mésmu ténpu.
Si nu ama kes kuza di es mundu li,
nu ka ta konsigi konsentra na kuzê
ki Deus krê pa nu faze,
i poku-poku nu pode ka inporta más ku vontadi di Deus.
Kel-la ta sérba tristi dimás!
É txeu inportanti pa sénpri nu mante nos odju fokadu
na faze vontadi di Deus,
konsentradu na nos trabadju di tudu alma
pa nos Pai Jeová pa tudu ténpu.
Nu ben odja kuzê ki un kazal faze
pa es mante konsentradu na ses sirvisu pa Jeová,
i modi ki es bira más filís.
Kantu ki nu tinha uns 20,
nu tinha un apartamentu na
séntru di sidadi na Viena,
má nu tinha un inpréstimu pa pagaba.
I éra un apartamentu...
Bunitu.
...bunitu própi.
É simé.
Ten kel apartamentu ta parseba
ma éra un kuza grandi.
N ta konsentraba na ganha dinheru
pamodi N ta atxaba ma
kel-la ta poba Doris más filís.
Nu kumesa ta falta alguns runion.
I nu ka tinha un rotina spritual.
Kel-li ka foi nada bon pa nos kazamentu.
Nu resebe un bon vizita di pastoreiu.
Kel ansion foi txeu dirétu ku mi
i el fla klaru ma mi ki é xéfi di família.
I dja ki mi é xéfi di família,
é nha responsabilidadi kuida di Doris
na sentidu spritual i ka sô...
I ka sô na sentidu material,
É simé.
Kasí ?
É kel-la própi.
I kel-la pô-m ta pensa,
‘N krê ser un bon xéfi di família’.
Más inportanti inda, N krê pa Doris ser filís
i el pode ser filís si nu konsentra
na da Jeová nos midjór.
Nu pâpia txeu sobri kel-li i nu kumesa
ta faze orason djuntu tudu dia.
I nu kaba pa da kónta ma nu tinha ki
fazeba algun kuza ku nos apartamentu.
Nu faze orason sobri kel-li i nu pidi Jeová:
“Favor, djuda-nu bende kel apartamentu li.
Nu krê libra di es karga.”
I nu konsigi bende kel apartamentu.
Kel-li krê fla ma nu fika sen dívida.
Kongrésu di 2014 da-nu txeu koraji própi. . .
El insentiva-nu djobe Reinu primeru
i Jeová ta fazeba se párti.
Éra primeru bês ki nu aplika kel testu na nos
i nu odja ma Jeová ta faze kel-li
pa nos tanbê, ka sô pa otus algen.
Lógu nu pâpia ku Jeová sobri kel-li.
Pa primeru bês, N krê fazeba mésmu
algun kuza pa Reinu di Deus.
I nu faze-l.
Nu faze própi.
Alguns mês dipôs di kongrésu,
nu bira pioneru ajudanti.
N ta trabadja na konstruson
i é ka fásil atxa un trabadju di meiu píriudu.
Nton, kantu ki N krê trabadjaba ménus óra,
N tevi ki poi Jeová na próva própi,
pamodi dipôs ki N faze kónta
N odja ma dinheru ta fikaba poku.
N pâpia txeu ku Jeová sobri kel-li,
N pidi-l pa el djuda-m ten kel koraji ki N mesteba
pa N ba pâpia ku nha patron
i pidi-l pa N trabadja más poku.
Tanbê N pidi Jeová pa el djuda-m kunfia
ma el ta tomaba kónta di nos.
Nu gostaba txeu di ser pioneru ajudanti.
Nton, na kel otu anu di sirvisu, nu pensa,
‘Pamodi ki nu ka ta bira pioneru fíksu?’
I nu faze planu.
Nton nu bira pioneru fíksu
i nu staba kontenti dimás.
Kada bês más sábi.
Mutu más sábi.
Simé.
I dipôs nu disidi bira nos vida inda más sinplis.
Nu muda pa un apartamentu inda más pikinoti.
Má el tinha tudu kuza ki nu
mesteba i nu ta xintiba sábi.
Dexa-m mostra nhos un Sentinéla
ki mexe ku nos txeu.
El ten un artigu ku téma:
“Trabadja ku Jeová tudu dia”
i kuazi pértu di fin ten un frazi,
ô midjór, un pergunta ki ta fla:
“Bu ta gostaba di resebe más
trenu pa sirbi Jeová más midjór?
Nton, bu pode prenxe pitison pa
Skóla pa Pregadoris di Reinu.”
Nu xinti ma kel-la éra pa nos.
Nu ka tinha más diskulpa.
Nu prenxe pitison i...
nu resebe un konviti!
Nu konvidadu mê.
Foi sábi.
Foi sin.
Ka foi fásil konsigi dôs mês
di fólga pa N bai skóla.
Na verdadi, N ka dadu própi.
N tevi ki sai di trabadju,
má N ka rapende nen un bokadinhu.
N ta fazeba el otu bês.
Bai pa skóla...
foi un prezenti di Jeová.
