JW subtitle extractor

Nhos é ben vindu pa JW Broadcasting®.
Na prugrama di es mês,
nu ta ben odja modi ki sta dispostu
pa muda nos manera
di pensa pode djuda-nu.
Nu ta ben prende ku dôs família
ki abri ses korason i ses kaza
i es resebe txeu benson
pamodi es faze kel-li.
Na djobe tizoru nu ta prende
modi ki Jeová ta purifika-nu
i ta purifika se organizason
i kuzê ki nu pode prende ku kes mudansa.
I nu ta ben odja ki benson
nos família pode ten
si nos sirvisu pa Jeová
é kel kuza más inportanti na nos vida.
Kel-li é JW Broadcasting.
Téma di nos diskursu é:
“Uza bu mimória ku sabedoria”.
Talvês bu pode pensa:
‘Modi ki N ta konsigi faze kel-li?
N ka ta konsigi kontrola
kuzê ki N ta lenbra di el.’
I kel-li pode ser verdadi.
Má nu ta konsigi kontrola
kuzê ki nu ta disidi
konsentra na el i
kontinua ta pensa na el.
Na kel diskursu li, nu sta ben odja
modi ki nu pode imita Jeová
na manera ki nu ta uza nos mimória.
Dipôs nu ta ben odja
modi ki nu pode uza nos mimória pa
mostra amor i sirbi otus.
Kuzê ki Jeová ta disidi lenbra sobri nos?
Favor, nhos abri nhos Bíblia na Ebreus 6:10.
Li ta fla:
“Pamodi Deus é ka injustu pa skese di nhos óbra
i di amor ki nhos mostra pa se nómi,
pamodi nhos sirbi kes santu
i nhos ta kontinua ta sirbi-s”.
Bu repara kuzê ki Jeová ta lenbra di el?
El ta konsentra na kuzas bon ki nu ta faze.
Bíblia di Studu na kel versiklu li ta fla:
“Jeová ta atxa ma si el para di konsentra
na kes kuza bon ki se sérvus lial ta faze,
El sta ta ser injustu”.
Kel-li ta mostra dretu
modi ki Jeová ta preokupa ku ses sérvu.
É klaru ki Jeová sabe tudu kuza sobri nos,
kel-li ta inklui nos pekadu ô nos fadjas.
Má el ka ta konsentra
na kes kuza mariadu ki nu ta faze.
Pur izénplu:
Nu pode konpara nos
mimória ku un bibliotéka.
Jeová sabe undi ki kada livru ta sta.
Na alguns di kes livru sta skrebedu
nos pekadus i nos fadjas.
Má na otus sta skrebedu
kes kuza dretu ki nu faze.
Jeová sabe na undi ki
kes livru ki ten nos fadjas sta.
Má el ta disidi lé i konsentra na kes livru
ki ten kes kuza dretu ki nu ta faze.
Modi ki izénplu di Jeová ta djuda-nu
uza nos mimória ku sabedoria?
Nu volta pa Ebreus 6:10,
i nu odja dôs kuza ki nu
pode konsentra na el.
Kel primeru é amor ki nu
ta mostra pa nómi di Jeová.
É un priviléjiu ser konxedu
pa Tistimunha di Jeová,
má tanbê nu ta rekonhese ma é un
responsabilidadi difende se nómi.
Nos manera di pâpia, nos manera di bisti,
i nos manera di aji
pode poi pesoas ta pâpia dretu
ô mariadu di Jeová.
É pamodi kel-li ki 1 Koríntius 10:31 ta fla ma
ka ta inporta kuzê ki nu faze,
nu debe “faze tudu kuza pa glória di Deus”.
Nu krê pa tudu algen
sabe ma nómi di Jeová
é santu i ma el é inportanti pa nos.
Tanbê nu ta mostra amor pa nómi di Deus
óras ki nu ta djuda otus konxe se nómi.
Kel-li ta involvi prega notísias
sábi di Reinu di Deus.
Nton, nu ta presta atenson
na nos manera di prega.
I nu ta lenbra di tra ténpu pa pripara.
É bon kumesa un konbérsu ku pesoas,
má tanbê nu krê pâpia ku es di algun kuza
ki pode djuda-s.
Tanbê nu pode lenbra
di sta sienti i priparadu
pa pruveta oportunidadis
pa da tistimunhu informal,
i lenbra di poi métas.
I si nos situason ta da,
nu krê lenbra di faze un prugrama
pa partisipa na pregason tudu simana.
Nos obijetivu é “faze tudu kel ki nu ta pode
pa nu prega notísia sábi”
i mostra otus algen modi ki nu ta
ama Jeová i se nómi.
Kel sugundu kuza ki Ebreus 6:10
ta fla pa nu konsentra na el
é “kontinua ta sirbi kes santu”.
Na kel testu li,
“kes santu” krê fla kes skodjedu ku spritu santu.
Kes irmons ku irmans skodjedu
ku spritu santu di kel ténpu,
ta djudaba kunpanheru di txeu manera.
Es ta ofereseba dinheru ô kuzas material.
Paulu ilojia-s pa kel ki es fazeba
pa djudaba ses irmons ku irmans,
i pa kel ki es staba ta kontinua
ta faze pa djudaba es.
Kel prinsípiu ki sta na Ebreus 6:10
ta sirbi pa tudu sérvus di Deus oji.
Lenbra di faze kuzas dretu pa otus.
Nu ta fika kontenti óras ki un algen
ta mostra-nu bondadi.
Má nu ta fika más kontenti inda
óras ki amor ta motiva-nu pa nu da otus.
I ten txeu kuza ki nu pode faze
pa djuda otus algen.
Nu pode da kumida i ropa pa kes ki meste
ô pa kes ki sta ta sufri pamodi
un dizastri na naturéza,
duénsa i pirsigison pamodi ses fé.
Otu manera é ilojia
i inkoraja kes irmons na nos kongregason.
I un manera spesial di faze kuzas dretu
pa nos irmons é ora pa es.
Kuzê ki nu krê fla
é ma ka ta inporta kal ki é nos situason,
nos tudu nu pode aplika
kel konsedju ki sta na
Provérbius 3:27.
El ta fla:
“Ka bu dexa di faze kel ki é dretu pa
kenha ki bu debe faze-l,
si bu ta konsigi djuda.”
Óras ki nu ta lenbra di mostra amor
pa nómi di Deus i djuda otus,
nu ta mostra ma nu sta ta
uza nos mimória ku sabedoria.
Un kuza ki nu ka gosta
di nos mimória é ki alvês
nu ta lenbra di kuzas
ki nu ta gostaba di skese.
Kel-li ta kontise
prinsipalmenti óras ki nu pasa
pa injustisa ô nu ka tratadu ku ruspetu.
Sô di pensa na kes algen
ô na kuzê ki es faze-nu,
kel-li ta pô-nu ta guarda rankor,
pô-l na se lugar, ô ka kunfia na el otu bês.
Nu ben odja dôs izénplu diferenti.
Nu ben kumesa ku izénplu di Davidi i Simei.
Simei éra família di rei Saul,
i dja tinha txeu anu ki el staba ta
guarda rankor di Davidi
i el ta kulpaba Davidi
pamodi Saul ku se família tradu reinu.