N xinti sima si Jeová odja algun kuza na nos.
Kel-li é bunitu.
Nu dizignadu pa un kongregason
ki ta mostra txeu amor.
I N sta kontenti di ser pioneru
djuntu ku nha mudjer Doris.
Kel-li é kel midjór vida ki ten.
Jeová sénpri mostra-nu amor
i da-nu tudu kes kuza ki nu meste.
Gósi nu tene ménus kuza material,
má tanbê nu ten mutu ménus preokupason
pamodi Jeová sénpri kuida di nos.
Nu ka ta rapende di nada.
Nu ta, sin.
Di kuzê?
Nu ta rapende di ka toma kel disizon li antis.
Kel-la é simé.
Benjamin i Dóris disidi sigi orientason di Jeová
i bira ses vida más sinplis.
Gósi ses vida é más filís
i es ten un objetivu di verdadi!
I si bu ta atxa ma é difísil bira bu vida más sinplis?
Ka bu dizanima.
Livru di Zakarias pode djuda-u.
Dja N skeseba modi ki livru di Zakarias é interesanti.
É simé.
N staba ku vontadi pa nu studa-l.
Bu sta priparadu?
Klaru ki sin.
N fika sô ta pensa na kuzê ki
nu pâpia na simana ki pasa.
Vida di kes judeu éra difísil,
es tinha inimigus, pesoas ki staba involvidu na pulítika
ki krê paraba ses trabadju,
i alvês es ta xintiba dizanimadu.
Es tinha ki konpo ténplu di Jiruzalen
i kuida di ses família.
Talvês es staba txeu kansadu,
ta parse sima nos vida oji.
Ta parse, sin.
I pa kel ki es atxaba,
ta parse ma es ka ta tinha bon rezultadu.
Es ka tinha nen trópa, nen algen pa governa-s,
es éra sô un grupu pikinoti ku un prubléma grandi.
É pamodi kel-li ki Jeová manda Ajeu i Zakarias,
pa da-s kel forsa ki es mesteba.
É simé.
Kel mensajen dirétu di Ajeu djuda-s kumesa ses trabadju
i Zakarias da-s más informasons ki ta djudaba es
kontinua ta faze kel ki Jeová manda-s pa es faze.
Uau! Ten txeu kuza pa prende.
Talvês nu meste studa-l poku-poku.
Kel-li é un bon ideia!
Vídiu i informasons sobri livru di Zakarias ta distaka
kes kuza inportanti i prinsipalmenti sobri Misías.
É simé.
Tanbê N gosta di kel párti “Asuntus di livru”
na Traduson di Mundu Novu.
N kumesa ku vizon 5:
un kandelabru i dôs olivera.
Kel-li é interesanti.
Nton, kuzê ki bu atxa?
Kantu ki N staba ta piskiza,
N atxa un artigu i Sentinéla di marsu di 2022, ku téma:
“Bu ta konsigi odja kuzê ki Zakarias odja?”
Kes kuza ki el ta fla i kes dizenhu djuda-m txeu.
Boa!
Modi ki bu atxa-l?
N uza Índice de Textos i N djobe
kes referénsia di kada versiklu.
Kel-li é un bon manera di faze piskiza.
Kel artigu ta splika ma kel azeti di kes arvi
ta reprizenta puder di spritu
santu di Deus ki ka ta kaba.
Imajina modi ki kel-la inkoraja kes judeu.
Es staba kansadu i dizanimadu,
má Jeová da-s serteza
ma nunka el ka ta paraba di djudaba es.
I es fika más inkorajadu inda kantu Jeová fla-s
kes palavra ki sta na versiklu 6 i 7, el fla-s:
“‘É ka ku forsa di trópa nen ku puder,
má é ku nha spritu,’ é Jeová di Izérsitu ki fla.
Abo é kenha, ó montanha grandi?
Dianti di Zorobabel bu ta ben bira un lugar planu.”
Kel-la foi un bon ilustrason.
Tudu kes opozison ki es staba ta pasa pa el
éra sima un montanha, má Zakarias fla ma es
ta ben biraba sima un lugar planu.
Nton, nen inpériu di Pérsa ô inimigus,
ô ti mésmu proibison, ka ta pode paraba kel trabadju.
Es ka mesteba di trópas, es tinha Jeová.
Talvês es imajina un montanha grandi
ta bira planu na ses frenti.
I es intende klaru ma es ka ta pode tinha bons rezultadu
pamodi ses situason ô ses kapasidadi,
sô es ta konsigiba kel-la ku ajuda di spritu di Jeová.
Kel-li é verdadi.
I kel mensajen da-s forsa mê.
Sikrê ku tudu kes prubléma ki es tinha,
es kunfia na Jeová i es faze ses trabadju.
I dipôs di kuatu anu i tal, ténplu fika prontu.
Es odja kuzê ki spritu di Jeová pode fazeba.
Kel proibison tradu dirapenti i ti mésmu kes nason
ki ta fikaba na ses vólta mandadu pa da-s
kes material ki es mesteba pa es konpoba ténplu.