2 Samuel kapitlu 16
ta fla ma Simei da Davidi
ku ses trópa ku pédra
i ku téra i ma el pidi-s praga.
Kel-li foi un grandi falta di ruspetu
ki Simei mostra.
Na verdadi, un di kes trópa di Davidi pidi-l
pa el dexa-l mata Simei,
má Davidi ka dexa-l.
Ku umildadi, el ka vinga di Simei,
má el dexa kuzas na mô di Jeová.
Davidi mante kalmu
i el kontrola se kabésa.
Kel-li foi un grandi izénplu.
Dipôs, kantu ki Davidi volta pa tronu,
Simei rapende i el pidi perdon.
Más un bês, Abizai krê mataba el,
má, más un bês Davidi ka dexa.
Davidi ti mésmu promete
i jura ma el ka ta mataba Simei.
Davidi lida ku kel asuntu li di un manera
ki nu ta odja klaru ma ta agradaba Jeová.
Má antis di Davidi móre,
repara kuzê ki el fla se fidju Salumon,
na 1 Reis 2:8, 9:
“Tanbê ten Simei, fidju di Jera,
kel benjaminita di Baurin.
É el ki maldisua-m kantu el pidi-m praga
duru na kel dia ki N bai pa Manain.
Má kantu el ben inkontra ku mi na riu Jurdon,
N jura pa Jeová: ‘N ka ta mata-u ku spada.’
Má gósi, ka bu dexa di kastiga-l
pamodi abo é un ómi ki ten sabedoria
i bu sabe kuzê ki bu debe faze ku el.
Poi se kabelu branku ta dixi
ku sangi pa Sipultura”.
Talvês Davidi tinha uns 60 i poku anu
kantu kontise kel situason ku Simei.
El tinha 70 anu kantu ki el móre.
Nton duránti tudu kes anu,
Davidi ka skese kuzê ki Simei faze.
El kontinua ta lenbra di kuzê ki el fazeba el.
Bíblia ka ta mostra
pamodi ki Davidi aji di kel manera la.
Má kel-li ta mostra
ma si un algen trata-nu
di manera injustu ô sen ruspetu,
pode ser txeu difísil iginora kel asuntu,
sikrê nu dexa pasa txeu ténpu.
I kel magua ki nu ta xinti
pode kontinua na nos korason pa txeu anu.
Nton, kuzê ki pode djuda-nu
púrdua kel algen
i para di pensa na kuzê ki el faze-nu?
Manera ki Jizus lida ku Pedru ta
inxina-nu modi ki nu debe púrdua otus.
Na kel noti ki Jizus prendedu,
Pedru prometeba Jizus
ma nunka el ka ta bandonaba el.
Má sô alguns óra dipôs,
Pedru nega ma el konxeba Jizus,
ka un nen dôs bês, má três bês.
Pensa na kel-li:
Jizus staba ta pasa pa kel momentu
más difísil di se vida na téra.
Má na kel óra ki más el mesteba di ajuda,
ses disiplu, i kel-li ta inklui se grandi
amigu Pedru, bandona-l.
Lógu ki Pedru da kónta di kuzê ki el fazeba,
el fika ta xinti kulpadu dimás i
ta txora ku txeu mágua.
Má modi ki Jizus trata Pedru?
1 Koríntius 15:5 ta fla ma,
dipôs ki el resusitadu,
el parse pa Pedru.
El uza kel oportunidadi
li pa poi Pedru ta
xinti kulpadu, i mostra ma el staba txeu
diziludidu ku el?
Nu ta atxa respósta na Markus 16:7.
Repara kuzê ki anju fla kes mudjer
ki bai pa sipultura di Jizus:
“Má nhos bai, nhos fla se disiplus i Pedru:
‘El sta bai nhos frenti pa Galilea.
Nhos ta bai odja-l la, sima el flaba nhos.’”
Nóta na Bíblia di Studu ta fla kes palavra li:
“Antis di Jizus parse pa tudu se disiplus,
primeru talvês el parse pa Pedru,
kantu Pedru staba el sô.
Kel preokupason li ki
Jizus mostra pa Pedru,
i tanbê pamodi kel anju fla nómi di
Pedru kantu el parse pa kes mudjer,
di serteza kel-li djuda
Pedru odja klaru ma Jizus
dja purduaba el pamodi
el negaba el três bês.”
Di serteza Pedru fika aliviadu.
É klaru ki Jizus ka skese
kuzê ki Pedru fazeba.
Má Jizus disidi lenbra,
ka di érus di Pedru,
má di kes bon kualidadi ki el tinha.
Jizus ka sô púrdua Pedru,
má el da-l priviléjiu di fortalese ses irmons.
Jizus dexa-nu un izénplu bunitu!
Si un algen ki nu ta fla
ma éra nos amigu magua-nu,
nu krê imita Jizus
i uza nos mimória ku sabedoria.
Odja últimu izénplu di modi ki nu
pode uza nos mimória ku sabedoria.
É sobri Davidi otu bês.
El lenbra di situasons na se vida
undi ki Jeová salva-l i djuda-l.
Kes lenbransa la da-l txeu kunfiansa
pa el lidaba ku prublémas más difísil.
Odja kuzê ki el fla na Salmu 27, vérsus 2 i 3:
“Kantu kes algen mau ataka-m pa kaba ku mi,
é nhas inimigu i kes ki staba
kóntra mi ki tropesa i kai.
Sikrê un izérsitu arma ses ténda pa es ataka-m,
nha korason ka ta ben xinti medu.
Sikrê es ben briga kóntra mi,
simé N ta kontinua ku kunfiansa”.
Di kuzê ki el staba disididu?
“Nha korason ka ta ben xinti medu”.
“N ta kontinua ku kunfiansa”.
Mi ku bo nu pode dizenvolve kel
mésmu kunfiansa ki Davidi tinha?
Nu pode sin.
Si nu uza nos mimória ku sabedoria.
Pur izénplu, dja bu kustuma sta
ta pasa pa un situason difísil,
bu ora ta pidi Jeová ajuda,
i dipôs bu odja modi ki el da-u forsa
i sabedoria pa bu lida ku kel prubléma
i modi ki el aji pa ajuda-u?
Lenbra di kel-li.
Dja bu kustuma krê faze
más na sirvisu di Jeová
i bu odja modi ki Jeová tra kes prubléma
ki bu atxa ma éra sima un montanha
ki ka ta dexaba bo alkansa bu méta?
Lenbra di kel-li tanbê.
Duránti nos vida, nu ta kria txeu lenbransa.
Óras ki nu ta lenbra di kuzas
ki kontise entri nos i otus algen,
nu krê konsentra na kes bon kualidadi
ki nos irmons ku irmans ten
i lenbra di tudu kes kuza dretu ki es faze.
I óras ki nu ta izamina nos korason,
nu krê sforsa pa tra sentimentus negativu,
sima rankor i inveja,
i kontinua ta dizenvolve kes bon kualidadi,
sima amor i perdon.
I pa sénpri nu lenbra
modi ki Jeová dja djuda-nu
na pasadu i modi ki es
sta ta djuda-nu gósi.
Nu pode ten serteza ma ka ta inporta
ki prubléma nu ben pasa pa el,
nu pode vense-s
si nu uza nos mimória ku sabedoria.
Alén di kes izénplu ki sta na Bíblia,
nu ten txeu izénplu
na nos ténpu di irmons
ki uza ses lenbransa di manera dretu.
Un di es, é irmon Don Schwenning.
El ten txeu lenbransa di mudansas
ki fazedu na organizason di Jeová
duránti ses anu di sirvisu pa el.
Kuzê ki el prende ku es?
Dja fazedu txeu mudansa i txeu kuza midjora
na organizason di Jeová na kes últimu 100 anu.
N pasa pa txeu di kes mudansa li.
Enbóra foi sabe i alvês N fika ku medu,
kes mudansa foi sénpri pa midjór.
N odja kuzas ta muda di ‘kóbri pa oru’.
Nha nómi é Don Schwenning.
Dja N ten más di 70 anu ta sirbi Jeová,
i nha obijetivu é sirbi-l pa tudu ténpu.
Nha pai prende verdadi kantu se
koléga di trabadju da-l un livru,
i poku ténpu dipôs nos tudu nu
kumesa ta sisti runion.
Kel-li foi un grandi mudansa pa nos,
má nu resebedu ku amor na kongregason.
Irmons ku irman, pô-m ta xinti ma N ta faze
párti di kongregason.
N ta fikaba kontenti di bai runion
i di xinti ma N tinha valor.
Alguns mudansa na organizason
foi fásil di intende i di seta-s.
Kantu N resebe Traduson di Mundu Novu,
pa primeru bês, N odja lógu ma kel-li
éra un grandi mudansa.
N ta amaba kel livru
i N ta leba un kapitlu tudu dia.
El éra fásil di intende.
É ka éra sima Traduson di Rei Jaime
ki N ta kustuma leba.
El djuda-m intende ma Jeová é un algen rial
i ma N ta pode sérba se amigu.
Pamodi kel-li, N faze prugrésu
i N batiza kantu N tinha 16 anu.
Dipôs ki N batiza i kantu ki N tinha 18 anu,
N dizignadu ajudanti di kongregason.
Un di kes primeru dizignason ki N dadu
éra faze studu di Bíblia na grupu
undi tinha txeu irmons
ki tinha más idadi i más spiriénsia ki mi.
Na komésu N xinti medu.
Obrigadu pamodi nhos ben.
I nu ben, aa...
Alvês éra difísil.
Alvês N ka sabia di kuzê ki N staba ta pâpia,
pur isu N ta papiaba sô di kes informason
ki staba na livru.
Má sikrê ku medu, irmon ku irmans
ta intendeba mi i es ta djudaba mi txeu.
N xinti ma Jeová staba ta da-m koraji
na nha novu dizignason.
Maioria di mudansa na organizason afeta-nu
di un manera ô di otu,
i kel mudansa di 1972 afeta-m txeu.
Ami éra sérvu di kongregason,
kel irmon ki ta tomaba kónta di tudu kuza,
i N tinha txeu responsabilidadi
na kongregason.
Foi na kel anu la ki organizason fla
ma ta tinha un grupu di
ansions na kongregason.
Foi difísil pa mi seta kel mudansa,
pur isu N fika ta xinti kulpadu.
N krê fikaba kontenti ku kel mudansa,
má ka foi fásil faze kel-li.
N ta atxa ma N bira más amigu di Jeová,
pamodi N faze txeu orason
sobri kel mudansa
i N pidi-l pa djuda-m intende-l.
N da kónta ma N meste odjaba kuzas
sima Jeová ta odja.
Ku ténpu N konsigi odja sabedoria di Jeová
na kel mudansa li.
Ten un grupu di ansion ta djuda-m txeu.
Pamodi más algen
ta djuda na toma kónta di kongregason.
I kel-li traze txeu benson.
Spiriénsia di kes irmon di idadi
i forsa di kes irmon
más jóven djuda-m txeu.
N odja ma kes palavra
di Provérbiu é verdadi:
“Ku konsedju di txeu algen
ta ten bons rezultadu.”
Sénpri ta ben ten mudansas,
i nu meste kolabora ku Jeová.
El krê pa nu apoia kes mudansa
pamodi kel-li é bon pa nos.
Na komésu nu pode ka intende kel-li,
má dipôs nu ta intende.
I é klaru, kes mudansa más
grandi inda sta pa ben.
Nu sta vive na un di kes momentu
más spesial pa sirbi Jeová.
Nton si bo é jóven, ka bu perde ténpu.
Prende tudu kel ki bu ta pode
sobri organizason di Jeová.
Faze párti di el.
Mante okupadu na bu kongregason.
Pâpia ku ansions
i dexa-s sabe ma bu sta dispostu na seta
kalker tipu di dizignason.
Dexa Jeová gia-u.
Kunfia na el, i bu ta ben ten un vida sábi
i xeiu di alegria.
Gósi nhos da-m lisénsa,
N ten ki volta pa nha trabadju,
inda N ten txeu kuza pa faze.
Talvês é txeu difísil pa nos
imajina un kongregason
sen un grupu di ansions.
Má foi difísil pa irmon
Don seta kel mudansa li.
Kuzê ki djuda-l pensa
sima Jeová ta pensa?
El ora sobri kel asuntu,
i el sforsa pa intende pamodi
ki kel mudansa é midjór.
Nu ben odja modi ki
orason djuda dôs família
faze más pa ses irmon ku irmans
i ki benson ki es resebe pamodi
es resebe kes delegadu di
kongrésu spesial na ses kasa.
Na 2015, fazedu un kongrésu spesial
na nos sidadi, na Medellin,
i nu tevi priviléjiu di ser
un di kes ki konvidadu
pa ba resebe delegadus na nos kaza.
Na kel ténpu, dja N tinha txeu responsabilidadi.
24 óra ta parseba poku.
Nos fidju inda éra mininu,
el tinha 11 anu.
Nha mudjer staba ta rekupera
di un prubléma di saúdi,
i el fika preokupadu ma nu
ka ta konsigiba djudaba irmons.
Nu pensa: ‘Kel-li é ka un bon óra
pa nu resebe delegadus na nos kaza.
Nu ka konsigi seta kel priviléjiu li gósi.’
Désdi ki nos fidju nase,
sénpri nu pidi Jeová na orason
pa djuda-nu inxina nos
fidju ama Jeová i sirbi-l.
Nu krê fazeba kuzas ki ta djudaba el
ser más amigu di Jeová.
Nton, un dia nha mudjer fla-m:
“Jeová dja da-nu txeu kuza, nton nu imita-l,
i nu da nos irmons kel ki es meste.”
Nton dipôs di txeu orason, nu dividi tarefas,
i nu faze kel ki nu mesteba
asi pa nu pode tinha lugar prontu
pa resebe nos irmons ku irmans.
Dipôs, kes irmon txiga,
es ta mostraba txeu amor i es éra sinseru.
I ta parseba sima ki dja tinha
txeu anu ki nu konxeba es.
Nu xinti inkorajadu di tene-s li ku nos,
i nu odja modi ki es ta amaba kuzas spritual.
Tanbê nu repara ma es tinha bon rotina spritual.
Kel amizadi ki nu dizenvolve ku kes irmon
i kes konbérsu ki nu tevi
afeta nos fidju di manera puzitivu.