Foi pamodi spritu di Jeová, ka pamodi sforsu di ómi.
Jeová bira kes montanha planu.
Nton, kuzê ki bu ta atxa ma kel-li ta inxina-nu sobri Jeová?
Kes vizon di Zakarias da-m serteza ma spritu di Jeová
pode faze kuzas ki nu pode atxa ma é ka posível.
I Jeová sabe ma alvês nu ta xinti sima kes judeu,
kansadu, dizanimadu i ti mésmu ku medu,
pur isu el krê pa nu intende se puder.
Profesias di Zakarias pode djuda-nu faze kel-li.
N krê lenbra di kel-li óras ki N lé Zakarias.
N krê tenta imajina kuzê ki sta kontise.
Kel-la própi.
Téma di kel artigu ki bu atxa ta fla klaru:
“Bu ta konsigi odja kuzê ki Zakarias odja?”
Nton modi ki nu pode aplika kel-li?
Pa N ser sinseru, alvês N ta xinti kansadu dimás.
Alén di nos rotina spritual, nu ten txeu kuza di faze:
kuida di família, ganha pon di kada dia, kuida di nos saúdi
i nu ten ki lida ku preson di Satanás.
É difísil lida ku tudu kel-li.
Pur isu, alvês N krê sisti runion pa internet.
Mi tanbê.
Má pensa na kel vizon di Zakarias ta djuda-m ka dizisti.
El ta lenbra-m ma Jeová ta da-m kel
forsa fíziku i emosional ki N meste.
N ta xinti asi tanbê.
Nton, óras ki N sta xinti ma N
sta fria na nha sirvisu pa Jeová,
N ta ora ta pidi spritu santu i dipôs N ta aji.
N ta faze asi óras ki N ta sforsa pa N ba runion
ô pregason, sikrê N ka tene vontadi.
N ten serteza ma Jeová ta da-m kel puder ki N meste.
I sima Jeová, N krê uza kel forsa ki N ten
pa N inkoraja otus, prinsipalmenti
si es sta dizanimadu ô ku medu.
N krê djuda-s ten serteza ma Jeová ta preokupa ku es
i ma el ta da-s kel forsa ki es meste.
Kel-la é rei di inportanti.
I kel-li ta sirbi pa futuru tanbê,
óras ki nu ben pasa pa pirsigison ô nu xinti medu.
N gosta di kuzê ki bu flaba:
bons rezultadu ka ta dipende di nos situason
ô kapasidadi, má di spritu di Jeová.
N gosta di modi ki nu studa livru di Zakarias:
nu kumesa ta studa-l poku-poku,
nu uza Índice de textos,
i nu imajina kuzê ki staba ta kontise!
Kes kuza li djuda-nu prende txeu sobri Palavra di Deus.
Nton nu pode pâpia un bokadinhu más
sobri kuzê ki “kes dôs pô” ta siginifika?
Klaru ki sin.
Tanbê N ta gostaba di prendeba
más di kes profesia sobri Misías
i odja modi ki es ta ligadu ku téma di Bíblia,
sima kuzas ki Zakarias faze ki ta
djuda-nu odja ken ki éra Misías.
I ten tudu kes otu vizon tanbê.
Ta parse ma inda nu tene txeu kuza di studa
na livru di Zakarias na nos prósimu adorason na família.
Kel-li é un bon lison ki nu pode aplika!
Nu pode ten bons rezultadu ka ta
inporta nos kapasidadi ô situason.
Si nos é obidienti,
Jeová pode uza se spritu santu pa abensua-nu.
Un manera ki nu pode konsentra na nos
sirvisu pa Jeová é kolabora ku Betel.
Nu ben odja modi ki é Un dia na vida di...
un algen ki ta kolabora ku Betel.
Oi, nha nómi é Hye-in.
N ta kolabora ku Betel di Koreia.
N ka ta bai pa Betel sénpri na
kes mésmu dia di simana,
N ta bai sô óras ki nha dipartamentu ta meste.
Normalmenti, ta dura di 45 minutu
ti un óra pa N txiga Betel.
Má si sta txeu tránzitu, ta leba más ténpu.
Inda ben ki N gosta di konduzi,
pur isu N ka ta atxa kansadu faze kel viajen li.
Irmons na Betel sénpri ta kumesa
ses dia ku Adorason di palmanhan.
Un diskursu ki fazedu ka dura li,
ku bazi na Tiagu 1:2-4 mexe txeu ku mi.
El insentiva-nu odja nos prubléma sima un profesor
ki krê djuda-nu bira un algen más maduru.
Óras ki nu ta pasa pa un prubléma,
é ka fásil di nu pensa:
‘Kuzê ki N pode prende ku kel situason li?’
Nu prende ma si nu faze studu pesoal,
si nu lé Bíblia tudu dia, nu faze orason, i nu midita,
nu ta konsigi aguenta firmi i kontinua ku alegria
ka ta inporta ki prubléma ki nu pasa pa el.
Adorason di palmanhan sénpri ta da-nu koraji.
N ta xinti ma sénpri ten algun kuza pa prende.
N ta trabadja na Dipartamentu di Transpórti.
Kel trabadju prinsipal ki nu ta faze é djobe transpórti
pa kes irmon ki ta trabadja pa
ténpu interu ki ben vizita di otu país.
Sénpri N ta tenta lenbra ma obijetivu di trabadja
na Betel é apoia trabadju di pregason.
Sénpri ki N ta konxe kes irmon
ki ta trabadja pa ténpu interu,
ki ta ben di otu país pa vizita Betel,
es ta mostra txeu gratidon,
i kel-li ta pô-m ta pensa:
‘Nu konsigi faze algun kuza pa djuda-s’.
I kel-li é un kuza ki ta pô-m xinti sábi.
Kel viajen, normalmenti,
ta dura un óra i meiu ô dôs óra,
i nu ta kustuma ta pâpia di txeu asuntu diferenti.
Enbóra nunka nu ka konxeba antis,
ta parse sima ki dja dura ki nos é amigu.
Nu ta kustuma konta spiriénsia
sobri modi ki Jeová dja djuda-nu
ô modi ki el da-nu forsa kantu
ki nu pasa pa prubléma.
Momentus sima kel-li ta poi kes
viajen ta ten txeu valor pa mi.
Na komésu, N ta atxaba ma N
ka krê trabadjaba na Betel,
pur isu N ka prenxe pitison lógu.
Má un dia, un amigu ki N ta kunfia txeu na el
lenbra-m ma óras ki nu ta sirbi Jeová,
nu ka debe skodje ki dizignason ki nu ta seta.
I dipôs di pensa na kel-la,
N da konta ma el tinha razon.
Pur isu N disidi ma N ta prenxeba pitison,
i ma N ta dexaba tudu kuza na mô di Jeová.
Nton é kel-li ki N faze, i N sta kontenti
pamodi inda N ta trabadja na Betel.
Foi difísil pa mi organiza ténpu di
nha sirvisu pa Betel ku nha trabadju.
Nha maior preokupason éra si N ta tinha
dinheru ki ta txiga pa kes kuza ki N meste.
Má dipôs ki N kumesa ta kolabora
ku Betel, nhas preokupason kaba.
N konsigi organiza nha ténpu dretu,
tantu pa nha trabadju i tanbê pa Betel.
Alén di nha trabadju i di kolabora ku Betel,
duránti algun ténpu N tevi
ki toma kónta di nha família.
Pa N kontinua ku nha rotina spritual,
N disidi marka un dia sértu
pa N faze nha studu pesoal.
É inportanti sénpri faze kuzas ki ta
djuda-m bira más amigu di Jeová.
Óras ki N ta kumesa xinti kansadu,
é kes kuza li ki ta da-m forsa pa N kontinua
ta kolabora ku Betel i prega ku zelu.
Faze kes kuza ki ta djuda-m bira más
amigu di Jeová é txeu inportanti pa mi.
Pur isu sénpri N ta tra ténpu pa faze-s.
“Un dia na [kaza di Jeová]
é midjór ki mil na kalker otu lugar!”
Kel-li é un di kes testu ki N ta pensa na el
na kes palmanhan ki N ta bai kolabora ku Betel.
Ka ta inporta ki dizignason ki N ta ben resebe na futuru,
N krê sirbi Jeová ku alegria i ku gratidon na korason.
Pa bu kolabora ku Betel
bu meste sta konsentradu i uza bu forsa dretu.
Bu repara modi ki irman Hye-in
kontinua ikilibradu i alegri?
Tudu simana el ta tra un dia pa el faze se studu pesoal.
Studa Bíblia ta djuda-nu midjora nos
kapasidadi di odja na sentidu spritual,
asi pa nu odja pa futuru ku kunfiansa.
Nu ben odja modi ki Daniel faze kel-li
na es Adorason di palmanhan.
Téma di nos diskursu é:
“Bira bu kunfiansa na amor
lial di Jeová más fórti.”
Pamodi ki nu meste faze kel-li?
Pode ser pamodi kuzas ki
kontise ku nos na pasadu.
Talvês pamodi manera ki nu kriadu,
érus ki nu faze na pasadu, ô kuzas ki nu pasa pa el
ki alvês pode pô-nu ta ten dúvida
si Jeová ta ama-nu ô nau.
Talvês pode ser prublémas ki nu sta ta pasa pa el,
ki ta dexa-nu txeu preokupadu, sima prublémas na família,
txeu trabadju, prublémas di saúdi ô otu kuza
ki ta djuda-nu intende di manera klaru
ma nu meste di amor i ajuda di Jeová.
I nos tudu nu sabe dretu ma na futuru
nu ta ben pasa pa situasons difísil
ki ta ben poi nos fé na próva
i nu pode pergunta si nu ta konsigi mante fiel.
Ka ta inporta kuzê ki kontise na pasadu,
prezenti ô ta ben kontise na futuru,
nu meste kontinua ta fortalese nos
kunfiansa na amor lial di Jeová.