Un dia, nha fidju fla-m:
“Papa, N krê pâpia ku bo
sobri un kuza txeu inportanti.”
I di fundu di se korason,
el fla modi ki el ta amaba Jeová.
I el fla: “Papa, N krê batiza.”
Óras ki N ta pensa na kes
irmon ki fika na nos kaza,
ta fika klaru ma Jeová responde nos orason.
Ti oji nos é amigu di kes irmons.
Nu bai vizita-s i nu lenbra di kes momentu
sábi ki nu pasa na kel kongrésu.
Tudu kel-li pô-nu ta xinti kontenti
di abri nos kaza i nos korason pa nos irmons
i mostra-s nos amor.
Kel-li ka ten présu!
El da-nu txeu alegria.
Nunka N ka imajinaba
ma resebe algen na nos kaza
ta sérba respósta pa orason di mi ku nha mai.
Abraon resebe algen stranhu dretu,
nton kantu N obi sobri kongrésu spesial,
N pensa: “Kel-li é nha xansi.
Pamodi sénpri N krê resebeba
irmons na nha kaza.”
Na kel ténpu, na undi ki nu ta moraba,
nu ka tinha txeu mobília.
Sô nu tinha kes kuza ki
nu mesteba pa kume i deta.
I nos méza di kume éra pikinotinhu.
Má tinha otu prubléma.
Ami éra kóntra kel disizon.
N flaba es ma N ka ta djudaba es
i nen pa es ka pidi-m ajuda.
Nha irman ka staba ta sirbi Jeová.
N staba konsentradu dimás
na universidadi i na nha trabadju.
N staba ta xinti mi sô,
ku un vaziu déntu mi.
N staba tristi dimás.
Kes irmon ki nu resebe na nos kaza
éra umildi, es éra divirtidu,
es ta mostraba amor i éra fásil pâpia ku es.
Es ta kumeba kalker kumida ki nu daba es,
es ka ta skodjeba.
Nu ta xintiba sima si dja tinha
un monti ténpu ki nu konxeba.
Kuzê ki mexe ku mi más txeu
é má es éra filís.
N da kónta ma es éra filís
pamodi es staba ta sirbi Jeová.
Ami é gratu pamodi nha mai ku nha irman
resebe kes irmon.
I konxe kes irmon
i odja ses bon izénplu,
foi kel ki N staba ta meste
pa motiva-m pa N konxe
Jeová i bira se amiga.
N pidi un studu di Bíblia,
N ba ta faze prugrésu,
i na dia 7 di marsu di 2020 N batiza.
N ganha amigus di verdadi
i N sabe ma nu ta ser amigu pa tudu ténpu.
Inda nu ta pâpia ku kunpanheru.
I nu ten un grupu na redi sosial
ki nu ta manda mensajen.
Nómi di kel grupu é: “Un família grandi.”
Resebe kes irmon foi más di ki un prezenti.
El foi un benson grandi di Jeová pa nos família.
Un família fórti,
novus amigu
i lenbransas ki ta da-nu alegria pa tudu ténpu.
Kes-li é sô alguns benson ki nu pode ten
óras ki nu ta faze kuzas dretu pa otus algen.
Klaru ki, nen tudu lenbransa é sabe.
Kuzê ki nu debe faze si nu sta kontinua
ta lenbra di kuzas ki nu ka krê lenbra?
Nu presta atenson na lisons ki nu pode tra
na es adorason di palmanhan ku téma:
“Nos tudu ta tropesa txeu bês.”
Ten txeu kuza ki nu pode fla
sobri Tiagu 3:2, ki ta fla:
“Nos tudu nu ta tropesa txeu bês”.
I kes versiklu dipôs di Tiagu 3:2,
ta mostra ma el sta ta pâpia
di tropesa na nos palavra
ô sima nóta di rodapé ta fla,
“fadja” na nos palavra.
Duránti anus, dja nu obi txeu konsedju
sobri modi ki nu pode midjora na kuzê ki nu ta fla.
Dja nu obi konsedjus sima kes-li:
“Pensa antis di bu pâpia”,
ô “Konta ti 10”,
ô “Obi ku más atenson”,
ô otus konsedju sobri modi ki nu
ta kontrola kuzê ki nu ta fla.
I tudu kes-li é bons konsedju.
Má dja bu repara ma sikrê ku tudu kes konsedju li
i ku spiriénsia ki nu ten na vida,
simé nu ta fla kuzas ki ta mágua otus algen?
Nu ta diskuti ô difende nos kabésa.
I dipôs nu ta pensa:
‘Pamodi ki N fla kes palavra la?’
Kel ilustrason ki Tiagu faze sobri
tropesa é un bon ilustrason.
Óras ki nu tropesa nu ta fika ku vergónha
i nu ta djobe na nos vólta pa
odja si ningen ka odja-nu.
I dipôs, kal ki é primeru kuza ki nu ta faze?
Nu ta djobe pa txon pa odja
kuzê ki pô-nu ta tropesa.
Talvês tinha algun kuza na txon ki dexadu la,
ô talvês kel txon ka staba niveladu i nu tropesa.
Ô talvês nu ka staba ku atenson
i nu tropesa na nos pé.
Alvês N ta tropesa óras ki N ta dixi skada
pamodi N ta sta ta pensa na otus kuza
i N ka ta djobe na undi ki N sta ta poi pé.
Ô alvês un algen ta pô-nu pé,
pa tenta pô-nu ta tropesa.
Má kel-li ka ta kontise txeu bês.
Nton, oji na nos diskursu, nu sta ben odja modi
ki nu pode djobe kuzê ki pô-nu ta tropesa.
Un pontu inportanti é ki kada bês ki nu tropesa,
é un oportunidadi pa nu prende.
Dipôs ki nu fadja, nu meste tra ténpu pa nu pensa:
‘Na ki situason ki N staba
kantu ki N aji di kel manera la?
Modi ki N pode identifika kel situason la
i aji di midjór manera óras ki el kontise otu bês?’
Óras ki nu ta identifika ki situason
ki pode pô-nu ta fla kuzas mariadu,
kel-li ta djuda-nu pripara
i kontrola manera ki nu ta reaji
antis di fla kalker kuza envês di
rapende dipôs ki dja nu fla algun kuza.
Si sénpri nu kontinua ta da kes
mésmu fadja na kuzê ki nu ta fla,
nton na verdadi nu ka sta ta
prende ku kada un di kes fadja.
Ten txeu motivu ki pode
pô-nu ta tropesa ô ta fadja,
sima dúvida, medu i orgulhu.
Má, nu sta ben pâpia di otus kuza
i odja modi ki nu pode
identifika-s pa nu pode ivita-s.
Kel primeru kuza é sta avontádi dimás.
Nu pode sabe txeu kuza sobri kel algen
ki alvês nu pode ka trata-l ku ruspetu.
I talvês kel-li kontise ku Tiagu
ki skrebe nos testu di oji.
N krê pa nhos pensa un bokadinhu na kel-li:
‘Modi ki foi pa Tiagu
kria djuntu ku Jizus, se irmon más grandi?’
Talvês el ta pensaba:
‘Bo é kel fidju ki mamá más gosta.
Bu ta atxa ma bo é perfeitu.’
I dipôs el ben diskubri ma el éra.
Na komésu, Tiagu ka rekonhese
ma Jizus éra Misías.
I un di kes motivu é talvês
pamodi Tiagu kria djuntu ku el.
Markus 3:21 ta djuda-nu intende
kuzê ki alguns família di
Jizus ta pensaba di el.
Li ta fla: “Má kantu se família
obi kuzê ki staba ta kontise,
es sai pa ba pega-l [Jizus],
pamodi es staba ta fla: ‘Dja el bira dodu.’”
Nóta na Bíblia di studu ta fla ma talvês
Tiagu éra un di kes família ki fla kes palavra la.
Nton bu ta konsigi imajina modi ki Tiagu xinti
dipôs ki kontise kel ki sta na 1 Koríntius 15:7?
1 Koríntius 15:7 ta fla:
“Dipôs el parse pa Tiagu,
i dipôs pa tudu kes apóstlu.”
Bu ta konsigi imajina modi ki Tiagu xinti
kantu Jizus parse pa el i es
tevi un konbérsu sinseru?
Talvês el xinti kasábi pamodi
alguns kuza ki el flaba Jizus
i gósi el ta rekonhese ma Jizus éra Misías.
Talvês dja bu da kónta ma alvês
bu ta fla bu maridu ô bu mudjer
alguns kuza ki nunka bu ka ta flaba más ningen.
Talvês kes algen di bu família sabe dretu
modi ki es ta dexa-u xatiadu asi pa bu fla kuzas
ki bu ta ben rapende dipôs.
Es pode faze kel-li di propózitu ô talvês nau.
Pensa na kel-li: ‘Si kel algen ka é di nha família,
N ta flaba el mésmu kuza?’
Si nau,
talvês nu debe pensa na modi ki nu ta trata
kes algen ki nu konxe dretu
i pripara pa modi ki nu ta reaji óras ki es xatia-nu.
Nu meste intende kuzê ki
ta pô-nu aji di un manera
i para di aji di kel manera.
Ka bu tropesa óras ki un algen
ki bu konxe dretu ta xatia-u.
Intende prigu i pripara pa ivita-l.
Otu situason é óras ki nu ta
xinti ma nu ten ki difende.
Un kuza inportanti na kel situason la
é tenta intende modi ki nu sta ta xinti.
Ki sentimentu ki sta ta pô-nu
ta aji di kel manera la?
É siumis?
É orgulhu?
Nu sta pensa sô na nos?
É pamodi un prubléma ki nu
tevi na pasadu ku kel algen?
Si nu analiza kel situason dretu,
nu ta intende ki sentimentu ki
sta pô-nu ta fla kuzas negativu.
I kel-li ta djuda-nu dizenvolve kualidadis
ki ta pô-nu ta aji di manera diferenti.
Pur izénplu, odja alguns situason
ki nu pode aji mariadu:
Ningen ka sta obi-nu.
Kal ki é nos reason?
Nu pode pâpia más altu ô grita.
Nu ka sta ser ruspetadu.
Modi ki nu ta reaji?
Nu ka ta mostra ruspetu tanbê.
Nu pode akuzadu di manera injustu.
Modi ki nu ta reaji?
Nu pode tenta difende nos kabésa
i prova ma nu sta sértu.
Otus algen pode ka intende-nu.
Modi ki nu ta reaji?
Nu ta fika dizanimadu i nu ta para di pâpia.
Na fin di kapitlu 3 di Tiagu na versiklus 14 ti 18,
ta splika modi ki nu pode troka kes
sentimentu negativu pa kes puzitivu.
Tiagu 3:14-18 ta fla:
“Má, si na nhos korason nhos tene
siumis fórti i nhos ta kria konfuzon,
ka nhos ingaba i ka nhos
konta mintira kóntra verdadi.
Kel-li é ka sabedoria ki ta ben di riba.
Kel tipu di sabedoria li é di téra, di animal, di dimónis.
Pamodi na undi ki ten siumis i konfuzon,
tanbê la ta ten dizórdi i tudu tipu di kuza mariadu.
Má kel sabedoria ki ta ben di riba,
[i li nu tene alguns di kes kualidadi ki nu pode troka]
primeru di tudu el é puru,
dipôs el é di pas, ikilibradu,
prontu pa obi, xeiu di mizerikórdia i di bons frutu.
El ta trata tudu algen igual i el é ka finjidu.
Tanbê, kel frutu di justisa ta simiadu
undi ki ten pas pa kes ki ta inpenha pa pas.”
Si bu ten ki difende pensa na kel-li:
modi ki bu ta reaji i kuzê ki bu krê fla?
Talvês bu pode pensa na kuzê
ki bu krê fla ti ki bu aji midjór.
É fásil faze kel-li ku un algen ki nu konxe dretu
pamodi txeu bês nu ta konsigi imajina
kuzê ki nu ta ba fla i kuzê ki es ta ba fla.
I tenta trena kel-li.
Si na komésu bu ka aji dretu,
kontinua ta trena na bu menti
ti ki bu konsigi aji más midjór.
Óras ki bu ba pâpia ku kel algen,
kel konbérsu talvês pode ser
diferenti di kel ki bu trena.
Má, objetivu di kel trenu é ki el ta ba djuda-u
kontrola bus sentimentu
i kontinua konsentradu na bu
obijetivu di faze pas ku otus algen.
Si nu pripara nos menti di kel manera li
i nu prende ku érus di pasadu,
nu ta sta más ben priparadu
pa kontrola kel ki nu ta fla.
Pa djuda-nu intende kel pontu prinsipal di kel frazi li:
Kada bês ki nu tropesa,
é un oportunidadi pa nu prende,
nu ben uza kel ilustrason ki sta na Tiagu 3:6.
El ta fla ma língua é sima “lumi.”
Modi ki bu ta xintiba si bu pegaba un lumi sen krê?
Bu ta xintiba kasábi.
Má sô kel-la ta txiga?
Nau.
Bu ta tenta sabe kuzê ki poi kel lumi ta pega.
Ô bu ta pidi otu algen pa faze kel-la pa bo.
Na kalker situason kuzê ki bu ta prende?
Bu ka debe dexa fogon abértu,
ô ku lumi altu dimás sen ningen pa djobe,
ô da ku agu na un lumi ki sta fórti
pamodi bu ta atxa ma el ta paga.
Bu prende kuzê ki bu ka debe faze otu bês.
Nton, faze mésmu kuza óras
ki bu ta tropesa na palavras.
Analiza kel situason.
Kuzê ki bu prende, ki pode djuda-u
ka aji di kel mésmu manera otu bês?
Lenbra, kada bês ki nu tropesa,
é un oportunidadi pa nu prende.
Óras ki nu ka ta kontinua ta pensa na nos éru
má envês di kel-la nu ta konsentra
na lisons ki nu pode prende,
ti mésmu kes lenbransa kasábi,
pode djuda-nu.
Xéfi di família ten un
responsabilidadi inportanti.
É ka fásil da família tudu kel
ki es ta meste na sentidu fíziku,
emosional i spritual.
Nu ben odja modi ki
un pai faze tudu kel-li
na múzika ku vídiu di es mês
ku téma: Dizisti é ka soluson.