Un kuza ki pode djuda-nu é lé kel ki sta na Daniel 9:4.
Párti di kel testu li sta na komentáriu di testu di oji.
Nton, nu abri Daniel 9:4.
Daniel fla: “N ora pa Jeová, nha Deus, i N konfesa. N fla-l:
‘Ó Jeová, kel Deus verdaderu,
kel Grandi i ki ta poi algen ta xinti txeu ruspetu.
Kel ki ta kunpri se kontratu,
i ki ta mostra amor lial pa kes ki ta ama-l
i ki ta obi ku ses mandamentu’”.
Kel-li éra párti di un orason ki Daniel faze.
Li el ta pâpia di amor lial di Jeová,
Kel ki ta kunpri ses kontratu i ses promésa,
i el ta aji di es manera ku kes ki ta ama-l
i ki ta obi ku ses mandamentu.
Óras ki nu ta analiza es orason i
kuzê ki staba ta kontise na kel ténpu,
nu ta fortalese nos kunfiansa na Jeová
ma el ta ben mostra-nu amor lial.
Primeru: Pamodi ki Daniel faze kel orason li?
Repara Daniel 9:2.
El fla: “...na primeru anu di se govérnu, ami Daniel,
N intende através di kes livru,
kantu anu ki Jeová flaba ma Jiruzalen
ta kontinuaba distruídu.
El flaba através di proféta Jeremias ma ta sérba 70 anu.”
Nton, na ki ténpu ki Daniel faze kel orason li?
Foi na anu 539 antis di Jizus
i dja tinha 68 anu ki Jiruzalen staba bandonadu.
Nton Daniel studa “kes livru”.
Nóta ta fla: “kes livru sagradu”.
Nton alén di kes kuza ki Jeremias skrebe,
talvês el konsigi lé kes kuza ki
el konsigi lé kes kuza ki Muizés,
Izaías, Ezekiel, Amós, i Ozeias skrebe.
Di serteza, Daniel lé Jeremias 29:10,
i kel versiklu ta fla asi:
“Pamodi é kel-li ki Jeová fla:
‘Óras ki nhos faze 70 anu na Babilónia,
N ta ben volta nha atenson pa nhos
i N ta ben torna traze nhos pa kel
lugar li i kunpri nha promésa.’”
Daniel pode odjaba kuzas ki staba ta kontise na se vólta
staba di akordu ku profesias di Bíblia.
I el sabia ma profesias dja flaba ma Siru
ki éra kel ki staba ta governa,
éra kel ki ta ben libertaba israelitas.
Enbóra Daniel ka sabia dretu modi
ki kel profesia ta ben kunpriba,
el sabia ma faltaba poku pa el kunpriba
i kel-li pô-l ta faze kel orason
i ta konsentra na amor lial di Jeová.
Nu ta atxa kel orason di Daniel na versiklu 4 ti versiklu 19,
i kes kuza ki el fla na orason ta mostra ma el staba
ta pensa na kes palavra di Jeremias
i ma el ta kunfiaba na kel profesia di Jeová.
Na verdadi, un artigu ta fla “ma orason di Daniel
ka tinha bazi sô na un ô dôs versiklu di Jeremias,
má na kel livru interu.”
Orason di Daniel ta mostra ma nason di Israel
mesteba própi di amor lial di Jeová.
El faze un diferénsa entri lialdadi i konpaxon di Jeová,
ku dizobidiensa di kes israelita
ki ka foi fiel ku orientason di Jeová.
I Daniel mostra klaru ma tudu kuza ki es pasa pa el
éra kel ki Jeová dja flaba ma ta ben kontiseba.
Repara versiklu 13.
El fla: “Sima sta skrebedu na Lei di Muizés,
tudu kel disgrasa li ben riba nos.”
Daniel sabia ma kes mésmu profesia ki ta avizaba
kuzê ki ta kontiseba ku kes israelita
si es ka obiba ku Jeová,
tanbê ta prometeba ma es ta ben voltaba pa Israel.
Livru di Levítiku, Deuteronomiu, Izaías, Jeremias,
tudu es ta prometeba ma si kes israelita rapendeba,
Jeová ta trazeba es di vólta pa ses téra.
I repara modi ki kel orason li ta tirmina na versiklu 19.
El fla: “Ó Jeová, obi.
Ó Jeová, púrdua.
Ó Jeová, presta atenson i aji!
Ka bu dura pa bu nómi, ó nha Deus,
pamodi bu sidadi i bu povu ki ta leba bu nómi.”
Nton, el pidi pa Jeová aji pamodi se nómi.
Un kuza interesanti é ki, na livru di Daniel,
nómi di Jeová ta parse 19 bês.
Di kes 19 bês, 18 ta parse sô na kel kapitlu
i 14 sta na kel orason ki Daniel faze.
Pamodi ki Daniel ora ta inplora
pa Jeová aji pamodi se nómi?
Daniel sabia ma si Jeová ka ajiba,
nómi di Jeová ta sérba difamadu.