Dizisti é ka soluson.
Deus é nha proteson, 
nha forsa i salvason. 
Dizisti é ka soluson. 
Dja N intende ma
di nha ladu el sta. 
Di nha ladu el sta. 
 Kes prubléma ki vida dja traze-m 
Sta tra-m pas i nha sonu tanbê. 
N ta luta txeu pa medu ka da-m. 
Má sforsa mi sô, kel-la ka ta djuda-m. 
Dexa tudu la pa trás, 
dja N pensa txeu na el. 
Má Deus é nha abrigu 
i N krê sta bera d’el. 
Dizisti é ka soluson. 
Deus é nha proteson, 
nha forsa i salvason. 
Dizisti é ka soluson. 
Dja N intende ma
di nha ladu el sta. 
Dja N intende ma
di nha ladu el sta. 
Si nu djunta txeu pédra frenti nos, 
Nos kaminhu ta ser duru i margós. 
Lenbra di kel-li i pensa txeu n’el 
Ta da-m forsa pa N kontinua ser fiel. 
Dexa tudu la pa trás, 
dja N ka sta pensa n’el. 
Jeová é nha abrigu 
i N krê sta bera d’el. 
Dizisti é ka soluson. 
Deus é nha proteson, 
nha forsa i salvason. 
Dizisti é ka soluson. 
Dja N intende ma
di nha ladu el sta. 
Dja N intende ma
di nha ladu el sta. 
Dja N intende ma
di nha ladu el sta. 
Deus é nha proteson, 
nha forsa i salvason. 
Dizisti é ka soluson. 
Dja N intende ma
di nha ladu el sta. 
Xéfi di família,
Jeová ta odja modi ki bu ta ama
i bu ta kuida di bu família.
Pode ka ser fásil, má dizisti é ka soluson.
Jeová ta bai djuda-u
bo ku bu família ten bons rezultadu.
Kel grupu di vídiu Djobe tizoru,
djuda-nu odja modi ki nu pode tra
más pruvetu di nos leitura di Bíblia.
Dja-nu txiga na últimu livru di Skrituras Ebraiku,
ki é Malakias.
Nu ben odja kuzê ki nu ta prende ku Jeová,
“kel ki ta purifika”.
N ka sta konsigi kridita ma dja nu sta ta studa
kel últimu di kes 12 proféta!
Ami tanbê.
Kel ténpu ki nu pasa ta studa-s pasa faxi.
Kuzê ki djuda-m más txeu
é kes sujiston di djobe modi
ki éra vida di pesoas
na ténpu ki kada livru skrebedu.
Kel-li é un bon sujiston.
Nton, kuzê ki bu gosta más txeu na Malakias?
Livru di Malakias é ka sô kel
últimu livru di Skrituras Ebraiku,
má tanbê el é kel últimu ki skrebedu.
Nton, mésmu dipôs ki Jeová
mostra paxénxa ku kes israelita,
i el manda txeu proféta pa djuda-s,
inda es staba ta faze kuzas ki Jeová ta ôdia.
Sin, kes dôs primeru kapitlu ta
mostra kuzê ki staba ta kontise.
Povu staba ta disruspeta Jeová,
ta oferese sakrifisiu sen valor
i alguns ti bandona ses mudjer,
talvês pa kaza ku mudjeris
ki ta adoraba deuzis falsu.
I kes saserdótis ta setaba kel-li.
N ta atxa ma si es éra nha povu,
N ta dizistiba di es.
Má Jeová ka ta fazeba kel-la.
É pur isu ki el manda Malakias.
É simé.
Timenti N staba ta lé,
ten uns palavra ki txoma-m atenson.
N ta fika dimiradu ku kantu
kuza ki nu pode prende
óras ki nu ta presta atenson na kes palavra.
É verdadi.
Nton, ki palavras ki txoma-u atenson?
Kapitlu 3, versiklu 3 ta fla ma
Jeová ‘ta ben xintaba sima un algen ki ta derete
i purifika kes fidju di Levi.’
Kes dôs palavra, “xinta” i “purifika,” pô-m ta pensa.
Asériu?
N piskiza kes dôs palavra li
na Bibliotéka na internet di Tori di Vijia
i N atxa un referénsia ki ta fla:
“Na ténpu antigu trabadju di
purifika metal ta lebaba txeu ténpu.
Pur isu, kel algen ki ta derete ta xintaba
i el ta speraba ti ki kel metal bira sima un spedju
ki ta daba pa odja se róstu na el.”
Kel-li pô-m ta pensa:
‘É ka kel-li ki Jeová sénpri
ta fazeba ku povu di Israel?’
El dexa-s pasa pa provason, el koriji-s
i sénpri el ta mandaba profétas.
Ku paxénxa Jeová staba
ta purifika ses adorason.
Jeová é kel tipu di algen la própi.
Sikrê algen diziludi-l,
nunka el ka ta trata-l mariadu,
i nen el ka ta dizisti di el faxi.
Ku paxénxa el ta xinta, i el ta purifika-l.
É kel-li ki el faze ku Israel,
i ki el ta faze ku nos oji.
Nu pode purifikadu através di
konsedju di Palavra di Deus,
ô di se sérvu ô através di un
provason ki nu sta pasa pa el.
Kel konsedju pode duê
ô kel provason pode ser difísil
i ti el pode dura más
di kel ki nu ta kreba.
Má é kes kuza li ki pode
purifika nos adorason.
É simé.
Má kuzê ki kel-li ta
inxina-nu sobri Jeová?
Kel-li ta inxina-nu ma Jeová ta
odja modi ki pesoas pode muda.
Nton sikrê ta duê,
Jeová ta purifika-nu pamodi
el ta odja kuzê ki nu pode bira.
Nton nu pode fla ma kel-li é ka
un manera di Jeová kastiga-nu,
má é un manera di el mostra-nu amor.
É kel-la própi.
É pur isu ki Jeová poi Malakias
ta skrebe kel-li na komésu di se livru:
“N mostra nhos amor.”
Má nu kontinua ta pensa sobri kel-li.
Es Sentinéla di 2018
ten bons pergunta, sima:
“Modi ki es asuntu ta pô-m ta xinti?”
i “Modi ki N pode sigi es prinsípiu?”.
Kes-li é bons pergunta pa nu pensa na el.
I si nu pensa dretu,
alvês ta duê óras ki nu ta dadu konsedju.
Má si nu lenbra ma Jeová ta
koriji-nu pamodi el ta ama-nu,
ta fika más fásil nu seta kel konsedju.
Jeová ta koriji-nu pamodi el ta odja
ki tipu di algen ki nu pode bira.
Alvês, N ta pensa na kes pergunta li:
‘N sta ta dexa Jeová purifika-m mê?
Óras ki N ta odja alguns kuza
na mi ki N meste midjora,
N ta ora manenti pa Jeová sobri kel-li?
Óras ki N ta resebe un konsedju
através di Bíblia, ô di organizason,
N ta pensa ku kuidadu na modi ki
N pode aplika-l ô N ta iginora-l?
Óras ki Jeová ta dexa-m
pasa pa un provason,
N ta konsentra na kel provason
i N ta guarda rankor?
Ô N ta dexa Jeová pô-m
ta bira un algen mansu
i ki ta mostra paxénxa?
Kuzê ki Jeová krê pa N odja na mi?
Kes-li é bons pergunta.
Óras ki algen purifika un metal,
ku kalor i ku ténpu, kes inpuréza ta parse.
Nton, óras ki provasons ô pirsigison
dura más di kel ki nu staba ta spera,
nu pode xinti kasábi.
Nu pode da kónta di sentimentus
i motivasons ki nu ka sabia ma nu ten.
N sabe ma kel-li dja kontise ku mi
i pa N fla verdadi, N ka reaji mutu dretu.
N fla kuzas ki N rapende,
N xinti kuzas ki N ka gosta
i N fika dizanimadu.
N ta atxaba ma mi éra un
algen más madura di ki si.
N ta intende-u.
Má é pur isu ki kel konparason ta konsola-nu.
Jeová sabe ma di vês en kuandu,
nos inperfeisons pode parse,
má é ka na kel-li ki el ta konsentra.
El ta konsentra na kes kuza di valor
ki ten na nos, ki é sima oru.
Nton, óras ki Jeová ta djuda-nu
da kónta di un frakéza,
nu pode odja kel-li sima un oportunidadi
di tenta kaba ku el,
envês di un motivu pa nu dizisti.
Bon pontu.
Jeová pode dexa-m pasa
pa un situason kasábi
pamodi el sabe kuzê ki N pode bira.
Di serteza el ta fika txeu kontenti
óras ki el ta odja-nu ta imita ses kualidadi.
É simé.
Tanbê nu pode imita manera di ser di Jeová
na manera ki nu ta odja otus algen.
N pode pensa:
‘N ta odja kes kualidadi ki es ten?
Kel tipu di algen ki es ta
ben ser na mundu novu?
Ô N ta konsentra sô na ses fadja?’
Sin.
‘N ta konsigi odja kuzê
ki Jeová gosta na es?’
Talvês kes kuza ki ta irita-m
pode djuda-l na un sértu dizignason.
Kel-li é un bon pontu.
Kel-li tanbê ta sirbi pa nos kazamentu.
N krê konsentra na kes bon kualidadi,
ki é sima oru, ka na kes fadja ô frakéza.
Sima Jeová, N krê konsentra na
kel algen ki nu pode ser na futuru,
ka ta inporta kantu ténpu ki dja nu ten kazadu.
Uau! Nu atxa bons tizoru sô na un versiklu!
É simé.
Nu prende txeu kuza pamodi nu djobe
modi ki éra vida di pesoas na kel ténpu.
Nu piskiza alguns palavra
i nu midita na modi ki nu pode aplika-s.
Inda ten txeu kuza ki nu pode prende,
sima modi ki livru di Malakias
sta ligadu ku Misías,
dja ki el tene txeu profesia.
É simé.
Malakias é kel últimu
proféta di Skrituras Ebraiku
antis di Misías parse.
Má se mensajen ti inda é inportanti pa nos.
Malakias profetiza sobri Juan Batista
i Juan Batista ta leba-nu pa Jizus.
Umm, interesanti!
Má tanbê, kuzê ki kel livru li ta inxina-nu
sobri modi ki Jeová ta kuida di mudjer?
Ô kuzê ki kes palavra “propriadadi
spesial” ta siginifika pa nos?
Inda ten txeu tizoru ki N ten vontadi di atxa.
Nu prende txeu kuza ta
studa sobri kes proféta.
Na kada un di kes kapitlu
nu odja amor lial di Jeová,
se mizerikórdia, puder
i modi ki el ta preokupa ku nos.
Nu prende txeu sobri
manera di ser di Jeová.
Nton nu kontinua ta faze piskiza.
Inda ten txeu kuza ki nu pode
prende na Palavra di Deus.
Ka ten ningen ki ta purifika sima Jeová.
Ku paxénxa el ta mostra-nu
modi ki nu pode midjora
i modi ki se organizason pode midjora.
Pensa na kel pergunta li:
‘Modi ki Jeová sta ta refina-m,
pa N bira un sérvu más midjór di sel?’
Nu fika kontenti di prende
sobri kes 12 proféta
na kes vídiu di Djobe tizoru.
Pa faze vídiu ki ta parse rial,
ekipa di produson meste
kria senáriu sima kes-li:
un vila di Israel,
un apartamentu di nos ténpu,
ô kalker otu lugar.
Dja bu kustuma pensa
modi ki es ta faze kel-li?
Nu ben odja.
Objetivu prinsipal di faze kalker vídiu é inxina.
I pa kel-la, nu ten ki toka korason.
Pur isu, nu meste poi kes séna di vídiu
ta parse rial pa kes algen ki sta ta sisti.
Lógu na komésu di un prujétu nu ta pergunta:
Nu ta pode uza un lugar ki dja izisti,
ô nu ten ki kria un novu senáriu?
Dja ki nu ta trabadja ku kontribuisons,
nu krê uza-s di midjór manera.
Nu sabe ma nos irmans ku irmans
ta trabadja duru pa ganha dinheru,
pur isu é inportanti nu
uza kontribuisons dretu
óras ki nu ta kria kes senáriu.
Nton antis di nu kria un senáriu,
primeru nu ta djobe si ka ten
ninhun otu lugar ki nu pode uza.
Alvês irmons ku irmans ta dexa-nu
uza ses kaza pa un ténpu.
Tanbê nu pode pidi autorizason
pa uza alguns lugar públiku.
Ô nu pode uza un propriadadi ki é di Betel.
Na un vídiu, ekipa di produson meste
gravaba un séna na un ospital.
Má envês di kria un senáriu
ô di bai pa un ospital,
es atxa un janela na un propriadadi di
Betel ki ta daba dretu pa kel séna.
Es uza kel-la pa faze un párti di kel séna
i dipôs es uza un vídiu di un
bebé ki dja staba gravadu.
Asi es konsigi faze kel séna faxi.
Alvês, nu ta da kónta ma nu ka ta
konsigi uza un lugar ki dja izisti,
pur isu nu ta kumesa ta
pensa na kria un senáriu.
Óras ki irmons disidi kria un senáriu,
kel algen ki ta dizenha tudu
kuza ki ta bai parse na vídiu
ta faze un runions ku es,
pa es djobe kuzê ki es meste.
Irmons ta trabadja pa faze un lista di
kes kuza ki es meste pa parse na vídiu
i na ki órdi ki es krê mostra-l,
asi pa pasa kel mensajen.
Kel-li ta djuda-nu intende kuzê
ki kada séna ta bai mostra
i na kuzê ki nu debe konsentra na el.
Asi nu ta kria sô kel ki nu meste
pa nu konta kel stória.
Óras ki bu ta trabadja na konstruson,
bu ta faze kuzas ki ta dura txeu ténpu.
Má kria un senáriu, é diferenti.
Nu krê pa es ser fásil di arma i fásil di dizarma.
Má sikrê el ta dura poku ténpu,
nu ta krê pa el parse bunitu.
Txeu bês nu ta faze kuzas ki ta parse rial,
má pesoas ka meste uza-l.
Pur izénplu kuzinha.
Nu pode disidi faze un kuzinha
má kes pórta i gaveta ka ta abri.