I Jeová dja prometeba ma el ta libertaba israelitas.
Si el ka fazeba kel-la pesoas ta papiaba mal di el.
Daniel sabia ma pa el intendeba kenha ki Jeová é
i kuzê ki se nómi siginifika,
el tinha ki rekonheseba ma Jeová é un Deus di amor lial.
Óras ki Jeová ta aji pa djuda se povu,
tanbê el ta santifika se nómi.
Ki lisons ki nu pode prende di es orason
ki pode fortalese nos kunfiansa ma Jeová
ta ben aji ku se amor lial pa djuda-nu?
Un di kes kuza é ki Jeová ka ta bandona se povu.
Kes kuza mariadu ki kes israelita pasa pa el
éra kel ki Jeová dja flaba ma ta binha kontiseba
i es pode tinha serteza ma si es rapendeba,
tudu kes kuza dretu ki Jeová dja prometeba
ta binha kontiseba ku es tanbê.
I foi kel-la ki kontise.
Kel-li pode da-nu koraji.
Alvês, nu pode faze éru,
má nu pode ten serteza ma si nu faze mudansa,
Jeová ta djuda-nu.
I sima el staba ku Daniel i kes israelita,
Jeová ta sta ku nos, nunka el ka ta bandona-nu.
Sugundu kuza ki nu ta prende é ma
studa profesias di Bíblia pode fortalese
nos kunfiansa na amor lial di Jeová.
É kel-la ki kontise ku Daniel.
Se studu pesoal fortalese se
kunfiansa ma Jeová ta ba ajiba,
i é kel-li ki ta kontise óras ki
nu ta studa profesias di Bíblia.
Sentinéla di agostu di 2023 ku téma:
“Prende ku profesias di Bíblia”, ta fla:
“Óras ki nu ta odja modi ki alguns
profesia di Palavra di Deus dja kunpri,
nu ta kunfia más na Jeová i na kalker orientason ki el ta da-nu.”
Tanbê kes profesia di Bíblia ta djuda-nu kontinua
ku un speransa puzitivu pa futuru,
ka ta inporta ki prublémas nu pasa pa el gósi.”
Tirseru kuza ki nu ta prende é amor lial di Jeová
sta ligadu ku se nómi i ku kenha ki el é.
Daniel staba konvensidu di kel-li,
sima nos tanbê nu sta konvensidu.
Mostra amor ta faze párti di manera di ser di Jeová.
Jeová ta ben aji pa djuda-nu pamodi se nómi
i kel-li ta da-nu tudu serteza ma Jeová
ta ben kunpri se promésa di kuida di nos.
I kuartu kuza ki nu ta prende é ma Jeová ta da-nu
informason ki nu ta meste na ténpu sértu.
Daniel intende kel ligason entri kes kuza
ki staba ta kontise i kes profesia di Bíblia.
I Jeová da-l kes informason ki el mesteba na ténpu sértu.
Jeová sta ta faze mésmu kuza pa se povu oji.
Nu sabe ma kes intendimentu ki nu
sta ta resebe sobri profesias di Bíblia,
i kel-li ta inklui kuzê ki nu pode spera
ma kuzê ki ta kontise na grandi tribulason,
ta prova klaru ma Jeová sta ta gia-nu.
Nton, midita na orason di Daniel
pode fortalese nos kunfiansa na amor lial di Jeová
i nu pode ten serteza ma ka ta inporta
kuzê ki kontise ku nos na pasadu,
kuzê ki nu sta ta pasa pa el gósi
ô kuzê ki sta ben kontise ku nos na futuru,
Jeová ta ben mostra-nu amor lial.
Nu prende bons lison na poku versiklu!
N gosta di kel pontu ki ta mostra
ma studa promésas di Jeová
ta djuda-nu odja pa futuru ku kunfiansa.
Na resureison ki sta pa ben,
nu ta ben resebe un monti di algen.
Bu sta ta spera un algen spesial
i ki bu tene vontadi di abrasa otu bês?
Pensa na kel algen timenti bu ta odja
múzika ku vídiu di es mês ku téma:
Labanta otu bês.
Bu dór é txeu dimás. 
Foi sima bu tradu un padás. 
Txora sin, dexa láguas kai. 
Nu ta sta ku bo ti ki kel dór sai. 
Jizus ta ben uza 
se vós pa txoma-s 
I fla-s p’es ben ten vida 
ki ka ta kaba más. 
Dja nu krê odja-s 
sima bu krê odja-s. 
Ku paxénxa nu ta spera p’es 
labanta otu bês.
Vive sen kel algen ta duê   
I bu sta k’un vaziu na bo tanbê.
Dizabafa ku Jeová 
I xinti kel pas ki el ta da. 
Jizus ta ben uza 
se vós pa txoma-s 
I fla-s p’es ben ten vida 
ki ka ta kaba más. 
Dja nu krê odja-s
sima bu krê odja-s. 
Ku paxénxa nu ta spera p’es 
labanta otu bês. 