Tanbê, enbóra na un senáriu
nu ka ta faze andar di riba,
nu pode faze skada pa da
ideia ma ten un otu andar.
Nu ta popa ténpu i dinheru.
Óras ki nu ta kria un senáriu, txeu bês
nu ta uza paredis falsu ki ta da pa faze antis.
Es é fásil di faze i es é fásil di arma
pa kria un senáriu.
I óras ki nu tirmina di uza-s, nu ta guarda-s.
Dipôs di kel prujétu,
si es pinta kel prujétu falsu
ô poi algun kuza na el,
nu ta tra kel xapa di madera
i nu ta tra kalker kuza ki nu
uza pa prega kel madera.
Dipôs, nu ta poi un xapa di
madera finu di uns 6 milímitru.
Asi nu ta pode torna uza kel paredi falsu.
Alguns di es, dja nu ten
más di 9 anu ta uza-s.
Óras ki nu ta kria un senáriu,
nu ta kustuma pensa di ki otus manera
ki nu pode uza-l.
Pur izénplu, kantu ki nu staba
ta faze drama di Ezekias,
“Ó Jeová, ...Confio em Ti“,
irmons pidi-nu pa nu uza tudu
kuza ki nu ta pode na otus vídiu.
Dja pasa uns 10 anu
i inda nu sta ta uza kes mésmu kuza
ki nu uza na drama di Ezekias.
Nton dja ten txeu anu ki nos dipartamentu
sénpri ta djobe manera pa nu
uza kes kuza ki dja nu uzaba.
Pur izénplu, un di kes senáriu
ki uzadu na vídiu di Juzias,
uzadu na vídiu di Neemias i
na kel grupu di vídiu di Davidi.
Tanbê nu tinha un senáriu ki nu
uzaba pa un sala di aula di nos ténpu,
dipôs pa un sala di aula di pasadu
i tanbê pa un kaza di Mérka di Sul.
Nu faze un senáriu di un Salon di Reinu
ki nu uza na txeu vídiu,
el fazedu na un bon tamanhu pa vídiu.
Kel-li krê fla ma diferenti
di un Salon di Reinu rial,
el ta parse xeiu sikrê ku uns 30 algen.
Kel párti di trás di Salon di Reinu
tanbê uzadu di otus manera.
Pur izénplu, nu pô-l ta parse ku un kuartu
i ku un lugar di faze intrevista.
Óras ki nu ta torna uza un
senáriu pa faze un otu vídiu,
nu ta fika preokupadu si pesoas ta rekonhese
kes kuza ki nu uzaba antis.
Pa kel-li ka kontise nu ta
uza otus mobília i dikorason.
Nu meste sô faze alguns mudansa
pa kel senáriu muda konpletamenti.
Nu gosta di kria senárius bunitu i ki é izatu,
má nu ta fika más kontenti inda
óras ki nu ta ranja soluson
pa problémas ki ta parse
ô faze un trabadju ki é
konplikadu di manera sinplis.
É un grandi priviléjiu trabadja djuntu
ku txeu irmon i irmans ki ten txeu taléntu
i kapasidadi pa rezolve prublémas.
Es ta faze un senáriu ki ta parse sinplis,
má óras ki nu filma el ta fika spetaklu.
Es ta faze tudu kel-li pa irmons ku irmans
pode prende kuzas inportanti.
Kel-li ta toka nos korason.
Nos vídius é un grandi
prizenti di Jeová!
Di serteza gósi nu
ta da-s más valor,
pamodi dja nu odja modi
ki nos irmons i irmans
ta sforsa txeu pa grava
kes vídiu di organizason.
Na prugrama di es mês,
nu odja modi ki nu pode uza nos
lenbransa dretu pa agrada Jeová
óras ki nu ta seta mudansas,
óras ki nu ta faze kuzas dretu pa otus
i óras ki nu ta dexa Jeová refina-nu.
Na vídiu di es mês,
nu sta ba vizita Kanbodja.
Kanbodja ki ta fika na Ázia,
é konxedu pa se kultura bunitu
i pa ses kumida sábi.
Kes algen di la ta bai pa merkadu
pa kunpra kes kuza ki es meste
pa faze un kumida ki es gosta txeu
ki txoma, ‘amok trei’,
ki é pexi ku karil enbrudjadu na folha di banana.
Fóra di sidadi ten txeu lugar bunitu.
Bu pode odja kaxuera grandi
i na florésta bu pode odja kes animal selvajen
sima elifanti di Ázia
i kel tipu di pasu li ki txomadu ibis jiganti.
Tanbê bu pode odja kanpu
bunitu xeiu di flor di lótus.
Na Kanbodja es ta faze
un tipu di zircon diferenti
ki ten kor azul ki es ta
txoma azul di Ratanakiri.
Pa poi kel pédra ta ten kel kor,
kes algen ki ta faze-l,
ta kenta-l ti ki el ta muda di kor.
Na 1958 misionárius txiga na Kanbodja
pa kumesa ta prega notísias sábi.
Pa volta di anu 1965,
misionárius sima George i Carol Crawford,
tevi ki sai di país pamodi prubléma na pulítika.
Na verdadi duránti un ténpu
ka foi posível prega i faze runion la.
Pur isu, duránti kuazi 25 anu ka tevi
ninhun Tistimunha di Jeová na Kanbodja.
Má Jeová ka skese di kes algen
di Kanbodja ki éra sinseru.
Na 1993, trabadju di Tistimunhas di Jeová
bira legal i nos irmons vólta pa la otu bês.
Oji, 33 anu dipôs,
ten más di 1.200 Tistimunhas di Jeová la
i es ta faze más di 1.400 studus di Bíblia.
Txeu irmons ku irmans muda pa Kanbodja
pamodi el é un país bunitu
i pesoas di la é dretu.
É ka difísil di intende pamodi ki
txeu algen ki ta vizita Kanbodja
lógu ta gosta di kes algen di la,
ki é filís i sinseru.
Ka dura li, fazedu primeru Skóla pa
Pregadoris di Reinu na Kanbodja.
20 irmons ku irmans partisipa na kel skóla li.
I kel-li ta inklui un kazal misionáriu
ki tinha vontadi di kursaba na kel skóla li,
sikrê dja es baba pa Skóla di Jiliade na 1999.
Kes irmon ku irmans jóven,
studa djuntu ku kes misionáriu
ki ten más spiriénsia.
Dôs di kes alunu dizignadu pa
kongregason di Chbar Ampov.
Kel kongregason li ta djuda na
pregason na un tiritóriu izoladu
ki txoma Svay Rieng,
ki ta fika uns 120 kilómetru
ô 75 milha lonji di la.
La ten un grupu pikinoti ki
ta sisti runion pa internet
i irmons di kongregason Chbar Ampov
di vês en kuandu ta bai pa
la pa prega i inkoraja irmons.
Kes publikador di kongregason
di Chbar Ampov
i grupu Svay Rieng sta manda nhos
ses amor i ses mantenha.
Nu ta fika inkorajadu di odja
modi ki nos irmons na otus país
sta konsentradu na lova Jeová.
Kel-li é JW Broadcasting
di Sédi Mundial di Tistimunhas di Jeová.

JW Broadcasting — Novenbru di 2026