Pértu d’el bu ta ben 
sta otu bês. 
Bu t’odja m’el ta sta kel mê 
i se surizu igual tanbê.
Ka é sonhu nau, 
é própi el ki ta sta la. 
Promésa di Jeová é rial, 
nton ka bu kansa di spera-l. 
Sin, Jizus ta ben uza 
se vós pa txoma-s 
I fla-s p’es ben ten vida 
ki ka ta kaba más. 
Dja nu krê odja-s
sima bu krê odja-s. 
Ku paxénxa nu ta spera p’es 
labanta otu bês. 
Labanta otu bês. 
Jeová sabe di vontadi ki nu ten
di odja kes algen ki nu ta ama.
I el krê odja-s tanbê.
Sima sta na se Palavra: “Pa el es tudu sta bibu.”
Nu ta fortalese nos fé na tudu promésas di Jeová
óras ki nu ta lé Bíblia na nos língua di korason.
Kuzê ki dja nu faze pa nu ten un Bíblia fásil di lé
izatu i ki sta disponível na un monti língua?
Kantu ki lansadu Bíblia Traduson di Mundu Novu
di Mateus ti Apokalipse na inglês na 1950,
irmon Nathan Knorr fla ma se objetivu...
Poku-poku nu ba ta lansa más livru di Bíblia
ti ki Traduson di Mundu Novu
na inglês fika prontu na 1961.
Ti ki enfin nu tevi un Bíblia na inglês ki éra sinplis,
fásil di lé i intende i ki ta daba ónra pa nómi di Jeová.
I irmons dja staba ta trabadja pa
traduzi kel Bíblia na más 6 língua.
Pa vólta di anu 1963,
6 tradutor tirmina di traduzi
di Mateus ti Apokalipse na ses língua.
Má traduson di Bíblia staba ta bai léntu,
i na alguns língua ta lebaba más
di 20 anu pa el staba konplétu.
Uns 30 anu dipôs ki
Traduson di Mundu Novu lansadu na inglês,
inda el staba disponível sô na 12 língua.
Pa djuda traduzi Bíblia na más língua, na 1989,
Grupu Enkaregadu di Óbra forma un novu dipartamentu
na Sédi Mundial ki é Sirvisus di Traduson.
Trabadju di kel dipartamentu li éra i inda é
djuda traduzi Bíblia i publikasons ku bazi na Bíblia,
trena tradutoris i responde perguntas
di tradutoris di mundu interu.
É klaru ki tradutoris tinha un monti pergunta
di modi ki es pode traduzi di manera izatu.
Modi ki kel dipartamentu li ta organiza
i pripara tradutoris pa traduzi Bíblia?
Primeru kel dipartamentu ta inxina tradutoris
kes ideia prinsipal di traduson.
Kel-li ta involve informasons sobri língua,
siginifikadu di alguns kuza ki
sta na Bíblia i otus konparason.
Pa alguns párti di Bíblia tradutoris ta meste di un dizenhu
pa djuda-s imajina kuzê ki es sta ta traduzi.
Un ekipa di traduson meste skodje un palavra
ki ta mostra klaru kel sentidu di testu orijinal.
Si un ekipa di traduson tene dúvida,
es pode manda kel pergunta pa Sirvisus di Traduson.
Pa faze kel-li es ta uza un prugrama di traduson spesial
ki ti gósi tene guardadu más di 140
mil perguntas sobri traduson di Bíblia.
I kes pergunta ta uzadu pa trena otus ekipa di traduson
i el ta djuda pa traduson fazedu
ku midjór kualidadi i más rápidu.
Kantu es pergunta Albert Schroeder
di Grupu Enkaregadu di Óbra
na kantu língua ki el ta atxa ma
Traduson di Mundu Novu debe traduzidu, el fla:
“[Na] tudu língua ki revista Sentinéla ta traduzidu,”
asi ta fika más fásil pesoas
prende verdadis sobri Bíblia.
Pa vólta di anu 1995,
irmons intende ma es meste un
traduson di Bíblia izatu na más língua.
Pesoas ki ta papiaba língua
ki Traduson di Mundu Novu
ka staba disponível tinha ki uzaba otus traduson.
Pamodi kel-li, alguns kongregason
grandi tinha sô un ô dôs Bíblia.
Alguns di kes traduson ka éra izatu
ô es ta apoiaba ensinus falsu.
I ti mésmu es ta uzaba nómi di deus
di kes lugar envês di nómi Jeová.
Na 2004, Grupu Enkaregadu di Óbra
da irmons trenu i tudu kuza ki es meste
pa es traduzi Bíblia na más língua.
Dipôs ki un ekipa kumesa traduzi Sentinéla,
kel otu prujétu inportanti é traduzi Bíblia.
Pamodi kel-li bira más fásil pa kontise
kel ki irmon Schroeder flaba.
Ekipas di traduson tinha un monti di trabadju pa faze!
Trabadju di tradutoris ka ta kaba óras ki es lansa Bíblia.
Pamodi língua ta muda ku ténpu,
tradusons di Bíblia ta meste fazedu revizon,
asi pa kes ideia ki sta na testu orijinal kontinua klaru.
Ti gósi, kuazi 700 irmon ta trabadja pa
ténpu interu pa traduzi Palavra di Deus.
Enbóra ta leba sô alguns sugundu pa diskarega Bíblia,
maioria di kes ekipa ta leba entri
5 ti 7 anu pa traduzi Bíblia interu.
Ku benson di Jeová,
nu ten un traduson di Bíblia ki ta
kontinua ta da ónra pa se nómi
na más di 325 língua i el é más izatu
i más fásil di lé di ki antis.
Sikrê ten poku publikadoris ki ta pâpia un língua
Traduson di Mundu Novu sta disponível pa es.
I kuzê ki ta kontise óras ki un algen umildi
ta resebe Bíblia na língua di se korason?
Filisidadi, zelu i alegria.
Traduzi Palavra di Deus
pa “tudu nason, língua, tribu i povu”
ta djuda pa notísia sábi
toka korason di pesoas na mundu interu.
Má kel más inportanti é bo ki ta faze.
Prósimu bês ki bu lé Bíblia,
dexa-l toka bu korason
i motiva-u leba kel mensajen
ki ta salva vida pa más algen ki bu ta pode.
Bu xinti vontadi di badja ku kes irmon ku irmans?
É sábi dimás resebe Traduson di Mundu Novu
na nos língua di korason!
Kuzê ki bu prende na prugrama di es mês?
Ku ajuda di Palavra di Deus nu pode kontinua
ku un ‘odju fokadu i nos korpu interu ta límia.’
Enbóra pode ser difísil,
nu pode ser filís si nu bira nos vida más sinplis
pa nu faze más na pregason.
Si bu ta mora pértu di Betel,
bu ta pode oferese pa bu kolabora ku Betel?
Livru di Zakarias ta djuda-nu odja puder di Jeová
i imita-l na inkoraja otus.
I nu obi un múzika sábi!
El pô-u ta badja sima mi tanbê?
Ta ben ser un dia sábi dimás
óras ki nu ben resebe tudu kes
algen ki nu ta ama otu bês!
Na vídiu di es mês, nu ta ben konxe Luxenburgu.
Nu bai vizita nos irmons ku irmans la.
Luxenburgu é un país pikinoti
ki ta fika na meiu di Europa.
Palavra Luxenburgu signifika “fortaléza pikinoti,”
i kel nómi li ta da ku el pamodi ten más di 70 kastélu la.
Kel-li é kastélu Bourscheid,
el ta fika riba di un monti pértu di riu Sûre,
i el serkadu pa 11 tori.
Pértu di el ten kastélu Vianden,
ki dja ten más di 700 anu.
El fazedu riba di un konstruson ki romanus faze
dja ten más di 1700 anu.
Sima kes kastélu li mante firmi duránti txeu anu,
sérvus di Jeová na Luxenburgu
mante firmi sikrê ku difikuldadi.
Pur izénplu, sikrê xéfis di relijion
tenta para nos trabadju,
Eugene Reuter dexa irmons uza
se kaza pa trabadju di Reinu.
Na 1933, se kaza foi primeru lugar ki uzadu
pa guarda i distribui publikasons ki ten bazi na Bíblia.
El poi plaka di Sosiadadi di
Tori di Vijia na frenti di se kaza,
kel-li mostra koraji i fé.
Na 1940, kantu trópas di Alimanha
ta tomaba kónta di Luxenburgu,
Rosalie Fonck podu prézu pamodi el atxadu
ku publikasons Tistimunhas di Jeová.
Es obriga-l fla nómi di irmons i di se líder.
Má, el responde-s: “Nha líder é Jeová Deus.”
Más ô ménus na kel mésmu ténpu,
Victor Bruch podu prézu pamodi el nega ba géra.
El mandadu pa kanpu di konsentrason di Buchenwald.
Trópas obriga irmons pa fika txeu óra sakédu,
pa trabadja di noti i pa marxa ku sapatu di madera.
Má irmons kontinua ta inkoraja kunpanheru.
Kantu Victor mandadu pa Auschwitz,
el mante lial i el kontinua ta pâpia
sobri speransa di Reinu di Deus ku otus algen.
Oji irmons na Luxenburgu sta kontinua ta mostra
kel mésmu fé i amor pa verdadi.
Más di dôs mil publikador
ta prega notísia sábi na 10 língua.
Irmons ta faze fijon verdi i karni porku asadu,
timenti es ta kume, es ta inkoraja kunpanheru.
Es ta fika kontenti di kanta djuntu na runion.
Nu ben obi kes 84 publikador di kongregason
Allemand ta kanta pa lova Jeová.
Nos irmons ku irmans di Luxenburgu
ta manda nhos mantenha
i nos tanbê nu ta manda nhos mantenha.
Kel-li é JW Broadcasting,
di Sédi Mundial di Tistimunhas di Jeová.

JW Broadcasting — Otubru di 2026